This document is an excerpt from the EUR-Lex website
Document 32020R1303
Commission Delegated Regulation (EU) 2020/1303 of 14 July 2020 supplementing Regulation (EU) No 648/2012 of the European Parliament and of the Council with regard to the criteria that ESMA should take into account to determine whether a central counterparty established in a third country is systemically important or likely to become systemically important for the financial stability of the Union or of one or more of its Member States (Text with EEA relevance)
Regolament Delegat tal-Kummissjoni (UE) 2020/1303 tal-14 ta’ Lulju 2020 li jissupplimenta r-Regolament (UE) Nru 648/2012 tal-Parlament Ewropew u tal-Kunsill fir-rigward tal-kriterji li l-ESMA jenħtieġ li tqis biex tiddetermina jekk kontroparti ċentrali stabbilita f’pajjiż terz hijiex sistemikament importanti jew aktarx issir sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha (Test b’rilevanza għaż-ŻEE)
Regolament Delegat tal-Kummissjoni (UE) 2020/1303 tal-14 ta’ Lulju 2020 li jissupplimenta r-Regolament (UE) Nru 648/2012 tal-Parlament Ewropew u tal-Kunsill fir-rigward tal-kriterji li l-ESMA jenħtieġ li tqis biex tiddetermina jekk kontroparti ċentrali stabbilita f’pajjiż terz hijiex sistemikament importanti jew aktarx issir sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha (Test b’rilevanza għaż-ŻEE)
C/2020/4892
ĠU L 305, 21.9.2020, p. 7–12
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
Relation | Act | Comment | Subdivision concerned | From | To |
---|---|---|---|---|---|
Completion | 32012R0648 | 22/09/2020 |
21.9.2020 |
MT |
Il-Ġurnal Uffiċjali tal-Unjoni Ewropea |
L 305/7 |
REGOLAMENT DELEGAT TAL-KUMMISSJONI (UE) 2020/1303
tal-14 ta’ Lulju 2020
li jissupplimenta r-Regolament (UE) Nru 648/2012 tal-Parlament Ewropew u tal-Kunsill fir-rigward tal-kriterji li l-ESMA jenħtieġ li tqis biex tiddetermina jekk kontroparti ċentrali stabbilita f’pajjiż terz hijiex sistemikament importanti jew aktarx issir sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet (1) u b’mod partikolari t-tieni subparagrafu tal-Artikolu 25(2a) tiegħu,
Billi:
(1) |
Meta tivvaluta l-grad ta’ riskju sistemiku li CCP ta’ pajjiż terz tippreżenta għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha, l-ESMA jenħtieġ li tqis firxa ta’ kunsiderazzjonijiet kwantitattivi u kwalitattivi oġġettivi li jiġġustifikaw id-deċiżjoni tagħha li tirrikonoxxi CCP ta’ pajjiż terz bħala CCP tal-Grad 1 jew tal-Grad 2. Jenħtieġ ukoll li tqis kull kondizzjoni li skontha l-Kummissjoni setgħet adottat id-deċiżjoni tagħha ta’ ekwivalenza. B’mod partikolari, meta tkun qed tivvaluta l-profil tar-riskju ta’ CCP ta’ pajjiż terz, l-ESMA trid tikkunsidra indikaturi ta’ attività kwantitattivi li jkunu oġġettivi u trasparenti fir-rigward tan-negozju mwettaq f’rabta mal-parteċipanti tal-ikklirjar stabbiliti fl-Unjoni jew li jkunu denominati f’muniti tal-Unjoni, fil-mument tal-valutazzjoni. Filwaqt li l-ESMA trid tqis in-negozju mwettaq mis-CCP b’mod olistiku, il-valutazzjoni tagħha jenħtieġ li tirrifletti r-riskju li CCP partikolari tista’ ġġib għall-istabbiltà finanzjarja tal-Unjoni. |
