(1)

Ir-rekwiżiti ta' rapportar dwar is-sostenibbiltà għandhom rwol ewlieni fl-iżgurar tat-trasparenza tas-suq u fl-iżgurar li l-impriżi jkunu responsabbli għall-impatti tagħhom fuq in-nies u fuq l-ambjent. Madankollu, huwa importanti li dawk ir-rekwiżiti jiġu ssimplifikati sabiex jiġi żgurat li jissodisfaw l-iskop li għalih kienu maħsuba, u biex jiġi limitat il-piż amministrattiv.

(2)

Id-Direttiva 2013/34/UE tal-Parlament Ewropew u tal-Kunsill (3) tirrikjedi li l-Kummissjoni tipprevedi standards tar-rapportar dwar is-sostenibbiltà permezz ta' atti delegati, sat-30 ta' Ġunju 2024, li jispeċifikaw l-informazzjoni li l-impriżi jridu jirrapportaw fir-rigward ta' kwistjonijiet relatati mas-sostenibbiltà u l-oqsma ta' rapportar speċifiċi għas-settur li fih topera impriża, minbarra l-informazzjoni li l-impriżi diġà meħtieġa jipprovdu skont ir-Regolament Delegat tal-Kummissjoni (UE) 2023/2772 (4).

(3)

Sabiex jitnaqqas il-piż tar-rapportar fuq l-impriżi, kif iddikjarat fil-Komunikazzjoni tal-Kummissjoni tas-16 ta’ Marzu 2023 intitolata “Il-kompetittività fit-tul tal-UE: inħarsu lil hinn mill-2030”, jenħtieġ li l-impriżi jitħallew jiffokaw l-ewwel fuq l-implimentazzjoni tar-rekwiżiti ta' rapportar dwar is-sostenibbiltà stipulati fir-Regolament Delegat (UE) 2023/2772. Għal dik ir-raġuni, l-iskadenza għall-adozzjoni tal-atti delegati li fihom l-istandards tar-rapportar dwar is-sostenibbiltà li jispeċifikaw l-informazzjoni li l-impriżi għandhom jirrappurtaw fir-rigward ta’ kwistjonijiet ta’ sostenibbiltà u l-oqsma ta’ rappurtar speċifiċi għas-settur li fih topera l-impriża msemmija fid-Direttiva 2013/34/UE jenħtieġ li tiġi posposta b'sentejn. Madankollu, dak il-posponiment jenħtieġ li ma jwaqqafx lill-Kummissjoni milli tippubblika l-atti delegati li fihom l-istandards tar-rapportar dwar is-sostenibbiltà speċifiċi għas-settur qabel dak il-perjodu ta’ sentejn ikun għadd, u jenħtieġ li l-Kummissjoni tagħmel ħilitha biex tadotta atti delegati li fihom tmienja mill-istandards tar-rapportar dwar is-sostenibbiltà speċifiċi għas-settur hekk kif kull wieħed ikun lest.

(4)

L-impriżi fl-istess settur spiss ikunu esposti għal riskji simili relatati mas-sostenibbiltà, u spiss ikollhom impatti simili fuq is-soċjetà u fuq l-ambjent. Paraguni bejn impriżi fl-istess settur huma partikolarment siewja għall-investituri u għal utenti oħrajn ta' informazzjoni dwar is-sostenibbiltà. Għalhekk, jenħtieġ li l-istandards tar-rapportar dwar is-sostenibbiltà jispeċifikaw kemm l-informazzjoni li impriżi fis-setturi kollha jenħtieġ li jiddivulgaw, kif ukoll l-informazzjoni li l-impriżi jenħtieġ li jiddivulgaw skont is-settur ta' attività tagħhom. L-istandards tar-rapportar dwar is-sostenibbiltà speċifiċi għas-settur huma partikolarment importanti fil-każ ta' setturi assoċjati ma' riskji għolja mil-lat tas-sostenibbiltà għall-ambjent, id-drittijiet tal-bniedem u l-governanza, jew l-impatti fuqhom, inkluż is-setturi elenkati fit-Taqsimiet A, B (inkluż iż-żejt, il-gass, il-minjieri u l-faħam) sa H, K u L tal-Anness I tar-Regolament (KE) Nru 1893/2006 tal-Parlament Ewropew u tal-Kunsill (5), u l-attivitajiet rilevanti f'dawk is-setturi. Meta tkun qed tadotta atti delegati li fihom standards dwar is-sostenibbiltà speċifiċi għas-settur, jenħtieġ li l-Kummissjoni tiżgura li l-informazzjoni speċifikata minn dawk l-istandards dwar is-sostenibbiltà tkun proporzjonata għall-iskala tar-riskji u l-impatti relatati ma' kwistjonijiet relatati mas-sostenibbiltà speċifiċi għal kull settur, filwaqt li tqis il-fatt li r-riskji u l-impatti ta' xi setturi huma ogħla minn dawk ta’ setturi oħra. Jenħtieġ li l-Kummissjoni tqis ukoll il-fatt li mhux l-attivitajiet kollha fi ħdan settur partikolari huma neċessarjament assoċjati ma' riskji jew impatti għoljin għas-sostenibbiltà. Għal impriżi li joperaw f'setturi li jiddependu partikolarment fuq ir-riżorsi naturali, l-istandards tar-rapportar dwar is-sostenibbiltà speċifiċi għas-settur ikunu jeħtieġu d-divulgazzjoni tal-impatti relatati man-natura fuq il-bijodiversità u l-ekosistemi u r-riskji għalihom.

