(1)

Fl-14 ta’ Ottubru 2020, il-Kummissjoni Ewropea (“il-Kummissjoni”) bdiet investigazzjoni antidumping fir-rigward tal-importazzjonijiet tal-plywood tal-betula li joriġina mir-Russja abbażi tal-Artikolu 5 tar-Regolament bażiku. Fil-11 ta’ Ġunju 2021, il-Kummissjoni imponiet dazju antidumping provviżorju fuq l-importazzjonijiet tal-plywood tal-betula li joriġinaw mir-Russja permezz tar-Regolament ta’ Implimentazzjoni tal-Kummissjoni (UE) Nru 2021/940 (2) (“ir-Regolament proviżorju”).

(2)

Wara d-divulgazzjoni provviżorja, diversi partijiet allegaw li kien hemm bidla fil-kundizzjonijiet tas-suq wara l-perjodu ta’ investigazzjoni (“PI”) (bejn l-1 ta’ Lulju 2019 u t-30 ta’ Ġunju 2020) u ddikjaraw li l-impożizzjoni ta’ miżuri definittivi ma tkunx ġustifikata fid-dawl ta’ dawk il-bidliet.

(3)

Sabiex teżamina dawk l-allegazzjonijiet fil-kuntest tal-investigazzjoni, il-Kummissjoni, fit-18 ta’ Awwissu 2021, talbet lill-partijiet interessati fl-Unjoni biex jipprovdu informazzjoni relatata mal-perjodu ta’ wara l-PI (minn Lulju 2020 sa Ġunju 2021) biex teżamina u tivvaluta l-impatt, jekk hemm, tal-allegati ċirkostanzi mibdula fis-suq tal-Unjoni. Waslet informazzjoni mit-tliet produtturi tal-Unjoni fil-kampjun, produttur tal-Unjoni mhux fil-kampjun, l-Ilmentaturi u minn 63 parti interessata inklużi utenti, importaturi, assoċjazzjonijiet u produtturi oħra tal-Unjoni. Il-produtturi tal-Unjoni fil-kampjun ipprovdew l-informazzjoni mitluba relatata ma’ ċerti indikaturi.

(4)

Fil-31 ta’ Awwissu 2021, il-Kummissjoni infurmat lill-partijiet interessati kollha bil-fatti u l-kunsiderazzjonijiet essenzjali li fuq il-bażi tagħhom kien beħsiebha timponi dazju antidumping definittiv fuq l-importazzjonijiet tal-plywood tal-betula li joriġinaw mir-Russja, li kienu bbażati fuq is-sitwazzjoni matul il-perjodu ta’ investigazzjoni, minħabba li l-iżviluppi allegati ta’ wara l-PI tqiesu li huma ta’ natura temporanja. Il-partijiet kollha ngħataw perjodu li fih setgħu jikkummentaw. Wara d-divulgazzjoni finali, diversi partijiet interessati talbu s-sospensjoni tal-miżuri antidumping skont l-Artikolu 14(4) tar-Regolament bażiku b’referenza għall-bidliet allegati fis-suq wara l-PI, li jqajmu dubji dwar il-ħtieġa li jinġabru d-dazji wara l-impożizzjoni tagħhom. Fid-dawl tal-informazzjoni disponibbli, il-Kummissjoni ddeċidiet li teżamina jekk sospensjoni tal-miżuri antidumping definittivi, jekk ikun hemm, skont l-Artikolu 14(4) tar-Regolament bażiku tkunx ġustifikata.

(5)

Fil-11 ta’ Ottubru 2021, il-Kummissjoni żvelat l-intenzjoni tagħha li ma tissospendix il-miżuri skont l-Artikolu 14(4) tar-Regolament bażiku. Il-partijiet kollha ngħataw perjodu li fih setgħu jikkummentaw.

(6)

Sussegwentement, fid-9 ta’ Novembru 2021 il-Kummissjoni imponiet dazji antidumping definittivi (3) fuq il-plywood tal-betula mir-Russja li jvarjaw minn 14,4 % sa 15,8 %. Fl-istess ħin ħabbret li deċiżjoni fir-rigward ta’ sospensjoni possibbli se tittieħed fi stadju aktar tard.

(7)

L-Artikolu 14(4) tar-Regolament bażiku, jipprevedi li, fl-interess tal-Unjoni, il-miżuri anti-dumping jistgħu jiġu sospiżi meta l-kondizzjonijiet tas-suq jinbidlu temporanjament sal-punt li ma jkunx probabbli li terġa’ tibda ssir ħsara b’konsegwenza ta’ din is-sospensjoni. Minn dan isegwi li l-miżuri antidumping jistgħu jiġu sospiżi biss f’sitwazzjoni fejn iċ-ċirkostanzi jkunu nbidlu sal-punt li l-industrija tal-Unjoni ma tibqax iġġarrab dannu materjali.

(8)

Matul il-perjodu kkunsidrat (2017 - Ġunju 2020), l-importazzjonijiet Russi żdiedu b’14 %, u laħqu sehem mis-suq ta’ 46 % fil-PI, minn 40 % fl-2017. B’mod parallel, is-sitwazzjoni ekonomika tal-industrija tal-Unjoni wriet xejra negattiva fl-indikaturi ewlenin kollha: produzzjoni (- 14 %), bejgħ fl-UE (- 17 %), sehem mis-suq (minn 47 % għal 39 %) u profittabbiltà (minn + 10 % għal - 3 %). Fuq din il-bażi, il-Kummissjoni kkonkludiet li l-industrija tal-Unjoni ġarrbet dannu materjali minħabba l-importazzjonijiet oġġett ta’ dumping. Fir-rigward tad-data ta’ wara l-PI, il-Kummissjoni qieset li l-prezzijiet allegatament għoljin b’mod anormali ta’ wara l-PI tal-prodott ikkonċernat u ż-żieda fit-trasport kienu mistennija li jkunu ta’ natura temporanja li jirrispondu għal irkupru ekonomiku globali u żieda fid-domanda wara l-COVID. Għalhekk, l-informazzjoni disponibbli għall-Kummissjoni għall-perjodu ta’ wara l-PI ma bidlitx il-konklużjonijiet fir-rigward tad-dannu materjali u l-kawżalità u l-impożizzjoni tad-dazji tqieset xierqa.

(9)

L-analiżi tal-informazzjoni addizzjonali mitluba mill-Kummissjoni biex teżamina s-sitwazzjoni fis-suq tal-Unjoni wara l-PI skont l-Artikolu 14(4) tar-Regolament bażiku wriet li s-sitwazzjoni tal-industrija tal-Unjoni ma nbidlitx b’mod sinifikanti mis-sitwazzjoni tagħha matul il-PI.

(10)

Matul il-perjodu ta’ wara l-PI, il-bejgħ tal-produtturi tal-Unjoni fl-Unjoni lil partijiet mhux relatati żviluppa b’mod pożittiv b’żieda ta’ 9 % meta mqabbel mal-PI. Madankollu, meta mqabbel mas-sena ta’ referenza tal-perjodu kkunsidrat, (jiġifieri l-2017), il-bejgħ fl-UE kien għadu 15 % inqas. Bl-istess mod, il-volum tal-produzzjoni u l-kapaċità żviluppaw b’mod pożittiv mill-PI b’żidiet ta’ + 11 % fil-produzzjoni u + 4 % fil-kapaċità tal-produzzjoni, li wassal għal żieda fl-użu tal-kapaċità ta’ 7 %. Madankollu, meta mqabbla mal-2017, il-volumi tal-produzzjoni u l-użu tal-kapaċità ta’ wara l-PI naqsu b’- 8 % u - 7 % rispettivament.

(11)

Rigward il-profittabbiltà, l-industrija tal-Unjoni kienet għadha qed tagħmel it-telf (- 1,1 %) matul il-perjodu ta’ wara l-PI, ferm inqas mill-profitt fil-mira stabbilit (9,7 %) fil-livell tal-2017, peress li matul dik is-sena l-industrija tal-Unjoni nstabet li kienet topera taħt kundizzjonijiet normali tas-suq fin-nuqqas tad-dumping. Dan juri li l-industrija tal-Unjoni bbenefikat biss parzjalment miż-żieda fid-domanda peress li ż-żieda fil-bejgħ u l-prezzijiet kienet ikkumpensata, fil-biċċa l-kbira, minn żieda fl-ispejjeż tal-produzzjoni (il-materja prima kienet affettwata b’mod simili miż-żieda fil-prezz) u aġġustamenti fil-prezzijiet imdewma minħabba obbligi kuntrattwali.

(12)

Fuq il-bażi ta’ dan ta’ hawn fuq, il-Kummissjoni kkonkludiet li filwaqt li l-industrija tal-Unjoni bbenefikat miż-żieda fid-domanda u sa ċertu punt ukoll mill-prezzijiet ogħla fis-suq ta’ wara l-PI, kif muri mix-xejra pożittiva ta’ ċerti indikaturi (ara l-premessi (10) u (11)) meta mqabbla mal-PI, dawk is-sinjali ta’ rkupru ma kinux b’saħħithom biżżejjed biex ireġġgħu lura s-sitwazzjoni dannuża tal-industrija tal-Unjoni, kif muri mix-xejriet meta mqabbla mal-2017. Barra minn hekk, l-industrija tal-Unjoni kienet għadha qed tagħmel telf fil-perjodu ta’ wara l-PI. Għalhekk, il-Kummissjoni kkonkludiet li l-evidenza ma wrietx li l-kundizzjonijiet tas-suq kienu nbidlu temporanjament sal-punt li ma kienx probabbli li d-dannu jerġa’ jibda b’riżultat ta’ sospensjoni.

(13)

Wara l-iżvelar tas-sejbiet tal-Kummissjoni, xi partijiet, inklużi l-produtturi esportaturi, l-importaturi u l-utenti, ikkontestaw il-konklużjoni fl-investigazzjoni antidumping fejn sostnew li l-industrija tal-Unjoni ma ġarrbitx ħsara mill-importazzjonijiet Russi iżda minn fatturi oħra. Speċifikament ġie ddikjarat li, wara l-PI, l-industrija tal-Unjoni ġarrbet ħsara mill-ispejjeż tal-produzzjoni u d-dewmien fl-aġġustamenti tal-prezzijiet.

(14)

Il-Kummissjoni fakkret li l-analiżi tal-kawżalità kienet is-suġġett tal-proċediment antidumping separat, li fih, il-Kummissjoni kkonkludiet li l-importazzjonijiet oġġett ta’ dumping mir-Russja kkawżaw dannu materjali lill-industrija tal-Unjoni u li l-ebda fatturi oħra, analizzati individwalment jew kollettivament, ma taffew ir-rabta kawżali bejn l-importazzjonijiet oġġett ta’ dumping u d-dannu mġarrab mill-industrija tal-Unjoni sal-punt li tali rabta ma tibqax ġenwina u sostanzjali (4). L-eżaminazzjoni tal-elementi fl-Artikolu 14(4) tar-Regolament bażiku jappartjenu għal kwistjoni differenti (jiġifieri, jekk id-dannu huwiex probabbli li jissokta jekk il-miżuri jiġu sospiżi) u ma tistax terġa’ tiftaħ l-analiżi li diġà saret li tirriżulta fl-impożizzjoni ta’ miżuri. Għalhekk, peress li d-dikjarazzjoni ma rreferietx għas-sejbiet tal-Kummissjoni fil-kuntest tal-Artikolu 14(4), din ġiet miċħuda.

