This document is an excerpt from the EUR-Lex website
Document 52011DC0882
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Open dataAn engine for innovation, growth and transparent governance
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Dejta miftuħaMezz għall-innovazzjoni, it-tkabbir u l-governanza trasparenti
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Dejta miftuħaMezz għall-innovazzjoni, it-tkabbir u l-governanza trasparenti
/* KUMM/2011/0882 finali */
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Dejta miftuħaMezz għall-innovazzjoni, it-tkabbir u l-governanza trasparenti /* KUMM/2011/0882 finali */
KOMUNIKAZZJONI MILL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU
EWROPEW U LILL-KUMITAT TAR-REĠJUNI Dejta miftuħa
Mezz għall-innovazzjoni, it-tkabbir u l-governanza trasparenti
1.
Introduzzjoni
L-għan ċentrali tal-istrateġija
UE 2020 huwa li l-ekonomiji tal-Ewropa jitpoġġew fi triq ta'
tkabbir rapidu u sostenibbli. Għal dan l-għan, l-Ewropa se jkollha
ssaħħaħ il-potenzjal innovattiv tagħha u tuża
r-riżorsi tagħha bl-aħjar mod possibbli. Waħda minn dawn ir-riżorsi hija d-dejta
pubblika[1]
— l-informazzjoni kollha li jipproduċu, jiġbru jew iħallsu
għaliha l-entitajiet pubbliċi fl-Unjoni Ewropea. Eżempji ta’ dan
huma l-informazzjoni ġeografika, l-istatistika, dejta dwar it-temp, dejta
minn proġetti ta' riċerka ffinanzjati pubblikament, u kotba
diġitizzati mil-libreriji. Din l-informazzjoni għandha potenzjal
sinifikanti, li bħalissa mhuwiex sfruttat, għall-użu
mill-ġdid fi prodotti u servizzi ġodda u għal titjib
tal-effiċjenza tal-amministrazzjonijiet. Il-benefiċċji
ekonomiċi kumplessivi mill-ftuħ ta' din ir-riżorsa jistgħu
jammontaw għal EUR 40 biljun fis-sena fl-UE. Il-ftuħ ta'
dejta pubblika jħeġġeġ ukoll il-parteċipazzjoni
taċ-ċittadini fil-ħajja politika u soċjali u
jikkontribwixxi għal oqsma ta’ politika bħalma huma l-ambjent. Din il-Komunikazzjoni tippreżenta pakkett
ta' miżuri biex jingħelbu l-ostakoli u l-frammentazzjoni
eżistenti madwar l-UE, bħala parti mill-Aġenda Diġitali
għall-Ewropa. Hija magħmula minn tliet komponenti li jsaħħu
lil xulxin: ·
L-adozzjoni tal-qafas legali għall-użu
mill-ġdid tad-dejta. Flimkien ma’ din il-Komunikazzjoni ġew adottati
proposta għal reviżjoni ta' Direttiva dwar l-użu mill-ġdid
ta’ informazzjoni dwar is-settur pubbliku u għal reviżjoni ta'
Deċiżjoni tal-Kummissjoni dwar l-użu mill-ġdid tal-informazzjoni
tagħha stess, ·
Il-mobilizzazzjoni tal-istrumenti finanzjarji
bħala appoġġ għad-dejta miftuħa, u l-azzjonijiet ta'
skjerament bħall-ħolqien ta' portali tad-dejta Ewropej, ·
L-iffaċilitar tal-koordinazzjoni u l-iskambju
tal-esperjenza bejn l-Istati Membri. L-azzjonijiet jiffukaw fuq oqsma li
għandhom x'jaqsmu mal-funzjonament tas-suq intern u fejn l-istandards u
l-approċċi komuni jwasslu għal servizzi u prodotti ta'
informazzjoni ġodda u aħjar għall-konsumatur Ewropew. Dawn
l-azzjonijiet huma bbażati fuq is-sistemi nazzjonali u ma jaffettwawx
l-aċċess għall-informazzjoni.
2.
Dejta miftuħa, għaliex hija importanti għall-Ewropa?
2.1.
Opportunitajiet tan-negozju u tal-ekonomija mhux
sfruttati
Ir-Rapport Digital Britain tal-2009
jiddeskrivi d-dejta bħala “munita ta’ innovazzjoni” u “l-ħajja
tal-ekonomija tal-għarfien”[2].
Parti kbira minn din il-munita ta’ innovazzjoni tiġi prodotta,
miġbura jew imħallsa mill-gvernijiet madwar l-UE. Hija materja prima
essenzjali għal firxa wiesgħa ta' prodotti u servizzi ta' informazzjoni
ġodda li jibnu fuq possibbiltajiet ġodda biex janalizzaw u
jivviżvalizzaw id-dejta minn sorsi differenti. Dawn il-prodotti jvarjaw minn sistemi ta’ appoġġ
għad-deċiżjonijiet għan-negozji, servizzi bbażati
fil-post u sistemi ta’ navigazzjoni tal-karozzi sa tbassir tat-temp u
applikazzjonijiet oħra għall-ismartphones tagħna. Id-daqs u t-tkabbir tas-suq tas-settur
tal-informazzjoni ġeografika juru l-potenzjal tad-dejta pubblika
bħala mezz għall-ħolqien tal-impjiegi. Fl-2007, is-suq
Ġermaniż għall-ġeoinformazzjoni kien stmat li jammonta
għal EUR 1.4 biljun, żieda ta' 50 % mis-sena 2000[3]. Fil-Pajjiżi l-Baxxi,
is-settur ġeografiku kien jammonta għal 15 000 impjegat
full-time fl-2008. Oqsma oħra bħad-dejta meteoroloġika,
l-informazzjoni legali u l-informazzjoni tan-negozju jiffurmaw ukoll
il-bażi ta’ swieq li dejjem qed jikbru. Studju riċenti jistma s-suq totali
għall-informazzjoni tas-settur pubbliku fl-2008 għal
EUR 28 biljun madwar l-UE[4].
