52013PC0142

MEMORANDUM TA’ SPJEGAZZJONI

1.           SFOND

Il-Ftehim dwar l-Akkwist Pubbliku mill-Gvern (GPA)[1] huwa attwalment l-uniku ftehim li jorbot legalment fid-WTO dwar is-suġġett ta’ akkwist pubbliku mill-gvern. Fil-verżjoni preżenti tagħha kien innegozjat b’mod parallel mal-Uruguay Round fl-1994, u daħal fis-seħħ fl-1 ta’ Jannar 1996 (ll-“GPA tal-1994”).

Il-Partijiet tal-GPA tal-1994 huma: L-Armenja, il-Kanada, l-Unjoni Ewropea fir-rigward tas-27 Stat Membru tagħha, Ħong Kong-Ċina, l-Islanda, l-Israel, il-Ġappun, il-Korea, il-Liechtenstein, il-Pajjiżi l-Baxxi fir-rigward ta’ Aruba, in-Norveġja, Singapor, l-Isvizzera, it-Tajpej Ċiniża, l-Istati Uniti. Il-GPA huwa amministrat mill-Kumitat dwar l-Akkwist Pubbliku mill-Gvern (minn hawn ’il quddiem il-“Kumitat”).

Il-GPA tal-1994 fih impenn intrinsiku għan-negozjati dwar kemm it-test kif ukoll il-kopertura tal-Ftehim mill-adozzjoni tiegħu fl-1994 (l-Artikolu XXIV:7(b)). Negozjati għal dan il-għan ġew imnedija fl-1999.

In-negozjati ġew imexxija mill-Kummissjoni f’isem l-UE. Il-Kunsill kien regolarment mgħarraf verbalment u bil-miktub dwar is-sitwazzjoni attwali tan-negozjati permezz tal-Kumitat tal-Politika Kummerċjali. Barra minn hekk, laqgħat ta’ koordinazzjoni mal-Istati Membri kienu miżmuma qabel kull sessjoni ta’ negozjati f’Ġinevra. Il-Parlament Ewropew ġie infurmat b’mod regolari bil-miktub permezz tal-Kumitat INTA.

Fit-30 ta’ Marzu 2012 in-negozjaturi addottaw Deċiżjoni dwar ir-Riżultati tan-Negozjati li biha addottaw l-elementi tar-riżultati tan-negozjati (“Deċiżjoni dwar ir-Riżultati tan-Negozjati”) magħmula minn: i) il-Protokoll li jemenda l-Ftehim dwar l-Akkwist Pubbliku mill-Gvern (minn hawn ’il quddiem il-“Protokoll”) u ii) is-seba’ Deċiżjonijiet (minn hawn ’il quddiem “id-Deċiżjonijiet”) tal-Kumitat. Permezz tad-Deċiżjoni dwar ir-Riżultati tan-Negozjati, il-Partijiet tal-GPA adottaw il-Protokoll u fetħuh għal aċċettazzjoni mill-Partijiet tal-GPA tal-1994. Il-Protokoll se jidħol fis-seħħ għal dawk il-Partijiet tal-GPA tal-1994 li ddepożitaw l-istrumenti rispettivi tagħhom ta’ aċċettazzjoni ta’ dan il-Protokoll, fit-30 jum li jsegwi t-tali depożitu minn żewġ terzi tal-Partijiet tal-GPA tal-1994. Barra minn hekk, id-Deċiżjoni dwar ir-Riżultati tan-Negozjati tistipula d-Deċiżjonijiet tal-Kumitat li jistabbilixxu programmi ta’ ħidma tal-ġejjieni tal-Kumitat u li jiddeskrivi fid-dettall r-rekwiżiti ta’ notifika skont l-Artikoli XIX u XXII tal-Ftehim.

Id-Deċiżjonijiet huma parti mill-pakkett innegozjat u jirriflettu l-impenn tal-Partijiet tal-GPA biex jibdew jimplimentaw ċerti dispożizzjonijiet tal-GPA rivedut, malli l-Protokoll jidħol fis-seħħ.

Fid-dawl tas-sostanza tagħhom ma kienx ikkunsidrat xieraq li jinkludu d-Deċiżjonijiet fil-Protokoll innifsu, biex b’hekk jissoġġettawhom għall-istess proċeduri tal-amendi Lanqas kien possibbli li jaddottawhom qabel id-dħul fis-seħħ tad-dispożizzjonijiet tal-Protokoll li jkunu qed jimplimentaw. Il-partijiet tal-GPA għalhekk laħqu ftehim dwar is-sostanza tad-Deċiżjonijiet, li jkunu jridu jingħataw effett fl-ewwel laqgħa tal-Kumitat wara d-dħul fis-seħħ tal-Protokoll, meta l-Kumitat jieħu deċiżjoni li tikkonferma l-impenn politiku biex jadotta d-deċiżjonijiet b’effett mid-data tad-dħul fis-seħħ tal-Protokoll.

Billi kemm il-Protokoll kif ukoll dawn id-Deċiżjonijiet huma s-suġġett tal-ftehim politiku adottat f’Marzu 2012, dawn jiffurmaw parti mill-istess pakkett għall-iskop tar-ratifika tal-UE tar-reviżjoni tal-GPA. Billi l-Unjoni se tkun meħtieġa biex tieħu pożizzjoni rigward id-Deċiżjonijiet fl-ewwel laqgħa tal-Kumitat wara d-dħul fis-seħħ tal-Protokoll, id-Deċiżjonijiet huma soġġetti għal proċedura interna differenti mill-Protokoll biex jittieħdu deċiżjonijiet. Għalhekk Deċiżjoni tal-Kunsill separata hija meħtieġa fir-rigward tad-Deċiżjonijiet,  minbarra dik li tikkonċerna l-konklużjoni tal-Protokoll 

Jekk il-Kunsill, wara li jikseb il-kunsens tal-Parlament Ewropew, jaddotta deċiżjoni biex jikonkludi l-Protokoll li Jemenda l-Ftehim dwar l-Akkwist Pubbliku mill-Gvern f’isem l-Unjoni Ewropea, l-Unjoni għandha tkun f'pożizzjoni li tieħu pożizzjoni fir-rigward tad-Deċiżjonijiet fi ħdan il-Kumitat.