(2) |
Meta jiġu speċifikati l-kriterji li l-ESMA trid tqis meta tkun qed tiddetermina l-grad ta’ CCP ta’ pajjiż terz, jenħtieġ li jitqiesu n-natura tat-tranżazzjonijiet ikklirjati mis-CCP, inklużi l-kumplessità, il-profil tar-riskju u l-maturità medja tagħhom, kif ukoll it-trasparenza u l-likwidità tas-swieq ikkonċernati u l-livell sa fejn l-attivitajiet ta’ kklirjar tas-CCP huma denominati f’Euro jew f’muniti oħra tal-Unjoni. F’dan ir-rigward, karatteristiċi speċifiċi li jikkonċernaw ċerti prodotti, bħal prodotti agrikoli, elenkati u eżegwiti fi swieq regolati f’pajjiżi terzi, li huma relatati ma’ swieq li fil-biċċa l-kbira jservu kontropartijiet mhux finanzjarji domestiċi f’dak il-pajjiż terz li jimmaniġġjaw ir-riskji kummerċjali tagħhom permezz ta’ dawn il-kuntratti, jistgħu joħolqu riskju negliġibbli għall-membri tal-ikklirjar u għaċ-ċentri tan-negozjar fl-Unjoni peress li jkollhom livell baxx ta’ interkonnettività sistemika mal-bqija tas-sistema finanzjarja. |
(3) |
Il-pajjiżi fejn topera s-CCP, il-firxa tas-servizzi li tipprovdi, il-karatteristiċi tal-istrumenti finanzjarji li tikklirja kif ukoll il-volumi kklirjati huma indikaturi oġġettivi tal-kumplessità tan-negozju tas-CCP. Meta tqis il-kriterju stabbilit fil-punt (a) tal-Artikolu 25(2a) tar-Regolament (UE) Nru 648/2012, jenħtieġ għalhekk li l-ESMA tikkunsidra s-sjieda, in-negozju u l-istruttura korporattiva tas-CCP, kif ukoll il-firxa, in-natura u l-kumplessità tas-servizzi tal-ikklirjar li toffri s-CCP u l-punt sa fejn dawn is-servizzi huma ta’ importanza għall-membri tal-ikklirjar u l-klijenti (“parteċipanti tal-ikklirjar”) stabbiliti fl-Unjoni. Filwaqt li jenħtieġ li l-importanza sistemika ta’ CCP tiġi vvalutata b’mod olistiku, l-ESMA jenħtieġ li tqis speċifikament il-proporzjon tan-negozju tas-CCP li jitwettaq f’muniti tal-Unjoni, kif ukoll il-proporzjon tan-negozju tas-CCP li oriġina minn parteċipanti tal-ikklirjar stabbiliti fl-Unjoni. Għal CCP li hu aktar probabbli li tkun ta’ importanza sistemika għall-Unjoni, huwa importanti li l-ESMA tivvaluta l-istruttura u s-sjieda tal-grupp li s-CCP tista’ tkun parti minnu sabiex tiddetermina jekk l-interessi tal-Unjoni humiex f’riskju. Barra minn hekk, il-profondità, il-likwidità u t-trasparenza tas-swieq moqdija minn tali CCP jenħtieġ li jiġu vvalutati wkoll sabiex l-ESMA tkun tista’ tifhem aħjar ir-riskju għall-membri tal-ikklirjar stabbiliti fl-Unjoni fit-twettiq ta’ rkant ta’ ġestjoni ta’ inadempjenza. |
(4) |
Il-kapital tas-CCP u r-riżorsi finanzjarji impenjati minn parteċipanti tal-ikklirjar kif ukoll it-tip u n-natura tal-kollateral li jipprovdu huma elementi essenzjali li jridu jiġu kkunsidrati meta jiġi vvalutat kemm is-CCP għandha l-kapaċità li tkun tiflaħ għal xi żvilupp sfavorevoli. Għalhekk jenħtieġ li meta tqis il-kriterju stabbilit fil-punt (b) tal-Artikolu 25(2a) tar-Regolament (UE) Nru 648/2012, l-ESMA jkollha viżjoni ġenerali tar-riżorsi finanzjarji disponibbli għas-CCP f’każ ta’ event ta’ inadempjenza jew tip