(1)

Il-politika marittima tal-Unjoni timmira lejn livell għoli ta’ sigurtà u ta’ ħarsien tal-ambjent. Dan jista’ jinkiseb permezz tal-konformità ma’ konvenzjonijiet, kodiċijiet u riżoluzzjonijiet internazzjonali filwaqt li tinżamm libertà tan-navigazzjoni kif previst mill-Konvenzjoni tan-Nazzjonijiet Uniti dwar il-Liġi tal-Baħar.

(2)

Il-Konvenzjoni Internazzjonali dwar il-Prevenzjoni ta’ Tniġġis mill-Vapuri (“Marpol 73/78”) tal-Organizzazzjoni Marittima Internazzjonali (IMO) tipprevedi projbizzjonijiet ġenerali dwar l-iskariki mill-vapuri fil-baħar, iżda tirregola wkoll il-kundizzjonijiet li taħthom ċerti sustanzi jistgħu jintremew fl-ambjent marin. Marpol 73/78 fiha eċċezzjonijiet għall-iskariku ta’ sustanzi niġġiesa, soġġetti għall-Annessi tagħha, li ma għandhomx jitqiesu bħala ksur meta jiġu ssodisfati kundizzjonijiet speċifikati. Dawk l-Annessi ma jeżentawx il-każijiet meta dawk responsabbli għad-dannu aġixxew jew bl-intenzjoni li jikkawżaw dannu jew bi traskuraġni u b’għarfien li probabbilment jirriżulta dannu.

(3)

Mill-adozzjoni tad-Direttiva 2005/35/KE tal-Parlament Ewropew u tal-Kunsill (3), Marpol 73/78 u l-Annessi tagħha kienu s-suġġett ta’ emendi importanti, li daħħlu fis-seħħ normi u projbizzjonijiet aktar stretti għall-iskariki ta’ sustanzi minn vapuri fil-baħar. Dawk il-bidliet kif ukoll it-tagħlimiet meħuda mill-implimentazzjoni tad-Direttiva 2005/35/KE jenħtieġ li jiġu kkunsidrati.

(4)

Filwaqt li objettiv ġenerali ta’ din id-Direttiva huwa li tittrasponi emendi importanti għall-Marpol 73/78 fil-liġi tal-Unjoni, test aġġornat u komplut tal-Marpol 73/78 u l-annessi relatati tagħha mhuwiex disponibbli għall-pubbliku. Dan joħloq xkiel għas-settur, iċ-ċittadini u l-amministrazzjonijiet biex jiksbu aċċess xieraq għat-test tal-Marpol 73/78 u konvenzjonijiet oħra simili tal-IMO.

(5)

L-Istati Membri jenħtieġ li jaħdmu fi ħdan l-IMO biex it-testi sħaħ u aġġornati tal-konvenzjonijiet tal-IMO, inkluż il-Marpol 73/78 u l-annessi tagħha, ikunu aċċessibbli għall-pubbliku mingħajr ħlas.

(6)

Id-Direttiva (UE) 2019/883 tal-Parlament Ewropew u tal-Kunsill (4) tiżgura li l-iskart jitwassal fil-portijiet tal-Unjoni, fejn jinġabar minn faċilitajiet adegwati ta’ akkoljenza fil-portijiet. L-infurzar tad-Direttiva (UE) 2019/883 huwa, flimkien mad-Direttiva 2005/35/KE, strument ewlieni fil-prevenzjoni tat-tniġġis ikkawżat mill-vapuri. Sabiex tiġi żgurata sistema ta’ infurzar effettiva, integrata u koerenti fir-rigward tad-dispożizzjonijiet tad-Direttiva (UE) 2019/883 dwar il-faċilitajiet tal-akkoljenza fil-portijiet għall-konsenja ta’ skart mill-vapuri, id-Direttiva 2005/35/KE jenħtieġ li tiġi emendata sabiex testendi l-kamp ta’ applikazzjoni tagħha għall-Annessi IV sa VI tal-Marpol 73/78, bil-ħsieb li l-vapuri jiġu skoraġġuti milli jiskarikaw sustanzi niġġiesa b’mod illegali fil-baħar minflok ma jitwasslu lejn faċilitajiet ta’ akkoljenza fil-portijiet f’konformità mad-Direttiva (UE) 2019/883.

(7)

Id-Direttiva (UE) 2019/883 ma tinkludix fi ħdan il-kamp ta’ applikazzjoni tagħha l-Anness III tal-Marpol 73/78 minħabba li l-oġġetti imballati mhumiex ikkategorizzati bħala skart; għalhekk normalment ma jiġux ikkonsenjati lejn il-faċilitajiet ta’ akkoljenza fil-portijiet. Madankollu, ma jistax jiġi eskluż li sustanzi ta’ ħsara ttrasportati f’forma imballata jistgħu jiġu skarikati b’mod illegali fil-baħar. Għalhekk, il-kamp ta’ applikazzjoni tad-Direttiva 2005/35/KE jenħtieġ li jiġi estiż biex ikopri l-Anness III tal-Marpol 73/78. Għaldaqstant, l-iskariku ta’ sustanzi ta’ ħsara jenħtieġ li jkun ipprojbit skont id-Direttiva 2005/35/KE, sakemm ma jinstabx mill-awtoritajiet kompetenti li kien meħtieġ li tiġi żgurata s-sikurezza tal-vapur jew li tiġi salvata l-ħajja fuq il-baħar. F’dak ir-rigward, l-iskariki msemmija f’din id-Direttiva ma jinkludux ir-rimi skont il-Konvenzjoni ta’ Londra dwar il-Prevenzjoni tat-Tniġġis tal-Baħar mir-Rimi ta’ Skart u Materja Oħra, 1972, u l-Protokoll tagħha tal-1996.