2.           IR-RIŻULTAT TAN-NEGOZJATI

Id-deċiżżjonijiet li għandhom jiġu addottati huma dawn li ġejjin:

i) Id-Deċiżjoni tal-Kumitat dwar l-Akkwist Pubbliku mill-Gvern dwar ir-rekwiżiti tan-Notifika skont l-aArtikoli XIX u XXII  tal-Ftehim: hi timmira li tiffaċilita rekwiżiti ta’ notifika, billi tikkjarifika l-modalitajiet ta’ notifika minn Parti fir-rigward tat-tibdiliet għal-liġijiet u r-regolamenti tagħha u l-lista tal-entitajiet tagħha.

ii) Id-Deċiżjoni tal-Kumitat dwar l-Akkwist Pubbliku mill-Gvern dwar l-adozzjoni ta’ programmi ta’ ħidma: tidentifika xi programmi ta’ ħidma speċifiċi li fuqhom il-Partijiet jintrabtu li jwettqu xogħol fil-ġejjieni.

iii) Id-Deċiżjoni tal-Kumitat dwar l-Akkwist Pubbliku mill-Gvern dwar Programm ta’ Ħidma fuq l-SMEs: tistabbilixxi programm ta’ ħidma fuq l-SMEs, bil-għan li tiffaċilita l-parteċipazzjoni tal-SMEs fl-akkwisti pubbliku mill-gvern, l-evitar ta’ miżuri diskriminatorji tal-SMEs u li tiżdied it-trasparenza.

iv) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar il-ġbir u r-rappurtar ta’ dejta tal-istatistika: għandha l-għan li tiffaċilita l-konformità mal-obbligu li tinġabar dejta tal-istatistika.

v) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar l-akkwist pubbliku sostenibbli: tistabbilixxi programm ta’ ħidma mmirat li jiżgura li l-politiki ta’ akkwist pubbliku sostenibbli huma kompatibbli mal-prinċipji ta’ nondiskriminazzjoni u trasparenza.

vi) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar l-esklużjonijiet u r-restrizzjoni fl-Annessi tal-partijiet: tadotta programm ta’ ħidma bil-għan li progressivament jitnaqqsu l-esklużjonijiet u r-restrizzjonijiet li l-Partijiet ikunu prevedew fl-Annessi tagħhom.

vii) Id-Deċiżjoni dwar programm ta’ ħidma dwar l-istandards tas-sikurezza: tadotta programm ta’ ħidma mmirata sabiex jiġi żgurat li t-tħassib tas-sigurtà pubblika huwa applikat b’mod li ma joħolqux diskriminazzjoni arbitrarja u mhux ġustifikata jew restrizzjonijiet moħbija.

Safejn dawn jiffaċilitaw l-implimentazzjoni tal-prinċipji tal-GPA u jikkontribwixxu għall-eliminazzjoni ta’ prassi diskriminatorji, l-adozzjoni tad-Deċiżjonijiet se toħloq ambjent favorevoli għal aktar ftuħ ta’ akkwist pubbliku mill-gvern.

2013/0077 (NLE)

Proposta għal

DEĊIŻJONI TAL-KUNSILL

li tistabbilixxi l-pożizzjoni li trid tittieħed mill-Unjoni Ewropea fi ħdan il-Kumitat dwar l-Akkwist Pubbliku mill-Gvern fir-rigward ta’ deċiżjonijiet li jimplimentaw ċerti dispożizzjonijiet tal-Protokoll li Jemenda l-Ftehim dwar l-Akkwist Pubbliku mill-Gvern

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel subparagrafu tal-Artikolu 207(4), flimkien mal-Artikolu 218(9), tiegħu,

Wara li kkunsidraw il-proposta tal-Kummissjoni Ewropea,

Billi:

(1)       In-negozjati dwar ir-reviżjoni tal-Ftehim tad-WTO dwar l-Akkwist Pubbliku mill-Gvern (GPA) ġew imnedija f’Jannar 1999, ibbażati fuq impenn intrinsiku tal-Artikolu XXIV:7(b) tal-GPA.

(2)       In-negozjati tmexxew mill-Kummissjoni b’konsultazzjoni mal-Kumitat stabbilit bl-Artikolu 207 tat-Trattat dwar il-Funzjonament tal-Unjoni Ewropea.

(3)       Fil-kuntest ta’ dawn in-negozjati, fit-30 ta’ Marzu 2012 in-negozjaturi laħqu ftehim dwar Protokoll li Jemenda l-Ftehim dwar l-Akkwist Pubbliku mill-Gvern (“il-Protokoll”) kif ukoll dwar seba’ deċiżjonijiet li għandhom jiġu adottati mill-Kumitat dwar l-akkwist pubbliku mill-Gvern li jibdew l-implimentazzjoni ta’ ċerti dispożizzjonijiet tal-Protokoll immedjatament mad-dħul fis-seħħ tagħhom. Dawn huma dawn li ġejjin: i) Id-Deċiżjoni tal-Kumitat dwar l-Akkwist Pubbliku mill-Gvern dwar ir-rekwiżiti ta’ notifika skont l-Artikolu XIX u XXII tal-Ftehim; ii) Id-Deċiżjoni tal-Kumitat dwar l-akkwist pubbliku mill-Gvern dwar l-adozzjoni ta’ programmi ta’ ħidma; iii) Id-Deċiżjoni tal-Kumitat dwar l-akkwist pubbliku mill-Gvern dwar programm ta’ Ħidma fuq l-SMEs; iv) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar il-ġbir u r-rappurtar ta’ dejta tal-istatistika; v) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar l-akkwist pubbliku sostenibbli; vi) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar l-esklużjonijiet u r-restrizzjoni fl-Annessi tal-partijiet; vii) Id-Deċiżjoni dwar programm ta’ ħidma dwar l-istandards tas-sikurezza; (minn hawn ’il quddiem “id-Deċiżjonijiet”).

(4)       Il-ftehim milħuq fit-30 ta’ Marzu 2012 għandu jingħata effett fl-ewwel laqgħa tal-Kumitat dwar l-Akkwist Pubbliku mill-Gvern wara d-dħul fis-seħħ tal-Protokoll. F’dik il-laqgħa l-Kumitat dwar l-Akkwist Pubbliku mill-Gvern se jieħu deċiżjoni li tikkonferma l-adozzjoni ta’ dawn is-seba’ Deċiżjonijiet u d-dħul tagħhom fis-seħħ mid-data tad-dħul fis-seħħ tal-Protokoll.

(5)       Safejn id-Deċiżjonijiet jiffaċilitaw l-implimentazzjoni tal-prinċipji tal-Ftehim dwar l-Akkwist Pubbliku mill-Gvern bħala riveduti u jikkontribwixxu għall-eliminazzjoni ta’ prassi diskriminatorji, l-adozzjoni tad-Deċiżjonijiet se tiffaċilita aktar ftuħ ta’ akkwist pubbliku mill-gvern.