ta’ event ieħor. Jenħtieġ li l-ESMA tqis ukoll in-natura garantita, mhux garantita, impenjata, mhux impenjata, iffinanzjata jew mhux iffinanzjata ta’ dawn ir-riżorsi kif ukoll il-mezzi użati mis-CCP biex tipprovdi ċertezza tad-dritt u fiduċja rigward is-saldu tal-pagamenti li tagħmel u l-kollateral li jkollha tittratta. Fl-aħħar nett, jenħtieġ li l-ESMA tikkunsidra l-eżistenza, in-natura u l-effett ta’ qafas ta’ rkupru u riżoluzzjoni għas-CCPs fil-ġurisdizzjoni li fiha topera s-CCP li tapplika għal rikonoxximent. Tali oqfsa ta’ rkupru u riżoluzzjoni jenħtieġ li jiġu vvalutati skont gwida u attributi ewlenin maqbula internazzjonalment. Meta tkun qed tqis ir-riskju tas-saldu u tal-likwidità, jenħtieġ li l-ESMA tagħti attenzjoni partikolari lis-CCPs li aktarx ikunu sistemiċi, fir-rigward tal-livell ta’ sigurtà li biha dawn is-CCPs jaċċessaw il-likwidità kif ukoll il-pressjoni tal-likwidità fuq il-muniti tal-Unjoni. Filwaqt li s-sigurtà tal-pagamenti u tas-saldu tista’ tissaħħaħ permezz tal-użu tat-teknoloġija tar-reġistru distribwit jew ta’ teknoloġiji reċenti oħra, jenħtieġ li l-ESMA tagħti attenzjoni għar-riskju addizzjonali li dan jista’ jġib lis-CCP, b’mod partikolari r-riskju ċibernetiku. |
(5) |
In-natura tal-kundizzjonijiet imposti minn CCP sabiex il-parteċipanti tal-ikklirjar ikollhom aċċess għas-servizzi tagħha u l-interkonnessjonijiet bejn dawk il-parteċipanti tal-ikklirjar għandhom riperkussjonijiet fuq il-mod li bih CCP tista’ tiġi milquta minn avveniment avvers fir-rigward ta’ dawn il-parteċipanti. Għalhekk, meta tqis il-kriterju stabbilit fil-punt (c) tal-Artikolu 25(2a) tar-Regolament (UE) Nru 648/2012, jenħtieġ li l-ESMA tiddetermina sa fejn possibbli l-identità tal-parteċipanti tal-ikklirjar lis-CCP, b’mod partikolari meta dik is-CCP tipprovdi servizzi lil parteċipanti tal-ikklirjar stabbiliti fl-Unjoni. Jenħtieġ li l-ESMA tiddetermina wkoll is-sehem mis-suq rilevanti jew l-importanza relattiva ta’ parteċipanti tal-ikklirjar jew gruppi ta’ parteċipanti tal-ikklirjar f’dik is-CCP. Sakemm ikun meħtieġ biex jiġi vvalutat l-impatt li jista’ jkollu fuq l-istruttura tas-sħubija tal-ikklirjar, jenħtieġ li l-ESMA tivvaluta l-kundizzjonijiet u l-opzjonijiet li bihom is-CCP tipprovdi aċċess għas-servizzi tal-ikklirjar tagħha. Fir-rigward ta’ CCP li x’aktarx tkun sistemika għall-Unjoni, jenħtieġ li l-ESMA tivvaluta jekk ir-rekwiżiti ġuridiċi u prudenzjali li CCP timponi fuq il-membri tal-ikklirjar tagħha humiex stretti biżżejjed. |
(6) |
Fil-każ ta’ tfixkil ta’ CCP, il-parteċipanti tal-ikklirjar jista’ jkollhom jiddependu, kemm direttament kif ukoll indirettament, fuq il-forniment ta’ servizzi simili jew identiċi minn CCPs oħra. Għaldaqstant, sabiex tiġi vvalutata l-importanza relattiva tas-CCP li tapplika għar-rikonoxximent, jenħtieġ li meta l-ESMA tqis il-kriterju stabbilit fil-punt (d) tal-Artikolu 25(2a) tar-Regolament (UE) Nru 648/2012, tiddetermina jekk il-parteċipanti tal-ikklirjar jistgħux jissostitwixxu s-servizzi tal-ikklirjar kollha jew uħud minnhom ipprovduti minn dik is-CCP b’servizzi pprovduti minn CCPs oħra, b’mod partikolari meta s-CCPs alternattivi jkunu awtorizzati jew rikonoxxuti fl-Unjoni. Meta l-membri tal-ikklirjar u l-klijenti stabbiliti fl-Unjoni jkunu jistgħu jikklirjaw biss ċerti prodotti soġġetti għall-obbligu tal-ikklirjar f’CCP waħda ta’ pajjiż terz, jenħtieġ li l-importanza sistemika ta’ dik is-CCP tiġi kkunsidrata b’reqqa kbira mill-ESMA. |
