52011DC0782

KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI

Niżviluppaw Strateġija Marittima għaż-Żona tal-Oċean Atlantiku

(Test b’rilevanza għaż-ŻEE)

1. Kamp ta' applikazzjoni

L-Oċean Atlantiku, li jimmarka l-fruntiera fil-Punent tal-UE, huwa t-tieni l-akbar oċean fid-dinja. Din il-Komunikazzjoni twieġeb għal talba mill-Kunsill tal-Unjoni Ewropea[1] (UE) u l-Parlament Ewoprew[2]. Tipproponi approċċ koerenti u bbilanċjat li huwa konsistenti mal-aġenda UE 2020[3] u l-inizjattivi ewlenin tagħha li jippromwovu l-koeżjoni territorjali u li jqisu d-dimensjoni internazzjonali.

Filwaqt li dan l-approċċ propost fil-biċċa l-kbira se jiffoka fuq l-għoti ta’ għajnuna lill-komunitajiet li jgħixu u jaħdmu fuq il-kosta tal-Atlantiku biex ikunu ppreparati għar-realtajiet ekonomiċi ġodda, jagħraf ukoll li l-UE taqsam ir-responsabbiltà għall-amministrazzjoni tal-oċeani tad-dinja. F’sens wiesa’, l-istrateġija se tkopri l-ispejjeż, l-ibħra territorjali u ġuriżdizzjonali tal-ħames Stati Membri tal-UE b'linja kostali mal-Atlantiku[4] – Franza, l-Irlanda, il-Portugall, Spanja u r-Renju Unit[5] kif ukoll l-ilmijiet internazzjonali li jaslu lejn il-Punent sal-Ameriki, lejn il-Lvant sal-Afrika u l-Oċean Indjan, lejn in-Nofsinhar sal-Oċean tan-Nofsinhar u lejn it-Tramuntana sal-Oċean Artiku[6]. Barra mill-azzjonijiet li jikkonċernaw il-ħames Stati Membri tal-UE, kemm f'livell nazzjonali kif ukoll f’dak lokali, qed jitfittex impenn ukoll min-naħa tal-Istati oħrajn tal-UE li jużaw dan l-ispazju kif ukoll sħab internazzjonali li l-ilmijiet tagħhom imissu ma’ dan l-ispazju. Jeħtieġ li jitqiesu l-implikazzjonijiet tas-sħubija tal-Islanda fl-UE.

L-azzjonijiet kollha proposti għandhom jiġu ffinanzjati fi ħdan programmi eżistenti u mhu se joħolqu ebda impatt addizzjonali fuq il-baġit tal-UE.

2. Opportunitajiet u Sfidi

L-isfidi u l-opportunitajiet li qed taffaċċja ż-żona tal-Oċean Atlantiku jistgħu jinġabru f’ħames temi. Madankollu dawn ma jiffurmawx sett ta’ azzjonijiet uniċi. L-azzjonijiet f’tema waħda jistgħu wkoll jikkontribwixxu għall-għanijiet ta’ tema oħra. Kollha se jikkontribwixxu lejn l-għan prevalenti tal-ħolqien ta’ impjiegi u tkabbir sostenibbli.

2.1. Nimplimentaw l-approċċ ekosistemiku

Il-ġestjoni tal-attivitajiet tal-bniedem fl-Atlantiku għandha twassal għal ekosistema b’saħħitha u produttiva. Huwa rikonoxxut li dan l-approċċ huwa implimentat bl-aqwa mod permezz tal-ġestjoni flimkien tal-attivitajiet kollha li għandhom impatt fuq il-baħar. L-approċċ ekosistemiku huwa l-bażi għall-ġestjoni tal-baħar kemm fil-Politika Komuni tas-Sajd kif ukoll fid-Direttiva ta’ Qafas dwar l-Istrateġija Marittima[7]. Iż-żewġ strumenti jinkludu referenzi għal iktar koerenza[8]. Madankollu, il-proċessi ta’ implimentazzjoni għall-iżgurar ta’ sajd sostenibbli u l-kisba ta' status ambjentali tajjeb fil-prattika għadhom fil-biċċa l-kbira separati u se jirrikjedu sforz addizzjonali fiż-żona tal-Oċean Atlantiku.

Għalhekk, l-istrateġija għall-Atlantiku għandha tiffoka fuq l-iżvilupp tal-aspetti li ġejjin:

– L-attivitajiet tas-sajd kienu pedament ċentrali fl-ekonomiji taż-żewġ naħat tal-Atlantiku. Huma għadhom jipprovdu madwar terz[9] tal-volum tal-ħatt l-art tal-flotta tas-sajd tal-UE. Kwart tal-importazzjonijiet ta' ħut tal-UE skont il-valur huma min-Norveġja u l-Islanda. Ir-riforma proposta tal-Politika Komuni tas-Sajd (PKS)[10] tipproponi li dawn l-istokkijiet jiġu mmaniġġjati sabiex jinkiseb ir-rendiment massimu sostenibbli filwaqt li jiġu kkonservati l-prodotti u s-servizzi mir-riżorsi akkwatiċi ħajjin għall-ġenerazzjonijiet preżenti u futuri. Sar progress tajjeb. Pereżempju, skont ir-Riżoluzzjonijiet tan-Nazzjonijiet Uniti 61/105 u 64/72 kemm l-Organizzazzjonijiet Reġjonali tal-Ġestjoni tas-Sajd għall-Atlantiku tat-Tramuntana, il-Kummissjoni tas-Sajd tal-Atlantiku tal-Grigal u l-Organizzazzjoni tas-Sajd fl-Atlantiku tal-Majjistral għalqu ż-żoni tas-sajd għat-tkarkir tal-qiegħ mhux biss biex jiżguraw is-sostenibbilità fit-tul tal-istokkijet tal-ħut tal-baħar fond iżda wkoll biex jikkonservaw l-ekosistemi vulnerabbli tal-baħar inklużi l-isponoż u l-qroll. Iżda għandu jsir aktar. Il-ġestjoni ta’ speċi unika trid tieqaf sabiex ikun hemm pjanijiet fit-tul għal diversi speċijiet flimkien li jqisu l-ekosistema usa’. L-Istati Membri tal-Atlantiku għandhom jieħdu l-opportunitajiet tar-reġjonalizzazzjoni li jinħolqu bir-riforma tal-Politika Komuni tas-Sajd biex jadottaw miżuri tekniċi għall-Atlantiku. Il-Kummissjoni beħsiebha tipproponi qafas xieraq hekk kif ir-riforma tal-PKS tidħol fis-seħħ.

