This document is an excerpt from the EUR-Lex website
Document 52014PC0673
Proposal for a COUNCIL IMPLEMENTING DECISION authorising Croatia to apply tax exemption to gas oil used to operate machinery in humanitarian demining in accordance with Article 19 of Directive 2003/96/EC
Proposta għal DEĊIŻJONI TA’ IMPLIMENTAZZJONI TAL-KUNSILL li tawtorizza lill-Kroazja biex tapplika eżenzjoni tat-taxxa għaż-żejt tal-gass li jintuża biex jitħaddem makkinarju għat-tneħħija tal-mini għal skopijiet umanitarji b’konformità mal-Artikolu 19 tad-Direttiva 2003/96/KE
Proposta għal DEĊIŻJONI TA’ IMPLIMENTAZZJONI TAL-KUNSILL li tawtorizza lill-Kroazja biex tapplika eżenzjoni tat-taxxa għaż-żejt tal-gass li jintuża biex jitħaddem makkinarju għat-tneħħija tal-mini għal skopijiet umanitarji b’konformità mal-Artikolu 19 tad-Direttiva 2003/96/KE
/* COM/2014/0673 final - 2014/0312 (NLE) */
Proposta għal DEĊIŻJONI TA’ IMPLIMENTAZZJONI TAL-KUNSILL li tawtorizza lill-Kroazja biex tapplika eżenzjoni tat-taxxa għaż-żejt tal-gass li jintuża biex jitħaddem makkinarju għat-tneħħija tal-mini għal skopijiet umanitarji b’konformità mal-Artikolu 19 tad-Direttiva 2003/96/KE /* COM/2014/0673 final - 2014/0312 (NLE) */
MEMORANDUM TA’ SPJEGAZZJONI 1. IL-KUNTEST TAL-PROPOSTA It-tassazzjoni fuq prodotti ta' enerġija
u fuq l-elettriku fl-Unjoni hija rregolata bid-Direttiva
tal-Kunsill 2003/96/KE ([1])(minn
issa 'l quddiem imsejħa d-“Direttiva dwar it-Tassazzjoni fuq l-Enerġija”
jew id-“Direttiva”). Skont l-Artikolu 19(1) tad-Direttiva,
flimkien mad-dispożizzjonijiet previsti b’mod partikolari
fl-Artikoli 5, 15 u 17 tagħha, il-Kunsill, billi jaġixxi b’mod
unanimu fuq proposta tal-Kummissjoni, jista’ jawtorizza lil kwalunkwe Stat
Membru biex jintroduċi aktar eżenzjonijiet jew tnaqqis fil-livell ta’
tassazzjoni għal kunsiderazzjonijiet politiċi speċifiċi. L-għan ta’ din il-proposta huwa li
jippermetti lill-Kroazja tapplika eżenzjoni tat-taxxa
għaż-żejt tal-gass li jintuża biex jopera makkinarju
speċjalizzat fit-tneħħija tal-mini għal skopijiet
umanitarji . Din l-eżenzjoni hija intiża biex tnaqqas l-ispejjeż
għal persuni ġuridiċi rreġistrati li jwettqu attivitajiet
ta’ tneħħija tal-mini u għaldaqstant taċċellera dawn
l-attivitajiet u tikkontribwixxi għall-implimentazzjoni tal-politika
tat-tneħħija tal-mini għal skopijiet umanitarji fil-Kroazja. It-tnaqqis fit-taxxa se jtaffi l-attivitajiet
ta’ tneħħija ta’ mini li qed iseħħu skont il-Konvenzjoni
Internazzjonali fuq il-Projbizzjoni tal-Użu, il-Kumulazzjoni,
il-Produzzjoni u t-Trasferiment ta’ Mini Kontra l-Persunal u dwar
id-Distruzzjoni Tagħhom (Trattat ta’ Ottawa, 1998), il-Konvenzjoni
Internazzjonali dwar il-Munizzjon tat-Tip Cluster iffirmata f’Oslo fl-2008, li
tipprojbixxi l-użu, it-trasferiment, il-ħażna u d-distruzzjoni
ta’ munizzjon tat-tip cluster maħżuna f’perjodu ta’ tmien snin, u l-Att dwar