L-istess studju jindika li l-benefiċċji ekonomiċi kumplessivi
minn iktar ftuħ tal-informazzjoni tas-settur pubbliku billi jkun permess
aċċess faċli, huma madwar EUR 40 biljun fis-sena
għall-UE27. Il-benefiċċji ekonomiċi totali diretti u
indiretti mill-applikazzjonijiet u l-użu tal-PSI fl-ekonomija kollha
tal-UE27 għandhom ikunu madwar EUR 140 biljun fis-sena.
2.2.
L-indirizzar tal-isfidi tas-soċjetà
L-ipproċessar intelliġenti tad-dejta
huwa essenzjali biex jiġu indirizzati l-isfidi tas-soċjetà. Id-dejta
tista', pereżempju, tintuża biex ittejjeb is-sostenibilità
tas-sistemi tal-kura tas-saħħa nazzjonali. Ir-rapport McKinsey
tal-2011 stima li l-użu effikaċi tad-dejta jista' jiġġenera
$ 300 biljun f'valur kull sena[5]. Il-progress fil-ġenomika, l-iskoperti tal-mediċina u
d-djanjożi u t-trattament ta' mard serju bħall-kanċer jew mard
tal-qalb, qed isiru dejjem aktar dipendenti fuq il-ġbir tad-dejta u
l-analiżi ta' tekniki sofistikati. Il-ġestjoni tad-dejta wkoll hija
essenzjali għall-indirizzar tal-isfidi ambjentali. Eżempji ta’
dan huma l-ipproċessar ta’ dejta dwar it-tendenzi fil-konsum
tal-enerġija biex titjieb l-effiċjenza fl-użu tal-enerġija
jew tad-dejta dwar it-tniġġis li tintuża
għall-ġestjoni tat-traffiku. Id-deċiżjonijiet infurmati ta'
politika fl-oqsma tat-trasport, l-użu tal-art u t-tibdil fil-klima
jiddependu dejjem iktar fuq analiżi tad-dejta disponibbli.
2.3.
It-tħaffif tal-progress xjentifiku
L-attivitajiet
xjentifiċi qed jiżdiedu dejjem iktar permezz tal-kollaborazzjoni
globali fuq l-internet, bl-użu tal-ġbir ta' dejta kbira ħafna,
riżorsi enormi tal-kompjuter u viżwalizzazzjoni ta' prestazzjoni
għolja. Ix-xjenza elettronika (riċerka permessa permezz
tal-infrastruttura elettronika/l-ICT) hija essenzjali biex jintlaħqu
l-isfidi tas-seklu 21 fl-iskoperti u t-tagħlim xjentifiċi.
Id-dejta użata tiġi minn simulazzjonijiet, strumenti diġitali,
xbieki ta’ sensers, u osservatorji. Ir-rapport "Riding the Wave"[6] tal-2010 enfasizza r-rwol
kruċjali tad-dejta għax-xjenza u l-potenzjal tagħha li tbiddel
in-natura propja tal-proċess xjentifiku. L-aċċess wiesa' għad-dejta xjentifika se jgħin,
pereżempju, lir-riċerkaturi f’oqsma differenti biex jikkollaboraw fuq
l-istess sett ta’ dejta, biex jeżerċitaw forom kompletament
ġodda ta' riċerka xjentifika u biex jesploraw korrelazzjonijiet bejn
ir-riżultati tar-riċerka. Il-bidla fil-proċess xjentifiku li
seħħet minħabba x-xjenza elettronika se żżid
il-produttività tar-riċerka u se twassal għal soluzzjonijiet
ġodda u mhux antiċipati għall-isfidi tas-soċjetà. Barra
minn hekk, il-kollaborazzjoni reċiproka bejn ir-riċerka ffinanzjata
mis-settur pubbliku u mis-settur kummerċjali fil-“Qasam Ewropew
tar-Riċerka onlajn” se tħaffef il-pass u l-impatt tal-innovazzjoni.
2.4.
Il-ħtieġa li naġixxu fil-livelli
kollha: lokali, reġjonali, nazzjonali u fil-livell tal-UE
Id-dejta pubblika tiġi prodotta
fil-livelli kollha tal-gvern. Il-kundizzjonijiet li taħthom tkun
disponibbli id-dejta għall-użu mill-ġdid kummerċjali jew
mhux kummerċjali għandhom effett fuq il-kompetizzjoni u
l-kompetittività. Ħafna mill-prodotti u s-servizzi
bbażati fuq l-informazzjoni tas-settur pubbliku jkollhom natura
transkonfinali. Ħadd ma jrid li s-servizz tal-mowbajl tiegħu jieqaf
fil-fruntiera, u s-servizzi tal-informazzjoni tan-negozju madwar l-Ewropa
kollha li jkollhom lakuni f'pajjiż wieħed jew iktar ma jibqgħux
ta’ interess. Barra minn hekk, sabiex jibbenefikaw mid-daqs tas-suq intern u
biex jgħinu lill-SMEs jikbru lil hinn mill-fruntieri nazzjonali
tagħhom, għandu jkun iffaċilitat l-iskjerament tas-servizzi
madwar l-UE kollha. Għalhekk, l-istess kundizzjonijiet
bażiċi għandhom japplikaw madwar l-Unjoni Ewropea. Dan se
joħloq livell ugwali u jistimula suq b’saħħtu ta’ prodotti u
servizzi innovattivi bbażati fuq d-dejta pubblika.
3.
Fejn ninsabu u xi nkiseb sa issa?
3.1.
Fejn ninsabu?
L-impetu għal aktar dejta miftuħa
qed jikseb momentum f'diversi Stati Membri. L-Istati Membri jħaddnu
l-kunċett għal raġunijiet ta’ trasparenza, effiċjenza
amministrattiva u l-potenzjal ekonomiku għall-użu mill-ġdid.
