IL-KUMMISSJONI EWROPEA

Brussell, 10.3.2020

COM(2020) 94 final

KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

Pjan ta’ azzjoni fit-tul għal implimentazzjoni u infurzar aħjar tar-regoli tas-suq uniku

Daħla

Is-suq uniku huwa wieħed mill-ikbar kisbiet tal-UE. Huwa jinsab fil-qalba tal-proġett Ewropew u wassal għal tkabbir ekonomiku fid-deċennji li għaddew u ħaffef il-ħajja tal-konsumaturi u tan-negozji Ewropej. L-UE hija responsabbli għal 18 % mill-output ekonomiku globali — l-Istati Uniti biss jgħadduha f’dan. Bis-saħħa ta’ suq uniku li jaħdem tajjeb, iċ-ċittadini tal-UE jkunu jistgħu jgawdu minn għażla ikbar ta’ servizzi u prodotti u minn opportunitajiet aħjar tax-xogħol. Is-suq uniku jagħti lill-operaturi ekonomiċi tal-UE suq domestiku kbir, jistimula l-kummerċ u l-kompetizzjoni, u jtejjeb l-effiċjenza. Dan huwa importanti ħafna biex jinkisbu t-trasformazzjonijiet ekoloġiċi u diġitali fl-UE u jservi ta’ pjattaforma biex wieħed jikkompeti fuq livell globali.

L-istrateġija industrijali l-ġdida għall-Ewropa li ġiet adottata llum 1 tpoġġi lis-suq uniku fil-qalba tagħha bħala wieħed mill-elementi ewlenin tat-trasformazzjoni industrijali tal-Ewropa. Biex is-suq uniku jkun jaħdem tajjeb għalina lkoll, il-liġijiet tal-UE jimplimentaw regoli komuni biex jitneħħew l-ostakli u biex il-prodotti u s-servizzi jkunu jistgħu jiċċirkolaw b’mod iktar faċli fl-UE, filwaqt li jitħarsu l-konsumaturi.

Dawn ir-regoli jistgħu jwasslu l-effetti mixtieqa biss jekk jitfasslu tajjeb u jekk jiġu infurzati kif suppost. Madankollu, hemm nuqqas ta’ konformità mar-regoli tas-suq uniku. Il-Komunikazzjoni dwar l-ostakli għas-suq uniku turi l-ħafna ostakli li għad hemm 2 , li ħafna drabi jkunu ġejjin mill-applikazzjoni ħażina ta’ leġiżlazzjoni tal-UE li jkun diġà ntlaħaq qbil dwarha jew mill-applikazzjoni mhux kompluta tagħha fil-livell nazzjonali. L-operaturi tas-suq u l-investituri għadhom iħabbtu wiċċhom ma’ ħafna ostakli regolatorji u amministrattivi marbutin mad-drittijiet tal-moviment liberu tagħhom u l-Ewropej huma esposti għal prodotti u servizzi illeċiti jew perikolużi minħabba nuqqas ta’ sorveljanza prattika, ta’ spezzjoni, ta’ detezzjoni u ta’ sanzjonar tal-operaturi ekonomiċi meta dawn jiksru r-regoli tas-suq uniku.

Tul iċ-ċiklu kollu tal-ħajja regolatorja, l-Istati Membri u l-Kummissjoni jaqsmu r-responsabbiltà li jiżguraw li jkun hemm konformità mar-regoli tas-suq uniku u li jiġu infurzati d-drittijiet taċ-ċittadini.

L-Istati Membri huma obbligati japplikaw tajjeb dak li jkunu qablu dwaru bħala leġiżlaturi Ewropej. Huma għandhom ukoll ir-responsabbiltà li jiżguraw li jiġu nnutati l-każijiet ta’ ksur tar-regoli tas-suq uniku li jkun hemm fit-territorju tagħhom u li jsolvuhom. Bħala l-gwardjan tat-Trattati, il-Kummissjoni għandha r-responsabbiltà toqgħod attenta li l-Istati Membri kollha jimplimentaw ir-regoli tas-suq uniku u jikkonformaw magħhom, u li jieħdu azzjoni deċiżiva permezz ta’ proċeduri ta’ ksur jekk ma jitħarsux ir-regoli.

F’Marzu tal-2019, il-Kunsill Ewropew stieden lill-Kummissjoni tiżviluppa pjan ta’ azzjoni fit-tul għal implimentazzjoni u infurzar aħjar tar-regoli tas-suq uniku, f’koordinazzjoni mill-qrib mal-Istati Membri. Minn dak iż-żmien ’l hawn, l-Istati Membri tennew l-impenn tagħhom favur infurzar aktar b’saħħtu 3 . Il-Kummissjoni tilqa’ t-talba tal-Kunsill Ewropew u, l-istess bħall-Istati Membri, hija tal-fehma li jeħtieġ li jitjiebu b’mod sostanzjali l-implimentazzjoni tar-regoli tas-suq uniku u l-konformità magħhom.

Abbażi ta’ sħubija mġedda bejn l-Istati Membri u l-Kummissjoni, u filwaqt li jitqiesu s-sejbiet ippreżentati fil-Komunikazzjoni tal-lum dwar l-ostakli għas-suq uniku, dan il-Pjan ta’ Azzjoni jippreżenta firxa ta’ azzjonijiet bil-għan li jiżdiedu kemm jista’ jkun l-effettività u l-effiċjenza tal-konformità u tal-infurzar fl-UE kollha.

L-isfidi attwali marbutin mal-infurzar

Il-kummerċ fis-suq uniku jirrappreżenta 56 miljun impjieg Ewropew 4 u huwa stmat li jwassal għal benefiċċji ekonomiċi ta’ bejn 8 u 9 % mill-PDG tal-UE 5 . Huwa stmat li jekk ikompli jittejjeb is-suq uniku għall-prodotti mmanifatturati, dan jista’ jiġġenera bejn EUR 183 biljun u EUR 269 biljun fis-sena, filwaqt li jekk jiġu integrati aktar is-swieq tas-servizzi dan jista’ jwassal għal qligħ ta’ EUR 297 biljun fis-sena 6 . Dawn iż-żidiet waħedhom jistgħu jżidu l-benefiċċji ekonomiċi minn bejn 8 u 9 % għal madwar 12 % tal-PDG addizzjonali.

Xi drabi donnu l-Istati Membri jiksru r-regoli miftiehma dwar is-suq uniku jew joħolqu u jittolleraw ostakli fil-liġijiet nazzjonali bil-għan li joħolqu protezzjoni addizzjonali fis-suq tagħhom u li jiksbu vantaġġi għan-negozji nazzjonali. Il-benefiċċji li jaf ikun hemm ħafna drabi jkunu għal perjodu qasir ħafna, iżda l-impatt fuq in-negozji Ewropej jista’ jwassal għal ħafna iktar ħsara, u dan jagħmilha ħafna iktar diffiċli li wieħed jibni fuq kundizzjonijiet ekwi ġenwini u joħloq mexxejja globali, u b’hekk jgħawweġ is-sitwazzjoni ta’ kundizzjonijiet ekwi minn ġewwa. Dan jolqot b’mod sproporzjonat lill-SMEs u lin-negozji l-ġodda. Il-kumpaniji li huma ikbar għandhom il-mezzi biex jikkonformaw ma’ settijiet differenti ta’ regoli, iżda l-SMEs huma l-ewwel li jiġu ppenalizzati bil-piżijiet amministrattivi u bil-kumplessità, speċjalment meta jaqsmu l-fruntieri biex iwettqu l-attivitajiet tan-negozju tagħhom fis-suq uniku. Huwa għalhekk li s-suq uniku u l-implimentazzjoni u l-infurzar kif suppost tiegħu huma fundamentali għall-Istrateġija għall-SMEs 7 li wkoll ġiet adottata llum.

L-implimentazzjoni ħażina jew insuffiċjenti u n-nuqqas ta’ infurzar iwasslu għal ħsara kemm fil-livell Ewropew kif ukoll f’dak nazzjonali. Fil-fatt, iċ-ċittadini u n-negozji ma jkunux jistgħu jibbenefikaw bis-sħiħ mid-drittijiet tal-moviment liberu tagħhom, in-negozji ma jkunux jistgħu joħolqu l-ekonomiji tal-iskala li s-suq uniku jista’ joffri, il-konsumaturi jispiċċaw f’riskju minħabba prodotti mhux konformi jew ikollhom inqas għażla, is-sigurtà tal-provvista tal-enerġija titqiegħed f’periklu, u jkun iktar diffiċli li jintlaħqu l-għanijiet ambjentali u klimatiċi tal-UE. In-negozji li jħarsu l-liġijiet jitilfu sehem mis-suq minħabba kompetizzjoni inġusta minn negozji li ma jsegwux ir-regoli u li joffru prodotti li ma jkunux konformi jew li jinjoraw ir-regoli dwar il-protezzjoni soċjali.

Ħidma konġunta bejn l-Istati Membri u l-Kummissjoni

L-ewwel nett, biex jiġu infurzati r-regoli tas-suq uniku, dawn iridu jiġu applikati kif suppost f’kull Stat Membru u minn kull awtorità pubblika Ewropea, u jrid ikun hemm sanzjonijiet fil-każ ta’ ksur, fosthom permezz ta’ proċeduri ta’ ksur meta jkun hemm bżonn. L-operaturi ekonomiċi jridu wkoll jiġu ssorveljati u spezzjonati u jingħataw sanzjonijiet, u l-prodotti illegali tagħhom iridu jitneħħew mis-suq, kemm jekk ikunu perikolużi, kemm jekk ikunu ffalsifikati u kemm jekk dawn ma jkunux konformi mar-regolamenti ambjentali jew tal-effiċjenza enerġetika jew ma’ regoli oħrajn.