(8)

Marpol 73/78 tinkludi l-emissjonijiet mill-vapuri fid-definizzjoni tal-iskariki fl-Artikolu 2 tiegħu. L-Anness VI tal-Marpol 73/78 jindirizza l-prevenzjoni tat-tniġġis tal-arja mill-vapuri. L-Anness VI u l-linji gwida korrispondenti tal-IMO dwar is-Sistemi ta’ Tindif tal-Gass tal-Egżost (EGCS) (ir-Riżoluzzjoni MEPC.340 (77)) jippermettu l-użu tal-EGCS mill-vapuri bħala metodu alternattiv ta’ konformità biex jitnaqqsu l-emissjonijiet tal-ossidu tal-kubrit (SOx). L-Anness VI tal-Marpol 73/78 jirregola r-residwu mill-EGCS billi jipprojbixxi l-iskarikar tiegħu fil-baħar u jirrikjedi l-konsenja tiegħu lejn faċilitajiet adegwati ta’ akkoljenza fil-port. Id-Direttiva (UE) 2016/802 tal-Parlament Ewropew u tal-Kunsill (5) tittrasponi standards internazzjonali tal-SOx fil-liġi tal-Unjoni, filwaqt li d-Direttiva (UE) 2019/883 tiżgura li r-residwu tal-EGCS jiġi kkonsenjat f’faċilitajiet ta’ akkoljenza fil-portijiet. Peress li r-residwu tal-EGCS jikkawża tniġġis fl-ambjent tal-baħar, il-penali previsti skont id-Direttiva 2005/35/KE jenħtieġ li japplikaw fil-każ ta’ skariki illegali.

(9)

L-“ilma skarikat”, kif definit kemm fiċ-Ċirkolari MEPC.1/Circ.899 kif ukoll fir-Riżoluzzjoni MEPC.340(77), jista’ jiġi skarikat direttament fil-baħar jekk ikun konformi mal-kriterji tal-kwalità tal-ilma skarikat stabbiliti fil-linji gwida tal-IMO dwar l-EGCS. Madankollu, ilma skarikat mill-EGCS jista’ jaffettwa l-ekosistema għalkemm jikkonforma mal-Marpol 73/78. F’dak il-każ, l-Istat Membru jista’ jimponi restrizzjonijiet jew limitazzjonijiet li jistgħu jintużaw abbażi tal-evalwazzjoni mwettqa bl-użu tal-metodoloġija għall-valutazzjonijiet tar-riskju u tal-impatt li jinsabu fil-linji gwida żviluppati mill-IMO u rrakkomandati mill-Kumitat għall-Protezzjoni tal-Ambjent Marittimu (Maritime Environment Protection Committee (MEPC)). F’dak il-każ, l-“ilma skarikat” jikkawża tniġġis fl-ambjent tal-baħar, u l-penali amministrattivi previsti skont id-Direttiva 2005/35/KE jenħtieġ li japplikaw fil-każ ta’ skariki illegali b’kunsiderazzjoni xierqa ta’ MEPC.1/Circ.883/Rev.1.

(10)

Id-Direttiva (UE) 2024/1203 tal-Parlament Ewropew u tal-Kunsill (6) tiżgura definizzjonijiet komuni ta’ reati kriminali ambjentali u d-disponibbiltà ta’ pieni kriminali effettivi, proporzjonati u dissważivi għal reati ambjentali serji. Id-Direttiva 2005/35/KE ġiet emendata bid-Direttiva 2009/123/KE tal-Parlament Ewropew u tal-Kunsill (7), li introduċiet pieni kriminali għal ċertu ksur tad-Direttiva 2005/35/KE, li issa jaqgħu fil-kamp ta’ applikazzjoni tad-Direttiva (UE) 2024/1203. Għaldaqstant, id-dispożizzjonijiet tad-Direttiva 2005/35/KE li ġew miżjuda jew sostitwiti bid-Direttiva 2009/123/KE jenħtieġ li jitħassru.

(11)

Il-penali amministrattivi introdotti fit-traspożizzjoni tad-Direttiva 2005/35/KE jenħtieġ li jkunu mingħajr preġudizzju għad-Direttiva (UE) 2024/1203. L-Istati Membri jenħtieġ li jiddefinixxu il-kamp ta’ applikazzjoni tal-infurzar tal-liġi amministrattiva u kriminali fir-rigward ta’ reati ta’ tniġġis ikkawżat mill-vapuri f’konformità mal-liġi nazzjonali tagħhom. Din id-Direttiva ma timpedix lill-Istati Membri milli jieħdu miżuri aktar stretti f’konformità mad-dritt internazzjonali u l-liġi tal-Unjoni, billi jipprevedu penali amministrattivi jew pieni kriminali f’konformità mal-liġi nazzjonali tagħhom. Fl-applikazzjoni tal-liġi nazzjonali li tittrasponi d-Direttiva 2005/35/KE, l-Istati Membri jenħtieġ li jiżguraw li l-impożizzjoni ta’ pieni kriminali u ta’ penali amministrattivi tirrispetta l-prinċipji tal-Karta tad-Drittijiet Fundamentali tal-Unjoni Ewropea, inkluż il-prinċipju ta’ ne bis in idem, filwaqt li tqis il-prinċipju ta’ “min iniġġes iħallas”, kif u meta applikabbli.