Huma qed jappoġġaw gvern miftuħ permezz tal-leġiżlazzjoni
u miżuri prattiċi, bħall-produzzjoni tad-dejta f’formati li huma
leġibbli mekkanikament u l-ħolqien ta' portali tad-dejta. Ir-Renju Unit waqqaf il-portal data.gov.uk li jiġbor flimkien
dejta mill-organizzazzjonijiet tal-gvern fil-livelli kollha. Stati Membri
oħra qed joħolqu portali simili, eżempju Franza bl-ETALAB.
Il-portali tad-dejta jeżistu wkoll fil-livell reġjonali,
bħad-dadesobertes.gencat.cat fil-Katalunja u dati.piemonte.it fi Piemonte
fl-Italja. Madankollu, il-livelli ta’ inizjattiva u ta’
kuxjenza ta' kwistjonijiet ta’ dejta miftuħa mhumiex uniformi fost
l-Istati Membri. Hemm riskju li l-Ewropa titlef l-opportunitajiet offruti
mid-dejta miftuħa, u taqa' lura minn reġjuni oħra fejn
il-politiki tad-dejta miftuħa huma stabbiliti sew.
3.2.
Xi nkiseb fil-livell tal-UE?
3.2.1.
Qafas leġiżlattiv u inizjattivi ta’ politika
(1)
Id-Direttiva dwar l-użu mill-ġdid
tal-informazzjoni tas-settur pubbliku Id-Direttiva dwar l-użu mill-ġdid
tal-informazzjoni tas-settur pubbliku tal-2003[7]
stabbilixxiet il-qafas leġiżlattiv ġenerali fil-livell Ewropew.
Id-Direttiva tipprovdi għal livell minimu ta' armonizzazzjoni.
Ir-reviżjoni tal-2009 tad-Direttiva indikat li minkejja l-progress
mill-2003 għadhom jeżistu ostakli għall-użu transkonfinali
tal-informazzjoni tas-settur pubbliku. Uħud minn dawn l-ostakli jistgħu
jiġu indirizzati fil-leġiżlazzjoni eżistenti, filwaqt li
oħrajn ma jistgħux. (2)
Inizjattivi ta' politika Il-politika ġenerali ta' użu
mill-ġdid hija kkumplimentata minn inizjattivi leġiżlattivi jew
ta' politika f’setturi speċifiċi. Xi eżempji huma: ·
id-Direttiva dwar l-Aċċess
għall-Informazzjoni Ambjentali u d-Direttiva INSPIRE[8], immirati lejn l-iktar tixrid
wiesa' possibbli tal-informazzjoni ambjentali u l-armonizzazzjoni
tas-settijiet tad-dejta ewlenin; ·
il-Komunikazzjoni tal-Kummissjoni dwar
l-Għarfien dwar il-Baħar tal-2020[9],
li fost affarijiet oħra timmira li tagħmel id-dejta tal-baħar
eħfef u irħas biex tintuża; ·
l-inizjattivi fi ħdan il-Pjan ta' Azzjoni[10] għall-Iskjerament ta'
Sistemi Intelliġenti tat-Trasport (STI) tal-2008, li fost affarijiet
oħra jħarsu lejn l-aċċess tal-fornituri ta’ servizzi
privati għal informazzjoni dwar l-ivvjaġġar u t-traffiku
fil-ħin reali; ·
il-politika tal-Kummissjoni dwar l-aċċess
miftuħ għall-informazzjoni xjentifika[11], li jinkludi strateġija
pilota għal aċċess miftuħ għall-pubblikazzjonijiet li
jirriżultaw minn proġetti ffinanzjati mill-Unjoni Ewropea u Infrastruttura
elettronika pan-Ewropea tar-Repożitorji tal-Open Access parteċipatorja;
Ir-repożitorju tal-pubblikazzjonijiet tal-JRC huwa wkoll rilevanti f'dan
il-kuntest. ·
il-politiki għad-diġitizzazzjoni tal-wirt
kulturali u l-iżvilupp tal-Europeana, il-librerija diġitali,
l-arkivju u l-mużew tal-Ewropa, jimmiraw li jiżguraw l-iktar użu
wiesa' possibbli tal-materjal kulturali diġitizzat u l-metadejta relatata. L-użu mill-ġdid tad-dejta tas-settur
pubbliku, kemm għall-finijiet kummerċjali kif ukoll mhux
kummerċjali, għandu jirrispetta bis-sħiħ il-leġiżlazzjoni
dwar il-privatezza Ewropea u nazzjonali. L-għanijiet tal-promozzjoni
tad-dejta miftuħa tal-gvern u tal-protezzjoni tad-dejta personali
jistgħu jirrinforzaw lil xulxin jekk ikunu bbażati fuq ġestjoni
ta' informazzjoni proattiva u konxja mis-settur pubbliku. Barra minn hekk, l-implimentazzjoni ta'
politiki dwar id-dejta miftuħa għandha tirrispetta bis-sħiħ
id-drittijiet tal-proprjetà intellettwali ta’ partijiet terzi u
tal-obbligi tal-Unjoni Ewropea skont it-trattati internazzjonali dwar
id-drittijiet tal-proprjetà intellettwali.
3.2.2.
Kofinanzjament ta' riċerka, żvilupp u
innovazzjoni (R&Ż&I)
Il-Kummissjoni appoġġat id-dejta
miftuħa permezz tal-programmi tagħha ta' finanzjament, partikolarment
il-Programm Qafas għar-Riċerka u l-Iżvilupp, il-Programm
għall-Kompetittività u l-Innovazzjoni, u l-programm ISA. Il-proġetti
jkopru firxa ta' oqsma ta' riċerka u ta’ applikazzjoni u tipi ta' organizzazzjonijiet. Il-proġett Linked Open Data (LOD2)[12] beda
f'Settembru 2010 u se jkompli għal 4 snin. Huwa jindirizza
l-isfruttament tal-internet bħala pjattaforma għall-integrazzjoni
tad-dejta u l-informazzjoni, u l-użu ta’ teknoloġiji semantiċi
biex jagħmlu d-dejta tal-gvern iktar użabbli. Il-proġett OpenAIRE[13],
li beda f’Diċembru 2009 ma' msieħba minn 25 pajjiż
tal-UE u diversi pajjiżi assoċjati, jimmira li tinbena infrastruttura
parteċipattiva għall-inizjattivi Pilota tal-KE
għall-Aċċess Miftuħ għall-Informazzjoni li
toħroġ mir-Riċerka. L-Azzjoni ISA dwar l-interoperabilità semantika (SEMIC.EU)[14] tippromwovi l-idea ta'
Metadejta Miftuħa tal-Gvern bħala l-ewwel pass lejn l-allinjament
tal-metadejta kemm fil-livell nazzjonali kif ukoll Ewropew.
3.2.3.
Inwettqu dak li ngħidu
Fl-2006, il-Kummissjoni stabbilixxiet politika
miftuħa ta' użu mill-ġdid għar-riżorsi
tal-informazzjoni tagħha stess permezz tad-Deċiżjoni dwar
l-Użu mill-ġdid tal-Informazzjoni tal-Kummissjoni. Din tagħmel
disponibbli l-informazzjoni kollha tal-Kummissjoni li tkun ġeneralment
aċċessibbli għal finijiet kummerċjali u mhux
kummerċjali. Eżempji huma d-dejta tal-Eurostat u l-memorji
tat-traduzzjoni tal-istituzzjonijiet tal-UE. L-informazzjoni hija normalment
disponibbli mingħajr ħlas, jew f’każijiet eċċezzjonali
bi tpattija għal spejjeż marġinali tat-tixrid.
4.
Sfidi u Opportunitajiet
4.1.
Opportunitajiet ġodda permezz tal-progress
teknoloġiku
Diversi żviluppi jħeġġu
opportunitajiet ġodda għall-użu mill-ġdid tad-dejta,
inkluż dejta tas-settur pubbliku, bi prodotti u servizzi ġodda
tal-informazzjoni. L-ewwel nett, l-ammont tad-dejta fid-dinja
huwa enormi. F’April 2011 biss, il-US Library of Congress ġabret
235 terabytes ta' dejta[15].
Huwa mistenni tkabbir ta’ 40 % fid-dejta globali ġġenerata kull
sena. Parti minn dan it-tkabbir ġej minn tipi
ġodda ta' dejta. F’setturi bħal ma huma dawk tat-trasport,
tal-karozzi, tal-forniment ta' servizzi pubbliċi u setturi oħra,
wieħed diġà jsib iktar minn 30 miljun nodi f’netwerks ta'
sensers[16]. Fl-istess ħin, qed nassistu għal
revoluzzjoni fit-teknoloġiji tal-analiżi, l-isfruttament u
l-ipproċessar tad-dejta, pereżempju dwar it-tfittix multilingwi u
l-estrazzjoni awtomatika tas-sinifikat minn netwerks ta' sensers.
4.2.
L-isfidi u l-ostakoli li fadal
F’dawn l-aħħar snin sar xi progress
sabiex id-dejta pubblika ssir aktar miftuħa, imma diversi ostakli
jibqgħu jippersistu. Il-qafas legali Minkejja l-armonizzazzjoni minima fl-2003
permezz tad-Direttiva dwar l-użu mill-ġdid tal-informazzjoni
tas-settur pubbliku, jibqgħu jippersistu differenzi sinifikanti
fir-regoli u l-prattiki nazzjonali. Dan iwassal
għall-frammentazzjoni tas-suq tal-informazzjoni interna u jfixkel
il-ħolqien ta’ servizzi ta’ informazzjoni transkonfinali. Id-differenzi huma l-iktar ċari
fir-rigward tal-ħlas, fejn f'ċertu każijiet ikunu bi rkupru
tal-ħlas u f’każijiet oħra, l-użu mill-ġdid ikun bla
ħlas jew prattikament bla ħlas. Analiżi ta’ studji riċenti
tindika li mil-lat makroekonomiku, il-mudell tad-dejta miftuħa jwassal
għal riżultati kumplessiv aħjar[17].
Serje ta' studji ta' każijiet dwar l-entitajiet tas-settur pubbliku li
biddlu minn irkupru sħiħ tal-ispiża għal sistema ta'
spejjeż marġinali juri li l-bidla mhux biss żiedet l-użu
mill-ġdid, imma minnha bbenefikaw ukoll il-korpi tas-settur pubbliku kkonċernati[18]. Barra minn hekk,
l-approċċ tad-dejta miftuħa jelimina t-tendenzi
monopolistiċi possibbli bbażati fuq dejta ta' sors wieħed. L-għarfien ta' organizzazzjonijiet u
negozji pubbliċi Fattur ewlieni ieħor huwa n-nuqqas ta’
għarfien fost l-organizzazzjonijiet pubbliċi tal-potenzjal
tad-dejta miftuħa. Għad hemm biża' kbir li jintilef il-kontroll.
Uħud mill-preokkupazzjonijiet huma leġittimi, bħall-protezzjoni
tal-privatezza, tas-sigurtà nazzjonali u l-ħtieġa li jiġu
protetti d-drittijiet tal-proprjetà intellettwali ta’ partijiet terzi.