(15)

Bl-istess mod, il-Kummissjoni nnutat li fl-analiżi tagħha tal-iżviluppi ta’ wara l-PI, (Taqsima 2.2 hawn fuq), hija ma sabitx li d-dannu kontinwu kien ikkawżat miż-żieda fl-ispejjeż tal-produzzjoni. Għall-kuntrarju, kif spjegat fil-premessa (12), l-industrija tal-Unjoni bbenefikat miż-żieda fid-domanda u sa ċertu punt ukoll mill-prezzijiet ogħla fis-suq. Il-Kummissjoni nnutat ukoll li, irrispettivament minn x’kienu l-effetti tad-dewmien tal-aġġustamenti tal-prezzijiet u tal-kost tal-produzzjoni wara l-iżviluppi fis-suq ta’ wara l-PI, is-sejba ta’ dannu materjali kkawżat mill-importazzjonijiet Russi matul il-PI ġiet stabbilita fir-Regolament ta’ Implimentazzjoni tal-Kummissjoni (UE) 2021/1930 fuq il-bażi tal-informazzjoni dwar il-perjodu 2017-Ġunju 2020 u ma ġietx indirizzata fil-kuntest tal-analiżi tal-elementi fl-Artikolu 14(4) tar-Regolament bażiku. Dawn il-pretensjonijiet kienu għalhekk miċħuda.

(16)

Wara d-divulgazzjoni, xi partijiet, inklużi l-produtturi esportaturi, l-importaturi u l-utenti, sostnew ukoll li l-Kummissjoni jenħtieġ li twettaq analiżi prospettiva ta’ jekk il-“kundizzjonijiet tas-suq inbidlux temporanjament sal-punt li ma jkunx probabbli li terġa’ ssir ħsara bħala riżultat tas-sospensjoni” skont l-Artikolu 14(4) tar-Regolament bażiku. Bl-istess mod, xi partijiet sostnew ukoll li l-Kummissjoni għandha tikkunsidra l-iżbilanċ bejn il-provvista u d-domanda kif sar fil-proċediment li jikkonċerna l-importazzjonijiet ta’ prodotti tal-aluminju rrumblat ċatt li joriġinaw miċ-Ċina.

(17)

Fir-rigward tal-analiżi prospettiva, il-Kummissjoni fakkret li l-analiżi tad-data ta’ wara l-PI kkonkludiet li l-industrija tal-Unjoni kienet għadha qed iġġarrab il-ħsara u għalhekk il-kundizzjonijiet għas-sospensjoni ma ġewx issodisfati. Konsegwentement, ma kien hemm l-ebda raġuni biex titwettaq analiżi prospettiva dwar jekk id-dannu huwiex probabbli li jissokta b’riżultat tas-sospensjoni, minħabba li l-analiżi wriet li l-industrija tal-Unjoni kompliet tkun materjalment danneġġjata fil-perjodu ta’ wara l-PI. Bl-istess mod, minħabba l-kontinwazzjoni tad-dannu għall-industrija tal-Unjoni, l-analiżi prospettiva tal-iżbilanċ bejn il-provvista u d-domanda tqieset bħala mhux ġustifikata.

(18)

Wara d-divulgazzjoni, Segezha Group, produttur esportatur, sostna wkoll li dazju fil-forma ta’ prezz minimu tal-importazzjoni (“PMI”) ikun l-aktar forma ġustifikata tal-miżura. Il-Kummissjoni fakkret li analiżi dwar il-forma tal-miżuri hija barra mill-ambitu ta’ din il-proċedura, u għalhekk ċaħdet it-talba.

(19)

Wara d-divulgazzjoni, Syktyvkar Plywood Mill, produttur esportatur Russu fil-kampjun, iddikjara li l-informazzjoni pprovduta minn partijiet interessati għajr il-produtturi tal-UE ma ssemmietx mill-Kummissjoni fid-dokument ta’ divulgazzjoni. Il-Kummissjoni fakkret li ma hemm l-ebda obbligu li fid-dokument ta’ divulgazzjoni tagħha ssir referenza għall-kummenti kollha mill-partijiet interessati kollha, peress li r-raġunijiet għall-konklużjonijiet tagħha kienu ddettaljati u spjegati kif xieraq. Madankollu, il-Kummissjoni nnotat li s-sottomissjonijiet u l-kummenti kollha mill-partijiet interessati ġew eżaminati u kkunsidrati kif xieraq meta analizzat sospensjoni possibbli skont l-Artikolu 14(4) tar-Regolament bażiku.

