1.

JIRRIKONOXXI li tifqigħat ta’ mard ġdid li jittieħed bħal COVID-19 huma theddidiet potenzjalment globali għas-saħħa pubblika, b’mod partikolari minħabba l-volumi kbar u l-frekwenza tal-ivvjaġġar internazzjonali f’dinja globalizzata;

2.

JINNOTA li l-każijiet ikkonfermati ta’ COVID-19 huma kkawżati minn virus li jista’ jiġi trażmess minn bniedem għal ieħor;

3.

JIEĦU NOTA tal-Pjan Strateġiku ta’ Tħejjija u Rispons dwar 2019-nCoV maħruġ mid-WHO fit-3 ta’ Frar 2020 (2), li għandu l-għan li jwaqqaf it-trażmissjoni ulterjuri tal-virus 2019-nCoV fiċ-Ċina u f’pajjiżi oħra, u li jtaffi l-impatt tat-tifqigħa fil-pajjiżi kollha u li jappella għall-mobilizzazzjoni ta’ finanzjament b’appoġġ għall-istabbiliment ta’ koordinazzjoni u appoġġ internazzjonali għall-operazzjonijiet, l-intensifikazzjoni tal-isforzi ta’ tħejjija u rispons tal-pajjiżi u l-aċċellerazzjoni tar-riċerka u l-innovazzjoni ta’ prijorità;

4.

JESPRIMI s-solidarjetà tiegħu mal-persuni li ġew infettati madwar id-dinja kollha u mal-pajjiżi l-aktar milqutin, b’mod partikolari ċ-Ċina, u JIDDIKJARA li huwa lest biex, flimkien mal-Kummissjoni u f’kooperazzjoni mad-WHO u mal-awtoritajiet ta’ dawn il-pajjiżi terzi, jeżamina l-modi u l-mezzi possibbli biex tingħata assistenza fil-ġlieda kontra din it-tifqigħa;

5.

IFAKKAR li l-UE u l-Istati Membri tagħha jikkoordinaw u jikkooperaw mill-qrib fil-qasam tas-sigurtà tas-saħħa, billi jimplimentaw miżuri ta’ ippjanar u ta’ rispons u ppjanar tal-istat ta’ tħejjija, kif ukoll billi jindirizzaw attivitajiet li jikkonċernaw l-ippjanar tal-kontinwità tal-operat, f’konformità mad-Deċiżjoni Nru 1082/2013/UE dwar theddid transkonfinali serju għas-saħħa (3), u d-Deċiżjoni Nru 1313/2013/UE dwar Mekkaniżmu tal-Unjoni għall-Protezzjoni Ċivili (UCPM) fil-qasam tal-emerġenzi tas-saħħa (4);

6.

JISSOTTOLINJA l-importanza tal-azzjonijiet rapidi li ttieħdu flimkien mal-Kummissjoni, fil-qafas tar-Regolamenti Internazzjonali tas-Saħħa (IHR) tad-WHO, permezz tal-koordinazzjoni ta’ miżuri ta’ rispons inkluż it-traċċar tal-kuntatti u l-komunikazzjoni tar-riskju, u permezz tal-kondiviżjoni tal-informazzjoni dwar miżuri nazzjonali ta’ prevenzjoni u tħejjija fi ħdan l-HSC u s-Sistema ta’ Twissija Bikrija u ta’ Reazzjoni (EWRS), sabiex tiġi protetta s-saħħa pubblika;

7.

JILQA’ r-Riżoluzzjoni dwar it-Tisħiħ tat-Tħejjija għall-Emerġenzi tas-Saħħa; l-Implimentazzjoni tar-Regolamenti Internazzjonali tas-Saħħa (IHR, 2005), li ġiet adottata mill-Bord Eżekuttiv tad-WHO fit-8 ta’ Frar 2020 (5);

8.

JILQA’ WKOLL il-ħidma li għaddejja bħalissa fid-WHO, il-Kummissjoni, l-ECDC u l-HSC, b’mod partikolari fuq il-linji gwida dwar definizzjoni komuni tal-każijiet, dwar maniġġar komuni tal-każijiet, u dwar informazzjoni lill-vjaġġaturi;

9.

JENFASIZZA l-importanza tal-ħidma tal-ECDC fuq gwida teknika rigward l-analiżi, il-valutazzjoni tar-riskju u t-trattament tal-persuni infettati u l-kuntatti tagħhom, kif ukoll fuq il-protezzjoni tal-professjonisti fil-kura medika involuti, kif ukoll il-ħidma tal-Aġenzija Ewropea għall-Mediċini (EMA) fuq it-trattamenti, it-tilqim u r-riċerka, il-ħidma tal-Aġenzija tas-Sikurezza tal-Avjazzjoni tal-Unjoni Ewropea (EASA) fuq kwistjonijiet relatati mal-protezzjoni tas-saħħa pubblika b’rabta mal-ivvjaġġar bl-ajru, u l-ħidma ta’ aġenziji rilevanti oħrajn tal-UE;

10.

JILQA’ l-attivazzjoni rapida tal-Arranġamenti Integrati tal-UE għal Rispons Politiku f’Sitwazzjonijiet ta’ Kriżi (IPCR) (6) fil-modalità ta’ kondiviżjoni tal-informazzjoni, u tal-Mekkaniżmu tal-Unjoni għall-Protezzjoni Ċivili (7), kif ukoll it-tisħiħ tal-assistenza konsulari b’rispons għat-tifqigħa ta’ COVID-19;

11.

JIRRIKONOXXI li l-effettività tal-miżuri nazzjonali meħuda fil-fruntieri u l-punti ta’ dħul tal-UE għall-protezzjoni tas-saħħa pubblika, inkluż il-miżuri li diġà ttieħdu mill-Istati Membri fil-kuntest tat-tifqigħa ta’ COVID-19, tista’ tissaħħaħ aktar bit-tisħiħ tal-koordinazzjoni li diġà għaddejja bejn l-Istati Membri u l-Kummissjoni, fil-qafas tar-rakkomandazzjonijiet tad-WHO;

12.

JIRRIKONOXXI li r-rispons għal theddid transkonfinali serju għas-saħħa jeħtieġ azzjoni kkoordinata bejn settur u ieħor fil-livelli nazzjonali, tal-UE u dak internazzjonali u jilqa’ l-appoġġ tal-Kummissjoni, is-Servizz Ewropew għall-Azzjoni Esterna (SEAE) u l-aġenziji rilevanti kollha tal-UE għal dak l-għan;

13.

JENFASIZZA l-importanza li jissaħħaħ ir-rwol tad-WHO fil-maniġġar tat-tifqigħa, abbażi, fost l-oħrajn, tal-kontribut ikkoordinat tal-UE, b’mod partikolari biex jiġu żgurati skambji ta’ data epidemjoloġika f’ħin reali;

14.

JISSOTTOLINJA l-ħtieġa li jiġi żviluppat approċċ ikkoordinat mad-WHO, inkluż l-esplorazzjoni ta’ possibbiltajiet ta’ finanzjament volontarju, biex jingħata appoġġ lill-pajjiżi b’sistemi tas-saħħa aktar dgħajfa, f’konformità mal-prinċipju ta’ solidarjetà globali;

15.

IĦEĠĠEĠ lill-Istati Membri biex jaġixxu flimkien, f’kooperazzjoni mal-Kummissjoni, b’mod proporzjonat u xieraq skont ir-rakkomandazzjonijiet tad-WHO u l-parir tal-ECDC, fuq il-linji li ġejjin:

16.

JAPPELLA lill-Kummissjoni biex: