Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32023R2849

    Regolament Delegat tal-Kummissjoni (UE) 2023/2849 tat-12 ta’ Ottubru 2023 li jissupplimenta r-Regolament (UE) 2015/757 tal-Parlament Ewropew u tal-Kunsill fir-rigward tar-regoli għar-rappurtar u s-sottomissjoni tad-data aggregata dwar l-emissjonijiet fil-livell tal-kumpaniji

    C/2023/6748

    ĠU L, 2023/2849, 15.12.2023, ELI: http://data.europa.eu/eli/reg_del/2023/2849/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_del/2023/2849/oj

    Date of document:
    12/10/2023; Data ta' adozzjoni
    Date of effect:
    01/01/2024; Applikazzjoni Ara Art. 3
    Date of effect:
    04/01/2024; Dħul fis-seħħ Data tal-pubblikazzjoni +20 Ara Art. 3
    Date of end of validity:
    No end date
    Author:
    Il-Kummissjoni Ewropea, Id-Direttorat Ġenerali għall-Azzjoni Klimatika
    Responsible body:
    CLIMA
    Form:
    Regolament delegat
    Additional information:
    Rilevanza għaż-ŻEE
    Treaty:
    Trattat dwar il-Funzjonament tal-Unjoni Ewropea
    Legal basis:
    Link
    Link
    Link
    Select all documents mentioning this document
    Modifies:
    Relation Act Comment Subdivision concerned From To
    Completion 32015R0757 01/01/2024
    Instruments cited:
    European flag

    Il-Ġurnal Uffiċjali
    ta'l-Unjoni Ewropea

    MT

    Serje L

    2023/2849

    15.12.2023

    REGOLAMENT DELEGAT TAL-KUMMISSJONI (UE) 2023/2849

    tat-12 ta’ Ottubru 2023

    li jissupplimenta r-Regolament (UE) 2015/757 tal-Parlament Ewropew u tal-Kunsill fir-rigward tar-regoli għar-rappurtar u s-sottomissjoni tad-data aggregata dwar l-emissjonijiet fil-livell tal-kumpaniji

    (Test b’rilevanza għaż-ŻEE)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (UE) 2015/757 tal-Parlament Ewropew u tal-Kunsill tad-29 ta’ April 2015 dwar il-monitoraġġ, ir-rappurtar u l-verifika ta’ emissjonijiet ta’ gassijiet serra mit-trasport marittimu, u li jemenda d-Direttiva 2009/16/KE (1), u b’mod partikolari l-Artikolu 11a(4) tagħha,

    Billi:

    (1)

    Jenħtieġ li jiġu stabbiliti regoli għar-rappurtar tad-data aggregata dwar l-emissjonijiet fil-livell tal-kumpaniji fit-trasport marittimu, kif ukoll għas-sottomissjoni tad-data aggregata dwar l-emissjonijiet fil-livell tal-kumpaniji lill-awtorità amministrattiva responsabbli.

    (2)

    Jenħtieġ li jiġu stabbiliti wkoll regoli għad-determinazzjoni tad-data aggregata dwar l-emissjonijiet fil-livell tal-kumpaniji mill-awtorità amministrattiva responsabbli f’sitwazzjonijiet speċifiċi, bħal meta ma tkun ġiet ippreżentata l-ebda data aggregata dwar l-emissjonijiet fil-livell tal-kumpaniji mill-kumpanija lill-awtorità amministrattiva responsabbli sal-iskadenza.

    (3)

    L-entitajiet responsabbli għall-konformità mar-Regolament (UE) 2015/757 u mad-Direttiva 2003/87/KE tal-Parlament Ewropew u tal-Kunsill (2) iridu jiġu identifikati b’mod ċar il-ħin kollu. Għal dan l-għan, u bil-ħsieb li tiġi żgurata l-koerenza fl-amministrazzjoni u l-infurzar, ir-Regolament (UE) 2015/757 jipprevedi li l-istess entità trid tkun responsabbli għat-tnejn li huma. Minkejja dan, fil-kuntest tar-rieżami tar-Regolament (UE) 2015/757, jenħtieġ li tiġi vvalutata l-konsistenza ta’ tali approċċ ma’ politiki u prattiki internazzjonali oħra tal-UE u, meta jkun xieraq, jenħtieġ li l-Kummissjoni tagħmel proposta leġiżlattiva għar-reviżjoni tar-Regolament (UE) 2015/757.