– L-akkwakultura tista’ tissodisfa d-domanda tal-UE għal prodotti tal-ħut tajbin għas-saħħa u li jiġu prodotti b’mod sostenibbli fil-livell li jista’ jiġi pprovdut mis-sajd tal-qbid u f’livell ogħla. L-ilmijiet kostali nodfa tal-Atlantiku b’mareat qawwija jipprovdu opportunità biex tintlaħaq din id-domanda, u b’hekk nibqgħu kompetittivi f’suq globali filwaqt li nirrispettaw l-ambjent. Madankollu, in-nuqqas ta’ spazju fuq il-littoral tal-Atlantiku bħalissa jillimita l-espansjoni. Filwaqt li titkompla r-riċerka, teknoloġiji ġodda u inġinerija innovattiva se jippermettu lill-industrija tmur aktar lil hinn mill-kosta, il-qsim ta’ spazju ma’ infrastruttura oħra bħall-pjattaformi tat-turbini tar-riħ hija opportunità li għandha titqies mill-bidu ta' kwalunkwe proċess ta’ liċenzjar. L-istrateġija għandha għalhekk tippromwovi l-ippjanar spazjali bħala għodda għall-implimentazzjoni tal-approċċ ekosistemiku fiż-żona tal-Oċean Atlantiku. Proċess bħal dan għandu jsaħħaħ il-koerenza, il-konnettività u r-reżiljenza ta’ żoni protetti tal-baħar fl-Atlantiku skont il-pjan ta’ azzjoni għall-bijodiversità tal-UE.

L-istrumenti tal-UE għal politika marittima integrata u l-kooperazzjoni territorjali diġà qed jappoġġjaw proġetti pilota dwar l-ippjanar spazjali u l-ġestjoni taż-żoni kostali fl-Atlantiku. Il-Kummissjoni Ewropea bħalissa qed teżamina l-għażliet għal approċċ iktar strutturat lejn dawn il-mekkaniżmi li se jippermetti lill-Istati Membri tal-Atlantiku u lill-partijiet interessati jimplimentaw l-approċċ ekosistemiku.

– Fl-aħħar nett, iċ-ċirkolazzjoni oċeanika tal-Atlantiku tixpruna l-bidliet fl-ekosistemi Ewropej, kemm dawk terrestri kif ukoll dawk tal-baħar. It-tbassir tal-bidliet futuri fil-klima tal-Ewropa u l-adattament ta’ dawn il-bidliet qatt mhu se jinkisbu mingħajr fehim aħjar tal-Atlantiku. Dan jitlob għal sistemi ta' osservazzjoni sostenibbli, mill-ispazju u fil-baħar, ta' varjabbli ewlenin tal-baħar. Is-sħab Ewropej u tat-Tramuntana tal-Amerika jikkontribwixxu għall-programm ARGO li diġà poġġa firxa ta' 900 sufrun li jimmonitorjaw kontinwament it-temperatura u s-salinità tal-wiċċ tal-Oċean Atlantiku. Il-Kummissjoni beħsiebha teżamina l-alternattivi biex tappoġġja din is-sistema ta' osservazzjoni tal-oċeani u tħejji, flimkien mas-sħab tagħha, l-estensjoni tagħha għal livelli aktar fil-fond u parametri bijoġeokimiċi kif ukoll fiżiċi.

2.2. Innaqqsu l-marka tal-karbonju tal-Ewropa

Peress li l-mitigazzjoni tat-tibdil fil-klima hija parti integrali mill-politiki kollha tal-UE, l-istrateġija trid tiffoka fuq l-elementi li ġejjin:

– L-Atlantiku għandu rjieħ aktar qawwija mill-ibħra l-oħra li jolqtu x-xtut tal-Ewropa. Dan mhux biss joffri enerġija nadifa iżda jista' jikkontribwixxi wkoll lejn anqas dipendenza fuq sorsi mbiegħda ta' fjuwil fossilu. It-turbini tar-riħ huma inklużi fil-Pjan Strateġiku tal-Enerġija tal-UE u diġà qed imorru lil hinn mill-kosta[11] biex jibbenefikaw minn irjieħ aktar qawwija u jnaqqsu l-impatt fuq il-pajsaġġ. L-espansjoni ta’ parks eoliċi lil hinn mill-kosta se toffri opportunitajiet industrijali ewlenin għall-portijiet li jagħtuhom servizz. Sal-2020, madwar 20 % tal-kapaċità eolika installata Ewropea lil hinn mill-kosta tista’ tkun tinstab fil-baċir tal-Atlantiku.