it-Tneħħija ta' Mini għal Skopijiet Umanitarji tar-Repubblika
tal-Kroazja tal-2005. L-għan tal-miżura li trid tiġi
applikata mill-Kroazja huwa li jingħata inċentiv għall-ikklerjar
aktar mgħaġġel ta' għelieqi suspettati li huma mminati, u
l-liberazzjoni ta’ art agrikola u foresti u b’hekk tagħmilhom
aċċessibbli għal darb’oħra għal attivitajiet
ekonomiċi. Il-miżura hija mistennija wkoll li jkollha effetti
pożittivi immedjati fuq il-ħajja u s-saħħa tal-bniedem
fiż-żoni kkontaminati b’mini u munizzjon li għadu ma splodiex. Mingħajr l-applikazzjoni tal-miżura,
l-operaturi tat-tagħmir għat-tneħħija ta’ mini awtorizzati
li jwettqu operazzjonijiet ta’ tneħħija ta’ mini fit-territorju
tal-Kroazja ser ikollhom iħallsu rata tad-dazju tas-sisa nazzjonali fuq
il-żejt tal-gass li jintuża bħala fjuwil tal-magni li
bħalissa jammonta għal HRK 2 860 (app.
EUR 375.54) ([2]) u
li tapplika għall-użu ta' propellant kif ukoll użi f’magni
stazzjonarji, f'makkinarju kbir u f’vetturi intenzjonati għall-użu
mhux fi triq pubblika (l-Artikolu 8(2)(b), (c) u (d) tad-Direttiva dwar
it-Tassazzjoni fuq l-Enerġija). Eżenzjoni mit-taxxa għal perjodu
ta’ żmien limitat se tippermetti lill-operaturi inaqqsu l-ispejjeż
tagħhom għall-attivitajiet ta’ tneħħija ta’ mini u
jżidu l-marġni ta’ qligħ tagħhom għal perjodu ta’
żmien limitat, biex b’hekk jinħoloq inċentiv biex jintensifikaw
il-ħidma tagħhom għall-perjodu ta’ applikazzjoni
tal-miżura. Dan se jħaffef il-proċess tat-tneħħija
tal-mini. It-talba u l-kuntest ġenerali
tagħha Permezz ta’ ittra ddatata t-8 ta’ April 2014,
l-awtoritajiet Kroati talbu deċiżjoni ta' awtorizzazzjoni li se
tippermetti lill-Kroazja tapplika eżenzjoni tat-taxxa
għaż-żejt tal-gass li jintuża biex iħaddem
il-makkinarju fit-tneħħija tal-mini għal skopijiet umanitarji
f’konformità mal-Artikolu 19 tad- Direttiva 2003/96/KE. Iktar tagħrif
u kjarifiki ġew pprovduti mill-awtoritajiet Kroati fil-15 ta’ Lulju 2014. L-intenzjoni tal-awtoritajiet Kroati huwa li
japplikaw eżenzjoni tat-taxxa għaż-żejt tal-gass li
jintuża biex iħaddem il-makkinarju fit-tneħħija tal-mini
għal skopijiet umanitarji. Il-miżura se tiġi implimentata billi
tiġi applikata sistema ta’ rifużjoni ta’ dazji tas-sisa mħallsa,
sabiex titħaffef it-tneħħija tal-mini fiż-żoni
kontaminati li jifdal. Magni li se jużaw żejt tal-gass eżentati
mill-ħlas tat-taxxi tas-sisa għandhom jiġu kklassifikati skont
l-iskop tagħhom, l-għodda tax-xogħol tagħhom u l-metodu
tagħhom ta’ tħaddim. Skont l-informazzjoni pprovduta
mill-awtoritajiet Kroati mill-1 ta' Jannar 2014, it-total taż-żoni
susspettati li għandhom il-mini u żoni kkontaminati biss bi splussivi
mhux sploduti fil-Kroazja kopra 613.6 km2. Il-Kroazja tistma li
l-potenzjal tal-produzzjoni mhux użata taż-żoni forestali
kkontaminati mill-mini jirrappreżenta telf annwali ta’ madwar EUR 30