Iżda jekk irridu niksbu l-benefiċċji tas-suq uniku, jeħtieġ li jkun hemm infurzar usa’ li jkun ikopri t-tul ta’ ħajja kollu tar-regoli rilevanti, mill-ħolqien tagħhom sal-applikazzjoni tagħhom. Dan jeħtieġ kollaborazzjoni fil-livelli kollha ta’ governanza tal-UE, mill-awtoritajiet u l-qrati lokali u reġjonali sal-livell Ewropew. Jeħtieġ ukoll li l-infurzar jitqies bħala eżerċizzju kontinwu li jibda mit-tfassil tar-regoli sat-traspożizzjoni tagħhom mill-Istati Membri, meta dan ikun applikabbli, u sal-applikazzjoni tagħhom u s-sanzjonar jekk ma jitħarsux. Huwa importanti ferm li l-Istati Membri u l-Kummissjoni jappoġġaw lil xulxin fir-rwoli rispettivi tagħhom biex jerfgħu r-responsabbiltà kondiviża tagħhom.

Il-miżuri ta’ prevenzjoni huma mezz importanti biex tiġi evitata l-ħtieġa għal azzjoni ta’ rimedju fi stadji iktar tard. F’każijiet fejn ma kienx possibbli li tiġi żgurata l-konformità mar-regoli tas-suq uniku minn qabel, iċ-ċittadini u n-negozji jaf isibu ruħhom iħabbtu wiċċhom ma’ ostakli regolatorji jew amministrattivi u b’hekk jistennew li dawn jitneħħew b’intervent ex post effettiv. Jeħtieġ li l-awtoritajiet tal-infurzar ikunu jiffunzjonaw tajjeb, li l-proċeduri u l-monitoraġġ ikunu adattati għall-iskop tagħhom, u li l-atturi fuq il-post bħall-uffiċjali pubbliċi u l-imħallfin jifhmu l-liġijiet tal-UE u jkunu jistgħu japplikawhom fl-attivitajiet tagħhom ta’ kuljum.

L-Istati Membri jridu jiżguraw li jkun hemm il-konformità mal-liġijiet tas-suq uniku biex jitħarsu d-drittijiet tal-individwi u tan-negozji. Dan irid jibda fl-istadju tat-tfassil tal-leġiżlazzjoni nazzjonali u għandu jkompli sad-deċiżjonijiet ġudizzjarji jew amministrattivi individwali. Il-Kummissjoni għandha l-kompitu li tappoġġa lill-Istati Membri fil-prevenzjoni tal-ħolqien ta’ ostakli ġodda għas-suq uniku, fit-traspożizzjoni tal-liġijiet tal-UE u fl-applikazzjoni tagħhom u fl-għoti ta’ bidu għal azzjoni ta’ rimedju meta jkun hemm bżonn.

Biex jingħelbu l-ostakli eżistenti tas-suq uniku, se jkun essenzjali li jkun hemm sħubija reali bejn l-atturi differenti responsabbli għall-implimentazzjoni u għall-infurzar fil-livell Ewropew u f’dak tal-Istati Membri. Dan se jgħin biex l-azzjonijiet ta’ infurzar immirati jingħataw direzzjoni u biex tittejjeb il-konformità mal-liġijiet tas-suq uniku.

Sabiex tissaħħaħ il-kooperazzjoni b’rabta mal-infurzar tar-regoli tas-suq uniku, se titwaqqaf Task Force konġunta għall-Infurzar fis-Suq Uniku (SMET), li se tkun magħmula mill-Istati Membri u mill-Kummissjoni. Is-SMET se tiltaqa’ b’mod regolari biex tivvaluta l-istat ta’ konformità tal-liġijiet nazzjonali mar-regoli tas-suq uniku, biex tagħti prijorità lill-iktar ostakli pressanti, biex tindirizza l-“gold-plating” mhux iġġustifikat, biex tiddiskuti kwistjonijiet ta’ infurzar orizzontali u biex issegwi l-implimentazzjoni ta’ dan il-Pjan ta’ Azzjoni. Is-SMET se tgħarraf b’mod regolari lill-Kunsill tal-Kompetittività u lill-Kumitat għas-Suq Intern u l-Ħarsien tal-Konsumatur tal-Parlament Ewropew dwar il-progress li jkun qed isir.

Is-SMET se tikkomplementa netwerk ta’ kooperazzjoni li għandu jinħoloq bejn il-koordinaturi nazzjonali tal-infurzar billi jintuża l-qafas eżistenti tal-Kumitat Konsultattiv dwar is-Suq Intern (l-IMAC). Dan il-format se jippermetti l-iskambju tal-informazzjoni u tal-aħjar prattiki bejn il-Kummissjoni u l-Istati Membri dwar kif l-amministrazzjonijiet nazzjonali janalizzaw u jsegwu l-każijiet importanti fil-livelli nazzjonali, reġjonali u lokali. Se jiġu eżaminati wkoll possibbiltajiet oħrajn biex jitjiebu l-koordinazzjoni u l-komunikazzjoni fost l-awtoritajiet tal-Istati Membri li huma responsabbli għas-sorveljanza tas-suq uniku b’rabta ma’ kwistjonijiet speċifiċi tal-infurzar.

Sabiex l-implimentazzjoni tirnexxi u tibqa’ għaddejja bl-istess ritmu, it-Tabella ta’ Valutazzjoni tas-Suq Uniku se tkun għodda utli għall-Istati Membri u għall-Kummissjoni biex jimmonitorjaw il-prestazzjoni fl-applikazzjoni tar-regoli tas-suq uniku. Il-Kummissjoni se taġġorna t-Tabella ta’ Valutazzjoni tas-Suq Uniku biex din tkun tirrifletti aħjar is-sitwazzjoni tal-utenti aħħarin fis-suq uniku u biex din tappoġġa s-Semestru Ewropew. L-użu ta’ indikaturi addizzjonali se jgħin biex jiġi vvalutat jekk is-suq uniku hux qed jaħdem kif suppost fl-oqsma li fihom mistenni joffri l-ikbar riżultati, bħal dawk tal-prodotti jew tas-servizzi, is-swieq finanzjarji jew diġitali, l-industriji li jużaw netwerk bħall-industrija tal-enerġija, iżda wkoll l-ekonomija tad-data u l-ekonomija ċirkolari. Għal dan il-għan, wara li tikkonsulta lill-Istati Membri, il-Kummissjoni se tipproponi l-użu ta’ indikaturi addizzjonali ambizzjużi, fosthom indikaturi dwar il-prestazzjoni tal-Istati Membri f’dawk l-oqsma.

Pjan ta’ Azzjoni għal implimentazzjoni u infurzar aħjar tar-regoli tas-suq uniku

I    Żieda fl-għarfien u fil-kuxjenza dwar ir-regoli tas-suq uniku

L-awtoritajiet nazzjonali u l-operaturi ekonomiċi, b’mod speċjali l-SMEs, ħafna drabi ma jkunux jafu bl-opportunaitajiet u bil-benefiċċji li jkunu ġejjin mil-leġiżlazzjoni dwar is-suq uniku. Barra minn hekk, jaf isibuha diffiċli jifhmu kompletament l-obbligi li jkollhom li jkunu ġejjin mil-liġijiet tal-UE, u dan iwassal għal problemi marbutin mal-konformità u mal-infurzar. L-għan tal-azzjonijiet proposti huwa li jżidu l-għarfien u l-kuxjenza dwar ir-regoli tas-suq uniku fost l-awtoritajiet u l-qrati nazzjonali li japplikawhom f’xogħolhom ta’ kuljum, kif ukoll fost iċ-ċittadini u n-negozji.

üL-AZZJONI NRU 1: Programm biex l-awtoritajiet nazzjonali jingħataw għodod iktar speċifiċi ta’ gwida:

Biex titjieb il-konformità u tiġi evitata s-segmentazzjoni tas-suq, il-Kummissjoni se tagħti iktar gwida lill-Istati Membri u lin-negozji u se tipprovdi għodod biex ikun hemm koordinazzjoni aħjar f’ċerti oqsma, fosthom billi tagħmel l-affarijiet li ġejjin:

obilli tidentifika l-oqsma li jistgħu joħolqu riskji ta’ traspożizzjoni u ta’ applikazzjoni, meta jkunu qed isiru n-negozjati leġiżlattivi, u billi tqis il-fatt li toħroġ gwida meta dan ikun xieraq. Dan diġà kien il-każ fil-każ tar-regoli għas-settur awdjoviżiv 8 u tar-regoli dwar id-drittijiet tal-awtur 9 li ġew adottati dan l-aħħar;

obilli toħroġ gwida dwar l-istrumenti leġiżlattivi fil-qasam diġitali (regoli riveduti dwar it-telekomunikazzjoni, iċ-ċibersigurtà, id-drittijiet tal-awtur u l-media awdjoviżiva);

obilli taġġorna l-Manwal dwar l-implimentazzjoni tad-direttiva dwar is-servizzi 10 , li jkopri l-każistika riċenti marbuta ma’ elementi ewlenin tad-Direttiva dwar is-Servizzi, u billi tagħti gwida dwar il-kwistjonijiet legali li jqumu, pereżempju, minħabba li jinħolqu mudelli ġodda tan-negozju u modi ġodda ta’ kif jiġu pprovduti s-servizzi;

obilli tistabbilixxi punt ċentrali ta’ informazzjoni dwar kwistjonijiet prattiċi li l-impjegati taċ-ċivil fl-Istati Membri jiltaqgħu magħhom fix-xogħol tagħhom ta’ kuljum huma u japplikaw il-liġijiet tas-suq uniku. Dan se jiġi organizzat f’kooperazzjoni mal-Istati Membri u fih se jiġu integrati, b’mod gradwali u fuq bażi volontarja, l-arranġamenti nazzjonali speċifiċi li jkunu ġew stabbiliti biex jiġu implimentati l-liġijiet tal-UE;

obilli taġġorna l-Gwida dwar l-applikazzjoni tal-Artikoli 34-36 tat-TFUE 11 ;

obilli toħroġ Gwida dwar l-aspetti strateġiċi tal-akkwist pubbliku (jiġifieri l-aspetti soċjali, tal-innovazzjoni u ekoloġiċi) u dwar aspetti oħrajn marbutin miegħu (jiġifieri l-aspett tal-kollużjoni), u billi tipproponi Rakkomandazzjoni dwar is-sistemi ta’ rieżami;

obilli toħroġ Gwida dwar il-prinċipju tar-rikonoxximent reċiproku 12 ;

obilli toħroġ Gwida dwar id-Direttiva dwar ir-Responsabbiltà għall-Prodotti 13 ;

obilli toħroġ Dokument ta’ gwida dwar l-Artikolu 4 tar-Regolament dwar is-Sorveljanza tas-Suq 14 ;

obilli taġġorna l-“Gwida l-Blu” dwar l-implimentazzjoni tar-regoli armonizzati tal-prodotti tal-UE 15 ;

obilli tippubblika rakkomandazzjonijiet aġġornati ta’ riforma għar-regolamentazzjoni tas-servizzi professjonali abbażi tal-Komunikazzjoni tal-Kummissjoni tas-17 ta’ Jannar 2017 16 . Dawn jissejsu fuq indikatur tar-restrittività li jintuża għall-valutazzjoni u għall-analiżi komparattiva tar-rekwiżiti nazzjonali fil-qasam tas-servizzi professjonali biex jitqiesu l-bidliet il-ġodda fl-oqfsa regolatorji tal-Istati Membri u biex tingħata spinta biex ikun hemm iktar riformi. Dawn ir-riformi jista’ jkollhom effetti pożittivi fuq il-mobbiltà tal-ħaddiema u jistgħu jnaqqsu n-nuqqas ta’ ħiliet u l-ispariġġ fil-ħiliet, b’mod partikulari fil-kuntest tat-tranżizzjoni ekoloġika u ta’ dik diġitali;

obilli tappoġġa lill-Istati Membri fit-traspożizzjoni tal-Att Ewropew dwar l-Aċċessibbiltà 17 , li mistenni jżid id-disponibbiltà tal-prodotti u tas-servizzi aċċessibbli fis-suq;

obilli tistabbilixxi pjattaformi għall-iskambju mal-Istati Membri, bħall-pjattaforma li tintuża għad-Direttivi dwar l-Akkwist Pubbliku, biex ikun hemm skambji ddettaljati tal-informazzjoni bejn il-Kummissjoni u l-awtoritajiet tal-Istati Membri dwar kwistjonijiet speċifiċi.

üL-AZZJONI NRU 2: It-titjib tal-aċċess tal-utenti għall-informazzjoni dwar ir-regoli u r-rekwiżiti

Sabiex jiżdied l-għarfien dwar ir-regoli applikabbli u dwar l-obbligi tan-negozji u biex jonqsu l-każijiet ta’ nuqqas ta’ konformità u ta’ nuqqas ta’ ħarsien tar-regoli, il-gateway diġitali unika 18 se tipprovdi aċċess għal informazzjoni komprensiva dwar ir-regoli tas-suq uniku u l-proċeduri amministrattivi marbutin miegħu u se tidderieġi lill-utenti wkoll għall-iktar servizzi ta’ assistenza rilevanti.

Il-punti ta’ kuntatt tal-UE għall-prodotti, li nħolqu permezz tal-Pakkett riċenti dwar il-Merkanzija 19 , se jipprovdu informazzjoni aħjar u iktar malajr lin-negozji dwar ir-regoli li japplikaw għall-prodotti tagħhom.

üL-AZZJONI NRU 3: Pjattaformi online li jiffaċilitaw il-konformità tal-prodotti

Dawk li jbiegħu l-prodotti fuq il-pjattaformi tal-kummerċ elettroniku jridu jkunu konxji mir-regoli tal-UE dwar il-prodotti u jiżguraw li ma jitqegħdux prodotti illegali u mhux sikuri fis-suq tal-UE. Il-miżuri li jista’ jkun hemm biex titjieb il-konformità tal-prodotti li jinbiegħu permezz tal-pjattaformi online se jiġu analizzati bħala parti mill-Att dwar is-Servizzi Diġitali. Waqt ir-reviżjoni tad-Direttiva dwar is-sigurtà ġenerali tal-prodotti 20 se jiġu eżaminati wkoll l-isfidi marbutin mas-sikurezza tal-prodotti fil-bejgħ online u fil-katina globali tal-provvista online.

üL-AZZJONI NRU 4: It-taħriġ tal-imħallfin u tal-ġuristi nazzjonali u l-iskambju tal-prattiki għalihom

Iċ-ċittadini u n-negozji tal-UE jiddependu fuq il-qrati nazzjonali għall-protezzjoni tad-drittijiet tagħhom fis-suq uniku. Għalhekk jeħtieġ li l-imħallfin nazzjonali jkunu mħarrġin sew fil-liġijiet tal-UE. Se jiżdiedu l-programmi tat-taħriġ u s-seminars għall-imħallfin u għall-ġuristi l-oħrajn li huma inkarigati jinfurzaw il-leġiżlazzjoni dwar is-suq uniku biex jiżdied l-għarfien dwarha u biex din tinftiehem aħjar. It-taħriġ u s-seminars se jiġu offruti bħala parti mill-offerta tat-taħriġ nazzjonali, iżda wkoll fil-forma ta’ taħriġ fil-livell tal-UE, fosthom fil-kuntest tar-reviżjoni li se jkun hemm tal-Istrateġija Ewropea għat-Taħriġ Ġudizzjarju.

üL-AZZJONI NRU 5: Il-bini tal-kapaċitajiet tal-amministrazzjonijiet pubbliċi nazzjonali

Fuq talba tal-Istati Membri, se jkun hemm programmi apposta li jipprovdu inċentivi finanzjarji u appoġġ tekniku biex jitjiebu kemm jista’ jkun il-kapaċitajiet ta’ implimentazzjoni u ta’ infurzar tal-amministrazzjonijiet pubbliċi, bħall-Programm għas-suq uniku li ġie propost fil-kuntest tal-Qafas Finanzjarju Pluriennali għall-2021 sal-2027.

L-aċċess għall-Programm għas-suq uniku se jissejjes fuq indikaturi komparattivi biex jiġi segwit it-titjib tal-infurzar li jkun hemm fil-prattika, bħas-setturi spezzjonati, l-għadd ta’ spetturi u l-għadd ta’ prodotti li jitneħħew mis-suq. Imbagħad, il-prestazzjoni tal-Istati Membri u l-ħtiġijiet tagħhom li jkunu ġew identifikati se jintrabtu mal-allokazzjoni tal-bini addizzjonali tal-kapaċitajiet, ta’ iktar taħriġ, ta’ iktar skambji, eċċ. F’dan il-kuntest, se jiġu eżaminati wkoll possibbiltajiet oħrajn biex jiġi ffaċilitat l-użu tal-mekkaniżmi nazzjonali ta’ rimedju min-naħa tan-negozji u taċ-ċittadini, u biex dan jissaħħaħ.

Fil-kuntest tal-Programm propost ta’ Appoġġ għal Riformi, l-awtoritajiet pubbliċi jistgħu jitolbu appoġġ tekniku marbut mal-ħtiġijiet ta’ riforma li l-Istati Membri jkunu identifikaw f’konformità mas-Semestru Ewropew, mal-prijoritajiet tal-Unjoni u maċ-ċiklu ta’ governanza ekonomika tal-Unjoni.

Barra minn hekk, ir-raba’ aġġornament tal-Pjan ta’ Azzjoni għall-Akkwist Pubbliku għall-2020 21 jinkludi serje ta’ inizjattivi ġodda biex l-amministraturi u l-benefiċjarji tal-fondi tal-UE jiġu megħjuna jtejbu l-prattiki tal-akkwist pubbliku tagħhom, biex jiġu żgurati kundizzjonijiet ekwi u biex l-akkwist pubbliku jintuża bħala għodda strateġika biex jintlaħqu l-objettivi ewlenin tal-politika.