(12)

Il-penali previsti mid-Direttiva 2005/35/KE jenħtieġ li jissaħħu billi tiġi żgurata applikazzjoni konsistenti tal-penali amministrattivi fl-Unjoni kollha. Sabiex jissaħħaħ l-effett deterrenti tal-penali imposti għar-reati ta’ tniġġis ikkawżat mill-vapuri, tali penali amministrattivi jenħtieġ li jieħdu mill-anqas il-forma ta’ multi imposti fuq il-kumpanija tal-vapur miżmum responsabbli. F’dan il-kuntest, il-kumpanija ta’ vapur tfisser is-sid tal-vapur jew kwalunkwe organizzazzjoni jew persuna oħra, bħall-maniġer jew il-bareboat charterer, li jkun assuma r-responsabbiltà għall-operat tal-vapur mingħand sid il-vapur, f’konformità mal-Kodiċi Internazzjonali ta’ Ġestjoni għall-Operazzjoni Sikura tal-Vapuri u għall-Prevenzjoni tat-Tniġġis (“Kodiċi ISM”) (8), implimentat fil-liġi tal-Unjoni bis-saħħa tar-Regolament (KE) Nru 336/2006 tal-Parlament Ewropew u tal-Kunsill (9). Id-Direttiva 2005/35/KE jenħtieġ li tirrikonoxxi li l-ġestjoni tal-vapur tista’ tiġi ddelegata mis-sid irreġistrat lil entità differenti, li mbagħad jenħtieġ li tinżamm responsabbli l-ewwelnett għan-nuqqas ta’ implimentazzjoni tal-obbligi tagħha skont il-Kodiċi ISM biex jiġi żgurat li tiġi evitata ħsara lill-ambjent jew l-assenjazzjoni ta’ operazzjonijiet abbord lil persunal kwalifikat. Mingħajr preġudizzju għal-leġiżlazzjoni applikabbli tal-Unjoni, id-deċiżjonijiet dwar il-penali li għandha tiġi applikata jenħtieġ li jsiru fi ħdan il-kamp ta’ applikazzjoni tas-sistemi nazzjonali amministrattivi u tal-infurzar tal-liġi kriminali. Għal pieni kriminali, l-obbligi tal-Istati Membri huma stabbiliti fid-Direttiva (UE) 2024/1203. Għaldaqstant, din id-Direttiva tikkonċerna biss il-penali amministrattivi u ma tikkonċernax proċedimenti kriminali kontra persuni fiżiċi jew ġuridiċi f’konformità mal-liġi nazzjonali.

(13)

Filwaqt li jirrikonoxxu li l-konformità għal xi Stati Membri mar-rekwiżit għal penali amministrattivi mhijiex possibbli minħabba l-liġi kostituzzjonali nazzjonali, l-Istati Membri jistgħu japplikaw id-dispożizzjonijiet dwar il-penali amministrattivi ta’ din id-Direttiva b’tali mod li l-penali jinbdew mill-awtorità kompetenti u jiġu imposti mill-qrati nazzjonali kompetenti, filwaqt li tiġi żgurata l-konformità mar-rekwiżit għal penali effettivi, proporzjonati u dissważivi. Fejn hemm referenzi f’din id-Direttiva għal penali amministrattivi, dawk l-Istati Membri se japplikaw penali skont it-tifsira tas-sistema legali nazzjonali tagħhom.

(14)

Irregolaritajiet u informazzjoni jistgħu jirriżultaw minn spezzjoni ta’ kontroll mill-Istat tal-port imwettqa skont id-Direttiva 2009/16/KE tal-Parlament Ewropew u tal-Kunsill (10) meta tkun obbligatorja jew meta tkun skedata. Jistgħu jiġu identifikati wkoll irregolaritajiet fir-rigward tal-konsenja ta’ skart iġġenerat mill-vapuri, jew in-notifika tiegħu, kif meħtieġ skont id-Direttiva (UE) 2019/883 jew fir-rigward tan-nuqqas ta’ konformità mal-kriterji għall-użu ta’ EGCS operati bħala metodi ta’ tnaqqis tal-emissjonijiet stabbiliti fl-Anness II tad-Direttiva (UE) 2016/802, kif ukoll informazzjoni relatata ma’ skariku illegali potenzjali tal-vapuri miksuba permezz tal-proċeduri previsti fid-Direttiva 2002/59/KE tal-Parlament Ewropew u tal-Kunsill (11), inkluża kwalunkwe prova jew evidenza preżuntiva dwar l-iskariki taż-żejt jew ksur ieħor tal-Marpol 73/78 ikkomunikati lill-Istat Membru jew inċidenti jew aċċidenti rrapportati mill-kaptan tal-vapur, u kwalunkwe informazzjoni oħra minn persuni involuti fit-tħaddim tal-vapur, inklużi l-bdoti.

(15)

Irregolaritajiet jew informazzjoni li jagħtu lok għal suspett li seħħ skariku illegali jistgħu jiġu skoperti matul spezzjoni ta’ kontroll tal-port mill-Istat. F’dak il-każ, spezzjoni ġdida tista’ ma tkunx meħtieġa jew effettiva biżżejjed. Minflok, l-Istat Membru jista’ jieħu azzjoni xierqa oħra, bħad-detenzjoni tal-vapur, il-bidu ta’ proċedimenti jew it-teħid ta’ miżuri ta’ rimedju.