miljun. 55 % ta’ żoni agrikoli kkontaminati jikkostitwixxu art li
tinħadem filwaqt li l-bqija huma fil-marġ u fil-mergħat. Huwa stmat
li 900 000 ruħ (madwar 20 % tal-popolazzjoni) għadhom
jgħixu qrib ħafna taż-żoni fejn huwa ssusspettat li hemm
il-mini. Bejn l-1991 u l-2013, kien hemm 1 353 inċidenti relatati
mal-mini jew aċċidenti f’żoni kkontaminati bil-mini, u li
affettwaw 1 976 ruħ u kkawżaw 510 mewt. Il-Kroazja talbet li jingħata permess
għall-eżenzjoni għal perjodu ta' sitt snin, li huwa l-perjodu
massimu indikat fl-Artikolu 19(2) tad-Direttiva. Kamp ta' applikazzjoni Il-benefiċjarji tal-miżura se jkunu
persuni ġuridiċi li jkunu awtorizzati miċ-Ċentru Kroat
għall-Azzjoni fil-Minjieri u li jkunu rreġistrati biex jieħdu
sehem fit-tneħħija tal-mini għal skopijiet umanitarji u skont
l-Att tat-Tneħħija tal-Mini għal Skopijiet Umanitarji ([3]), ir-Regoli dwar
il-kondotta tat-tneħħija tal-mini għal skopijiet
umanitarji ([4])
u r-Regoli dwar ir-rekwiżiti tekniċi biex tiġi ddeterminata
l-konformità tal-makkinarju li jintuża fit-tneħħija tal-mini
għal skopijiet umanitarji ([5]).
Il-benefiċjarji se jikklerjaw il-mini u l-art bl-użu ta’ makkinarju
li jneħħi l-mini u se joħolqu l-kundizzjonijiet biex dawk li
jwettqu xogħol pirotekniku jkunu jistgħu jiddiżattivaw il-mini
mhux sploduti. Il-magni akkreditati se jiġu ddefiniti skont it-tip
tagħhom, l-għan u l-konsum tal-fjuwil, li min-naħa tagħhom
jiddependu fuq il-profondità tal-ispazju, il-veloċità tal-magna,
id-densità tal-ispazju u l-effett tal-magna fuq mogħdijiet b’ħamrija
kompatta lokali. Il-miżura għandha tingħata permezz ta’
ħlas lura tas-sisa mħallsa, billi jinġabru il-fatturi
mħallsin għat-tali użu. Dawn ir-rekords sa jkun fihom dettalji
tax-xerrejja, in-numri tas-serje tal-magni, in-numru ta’ sigħat ta’
tħaddim tal-magni, il-kwantità ta’ żejt tal-gass mixtrija u d-data
tax-xiri. Skont iċ-ċifri pprovduti
mill-awtoritajiet Kroati, fil-Kroazja hemm 36 persuni ġuridiċi
rreġistrati b’47 magni li ntużaw fit-tneħħija tal-mini
għal skopijiet umanitarji. Madankollu, il-miżura mhix maħsuba li
tkun ristretta biss għal dawn l-operaturi akkreditati iżda ser
tapplika għal kwalunkwe operatur akkreditat u makkinarju ta’
tneħħija ta’ mini ġodda li jistgħu jintużaw għal
dan il-għan, fil-futur. Iċ-Ċentru Kroat għall-Azzjoni
fil-Minjieri takkredita u żżomm rekord tal-magni ġodda
tat-tneħħija tal-mini kollha maħsuba biex jintużaw
għat-tneħħija tal-mini għal skopijiet umanitarji. Skont
l-awtoritajiet Kroati l-ammont tal-vantaġġ għal kull
benefiċjarju li jinkiseb mill-miżura se jiddependi fuq id-daqs
taż-żona li għandha tiġi kklerjata mill-mini permezz ta'
makkinarju tat-tneħħija tal-mini u fuq il-konsum totali
taż-żejt tal-gass li jintuża biex jitħaddem il-makkinarju
meta jkunu qed jitneħħew il-mini minn żona bħal din.