üL-AZZJONI NRU 6: Il-bini tal-kapaċitajiet tal-professjonisti tal-akkwist pubbliku u t-tisħiħ tal-kooperazzjoni bejn il-korpi nazzjonali

Bi sħubija mal-Istati Membri, il-Kummissjoni se tiżviluppa għodod prattiċi biex jitjiebu l-ħiliet tal-uffiċjali li jkunu involuti fl-akkwist pubbliku, se tlaqqa’ lix-xerrejja pubbliċi biex tippromwovi l-qsim tal-għarfien espert, se tiffaċilita t-taħriġ u se toffri inċentivi favur l-akkwist konġunt f’konformità mad-domanda taċ-ċittadini għal akkwist pubbliku iktar ekoloġiku, soċjalment responsabbli u innovattiv.

Il-Kummissjoni se tippromwovi wkoll il-kooperazzjoni u l-iskambju tal-prattiki permezz tan-Netwerk tal-Korpi ta’ Rieżami tal-Prim’Istanza dwar l-Akkwist Pubbliku.

II    Titjib tat-traspożizzjoni tar-regoli tal-UE u tal-implimentazzjoni u tal-applikazzjoni tagħhom

It-traspożizzjoni, l-implimentazzjoni u l-applikazzjoni ħażina tar-regoli tal-UE xxekkel il-funzjonament tajjeb tas-suq uniku.

üL-AZZJONI NRU 7: Djalogu strutturat għal traspożizzjoni aħjar tad-Direttivi dwar is-suq uniku

Sabiex titjieb it-traspożizzjoni f’waqtha u korretta tad-Direttivi, matul il-perjodu ta’ traspożizzjoni se jiġi stabbilit djalogu strutturat bejn l-Istati Membri u l-Kummissjoni. Dan id-djalogu strutturat qabel ma l-Istati Membri jadottaw il-liġijiet tagħhom se jissimplifika l-verifiki tal-konformità. L-użu ta’ “tabelli ta’ konkordanza virtwali dinamiċi” 22 jista’ jappoġġa l-proċess tat-traspożizzjoni, billi bihom jista’ jinżamm rendikont tal-liġijiet nazzjonali, inkluż tal-emendi jew tat-tħassir sussegwenti tagħhom. Wara li jadottaw il-liġijiet nazzjonali, l-Istati Membri għandhom jibagħtu lill-Kummissjoni spjegazzjoni ċara u preċiża dwar liema dispożizzjonijiet nazzjonali jittrasponu l-obbligi korrispondenti tad-Direttivi 23 . F’dan il-kuntest se tingħata attenzjoni partikulari lill-kwistjonijiet tal-“gold-plating” mhux iġġustifikat.

üL-AZZJONI NRU 8: Sħubija għall-implimentazzjoni tar-Regolamenti dwar is-suq uniku

Sabiex tittejjeb l-implimentazzjoni tad-dispożizzjonijiet tar-Regolamenti dwar is-suq uniku li jkunu jeħtieġu azzjoni min-naħa tal-Istati Membri (bħat-twaqqif ta’ strutturi jew l-iżvilupp ta’ proċeduri) qabel ma dawn jibdew jiġu applikati, se jiġu organizzati laqgħat speċifiċi bejn il-Kummissjoni u l-Istati Membri hekk kif jintlaħaq ftehim politiku dwar ir-Regolament. Se jitwettqu sessjonijiet ta’ ħidma dwar l-implimentazzjoni biex jgħinu lill-Istati Membri jimplimentaw it-tali dispożizzjonijiet, li jkunu meħtieġa skont ir-Regolamenti, ferm qabel id-dħul fis-seħħ tagħhom 24 .

III    Nużaw bl-aqwa mod il-mekkaniżmi ta’ prevenzjoni

Il-prevenzjoni ta’ miżuri nazzjonali li jmorru kontra l-liġijiet tal-UE fl-Istati Membri se tgħin biex jiġu żgurati kundizzjonijiet ekwi għaċ-ċittadini u għan-negozji fis-suq uniku u se tevita l-proċedimenti twal ta’ ksur. Pereżempju, il-fatt li nużaw l-għodod ta’ notifika li jeżistu għat-tali miżuri bl-aqwa mod possibbli se jipprowmovi l-konformità mar-regoli tal-UE.

üL-AZZJONI NRU 9: It-titjib tal-valutazzjonijiet ex ante tar-regolamentazzjoni restrittiva fil-kuntest tad-Direttiva dwar it-Test tal-Proporzjonalità

Sabiex jiġi evitat il-ħolqien ta’ restrizzjonijiet ġodda fir-regolamentazzjoni nazzjonali, il-Kummissjoni se tgħin lill-Istati Membri u tipprovdilhom gwida u se tiffaċilita l-iskambju tal-aħjar prattiki bejniethom dwar il-valutazzjonijiet ex ante tal-proporzjonalità abbażi tad-Direttiva dwar it-Test tal-Proporzjonalità 25 , li tobbliga lill-Istati Membri jivvalutaw bir-reqqa l-proporzjonalità tar-regolamentazzjoni nazzjonali l-ġdida tal-professjonijiet qabel ma din tiġi adottata.

üL-AZZJONI NRU 10: Is-simplifikazzjoni tat-tħaddim tad-Direttiva dwar it-Trasparenza tas-Suq Uniku

F’konformità mal-approċċ iktar strateġiku għall-azzjonijiet ta’ infurzar tal-Kummissjoni 26 , l-implimentazzjoni futura tad-Direttiva dwar it-Trasparenza tas-Suq Uniku 27 se tissejjes fuq erba’ assi, kif ġej: (i) l-Istati Membri jinnotifikaw l-abbozzi kollha tar-regolamenti tekniċi marbutin mal-prodotti u mas-servizzi tas-soċjetà tal-informazzjoni; (ii) il-Kummissjoni se tagħti segwitu għan-notifiki kollha li jqajmu tħassib dwar il-kompatibbiltà ta’ dawn ir-regolamenti mal-liġijiet tal-UE; (iii) hija u tfassal l-azzjonijiet ta’ segwitu tagħha, il-Kummissjoni se tagħti każ b’mod partikulari l-miżuri li jkollhom l-ikbar impatt fuq is-suq uniku; (iv) il-Kummissjoni se timmonitorja l-leġiżlazzjoni li tkun wasslet għal reazzjoni min-naħa tagħha fil-kuntest tad-Direttiva u li, jekk ma tiġix aġġustata kif xieraq, jaf twassal għal proċedimenti ta’ ksur.

Il-Kummissjoni se tinkoraġġixxi wkoll lill-awtoritajiet nazzjonali jirreaġixxu għan-notifiki li jagħmlu l-Istati Membri l-oħrajn, jistabbilixxu qafas għal kuntatti regolari fost il-korpi regolatorji nazzjonali u l-awtoritajiet li jkunu inkarigati jimplimentaw id-Direttiva dwar it-Trasparenza tas-Suq Uniku, u jippromwovu l-konverġenza regolatorja fost ir-regolamenti nazzjonali. Jekk joħroġ li l-livell ta’ armonizzazzjoni li jeżisti ma jkunx biżżejjed, il-Kummissjoni se tanalizza bir-reqqa jekk ikunx hemm bżonn ta’ iktar armonizzazzjoni fil-livell Ewropew.

üL-AZZJONI NRU 11: Il-prevenzjoni tal-ħolqien ta’ ostakli ġodda għall-għoti tas-servizzi fis-suq uniku

Sabiex jiġu evitati l-ostakli mhux iġġustifikati fis-suq uniku tas-servizzi, il-Kummissjoni tistieden lill-Parlament Ewropew u lill-Kunsill jadottaw malajr il-proposta leġiżlattiva għal Direttiva ġdida dwar in-Notifiki tas-Servizzi 28 . Sa ma tiġi adottata dik il-proposta, il-Kummissjoni se tieħu l-passi meħtieġa biex tiżgura li l-Istati Membri jħarsu l-obbligu ta’ notifika li għandhom skont id-Direttiva dwar is-Servizzi sabiex tidentifika u telimina l-ostakli regolatorji ġodda li jaf ikun hemm.

üL-AZZJONI NRU 12: L-isfruttament tal-potenzjal sħiħ tal-mekkaniżmu ta’ notifika li tipprevedi d-Direttiva dwar il-kummerċ elettroniku

L-Istati Membri li jillimitaw b’mod iġġustifikat u proporzjonat il-libertà li jiġu pprovduti s-servizzi transfruntieri tas-soċjetà tal-informazzjoni jridu jgħarrfu lill-Istat Membru tal-istabbiliment u lill-Kummissjoni bil-miżuri nazzjonali li jagħmlu dan; madankollu, għadu ma ġiex sfruttat il-potenzjal sħiħ ta’ dan il-mekkaniżmu ta’ notifika li tipprevedi d-Direttiva dwar il-kummerċ elettroniku 29 . Il-miżuri li jista’ jkun hemm biex titjieb il-kooperazzjoni bejn l-Istati Membri kif ukoll l-għodod fil-kuntest tal-mekkaniżmu ta’ notifika se jiġu analizzati bħala parti mill-ħidma ta’ tħejjija għall-Att dwar is-Servizzi Diġitali.

IV    Detezzjoni tal-każijiet ta’ nuqqas ta’ konformità fis-suq uniku u fil-fruntieri esterni

Meta r-regoli nazzjonali jkunu diġà ġew adottati u jkunu daħlu fis-seħħ, l-awtoritajiet nazzjonali u l-Kummissjoni jridu jkunu kapaċi jinnutaw il-każijiet ta’ nuqqas ta’ konformità biex jiġi ppreservat il-funzjonament tajjeb tas-suq uniku. Għal dan il-għan, il-Kummissjoni u l-awtoritajiet tal-Istati Membri jrid ikollhom l-għodod li jtejbu l-kapaċitajiet tagħhom b’rabta mad-detezzjoni, mal-investigazzjoni u mal-qsim ta’ malajr tal-informazzjoni.