(16)

L-awtoritajiet amministrattivi u ġudizzjarji nazzjonali jenħtieġ li jqisu ċ-ċirkostanzi rilevanti kollha, inkluż reċidiviżmu tat-tniġġis ikkawżat mill-vapuri, meta jiddeterminaw il-livell ta’ penali li għandhom jiġu imposti fuq in-niġġiesa. Filwaqt li titqies in-natura diversa tas-sustanzi niġġiesa koperti mid-Direttiva 2005/35/KE u l-importanza tal-applikazzjoni konsistenti tal-penali madwar l-Unjoni fid-dawl tan-natura transfruntiera tal-imġiba regolata, jenħtieġ li jitrawmu approssimazzjoni u effettività ulterjuri tal-livelli ta’ penali permezz ta’ skambji dwar il-kriterji għad-determinazzjoni u l-applikazzjoni ta’ penali għall-iskariki ta’ sustanzi niġġiesa differenti. Sabiex tiġi żgurata l-applikazzjoni effettiva tal-penali u biex jintlaħqu l-objettivi ta’ din id-Direttiva, huwa kruċjali li jiġi ffaċilitat l-iskambju ta’ esperjenzi u l-aħjar prattiki bejn l-awtoritajiet nazzjonali kompetenti tal-Istati Membri. Barra minn hekk, abbażi tal-għarfien miksub minn tali skambji, il-Kummissjoni tista’ tipproponi linji gwida aktar speċifiċi, inkluż dwar tipi speċifiċi ta’ sustanzi niġġiesa u oqsma sensittivi ta’ tħassib.

(17)

Meta Stat Membru jissuspetta li vapur li huwa volontarjament fil-port tiegħu jew f’terminal off-shore wettaq skariku illegali, jenħtieġ li ssir spezzjoni xierqa biex jiġu stabbiliti ċ-ċirkostanzi. Sabiex l-Istati Membri jiġu assistiti bl-obbligi tagħhom skont id-Direttiva 2005/35/KE li jispezzjonaw vapuri bħal dawn, l-Anness I tad-Direttiva 2005/35/KE jipprovdi lista indikattiva ta’ irregolaritajiet jew informazzjoni li jenħtieġ li titqies mill-awtoritajiet kompetenti fuq bażi ta’ każ b’każ meta jiġi ddeterminat jekk vapur ikunx jenħtieġ li jitqies bħala suspettat.

(18)

Il-miżuri ta’ akkumpanjament għall-kooperazzjoni u l-obbligi ta’ rapportar tal-Istati Membri ma kinux biżżejjed biex jippermettu analiżi sħiħa dwar jekk in-niġġies jiffaċċjax penali effettivi, proporzjonati u dissważivi u sabiex data adegwata ssir disponibbli għall-Kummissjoni biex timmonitorja l-implimentazzjoni tad-Direttiva 2005/35/KE. Sabiex jiġi żgurat l-infurzar effettiv u konsistenti tad-Direttiva 2005/35/KE, l-iskambju ta’ informazzjoni, esperjenza u l-aħjar prattiki jenħtieġ li jiġi ffaċilitat permezz ta’ kooperazzjoni msaħħa, filwaqt li fl-istess ħin jiġi żgurat li l-Kummissjoni jkollha għad-dispożizzjoni tagħha data adegwata sabiex ikun jista’ jsir monitoraġġ xieraq tal-implimentazzjoni tad-Direttiva 2005/35/KE.

(19)

Sabiex tissaħħaħ l-informazzjoni meħtieġa għall-implimentazzjoni effettiva ta’ din id-Direttiva, l-Istati Membri għandhom għad-dispożizzjoni tagħhom mekkaniżmi ta’ rapportar rilevanti, bħar-rapportar fil-qafas tal-konvenzjonijiet reġjonali tal-baħar u arranġamenti oħra ta’ kooperazzjoni reġjonali, bħall-Ftehim ta’ Bonn, l-Investigaturi u Prosekuturi tan-Network tal-Baħar tat-Tramuntana, u n-Network ta’ Prosekuturi dwar il-Kriminalità Ambjentali fir-Reġjun tal-Baħar Baltiku.

(20)

Is-servizz eżistenti bbażat fuq is-satellita “CleanSeaNet”, li jinnotifika lill-awtoritajiet tal-Istati Membri dwar skariki illegali potenzjali, jenħtieġ li jkompli jittejjeb biex jinkludi informazzjoni dwar is-sustanzi niġġiesa addizzjonali taħt il-kamp ta’ applikazzjoni tad-Direttiva 2005/35/KE. L-informazzjoni relatata mal-iskariki potenzjali jew reali rrapportati mill-Istati Membri f’konformità mad-Direttiva 2005/35/KE u ma’ bażijiet tad-data oħra tal-Unjoni dwar is-sikurezza marittima, bħas-Sistema tal-Unjoni għall-Iskambju ta’ Informazzjoni Marittima stabbilita bid-Direttiva 2002/59/KE (“SafeSeaNet”) u l-Bażi tad-Data għall-Ispezzjonijiet stabbilita bid-Direttiva 2009/16/KE (“THETIS”) jenħtieġ li jiġu integrati u mxerrda f’format elettroniku faċli għall-utent lill-awtoritajiet nazzjonali involuti fil-katina tal-infurzar sabiex jiffaċilitaw ir-rispons f’waqtu tagħhom għal tali skariki illegali potenzjali. Tali informazzjoni, meta tkun relatata ma’ skariku reali jew potenzjali ta’ residwu tal-EGCS minn vapur, jenħtieġ li tkompli titqassam awtomatikament, bħal permezz tal-modulu ddedikat ta’ THETIS stabbilit skont id-Deċiżjoni ta’ Implimentazzjoni tal-Kummissjoni (UE) 2015/253 (12) (“THETIS-EU”), sabiex l-Istati Membri jiġu megħjuna b’azzjonijiet ta’ infurzar imwettqa f’konformità mad-dispożizzjonijiet tad-Direttiva (UE) 2016/802.