Il-Kroazja tistma li l-ammont tal-benefiċċju li jirriżulta
mit-tnaqqis ta’ taxxa kkalkolata abbażi ta’ ċifri ta’ konsum
tal-fjuwil medju għall-operaturi kollha involuti fit-tneħħija
tal-mini fl-2013 huwa bejn wieħed u ieħor
HRK 2 907 038 (app. EUR 381 736.50), li jfisser li
l-ammont medju kull magna huwa stmat li huwa HRK 61 859.15 jew
EUR 8 123.01 kull sena. L-awtoritajiet Kroati jantiċipaw li
għas-sitt snin li fihom se tapplika l-miżura, l-ispiża annwali
tal-baġit ibbażata fuq il-konsum medju stmat se tiżdied u se
tkun ta': HRK 2 965 179 (app. EUR 389 371.23)
għall-2015, HRK 3 024 482 (app. EUR 397 158.66)
għall-2016, HRK 3 084 971 (app. EUR 405 101.83)
għall-2017, HRK 3 146 671 (app. EUR 413 203.87)
għall-2018, HRK 3 209 604 (app. EUR 421 467.94)
għall-2019, HRK 3 273 796 (app. EUR 429 897.30)
għall-2020 u l-ammont totali se jkun: HRK 18 704 706 (app.
EUR 2 456 200.83). L-eżekuzzjoni tal-miżura Id-dipartimenti kompetenti
taċ-Ċentru Kroat għall-Azzjoni fil-Minjieri (HCR) ser
jissorveljaw u jżommu reġistri tat-tħaddim tal-makkinarju.
Għandhom jinżammu rekords għal kull proġett (sit). Se jkun
hemm formola speċjali għal kull magna li fuqha se jiġu
rreġistrati s-sigħat ta’ operat, il-prestazzjoni u l-konsum
tal-fjuwil għal kull jum. Meta proġett ikun intemm, l-operatur
tat-tneħħija tal-mini għandu jissottometti formola tat-taxxa
tas-sisa għall-makkinarju tagħha impjegat fuq is-sit, akkumpanjata
minn formola ta' reġistrar għal kull magna. Il-formoli se jiġu
approvati mill-maniġer tas-sit u vverifikati minn uffiċjal HCR
responsabbli għall-monitoraġġ tal-proġett, li għandu
jkun preżenti fuq is-sit ta’ tneħħija ta’ mini f’kull ħin
għall-finijiet ta’ verifiki fuq il-post. Skont ir-responsabbiltà ġenerali
tagħha li tissorvelja l-implimentazzjoni tal-leġiżlazzjoni
fiskali, l-Amministrazzjoni tat-Taxxa tal-Ministeru tal-Finanzi se twettaq,
abbażi ta’ informazzjoni dwar is-sit fejn tkun qed isseħħ
l-attività ta’ tneħħija ta’ mini, kontrolli sistematiċi
tal-fjuwil li jintuża f’makkinarju għat-tneħħija tal-mini
barra milli twettaq id-dmirijiet ta’ monitoraġġ l-oħra
tagħha. L-eżenzjoni mit-taxxa għandha tingħata permezz ta’
ħlas lura tas-sisa mħallsa. L-argumenti
tal-awtoritajiet Kroati dwar l-impatt tal-miżura fuq is-suq intern Il-miżura
mhux se tiffavorixxi ċerti impriżi fuq oħrajn, peress li ser
tapplika għall-impriżi kollha involuti fit-tneħħija
tal-mini għal skopijiet umanitarji, u b’hekk ebda vantaġġ
ekonomiku mhu ser jingħata lil kwalunkwe intrapriża partikolari
involuta. Bl-istess mod il-Kroazja tassumi li l-miżura mhux se taffettwa
l-kummerċ fi ħdan l-UE minħabba n-natura speċifika
tagħha u li hija limitata għaż-żoni kkontaminati bil-mini