üL-AZZJONI NRU 13: Ir-razzjonalizzazzjoni tas-sistemi tal-IT tas-suq uniku u t-twaqqif ta’ pjattaforma għall-infurzar online (“laboratorju tal-infurzar elettroniku”)

Il-Kummissjoni u l-Istati Membri jużaw diversi sistemi tal-IT biex jaqsmu l-informazzjoni bejniethom dwar il-prodotti industrijali u tal-konsumaturi li jkunu illegali jew li ma jkunux konformi. Biex tnaqqas il-frammentazzjoni marbuta mas-sistemi tal-IT 30 li jintużaw biex tinqasam l-informazzjoni dwar il-prodotti industrijali u tal-konsumaturi li jkunu illegali jew li ma jkunux konformi, il-Kummissjoni se tagħmel dan li ġej:

ose tistabbilixxi punt tad-dħul uniku Ewropew għall-informazzjoni marbuta mal-kontrolli tal-prodotti mhux tal-ikel għall-awtoritajiet, li fih ikunu aċċessibbli s-sistemi eżistenti bħall-ICSMS u r-RAPEX u l-Punt Uniku ta’ Kuntatt Doganali li se jinħoloq dalwaqt, u li permezz tiegħu se jkun hemm skambju mmirat tad-data bejn is-sistemi differenti skont il-leġiżlazzjoni applikabbli;

oflimkien mal-Istati Membri, se tiżgura li s-Sistema ta’ Informazzjoni tas-Suq Intern (l-IMI) issir l-għodda awtomatika għall-kooperazzjoni amministrattiva fis-suq intern, billi tuża d-data u l-informazzjoni disponsibbli u billi tevalwa kif il-kooperazzjoni amministrattiva taħdem f’ċerti oqsma tas-suq uniku;

ose toħloq għodda għar-rappurtar tal-ostakli fis-suq uniku fil-kuntest tal-gateway diġitali unika, filwaqt li tqis l-esperjenza li nkisbet fil-kuntest tas-sit web imsejjaħ “Innaqqsu l-piż” 31 , li tkun tippermetti liċ-ċittadini u lin-negozji jirrappurtaw b’mod anonimu l-ostakli regolatorji li jiltaqgħu magħhom huma u jeżerċitaw id-drittijiet tagħhom marbutin mas-suq uniku;

oflimkien mal-Istati Membri, se tuża għalkollox is-sistema ta’ ġestjoni tal-informazzjoni għall-kontrolli uffiċjali (l-IMSOC) biex ittejjeb l-infurzar b’rabta mal-leġiżlazzjoni agroalimentari tal-UE (fosthom dik marbuta mas-saħħa tal-annimali u tal-pjanti). L-IMSOC se tikkollega s-sistemi eżistenti tal-informazzjoni rilevanti ma’ xulxin (jiġifieri l-iRASFF 32 , l-ADIS-exADNS 33 , l-EUROPHYT 34 u s-sistema TRACES 35 ) u se tippermetti l-iskambju tal-informazzjoni bejniethom;

ose teżamina jekk laboratorju ffinanzjat fil-kuntest tal-Programm għas-suq uniku jew tal-programm “Ewropa Diġitali” biex jittestja soluzzjonijiet avvanzati tal-IT u japplikahom ikunx jista’ jiġi integrat fl-istrutturi eżistenti bħan-Netwerk ta’ Kooperazzjoni għall-Protezzjoni tal-Konsumaturi, in-Netwerk tal-UE għall-Konformità tal-Prodotti u l-osservatorju tal-EUIPO, jew ikunx jista’ jiġi kkollegat magħhom.

üL-AZZJONI NRU 14: It-tisħiħ tal-ġlieda kontra l-prodotti illegali u ffalsifikati

Il-Kummissjoni u l-Uffiċċju Ewropew ta’ Kontra l-Frodi (l-OLAF) jaħdmu mal-awtoritajiet nazzjonali tal-Istati Membri u ta’ pajjiżi terzi fil-kuntest tal-assistenza amministrattiva reċiproka b’rabta mal-każijiet ta’ importazzjoni jew esportazzjoni illeċita, u jikkontribwixxu biex ma jidħlux prodotti illeċiti fis-suq uniku.

Illum il-ġurnata, il-prodotti illeċiti ma jiġux importati biss fl-UE, iżda jiġu wkoll immanifatturati jew magħmulin fl-UE stess minn komponenti importati u wara jitqiegħdu fis-suq uniku jew jiġu nnegozjati fih. Madankollu, l-OLAF ma jistax jintervjeni fit-tali każijiet minħabba li l-mandat attwali tiegħu ma jkoprix il-każijiet fl-UE stess.

Sabiex isaħħu l-infurzar tad-drittijiet tal-proprjetà intellettwali u tal-projbizzjonijiet jew tar-restrizzjonijiet fuq it-tqegħid tal-prodotti illegali jew iffalsifikati fis-suq uniku, il-Kummissjoni u l-Istati Membri jistgħu jimxu fuq ir-regoli dwar l-assistenza amministrattiva reċiproka li jeżistu fil-qasam doganali, kif ukoll iqisu l-possibbiltà li jwessgħu l-mandat tal-OLAF.

üL-AZZJONI NRU 15: It-tisħiħ tal-infurzar fil-katina agroalimentari

Aspett importanti tas-suq uniku huwa l-ikel sikur u sostenibbli u l-moviment liberu tiegħu. Dan jagħti kontribut sinifikanti għas-saħħa taċ-ċittadini u għall-benesseri tagħhom, kif ukoll għall-interessi soċjali u ekonomiċi tagħhom.

Filwaqt li l-Istati Membri għandhom ir-responsabbiltà jivverifikaw li l-operaturi jħarsu l-liġijiet tal-UE, kull sena l-Kummissjoni twettaq madwar 220 awditu “fuq il-post” fl-Istati Membri u fil-pajjiżi li mhumiex Stati Membri tal-UE biex tivverifika li s-sistemi ta’ kontroll ikunu effettivi u li l-awtoritajiet ikunu qed jissodisfaw l-obbligi legali tagħhom. Il-Kummissjoni se żżid l-infurzar tagħha b’rabta mal-applikazzjoni tal-liġijiet tal-UE fil-katina agroalimentari, fosthom permezz ta’ awditi mmirati u tas-segwitu sistematiku tagħhom biex tiżgura li l-Istati Membri jindirizzaw in-nuqqasijiet.

Il-Kummissjoni se tkompli tappoġġa wkoll lill-Istati Membri permezz tal-programm tat-taħriġ tagħha msejjaħ “Taħriġ Imtejjeb għal Iżjed Sikurezza fl-Ikel” għall-persunal tal-amministrazzjonijiet pubbliċi, bil-għan li ttejjeb l-implimentazzjoni tar-regoli tal-UE.

Il-każijiet ta’ frodi alimentari jistgħu jnaqqsu l-fiduċja tal-konsumaturi fis-sistema tal-ikel tal-UE u jaffettwaw ħażin il-funzjonament tas-suq intern. Għalhekk il-Kummissjoni se żżid l-isforzi tal-UE biex tittratta l-frodi agroalimentari fil-kuntest tal-istrateġija tagħha msejħa “Mill-għalqa sal-platt”.

üL-AZZJONI NRU 16: L-iżvilupp ta’ sistemi tat-tikkettar u tat-traċċabbiltà

It-traċċabbiltà hija essenzjali biex ikun hemm l-infurzar. Is-sistemi tat-tikkettar u tat-traċċabbiltà jistgħu jaħdmu biss jekk l-informazzjoni li tingħadda tul il-katina tal-provvista tal-prodott tkun tippermetti lill-awtoritajiet doganali jagħmlu verifiki awtomatizzati tal-konformità. F’kooperazzjoni mal-Istati Membri, il-Kummissjoni se teżamina u tippromwovi l-użu ta’ għodod diġitali li jippermettu li jsiru kontrolli iktar immirati fil-fruntieri esterni u fl-UE. Dan jinkludi l-iżvilupp ta’ sistemi tat-tikkettar u tat-traċċabbiltà (bħall-kodiċijiet QR, ir-RFID, il-block chains, eċċ.) biex l-informazzjoni speċifika marbuta mal-konformità tingħadda b’mod sigur tul il-katina kollha tal-provvista, filwaqt li jitqiesu l-istrumenti eżistenti bħall-bażi tad-data Ewropea tal-prodotti għat-tikkettar tal-enerġija (l-EPREL). Bl-appoġġ finanzjarju għat-tagħmir ta’ kontroll doganali mogħti fil-kuntest tal-Fond għall-Ġestjoni Integrata tal-Fruntieri għall-2021 sal-2027, se jiġi żviluppat tagħmir doganali ġdid li jkun kapaċi jaqra u jivverifika l-informazzjoni kkodifikata. Il-kwistjonijiet marbutin mat-traċċabbiltà se jiġu vvalutati wkoll waqt ir-reviżjoni tad-Direttiva dwar is-sigurtà ġenerali tal-prodotti.