Argumenti oħra jidhru li iktar huma skużi biex ma titteħidx
azzjoni[19]. Biex tinbidel il-mentalità
tal-amministrazzjonijiet jeħtieġ impenn politiku qawwi fl-ogħla
livell u djalogu dinamiku bejn il-partijiet interessati, inklużi
l-amministrazzjonijiet u d-detenturi tad-dejta pubblika, in-negozji u
l-komunità akkademika. Każijiet ta' pilota u ta' testijiet, il-qsim
tal-prattiki tajba, u l-kampanji tal-mobilizzazzjoni (li pereżempju
jużaw kompetizzjonijiet ta’ dejta miftuħa) jistgħu jgħinu
biex is-settur pubbliku jadotta kultura ta’ dejta miftuħa. Dan se
jżid ukoll l-għarfien tan-negozji dwar id-disponibbiltà tad-dejta u
l-opportunitajiet li toffri. Ostakoli
prattiċi u tekniċi Fl-aħħar nett, hemm kwistjonijiet prattiċi
u tekniċi li jridu jiġu indirizzati. L-ostakli tal-lingwa u l-kwistjonijiet
tal-interoperabbiltà jeħtieġ li jiġu indirizzati sabiex
ir-riżorsi ta’ informazzjoni minn organizzazzjonijiet u pajjiżi
differenti jkunu jistgħu jintużaw flimkien. Id-disponibbiltà
tal-informazzjoni f’format li jkun leġibbli mekkanikament kif ukoll
bħala saff irqiq ta’ metadejta maqbula b'mod komuni jistgħu
jiffaċilitaw il-kontroreferenza u l-interoperabbiltà tad-dejta u
għalhekk, itejbu l-valur tagħha għall-użu mill-ġdid
b'mod konsiderevoli. U l-infrastruttura teknika jeħtieġ li tkun
fis-seħħ biex tiżgura d-disponibbiltà tal-informazzjoni fit-tul.
Barra minn hekk, jenħtieġ iktar appoġġ
għar-R&Ż u l-innovazzjoni fl-għodod tal-analiżi
tad-dejta u tal-viżwalizzazzjoni.
4.3.
Konklużjoni
L-isfruttament tad-dejta pubblika għandu
potenzjal enormi għall-ekonomija tal-UE u l-benessri tal-konsumatur.
Madankollu, l-għodod regolatorji eżistenti u l-implimentazzjoni
tagħhom, in-nuqqas ta’ għarfien tal-amministrazzjonijiet u n-negozji
u l-adozzjoni bil-mod tat-teknoloġiji innovattivi qed iżommu lura
l-iżvilupp ta’ suq veru għall-użu mill-ġdid tad-dejta
pubblika u ma jippermettux li jittieħdu l-benefiċċji massimi
minn opportunitajiet ġodda li joffru d-dejta u t-teknoloġiji
evolventi. Dawn il-kunsiderazzjonijiet wasslu
lill-Kummissjoni biex tirrevedi u ssaħħaħ l-istrateġija
tad-dejta pubblika tagħha billi tiffoka fuq il-qafas legali
għall-użu mill-ġdid u l-għodod disponibbli għall-appoġġ.
5.
Azzjonijiet fil-livell Ewropew: L-istrateġija riveduta
għad-dejta pubblika miftuħa
L-istrateġija riveduta tal-Kummissjoni
hija mibnija fuq tliet komponenti kumplimentari: ·
L-adozzjoni tal-qafas għall-użu
mill-ġdid tad-dejta, inklużi miżuri legali, miżuri ta'
liġi mhux vinkolanti u miżuri ta' politika, ·
Il-mobilizzazzjoni tal-istrumenti finanzjarji billi
tingħata prijorità lid-dejta miftuħa fi programmi ta’
R&Ż&I u tal-infrastruttura, ·
L-iffaċilitar tal-koordinazzjoni u l-iskambju
tal-esperjenza bejn l-Istati Membri.
5.1.
Qafas leġiżlattiv rivedut li jwassal
għall-ftuħ u l-użu mill-ġdid
Din il-Komunikazzjoni hija akkumpanjata bi
proposta għar-reviżjoni tad-Direttiva dwar l-użu mill-ġdid
ta’ informazzjoni tas-settur pubbliku, billi: –
Tintroduċi l-prinċipju li l-informazzjoni
pubblika kollha li mhijiex espliċitament koperta b'waħda
mill-eċċezzjonijiet tista' terġa' tintuża mill-ġdid
għal finijiet kummerċjali u mhux kummerċjali; –
Tiffissa l-ammont li jista' jiġi impost
għall-informazzjoni tas-settur pubbliku għal mhux aktar
mill-ispejjeż marġinali ta' tixrid; f'każijiet eċċezzjonali
biss jibqa’ possibbli li jiġu imposti l-ispejjeż kollha
għall-produzzjoni u t-tixrid tal-informazzjoni. –
Tespandi l-kamp ta' applikazzjoni tad-Direttiva
biex jinkludi l-libreriji, l-arkivji, il-mużewijiet u l-libreriji
tal-universitajiet, għalkemm b’mod li jillimita l-effetti finanzjarji
possibbli u li ma jimponix piż amministrattiv kbir fuq dawn
l-istituzzjonijiet. Anke għal entitajiet oħra tas-settur
pubbliku, il-modifikazzjonijiet fid-Direttiva se jinvolvu piż finanzjarju
u amministrattiv limitat li huwa ferm ikbar mill-benefiċċji
mistennija għas-soċjetà inġenerali. Fl-istess ħin, il-Kummissjoni qed
taġġorna r-regoli dwar l-użu mill-ġdid tar-riżorsi
tal-informazzjoni tagħha stess. Il-bidliet ewlenin jikkonċernaw
l-inklużjoni ta' informazzjoni tar-riċerka prodotta
miċ-Ċentru Konġunt għar-Riċerka, miżuri li jtejbu
l-implimentazzjoni tad-Deċiżjoni, u dispożizzjoni dwar formati
li huma leġibbli mekkanikament. Fl-2012, il-Kummissjoni se tesplora jekk u
kif regoli simili jiġu adottati mill-istituzzjonijiet l-oħra tal-UE u
mill-aġenziji Ewropej ewlenin. Fl-inizjattivi leġiżlattivi u ta’
politika tagħha li se tieħu f'oqsma bħat-trasport, l-ambjent,
il-politika marittima u l-politika dwar l-ispazju, il-Kummissjoni se
tikkunsidra bis-sħiħ l-opportunitajiet offruti mid-dejta
miftuħa. Fejn rilevanti, se tmur lil hinn mill-kundizzjonijiet minimi
stabbiliti bid-Direttiva dwar l-użu mill-ġdid tal-informazzjoni
tas-settur pubbliku, sabiex jiġi żgurat l-iktar użu wiesa'
possibbli tar-riżorsi tad-dejta.
5.2.