(21)

Sabiex jiġi żgurat il-monitoraġġ effettiv tal-implimentazzjoni ta’ din id-Direttiva mill-Istati Membri kollha, jenħtieġ li tiġi żgurata analiżi diġitali tal-allerti kollha ta’ fiduċja għolja minn kull Stat Membru fi żmien 66 xahar mid-data tad-dħul fis-seħħ ta’ din id-Direttiva emendatorja. F’dak il-perjodu ta’ żmien, jenħtieġ li l-Istati Membri kollha jindikaw ukoll jekk jivverifikawx jew le dawk l-allerti ta’ fiduċja għolja mibgħuta minn CleanSeaNet kull sena, filwaqt li jistinkaw biex jivverifikaw mill-inqas 25 % ta’ dawk l-allerti ta’ fiduċja għolja. F’dak il-kuntest, verifika tfisser kwalunkwe azzjoni ta’ segwitu mill-awtoritajiet kompetenti ta’ allert mibgħut minn CleanSeaNet biex jiġi ddeterminat jekk l-allert inkwistjoni jikkorrispondix għal skariku illegali. Jekk Stat Membru ma jivverifikax allert, jenħtieġ li jindika r-raġunijiet għaliex ma għamilx dan.

(22)

“Allerti ta’ fiduċja għolja” jenħtieġ li tinftiehem li tirreferi għall-allerti dwar detezzjonijiet tal-“Klassi A” minn CleanSeaNet meta jkunu relatati ma’ skariki potenzjali ta’ sustanzi niġġiesa skont l-Anness I u II tal-Marpol 73/78. Fir-rigward tas-sustanzi niġġiesa skont Annessi oħra tal-Marpol 73/78, li bħalissa mhumiex immonitorjati minn CleanSeaNet, bħalissa ma jistax jiġi stabbilit approċċ fil-livell ta’ fiduċja. Il-Kummissjoni, bl-għajnuna tal-Aġenzija Ewropea għas-Sigurtà Marittima (“EMSA”), se tiżviluppa kontrolli semiawtomatizzati tal-immaġnijiet satellitari għal sustanzi niġġiesa skont Annessi oħra tal-Marpol 73/78 biex tistabbilixxi l-possibbiltà li jiġi ddeterminat il-livell ta’ fiduċja tagħhom. L-attivitajiet ta’ verifika jistgħu jinkludu ħafna azzjonijiet minn diversi awtoritajiet kompetenti, bħal verifika fuq il-post, it-tqabbil tad-detezzjoni bis-satellita mad-data awżiljarja disponibbli nazzjonalment u l-ispezzjonijiet tal-kontroll mill-Istat tal-port.

(23)

L-aċċess għal din l-informazzjoni minn awtoritajiet kompetenti jenħtieġ li jingħata lill-awtoritajiet ta’ Stati Membri oħra li għandhom interess fiha taħt ir-rwoli tagħhom bħala Stati tal-port li jmiss, l-Istati kostali affettwati mill-iskariku potenzjali jew mill-Istati tal-bandiera tal-vapur sabiex tiġi ffaċilitata kooperazzjoni transfruntiera effettiva u f’waqtha, jiġi minimizzat il-piż amministrattiv tal-attivitajiet ta’ infurzar u fl-aħħar mill-aħħar jiġu ppenalizzati b’mod effettiv it-trasgressuri għall-ksur tad-Direttiva 2005/35/KE. Jenħtieġ li jitrawwem ukoll l-użu ta’ teknoloġiji ġodda bħad-droni u tekniki ta’ appoġġ għad-deċiżjonijiet, bħall-intelliġenza artifiċjali.

(24)

Bħala parti mill-evalwazzjoni u r-rieżami ta’ din id-Direttiva, jenħtieġ li l-Kummissjoni tivvaluta r-rati ta’ verifika tal-Istati Membri u jenħtieġ li tipprevedi li tipproponi, jekk xieraq, rati ta’ verifika ogħla milli previst f’din id-Direttiva, abbażi tal-iżviluppi teknoloġiċi u ċ-ċirkostanzi u l-kapaċitajiet partikolari tal-Istati Membri.

(25)

Jenħtieġ li jiġi rikonoxxut li ċ-ċirkostanzi tal-Istati Membri kostali jvarjaw b’mod sinifikanti f’termini tal-pożizzjoni ġeografika tagħhom, id-daqs tal-ilmijiet li fuqhom jeżerċitaw il-ġuriżdizzjoni u d-densità tat-traffiku marittimu kif ukoll ir-riżorsi tagħhom u l-aċċess kosteffiċjenti għat-teknoloġija u l-mezzi disponibbli biex tiġi identifikata, ivverifikata u miġbura evidenza fir-rigward ta’ skariki illegali.