(6)       Huwa xieraq, għalhekk, li tiġi stabbilita l-pożizzjoni li trid tittieħed mill-Kummissjoni f’isem l-Unjoni fi ħdan il-Kumitat dwar l-Akkwist Pubbliku mill-Gvern fir-rigward tad-Deċiżjonijiet.

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed mill-Unjoni Ewropea fi ħdan il-Kumitat dwar l-Akkwist Pubbliku mill-Gvern huwa li jikkonferma l-adozzjoni ta’ dan li ġej: i) Id-Deċiżjoni tal-Kumitat dwar l-Akkwist Pubbliku mill-Gvern dwar ir-rekwiżiti ta’ notifika skont l-Artikolu XIX u XXII tal-Ftehim; ii) Id-Deċiżjoni tal-Kumitat dwar l-Akkwist Pubbliku mill-Gvern dwar l-adozzjoni ta’ programmi ta’ ħidma; iii) Id-Deċiżjoni tal-Kumitat dwar l-akkwist pubbliku mill-Gvern dwar programm ta’ Ħidma fuq l-SMEs; iv) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar il-ġbir u r-rappurtar ta’ dejta tal-istatistika; v) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar l-akkwist pubbliku sostenibbli; vi) Id-Deċiżjoni tal-Kumitat dwar l-Akkwist Pubbliku mill-Gvern dwar programm ta’ ħidma dwar l-esklużjonijiet u r-restrizzjoni fl-Annessi tal-partijiet; vii) Id-Deċiżjoni dwar programm ta’ ħidma dwar l-istandards tas-sikurezza; u taqbel li d-dħul tagħhom fis-seħħ mid-data tad-dħul fis-seħħ tal-Protokoll li jemenda l-Ftehim dwar l-Akkwisti Pubbliku mill-Gvern.

Din il-pożizzjoni għandha tiġi espressa mill-Kummissjoni.

It-test tad-Deċiżjonijiet huwa mehmuż ma’ din id-Deċiżjoni.

Artikolu 2

Din id-Deċiżjoni għandha tidħol fis-seħħ fil-jum tal-adozzjoni tagħha.

Magħmul fi Brussell,

                                                                       Għall-Kunsill

                                                                       Il-President

[1]               Il-Ġurnal Uffiċjali J C 256, 3.9. 1996, p. 1

ANNESS

Anness A Deċiżjoni tal-Kumitat dwar l-Akkwist Pubbliku dwar ir-Rekwiżiti ta’ Notifika skont l-Artikoli XIX u XXII tal-Ftehim.. 2

Anness B Deċiżjoni tal-Kumitat dwar l-Akkwist Pubbliku dwar l-Adozzjoni ta’ Programmi ta’ Ħidma  4

Anness C Deċiżjoni tal-Kumitat dwar l-Akkwist Pubbliku dwar Programm ta’ Ħidma dwar l-SMEs  5

Anness D Deċiżjoni tal-Kumitat dwar l-Akkwist Pubbliku dwar Programm ta’ Ħidma għall-Ġbir u r-Rapportar ta’ Dejta Statistika. 8

Anness E Deċżijoni tal-Kumitat dwar l-Akkwist Pubbliku dwar Programm ta’ Ħidma dwar l-Akkwist Sostenibbli 10

Anness F Deċiżjoni tal-Kumitat dwar l-Akkwist Pubbliku dwar Programm ta’ Ħidma dwar l-Esklużjonijiet u r-Restrizzjonijiet fl-Annessi tal-Partijiet 11

Anness G Deċiżjoni tal-Kumitat dwar l-Akkwist Pubbliku dwar Programm ta' Ħidma dwar l-Istandards tas-Sikurezza fl-Akkwist Internazzjonali 13

Anness A Deċiżjoni tal-Kumitat dwar l-Akkwist Pubbliku dwar ir-Rekwiżiti ta’ Notifika skont l-Artikoli XIX u XXII tal-Ftehim

Deċiżjoni tat-30 ta' Marzu 2012.

Il-Kumitat dwar l-Akkwist Pubbliku,

Filwaqt li jikkunsidra l-importanza tat-trasparenza tal-liġijiet u r-regolamenti rilevanti għal dan il-Ftehim, inklużi l-bidliet għalih kif meħtieġ mill-Artikolu XXII:5 tal-Ftehim;

Filwaqt li jikkunsidra l-importanza taż-żamma ta’ listi preċiżi ta’ entitajiet koperti taħt l-Annessi ta' Parti tal-Appendiċi I tal-Ftehim, skont l-Artikolu XIX tal-Ftehim;

Filwaqt li jirrikonoxxi l-isfidi għall-Partijiet biex jissottomettu notifiki f'waqthom lill-Kumitat fir-rigward tal-bidliet għal-liġijiet u r-regolamenti tagħhom li huma rilevanti għall-Ftehim, kif meħtieġ mill-Artikolu XXII:5 tal-Ftehim, u tar-rettifiki proposti għall-Annessi tiegħu tal-Appendiċi I, kif meħtieġ mill-Artikolu XIX:1 tal-Ftehim;

Filwaqt li jikkunsidra li d-dispożizzjonijiet tal-Artikolu XIX tal-Ftehim jiddistingwu bejn in-notifiki ta’ rettifiki proposti li ma jbiddlux il-kopertura miftehma b’mod reċiproku prevista fil-Ftehim u tipi oħra ta' modifiki proposti tal-Annessi tiegħu tal-Appendiċi I;

Filwaqt li jirrikonoxxi li permezz tat-tibdiliet teknoloġiċi bosta Partijiet setgħu jagħmlu użu minn mezzi elettroniċi biex jipprovdu informazzjoni dwar ir-reġimi ta’ akkwist pubbliku tagħhom u biex jinnotifikaw il-Partijiet tal-bidliet għal dak ir-reġim;

Hawnhekk jiddeċiedu kif ġej:

Notifiki Annwali ta' Bidliet fil-Liġijiet u r-Regolamenti

1.         Meta Parti żżomm midja elettronika uffiċjalment deżinjata li tipprovdi ħoloq għal-liġijiet u r-regolamenti attwali tagħha li huma rilevanti għal dan il-Ftehim u l-liġijiet u r-regolamenti tagħha huma disponibbli f'waħda mil-lingwi uffiċjali tad-WTO, u tali midja hija elenkata fl-Appendiċi II, il-Parti tista’ tissodisfa r-rekwiżit fl-Artikolu XXII:5 billi tinnotifika lill-Kumitat darba fis-sena, fi tmiem is-sena, dwar kwalunkwe bidla sakemm dawn il-bidliet huma sostantivi, jiġifieri, jistgħu jaffettwaw l-obbligi tal-Parti taħt il-Ftehim; u f'każijiet bħal dawn, għandha ssir minnufih notifika .