(7) |
Is-CCPs jistgħu jiġu konnessi f’ħafna modi ma’ infrastrutturi finanzjarji oħra bħal CCPs jew depożitarji ċentrali ta’ titoli oħra. Tfixkil ta’ dawn il-konnessjonijiet jista’ jkollu impatt negattiv fuq il-funzjonament tajjeb tas-CCP. Għalhekk, meta tqis il-kriterju stabbilit fil-punt (e) tal-Artikolu 25(2a) tar-Regolament (UE) Nru 648/2012, jenħtieġ li l-ESMA tivvaluta l-punt sa fejn is-CCP tkun konnessa ma’ infrastrutturi oħra tas-suq finanzjarju jew ma’ istituzzjonijiet finanzjarji oħra b’mod li jista’ jkollu impatt fuq l-istabbiltà finanzjarja tal-Unjoni jew ta’ wieħed jew aktar mill-Istati Membri tagħha. Meta tagħmel dan, jenħtieġ li l-ESMA tagħti attenzjoni partikolari lil dawn il-konnessjonijiet u interdipendenzi ma’ entitajiet li jinsabu fl-Unjoni. Fl-aħħar nett, jenħtieġ li l-ESMA tidentifika u tivvaluta n-natura tas-servizzi esternalizzati mis-CCP u r-riskju li tali arranġamenti jistgħu joħolqu għas-CCP f’każ li dawn b’xi mod jiġu interrotti jew imfixkla. |
(8) |
Meta jiġi determinat, bl-użu ta’ indikaturi kwantitattivi oġġettivi, li l-iskopertura tal-membri tal-ikklirjar u l-klijenti stabbiliti fl-Unjoni għal CCP hija sinifikanti, jenħtieġ li l-ESMA tivvaluta elementi addizzjonali għal kull kriterju. Aktar ma’ CCP tissodisfa minn dawn l-indikaturi, aktar ikun probabbli li l-ESMA tikkonkludi li dik is-CCP tkun ta’ importanza sistemika għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha. |
(9) |
Dan ir-Regolament Delegat jenħtieġ li jidħol fis-seħħ b’urġenza biex jiżgura l-operazzjonalizzazzjoni l-aktar rapida tar-Regolament (UE) 2019/2099 tal-Parlament Ewropew u tal-Kunsill (2). |
ADOTTAT DAN IR-REGOLAMENT:
Artikolu 1
In-natura, id-daqs u l-kumplessità tan-negozju tas-CCP
1. Meta tqis il-kriterju stabbilit fil-punt (a) tal-Artikolu 25(2a) tar-Regolament (UE) Nru 648/2012, l-ESMA għandha tivvaluta l-elementi li ġejjin:
(a) |
il-pajjiżi li fihom is-CCP tipprovdi jew biħsiebha tipprovdi servizzi; |
(b) |
il-punt sa fejn is-CCP tipprovdi servizzi oħrajn flimkien mas-servizzi tal-ikklirjar; |
(c) |
it-tip ta’ strumenti finanzjarji kklirjati jew li jridu jiġu kklirjati mis-CCP; |
(d) |
jekk l-istrumenti finanzjarji kklirjati jew li jridu jiġu kklirjati mis-CCP humiex soġġetti għall-obbligu tal-ikklirjar skont l-Artikolu 4 tar-Regolament (UE) Nru 648/2012; |
(e) |
il-valuri medji kklirjati mis-CCP matul sena, fil-livelli li ġejjin:
|
(f) |
jekk is-CCP tkunx lestiet valutazzjoni tal-profil tar-riskju tagħha abbażi ta’ standards miftiehma internazzjonalment jew mod ieħor, il-metodoloġija użata u r-riżultat tal-valutazzjoni. |
2. Għall-finijiet tal-punt (e) tal-paragrafu 1, l-ESMA għandha tivvaluta l-valuri li ġejjin b’mod separat:
(a) |
għal tranżazzjonijiet ta’ titoli (inklużi tranżazzjonijiet ta’ finanzjament ta’ titoli skont ir-Regolament (UE) 2015/2365 tal-Parlament Ewropew u tal-Kunsill (3)), il-valur ta’ pożizzjonijiet miftuħa jew ta’ interess miftuħ; |
(b) |
għal tranżazzjonijiet ta’ derivattivi nnegozjati f’suq regolat skont it-tifsira tad-Direttiva 2014/65/UE tal-Parlament Ewropew u tal-Kunsill (4), il-valur tal-interess miftuħ jew tal-fatturat; |
(c) |
għal tranżazzjonijiet ta’ derivattivi barra l-borża (over-the-counter, OTC), l-ammont nozzjonali pendenti gross u nett. |
Dawn il-valuri għandhom jiġu vvalutati għal kull munita u għal kull klassi ta’ assi.
3. Fejn japplika xi wieħed mill-indikaturi msemmija fl-Artikolu 6, l-ESMA, flimkien mal-elementi elenkati fil-paragrafu 1 ta’ dan l-Artikolu, għandha tivvaluta wkoll l-elementi li ġejjin:
(a) |
l-istruttura tas-sjieda tas-CCP; |
(b) |
meta s-CCP tkun tappartjeni għall-istess grupp bħal dak ta’ infrastruttura oħra tas-suq finanzjarju, bħal CCP oħra jew depożitorju ċentrali tat-titoli, l-istruttura korporattiva tal-grupp li għalih tappartjeni s-CCP; |
(c) |
jekk is-CCP tipprovdix servizzi tal-ikklirjar lill-klijenti jew lill-klijenti indiretti stabbiliti fl-Unjoni permezz ta’ membri tal-ikklirjar stabbiliti barra mill-Unjoni; |
(d) |
in-natura, il-profondità u l-likwidità tas-swieq moqdija u l-livell tal-informazzjoni disponibbli dwar id-data adegwata dwar l-ipprezzar għall-parteċipanti tas-suq u kull sors ta’ pprezzar aċċettat b’mod ġenerali u affidabbli; |
(e) |
jekk il-kwotazzjonijiet, il-prezzijiet ta’ talba u offerta prenegozjar u l-profonditajiet ta’ interessi ta’ negozjar humiex pubbliċi; |
(f) |
jekk il-prezz postnegozjar, il-volum u l-ħin tat-tranżazzjonijiet eżegwiti jew konklużi, fuq u barra s-swieq moqdija mis-CCP humiex pubbliċi. |
Artikolu 2
L-effett ta’ nuqqas jew ta’ tfixkil għal CCP
1. Meta jitqies il-kriterju stabbilit fil-punt (b) tal-Artikolu 25(2a) tar-Regolament (UE) Nru 648/2012, l-ESMA għandha tivvaluta l-elementi li ġejjin:
(a) |
il-kapital, inkluż il-qligħ imfaddal u r-riżervi, tas-CCP; |
(b) |
it-tip u l-ammont ta’ kollateral aċċettat u miżmum mis-CCP, it-telf impost applikat, il-metodoloġija tat-telf impost korrispondenti, il-muniti li fihom huwa ddenominat il-kollateral u l-punt sa fejn il-kollateral huwa pprovdut minn entitajiet stabbiliti fl-Unjoni jew li huma parti minn grupp soġġett għal superviżjoni konsolidata fl-Unjoni; |
(c) |
l-ammont massimu ta’ marġni miġbura mis-CCP f’jum wieħed matul perjodu ta’ 365 jum qabel il-valutazzjoni tal-ESMA; |
(d) |
l-ammont massimu ta’ marġni miġbura mis-CCP f’jum wieħed matul perjodu ta’ 365 jum qabel il-valutazzjoni tal-ESMA minn kull membru tal-ikklirjar li tkun entità stabbilita fl-Unjoni jew entità li tkun parti minn grupp soġġett għal superviżjoni konsolidata fl-Unjoni, għal kull klassi ta’ assi jew fond tal-inadempjenza segregat fejn applikabbli; |
(e) |
fejn applikabbli għal kull fond tal-inadempjenza tas-CCP, il-kontribuzzjonijiet massimi tal-fond tal-inadempjenza meħtieġa u miżmuma mis-CCP f’jum wieħed matul perjodu ta’ 365 jum qabel il-valutazzjoni tal-ESMA; |
