52011PC0475

2008/0028 (COD)

OPINJONI TAL-KUMMISSJONI skont l-Artikolu 294(7)(ċ) tat-Trattat dwar il-Funzjonament tal-Unjoni Ewropea, dwar l-emenda[i] tal-Parlament Ewropew lill-pożizzjoni tal-Kunsill fir-rigward tal-proposta għal

REGOLAMENT TAL-PARLAMENT EWROPEW U TAL-KUNSILL dwar l-għoti ta' tagħrif dwar l-ikel lil konsumaturi, li jemenda r-Regolamenti (KE) Nru 1924/2006 u (KE) Nru 1925/2006 u li jirrevoka d-Direttivi 87/250/KEE, 90/496/KEE, 1999/10/KE, 2000/13/KE, 2002/67/KE, 2008/5/KE u r-Regolament (KE) Nru 608/2004

1.           L-introduzzjoni

L-Artikolu 294(7)(c) tat-Trattat dwar il-Funzjonament tal-Unjoni Ewropea jistipula li l-Kummissjoni għandha tagħti opinjoni dwar l-emendi proposti mill-Parlament Ewropew fit-tieni qari. Il-Kummissjoni tistabbilixxi l-opinjoni tagħha hawn taħt fir-rigward tal-emendi proposti mill-Parlament.

2.           L-isfond

Id-data tat-trażmissjoni tal-proposta lill-Parlament Ewropew u lill-Kunsill (id-dokument COM(2008) 40 finali – 2008/0028(COD)): || l-1 ta' Frar 2008

Id-data tal-opinjoni tal-Kumitat Ekonomiku u Soċjali Ewropew: || it-18 ta' Settembru 2008

Id-data tal-opinjoni tal-Parlament Ewropew, l-ewwel qari: || is-16 ta' Ġunju 2010

Id-data tat-trażmissjoni tal-proposta emendata: || l-ebda data

Id-data tal-adozzjoni tal-pożizzjoni tal-Kunsill: || il-21 ta' Frar 2011

Id-data tal-opinjoni tal-Parlament Ewropew, it-tieni qari: || is-6 ta' Lulju 2011

3.           L-għan tal-proposta mill-Kummissjoni

Il-proposta tikkonsolida u taġġorna żewġt oqsma ta' leġiżlazzjoni importanti dwar l-ittikkettjar, l-ittikkettjar tal-ikel ġenerali u l-ittikkettjar dwar in-nutrizzjoni koperti bid-Direttivi 2000/13/KE [1] u 90/496/KEE[2] rispettivament. Il-proposta tfassal mill-ġdid sitt Direttivi oħra dwar l-ittikkettjar ta' ċerti kategoriji ta' ikel. Xi uħud mill-għanjiet prinċipali tal-proposta huma:

– Il-ħolqien ta' strument wieħed għal prinċipji u rekwiżiti għal rekwiziti orizzontali tal-ittikkettjar fir-rigward tal-ittikkettjar ġenerali u tan-nutrizzjoni;

– Biex ikunu inklużi dispożizzjonijiet speċifiċi dwar ir-responsabbiltajiet fil-katina tal-ikel fir-rigward tal-preżenza u l-preċiżjoni tat-tagħrif dwar l-ikel;

– Biex ikunu stabbiliti kriterji miżurabbli għal ċertu aspett ta' leġibilità fl-ittikkettjar tal-ikel;

– Biex ikunu kkjarifikati r-regoli li japplikaw dwar l-ittikkettjar tal-pajjiż tal-oriġini jew il-post ta' provenjenza;

– Biex ikun introdott l-ittikkettjar mandatorju dwar tagħrif nutrittiv fil-kamp viżiv prinċipali tal-maġġoranza tal-ikel ipproċessat;

4.           L-opinjoni tal-Kummissjoni dwar l-emendi mill-Parlament Ewropew

Il-Parlament Ewropew ivvota fit-tieni qari fuq test ikkonsolidat li fih numru ta' emendi għat-test tal-Pożizzjoni tal-Kunsill fl-ewwel qari. It-test huwa r-riżultat tan-negozjati bejn il-Parlament, il-Kunsill u l-Kummissjoni. Il-Kummissjoni taċċetta l-emendi kollha vvutati mill-Parlament, li huma r-riżultat ta' negozjati interistituzzjonali li ppermettew ftehim għat-tieni qari.

[1]               Id-Direttiva 2000/13/KE tal-Parlament Ewropew u tal-Kunsill tal-20 ta' Marzu 2000 fuq l-approssimazzjoni ta' liġijiet tal-Istati Membri li għandhom x'jaqsmu ma' tikkettjar, preżentazzjoni u riklamar ta' oġġetti tal-ikel (ĠU L 109, 6.5.2000, p. 29).

[2]               Id-Direttiva tal-Kunsill 90/496/KEE tal-24 ta' Settembru 1990 dwar l-ittikkettjar tan-nutrizzjoni għall-oġġetti tal-ikel (ĠU L 276, 6.10.1990, p. 40)