(26)

Is-Sottogrupp dwar l-Iskart mill-Vapuri, li kien ġie stabbilit fil-qafas tal-Forum Ewropew dwar Trasport Marittimu Sostenibbli, u li laqqa’ flimkien firxa wiesgħa ta’ esperti fil-qasam tat-tniġġis ikkawżat mill-vapuri u l-ġestjoni ta’ skart mill-vapuri, ġie differit f’Diċembru 2017 minħabba l-bidu ta’ negozjati interistituzzjonali dwar id-Direttiva (UE) 2019/883. Peress li dak is-Sottogrupp temporanju pprovda gwida u għarfien espert siewja lill-Kummissjoni, jenħtieġ li jinħoloq grupp ta’ esperti simili b’mandat ta’ skambju ta’ esperjenza dwar l-applikazzjoni ta’ din id-Direttiva sabiex jassisti lill-Istati Membri fil-bini tal-kapaċità tagħhom li jidentifikaw u jivverifikaw inċidenti ta’ tniġġis u jiżguraw l-infurzar effettiv tad-Direttiva 2005/35/KE.

(27)

L-EMSA jenħtieġ li tipprovdi l-appoġġ meħtieġ lill-Kummissjoni biex tiżgura l-implimentazzjoni ta’ din id-Direttiva.

(28)

L-Istati Membri jenħtieġ li jirrapportaw lill-Kummissjoni l-informazzjoni meħtieġa biex jiżguraw monitoraġġ xieraq tal-implimentazzjoni tad-Direttiva 2005/35/KE. Sabiex jiġi limitat il-piż amministrattiv u tingħata assistenza lill-Kummissjoni fl-analiżi tad-data pprovduta mill-Istati Membri, tali informazzjoni jenħtieġ li tiġi rrapportata mill-Istati Membri permezz ta’ għodda elettronika ddedikata għar-rapportar, żviluppata mill-Kummissjoni. Sa fejn tali informazzjoni tkun relatata ma’ penali imposti fuq jew li jinvolvu persuni fiżiċi, tali informazzjoni jenħtieġ li tiġi anonimizzata. Sabiex jiġi żgurat li l-informazzjoni rrapportata f’konformità mad-Direttiva 2005/35/KE tkun komparabbli fit-tip bejn l-Istati Membri u tinġabar abbażi ta’ format u proċedura elettroniċi armonizzati għar-rapportar, jenħtieġ li l-Kummissjoni tingħata setgħat ta’ implimentazzjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (13).

(29)

Sabiex tassisti lill-Istati Membri fl-iżvilupp tal-kapaċitajiet tagħhom fir-rigward tal-infurzar effettiv tad-Direttiva 2005/35/KE mill-awtoritajiet amministrattivi u ġudizzjarji nazzjonali, bl-għajnuna tal-EMSA, jenħtieġ li l-Kummissjoni tipprovdi lill-Istati Membri bi gwida u taħriġ relatati, fost l-oħrajn, mal-aħjar metodi u prattiki għall-identifikazzjoni, il-verifika u l-ġbir tal-evidenza, kif ukoll gwida dwar l-iżviluppi regolatorji rilevanti tal-Marpol 73/78 u dwar l-iżviluppi teknoloġiċi disponibbli, inklużi għodod diġitali ġodda, sabiex jiġu ffaċilitati attivitajiet ta’ infurzar effettivi, kosteffiċjenti u mmirati.

(30)

Sabiex tiżdied is-sensibilizzazzjoni tal-pubbliku dwar l-iskariki tat-tniġġis ikkawżat mill-vapuri u biex tittejjeb il-protezzjoni ambjentali, l-informazzjoni pprovduta mill-Istati Membri dwar l-applikazzjoni tad-Direttiva 2005/35/KE jenħtieġ li ssir disponibbli għall-pubbliku permezz ta’ ħarsa ġenerali madwar l-Unjoni u tinkludi l-informazzjoni elenkata fl-Anness II tad-Direttiva 2005/35/KE. Id-Direttiva 2003/4/KE tal-Parlament Ewropew u tal-Kunsill (14) għandha l-għan li tiggarantixxi d-dritt tal-aċċess għal informazzjoni ambjentali fl-Istati Membri skont l-Konvenzjoni dwar l-aċċess għall-informazzjoni, il-parteċipazzjoni tal-pubbliku fit-teħid ta’ deċiżjonijiet u l-aċċess għall-ġustizzja fi kwistjonijiet ambjentali (15) (magħrufa wkoll bħala l-Konvenzjoni ta’ Aarhus), li l-Unjoni hija parti minnha. Il-Kummissjoni jenħtieġ li tipproteġi l-kunfidenzjalità tal-informazzjoni li jirċievu l-Istati Membri, mingħajr preġudizzju għad-Direttiva 2003/4/KE.