(f) |
fejn applikabbli għal kull fond tal-inadempjenza tas-CCP, il-kontribuzzjonijiet massimi tal-fond tal-inadempjenza meħtieġa u miżmuma mis-CCP f’jum wieħed matul perjodu ta’ 365 jum qabel il-valutazzjoni tal-ESMA minn kull membru tal-ikklirjar li tkun entità stabbilita fl-Unjoni jew entità parti minn grupp soġġett għal superviżjoni konsolidata fl-Unjoni; |
(g) |
l-akbar obbligu ta’ pagament stmat f’jum wieħed b’kollox u f’kull munita tal-Unjoni li tkun ikkawżata mill-inadempjenza ta’ xi wieħed jew tnejn mill-akbar membri tal-ikklirjar singoli (u l-affiljati tagħhom) f’kundizzjonijiet tas-suq estremi iżda plawżibbli; |
(h) |
l-ammont totali u għal kull munita tal-Unjoni ta’ riżorsi finanzjarji likwidi, għall-benefiċċju tas-CCP, separat skont it-tip ta’ riżorsi, inklużi depożiti ta’ flus, riżorsi impenjati jew mhux impenjati; |
(i) |
l-ammont ta’ riżorsi finanzjarji likwidi totali impenjati lis-CCP minn entitajiet stabbiliti fl-Unjoni jew li huma parti minn grupp soġġett għal superviżjoni konsolidata fl-Unjoni. |
2. Fejn japplika xi wieħed mill-indikaturi msemmija fl-Artikolu 6, l-ESMA, flimkien mal-elementi elenkati fil-paragrafu 1 ta’ dan l-Artikolu, għandha tivvaluta wkoll l-elementi li ġejjin:
(a) |
l-identità tal-fornituri tal-likwidità stabbiliti fl-Unjoni jew li jkunu parti minn grupp soġġett għal superviżjoni konsolidata fl-Unjoni; |
(b) |
il-valuri medji u massimi ta’ kuljum aggregati ta’ pagamenti deħlin u ħerġin f’munita tal-Unjoni; |
(c) |
il-punt sa fejn il-flus tal-bank ċentrali jintużaw għas-saldu u l-pagament jew jekk entitajiet oħra jintużawx għas-saldu jew għall-pagament; |
(d) |
il-punt sa fejn is-CCP tapplika teknoloġiji bħal teknoloġija tar-reġistru distribwit fil-proċess tas-saldu/tal-pagament tagħha; |
(e) |
il-pjan ta’ rkupru tas-CCP; |
(f) |
ir-reġim ta’ riżoluzzjoni applikabbli għas-CCP; |
(g) |
jekk ġiex stabbilit grupp ta’ ġestjoni tal-kriżijiet għal dik is-CCP. |
Artikolu 3
L-istruttura tas-sħubija tal-ikklirjar tas-CCP
1. Meta jitqies il-kriterju stabbilit fil-punt (c) tal-Artikolu 25(2a) tar-Regolament (UE) Nru 648/2012, l-ESMA għandha tivvaluta dan li ġej:
(a) |
is-sħubija ta’ kklirjar u, meta l-informazzjoni tkun disponibbli, jekk il-klijenti jew klijenti indiretti, stabbiliti fl-Unjoni jew li jkunu parti minn grupp soġġett għal superviżjoni konsolidata fl-Unjoni jkunux qed jużaw is-servizzi ta’ kklirjar tas-CCP u f’dan il-każ liema klijenti; kif ukoll |
(b) |
l-opzjonijiet differenti disponibbli biex jiġu aċċessati s-servizzi tal-ikklirjar tas-CCP (inklużi mudelli differenti ta’ sħubija u ta’ aċċess dirett għall-klijenti), kull kundizzjoni għall-għoti, iċ-ċaħda jew it-terminazzjoni tal-aċċess. |
2. Meta japplika xi wieħed mill-indikaturi msemmija fl-Artikolu 6, l-ESMA, flimkien mal-elementi elenkati fil-paragrafu 1 ta’ dan l-Artikolu, għandha speċifikament tivvaluta kull rekwiżit ġuridiku jew prudenzjali impost mis-CCP fuq il-membri tal-ikklirjar biex jaċċessaw is-servizzi tal-ikklirjar tagħha.