2.         Il-Partijiet għandu jkollhom opportunità biex jiddiskutu n-notifika annwali ta’ Parti matul l-ewwel laqgħa informali tal-Kumitat fis-sena ta' wara.

Rettifiki Proposti għall-Annessi ta’ Parti tal-Appendiċi 1

3.         Il-bidliet li ġejjin għall-Annessi ta’ Parti tal-Appendiċi I għandhom jitqiesu bħala rettifika skont l-Artikolu XIX tal-Ftehim:

(a)        bidla fl-isem ta’ entità;

(b)        fużjoni ta’ żewġ entitajiet jew aktar elenkati f'Anness; kif ukoll

(c)        is-separazzjoni ta' entità elenkata f’Anness f’żewġ entitajiet jew aktar li huma kollha miżjuda mal-entitajiet elenkati fl-istess Anness.

4.         Fil-każ ta' rettifiki proposti għall-Annessi ta’ Parti taħt l-Appendiċi I koperti taħt il-paragrafu 3, il-Parti għandha tinnotifika lill-Kumitat kull sentejn, b’bidu mid-dħul fis-seħħ tal-Protokoll ta’ Emenda għall-Ftehim Eżistenti (tal-1994) .

5.         Parti tista’ tinnotifika lill-Kumitat dwar oġġezzjoni għal rettifika proposta fi żmien 45 ġurnata mid-data taċ-ċirkolazzjoni tan-notifika lill-Partijiet. Skont l-Artikolu XIX:2, meta Parti tressaq oġġezzjoni, għandha tistipula r-raġunijiet għall-oġġezzjoni, inklużi r-raġunijiet għaliex temmen li r-rettifika proposta tkun tista’ taffettwa l-kopertura miftiehma b’mod reċiproku taħt il-Ftehim u għalhekk ir-rettifika mhijiex suġġetta għall-paragrafu 3. Jekk ma jkun hemm ebda oġġezzjoni bil-miktub, ir-rettifiki proposti jsiru effettivi 45 ġurnata wara ċ-ċirkolazzjoni tan-notifika, kif previst fl-Artikolu XIX:5(a).

6.         Fi żmien erba' snin mill-adozzjoni ta' din id-Deċiżjoni, il-Partijiet għandhom jirrevedu l-operat u l-effettività tagħha, u jagħmlu kull aġġustament meħtieġ.

Anness B Deċiżjoni tal-Kumitat dwar l-Akkwist Pubbliku dwar l-Adozzjoni ta’ Programmi ta’ Ħidma

Deċiżjoni tat-30 ta' Marzu 2012.

Il-Kumitat dwar l-Akkwist Pubbliku,

Filwaqt li jinnota li skont l-Artikolu XXII:8(b), il-Kumitat jista’ jadotta deċiżjoni li telenka programmi ta' ħidma addizzjonali, li l-Kumitat għandu jimpenja ruħu li jiffaċilita l-implimentazzjoni tal-Ftehim u n-negozjati stipulati fl-Artikolu XXII:7 tal-Ftehim;

Jiddeċiedi kif ġej:

1.         Il-programmi ta' ħidma li ġejjin huma miżjuda mal-lista ta’ programmi ta’ ħidma li abbażi tagħhom il-Kumitat għandu jwettaq ħidma futura:

(a)        reviżjoni tal-użu, it-trasparenza u l-oqfsa legali ta' sħubiji pubbliċi-privati, u r-relazzjoni tagħhom mal-akkwist kopert;

(b)        il-vantaġġi u l-iżvantaġġi tal-iżvilupp ta’ nomenklatura komuni għal prodotti u servizzi; kif ukoll

(c)        il-vantaġġi u l-iżvantaġġi tal-iżvilupp ta’ avviżi standardizzati.

2.         Il-Kumitat għandu jiżviluppa l-ambitu u l-iskeda ta’ żmien għal kull programm ta’ ħidma bħal dan f’data aktar ‘il quddiem.

3.         Il-Kumitat għandu perjodikament jirrevedi din il-lista ta’ programmi u jagħmel aġġustamenti xierqa.

Anness C Deċiżjoni tal-Kumitat dwar l-Akkwist Pubbliku dwar Programm ta’ Ħidma dwar l-SMEs

Deċiżjoni tat-30 ta' Marzu 2012.

Il-Kumitat dwar l-Akkwist Pubbliku,

Filwaqt li jinnota li l-Artikolu XXII:8(a) tal-Ftehim dwar l-Akkwist Pubbliku (il-Ftehim) jipprovdi li l-Partijiet għandhom jadottaw u jirrevedu perjodikament programm ta' ħidma, inkluż programm ta’ ħidma dwar impriżi żgħar u ta' daqs medju (SMEs);

Filwaqt li jirrikonoxxi l-importanza li jiffaċilita l-parteċipazzjoni tal-SMEs fl-akkwist pubbliku; kif ukoll

Filwaqt li jirrikonoxxi li l-Partijiet ftiehmu fl-Artikolu XXII:6 li jippruvaw jevitaw li jintroduċu jew jissoktaw miżuri diskriminatorji li jwasslu għal distorsjoni fl-akkwist miftuh;

Hawnhekk jadotta l-programm ta' ħidma li ġej fir-rigward tal-SMEs:

1.         Tnedija ta’ Programm ta’ Ħidma dwar l-SMEs: Fl-ewwel laqgħa tal-Kumitat wara d-dħul fis-seħħ tal-Protokoll ta’ Emenda għall-Ftehim Eżistenti (tal-1994), il-Kumitat għandu jniedi Programm ta’ Ħidma dwar l-SMEs. Il-Kumitat għandu jirrevedi l-miżuri u l-politiki għall-SMEs li l-Partijiet jużaw biex jassistu, jippromwovu, jinkoraġġixxu, jew jiffaċilitaw il-parteċipazzjoni mill-SMEs fl-akkwist pubbliku u jipprepara rapport tar-riżultati tar-reviżjoni.

2.         Evitar ta' Miżuri Diskriminatorji għall-SMEs: Il-Partijiet għandhom jevitaw l-introduzzjoni ta' miżuri diskriminatorji li jiffavorixxu biss lill-SMEs domestiċi u għandhom jiskoraġġixxu l-introduzzjoni ta’ miżuri u politiki bħal dawn mill-Partijiet aderenti.