Il-Kummissjoni se taħdem qatigħ biex tintbagħat b’mod diġitali l-informazzjoni dwar il-konformità tal-prodotti industrijali u tal-konsumaturi li jiġu ddikjarati lill-awtoritajiet doganali għar-“rilaxx għaċ-ċirkolazzjoni libera” (jiġifieri “d-dikjarazzjoni tal-konformità tal-UE” li diġà teżisti). Hija u tagħmel dan, il-Kummissjoni se tivvaluta wkoll l-impatt fuq l-SMEs, b’mod partikulari fuq il-mikrointrapriżi, sabiex tidentifika l-miżuri ta’ mitigazzjoni li jeħtieġ ikun hemm.

Barra minn hekk, fil-kuntest tal-Aġenda l-ġdida tal-Konsumaturi, it-tikketti u t-traċċabbiltà se jkollhom rwol ewlieni biex il-konsumaturi jingħataw is-setgħa jipparteċipaw fit-tranżizzjoni ekoloġika u f’dik diġitali. Il-Kummissjoni se tidentifika l-aħjar użijiet tal-għodod diġitali sabiex lill-konsumaturi tagħtihom l-iktar informazzjoni affidabbli biex meta jkunu qed jixtru jagħmlu dan b’mod infurmat u b’fiduċja, l-iktar fil-każ tax-xiri transfruntier.

V    Tisħiħ tal-infurzar fuq il-post

Minkejja l-isforzi kollha biex tinħoloq kultura ta’ konformità fis-suq uniku, l-ostakli regolatorji li jkunu ġejjin min-nuqqas ta’ konformità jeħtieġu intervent ex post effettiv. Anke f’dan l-istadju, huwa importanti ferm li l-awtoritajiet tal-Istati Membri u l-Kummissjoni jikkooperaw bejniethom.

üL-AZZJONI NRU 17: In-Netwerk tal-UE għall-Konformità tal-Prodotti

Ħafna prodotti mhux konformi xorta waħda għadhom jitqiegħdu għad-dispożizzjoni tal-konsumaturi, ta’ spiss permezz ta’ mezzi online, u dan ipoġġi f’riskju lill-konsumaturi u lill-utenti aħħarin professjonali u jgħawweġ il-kompetizzjoni. Sabiex issaħħaħ il-koordinazzjoni bejn l-awtoritajiet tas-sorveljanza tas-suq fis-settur mhux tal-ikel, prevista fir-Regolament (UE) 2019/1020 36 , il-Kummissjoni se tistabbilixxi n-Netwerk tal-UE għall-Konformità tal-Prodotti minn Jannar tal-2021 ’il quddiem, f’kooperazzjoni mal-Istati Membri. Dan se jkun magħmul mill-uffiċċji uniċi ta’ kooperazzjoni li l-Istati Membri ħolqu dan l-aħħar biex jirrappreżentaw lill-awtoritajiet tas-sorveljanza tas-suq tagħhom. Barra minn hekk, minn Lulju tal-2021 ’il quddiem, il-Kummissjoni se timmonitorja t-tħaddim tal-mekkaniżmu ta’ assistenza reċiproka li stabbilixxa dak ir-Regolament, u se tidentifika l-oqsma li fihom ma kienx iġġustifikat li l-Istati Membri jirrifjutaw it-talbiet għall-informazzjoni dwar il-konformità u t-talbiet għall-miżuri tal-infurzar fil-każ ta’ nuqqas ta’ konformità.

üL-AZZJONI NRU 18: Il-fatt li s-SOLVIT isir l-għodda awtomatika għas-soluzzjoni tat-tilwim marbut mas-suq uniku

Hemm għodod differenti għas-soluzzjoni tat-tilwim li jkopru oqsma legali li s-soltu jidħlu fil-mandat tas-SOLVIT 37 u dan qed jifframmenta x-xenarju tal-infurzar. Il-Kummissjoni u l-Istati Membri se jiżguraw li s-SOLVIT jissaħħaħ biex isir l-għodda alternattiva awtomatika għas-soluzzjoni tat-tilwim fl-oqsma kollha tal-politika tas-suq uniku li jkunu jeħtieġu deċiżjoni min-naħa ta’ xi amministrazzjoni. Is-SOLVIT se jintuża kif inhu jew, jekk ikun hemm bżonn, il-mudell tiegħu se jiġi adattat għar-rekwiżiti tal-inizjattivi l-ġodda. Il-Kummissjoni u l-Istati Membri se jsaħħu r-rabtiet li hemm bejn is-SOLVIT u l-korpi u n-netwerks differenti li jeżistu fil-livell nazzjonali u f’dak tal-UE.

Dan diġà huwa previst għall-Awtorità Ewropea tax-Xogħol (l-ELA) 38 , li bdiet taħdem f’Ottubru tal-2019 u li se tkun laħqet il-kapaċità sħiħa tagħha sal-2024. L-ELA se tgħin lill-Kummissjoni u lill-Istati Membri jiżguraw li r-regoli tal-UE dwar il-mobbiltà tal-ħaddiema u dwar il-koordinazzjoni tas-sigurtà soċjali jiġu infurzati b’mod ġust, sempliċi u effettiv, biex b’hekk iċ-ċittadini u n-negozji jkunu jistgħu jgawdu b’mod iktar faċli mill-benefiċċji li joffri s-suq uniku. Hija se tipprovdi soluzzjonijiet biex jitjieb l-aċċess taċ-ċittadini u ta’ min iħaddem għal informazzjoni ta’ kwalità dwar il-leġiżlazzjoni tal-UE u l-leġiżlazzjoni nazzjonali b’rabta mal-mobbiltà tal-ħaddiema.

VI    Trattament aħjar tal-każijiet tal-ksur

F’każ li jkun hemm dak li jidher li hu ksur tal-liġijiet Ewropej, il-Kummissjoni se tfittex li tiddjaloga mal-Istati Membri biex tifhem aħjar il-problemi li jkun hemm u ssib soluzzjonijiet għalihom. F’każ li d-djalogu ma jwassal għall-ebda riżultat, il-Kummissjoni mhix se tiddejjaq tieħu azzjonijiet b’saħħithom u effettivi ta’ infurzar meta jkun hemm bżonn. Arranġamenti aħjar tax-xogħol u użu aħjar tal-għodod amministrattivi kollha disponibbli, kif ukoll żieda fil-kooperazzjoni se jaċċelleraw il-proċess biex jintemm il-ksur u jissimplifikawh.

üL-AZZJONI NRU 19: Prijoritizzazzjoni aħjar tal-azzjonijiet ta’ infurzar

Sabiex tipprijoritizza aħjar l-azzjonijiet ta’ infurzar, kif kienet spjegat diġà fl-2016 39 , il-Kummissjoni tiffoka l-isforzi tagħha fuq il-każijiet li għandhom impatt sinifikanti fuq is-suq uniku, abbażi ta’ valutazzjoni tal-impatti ekonomiċi, legali u tal-politika tagħhom. Abbażi ta’ dan l-approċċ, kull sena l-Kummissjoni se tadotta Rapport Strateġiku dwar l-Infurzar fis-Suq Uniku li fih tidentifika l-oqsma speċifiċi ta’ tħassib u l-prijoritajiet b’rabta mal-infurzar, filwaqt li tqis is-sejbiet tas-Semestru Ewropew. Fl-istess ħin, huwa importanti ħafna li l-Kummissjoni tiġi mgħarrfa bil-ksur tar-regoli tas-suq uniku min-naħa tal-partijiet interessati, sabiex ikollha stampa sħiħa hija u tiddeċiedi dwar il-prijoritajiet. Għal dak il-għan, se tiġi riveduta s-sistema biex wieħed jibgħat l-ilmenti sabiex din tkun integrata iktar fis-SOLVIT. Il-Kummissjoni se timmonitorja r-rapporti tas-SOLVIT sabiex tidentifika l-kwistjonijiet strutturali li jaf ikunu rilevanti. Il-Kummissjoni se teżamina wkoll il-possibbiltà li testendi l-għodda li qed tiġi ttestjata bħalissa fuq il-pjattaforma għas-soluzzjoni online għat-tilwim (il-pjattaforma tal-ODR) għal oqsma oħrajn tal-politika tas-suq uniku biex tgħin lill-konsumaturi jivvalutaw aħjar il-possibbiltajiet tagħhom ta’ rimedju.

üL-AZZJONI NRU 20: Trattament ċar u konsistenti tal-każijiet

Il-fiduċja fis-sistema tal-infurzar tiddependi fuq il-fatt li l-ilmenti jiġu eżaminati f’waqthom u li jkun hemm sanzjonijiet fil-każ ta’ ksur. Għal dak il-għan, il-Kummissjoni se tkompli tissimplifika l-proċessi tagħha għat-trattament tal-każijiet. Hija se tivvaluta l-ilmenti b’mod preliminari fi żmien xahrejn minn meta jaslu biex min jagħmilhom ikun jista’ jirċievi tweġiba. Jekk tkun inġabret biżżejjed informazzjoni, din it-tweġiba għandha diġà tkun tinkludi deċiżjoni ċara dwar: (1) jekk l-ilment hux se kompli jiġi segwit jew le; (2) jekk dan hux se jintbagħat lill-korpi tas-soluzzjoni tat-tilwim bħas-SOLVIT; (3) jekk hux ħa jinbeda djalogu dwaru bejn il-Kummissjoni u l-Istat Membru kkonċernat; jew (4) hix se tinbeda mill-ewwel proċedura ta’ ksur.