tar-Repubblika tal-Kroazja. Dispożizzjonijiet eżistenti
fil-qasam tal-proposta Id-Direttiva tal-Kunsill 2003/96/KE
tas-27 ta' Ottubru 2003 li tirriforma l-istruttura tal-Komunità
dwar tassazzjoni fuq prodotti ta' enerġija u elettriku b'mod partikolari
l-Artikoli 8(1) u 8(2)(c) u (d). Valutazzjoni tal-miżura skont
l-Artikolu 19 tad-Direttiva 2003/96/KE Konsiderazzjonijiet speċifiċi
ta’ politika L-Artikolu 19(1), l-ewwel subparagrafu,
tad-Direttiva jgħid hekk: "Flimkien
ma’ dawn id-dispożizzjonijiet msemmija fl-Artikoli ta' qabel, b'mod
partikolari l-Artikoli 5, 15 u 17, il-Kunsill, li jaġixxi
b'mod unanimu fuq xi proposta tal-Kummissjoni, jista' jawtorizza lil kwalunkwe
Stat Membru biex jintroduċi iktar eżenzjonijiet u tnaqqis
għall-konsiderazzjonijiet politiki speċifiċi." Permezz tal-eżenzjoni mit-taxxa in
kwistjoni, l-awtoritajiet Kroati isegwu l-għan li jħaffu
t-tneħħija tal-mini fiż-żona miż-żoni
kkontaminati li fadal f’diversi reġjuni tal-Kroazja. Mingħajr
il-miżura, iż-żejt tal-gass li jintuża biex jitħaddem
il-makkinarju tat-tneħħija tal-mini għal skopijiet umanitarji
jkun intaxxat HRK 2 860 (app. EUR 375.54) kull 1 000 l. Ta'
min jinnota li l-Kroazja tapplika l-istess rata ta' tassazzjoni
għaż-żejt tal-gass li jintuża bħala propellant u
għall-għanijiet stabbiliti fl-Artikolu 8(2)(c) u (d) tad-Direttiva
2003/96/KE. Barra minn hekk, l-applikazzjoni (b'limitu ta' żmien) ta’
eżenzjoni fiskali mitluba toħloq inċentiv għall-operaturi
ekonomiċi involuti f’attivitajiet ta’ tneħħija ta’ mini għal
skopijiet umanitarji biex jiffinalizzaw il-ħidma tagħhom qabel ma
jiskadi l-perjodu ta’ sitt snin tal-miżura u għalhekk jikkontribwixxi
għall-għan ta’ politika ddikjarat, li huwa li titħaffef
it-tneħħija tal-mini fiż-żona ta’ żoni kkontaminati li
jifdal. Fil-Kroazja, minbarra l-miżura prevista, m’hemmx sussidji
oħra li japplikaw għal operaturi ekonomiċi involuti
fit-tneħħija tal-mini għal skopijiet umanitarji. Il-Kroazja enfasizzat li l-applikazzjoni
tal-miżura hija mistennija li jkollha effetti pożittivi immedjati fuq
il-ħajja u s-saħħa tal-bniedem fiż-żoni kkontaminati
b’mini u munizzjon li għadu ma splodiex. B’konformità ma’ dan ta’ hawn
fuq, il-Kummissjoni tinnota li skont l-informazzjoni pprovduta
mill-awtoritajiet Kroati fil-perjodu bejn l-1991 u l-2013,
1 976 persuna sostnew korrimenti marbuta mal-mini fil-Kroazja, fejn
510 minnhom mietu. Tinnota wkoll li dan it-telf ta’ dħul min-nuqqas ta’
kultivazzjoni ta' art agrikola kkontaminata bil-mini jista’ tilħaq
l-ammont ta’ EUR 50 miljun. Wieħed jista' jikkonkludi li x-xewqa li
tiġi applikata eżenzjoni tat-taxxa għaż-żejt tal-gass
li jintuża biex jitħaddem il-makkinarju fit-tneħħija
tal-mini għal skopijiet umanitarji f’diversi reġjuni tal-Kroazja hija