    (4)

    Jenħtieġ li l-Kummissjoni tivvaluta wkoll il-konsistenza tal-klassifikazzjoni żero tal-bijomassa, b’mod partikolari tal-bijomassa bbażata fuq l-għelejjel tal-ikel u tal-għalf, fid-Direttiva 2003/87/KE ma’ politiki oħra tal-UE, u, meta jkun xieraq, il-Kummissjoni jenħtieġ li tagħmel proposta biex tirrevedi l-leġiżlazzjoni rilevanti.

    (5)

    Sabiex jiġi żgurat il-funzjonament effettiv tas-Sistema tal-UE għall-Iskambju ta’ Kwoti tal-Emissjonijiet, li għandha tinkludi l-emissjonijiet ta’ gassijiet serra mit-trasport marittimu mill-perjodu ta’ rappurtar li jibda fl-1 ta’ Jannar 2024, jenħtieġ li dan ir-Regolament japplika minn dik id-data,

    ADOTTAT DAN IR-REGOLAMENT:

    Artikolu 1

    Regoli għar-rappurtar tad- data aggregata dwar l-emissjonijiet fil-livell tal-kumpaniji

    1.   Il-kumpaniji għandhom jissottomettu lill-awtorità amministrattiva responsabbli d-data aggregata dwar l-emissjonijiet fil-livell tal-kumpaniji kkalkulata f’konformità mar-regoli ta’ monitoraġġ imsemmija fil-Parti C tal-Anness II tar-Regolament (UE) 2015/757.

    2.   Il-kumpaniji għandhom jinkludu fid-data aggregata dwar l-emissjonijiet fil-livell tal-kumpaniji l-informazzjoni li ġejja:

    (a)

    data li tidentifika l-kumpanija u l-bastimenti taħt ir-responsabbiltà tal-kumpanija, kif ġej:

    (i)

    l-isem u l-indirizz tal-kumpanija;

    (ii)

    in-numru uniku ta’ identifikazzjoni tal-OMI tas-sid irreġistrat u ta-kumpanija;

    (iii)

    il-pajjiż tar-reġistrazzjoni tal-kumpanija, kif irreġistrat taħt l-Iskema tan-Numru Uniku tal-Identifikazzjoni tal-Kumpanija u s-Sid Reġistrat tal-OMI;

    (iv)

    l-indirizz tal-kumpanija;

    (v)

    l-isem, it-titolu tal-impjieg, l-indirizz tan-negozju, id-dettalji tat-telefown u tal-posta elettronika ta’ persuna ta’ kuntatt;

    (vi)

    l-awtorità amministrattiva responsabbli;

    (vii)

    lista ta’ bastimenti, li l-emissjonijiet ta’ gassijiet serra tagħhom jaqgħu fil-kamp ta’ applikazzjoni tad-Direttiva 2003/87/KE, li huma taħt ir-responsabbiltà tal-kumpanija matul il-perjodu ta’ rappurtar, inkluż, għal kull bastiment, in-numru ta’ identifikazzjoni tal-bastiment tal-OMI u n-numru ta’ identifikazzjoni uniku tal-kumpanija u tas-sid irreġistrat tal-OMI, kif ukoll il-perjodu li matulu l-bastiment kien taħt ir-responsabbiltà tal-kumpanija;

    (b)

    data relatata mal-verifika, kif ġej:

    (i)

    l-isem tal-verifikatur;

    (ii)

    l-indirizz tal-verifikatur;

    (iii)

    in-numru tal-akkreditazzjoni tal-verifikatur;

    (iv)

    il-korp nazzjonali ta’ akkreditament li jkun akkredita lill-verifikatur;

    (v)

    id-dikjarazzjoni tal-verifikatur;

    (c)

    is-somma tal-emissjonijiet aggregati totali ta’ gassijiet serra tal-bastimenti kollha li għandhom jiġu rrapportati skont id-Direttiva 2003/87/KE kif iddeterminati fil-livell tal-bastiment f’konformità mal-Parti C, il-punti 1.1 sa 1.7, tal-Anness II tar-Regolament (UE) 2015/757, espressi f’tunnellati ta’ ekwivalenti ta’ CO2 u diżaggregati skont il-gassijiet serra;

    (d)

    l-għadd totali tal-emissjonijiet aggregati totali ta’ gassijiet serra tal-bastimenti kollha li għandhom jiġu rrapportati skont id-Direttiva 2003/87/KE kif iddeterminati fil-livell tal-bastiment f’konformità mal-Parti C tal-Anness II tar-Regolament (UE) 2015/757, kif ikkalkulati f’konformità ma’:

    (i)

    il-parti C, il-punt 1.1, ta’ dak l-Anness;

    (ii)

    il-parti C, il-punti 1.1 u 1.2, ta’ dak l-Anness;