(5)

Id-Direttiva 2013/34/UE tirrikjedi wkoll li l-Kummissjoni tadotta, sat-30 ta’ Ġunju 2024, att delegat biex tipprevedi li jintużaw standards tar-rapportar dwar is-sostenibbiltà għad-divulgazzjoni ta’ informazzjoni dwar is-sostenibbiltà fir-rigward ta’ impriżi ta’ pajjiżi terzi b’fatturat nett ta’ aktar minn EUR 150 miljun fl-Unjoni u b’sussidjarji fl-Unjoni li jew huma impriżi kbar jew impriżi żgħar u medji b'titoli ammessi għall-kummerċ fis-swieq regolati tal-Unjoni, jew b'fergħat fl-Unjoni b'fatturat nett ta' aktar minn EUR 40 miljun. Dan ir-rekwiżit ta' rapportar għal ċerti impriżi ta' pajjiżi terzi japplika biss mis-sena finanzjarja 2028. Peress li l-iskadenza għall-adozzjoni tal-atti delegati li fihom l-istandards tar-rapportar dwar is-sostenibbiltà li jispeċifikaw l-informazzjoni li l-impriżi għandhom jirrappurtaw fir-rigward ta’ kwistjonijiet ta’ sostenibbiltà u l-oqsma ta’ rappurtar speċifiċi għas-settur li fih topera l-impriża għandha tiġi posposta b'sentejn, l-iskadenza għall-adozzjoni tal-istandards tar-rapportar dwar is-sostenibbiltà għal ċerti impriżi ta' pajjiżi terzi jenħtieġ li tiġi posposta b'sentejn ukoll.

(6)

Sabiex trawwem kontroll demokratiku, skrutinju u trasparenza, jenħtieġ li l-Kummissjoni, mill-inqas darba fis-sena, tikkonsulta dwar l-iżvilupp ta' standards tar-rapportar dwar is-sostenibbiltà mal-Parlament Ewropew, u b'mod konġunt mal-Grupp ta' Esperti tal-Istati Membri dwar il-Finanzi Sostenibbli u mal-Kumitat Regolatorju tal-Kontabilità, rigward il-programm ta' ħidma tal-EFRAG. Fir-rigward tal-iżvilupp ta' standards tar-rapportar dwar is-sostenibbiltà, il-programm ta' ħidma tal-EFRAG jenħtieġ li jinkludi informazzjoni dwar l-ippjanar, il-prijoritizzazzjoni u l-iskedi ta' żmien tiegħu għal abbozzi ta' standards futuri u riżultati tanġibbli oħra.

(7)

Għaldaqstant, jenħtieġ li d-Direttiva 2013/34/UE tiġi emendata skont dan. Peress li l-emendi introdotti minn din id-Direttiva emendatorja jikkonċernaw element speċifiku ta' setgħa li jiġu adottati atti delegati mogħtija lill-Kummissjoni, ma hemmx bżonn li l-Istati Membri jittrasponu dawk l-emendi f'każ li l-leġiżlazzjoni nazzjonali tagħhom tagħmel referenza biss għal tali setgħa,

(1)

l-Artikolu 29b(1), huwa emendat kif ġej:

(2)

fl-Artikolu 40b, id-data “30 ta' Ġunju 2024” hija sostitwita bit- “30 ta' Ġunju 2026”.