Liġi mhux vinkolanti għal informazzjoni
ta' riċerka miftuħa
Minħabba l-ispeċifiċitajiet
tad-dejta tar-riċerka, il-Kummissjoni se tistabbilixxi fid-dettall u
f'dokumenti separati l-istrateġija tagħha għal dejta xjentifika
u tar-riċerka u infrastrutturi assoċjati. Fl-2012, il-Kummissjoni
biħsiebha tadotta Komunikazzjoni u Rakkomandazzjoni dwar
l-aċċessibbiltà u l-preservazzjoni tal-informazzjoni xjentifika. Se
taħdem mal-Istati Membri sabiex iħaffu l-attivitajiet tagħhom
biex jipprovdu aċċess miftuħ għall-informazzjoni xjentifika
abbażi ta’ sett konkret ta’ miżuri. Fl-istess ħin,
il-Kummissjoni se tispjega fid-dettall kif se tittratta r-riżultati
tar-riċerka ffinanzjata mill-Unjoni Ewropea.
5.3.
Miżuri finanzjarji u ta’ appoġġ
Stimulazzjoni tar-R&Ż&I f’dejta miftuħa
Il-Kummissjoni, permezz tal-programmi ta'
finanzjament tagħha, se tkompli tistimula l-attivitajiet sabiex id-dejta
tal-gvern tkun aktar aċċessibbli. Biex tistimula s-suq, biex
tittestja u tippromwovi l-iżvilupp ta’ soluzzjonijiet innovattivi, u biex
tiżgura l-iktar adozzjoni wiesgħa possibbli tad-dejta miftuħa,
il-Kummissjoni se tuża strumenti differenti. (1)
L-appoġġ għar-R&Ż Il-Kummissjoni se tkompli tappoġġa
r-R&Ż fit-teknoloġiji li jimmaniġġjaw id-dejta,
eż. it-tiftix tad-dejta, l-analitika jew il-viżwalizzazzjoni. Matul
il-perjodu 2011-2013, il-Kummissjoni se tonfoq madwar EUR 100 miljun
fir-R&Ż f'dawn l-oqsma. Il-ġestjoni tal-informazzjoni wkoll hija
waħda mill-oqsma prijoritarji maħsuba għall-ICT
fl-Orizzont 2020, li se jkopri l-appoġġ tal-UE
għar-riċerka u l-innovazzjoni fil-perjodu 2014-2020. Il-Kummissjoni se tappoġġa l-innovazzjoni
u l-adozzjoni tat-teknoloġija permezz ta' azzjonijiet pilota, ta’
ttestjar u ta’ wiri ta' applikazzjonijiet innovattivi bħalma huma
s-sistemi tal-informazzjoni ġeografika (GIS) u s-servizzi ta’
lokalizzazzjoni u applikazzjonijiet ta' kontenut kreattiv fl-edukazzjoni,
il-kultura jew il-moda. Dawn se jiġu appoġġati mill-programm
CIP-ICT PSP fl-2012-13 u huwa previst appoġġ ulterjuri fl-ambitu
tal-Orizzont 2020. Barra minn hekk, il-Kummissjoni se tgħin
biex torganizza kompetizzjonijiet tad-dejta miftuħa biex
tippromwovi l-iżvilupp ta' servizzi ġodda tal-informazzjoni, u
jittieħdu inizjattivi biex itejbu l-aċċess għall-kapital
għall-imprendituri li jibnu servizzi tal-informazzjoni ġodda
bbażati fuq id-dejta tas-settur pubbliku. (2)
Appoġġ għal infrastrutturi tad-dejta
— il-portali tad-dejta għall-Ewropa Sabiex tiffaċilita l-iżvilupp
tal-prodotti u s-servizzi tal-informazzjoni li jużaw dejta minn madwar
l-Unjoni Ewropea kollha, il-Kummissjoni se taħdem sabiex toħloq
żewġ portali tad-dejta Ewropej interkonnessi. Fl-2012, il-Kummissjoni se tibda topera portal
li se jagħmel ir-riżorsi tad-dejta tagħha stess u dawk ta’
istituzzjonijiet u aġenziji oħra Ewropej aċċessibbli u
użabbli faċilment. Fl-istess ħin, id-definizzjonijiet
tal-metadejta b'potenzjal għoli ta' użu mill-ġdid se jiġu
identifikati u promossi. Il-kundizzjonijiet standard għall-użu se
jkollhom l-għan li jiżguraw l-iktar adozzjoni wiesgħa possibbli
ta' dejta Ewropea fis-servizzi innovattivi tal-informazzjoni, f'konformità
mad-Deċiżjoni tal-Kummissjoni dwar l-użu mill-ġdid
tal-informazzjoni tal-Kummissjoni. Il-Kummissjoni se taħdem flimkien
mal-Istati Membri, l-entitajiet tas-settur pubbliku u aggregaturi
reġjonali biex tistabbilixxi l-portal pan-Ewropew tad-dejta li se jibda
jopera fl-2013, u li se jagħti aċċess dirett lil firxa ta'
settijiet tad-dejta minn madwar l-UE (inkluża d-dejta disponibbli permezz
tal-portal tal-Kummissjoni). Fejn possibbli, il-ħidma se tkompli fuq
strutturi u żviluppi eżistenti, u l-portal se jespandi gradwalment
il-kontenut tiegħu biex ikopri s-settijiet tad-dejta ewlenin mill-Istati
Membri kollha. Fil-fażi tal-bidu (2011-2013) se
jiġi pprovdut appoġġ mill-programm CIP.