3.         Programm ta’ Trasparenza u Stħarriġ tal-SMEs

3.1        Programm ta' Trasparenza

Mad-dħul fis-seħħ tal-Protokoll ta’ Emenda għall-Ftehim Eżistenti (tal-1994) , il-Partijiet li fl-Appendiċi I tagħhom għandhom dispożizzjonijiet speċifiċi għall-SMEs, inkluż twarrib, għandhom jinnotifikaw lill-Kumitat dwar dawn il-miżuri u politiki. In-notfika għandha tinkludi deskrizzjoni sħiħa tal-miżuri u politiki, il-qafas legali rilevanti tagħhom flimkien mal-operat tagħhom u l-valur tal-akkwist soġġett għal tali miżuri. Barra minn hekk, dawk il-Partijiet għandhom jinnotifikaw lill-Kumitat dwar kull bidla sostanzjali f’tali miżuri u politiki, skont l-Artikolu XXII:5 tal-Ftehim.

3.2        Stħarriġ tal-SMEs

(a)        Il-Kumitat għandu jistħarreġ dwar il-Partijiet, permezz tal-użu ta' kwestjonarju li jikseb informazzjoni rigward il-miżuri u l-politiki użati biex jassistu, jippromwovu, jinkoraġġixxu, jew jiffaċilitaw il-parteċipazzjoni mill-SMEs fl-akkwist pubbliku. Il-kwestjonarju għandu jipprova jikseb informazzjoni minn kull Parti rigward:

(i)         deskrizzjoni tal-miżuri u l-politiki użati mill-Parti, inklużi l-miri ekonomiċi, soċjali, u oħrajn tal-miżuri u l-politiki u kif dawn huma amministrati;

(ii)        kif il-Parti tiddefinixxi l-SMEs;

(iii)       sa liema livell il-Parti jkollha aġenziji jew istituzzjonijiet speċjalizzati li jassistu lill-SMEs fir-rigward tal-akkwist pubbliku;

(iv)       il-livell ta' parteċipazzjoni fl-akkwist pubbliku kemm f'termini ta' valur kif ukoll ta’ għadd ta’ kuntratti mogħtija lill-SMEs;

(v)        deskrizzjoni ta’ miżuri u politiki għas-sottokuntrattar lill-SMEs, inklużi l-miri, garanziji, u inċentivi tas-sottokuntrattar;

(vi)       l-iffaċilitar tal-parteċipazzjoni tal-SMEs f’offerti konġunti (b’fornituri kbar jew żgħar oħra);

(vii)       mizuri u politiki ffukati fuq li jingħataw opportunitajiet lill-SMEs biex jipparteċipaw fl-akkwist pubbliku (bħal trasparenza u disponibbiltà akbar tal-informazzjoni dwar l-akkwist pubbliku għall-SMEs; semplifikazzjoni tal-kwalifiki għall-parteċipazzjoni fl-offerti; tnaqqis fid-daqs tal-kuntratti; u l-iżgurar ta’ pagamenti f’waqthom għall-fornimenti ta’ prodotti u servizzi); kif ukoll

(viii)      l-użu ta' miżuri u politiki ta’ akkwist pubbliku li jistimulaw l-innovazzjoni tal-SMEs.

(b)        Il-ġabra ta’ Stħarriġ tal-SMEs mis-Segretarjat tad-WTO: Is-Segretarjat tad-WTO għandu jiffissa limitu ta' żmien għat-trażmissjoni tat-tweġibiet għall-kwestjonarju mill-Partijiet kollha tas-Segretarjat tad-WTO. Malli jaslu t-tweġibiet, is-Segretarjat għandu jipprepara ġabra tat-tweġibiet u jiċċirkola t-tweġibiet u l-ġabra lill-Partijiet. Is-Segretarjat għandu jinkludi lista ta' Partijiet bi tweġibiet pendenti.

(c)        Skambji fost il-Partijiet dwar it-Tweġibiet għall-Kwestjonarji tal-SMEs: Abbażi tad-dokument imħejji mis-Segretarjat tad-WTO, il-Kumitat għandu jistabbilixxi perjodu għall-iskambju tal-mistoqsijiet, talbiet għal informazzjoni addizzjonali, u kummenti dwar it-tweġibiet tal-Partijiet l-oħra.

4.         Valutazzjoni tar-Riżultati tal-Istħarriġ tal-SMEs u l-Implimentazzjoni tal-Eżiti tiegħu

4.1        Valutazzjoni tar-Riżultati tal-Istħarriġ tal-SMEs

Il-Kumitat għandu jidentifika l-miżuri u l-politiki li jqis bħala l-aħjar prattiki għall-promozzjoni u l-iffaċilitar tal-parteċipazzjoni tal-SMEs tal-Partijiet fl-akkwist pubbliku u jħejji rapport li jinkludi l-aħjar prattiki tal-miżuri u politiki u lista tal-miżuri l-oħra.

4.2        Implimentazzjoni tal-Eżitu tal-Istħarriġ tal-SMEs

(a)        Il-Partijiet għandhom jippromwovu l-adozzjoni tal-aħjar prattiki identifikati fil-valutazzjoni tal-istħarriġ biex jinkoraġġixxu u jiffaċilitaw il-parteċipazzjoni tal-SMEs tal-Partijiet fl-akkwist pubbliku.

(b)        Fir-rigward ta' miżuri oħra, il-Kumitat għandu jinkoraġġixxi lill-Partijiet li għandhom tali miżuri biex jirreveduhom bil-ħsieb li jeliminawhom jew japplikawhom għall-SMEs tal-Partijiet l-oħra. Dawn il-partijiet għandhom jinfurmaw lill-Kumitat dwar l-eżitu tar-reviżjoni.

(c)        Il-Partijiet li għandhom miżuri oħra għandhom jinkludu l-valur tal-akkwist soġġett għal tali miżuri fl-istatistika li dawn jissottomettu lill-Kumitat skont l-Artikolu XVI:4 tal-Ftehim.

(d)        Il-Partijiet jistgħu jitolbu l-inklużjoni ta’ tali miżuri oħra fin-negozjati futuri taħt l-Artikolu XXII:7 tal-Ftehim, u tali talbiet għandhom jitqiesu            b'mod favorevoli mill-Parti li jkollha tali miżuri.

5.         Reviżjoni

Sentejn wara d-dħul fis-seħħ tal-Protokoll ta’ Emenda tal-Ftehim Eżistenti (tal-1994) , il-Kumitat għandu jirrevedi l-effett tal-aħjar prattiki fuq l-espansjoni tal-parteċipazzjoni tal-SMEs tal-Partijiet fl-akkwist pubbliku, u jikkunsidra jekk prattiki oħrajn jistgħux isaħħu ulterjurment il-parteċipazzjoni mill-SMEs. Il-Kunsill jista' wkoll jikkunsidra l-effett ta' miżuri oħra fuq il-parteċipazzjoni tal-SMEs tal-Partijiet l-oħra fl-akkwist pubbliku tal-Partijiet li għandhom tali miżuri.

