(1)

L-Artikolu 8ac(7), l-ewwel subparagrafu tad-Direttiva 2011/16/UE jipprevedi li wara talba motivata ta’ Stat Membru jew fuq inizjattiva tagħha stess, il-Kummissjoni għandha tiddetermina jekk l-informazzjoni li għandha tiġi skambjata awtomatikament mill-awtoritajiet kompetenti ta’ Stat Membru u ġuriżdizzjoni mhux tal-Unjoni skont ftehim bejn dawk l-awtoritajiet u dik il-ġuriżdizzjoni, hijiex ekwivalenti għal dik speċifikata fl-Anness V, it-Taqsima III, il-paragrafu B ta’ dik id-Direttiva. Ir-Regolament ta’ Implimentazzjoni tal-Kummissjoni (UE) 2023/823 (2) jistabbilixxi regoli għall-implimentazzjoni ta’ dik id-dispożizzjoni tad-Direttiva 2011/16/UE.

(2)

Wara talba tal-awtorità kompetenti tal-Kanada fit-30 ta’ Ġunju 2023, il-Kummissjoni ddeċidiet li tiddetermina jekk l-informazzjoni li hija meħtieġa tiġi skambjata awtomatikament skont il-Ftehim Multilaterali bejn l-Awtoritajiet Kompetenti dwar l-iskambju awtomatiku ta’ informazzjoni dwar l-introjtu derivat permezz ta’ pjattaformi diġitali (3) (“DPI-MCAA”), li bħalissa huwa ffirmat mill-awtoritajiet kompetenti tal-Kanada u tal-Belġju, tal-Bulgarija, tal-Kroazja, ta’ Ċipru, tal-Estonja, tal-Finlandja, tal-Irlanda, tal-Latvja, tal-Lussemburgu, ta’ Malta, tan-Netherlands, tal-Polonja, tal-Portugall, tas-Slovakkja, tas-Slovenja, ta’ Spanja u tal-Iżvezja (“l-Istati Membri firmatarji”), tirrelatax mal-attivitajiet fl-ambitu tad-Direttiva 2011/16/UE, u jekk hijiex ekwivalenti għall-informazzjoni meħtieġa skont ir-regoli dwar ir-rapportar stabbiliti f’dik id-Direttiva.

(3)

Għall-finijiet tad-determinazzjoni, il-Kummissjoni vvalutat id-dispożizzjonijiet rilevanti tal-Att tal-Kanada dwar it-Taxxa fuq l-Introjtu (4), b’mod partikolari s-Sezzjoni 162, il-Parti XX (“Regoli ta’ Rapportar għall-Operaturi tal-Pjattaformi Diġitali”) tiegħu, kif miżjuda bit-taqsima 78(1) tal-Att dwar l-Implimentazzjoni tal-Baġit tal-Kanada, 2023, Nru 1 (5), u li, skont it-Taqsima 78(2) tal-Att, se tidħol fis-seħħ fl-1 ta’ Jannar 2024, u d-DPI-MCAA li bħalissa huwa ffirmat mill-awtoritajiet kompetenti tal-Kanada u mill-Istati Membri firmatarji.

(4)

L-Att dwar it-Taxxa fuq l-Introjtu, kif emendat bl-Att dwar l-Implimentazzjoni tal-Baġit, 2023, Nru 1, japplika d-dispożizzjonijiet tal-Model Rules for Reporting by Platform Operators with respect to Sellers in the Sharing and Gig Economy (6) (“ir-Regoli Mudell”) tal-Organizzazzjoni għall-Kooperazzjoni u l-Iżvilupp Ekonomiċi (OECD) tal-2020, issupplimentati bil-Model Reporting Rules for Digital Platforms tal-OECD tal-2021: International Exchange Framework and Optional Module for sale of goods (7).

(5)

Id-DPI-MCAA huwa qafas legali internazzjonali żviluppat mill-OECD biex jappoġġa l-iskambju awtomatiku annwali tal-informazzjoni miġbura skont ir-Regoli Mudell tal-OECD mill-ġuriżdizzjoni tar-residenza tal-operatur tal-pjattaforma mal-ġurisdizzjonijiet ta’ residenza tal-bejjiegħa u, fir-rigward ta’ tranżazzjonijiet li jinvolvu l-kiri ta’ proprjetà immobbli, il-ġuriżdizzjonijiet li fihom tinsab tali proprjetà immobbli, kif determinat abbażi tal-proċeduri ta’ diliġenza dovuta.