– Jeħtieġ ukoll li jiġi sfruttat il-potenzjal tal-mewġ qawwi u l-mareat b’saħħithom tal-Atlantiku. In-natura prevedibbli tal-enerġija mill-mareat tista’ tikkomplimenta l-enerġija varjabbli mir-riħ. Il-gżejjer jistgħu jirċievu proporzjon għoli tal-enerġija tagħhom mill-baħar. Madankollu, l-użu b'suċċess ta’ enerġija rinnovabbli lil hinn mill-kosta fuq skala kbira se jseħħ biss jekk ikun żgurat li l-konnessjonijiet tal-grilji jillinkjaw iċ-ċentri prinċipali ta’ produzzjoni mal-konsum. F’Diċembru 2010, għaxar pajjiż Ewropej qablu li jiżviluppaw grilja tal-elettriku lil hinn mill-kosta fil-Baħar tat-Tramuntana li jinsab biswit. Fil-linji gwida l-ġodda għall-implimentazzjoni tal-infrastrutturi tal-enerġija tal-Ewropa, il-Kummissjoni se tipproponi li l-Baħar Irlandiż ikun inkluż flimkien mal-Baħar tat-Tramuntana u l-Baltiku ġewwa "grilja lil hinn mill-kosta tal-Ibħra tat-Tramutana" li se jitqiesu bħala "prijorità tal-infrastruttura tal-enerġija". Dan se jħaffef il-proċess għall-għoti tal-permessi.

Il-Kummissjoni beħsiebha timplimenta t-talba tal-Kunsill[12] li tesplora s-sinerġiji bejn il-Politika Ewropea tal-Enerġija u l-politika marittima integrata sabiex tippromwovi aktar ġenerazzjoni tal-enerġija mill-baħar, partikolarment mill-mewġ, il-mareat, il-kurrenti u sorsi tal-gradjent termali, inkluż mill-Atlantiku.

– Il-bidliet fit-trasport marittimu se jikkontribwixxu wkoll għat-tnaqqis tal-marka tal-karbonju fl-Atlantiku.

Għaddejjin negozjati taħt l-awspiċji tal-Organizzazzjoni Marittima Internazzjonali (IMO) biex jitnaqqsu l-emissjonijiet ta’ gassijiet serra mit-tbaħħir internazzjonali. L-adozzjoni ta’ Indiċi ta’ Effiċjenza Enerġetika se tnaqqas l-emissjonijiet minn bastimenti li jinbnew wara l-2013. Filwaqt li jiffavorixxu bastimenti aktar effiċjenti fl-użu tal-fjuwil, il-miri tal-emissjonijiet jistgħu jinfluwenzaw l-organizzazzjoni tar-rotot tat-tbaħħir fl-Atlantiku. L-istrateġija fl-Atlantiku għandha tirrifletti kif it-tbaħħir fl-Atlantiku jkun jopera taħt ir-restrizzjonijiet ta' żieda fil-volum tat-tbaħħir u inqas emissjonijiet ta’ dijossidu tal-karbonju.

Il-bidla fit-trasport tal-merkanzija mit-triq għall-baħar ukoll se tnaqqas l-emissjonijiet. Skont il-White Paper riċenti tal-UE dwar it-trasport, bħalissa għaddejjin azzjonijiet immirati lejn l-integrazzjoni ta’ trasport fuq l-ilma fin-netwerk tat-trasport Ewropew. L-Atlantiku ma jospita ebda port enormi iżda pjuttost għadd sinifikanti ta’ portijiet iżgħar. Il-proġetti dwar l-"Awstostradi tal-Baħar" tal-UE diġà jikkontribwixxu permezz ta' rotot eżistenti bejn Bilbao u Zeebrugge, bejn Sines u La Spezia u rotta ġdida bejn Gijón u Saint-Nazaire li dalwaqt jiġu mtejba biex jipprovdu frekwenza ogħla. Hija ppjanata rotta bejn Nantes-Saint-Nazaire u Vigo, li għandha tiġi estiża fi stadju aktar tard sa Le Havre u Algesiras. Fl-2014, għandha tibda topera linja bejn Brest u Leixões. L-awtoritajiet reġjonali tal-Atlantiku qed jikkunsidraw l-iżvilupp ulterjuri ta' kurituri tat-trasport multimodali, bħala parti min-Netwerk Ewropew tat-Trasport (TEN-T). Azzjonijiet oħra tal-UE biex tiżdied l-effiċjenza ta’ tbaħħir fil-qosor fl-Atlantiku jinkludu l-implimentazzjoni ta’ "Żona Ewropea ta’ Trasport Marittimu mingħajr Konfini"[13] u l-proġett pilota "Blue Belt" biex jitnaqqsu l-piżijiet amministrattivi bħall-proċeduri doganali għat-traffiku tal-merkanzija intraUE. Il-Kummissjoni se tivvaluta l-progress sal-2012. Djalogu dwar it-trasport marittimu mal-amministrazzjoni marittima tal-Istati Uniti rriżulta f’Memorandum ta’ kooperazzjoni dwar it-tbaħħir qasir bil-baħar iffirmat fl-2011. Ir-riżultati mir-riflessjoni tal-awtoritajiet reġjonali, ir-rapport ta’ progress tal-Kummissjoni u t-tagħlimiet meħuda mill-kooperazzjoni ma’ awtoritajiet marittimi oħra se jdakkru l-isforz tal-istrateġija tal-Atlantiku sabiex jiżdied il-volum tat-tbaħħir qasir bil-baħar.

2.3. Nisfruttaw ir-riżorsi naturali f'qiegħ il-baħar tal-Atlantiku b’mod sostenibbli

Din l-istrateġija għandu jkollha l-għan li tiffoka fuq l-aspetti li ġejjin sabiex tiżviluppa l-isfruttar sostenibbli tar-riżorsi naturali f'qiegħ il-baħar tal-Atlantiku:

– Il-Komunikazzjoni riċenti mill-Kummissjoni dwar l-indirizzar tal-isfidi fis-swieq tal-komoditajiet u dawk marbutin mal-materja prima[14] tenfasizza l-bżonn li jiżdied l-investiment tal-assi naturali tal-Ewropa filwaqt li jiġi żgurat li l-minerali jiġu estratti taħt kundizzjonijiet sikuri li jirrispettaw l-ambjent u l-ħaddiema. Fl-2010 l-Awtorità Internazzjonali dwar Qiegħ il-Baħar adottat regolamenti dwar it-tfittxija u l-esplorazzjoni għan-noduli polimetalliċi[15] u f'Lulju 2011 ħarġet liċenzja għat-tiftix ta’ erja fiż-żona tat-Tramuntana tax-xifer ta’ nofs l-Atlantiku. L-isforzi ta' kuntratturi attwali mal-Awtorità huma primarjament diretti lejn studji ġeoloġiċi u ambjentali fit-tul, iffinanzjati permezz ta’ fondi pubbliċi iktar milli l-esplorazzjoni xprunata kummerċjalment. Is-Sħubija Ewropea dwar il-materja prima ppjanata mill-Kummissjoni fil-qafas tal-Inizjattiva Ewlenija tal-UE2020 dwar l-Unjoni tal-Innovazzjoni[16] se tinkludi l-promozzjoni tar-riċerka u l-innovazzjoni għal aċċess sostenibbli għall-materja prima tal-baħar.