bbażata fuq kunsiderazzjonijiet speċifiċi ta’ politika b’mod
partikolari fir-rigward ta' politika soċjali, tas-sikurezza,
tas-saħħa u reġjonali. Il-konsistenza mal-politiki u
mal-għanijiet l-oħra tal-Unjoni Il-miżura mitluba tirrigwarda
prinċipalment il-politika reġjonali tal-UE dwar is-saħħa u
l-ambjent sal-punt li tgħin parzjalment għat-tnaqqis aktar rapidu
taż-żoni kkontaminati bil-mini tar-Repubblika tal-Kroazja li
jippreżentaw theddida għall-ħajja u s-saħħa
tal-bniedem, annimali domestikati u slavaġ. Wieħed għandu
jinnota li huwa stmat li 900 000 persuna fil-Kroazja għadhom
jgħixu qrib żoni susspettati li għandhom il-mini u b'hekk
is-saħħa u s-sikurezza tagħhom qiegħda fil-periklu. Il-Kummissjoni tinnota li l-miżura hija
limitata għal żejt tal-gass li jintuża f’magni
speċifiċi akkreditati imfassla u mibnija speċifikament
għat-tindif ta’ żoni fejn hemm il-mini u li hija limitata wkoll
għal żoni kkontaminati bil-mini fir-Repubblika tal-Kroazja. Ta’ min
isemmi wkoll li dawn il-magni ma jistgħux jintużaw għal
kwalunkwe tip ta’ trasport fit-toroq pubbliċi. Għaldaqstant jista' jiġi
konkluż li l-miżura hija kompatibbli mal-politiki tal-Unjoni fl-oqsma
ta' saħħa, ambjent, enerġija u trasport. Skont iċ-ċirkostanzi deskritti,
il-miżura tidher li hija aċċettabbli wkoll mill-aspett
tal-funzjonament xieraq tas-suq intern u l-ħtieġa biex tkun
żgurata l-kompetizzjoni ġusta. B’mod partikolari, minħabba
l-fatt li l-miżura mhix se tiffavorixxi ċerti intrapriżi fuq
oħrajn peress li ser tapplika għall-intrapriżi kollha involuti
fit-tneħħija tal-mini għal skopijiet umanitarji fil-Kroazja.
Bl-istess mod, il-miżura mhux se taffettwa l-kummerċ fi ħdan
l-UE minħabba n-natura speċifika tagħha u li hija limitata
għaż-żoni kkontaminati bil-mini tar-Repubblika tal-Kroazja. Il-perjodu ta’
applikazzjoni tal-miżura Il-Kummissjoni tissuġġerixxi li
l-perjodu ta' applikazzjoni għandu jiġi stabbilit skont il-perjodu
massimu permess mid-Direttiva 2003/96/KE, jiġifieri sitt snin. Dan
il-perjodu jidher li huwa adattat biex jippermetti lill-awtoritajiet Kroati
biex jiġbru l-informazzjoni biex jivvalutaw ir-riżultati tal-miżura
u biex jipprovdu lill-operaturi ekonomiċi li jkunu qed jibbenefikaw minnha
livell suffiċjenti ta’ ċertezza u biżżejjed ħin biex
jikkonkludu l-proċess tat-tneħħija tal-mini miż-żoni
kkontaminati. Regoli dwar l-għajnuna mill-Istat L-awtoritajiet Kroati pprevedew li tapplika eżenzjoni
tat-taxxa għaż-żejt tal-gass li jintuża biex jitħaddem
makkinarju fit-tneħħija tal-mini għal skopijiet umanitarji
permezz ta’ rifużjoni tad-dazju tas-sisa kollu. Il-miżura
tikkostitwixxi għajnuna mill-Istat u għandha tiġi nnotifikata
lill-Kummissjoni skont l-Artikolu 108(3) tat-TFUE. 2. IR-RIŻULTATI
TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET
TAL-IMPATT Il-konsultazzjoni
mal-partijiet interessati Din il-proposta hija bbażata fuq talba
mill-Kroazja u tikkonċerna biss dan l-Istat Membru. Ġbir u
użu ta’ kompetenzi Ma kienx hemm bżonn ta’ kompetenzi
esterni. Valutazzjoni
tal-impatt Din il-proposta tikkonċerna
awtorizzazzjoni lil Stat Membru individwali fuq talba tiegħu stess. 3. L-ELEMENTI LEGALI
TAL-PROPOSTA Il-prinċipju tas-sussidjarjetà Il-qasam tat-tassazzjoni indiretta kopert
mill-Artikolu 113 TFUE mhuwiex fih innifsu fil-kompetenza esklussiva
tal-Unjoni Ewropea fi ħdan it-tifsira tal-Artikolu 3 TFUE. Madankollu, l-eżerċizzju tal-Istati
Membri tal-kompetenzi tagħhom f’dan il-qasam huwa ċirkoskritt u
limitat ħafna mil-liġi eżistenti tal-UE. Skont
l-Artikolu 19 tad-Direttiva 2003/96/KE, il-Kunsill biss għandu
s-setgħa li jawtorizza lil xi Stat Membru jintroduċi
eżenzjonijiet jew tnaqqis ulterjuri, skont it-tifsira ta’ dik id-dispożizzjoni.
L-Istati Membri ma jistgħux jieħdu post il-Kunsill. Il-proposta għalhekk tirrispetta
l-prinċipju tas-sussidjarjetà. Il-prinċipju
tal-proporzjonalità Il-proposta tirrispetta l-prinċipju
tal-proporzjonalità. It-tnaqqis fit-taxxa ma jeċċedix dak li hu
neċessarju biex jintlaħaq l-għan inkwistjoni (ara
l-kunsiderazzjonijiet dwar l-aspetti tas-suq intern u l-kompetizzjoni
ġusta, hawn fuq). Għażla
tal-istrumenti Strument(i) propost(i): Deċiżjoni
tal-Kunsill. L-Artikolu 19 tad-Direttiva 2003/96 jipprovdi
għal din it-tip ta’ miżura biss. 4. IMPLIKAZZJONI BAĠITARJA
Il-miżura ma timponi l-ebda piż
finanzjarju jew amministrattiv fuq l-Unjoni. Il-proposta għalhekk ma
għandha l-ebda impatt fuq il-baġit tal-Unjoni. 2014/0312 (NLE) Proposta għal DEĊIŻJONI TA’ IMPLIMENTAZZJONI
TAL-KUNSILL li tawtorizza lill-Kroazja biex tapplika
eżenzjoni tat-taxxa għaż-żejt tal-gass li jintuża biex
jitħaddem makkinarju għat-tneħħija tal-mini għal
skopijiet umanitarji b’konformità mal-Artikolu 19 tad-Direttiva 2003/96/KE IL-KUNSILL TAL-UNJONI EWROPEA, Wara li kkunsidra it-Trattat dwar
il-Funzjonament tal-Unjoni Ewropea, Wara li kkunsidra d-Direttiva tal-Kunsill
2003/96/KE tas-27 ta’ Ottubru 2003 li tirriforma l-istruttura
tal-Komunità dwar tassazzjoni fuq prodotti ta’ enerġija u elettriku ([6]), u b’mod partikolari
l-Artikolu 19 tagħha, Wara li kkunsidra l-proposta mill-Kummissjoni
Ewropea, Billi: (1) Permezz ta’ ittra ddatata t-8
ta’ April 2014, l-awtoritajiet Kroati talbu deċiżjoni ta'
awtorizzazzjoni li se tippermetti lill-Kroazja tapplika eżenzjoni
tat-taxxa għaż-żejt tal-gass li jintuża biex iħaddem
il-makkinarju fit-tneħħija tal-mini għal skopijiet umanitarji
f’konformità mal-Artikolu 19 tad- Direttiva 2003/96/KE. (2) Bl-eżenzjoni fit-taxxa