(6)

Id-DPI-MCAA iffirmat mill-Kanada u mill-Istati Membri firmatarji jeħtieġ l-attivazzjoni tar-relazzjoni ta’ skambju bejn il-Kanada u kull Stat Membru firmatarju f’konformità mat-Taqsima 7 tad-DPI-MCAA.

(7)

F’konformità mal-Artikolu 2 tar-Regolament ta’ Implimentazzjoni (UE) 2023/823, il-Kummissjoni ddeterminat li d-definizzjonijiet rigward l-operatur tal-pjattaforma tar-rapportar stabbiliti fl-Att dwar it-Taxxa fuq l-Introjtu, kif emendat bl-Att dwar l-Implimentazzjoni tal-Baġit, 2023, Nru 1, u f’konformità mad-DPI-MCAA ffirmat mill-awtoritajiet kompetenti tal-Kanada u tal-Istati Membri firmatarji huma ekwivalenti għad-definizzjonijiet stabbiliti fl-Anness V, it-Taqsima I, is-subparagrafi A(1) sa A(4) tad-Direttiva 2011/16/UE.

(8)

F’konformità mal-Artikolu 3 tar-Regolament ta’ Implimentazzjoni (UE) 2023/823, il-Kummissjoni ddeterminat li d-definizzjonijiet rigward il-bejjiegħa rapportabbli stabbiliti fl-Att dwar it-Taxxa fuq l-Introjtu, kif emendat bl-Att dwar l-Implimentazzjoni tal-Baġit, 2023, Nru 1 u f’konformità mad-DPI-MCAA ffirmat mill-awtoritajiet kompetenti tal-Kanada u tal-Istati Membri firmatarji huma ekwivalenti għad-definizzjonijiet stabbiliti fl-Anness V, it-Taqsima I, is-subparagrafi B(1) sa B(4), C(1) u C(2), tad-Direttiva 2011/16/UE.

(9)

F’konformità mal-Artikolu 4 tar-Regolament ta’ Implimentazzjoni (UE) 2023/823, il-Kummissjoni ddeterminat li d-definizzjonijiet tal-attività rilevanti stabbiliti fl-Att dwar it-Taxxa fuq l-Introjtu, kif emendat bl-Att dwar l-Implimentazzjoni tal-Baġit, 2023, Nru 1 u f’konformità mad-DPI-MCAA ffirmat mill-awtoritajiet kompetenti tal-Kanada u tal-Istati Membri firmatarji huma ekwivalenti għad-definizzjonijiet stabbiliti fl-Anness V, it-Taqsima I, is-subparagrafi A(8), A(10), A(11) u C(9) tad-Direttiva 2011/16/UE.

(10)

F’konformità mal-Artikolu 5 tar-Regolament ta’ Implimentazzjoni (UE) 2023/823, il-Kummissjoni ddeterminat li l-proċeduri ta’ diliġenza dovuta stabbiliti fl-Att dwar it-Taxxa fuq l-Introjtu, kif emendat bl-Att dwar l-Implimentazzjoni tal-Baġit, 2023, Nru 1 u f’konformità mad-DPI-MCAA ffirmat mill-awtoritajiet kompetenti tal-Kanada u tal-Istati Membri firmatarji huma ekwivalenti għall-proċeduri ta’ diliġenza dovuta stabbiliti fl-Anness V, it-Taqsima II tad-Direttiva 2011/16/UE u għad-definizzjonijiet stabbiliti fl-Anness V, it-Taqsima I, is-subparagrafi C(3) sa C(7) tad-Direttiva 2011/16/UE.