– L-istituti tar-riċerka tal-baħar fuq iż-żewġ naħat tal-Atlantiku huma f’post tajjeb biex iżidu l-għarfien dwar x’tista’ toffri l-bijodiversità rikka tal-oċean għall-ikel, il-fjuwil u l-farmaċewtiċi filwaqt li jiġu kkonservati l-funzjonijiet tal-ekosistemi tiegħu. Huma qegħdin dejjem aktar jaħdmu flimkien. Il-ħames Stati tal-UE li jmissu mal-Atlantiku u Stati Membri oħra tal-UE kif ukoll in-Norveġja u l-Islanda diġà qed jikkooperaw taħt is-Seba’ Programm Kwadru[17] fl-azzjoni ta’ koordinazzjoni SEAS-era[18] u bħalissa qegħdin iħejju l-Inizjattiva ġdida għall-Ipprogrammar Konġunt "Ibħra u Oċeani b’Saħħithom u Produttivi"[19] biex jaqsmu x-xogħol fost il-programmi nazzjonali ta’ riċerka tal-baħar. Filwaqt li l-bini ta’ sħubijiet transatlantiċi kien diffiċli minħabba l-bżonn ta’ allinjament taż-żmien ta’ opportunitajiet ta' finanzjament, il-Kummissjoni se tfittex li tiddefinixxi l-arranġamenti li jippermettu li l-organizzazzjonijiet fuq iż-żewġ naħat tal-Atlantiku jikkontribwixxu għal proġetti konġunti.

– L-aċċess għad-dejta prodotta minn istituti ta' riċerka u awtoritajiet pubbliċi oħra mhux dejjem kien faċli fil-passat. L-inizjattiva 2020 tal-UE dwar l-għarfien tal-baħar[20] se tappoġġja n-negozji u l-awtoritajiet ta’ konservazzjoni billi tipprovdi punt ta’ aċċess uniku għad-dejta tal-baħar armonizzat skont il-baċiri tal-ibħra, u b'hekk inaqqas l-ispiża tal-ġbir flimkien tad-dejta meħtieġa biex tkun iddisinjata, mibnija u mħaddma infrastruttura kostali jew lil hinn mill-kosta. L-isfruttar tal-potenzjal tal-patrimonju tad-dejta tal-baħar mhux biss se jwassal sabiex il-proċessi kummerċjali attwali ikunu aktar kompetittivi iżda se jistimula l-innovazzjoni billi jiftaħ l-aċċess għal riċerkaturi u negozji żgħar li qabel kienu esklużi. Hemm il-ħsieb li l-isforzi tal-UE wkoll jikkontribwixxu lejn inizjattivi ta’ aċċess globali miftuħ bħal GEBCO[21] u OneGeology[22]. L-istrateġija għandha tirrifletti dwar l-opportunitajiet li dawn l-iżviluppi jiftħu għaż-żona tal-Oċean Atlantiku.

2.4. Nirreaġixxu għat-theddid u l-emerġenzi

Jeħtieġ li l-UE tkun ippreparata għat-theddid u l-emerġenzi fl-Atlantiku kemm jekk ikunu kkawżati minn inċidenti, diżastri naturali kif ukoll minn attività kriminali. L-aspetti li ġejjin huma prijoritajiet għaż-żona tal-Oċean Atlantiku:

– L-adozzjoni ta' miżuri leġiżlattivi importanti dwar is-sikurezza marittima, bl-aktar waħda riċenti tkun it-tielet pakkett dwar is-sikurezza marittima fl-2009[23], naqqsu r-riskju tal-inċidenti fit-tbaħħir. Il-Ftehimiet ta’ Lisbona u ta' Bonn[24] xprunaw il-koordinazzjoni bejn l-Istati Membri dwar it-tħejjija u r-reazzjoni għad-diżastri tal-baħar. Il-Memorandum ta' Fehim ta' Pariġi, wassal għal aktar minn 24.000 spezzjoni ta’ vapuri fis-sena. Madankollu l-inċidenti xorta jistgħu jseħħu u l-kosta tal-Atlantiku tibqa’ vulnerabbli għal avvenimenti naturali bħall-maltempati li laqtu l-Vendée fl-2010. Il-klima li dejjem tinbidel flimkien ma' impatti umani oħrajn fuq il-baħar tfisser li dak li ġara fil-passat jista’ ma jkunx ta’ gwida għall-futur. Għandna dejjem inkunu ppreparati għal dak li mhux mistenni.