(31)

Id-Direttiva (UE) 2019/1937 tal-Parlament Ewropew u tal-Kunsill (16) tistabbilixxi standards minimi dwar ir-rapportar ta’ ksur tal-liġi tal-Unjoni, inkluż ksur tad-Direttiva 2005/35/KE, u għall-protezzjoni ta’ persuni li jirrapportaw tali ksur. L-Istati Membri jenħtieġ li jiżguraw, b’mod partikolari, li l-ekwipaġġ taħt il-kamp ta’ applikazzjoni tad-Direttiva (UE) 2019/1937 li jirrapporta skariki illegali reali jew potenzjali jingħata protezzjoni, appoġġ u għajnuna, kif xieraq, kif previst f’dik id-Direttiva.Minbarra l-kanali ta’ rapportar eżistenti pprovduti fil-livell nazzjonali kif regolati skont id-Direttiva (UE) 2019/1937, il-Kummissjoni jenħtieġ li tagħmel disponibbli mezz ta’ rapportar estern ċentralizzat online għar-rapportar ta’ skariki illegali reali jew potenzjali u tgħaddi dawn ir-rapporti lill-Istati Membri kkonċernati, li sussegwentement jenħtieġ li jittrattaw dawk ir-rapporti f’konformità mad-Direttiva (UE) 2019/1937, inkluż fir-rigward tar-rikonoxximent tar-riċevuta, ir-rispons adegwat u s-segwitu. Il-liġi tal-Unjoni dwar il-protezzjoni tad-data personali, b’mod partikolari r-Regolamenti (UE) 2016/679 (17) u (UE) 2018/1725 (18) tal-Parlament Ewropew u tal-Kunsill japplikaw meta tiġi pproċessata data personali fil-kuntest ta’ din id-Direttiva. Jenħtieġ li l-Kummissjoni tiżgura l-protezzjoni tal-kunfidenzjalità tal-identità tal-persuni li jirrapportaw, inkluż, meta meħtieġ, billi tillimita l-eżerċizzju ta’ ċerti drittijiet ta’ protezzjoni tad-data tal-persuni kkonċernati, bħal individwi inklużi fir-rapport bħala parteċipanti fl-iskariku illegali potenzjali, skont l-Artikolu 25(1), il-punti (c) u (h), u mal-Artikolu 25(2) tar-Regolament (UE) 2018/1725, sa fejn u sakemm ikun meħtieġ biex jiġu evitati u indirizzati tentattivi li jxekklu r-rapportar jew li jimpedixxu, ifixklu jew inaqqsu s-segwitu, b’mod partikolari l-investigazzjonijiet, jew it-tentattivi biex tinstab l-identità tal-persuni li jirrapportaw. Tali restrizzjonijiet jenħtieġ li jirrispettaw l-essenza tad-drittijiet u l-libertajiet fundamentali u jkunu miżuri meħtieġa u proporzjonati f’soċjetà demokratika biex jissalvagwardjaw objettivi importanti ta’ interess pubbliku ġenerali tal-Unjoni jew ta’ Stat Membru, inklużi l-protezzjoni tas-suġġett tad-data jew id-drittijiet u l-libertajiet ta’ oħrajn.

(32)

Għaddejjin diskussjonijiet fl-IMO dwar kwistjonijiet ambjentali ġodda fir-rigward tat-tbaħħir internazzjonali li jirriżultaw fit-tniġġis tal-baħar. Dawk id-diskussjonijiet jistgħu jirriżultaw f’dispożizzjonijiet ġodda skont il-Marpol 73/78, li jdaħħlu fil-kamp ta’ applikazzjoni ta’ dik il-Konvenzjoni tipi oħra ta’ sustanzi niġġiesa, bħall-iskart tal-plastik fil-baħar u t-telf ta’ pellets tal-plastik. Rieżami futur jenħtieġ li jivvaluta l-possibbiltà li jiġi mmodifikat il-kamp ta’ applikazzjoni tad-Direttiva 2005/35/KE, jekk xieraq, bil-ħsieb li jiġi żgurat reġim ta’ infurzar koerenti, effiċjenti u effettiv, kif ukoll l-impożizzjoni ta’ penali dissważivi. Dak ir-rieżami jenħtieġ li jivvaluta wkoll modi kif tittejjeb is-sorveljanza bis-satellita ta’ kontenituri mitlufa, li potenzjalment jinkludu sustanzi ta’ ħsara. Il-Kummissjoni jenħtieġ li tikkunsidra wkoll l-interazzjoni ta’ din id-Direttiva ma’ leġiżlazzjoni rilevanti oħra tal-Unjoni dwar it-tniġġis tal-baħar, bħad-Direttivi 2008/56/KE (19), (UE) 2016/802 u (UE) 2024/2881 (20) tal-Parlament Ewropew u tal-Kunsill, inkluż dwar ir-rappurtar ta’ storbju eċċessiv taħt l-ilma u dwar it-tniġġis tal-arja, bħall-karbonju iswed, il-materja partikolata (PM), l-ossidu nitriku (NOx) u l-ossidu tal-kubrit (SOx), li tirriżulta fi ħsara għall-bijodiversità u r-riżorsi ħajjin fl-ekosistemi tal-baħar, kif ukoll f’perikli għas-saħħa tal-bniedem u l-ħsara fil-kwalità għall-użu tal-ilma baħar u l-użu sostenibbli ta’ oġġetti u servizzi tal-baħar, u b’hekk tfixkel attivitajiet oħra tal-baħar, bħas-sajd, it-turiżmu u r-rikreazzjoni fiż-żoni kostali.

(33)

L-Istati Membri mingħajr aċċess dirett għall-baħar jew mingħajr portijiet ma jistgħux japplikaw ċerti dispożizzjonijiet ta’ din id-Direttiva minħabba dawk ir-raġunijiet ġeografiċi. Sabiex jiġi evitat li jiġi impost piż amministrattiv sproporzjonat fuq dawk l-Istati Membri, jenħtieġ li ma jkunux obbligati jittrasponu u jimplimentaw uħud mid-dispożizzjonijiet ta’ din id-Direttiva.

