IL-KUMMISSJONI EWROPEA
Brussell, 9.7.2015
COM(2015) 328 final
2015/0144(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata, f'isem l-Unjoni Ewropea,
fil-Kumitat Konġunt taż-ŻEE dwar emenda għall-Anness XXI (Statistika)
tal-Ftehim ŻEE
(Statistika dwar l-Enerġija)
MEMORANDUM TA’ SPJEGAZZJONI
1.KUNTEST TAL-PROPOSTA
Sabiex jiġi żgurat ir-rekwiżit taċ-ċertezza legali u l-omoġenità tas-Suq Intern, il-Kumitat Konġunt taż-ŻEE għandu jintegra l-leġiżlazzjoni kollha relevanti tal-UE fil-Ftehim taż-ŻEE mill-aktar fis possibbli wara l-adozzjoni tiegħu.
2.RIŻULTATI TAL-KONSULTAZZJONIJIET MAL-PARTIJIET IKKONĊERNATI U L-VALUTAZZJONIJIET TAL-IMPATT
L-abbozz tad-Deċiżjoni tal-Kumitat Konġunt taż-ŻEE (anness mad-Deċiżjoni proposta tal-Kunsill) għandu l-għan li jemenda l-Anness XXI (Statistika) għall-Ftehim taż-ŻEE sabiex jinkorpora r-Regolament tal-Kummissjoni (UE) Nru 431/2014 tal-24 ta’ April 2014 li jemenda r-Regolament (KE) Nru 1099/2008 tal-Parlament Ewropew u tal-Kunsill dwar l-istatistika dwar l-enerġija, fir-rigward tal-implimentazzjoni tal-istatistika annwali dwar il-konsum tal-enerġija fl-unitajiet domestiċi fil-Ftehim ŻEE.
L-Istati tal-EFTA membri taż-ŻEE qed jitolbu derogi mill-acquis tal-UE għal Liechtenstein u l-Islanda. Billi dawn l-adattamenti jintroduċu bidliet li huma aktar minn aġġustamenti tekniċi sempliċi, kif previst fl-Artikolu 1(3) tar-Regolament tal-Kunsill (KE) Nru 2894/94, il-pożizzjoni tal-UE għandha tiġi adottata mill-Kunsill.
L-Istati tal-EFTA taż-ŻEE jitolbu d-deroga għal l-Islanda fejn qalet li l-Islanda ma tkunx konnessa man-netwerk Ewropew tal-enerġija u bħala tali hi sistema indipendenti iżolata tal-enerġija. Il-produzzjoni tal-elettriku fl-Islanda hija bbażata fuq kważi 100 % ta’ sorsi rinnovabbli, li jammontaw għal prattikament kull użu aħħari tal-enerġija residenzjali. L-użu domestiku tal-elettriku fl-Islanda jammonta għal 4 % tal-konsum totali tal-enerġija fl-Islanda. Il-klassifikazzjoni dettaljata tal-konsum tal-enerġija fl-unitajiet domestiċi skont l-attività stabbilita fl-Anness B tar-Regolament (KE) Nru 1099/2008, għaldaqstant ma tkunx rilevanti għall-istrateġija tal-enerġija tal-Islanda u saħansitra ta' valur inqas għall-istrateġija tal-enerġija tal-UE, minħabba li l-Islanda tikkostitwixxi sistema tal-enerġija iżolata. Għaldaqstant, ma hemm l-ebda interess nazzjonali f’din l-istatistika partikolari, u ma żżid l-ebda valur għall-istatistika Ewropea prodotta skont dan ir-Regolament.
Barra minn hekk, il-konformità tkun tirrikjedi stħarriġ għall-ġbir tad-dejta li jista’ jkun għali u kkumplikat, u tista’ toħloq distorsjoni fuq il-kapaċità organizzattiva u l-fondi lil hinn mill-produzzjoni statistika ta’ aktar valur sinifikanti kemm għall-UE kif ukoll għall-Islanda.