L-ewwel sigħat ta’ kriżi huma vitali u l-avvenimenti b’impatt lokali għandhom bżonn l-għajnuna mill-ġirien. Il-mekkaniżmi għandhom ikunu f’posthom qabel il-maltempati, it-terremoti, it-tsunami, l-inċidenti nukleari, l-invażjoni ta' speċijiet aljeni, jew it-tixrid taż-żejt. It-twissijiet bikrin jeħtieġu monitoraġġ kontinwu tal-baħar, it-trażmissjoni veloċi ta' informazzjoni, il-koordinazzjoni tat-timijiet ta' reazzjoni u l-mobilizzazzjoni tal-parir espert. Il-Kummissjoni qegħda tmexxi l-ħidma dwar il-prevenzjoni u l-preparazzjoni inkluża l-politika tal-ġestjoni tar-riskju[25] li tgħaqqad il-valutazzjoni tat-theddid u tar-riskju mat-teħid ta' deċiżjonijiet u l-iżvilupp tal-ippjanar tax-xenarju għal diżastri transkonfinali. Meta sseħħ emerġenza kbira ħafna, il-Mekkaniżmu ta’ Protezzjoni Ċivili tal-UE jiffaċilita l-koordinazzjoni u t-trasport tal-assistenza mill-Istati Membri u l-Aġenzija Ewropea għas-Sigurtà Marittima (EMSA). Jista’ jikkontribwixxi wkoll lejn dan, it-tbassir preċiż tal-baħar imsejjes fuq is-servizzi ewlenin tal-baħar tal-programm ta' Monitoraġġ Globali tal-Ambjent u s-Sigurtà. Huwa jagħti tbassir separat għall-Atlantiku tal-Majjistral u ż-żona Iberika u ta’ Biscay. L-awtoritajiet nazzjonali u reġjonali responsabbli għall-ħarsien tal-linja kostali tal-Atlantiku u n-nies li jgħixu hemmhekk għandhom jikkunsidraw proġetti li jittestjaw il-livell ta’ preparazzjoni taħt il-programm tal-kooperazzjoni territorjali tal-UE u jieħdu impenn attiv fil-Mekkaniżmu ta’ Protezzjoni Ċivili tal-UE.

– L-Atlantiku huwa ta’ importanza vitali għall-eżistenza tal-kummerċ fl-Ewropa. Is-sigurtà tal-provvista tal-Ewropa għandha tkun assolutament sikura u t-traffikar tal-armi, in-nies u d-drogi għandu jieqaf. L-ekonomiji tal-Unjoni Ewropea u l-Istati Uniti jammontaw għal madwar nofs il-PDG fid-dinja u għal kważi terz tal-flussi kummerċjali fid-dinja. F'Ġunju 2011 dawn iż-żewġ sħab qablu li jirrikonoxxu reċiprokament l-istandards sabiex jitnaqqsu l-ostakli regolatorji għall-kummerċ filwaqt li jiżguraw is-sigurtà tal-linja transatlantika vitali għall-eżistenza tal-kummerċ. L-istrateġija għal rotot marittimi kritiċi oħrajn hija li tinbena l-kapaċità fl-Istati kostali. Bħalissa għaddejja valutazzjoni tal-ħtiġijiet biex tiddetermina liema miżuri taħt l-istrument għall-istabbiltà jistgħu jnaqqsu l-piraterija, is-serq armat fuq il-baħar u t-teħid ta' ostaġġi fil-Golf tal-Guinea.

Is-SafeSeaNet tal-Aġenzija Ewropea għas-Sigurtà Marittima diġà tipprovdi integrazzjoni ta’ dikjarazzjonijiet obbligatorji mill-vapuri u portal għas-sinjali mis-Sistema ta' Identifikazzjoni Awtomatika (AIS) tagħhom li jindunaw bihom l-istazzjonijiet kostali. Il-bastimenti tas-sajd huma mmonitorjati permezz tas-sistema ta’ Monitoraġġ tal-Bastimenti u s-sistema ta’ Identifikazzjoni u Traċċar mill-Bogħod tippermetti s-sorveljanza tal-vapuri tal-passiġġieri u tal-merkanzija kollha ‘l fuq minn 300 tunnellata f’elf mil nawtiku mill-kosta Ewropea. Intwera wkoll it-traċċar ta' vapuri li jinsabu saħansitra aktar 'il bogħol b’teknoloġiji oħrajn[26]. Madankollu dawk li qed jaħdmu kontra theddid bħall-kuntrabandu, is-sajd illegali jew it-traffikar għad m'għandhomx aċċess għal stampa sħiħa peress li l-ftehimiet għall-qsim tad-dejta bejn awtoritajiet differenti għadhom mhumiex kompletament fis-seħħ. Ir-reġjuni tal-Atlantiku għalhekk se jibbenefikaw minn miżuri fil-livell tal-UE li għaddejjin bħalissa biex jippromwovu l-iżvilupp ta’ Ambjent Komuni għall-Qsim tal-Informazzjoni (CISE) li se jgħaqqad sistemi bħas-Sistema Ewropea ta’ Sorveljanza tal-Fruntieri (EUROSUR), għall-iskambju ta' informazzjoni dwar il-migrazzjoni irregolari u l-kriminalità transkonfinali u s-sistema SafeSeaNet. Il-qsim ta' informazzjoni mhijiex purament ta' tħassib intern għall-UE. Pereżempju f'Settembru 2011 l-Istati Uniti u l-Unjoni Ewropea qablu li jaqsmu l-informazzjoni dwar sajd illegali, mhux rappurtat u mhux regolat. Il-fokus tal-istrateġija tal-Atlantiku għandha tkun li jimmassimizza l-benefiċċju mill-qsim tal-informazzjoni.

2.5. Tkabbir inklussiv soċjalment

Filwaqt li hemm varjazzjoni konsiderevoli madwar il-kosta tal-Atlantiku, ħafna komunitajiet iridu jlaħħqu ma’ tnaqqis fl-impjiegi fis-sajd u fil-bini tal-vapuri, iċ-ċaqliq tat-turiżmu tal-massa lejn klimi aktar xemxin u t-tendenza li l-anzjani jagħżlu l-kosta għall-irtirar. L-isfida hija li niżguraw il-ħolqien ta’ impjiegi ġodda b’valur miżjud għoli fuq il-kosta u, bl-istess mod, li dawk li qed ifittxu x-xogħol fl-ekonomija l-ġdida jkollhom il-ħiliet it-tajba biex jimlew dawn l-impjiegi.