(34)

Minħabba li l-objettivi ta’ din id-Direttiva ma jistgħux jinkisbu b’mod suffiċjenti mill-Istati Membri minħabba d-dannu transfruntier li jista’ jiġi kkawżat minn skariki illegali koperti minn din id-Direttiva u d-disponibbiltà ta’ penali effettivi, proporzjonati u dissważivi madwar l-Unjoni għal tali skariki, iżda jistgħu pjuttost, minħabba l-iskala u l-effetti tal-azzjoni proposta, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-objettivi.

(35)

Din id-Direttiva tirrispetta d-drittijiet fundamentali u tosserva l-prinċipji rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea, inkluż il-protezzjoni tad-data personali, id-dritt għal rimedju effettiv u għal proċess ġust, il-preżunzjoni tal-innoċenza u d-dritt għad-difiża, il-prinċipji tal-legalità u tal-proporzjonalità tar-reati u tal-pieni kriminali, u d-dritt li persuna ma tiġix iġġudikata jew ikkastigata darbtejn fi proċedimenti kriminali għall-istess reat. Din id-Direttiva tfittex li tiżgura rispett sħiħ għal dawn id-drittijiet u prinċipji u jenħtieġ li tiġi implimentata kif meħtieġ.

(36)

Il-Kontrollur Ewropew għall-Protezzjoni tad-Data ġie kkonsultat skont l-Artikolu 42(1) tar-Regolament (UE) 2018/1725 u ta l-opinjoni tiegħu fil-25 ta’ Lulju 2023.

(37)

Id-Direttiva 2005/35/KE jenħtieġ li tiġi emendata skont dan,

(1)

it-titolu huwa sostitwit b’dan li ġej:

“Direttiva 2005/35/KE tal-Parlament Ewropew u tal-Kunsill tas-7 ta’ Settembru 2005 dwar l-infurzar ta’ standards internazzjonali dwar it-tniġġis mill-vapuri u dwar l-introduzzjoni ta’ penali amministrattivi għal reati ta’ tniġġis”

(2)

l-Artikolu 1 huwa sostitwit b’dan li ġej:

(3)

L-Artikolu 2 huwa sostitwit b’dan li ġej:

(4)

l-Artikolu 4 huwa sostitwit b’dan li ġej:

(5)

l-Artikoli 5, 5a u 5b jitħassru;

(6)

l-Artikolu 6 huwa sostitwit b’dan li ġej:

(7)

l-Artikolu 8 huwa sostitwit b’dan li ġej:

(*1)  Id-Direttiva (UE) 2024/1203 tal-Parlament Ewropew u tal-Kunsill tal-11 ta’ April 2024 dwar il-protezzjoni tal-ambjent permezz tal-liġi kriminali u li tissostitwixxi d-Direttivi 2008/99/KE u 2009/123/KE (ĠU L, 2024/1203, 30.4.2024, ELI: http://data.europa.eu/eli/dir/2024/1203/oj).”;"

(8)

l-Artikoli 8a, 8b u 8c jitħassru;

(9)

jiddaħħal l-Artikolu li ġej:

(10)

l-Artikolu 10 huwa sostitwit b’dan li ġej:

(*2)  Id-Direttiva 2002/59/KE tal-Parlament Ewropew u tal-Kunsill tas-27 ta’ Ġunju 2002 li tistabbilixxi sistema għall-monitoraġġ u l-informazzjoni dwar it-traffiku tal-bastimenti fil-Komunità u li tħassar id-Direttiva tal-Kunsill 93/75/KEE (ĠU L 208, 5.8.2002, p. 10).”;"

(11)

jiddaħħlu l-Artikoli li ġejjin:

(*3)  Id-Direttiva 2003/4/KE tal-Parlament Ewropew u tal-Kunsill tat-28 ta’ Jannar 2003 dwar l-aċċess pubbliku għat-tagħrif ambjentali u li tħassar id-Direttiva tal-Kunsill 90/313/KEE (ĠU L 41, 14.2.2003, p. 26)."

(*4)  Id-Direttiva (UE) 2019/1937 tal-Parlament Ewropew u tal-Kunsill tat-23 ta’ Ottubru 2019 dwar il-protezzjoni ta’ persuni li jirrapportaw dwar ksur tal-liġi tal-Unjoni (ĠU L 305, 26.11.2019, p. 17)."

(*5)  Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).”;"

(12)

l-Artikoli 11 u 12 jitħassru;

(13)

jiddaħħal l-Artikolu li ġej:

(14)

l-Artikolu 13 huwa sostitwit b’dan li ġej:

(*6)  Ir-Regolament (KE) Nru 2099/2002 tal-Parlament Ewropew u tal-Kunsill tal-5 ta’ Novembru 2002 li jistabbilixxi Kumitat dwar l-Ibħra Protetti u l-Prevenzjoni ta’ Tniġġis minn Bastimenti (COSS) u li jemenda r-Regolamenti dwar is-sigurtà marittima u l-prevenzjoni ta’ tniġġis minn bastimenti (ĠU L 324, 29.11.2002, p. 1)."

(*7)  Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).”;"

(15)

l-Artikoli 14 u 15 jitħassru;

(16)

l-Artikolu 16 huwa ssostitwit b’dan li ġej:

(17)

l-Anness uniku huwa sostitwit bit-test stabbilit fl-Anness ta’ din id-Direttiva.