F'dan id-dawl, meta wieħed iqis is-sitwazzjoni speċifika kif deskritt hawn fuq, ġie ppreżentat test ta’ adattament, li jeżenta l-Islanda mill-ġbir ta’ dejta li taqa' fi ħdan l-ambitu tal-Anness B.
Jekk jogħġbok innota li għal raġunijiet tekniċi, din id-Deċiżjoni tal-Kumitat Konġunt tissostitwixxi t-test sħiħ tal-punt 26a tal-Anness XXI għall-Ftehim taż-ŻEE. Madankollu, ir-Regolament (KE) Nru 1099/2008 u l-eżenzjoni speċifika għal Liechtenstein previsti fil-punt (a) kienu parti mill-Ftehim ŻEE sa mid-dħul fis-seħħ tad-Deċiżjoni tal-Kumitat Konġunt taż-ŻEE Nru 89/2009 tat-3 ta’ Lulju 2009.
3.ELEMENTI LEGALI TAL-PROPOSTA
L-Artikolu 1(3) tar-Regolament tal-Kunsill (KE) Nru 2894/94 dwar l-arranġamenti għall-implimentazzjoni tal-Ftehim taż-ŻEE jipprevedi li l-Kunsill jistabbilixxi l-pożizzjoni li għandha tiġi adottata f'isem l-Unjoni dwar Deċiżjonijiet bħal dawn, fuq proposta mill-Kummissjoni.
Il-Kummissjoni tissottometti l-Abbozz ta' Deċiżjoni tal-Kumitat Konġunt taż-ŻEE għall-adozzjoni mill-Kunsill bħala l-pożizzjoni tal-Unjoni. Il-Kummissjoni tittama li tkun fil-qagħda li tippreżentah fil-Kumitat Konġunt taż-ŻEE mill-aktar fis possibbli.
2015/0144 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tiġi adottata, f'isem l-Unjoni Ewropea,
fil-Kumitat Konġunt taż-ŻEE dwar emenda għall-Anness XXI (Statistika)
tal-Ftehim ŻEE
(Statistika dwar l-Enerġija)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikoli 338(1) u 218(9) tiegħu,
Wara li kkunsidra r-Regolament tal-Kunsill (KE) Nru 2894/94 tat-28 ta' Novembru 1994 dwar l-arranġamenti għall-implimentazzjoni tal-Ftehim dwar iż-Żona Ekonomika Ewropea, u b'mod partikolari l-Artikolu 1(3) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim dwar iż-Żona Ekonomika Ewropea (“il-Ftehim ŻEE”) daħal fis-seħħ fl-1 ta' Jannar 1994.
(2)Skont l-Artikolu 98 tal-Ftehim ŻEE, il-Kumitat Konġunt taż-ŻEE jista’ jiddeċiedi li, fost l-oħrajn, jemenda l-Anness XXI (Statistika) għall-Ftehim ŻEE.
(3)Ir-Regolament tal-Kummissjoni (UE) Nru 431/2014 tat-8 ta' Ġunju 2011 li jemenda r-Regolament (KE) Nru 1099/2008 tal-Parlament Ewropew u tal-Kunsill għandu jiġi inkorporat fil-Ftehim taż-ŻEE.
(4)Għalhekk, l-Anness XXI tal-Ftehim ŻEE għandu jiġi emendat skont dan.
(5)Il-pożizzjoni tal-Unjoni fi ħdan il-Kumitat Konġunt taż-ŻEE għandha tkun ibbażata fuq l-abbozz ta’ Deċiżjoni mehmuż,
ADOTTA DIN ID-DEĊIŻJONI:
Artikolu 1
Il-pożizzjoni li għandha tiġi adottata, f’isem l-Unjoni, fi ħdan il-Kumitat Konġunt taż-ŻEE dwar l-emenda proposta tal-Anness XXI (Statistika) għall-Ftehim ŻEE għandha tkun ibbażata fuq l-abbozz ta’ Deċiżjoni tal-Kumitat Konġunt taż-ŻEE mehmuż ma’ din id-Deċiżjoni.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell,
Għall-Kunsill
Il-President