üL-AZZJONI NRU 21: Użu aħjar tas-sistema tal-“EU Pilot”

Is-sistema tal-“EU Pilot” hija għodda utli biex tinkiseb l-informazzjoni fl-istadju tad-djalogu mal-Istati Membri qabel ma tinbeda proċedura ta’ ksur. Sabiex is-sistema tkun immirata u strutturata aħjar bħala għodda rapida u effettiva li tappoġġa djalogu mal-Istati Membri li jkun iffukat fuq is-soluzzjonijiet, il-Kummissjoni beħsiebha tuża l-“EU Pilot” b’ċerti kundizzjonijiet ċari u skont skedi ċari taż-żmien għall-każijiet li għalihom jidher li tkun tista’ tinstab soluzzjoni ta’ malajr f’qasir żmien.

Il-Kummissjoni:

ose tiżviluppa kriterji ċari u oġġettivi biex tidentifika meta għandu jintuża l-“EU Pilot”;

ose taħdem mal-Istati Membri biex tidentifika soluzzjonijiet prammatiċi biex jitħaffef il-proċess, filwaqt li jinżammu d-drittijiet essenzjali taż-żewġ partijiet fid-djalogu u filwaqt li jintużaw tajjeb is-sistemi l-iktar avvanzati disponibbli;

ose ssib mezzi iktar flessibbli ta’ skambju biex jiġu solvuti l-kwistjonijiet kumplessi;

ose taqsam l-informazzjoni dwar il-kwistjonijiet li jkunu ssolvew permezz tal-“EU Pilot” (f’forma aggregata), bil-għan li xxerred l-aqwa prattiki, filwaqt li żżomm il-bilanċ fir-relazzjoni ta’ kunfidenzjalità li għandha mal-Istati Membri 40 .

üL-AZZJONI NRU 22: Laqgħat regolari b’mod sistematiku dwar pakketti tematiċi

L-iskambji bil-miktub li jkun hemm fil-kuntest tal-proċeduri ta’ ksur (li jiffurmaw il-bażi għal proċedura sussegwenti li jaf ikun hemm fil-qrati) mhux dejjem jindirizzaw b’mod suffiċjenti s-soluzzjonijiet kollha disponibbli. Biex tikkomplementa dawn l-iskambji formali b’kuntatt dirett, il-Kummissjoni qed tippjana li torganizza laqgħat dwar pakketti tematiċi mal-Istati Membri individwali li jkunu ddedikati għal oqsma speċifiċi tal-politika. Dawn jistgħu jikkontribwixxu biex jinstabu soluzzjonijiet li jkunu konformi mal-liġijiet tal-UE u għalhekk għandhom isiru b’mod regolari kull meta jkun hemm bżonn. Jekk jitħejjew b’attenzjoni, kapaċi jtemmu b’mod effettiv in-nuqqasijiet ta’ qbil u jużaw l-għarfien espert tal-UE u tal-Istati Membri biex jinstabu s-soluzzjonijiet. Il-laqgħat dwar il-pakketti tematiċi jistgħu jiġu kkombinati ma’ laqgħat oħrajn mal-Istati Membri (bħad-djalogi dwar il-konformità), jew jiġu organizzati flimkien magħhom.

***

KONKLUŻJONI

Biex tiġi promossa kultura ta’ konformità hemm bżonn ta’ impenn politiku b’saħħtu favur is-suq uniku u ta’ implimentazzjoni effettiva tar-regoli tiegħu. Hemm bżonn ukoll ta’ sjieda politika, ta’ trasparenza u ta’ sistemi effiċjenti fis-seħħ biex titħeġġeġ il-konformità u biex din tiġi mmonitorjata.

Dan il-Pjan ta’ Azzjoni jwieġeb għas-sejħa għall-azzjoni li għamlu l-Istati Membri u jieħu l-inizjattiva biex jiġu indirizzati l-isfidi eżistenti li qed niffaċċjaw illum fil-qasam tal-implimentazzjoni u tal-infurzar. L-azzjonijiet jittrattaw għadd ta’ problemi differenti li jkopru l-istadji kollha u l-oqsma kollha li fihom jista’ jkun hemm problemi marbutin mal-implimentazzjoni u li fihom jista’ jkun hemm attivitajiet ta’ infurzar kemm fil-livell tal-UE kif ukoll f’dak nazzjonali, u jiddependu fuq impenn konġunt fil-livell lokali, reġjonali, nazzjonali u tal-UE. Bis-saħħa ta’ dawn l-azzjonijiet, il-Kummissjoni u l-Istati Membri se jippermettu lis-suq uniku jagħti spinta lin-negozji tagħna u joffri l-aqwa għażla lill-konsumaturi. Jekk naħdmu flimkien nistgħu niżguraw li s-suq uniku jkun jaħdem għall-Ewropej kollha.

(1)      COM(2020) 102, l-10 ta’ Marzu 2020.

(2)      COM(2020) 93, l-10 ta’ Marzu 2020.

(3)    Il-Kunsill tal-Kompetittività kompla jiżviluppa din it-talba fil-Konklużjonijiet tiegħu tas-27 ta’ Mejju 2019 u talab lill-Kummissjoni żżid it-trasparenza u s-sjieda politika tal-azzjonijiet ta’ implimentazzjoni u ta’ infurzar. Wara dan, l-Istati Membri ripetutament enfasizzaw l-importanza tal-infurzar, kif ukoll il-ħtieġa li jkun hemm sħubija aktar b’saħħitha mal-Kummissjoni u kooperazzjoni mtejba magħha. Ittra ffirmata mill-Istati Membri kollha li ġiet ippreżentata waqt il-laqgħa tal-Coreper II fid-29 ta’ Novembru 2019 kompliet tenfasizza dan.

(4)    L-istudju ta’ Højbjerre Brauer Schultz tal-2018 iffinanzjat mill-Awtorità Daniża tan-Negozju msejjaħ “25 years of the European Single Market”.

(5)      Il-Komunikazzjoni tal-Kummissjoni msejħa “Is-Suq Uniku f’dinja li qiegħda tinbidel” (COM(2018) 772 final).

(6)      Il-paġni 9 sa 11 tal-istudju tal-Parlament Ewropew imsejjaħ “Id-dividend ta’ żewġ triljun euro tal-Ewropa: L-Immappjar tal-Kost tan-Non-Ewropa, 2019-24” (li jinsab hawn: https://www.europarl.europa.eu/thinktank/mt/document.html?reference=EPRS_STU(2019)631745 ). 

(7)      COM(2020) 103, l-10 ta’ Marzu 2020.

(8)      Ara l-premessa 5 tad-Direttiva (UE) 2018/1808 tal-Parlament Ewropew u tal-Kunsill tal-14 ta’ Novembru 2018 li temenda d-Direttiva 2010/13/UE dwar il-koordinazzjoni ta’ ċerti dispożizzjonijiet stabbiliti bil-liġi, b’regolament jew b’azzjoni amministrattiva fi Stati Membri dwar il-forniment ta’ servizzi tal-media awdjoviżiva (Direttiva dwar is-Servizzi tal-Media Awdjoviżiva) fid-dawl ta’ realtajiet tas-suq li qed jinbidlu (ĠU L 303, 28.11.2018, p. 69) u l-Artikolu 13(7) u l-Artikolu 33a tad-Direttiva 2010/13/UE tal-Parlament Ewropew u tal-Kunsill tal-10 ta’ Marzu 2010 dwar il-koordinazzjoni ta’ ċerti dispożizzjonijiet stabbiliti bil-liġi, b’regolament jew b’azzjoni amministrattiva fi Stati Membri dwar il-forniment ta’ servizzi tal-media awdjoviżiva (Direttiva dwar is-Servizzi tal-Media awdjoviżiva) (ĠU L 95, 15.4.2010, p. 1).

(9)      Ara l-Artikolu 17(10) tad-Direttiva (UE) 2019/790 tal-Parlament Ewropew u tal-Kunsill tas-17 ta’ April 2019 dwar id-drittijiet tal-awtur u drittijiet relatati fis-Suq Uniku Diġitali u li temenda d-Direttivi 96/9/KE u 2001/29/KE (ĠU L 130, 17.5.2019, p. 92).

(10)    Il-Manwal dwar l-implimentazzjoni tad-direttiva dwar is-servizzi, li jinsab hawnhekk: https://op.europa.eu/mt/publication-detail/-/publication/a4987fe6-d74b-4f4f-8539-b80297d29715 .

(11)      https://op.europa.eu/mt/publication-detail/-/publication/a5396a42-cbc8-4cd9-8b12-b769140091cd.

(12)      Skont il-premessa 5 tar-Regolament (UE) 2019/515 tal-Parlament Ewropew u tal-Kunsill tad-19 ta’ Marzu 2019 dwar ir-rikonoxximent reċiproku ta’ merkanzija kummerċjalizzata legalment fi Stat Membru ieħor u li jħassar ir-Regolament (KE) Nru 764/2008 (ĠU L 91, 29.3.2019, p. 1), jenħtieġ li l-Kummissjoni tipprovdi gwida mhux vinkolanti fir-rigward tal-ġurisprudenza tal-Qorti tal-Ġustizzja tal-Unjoni Ewropea dwar il-kunċett ta’ raġunijiet prevalenti ta’ interess pubbliku u kif għandu jiġi applikat il-prinċipju tar-rikonoxximent reċiproku.