Anness D Deċiżjoni tal-Kumitat dwar l-Akkwist Pubbliku dwar Programm ta’ Ħidma għall-Ġbir u r-Rapportar ta’ Dejta Statistika

Deċiżjoni tat-30 ta' Marzu 2012.

Il-Kumitat dwar l-Akkwist Pubbliku,

Filwaqt li jinnota li l-Artikolu XXII:8(a) tal-Ftehim dwar l-Akkwist Pubbliku (il-Ftehim) jipprovdi li l-Partijiet għandhom jadottaw u jirrevedu perjodikament programm ta' ħidma, inkluż programm ta’ ħidma dwar il-ġbir u r-rapportar tad-dejta statistika;

Filwaqt li jikkunsidra l-importanza tal-ġbir u r-rapportar tad-dejta statistika, kif mitlub mill-Artikolu XVI:4 tal-Ftehim dwar l-Akkwist Pubbliku (il-Ftehim), meta tiġi pprovduta trasparenza fl-akkwist kopert taħt il-Ftehim;

Filwaqt li jikkunsidra l-fatt li dejta statistika li turi sa liema livell il-Partijiet jiksbu prodotti u servizzi koperti mill-Ftehim minn Partijiet oħra tal-Ftehim tista’ tkun għodda importanti fl-inkoraġġiment ta’ Membri oħra tad-WTO biex jaderixxu mal-Ftehim;

Filwaqt li jirrikonoxxi l-isfidi kumplessivi tal-Partijiet tal-Ftehim fil-ġbir tad-dejta fil-qasam tal-akkwist pubbliku u b'mod partikolari biex jiġi determinat il-pajjiż ta' oriġini tal-prodotti u servizzi li jakkwistaw taħt il-Ftehim; kif ukoll

Filwaqt li jirrikonoxxi li l-Partijiet jużaw metodoloġiji differenti fil-ġbir tagħhom tal-istatistika sabiex ikunu ssodisfati r-rekwiżiti ta’ rapportar fl-Artikolu XVI:4 tal-Ftehim, u jistgħu jużaw metodoloġiji differenti fil-ġbir ta' dejta għal entitajiet tal-gvern ċentrali u entitajiet tal-gvern subċentrali;

Hawnhekk jadotta l-programm ta' ħidma li ġej fir-rigward tal-ġbir u r-rapportar ta’ dejta statistika:

1.         Tnedija ta’ Programm ta’ Ħidma dwar il-Ġbir u r-Rapportar ta’ Dejta Statistika: Fl-ewwel laqgħa tal-Kumitat wara d-dħul fis-seħħ tal-Protokoll ta' Emenda tal-Ftehim Eżistenti (tal-1994), il-Kumitat għandu jniedi Programm ta’ Ħidma dwar il-Ġbir u r-Rapportar ta’ Dejta Statistika. Il-Kumitat għandu jirrevedi l-ġbir u r-rapportar ta’ dejta statistika mill-Partijiet, jikkunsidra l-potenzjal tal-armonizzazzjoni tagħhom, u jħejji rapport dwar ir-riżultati.

2.         Sottomissjoni tad-Dejta mill-Partijiet: Il-Kumitat għandu jiftiehem dwar data sa meta kull Parti għandha tissottometti lill-Kumitat l-informazzjoni li ġejja rigward dejta statistika dwar l-akkwist kopert b’dan il-Ftehim:

(a)        deskrizzjoni tal-metodoloġija li tuża biex tiġbor, tevalwa, u tirrapporta dejta statistika, li tissupera jew hija taħt il-limiti stabbiliti tal-Ftehim u għall-akkwist deskritt fil-paragrafu 4.2(c) tal-Programm ta' Ħidma dwar l-SMEs, inkluż jekk din tibbażax id-dejta dwar l-akkwist kopert mill-Ftehim fuq il-valur sħiħ tal-kuntratti mogħtija jew in-nefqa totali għal akkwist f'perjodu ta’ żmien partikolari;

(b)        jekk id-dejta statistika miġbura minnha tinkludix il-pajjiż ta’ oriġini tal-prodotti jew servizzi li huma akkwistati, u jekk iva, kif tiddetermina jew tistma l-pajjiż ta' oriġini, u l-ostakli tekniċi fil-ġbir tad-dejta dwar il-pajjiż ta’ oriġini;

(c)        spjegazzjoni tal-klassifikazzjonijiet użati f'rapporti statistiċi; kif ukoll

(d)        deskrizzjoni tas-sorsi tad-dejta.

3.         Ġabra tas-sottomissjonijiet: Is-Segretarjat għandu jipprepara ġabra tas-sottomissjonijiet u jiċċirkola s-sottomissjonijiet u l-ġabra lill-Partijiet. Is-Segretarjat għandu jinkludi lista ta' Partijiet b'sottomissjonijiet pendenti.

4.         Rakkomandazzjonijiet: Il-Kumitat għandu jirrevedi s-sottomissjonijiet tal-Partijiet u jagħmel rakkomandazzjonijiet dwar:

(a)        jekk il-Partijiet għandhomx jadottaw metodu komuni għall-ġbir ta' statistika;

(b)        jekk il-Partijiet ikunux jistgħu jistandardizzaw il-klassifikazzjonijiet fid-dejta statistika rrapportata lill-Kumitat;

(c)        mezzi għall-iffaċilitar tal-ġbir tal-pajjiż ta' oriġini ta' prodotti u servizzi koperti minn dan il-Ftehim; kif ukoll

(d)        kwistjonijiet tekniċi oħra fid-dejta dwar l-akkwist pubbliku rrapportata mqajma minn kwalunkwe Parti.

5.         Il-Kumitat għandu jiżviluppa, kif xieraq, rakkomandazzjonijiet relatati ma’:

(a)        l-armonizzazzjoni potenzjali tar-rapportar statistiku bil-għan li tiġi inkluża l-istatistika dwar l-akkwist pubbliku fir-rapportar annwali tad-WTO;

(b)        il-forniment ta’ assistenza mis-Segretarjat relatat mar-rapportar statistiku lill-Membri tad-WTO li huma fil-proċess li jaderixxu mal-Ftehim; kif ukoll

(c)        mezzi li jiżguraw li l-Membri tad-WTO li qed jaderixxu mal-Ftehim ikollhom il-mezzi xierqa biex jikkonformaw ma' ġbir ta' dejta statistika u rekwiżiti ta 'rappurtar.