(20)

Wara d-divulgazzjoni, xi partijiet interessati ddikjaraw li l-impożizzjoni ta’ miżuri tmur kontra l-interess tal-Unjoni. Il-Kummissjoni fakkret li l-interess tal-Unjoni fir-rigward tal-impożizzjoni tal-miżuri kien diġà ġie analizzat kif xieraq fil-proċediment antidumping (b’mod partikolari, il-premessi (213) sa (236) tar-Regolament ta’ Implimentazzjoni (UE) 2021/1930, u kkonkludiet li ma kienx hemm raġunijiet konvinċenti li ma kienx fl-interess tal-Unjoni li jiġu imposti miżuri fuq l-importazzjonijiet tal-plywood tal-betula li joriġinaw mir-Russja). Ta’ min ifakkar ukoll li skont l-Artikolu 14 (4) tar-Regolament bażiku, l-analiżi tal-interess tal-Unjoni ssir rilevanti biss jekk l-industrija tal-Unjoni ma tibqax iġġarrab dannu u d-dannu ma jkunx probabbli li jkompli b’riżultat tas-sospensjoni. Minħabba li l-analiżi tal-iżviluppi ta’ wara l-PI kkonkluda li l-industrija tal-Unjoni kienet għadha qed iġġarrab dannu u, għalhekk, il-kundizzjonijiet għas-sospensjoni ma ġewx issodisfati, il-Kummissjoni ma qisitx li kien meħtieġ li jiġi evalwat l-interess tal-Unjoni skont l-Artikolu 14(4) tar-Regolament bażiku.

(21)

Wara d-divulgazzjoni, xi partijiet interessati ddikjaraw li jenħtieġ li l-Kummissjoni tissospendi l-miżuri definittivi fuq il-pannelli kwadri. L-ewwel nett, il-Kummissjoni nnutat li l-Artikolu 14(4) tar-Regolament bażiku jipprevedi s-sospensjoni tal-miżuri imposti fuq l-importazzjonijiet tal-prodott ikkonċernat kollu kemm hu u mhux parti minnu. Il-Kummissjoni nnotat ukoll li t-talba għall-esklużjoni fuq pannelli kwadri kienet indirizzata fil-proċediment antidumping parallel, li ċaħad it-talba għall-esklużjoni għal panelli kwadri (5). Għalhekk it-talba ġiet rifjutata.

(22)

Minħabba li l-eżaminazzjoni tal-iżvulupp ta’ wara l-PI wriet li l-industrija tal-Unjoni kienet għadha qed issofri minn sitwazzjoni dannuża, il-Kummissjoni ma setgħetx tikkonkludi li l-kundizzjonijiet tas-suq kienu inbidlu temporanjament sal-punt li d-dannu x’aktarx ma jerġax jissokta b’riżultat ta’ sospensjoni, u li jkun fl-interess tal-Unjoni li tissospendi l-miżuri skont l-Artikolu 14(4) tar-Regolament bażiku. Din id-deċiżjoni hija mingħajr preġudizzju għad-dritt tal-Kummissjoni li tieħu deċiżjoni skont l-Artikolu 14(4) tar-Regolament bażiku, jekk il-kundizzjonijiet tas-suq jinbidlu fil-futur.

(23)

Għalhekk, il-Kummissjoni ddeċidiet li ma tissospendix id-dazji antidumping fuq l-importazzjonijiet tal-plywood tal-betula mir-Russja imposti mir-Regolament ta’ Implimentazzjoni (UE) 2021/1930.