(13) Id-Direttiva tal-Kunsill KEE 85/374 tal-25 ta’ Lulju 1985 dwar l-approssimazzjoni tal-liġijiet, regolamenti u dispożizzjonijiet amministrattivi tal-Istati Membri dwar responsabbiltà għall-prodotti difettużi (ĠU L 210, 7.8.1985, p. 29).

(14)      Ir-Regolament (UE) 2019/1020 tal-Parlament Ewropew u tal-Kunsill tal-20 ta’ Ġunju 2019 dwar is-sorveljanza tas-suq u l-konformità tal-prodotti u li jemenda d-Direttiva 2004/42/KE u r-Regolamenti (KE) Nru 765/2008 u (UE) Nru 305/2011 (ĠU L 169, 25.6.2019, p. 1). Ir-Regolament dwar is-Sorveljanza tas-Suq ġie adottat fl-2019 u għandu l-għan li jtejjeb is-sorveljanza tas-suq tal-prodotti fl-UE.

(15)      Il-“Gwida l-Blu” attwali dwar l-implimentazzjoni tar-regoli tal-prodotti tal-UE 2016 tinsab fl-Avviż tal-Kummissjoni bin-numru ta’ referenza 2016/C 272/01.

(16)      Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar rakkomandazzjonijiet ta’ riforma għar-regolamentazzjoni tas-servizzi professjonali (COM(2016) 820 final).

(17)      Id-Direttiva (UE) 2019/882 tal-Parlament Ewropew u tal-Kunsill tas-17 ta’ April 2019 dwar ir-rekwiżiti ta’ aċċessibbiltà għall-prodotti u għas-servizzi (ĠU L 151, 7.6.2019, p. 70).

(18)      Ir-Regolament (UE) 2018/1724 tal-Parlament Ewropew u tal-Kunsill tat-2 ta’ Ottubru 2018 li jistabbilixxi gateway diġitali unika li tipprovdi aċċess għal informazzjoni, għal proċeduri u għas-servizzi ta’ assistenza u ta’ soluzzjoni tal-problemi u li jemenda r-Regolament (UE) Nru 1024/2012 (ĠU L 295, 21.11.2018, p. 1).

(19)      Ir-Regolament (UE) 2019/515 tal-Parlament Ewropew u tal-Kunsill tad-19 ta’ Marzu 2019 dwar ir-rikonoxximent reċiproku ta’ merkanzija kummerċjalizzata legalment fi Stat Membru ieħor u li jħassar ir-Regolament (KE) Nru 764/2008 (ĠU L 91, 29.3.2019, p. 1) u r-Regolament (UE) 2019/1020 tal-Parlament Ewropew u tal-Kunsill tal-20 ta’ Ġunju 2019 dwar is-sorveljanza tas-suq u l-konformità tal-prodotti u li jemenda d-Direttiva 2004/42/KE u r-Regolamenti (KE) Nru 765/2008 u (UE) Nru 305/2011 (ĠU L 169, 25.6.2019, p. 1).

(20)      Id-Direttiva Nru 2001/95/KE tal-Parlament u tal-Kunsill tat-3 ta’ Diċembru 2001 dwar is-sigurtà ġenerali tal-prodotti (ĠU L 11, 15.1.2002, p. 4).

(21) https://ec.europa.eu/regional_policy/sources/docgener/informat/2014/action_plan_pp.pdf.

(22)      Għall-kuntrarju tal-listi statiċi, li jirriflettu l-konkordanza tal-leġiżlazzjoni nazzjonali mal-leġiżlazzjoni tal-UE fil-mument tat-traspożizzjoni, it-tabelli ta’ konkordanza virtwali dinamiċi huma soluzzjonijiet diġitali li jippermettu aġġornament kontinwu tal-istat tat-traspożizzjoni anke wara li jidħlu fis-seħħ il-liġijiet oriġinali tat-traspożizzjoni. Il-proċessi ta’ notifika jistgħu jkunu sors ta’ informazzjoni għal dawn it-tabelli u jiffaċilitaw l-aġġornament tagħhom maż-żmien.

(23)      Is-sentenza tal-Qorti tal-Ġustizzja fil-Kawża C‑543/17, il-Kummissjoni vs il-Belġju.

(24)    L-implimentazzjoni li għaddejja bħalissa tar-Regolament dwar il-gateway diġitali unika tista’ sservi bħala eżempju ta’ dan.

(25)      Id-Direttiva (UE) 2018/958 tal-Parlament Ewropew u tal-Kunsill tat-28 ta’ Ġunju 2018 dwar test tal-proporzjonalità qabel l-adozzjoni ta’ regolamentazzjoni ġdida tal-professjonijiet (ĠU L 173, 9.7.2018, p. 25).

(26) Il-Komunikazzjoni tal-Kummissjoni msejħa “Id-Dritt tal-UE: Riżultati aħjar permezz ta’ applikazzjoni aħjar” (C/2016/8600) (ĠU C 18, 19.1.2017, p. 10).

(27)      Id-Direttiva (UE) 2015/1535 tal-Parlament Ewropew u tal-Kunsill tad-9 ta’ Settembru 2015 li tistabbilixxi proċedura għall-għoti ta’ informazzjoni fil-qasam tar-regolamenti tekniċi u tar-regoli dwar is-servizzi tas-Soċjetà tal-Informatika (ĠU L 241, 17.9.2015, p. 1).

(28)      Il-Proposta għal Direttiva tal-Parlament Ewropew u tal-Kunsill dwar l-infurzar tad-Direttiva 2006/123/KE dwar is-servizzi fis-suq intern, li tistabbilixxi l-proċedura ta’ notifika għal skemi ta’ awtorizzazzjoni u r-rekwiżiti relatati ma’ servizzi, u li temenda d-Direttiva 2006/123/KE u r-Regolament (UE) Nru 1024/2012 dwar il-kooperazzjoni amministrattiva permezz tas-Sistema ta’ Informazzjoni tas-Suq Intern (COM(2016) 821 final).

(29)      Id-Direttiva 2000/31/KE tal-Parlament Ewropew u tal-Kunsill tat-8 ta’ Ġunju 2000 dwar ċerti aspetti legali tas-servizzi minn soċjetà tal-informazzjoni, partikolarment il-kummerċ elettroniku, fis-Suq Intern (Direttiva dwar il-kummerċ elettroniku) (ĠU L 178, 17.7.2000, p. 1).

(30)      Bħas-Sistema ta’ Informazzjoni u Komunikazzjoni għas-Sorveljanza tas-Suq (l-ICSMS), is-sistema ta’ twissija rapida għall-prodotti perikolużi mhux tal-ikel (imsejħa “Safety Gate”, li qabel kienet imsejħa “RAPEX”), u l-bażi tad-data Ewropea tal-prodotti għat-tikkettar tal-enerġija msejħa “EPREL”.

(31)       https://ec.europa.eu/info/law/better-regulation/lighten-load .

(32) Il-pjattaforma online tas-Sistema ta’ Twissija Rapida għall-Ikel u l-Għalf.

(33) Is-Sistema ta’ Informazzjoni dwar il-Mard tal-Annimali (l-ADIS), li qabel kienet is-Sistema ta’ Notifika tal-Mard tal-Annimali (l-ADNS).

(34) Is-sistema ta’ notifika u ta’ twissija rapida li tittratta l-interċettazzjonijiet ta’ konsenji ta’ pjanti u ta’ prodotti tal-pjanti li jkunu importati fl-UE jew li jkunu qed jiġu nnegozjati fl-UE stess, li jsiru għal raġunijiet marbutin mas-saħħa tal-pjanti.

(35) Is-Sistema tal-Kontroll tal-Kummerċ u tal-Esperti veterinarji, li hija l-għodda ta’ ġestjoni online għar-rekwiżiti sanitarji kollha li japplikaw għall-kummerċ fl-UE u għall-importazzjoni tal-annimali, tas-semen u tal-embrijuni, tal-ikel, tal-għalf u tal-pjanti.

(36)      Ir-Regolament (UE) 2019/1020 tal-Parlament Ewropew u tal-Kunsill tal-20 ta’ Ġunju 2019 dwar is-sorveljanza tas-suq u l-konformità tal-prodotti u li jemenda d-Direttiva 2004/42/KE u r-Regolamenti (KE) Nru 765/2008 u (UE) Nru 305/2011 (ĠU L 169, 25.6.2019, p. 1).

(37)      Is-SOLVIT jittratta l-kwistjonijiet transfruntiera li jinħolqu meta l-awtoritajiet pubbliċi jiksru l-liġijiet tal-UE.

(38)      Ir-Regolament (UE) 2019/1149 tal-Parlament Ewropew u tal-Kunsill tal-20 ta’ Ġunju 2019 li jistabbilixxi Awtorità Ewropea tax-Xogħol, li jemenda r-Regolamenti (KE) Nru 883/2004, (UE) Nru 492/2011, u (UE) 2016/589 u li jħassar id-Deċiżjoni (UE) 2016/344 (ĠU L 186, 11.7.2019, p. 21).

(39)      Fil-Komunikazzjoni tal-Kummissjoni msejħa “Id-Dritt tal-UE: Riżultati aħjar permezz ta’ applikazzjoni aħjar” (C/2016/8600).

(40)      Ir-Rapport Speċjali Nru 5/2016 tal-Qorti Ewropea tal-Awdituri msejjaħ “Il-Kummissjoni żgurat l-implimentazzjoni effettiva tad-Direttiva dwar is-Servizzi?”, ippubblikat fl-14 ta’ Marzu 2016.