li bi ħsiebha tapplika, il-Kroazja għandha l-għan li
tħaffef it-tneħħija tal-mini fiż-żoni kkontaminati li
fadal f’diversi reġjuni. Il-miżura għalhekk se jkollha effetti
pożittivi immedjati fuq il-ħajja u s-saħħa tal-bniedem
f’dawn ir-reġjuni. (3) Il-miżura hija limitata
għal magni speċifiċi akkreditati imfassla u mibnija
speċifikament għat-tindif ta’ żoni fejn hemm il-mini. (4) Il-miżura hija limitata
għal żoni kkontaminati bil-mini fit-territorju tal-Kroazja. (5) Il-miżura se tapplika
għall-operaturi kollha involuti fit-tneħħija tal-mini għal
skopijiet umanitarji fil-Kroazja, u b’hekk ebda vantaġġ ekonomiku mhu
ser jingħata lil kwalunkwe operatur partikolari involut. (6) Konsegwentement,
il-miżura hija aċċettabbli mill-perspettiva tal-funzjonament
xieraq tas-suq intern u l-ħtieġa biex tkun żgurata
l-kompetizzjoni ġusta u hija kompatibbli mal-politiki tal-Unjoni Ewropea
fl-oqsma tas-saħħa, l-ambjent, l-enerġija u t-trasport. (7) Mill-Artikolu 19(2)
tad-Direttiva 2003/96/KE jirriżulta li kull awtorizzazzjoni mogħtija
skont dan l-Artikolu jrid ikollha żmien strettament limitat. Sabiex
l-operaturi ekonomiċi kkonċernati jiġu pprovduti b’livell
suffiċjenti ta’ ċertezza u biżżejjed żmien biex
jikkonkludu l-proċess ta’ tneħħija tal-mini taz-zoni
kkontaminati, qed tingħata awtorizzazzjoni għal perjodu ta’ sitt
snin. (8) Din id-Deċiżjoni
hija bla ħsara għall-applikazzjoni tar-regoli tal-Unjoni dwar
l-għajnuna mill-Istat, ADOTTA DIN ID-DEĊIŻJONI: Artikolu 1 Il-Kroazja hija b’dan awtorizzata li
teżenta mit-tassazzjoni, iż-żejt tal-gass li jintuża sabiex
jitħaddem il-makkinarju speċjalizzat li jintuża
fit-tneħħija tal-mini għal skopijiet umanitarji fit-territorju
tiegħu. Il-miżura hija limitata għal magni speċifiċi
akkreditati imfassla u mibnija speċifikament għat-tindif ta’
żoni fejn hemm il-mini. Artikolu 2 Din id-Deċiżjoni għandha
jkollha effett fl-istess jum tan-notifika tagħha. Tiskadi sitt snin wara. Artikolu 3 Din
id-Deċiżjoni hija indirizzata lir-Repubblika tal-Kroazja. Magħmul fi Brussell, Għall-Kunsill Il-President ([1]) Id-Direttiva
tal-Kunsill 2003/96/KE tas-27 ta' Ottubru 2003 li tirriforma l-istruttura
tal-Komunità dwar tassazzjoni fuq prodotti ta' enerġija u elettriku
(ĠU L 283, 31.10.2003, p. 51). ([2]) Il-kalkolazzjonijiet
kollha huma bbażati fuq ir-rata tal-kambju
fl-1 ta’ Ottubru 2013, jiġifieri HRK 7,6153 għal
EUR 1. Cf. ĠU C 286, 2.10.2013. ([3]) Gazzetta
Uffiċjali tar-Repubblika tal-Kroazja-NN Nri 153/2005, 63/2007 u 152/2008. ([4]) Gazzetta
Uffiċjali tar-Repubblika tal-Kroazja-NN Nri 53/2007, 111/2007 u 141/2011. ([5]) Gazzetta
Uffiċjali tar-Repubblika tal-Kroazja-NN Nri 53/2007, 39/2011 u 57/2013. ([6]) ĠU
L 283, 31.10.2003, p. 51.