Artikolu 4
Servizzi ta’ kklirjar alternattivi pprovduti minn CCPs oħra
1. Meta tqis il-kriterju stabbilit fil-punt (d) tal-Artikolu 25(2a) tar-Regolament (UE) Nru 648/2012, l-ESMA għandha tivvaluta jekk il-membri tal-ikklirjar u l-klijenti stabbiliti fl-Unjoni jistgħux jaċċessaw uħud mis-servizzi tal-ikklirjar jew is-servizzi kollha tal-ikklirjar ipprovduti minn CCP permezz ta’ CCPs oħrajn u jekk dawn is-CCPs ikunux awtorizzati jew rikonoxxuti skont l-Artikoli 14 u 25 ta’ dak ir-Regolament.
2. Meta japplika xi wieħed mill-indikaturi msemmija fl-Artikolu 6, l-ESMA, flimkien mal-elementi elenkati fil-paragrafu 1 ta’ dan l-Artikolu, għandha tivvaluta wkoll jekk is-servizzi pprovduti mis-CCP jkunux relatati ma’ klassi ta’ derivattivi soġġetta għall-obbligu tal-ikklirjar skont l-Artikolu 4 tar-Regolament (UE) Nru 648/2012.
Artikolu 5
Ir-relazzjoni, l-interdipendenzi, jew interazzjonijiet oħra tas-CCP
1. Meta tqis il-kriterju stabbilit fil-punt (e) tal-Artikolu 25(2a) tar-Regolament (UE) Nru 648/2012, l-ESMA għandha tivvaluta l-ambitu ta’ funzjonijiet, servizzi jew attivitajiet li jkunu ġew esternalizzati mis-CCP.
2. Meta japplika xi wieħed mill-indikaturi msemmija fl-Artikolu 6, l-ESMA, flimkien mal-elementi elenkati fil-paragrafu 1 ta’ dan l-Artikolu, għandha tivvaluta wkoll l-elementi li ġejjin:
(a) |
l-effetti possibbli li jista’ jkun hemm fuq l-Unjoni jew fuq wieħed jew aktar mill-Istati Membri tagħha meta l-fornitur ta’ funzjonijiet, servizzi jew attivitajiet esternalizzati ma jkunx kapaċi jikkonforma mal-obbligi tiegħu skont l-arranġamenti ta’ esternalizzazzjoni; |
(b) |
jekk is-CCP isservix ċentri tan-negozjar stabbiliti fl-Unjoni; |
(c) |
jekk is-CCP għandhiex arranġamenti ta’ interoperabilità jew ftehimiet ta’ marġinazzjoni inkroċjata ma’ CCPs stabbiliti fl-Unjoni, jew rabtiet ma’ infrastrutturi oħra tas-suq finanzjarju li jinsabu fl-Unjoni jew parteċipazzjoni fihom, bħalma huma d-Depożitarji Ċentrali tat-Titoli jew is-sistemi ta’ pagament. |
Artikolu 6
Indikaturi tal-iskopertura minima tal-membri tal-ikklirjar u l-klijenti stabbiliti fl-Unjoni għas-CCP
1. L-indikaturi għall-finijiet tal-Artikoli minn 1 sa 5 huma dawn li ġejjin:
(a) |
l-interess miftuħ massimu tat-tranżazzjonijiet ta’ titoli, inklużi t-tranżazzjonijiet ta’ finanzjament tat-titoli, jew l-iskambju ta’ derivattivi nnegozjati f’muniti tal-Unjoni kklirjati mis-CCP fuq perjodu ta’ sena qabel il-valutazzjoni jew maħsuba li jiġu kklirjati mis-CCP fuq perjodu ta’ sena wara li tkun saret il-valutazzjoni jkun ta’ aktar minn EUR 1000 biljun; |