– Huma meħtieġa rikonoxximent reċiproku usa’ tat-taħriġ, inkluża l-ġenerazzjoni li jmiss ta' xjenzjati tal-baħar[27], taħriġ mill-ġdid u kwalifiki professjonali biex jinżamm l-għarfien espert marittimu u biex il-professjonijiet marittimi jerġgħu isiru attraenti. Hemm bżonn li jsir użu aħjar tal-esperjenza tan-nies irtirati minn professjonijiet marittimi u li ż-żgħażagħ jinġibdu lejn karrieri marittimi. Id-djalogu ma' sħab soċjali dwar il-kundizzjonijiet tax-xogħol għas-sajjieda u l-baħħara għandu jkompli. Il-Kummissjoni bdiet ix-xogħol dwar l-evalwazzjoni tad-Direttiva dwar il-Kwalifiki Professjonali tal-2005 li se twassal għal Green Paper fl-2011 u reviżjoni tad-Direttiva fl-2012. L-istrateġija għandha l-għan li tinkludi kontribut mill-industriji marittimi tal-Atlantiku f'dawn l-isforzi.

Ir-raggruppament reġjonali ta' industriji marittimi ma' stabbilimenti edukattivi jistgħu jiżguraw forza tax-xogħol b’ħiliet u jippromwovu l-mobbiltà tal-ħaddiema ġewwa s-setturi. Pereżempju l-industrija lil hinn mill-kosta Brest tibbenifika mill-viċinanza ta' istituzzjonijiet li jipprovdu tagħlim u riċerka dwar il-baħar. U l-inizjattiva SmartOcean tal-Istitut Irlandiż dwar il-Baħar jinvolvi lil kumpaniji tat-teknoloġija tal-informazzjoni multinazzjonali u lil intrapriżi ż-żgħar fl-iżvilupp ta’ prodotti ta’ valur għoli għall-industrija tal-baħar. Il-miġja ta' teknoloġiji ġodda ta’ komunikazzjoni tfisser li massa kritika ta' industriji u riċerkaturi f'postijiet ġeografikament separati jistgħu jwaqqfu raggruppamenti virtwali. L-istrateġija għandha tiffoka fuq l-inkoraġġiment tal-iżvilupp ta’ dawn ir-raggruppamenti permezz ta’proġetti ta’ kooperazzjoni territorjali.

– Turiżmu għaqli[28] jista' jgħin biex jiġġenera mill-ġdid xi żoni kostali tal-Atlantiku iżda jrid jiġbed il-kummerċ matul is-sena kollha u mhux biss fis-sajf biex jappoġġja l-impjiegi ta' kwalità. Is-sbuħija selvaġġa naturali tal-Atlantiku, il-bijodiversità rikka, il-kċina tradizzjonali tal-frott tal-baħar u l-kultura Ċeltika huma assi li jistgħu jiġu sfruttati faċilment. L-attivitajiet nawtiċi huma sors importanti ta’ dħul u joħolqu impjiegi ta’ valur għoli, għalkemm il-kosta tal-Atlantiku għandha nuqqas kbir ta’ rmiġġi speċjalment għall-bastimenti ta’ rikreazzjoni kbar. It-tkabbir drammatiku tal-industrija tal-kruċieri f'postijiet oħra għadu ma ġiex riprodott fl-Atlantiku. L-istrateġija tal-Atlantiku għandha tinkorpora l-opportunitajiet għall-iżvilupp f'dan il-qasam.

3. Għodod tal-UE

L-istrumenti leġiżlattivi tal-UE b'impatti importanti fuq il-baħar u li jippermettu awtonomija lokali konsiderevoli huma fi stadju bikri ta' maturità u l-istrumenti finanzjarji għall-perjodu ta' programmar 2014-2020 tal-UE qed jitħejjew. Id-deċiżjonijiet ta’ programmar li qed jittieħdu issa u li se jittieħdu fil-futur qrib se jkollhom impatt matul dan il-perjodu. Għalhekk huwa essenzjali li l-partijiet interessati fl-Atlantiku jkunu lesti li jużaw dawn l-istrumenti sabiex jaffrontaw l-isfidi identifikati hawnhekk. L-għodod ewlenin huma:

– Qafas Strateġiku Komuni għall-fondi strutturali li se jsarraf il-miri u l-għanijiet ta' Ewropa 2020 f'azzjonijiet ewlenin u jiffoka fuq oqsma bħall-enerġija u l-ambjent. Dan il-qafas se jidentifika azzjonijiet ewlenin meħtieġa fir-rigward tal-miri u l-inizjattivi ewlenin. Il-Qafas Strateġiku Komuni se jinkludi l-azzjonijiet li bħalissa huma koperti mill-Fond ta' Koeżjoni, il-Fond Ewropew għall-Iżvilupp Reġjonali, il-Fond Soċjali Ewropew, il-Fond Ewropew għall-Affarijiet Marittimi u għas-Sajd u l-Fond Agrikolu Ewropew għall-Iżvilupp Rurali u jidentifika r-rabtiet u l-mekkaniżmi ta' koordinazzjoni mal-istrumenti l-oħra tal-UE bħall-programmi għar-riċerka, l-innovazzjoni, it-tagħlim tul il-ħajja u n-netwerks

– Orizzont 2020 - Qafas Strateġiku Komuni għar-riċerka, l-innovazzjoni u l-iżvilupp teknoloġiku li se jorbot sew mal-programmi nazzjonali ta’ riċerka biex tiġi promossa l-eċċellenza, jiġu affrontati l-isfidi tas-soċjetà u tingħata spinta lill-kompetittività. Ir-riċerka, l-iżvilupp teknoloġiku u l-innovazzjoni jistgħu joħolqu opportunitajiet għat-tkabbir sostenibbli li jikkumpensaw għat-tnaqqis relattiv tal-industriji marittimi tradizzjonali. Il-proġett SEAS-ERA li għaddej bħalissa se jagħti prijoritajiet speċifiċi għall-baċiri tal-Atlantiku li jistgħu jintużaw fil-programmi ta’ ħidma tal-Qafas il-ġdid.