6.         Analiżi tad-dejta: Il-Kumitat għandu jikkunsidra kif id-dejta statistika sottomessa lis-Segretarjat kull sena mill-Partijiet tista’ tintuża għal analiżi ulterjuri biex tiffaċilita aktar l-fehim tal-importanza ekonomika tal-Ftehim, inkluż l-impatt tal-limiti fuq il-prestazzjoni tal-Ftehim.

Anness E Deċżijoni tal-Kumitat dwar l-Akkwist Pubbliku dwar Programm ta’ Ħidma dwar l-Akkwist Sostenibbli

Deċiżjoni tat-30 ta' Marzu 2012.

Il-Kumitat dwar l-Akkwist Pubbliku,

Filwaqt li jinnota li l-Artikolu XXII:8(a) tal-Ftehim dwar l-Akkwist Pubbliku (il-Ftehim) jipprovdi li l-Partijiet għandhom jadottaw u jirrevedu perjodikament programm ta' ħidma, inkluż programm ta’ ħidma dwar l-akkwist sostenibbli;

Filwaqt li jirrikonoxxi li bosta Partijiet żviluppaw politiki nazzjonali u sottonazzjonali ta’ akkwist sostenibbli;

Filwaqt li jisħaq fuq l-importanza li jiġi żgurat li l-akkwist kollu jitwettaq skont il-prinċipji ta’ nondiskriminazzjoni u trasparenza kif riflessi fil-Ftehim;

Hawnhekk jadotta programm ta' ħidma fir-rigward tal-akkwist sostenibbli:

1.         Tnedija ta’ Programm ta' Ħidma dwar l-Akkwist Sostenibbli: Fl-ewwel laqgħa tal-Kumitat wara d-dħul fis-seħħ tal-Protokoll ta' Emenda tal-Ftehim Eżistenti (tal-1994), il-Kumitat għandu jniedi Programm ta’ Ħidma dwar l-Akkwist Sostenibbli.

2.         Il-programm ta' ħidma għandu jeżamina temi li jinkludu:

(a)        l-għanijiet tal-akkwist sostenibbli;

(b)        il-modi li permezz tagħhom il-kunċett tal-akkwist sostenibbli huwa integrat f’politiki nazzjonali u sottonazzjonali tal-akkwist;

(c)        il-modi li permezz tagħhom l-akkwist sostenibbli jkun jista’ jiġi prattikat b’mod konsistenti mal-prinċipju ta' "l-aħjar valur għall-flus"; kif ukoll

(d)        il-modi li permezz tagħhom l-akkwist sostenibbli jkun jista’ jiġi pprattikat b'mod konsistenti mal-obbligi kummerċjali internazzjonali tal-Partijiet.

3.         Il-Kumitat għandu jidentifika miżuri u politiki li huwa jqis bħala li jikkostitwixxu akkwist sostenibbli pprattikat b’mod konsistenti mal-prinċipju ta’ “l-aħjar valur għall-flus” u mal-obbligi kummerċjali internazzjonali tal-Partijiet u jħejji rapport li jelenka l-aħjar prattiki tal-miżuri u l-politiki.

Anness F Deċiżjoni tal-Kumitat dwar l-Akkwist Pubbliku dwar Programm ta’ Ħidma dwar l-Esklużjonijiet u r-Restrizzjonijiet fl-Annessi tal-Partijiet

Deċiżjoni tat-30 ta' Marzu 2012.

Il-Kumitat dwar l-Akkwist Pubbliku,

Filwaqt li jinnota li l-Artikolu XXII:8(a) tal-Ftehim dwar l-Akkwist Pubbliku (il-Ftehim) jipprovdi li l-Partijiet għandhom jadottaw u jirrevedu perjodikament programm ta' ħidma, inkluż programm ta’ ħidma dwar l-esklużjonijiet u r-restrizzjonijiet fl-Annessi tal-Partijiet;

Filwaqt li jirrkonoxxu li l-Partijiet inkludew esklużjonijiet u restrizzjonijiet fl-Annessi rispettivi tagħhom tal-Appendiċi I tal-Ftehim (esklużjonijiet u restrizzjonijiet);

Filwaqt li jirrkonoxxi l-importanza ta' miżuri trasparenti dwar l-akkwist pubbliku; kif ukoll

Filwaqt li jikkunsidra l-importanza ta' tnaqqis u eliminazzjoni progressivi ta' esklużjonijiet u restrizzjonijiet f'negozjati fil-ġejjieni kif previst fl-Artikolu XXII:7 tal-Ftehim;

Hawnhekk jadotta l-programm ta' ħidma li ġej fir-rigward tal-esklużjonijiet u r-restrizzjonijiet fl-Annessi tal-Partijiet:

1.         Tnedija tal-Programm ta' Ħidma dwar l-Esklużjonijiet u r-Restrizzjonijiet: Fl-ewwel laqgħa tal-Kumitat wara d-dħul fis-seħħ tal-Protokoll ta' Emenda tal-Ftehim Eżistenti (tal-1994) , il-Kumitat għandu jniedi Programm ta' Ħidma dwar l-Esklużjonijiet u r-Restrizzjonijiet fl-Annessi tal-Partijiet bl-għanijiet ta':

(a)        tisħiħ tat-trasparenza fir-rigward tal-kamp ta' applikazzjoni u l-effett tal-esklużjonijiet u r-restrizzjonijiet speċifikati fl-Annessi tal-Partijiet għall-Appendiċi I tal-Ftehim; u; kif ukoll

(b)        għoti ta’ informazzjoni relatata mal-esklużjonijiet u r-restrizzjonijiet biex jiġu ffaċilitati n-negozjati previsti fl-Artikolu XXII:7 tal-Ftehim.

2.         Programm ta' Trasparenza: Kull Parti għandha tissottometti lill-Kumitat, sa mhux iktar tard minn sitt xhur wara t-tnedija tal-Programm ta' Ħidma, lista ta':

(a)        esklużjonijiet speċifiċi għall-pajjiżi li għandha fl-Annessi tagħha għall-Appendiċi I tal-Ftehim; u; kif ukoll

(b)        kwalunkwe esklużjoni jew restrizzjoni oħra speċifikata fl-Annessi tagħha tal-Appendiċi I għall-Ftehim li taqa' fi ħdan il-kamp ta' applikazzjoni tal-Artikolu II:2(e) tal-Ftehim, minbarra esklużjonijiet jew restrizzjonijiet li jkunu qed jiġu riveduti fil-Programm ta' Ħidma dwar l-SMEs jew meta Parti tkun ħadet impenn li telimina progressivament esklużjoni jew restrizzjoni f'Anness tal-Appendiċi I għall-Ftehim.