Fil-perjodu 2014-2020, il-finanzjament tal-infrastruttura Ewropea
għas-servizzi elettroniċi għad-dejta pubblika se jiġi
mill-Faċilità Nikkollegaw l-Ewropa[20]. Il-Kummissjoni se tkompli tappoġġa
wkoll l-attivitajiet ta' diġitizzazzjoni u l-iżvilupp tal-pjattaforma
Europeana li tindirizza aspett importanti tal-użu mill-ġdid
tad-dejta. (3)
Appoġġ għal infrastrutturi tad-dejta
tar-riċerka Minbarra l-appoġġ li tagħti
fl-ambitu tal-FP7, il-Kummissjoni għandha l-intenzjoni li tkompli
tagħti l-appoġġ tagħha fil-qafas tal-Orizzont 2020
għall-iżvilupp ta' infrastruttura tas-servizzi persistenti u soda
għad-dejta xjentifika fl-Ewropa li twieġeb
għall-ħtiġijiet tax-xjenza u r-riċerka intensivi fid-dejta
tal-2020, abbażi tar-rakkomandazzjonijiet tar-rapport “Riding the Wave”.
Din l-infrastruttura għandha tippermetti l-aċċess u interazzjoni
għal fluss kontinwu ta’ informazzjoni, minn dejta ta' osservazzjoni mhux
ipproċessata u dejta sperimentali sa pubblikazzjonijiet fl-oqsma kollha
tax-xjenza. Din l-infrastruttura tinkludi aspetti
tekniċi, organizzattivi u regolatorji li jeħtieġu koordinazzjoni
estensiva mal-Istati Membri u wkoll mal-pajjiżi terzi u
mal-organizzazzjonijiet internazzjonali biex ikunu żgurati
l-interoperabbiltà u l-aċċess reċiproku. Il-Kummissjoni se
taħdem flimkien mal-imsieħba internazzjonali tagħna biex
tiżviluppa standards għall-aċċess u l-interoperabbiltà
tad-dejta globali.
5.4.
Miżuri ta’ koordinazzjoni fuq il-livell
tal-Istati Membri u tal-UE
Il-Kummissjoni se tkompli tiffaċilita
l-koordinazzjoni u l-iskambju tal-esperjenza bejn l-Istati Membri, b'mod
partikolari permezz ta': ·
Il-grupp PSI, grupp ta’ esperti tal-Istati Membri
għall-iskambju ta' prattiki tajbin u inizjattivi li jappoġġaw
l-użu mill-ġdid tal-informazzjoni tas-settur pubbliku, ·
Il-pjattaforma tal-Informazzjoni tas-Settur
Pubbliku. Dan il-portal tal-internet jipprovdi aħbarijiet dwar
l-iżviluppi Ewropej, prattiki tajba, eżempji ta' prodotti u servizzi
ġodda, u kawżi legali li jikkonċernaw l-użu mill-ġdid
tal-PSI, ·
In-netwerk LAPSI, li janalizza kwistjonijiet legali
relatati ma’ informazzjoni tas-settur pubbliku u li jippromwovi id-dibattitu
fost ir-riċerkaturi u l-partijiet interessati. Se jipproduċi sett ta'
linji gwida għall-politiki u l-prattiki tal-aċċess u l-użu
mill-ġdid, ·
L-azzjoni ISA dwar l-interoperabbiltà semantika. Il-Kummissjoni se tkompli tappoġġa u
tipparteċipa fil-gruppi konsultattivi tal-politika bħall-Forum ta'
Politika dwar l-Infrastruttri elettroniċi u l-Grupp ta’ Riflessjoni dwar
l-Infrastruttri elettroniċi, li huma importanti għall-koordinazzjoni tal-infrastrutturi
tad-dejta xjentifika bejn l-Istati Membri.
6.
Konklużjoni
L-informazzjoni prodotta, miġbura jew
imħallsa minn organizzazzjonijiet pubbliċi madwar l-Unjoni Ewropea
hija riżorsa ewlenija fl-ekonomija tal-informazzjoni. Bħalissa,
il-potenzjal sħiħ tagħha għadu 'l bogħod milli jseħħ.
F'din il-Komunikazzjoni, il-Kummissjoni qed tipproponi passi konkreti biex
jilliberaw il-potenzjal tar-riżorsi tas-settur pubbliku tal-Ewropa, li
jvarjaw minn reviżjoni tad-Direttiva dwar l-użu mill-ġdid
tal-informazzjoni tas-settur pubbliku sal-ħolqien ta’ portal pan-Ewropew. L-Istati Membri jistgħu jikkontribwixxu
sabiex id-dejta miftuħa ssir realtà permezz ta' adozzjoni,
traspożizzjoni u implimentazzjoni rapidi tad-Direttiva riveduta dwar
l-użu mill-ġdid tal-informazzjoni tas-settur pubbliku. Dan se joħloq
il-kundizzjonijiet għall-attività ekonomika bbażata fuq dejta
miftuħa u se jistimula l-applikazzjonijiet transkonfinali. Barra minn hekk, l-Istati Membri għandhom
jifformulaw u jimplimentaw il-politiki dwar id-dejta miftuħa billi
jadottaw eżempji ta' prattika tajba minn madwar l-UE. L-appoġġ
għandu pereżempju jingħata lill-piloti tad-dejta miftuħa u
lill-kompetizzjonijiet tad-dejta miftuħa, b'mod partikolari dawk li
jimmiraw lejn l-iżvilupp ta' prodotti u servizzi transkonfinali. Fl-aħħar nett, il-Kummissjoni
tistieden lill-Istati Membri biex jikkontribwixxu għall-iżvilupp
tal-portal pan-Ewropew tad-dejta. Il-Kummissjoni se tidħol
f’diskussjonijiet ma’ esperti mill-Istati Membri sabiex ikun żgurat li
l-portal ikollu pedament sod. Matul il-fazi tal-iskjerament, l-Istati Membri
ser ikollhom jagħmlu disponibbli firxa wiesgħa ta' settijiet
tad-dejta permezz tal-portal biex ibiddluh f’servizz ta' suċċess u