– Politika Komuni tas-Sajd riformata. Il-Kummissjoni pproponiet[29] aġenda b'miri ambizzjużi għar-reġjonalizzazzjoni u s-simplifikazzjoni. Filwaqt li d-deċiżjonijiet ewlenin dwar l-għanijiet, il-miri, l-istandards minimi komuni, ir-riżultati u l-iskedi ta’ żmien għat-twassil jibqgħu fil-livell tal-UE, l-Istati Membri għandu jkollhom il-flessibbiltà biex jiddeċiedu dwar miżuri oħra għall-ġestjoni tas-sajd, taħt is-superviżjoni tal-Kummissjoni u f'konformità sħiħa mal-liġi tal-UE. L-Istati Membri li qegħdin mal-Atlantiku laqgħu din id-devoluzzjoni u jistennew li dan iwassal għal ġestjoni tas-sajd li tkun kapaċi tirreaġixxi aktar malajr u b’mod aktar effiċjenti għat-tibdil tal-kundizzjonijiet ekoloġiċi jew ekonomiċi.

– Id-Direttiva Kwadru dwar l-Istrateġija Marina[30] li tistabbilixxi qafas sabiex jintlaħaq jew jinżamm status ambjentali tajjeb fl-ambjent tal-baħar sa mhux aktar tard mis-sena 2020. L-Istatus Ambjentali Tajjeb huwa fil-livell tar-reġjun tal-baħar[31], u b’hekk hija meħtieġa l-kooperazzjoni bejn l-Istati kostali fid-definizzjoni, il-monitoraġġ u l-valutazzjoni tal-istatus ambjentali tajjeb.

– l-inizjattivi ewlenin tal-politika marittima dwar is-sorveljanza marittima, l-għarfien dwar l-ibħra u l-ippjanar spazjali marittimu. Dawn se jistabbilixxu standards fil-livell tal-UE iżda se jinkludu wkoll miżuri speċifiċi għall-Atlantiku. Pereżempju il-proċess biex jitjieb l-għarfien dwar l-ibħra jinkludi “punti ta' kontroll” separati biex jiġu determinati n-nuqqasijiet, id-duplikazzjonijiet u l-prijoritajiet fil-programmi ta’ monitoraġġ tal-baħar fil-Bajja ta’ Biscay, fl-Ibħra Ċeltiċi, fil-kosta Iberika u l-Makaroneżja.

– strumenti ta’ politika barranija bħall-EDF (il-Fond Ewropew għall-Iżvilupp) u l-programm dwar ir-Rotot Marittimi Kritiċi tal-UE biex jimpenjaw pajjiżi terzi fil-protezzjoni tat-tbaħħir fl-Atlantiku, iżda wkoll permezz ta’ djalogu internazzjonali (permezz tal-IMO) u bilaterali mas-sħab fir-reġjun tal-Atlantiku.

– Hemm bżonn li tingħata prijorità lir-riċerka, il-proġetti pilota, id-djalogi, is-sħubijiet u l-investimenti fi proposti strateġiċi u ta’ programmi fi ħdan dan il-qafas sabiex jingħata l-aktar pakkett effettiv għall-benefiċċju tal-Atlantiku.

4. Implimentazzjoni tal-istrateġija

L-istrateġija tal-Atlantiku mhux se taħdem biss b'azzjoni mill-istituzzjonijiet tal-UE. Tirrikjedi l-involviment mill-Istati Membri, ir-reġjuni, l-awtoritajiet lokali u l-industrija privata kif ukoll minn gruppi ta’ riflessjoni. Għalhekk l-iżvilupp tal-istrateġija għaż-żona tal-Oċean Atlantiku hija bbażata fuq il-metodoloġija li ġejja:

– il-bini fuq l-impenn attiv u l-inizjattiva ta’ Stati Membri u reġjuni li qegħdin mal-Atlantiku u partijiet oħra interessati fit-tfassil u l-implimentazzjoni ta' azzjonijiet inkluż input minn Gruppi ta’ Azzjoni Lokali. Dawn huma gruppi ta’ sħab pubbliċi u privati li jirċievu appoġġ speċifiku mill-Fond Ewropew għas-Sajd u l-Fond Agrikolu Ewropew għall-Iżvilupp Rurali sabiex jidentifikaw investimenti mill-UE. Dan l-approċċ ta’ awtoassistenza minn isfel għal fuq ipprovda lill-komunitajiet lokali bil-mezzi biex jiżviluppaw attivitajiet ekonomiċi ġodda f'oqsma fejn l-opportunitajiet tradizzjonali qed jonqsu u għandu jitkompla fl-iffinanzjar strutturali l-ġdid ta' wara l-2013.

– il-promozzjoni tal-kooperazzjoni internazzjonali dwar kwistjonijiet bħalma huma l-osservazzjoni, il-qsim tad-dejta, il-valutazzjonijiet tal-ibħra, ir-riċerka, it-tnaqqis tal-emissjonijiet u t-tniġġis minn bastimenti, in-navigazzjoni bla periklu u sikuri, is-sigurtà tal-portijiet, il-ġlieda kontra l-piraterija, u l-ġlieda kontra s-sajd illegali, mhux rappurtat u mhux regolat.

– l-adozzjoni ta’ Pjan ta' Azzjoni għall-istrateġija sa tmiem l-2013, b’indikazzjoni tal-proġetti u l-azzjonijiet speċifiċi rrakkomandati għall-appoġġ.

– "Governanza intelliġenti" sabiex timplimenta l-istrateġija billi tibni fuq strutturi attwali

L-għodod għall-implimentazzjoni tal-istrateġija huma:

– kooperazzjoni msaħħa - laqgħat, konferenzi, workshops, diskussjoni onlajn u siti ta’ informazzjoni.