    (iii)

    il-parti C, il-punti 1.1 u 1.2 u 1.3, ta’ dak l-Anness;

    (iv)

    il-parti C, il-punti 1.1 sa 1.4, ta’ dak l-Anness;

    (v)

    il-parti C, il-punti 1.1 sa 1.5, ta’ dak l-Anness;

    (vi)

    il-parti C, il-punti 1.1 sa 1.6, ta’ dak l-Anness;

    (e)

    l-informazzjoni rilevanti kollha relatata mal-metodoloġija użata biex tiġi aggregata d-data dwar l-emissjonijiet fil-livell tal-kumpaniji, inklużi l-bidliet fil-metodoloġija meta mqabbla mal-perjodu ta’ rappurtar preċedenti.

    Artikolu 2

    Determinazzjoni tal-emissjonijiet mill-awtorità amministrattiva responsabbli

    1.   L-awtorità amministrattiva responsabbli għandha tagħmel stima konservattiva tad-data aggregata dwar l-emissjonijiet fil-livell tal-kumpaniji fi kwalunkwe waħda mis-sitwazzjonijiet li ġejjin:

    (a)

    ma tkun ġiet ippreżentata l-ebda data aggregata dwar l-emissjonijiet fil-livell tal-kumpaniji mill-kumpanija sal-iskadenza msemmija fl-Artikolu 11a tar-Regolament (UE) 2015/757;

    (b)

    id-data aggregata vverifikata dwar l-emissjonijiet fil-livell tal-kumpaniji msemmija fl-Artikolu 11a tar-Regolament (UE) 2015/757 tinstab li mhix konformi ma’ dak ir-Regolament;

    (c)

    id-data aggregata dwar l-emissjonijiet fil-livell tal-kumpaniji ma tkunx ġiet ivverifikata bħala sodisfaċenti f’konformità mar-Regolament Delegat tal-Kummissjoni (UE) 2016/2072 (3).

    2.   Meta verifikatur ikun ikkonkluda, fir-rapport ta’ verifika skont l-Artikolu 13(5) tar-Regolament (UE) 2015/757, li jeżistu dikjarazzjonijiet skorretti mhux materjali u ma jkunux ġew ikkoreġuti mill-kumpanija qabel ma toħroġ id-dikjarazzjoni ta’ verifika, l-awtorità amministrattiva responsabbli għandha tivvaluta dawk id-dikjarazzjonijiet skorretti, u fejn id-dikjarazzjonijiet skorretti jinstabu li huma materjali, għandha tagħmel stima konservattiva tad-data aggregata dwar l-emissjonijiet fil-livell tal-kumpaniji.

    3.   Meta l-awtorità amministrattiva responsabbli tagħmel stima konservattiva tad-data aggregata dwar l-emissjonijiet fil-livell tal-kumpaniji, din għandha tinforma lill-kumpanija jekk ikunux meħtieġa korrezzjonijiet u liema jkunu. Il-kumpanija għandha tagħmel dik l-informazzjoni disponibbli għall-verifikatur.

    4.   L-Istati Membri għandhom jistabbilixxu skambju effiċjenti ta’ informazzjoni bejn l-awtoritajiet kompetenti responsabbli għall-approvazzjoni tal-pjanijiet ta’ monitoraġġ u l-awtoritajiet kompetenti li jirċievu data aggregata dwar l-emissjonijiet fil-livell tal-kumpaniji, meta dawk l-awtoritajiet ma jkunux l-istess.

    Artikolu 3

    Dħul fis-seħħ

    Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Għandu japplika mill-1 ta’ Jannar 2024.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, it-12 ta’ Ottubru 2023.

    Għall-Kummissjoni

    Il-President

    Ursula VON DER LEYEN

    (1)   ĠU L 123, 19.5.2015, p. 55.

    (2)  Id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni u li temenda d-Direttiva tal-Kunsill 96/61/KE (ĠU L 275, 25.10.2003, p. 32).

    (3)  Ir-Regolament Delegat tal-Kummissjoni (UE) 2016/2072 tat-22 ta’ Settembru 2016 dwar l-attivitajiet ta’ verifika u l-akkreditament tal-verifikaturi skont ir-Regolament (UE) 2015/757 tal-Parlament Ewropew u tal-Kunsill dwar il-monitoraġġ, ir-rappurtar u l-verifika ta’ emissjonijiet tad-diossidu tal-karbonju mit-trasport marittimu (ĠU L 320, 26.11.2016, p. 5).

    ELI: http://data.europa.eu/eli/reg_del/2023/2849/oj

    ISSN 1977-074X (electronic edition)

    Top