(11)

F’konformità mal-Artikolu 6 tar-Regolament ta’ Implimentazzjoni (UE) 2023/823, il-Kummissjoni ddeterminat li r-rekwiżiti ta’ rapportar stabbiliti fl-Att dwar it-Taxxa fuq l-Introjtu, kif emendat bl-Att dwar l-Implimentazzjoni tal-Baġit, 2023, Nru 1 u f’konformità mad-DPI-MCAA ffirmat mill-awtoritajiet kompetenti tal-Kanada u tal-Istati Membri firmatarji huma ekwivalenti għar-rekwiżiti ta’ rapportar stabbiliti fl-Anness V, it-Taqsima III, is-subparagrafi A(1), A(2), A(5), A(6) u A(7) u l-paragrafu B tad-Direttiva 2011/16/UE, u għad-definizzjonijiet stabbiliti fl-Anness V, it-Taqsima I, is-subparagrafi C(3) sa C(8) tad-Direttiva 2011/16/UE.

(12)

F’konformità mal-Artikolu 7 tar-Regolament ta’ Implimentazzjoni (UE) 2023/823, il-Kummissjoni ddeterminat li r-regoli u l-proċeduri amministrattivi stabbiliti fl-Att dwar it-Taxxa fuq l-Introjtu, kif emendat bl-Att dwar l-Implimentazzjoni tal-Baġit, 2023, Nru 1 u f’konformità mad-DPI-MCAA ffirmat mill-awtoritajiet kompetenti tal-Kanada u tal-Istati Membri firmatarji, biex jiżguraw l-implimentazzjoni effettiva tal-proċeduri ta’ diliġenza dovuta u r-rekwiżiti ta’ rapportar kif ukoll il-konformità magħhom, huma ekwivalenti għad-dispożizzjonijiet stabbiliti fl-Anness V, it-Taqsima IV, il-paragrafi A sa D tad-Direttiva 2011/16/UE.

(13)

Għalhekk, l-informazzjoni li hija meħtieġa tiġi skambjata awtomatikament bejn l-awtoritajiet kompetenti tal-Kanada u tal-Istati Membri firmatarji f’konformità mad-DPI-MCAA jenħtieġ li titqies ekwivalenti għal dik speċifikata fl-Anness V, it-Taqsima III, il-paragrafu B tad-Direttiva 2011/16/UE. F’konformità mal-Artikolu 8 tar-Regolament ta’ Implimentazzjoni (UE) 2023/823, din id-determinazzjoni tal-ekwivalenza tapplika għall-istess ftehim bejn l-awtoritajiet kompetenti ta’ kwalunkwe Stat Membru ieħor u tal-Kanada.

(14)

Peress li l-Parti XX tal-Att dwar it-Taxxa fuq l-Introjtu, kif miżjuda bit-Taqsima 78(1) tal-Att, għadha ma daħlitx fis-seħħ, jenħtieġ li d-determinazzjoni tal-ekwivalenza tapplika biss mid-data tad-dħul fis-seħħ tal-Parti XX tal-Att dwar it-Taxxa fuq l-Introjtu.

(15)

Madankollu, jenħtieġ li d-determinazzjoni tal-ekwivalenza tapplika biss diment li r-relazzjoni ta’ skambju bejn il-Kanada u l-Istati Membri firmatarji tiġi attivata f’konformità mat-Taqsima 7 tad-DPI-MCAA.

(16)

Kif previst fl-Artikolu 25(1) tad-Direttiva 2011/16/UE, jenħtieġ li l-iskambju kollu ta’ informazzjoni bejn l-awtoritajiet kompetenti tal-Istati Membri u l-ġuriżdizzjonijiet mhux tal-Unjoni skont id-DPI-MCAA jikkonforma mar-Regolament (UE) 2016/679 tal-Parlament Ewropew u tal-Kunsill (8).

(17)

Ġie kkonsultat il-Kontrollur Ewropew għall-Protezzjoni tad-Data f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (9).

(18)

Il-miżuri previsti f’dan ir-Regolament huma skont l-opinjoni tal-Kumitat dwar il-Kooperazzjoni Amministrattiva għat-Tassazzjoni,

(a)

Il-Parti XX tal-Att tal-Kanada dwar it-Taxxa fuq l-Introjtu, kif miżjuda bit-Taqsima 78(1) tal-Att dwar l-Implimentazzjoni tal-Baġit tal-Kanada, 2023, Nru 1, u kif ivvalutata mill-Kummissjoni, daħlet fis-seħħ;

(b)

ir-relazzjoni tal-iskambju bejn l-awtoritajiet kompetenti tal-Kanada u kull Stat Membru firmatarju ġiet attivata f’konformità mat-Taqsima 7 tad-DPI-MCAA.