3.         Ġabra tas-Sottomissjonijiet: Is-Segretarjat għandu jħejji ġabra tas-sottomissjonijiet u jiċċirkola s-sottomissjonijiet u l-kumpilazzjoni lill-Partijiet. Is-Segretarjat għandu jinkludi lista tal-Partijiet b'sottomissjonijiet pendenti.

4.         Talbiet għal Informazzjoni Addizzjonali: Kwalunkwe Parti tista' titlob informazzjoni addizzjonali b'mod perjodiku dwar kwalunkwe esklużjoni jew restrizzjoni li taqa' fi ħdan il-kamp ta' applikazzjoni tal-paragrafu 2(a) u (b), inklużi miżuri li jaqgħu fi ħdan il-kamp ta' applikazzjoni ta' kwalunkwe esklużjoni jew restrizzjoni, il-qafas legali tagħhom, il-politiki u l-prattiki ta' implimentazzjoni u l-valur tal-akkwist soġġett għal tali miżuri. Parti li tirċievi talba bħal din għandha tipprovdi l-informazzjoni miftluba minnufih.

5.         Ġabra ta' Informazzjoni Addizzjonali: Is-Segretarjat għandu jħejji ġabra tal-informazzjoni addizzjonali fir-rigward ta' kwalunkwe Parti u għandu jiċċirkolaha lill-Partijiet.

6.         Reviżjoni mill-Kumitat: Fil-laqgħa annwali prevista fl-Artikolu XXI:3(a) tal-Ftehim, il-Kumitat għandu jirrevedi l-informazzjoni ippreżentata mill-Partijiet bil-għan li jiddetermina jekk tipprovdix:

(a)        l-ogħla grad possibbli ta' trasparenza fir-rigward tal-esklużjonijiet u r-restrizzjonijiet speċifikati fl-Annessi tal-Partijiet tal-Appendiċi I għall-Ftehim; kif ukoll

(b)        informazzjoni sodisfaċenti biex jiġu ffaċilitati n-negozjati previsti fl-Artikolu XXII:7 tal-Ftehim.

7.         Parti Ġdida Aderenti għall-Ftehim: Parti ġdida li taderixxi mal-Ftehim għandha tippreżenta lill-Kumitat il-lista fil-paragrafu 2 fi żmien sitt xhur mill-adeżjoni tagħha.

Anness G Deċiżjoni tal-Kumitat dwar l-Akkwist Pubbliku dwar Programm ta' Ħidma dwar l-Istandards tas-Sikurezza fl-Akkwist Internazzjonali

Deċiżjoni tat-30 ta’ Marzu 2012

Il-Kumitat dwar l-Akkwist Pubbliku,

Filwaqt li jinnota li l-Artikolu XXII:8(a) tal-Ftehim dwar l-Akkwist Pubbliku (il-Ftehim) jistipula li l-Partijiet għandhom jadottaw u jirrevedu perjodikament programm ta' ħidma, inkluż programm ta' ħidma dwar l-istandards tas-sikurezza fl-akkwist internazzjonali;

Filwaqt li jinnota li l-Artikolu X:1 tal-Ftehim jistipula li l-entitajiet akkwirenti “ma għandhomx iħejju, jadottaw jew japplikaw xi speċifikazzjoni teknika bil-għan jew bl-effett li joħolqu xkiel żejjed għall-kummerċ internazzjonali”;

Filwaqt li jinnota li l-Artikolu III:2(a) tal-Ftehim ma jżommx lill-Partijiet milli jimponu jew jinfurzaw miżuri neċessarji biex jipproteġu s-sikurezza pubblika, bil-kundizzjoni li tali miżuri ma jiġux applikati b'mod li jkun jikkostitwixxi mezz ta' diskriminazzjoni arbitrarja jew mhux iġġustifikata jew restrizzjoni moħbija fuq kummerċ internazzjonali;

Filwaqt li jirrikonoxxi l-ħtieġa ta’ approċċ ibbilanċjat bejn is-sikurezza pubblika u l-ostakli żejda għall-kummerċ internazzjonali;

Filwaqt li jirrikonoxxi li l-prattiki diverġenti bejn il-Partijiet fir-rigward tas-sikurezza pubblika jista' jkollhom effett negattiv fuq il-prestazzjoni tal-Ftehim;

Hawnhekk jadotta l-programm ta' ħidma li ġej fir-rigward tal-istandards tas-sikurezza:

1.         Tnedija tal-Programm ta' Ħidma dwar l-Istandards tas-Sikurezza fl-Akkwist Internazzjonali: Fl-ewwel laqgħa tal-Kumitat wara d-dħul fis-seħħ tal-Protokoll ta' Emenda għall-Ftehim Eżistenti (tal-1994), il-Kumitat għandu jniedi Programm ta' Ħidma dwar l-Istandards tas-Sikurezza fl-Akkwist Internazzjonali.

2.         Il-Programm ta' Ħidma għandu jeżamina t-temi bil-għan li jaqsam l-aħjar prattiki fuq affarijiet li jinkludu:

(a)        Il-mod li bih it-tħassib dwar is-sikurezza pubblika huwa indirizzat fil-leġiżlazzjoni, ir-regolamenti u l-prattiki tal-Partijiet u linji gwida relatati mal-implimentazzjoni tal-Ftehim mill-entitajiet akkwirenti;

(b)        Ir-relazzjoni bejn id-dispożizzjonijiet tal-ispeċifikazzjonijiet tekniċi fl-Artikolu X u l-ħarsien tas-sikurezza pubblika fl-Artikolu III tal-Ftehim u fl-Annessi tal-Partijiet għall-Appendiċi 1;

(c)        L-aħjar prattiki li jistgħu jiġu adottati għall-protezzjoni tas-sikurezza pubblika fid-dawl tad-dispożizzjonijiet fuq l-ispeċifikazzjonijiet tekniċi u d-dokumentazzjoni tal-offerta fl-Artikolu X.

3.         Il-Kumitat għandu jiżviluppa l-kamp ta' applikazzjoni u l-iskeda ta' żmien għall-eżami ta' kull tema identifikata fil-paragrafu 2. Il-Kumitat għandu jħejji rapport li jiġbor fil-qosor l-eżitu tal-eżami tiegħu ta' dawn il-kwistjonijiet u jelenka l-aħjar prattiki identifikati fil-paragrafu 2(c).

__________