– azzjonijiet immirati ġewwa ftehimiet u strutturi eżistenti bħalma huma l-Konvenzjoni OSPAR, l-organizzazzjonijiet reġjonali tas-sajd u l-Organizzazzjoni Marittima Internazzjonali.

– taħlita strateġika tal-istrumenti ta’ finanzjament u dawk leġiżlattivi tal-UE definiti fit-Taqsima 3 biex jinkisbu l-għanijiet għall-Atlantiku.

Bħala l-ewwel pass, ġie stabbilit Forum dwar l-Atlantiku li se jippermetti lill-Istati Membri, il-Parlament, l-awtoritajiet reġjonali, is-soċjetà ċivili u r-rappreżentanti ta’ industriji eżistenti u emerġenti biex jikkontribwixxu. Se jinkludi sett ta' workshops iffukati fuq l-isfidi u l-opportunitajiet spjegati hawn fuq u grupp ta’ riflessjoni biex jissuġġerixxi alternattivi sabiex jintlaħqu l-għanijiet. Il-Forum hu mistenni li jibda jaħdem fl-2012 u jiġi xolt fl-2013.

[1]               Il-Konklużjonijiet tal-Kunsill dwar il-Politika Marittima Integrata tal-14.06.2010.

[2]               Ir-Riżoluzzjoni dwar l-Istrateġija Ewropea għar-Reġjun tal-Atlantiku, 9.03.2011 (ref B7-0165/2011).

[3]               COM(2010) 2020.

[4]               L-isfidi pjuttost differenti tal-kosti u l-ilmijiet tal-Baħar tat-Tramuntana mhumiex ikkunsidrati hawnhekk. Għadha ma ttieħdet ebda deċiżjoni dwar jekk hux se tiġi żviluppata strateġija separata għall-Baħar tat-Tramuntana.

[5]               Inklużi r-Reġjuni l-Aktar Imbiegħda tal-Ażores, il-Gżejjer Kanarji, il-Gujana Franċiża, Guadeloupe, Madejra, Martinique, Saint Barthélemy u Saint-Martin

[6]               Ġie żviluppat approċċ separat tal-UE għall-Artiku, ara COM(2008) 763

[7]               Ara b’mod partikulari ĠU L 164, 25.6.2008, p. 19, Art. 1(3) L-istrateġiji Marini għandhom japplikaw approċċ ibbażat fuq il-kunsiderazzjonijiet tal-ekosistema għall-ġestjoni tal-attivitajiet tal-bniedem

[8]               Ara pereż. il-premessi 39 u 40 tal-MSFD, u l-premessa 8 u l-Artikolu 2(4) tar-Regolament propost għall-PKS.

[9]               Eskluż il-Baħar tat-Tramuntana

[10]             COM (2011)417 Riforma tal-Politika Komuni tas-Sajd

[11]             COM (2008) 768, 13.11.2008.

[12]             Il-Kunsill tal-Affarijiet Ġenerali, is-16 ta’ Novembru 2009

[13]             COM(2009) l-10 ta’ Jannar 2009.

[14]             COM(2011) il-25 ta’ Frar 2011.

[15]             ISBA/6/A/18, l-Anness

[16]             COM(2010)546 finali.

[17]             L-istrument ewlieni tal-UE għall-finanzjament tar-riċerka u l-iżvilupp tat-teknoloġija

[18]             SEAS-era: Lejn Strateġija u Programmi Ta’ Riċerka Integrata tal-Baħar – http://www.seas-era.eu

[19]             http://www.jpi-oceans.eu

[20]             Komunikazzjoni tal-Kummissjoni "Għarfien dwar il-baħar 2020: dejta u osservazzjoni tal-baħar għat-tkabbir intelliġenti u sostenibbli" (COM(2010) 461, 8.9.2010)

[21]             Mappa batimetrika ġenerali tal-Oċeani

[22]             Inizjattiva internazzjonali ta’ stħarriġ ġeoloġiku fid-dinja varat fl-2007 biex tikkontribwixxi għas-“Sena Internazzjonali dwar il-Pjaneta Tagħna",

[23]             Ir-Regolamenti tat-23 ta' April 2009 (ĠU L 131, 28/05/2009) u d-Direttivi relatati sussegwenti..

[24]             Il-Ftehim ta' Lisbona jistipula l-implimentazzjoni ta’ Ċentru Internazzjonali ta' Azzjoni għar-Reazzjoni għal Inċidenti ta' Tniġġis fil-Grigal tal-Atlantiku (CILPAN).

[25]             Valutazzjoni tar-riskju u l-linji gwida direzzjonali għall-immaniġġjar tad-diżastri SEC (2010)1626

[26]             Pereżempju bl-użu ta' satelliti li jaqbdu sinjali minn Sistemi ta’ Identifikazzjoni Awtomatika tal-vapuri

[27]             Workshop tal-Ġurnata Marittima Ewropea 2010 "Lejn Forum ta’ Xjenzati u Teknoloġisti tal-Baħar Żgħażagħ". www.eurocean.org/euymast/

[28]             COM(2010)352, 30.06.2010

[29]             COM(2011) 417.

[30]             Id-Direttiva 2008/56/KE tat-17 ta' Ġunju 2008

[31]             Skont l-Artikolu 4, ir-reġjun tal-baħar tal-Grigal tal-Atlantiku huwa maqsum f'dawn is-subreġjuni: (i) il-Baħar tat-Tramuntana l-Kbir, inklużi l-Kattegat u l-Kanal Ingliż; (ii) l-Ibħra Ċeltiċi; (ii) il-Bajja ta' Biscay u l-Kosta Iberika; (iv) l-Oċean Atlantiku, ir-reġjun bijoġeografiku Makaroneżjan, li jikkonsisti mill-ilmijiet ta’ madwar l-Ażores, il-Madejra u l-Gżejjer Kanarji;