(b) |
in-nozzjonal massimu pendenti ta’ tranżazzjonijiet ta’ derivattivi barra l-borża denominati f’muniti tal-Unjoni kklirjati mis-CCP fuq perjodu ta’ sena qabel il-valutazzjoni jew maħsuba li jiġu kklirjati mis-CCP fuq perjodu ta’ sena wara li tkun saret il-valutazzjoni jkun ta’ aktar minn EUR 1000 biljun; |
(c) |
ir-rekwiżit tal-marġni aggregat medju u l-kontribuzzjonijiet għall-fond tal-inadempjenza għall-kontijiet miżmuma għand is-CCP minn membri tal-ikklirjar li jkunu entitajiet stabbiliti fl-Unjoni jew ikunu parti minn grupp soġġett għal superviżjoni konsolidata fl-Unjoni, ikkalkulat mis-CCP fuq bażi netta fil-livell tal-kont tal-membri tal-ikklirjar fuq perjodu ta’ sentejn qabel il-valutazzjoni jkun ta’ aktar minn EUR 25 biljun; |
(d) |
l-akbar obbligu ta’ pagament stmat imwettaq minn entitajiet stabbiliti fl-Unjoni jew li jkunu parti minn grupp soġġett għal superviżjoni konsolidata fl-Unjoni, u kkalkulat fuq perjodu ta’ sena qabel il-valutazzjoni, li jirriżulta mill-inadempjenza ta’ mill-inqas tnejn mill-akbar membri tal-ikklirjar singoli u l-affiljati tagħhom, f’kundizzjonijiet tas-suq estremi iżda plawżibbli jkun ta’ aktar minn EUR 3 biljun. |
Għall-finijiet tal-punt (d), l-obbligu ta’ pagament għandu jaggrega l-impenji fil-muniti kollha tal-Unjoni kkonveriti f’EUR kif meħtieġ.
2. L-ESMA tista’ tiddetermina biss, abbażi tal-kriterji speċifikati fl-Artikoli minn 1 sa 5, li CCP ta’ pajjiż terz tkun CCP ta’ Grad 2 meta tal-inqas wieħed mill-indikaturi fil-paragrafu 1 ikun issodisfat.
Artikolu 7
Dħul fis-seħħ
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-14 ta’ Lulju 2020.
Għall-Kummissjoni
Il-President
Ursula VON DER LEYEN
(1) ĠU L 201, 27.7.2012, p. 1.
(2) Ir-Regolament (UE) 2019/2099 tal-Parlament Ewropew u tal-Kunsill tat-23 ta’ Ottubru 2019 li jemenda r-Regolament (UE) Nru 648/2012 fir-rigward tal-proċeduri u l-awtoritajiet involuti għall-awtorizzazzjoni ta’ CCPs u r-rekwiżiti għar-rikonoxximent ta’ CCPs ta’ pajjiżi terzi (ĠU L 322, 12.12.2019, p. 1).
(3) Ir-Regolament (UE) 2015/2365 tal-Parlament Ewropew u tal-Kunsill tal-25 ta’ Novembru 2015 dwar it-trasparenza ta’ transazzjonijiet ta’ finanzjament tat-titoli u l-użu mill-ġdid u li jemenda r-Regolament (UE) Nru 648/2012 (ĠU L 337, 23.12.2015, p. 1).
(4) Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349).