bażi għall-attività ekonomika. Il-Kummissjoni tistieden lill-Parlament
Ewropew u l-Kunsill, fl-ambitu tal-kompetenzi rispettivi tagħhom, biex
joħolqu l-kundizzjonijiet ta’ qafas tajbin għall-użu
mill-ġdid tal-informazzjoni tas-settur pubbliku madwar l-Unjoni Ewropea, u
biex jappoġġaw il-proġetti u l-infrastrutturi li jistgħu
jbiddlu d-dejta pubblika tal-Ewropa f'mezz għall-innovazzjoni, it-tkabbir
u t-trasparenza. Strateġija
tad-dejta miftuħa, il-miżuri ewlenin Il-qafas
leġiżlattiv ·
Il-proposta għal reviżjoni ta' Direttiva
dwar l-użu mill-ġdid tal-informazzjoni tas-settur pubbliku,
Diċembru 2011; ·
Ir-reviżjoni tad-Deċiżjoni
tal-Kummissjoni dwar l-użu mill-ġdid tal-informazzjoni
tal-Kummissjoni, Diċembru 2011; Ħidma biex is-sistema tiġi
estiża għal Istituzzjonijiet u Aġenziji Ewropej oħra, 2012; ·
Id-dejta miftuħa għandha
tiddaħħal f'inizjattivi leġiżlattivi u ta' politika
settorjali. Portali
u pjattaformi Ewropej tad-dejta miftuħa ·
Portal li jagħti aċċess
għad-dejta tal-Kummissjoni u dejta minn istituzzjonijiet u aġenziji
oħra tal-UE, rebbiegħa 2012; ·
Tnedija ta' portal pan-Ewropew tad-dejta, li
jagħti aċċess għas-settijiet tad-dejta minn madwar l-UE,
rebbiegħa 2013, wara l-ħidma preparatorja mal-Istati Membri
mill-2011; ·
Kofinanzjament tal-infrastruttura Ewropea
għas-servizzi elettroniċi għad-dejta miftuħa permezz
tal-Faċilità Nikkollegaw l-Ewropa 2014-2020. Dejta
miftuħa għax-xjenza ·
Komunikazzjoni u Rakkomandazzjoni lill-Istati
Membri dwar informazzjoni xjentifika, kmieni fl-2012; ·
Espansjoni tal-inizjattiva pilota ta'
aċċess miftuħ għall-pubblikazzjonijiet xjentifiċi
għall-Orizzont 2020 kollu u inizjattiva pilota b’aċċess
miftuħ għad-dejta tar-riċerka. Riċerka
u innovazzjoni ·
Proġetti tar-riċerka u l-innovazzjoni
rilevanti għad-dejta miftuħa, b’mod partikolari permezz tal-FP7,
il-programm CIP u Orizzont 2020, b'finanzjament għall-infrastrutturi
tar-riċerka li jappoġġaw l-aċċess miftuħ
għal artikli u d-dejta tar-riċerka; ·
Kompetizzjonijiet tad-dejta
miftuħa (2012-2013) u aċċess imtejjeb għall-kapital
għall-imprendituri f'dan il-qasam. Miri Il-Kummissjoni
impenjat ruħha li: ·
fl-2012 tniedi portal tad-dejta miftuħa tal-Kummissjoni. ·
fl-2013 tniedi portal pilota
b'interfaċċja multilingwi u b'faċilitajiet ta' tiftix,
b'settijiet ta' dejta minn madwar l-UE. Il-ħidma
mal-Istati Membri għandha twassal għal: ·
formulazzjoni u implimentazzjoni ta' politiki dwar
dejta pubblika miftuħa fl-Istati Membri kollha minn kmieni fl-2013.
·
1/3 tad-dejta kollha strutturata tal-gvern
disponibbli fl-Istati Membri tkun tista’ tiġi mfittxa permezz tal-portal
pan-Ewropew tad-dejta sal-2015. L-impatt
kumplessiv previst: ·
sal-2017 (tliet snin wara d-data mistennija
għat-traspożizzjoni tad-Direttiva dwar l-użu mill-ġdid
tal-informazzjoni tas-settur pubbliku), il-benefiċċji kumplessivi
tal-użu mill-ġdid tal-PSI mistennija jilħqu
EUR 100 biljun fis-sena fl-UE, inkluż l-iżvilupp ta'
negozji ġodda u żieda fl-effiċjenza fis-servizzi tas-settur
pubbliku. [1] Il-kunċetti ta' "dejta" u
"informazzjoni" kif użati f'din il-Komunikazzjoni huma
interkambjabbli u jirreferu għal kwalunkwe kontenut ikun xi jkun il-mezz
tiegħu. [2] http://www.official-documents.gov.uk/document/cm76/7650/7650.pdf. [3] Valutazzjoni tal-użu mill-ġdid
tal-Informazzjoni tas-Settur Pubbliku fl-Informazzjoni Ġeografika,
is-setturi tal-Informazzjoni Meteoroloġika u tal-Informazzjoni Legali,
MICUS, Diċembru 2008. [4] G. Vickery, Awwissu 2011. [5] Ir-rapport Mc Kinsey dwar ‘’, Mejju 2011. [6] Ir-rapport finali tal-Grupp ta' Esperti ta' Livell
Għoli dwar id-Dejta Xjentifika, Ottubru 2010. [7] ĠU L 345/90,
31.12.2003. [8] Id-Direttivi 2003/4/KE,
ĠU L 41/26, 14.2.03 u 2007/2/KE, ĠU L 108/1, 14.3.2007. [9] COM(2010) 461 finali. [10] COM(2008) 886 finali/2 [11] Komunikazzjoni dwar informazzjoni
xjentifika fl-era diġitali, COM (2007) 56, Komunikazzjoni dwar
Infrastrutturi tal-ICT għax-Xjenza elettronika COM(2009) 108 u
l-Konklużjonijiet tal-Kunsill relatati. [12] http://lod2.eu/. [13] http://www.openaire.eu/. [14] http://www.semic.eu/ [15] McKinsey, op.cit. [16] idem. [17] G. Vickery, op.cit. [18] Studju dwar , Deloitte Consulting
u oħrajn, Ġunju 2011. [19] Xi eżempji fuq
http://www.dr0i.de/lib/2011/07/04/a_sample_of_data_hugging_excuses.html [20] Ara l-proposti tal-Kummissjoni għall-Faċilità Nikkollegaw
l-Ewropa, COM(2011)665, COM(2011)657/3.