(1)

Is-settur tas-sajd u tal-akkwakultura ntlaqat partikularment ħażin mit-tfixkil fis-suq li nqala’ minħabba t-tnaqqis sinifikanti li kien hemm fid-domanda minħabba t-tifqigħa ta’ COVID-19. L-għeluq tal-postijiet tal-bejgħ, tas-swieq, tal-ħwienet u tal-mezzi ta’ distribuzzjoni wassal għal tnaqqis sostanzjali fil-prezzijiet u fil-volumi. It-tnaqqis fid-domanda u fil-prezzijiet, flimkien mal-vulnerabbiltà tal-katina tal-provvista u mal-kumplessità tagħha, wassal biex l-attivitajiet tal-flotot tas-sajd u tal-produzzjoni tal-frott tal-baħar jagħmlu t-telf. B’hekk, is-sajjieda ġew obbligati li jibqgħu fil-portijiet u dawk li jrabbu l-ħut se jkollhom jarmu l-prodotti tagħhom jew jeqirduhom fi żmien ftit ġimgħat.

(2)

Jenħtieġ li l-Fond Ewropew għall-Affarijiet Marittimi u s-Sajd (FEMS), li ġie stabbilit bir-Regolament (UE) Nru 508/2014 tal-Parlament Ewropew u tal-Kunsill (2), ikun jista’ jappoġġa miżuri speċifiċi sal-31 ta’ Diċembru 2020 biex jittaffa l-impatt tat-tifqigħa ta’ COVID-19 fuq is-settur tas-sajd u tal-akkwakultura. Jenħtieġ li dawk il-miżuri jkunu jinkludu l-għoti ta’ appoġġ għall-waqfien temporanju mill-attivitajiet tas-sajd, fosthom tas-sajd f'ilmijiet interni u ta' sajjieda li jistadu bil-wieqfa, u għal ċertu telf ekonomiku għal produtturi fl-akkwakultura u intrapriżi ta' pproċessar u fir-reġjuni ultraperiferiċi, sakemm dawn iseħħu minħabba t-tifqigħa ta’ COVID-19. Jenħtieġ li dawk il-miżuri jkunu jinkludu wkoll l-għoti ta’ kapital operatorju lil produtturi fl-akkwakultura u intrapriżi ta' pproċessar u appoġġ lill-organizzazzjonijiet tal-produtturi u lill-assoċjazzjonijiet tal-organizzazzjonijiet tal-produtturi għall-ħżin tal-prodotti tas-sajd u tal-akkwakultura skont ir-Regolament (UE) Nru 1379/2013 tal-Parlament Ewropew u tal-Kunsill (3). Jenħtieġ li n-nefqa għall-attivitajiet appoġġati fil-kuntest ta’ dawk il-miżuri tkun eliġibbli mill-1 ta’ Frar 2020.

(3)

Jenħtieġ li r-riżorsi li huma disponibbli għall-impenji min-naħa tal-FEMS taħt ġestjoni kondiviża jinqasmu b’tali mod li jiżgura li jkunu stabbiliti ammonti fissi għall-kontroll tas-sajd u għall-ġbir ta' data xjentifika, filwaqt li jkun permess li 10 % ta' dawk l-ammonti jintużaw għal miżuri relatati mal-mitigazzjoni tat-tifqigħa ta’ COVID-19, u għall-kumpens għal spejjeż addizzjonali fir-reġjuni ultraperiferiċi. Jenħtieġ li r-riżorsi l-oħrajn taħt ġestjoni kondiviża jiġu allokati mill-Istati Membri skont il-ħtiġijiet tagħhom.

(4)

Minħabba l-konsegwenzi soċjoekonomiċi sinifikanti tat-tifqigħa ta’ COVID-19 u l-bżonn ta’ likwidità fl-ekonomija, jenħtieġ li l-waqfien temporanju mill-attivitajiet tas-sajd minħabba t-tifqigħa ta’ COVID-19 ikun jista’ jiġi appoġġat b’rata massima ta’ kofinanzjament ta’ 75 % tan-nefqa pubblika eliġibbli.

(5)

Minħabba l-ħtieġa ta’ flessibbiltà fl-allokazzjoni mill-ġdid tar-riżorsi finanzjarji biex jiġu indirizzati l-konsegwenzi tat-tifqigħa ta’ COVID-19, jenħtieġ li ma jkunx hemm impost limitu massimu finanzjarju fuq il-forniment ta’ appoġġ li jingħata għall-waqfien temporanju mill-attivitajiet tas-sajd minħabba dik it-tifqigħa. Jenħtieġ li dan ikun mingħajr preġudizzju għal-limitu massimu finanzjarju eżistenti impost għall-każijiet l-oħrajn ta’ waqfien temporanju mill-attivitajiet tas-sajd. Jenħtieġ li jkompli japplika l-obbligu li l-appoġġ li jingħata għall-waqfien temporanju jitnaqqas mill-appoġġ li jingħata għall-waqfien permanenti mill-attivitajiet tas-sajd għall-istess bastiment. Għal miżuri relatati mal-mitigazzjoni tat-tifqigħa ta’ COVID-19, jenħtieġ li r-rekwiżit tal-attività għal 120 jum jitnaqqas b'mod proporzjonali għal sidien ta' bastimenti reġistrati għal inqas minn sentejn u għal sajjieda li bdew jaħdmu inqas minn sentejn qabel l-applikazzjoni għal appoġġ.

(6)

Minħabba l-urġenza li jingħata l-appoġġ meħtieġ, jenħtieġ li l-kamp ta’ applikazzjoni tal-proċedura ssimplifikata jkun jista’ jiġi estiż biex ikun jinkludi l-emendi fil-programmi operazzjonali marbutin mal-miżuri speċifiċi u l-allokazzjoni mill-ġdid tar-riżorsi finanzjarji allokati għalihom biex jiġu indirizzati l-konsegwenzi tat-tifqigħa ta’ COVID-19. Jenħtieġ li dik il-proċedura ssimplifikata tkun tkopri l-emendi kollha meħtieġa biex jiġu implimentati bis-sħiħ il-miżuri kkonċernati, fosthom l-introduzzjoni tagħhom u d-deskrizzjoni tal-metodi biex jiġi kkalkulat l-appoġġ.

(7)

Minħabba r-rwol ewlieni li għandhom l-organizzazzjonijiet tal-produtturi fil-ġestjoni tal-kriżi, jenħtieġ li l-limitu massimu għall-appoġġ għall-pjanijiet ta’ produzzjoni u ta’ kummerċjalizzazzjoni jiżdied għal 12 % tal-valur annwali medju tal-produzzjoni li titqiegħed fis-suq. Jenħtieġ ukoll li l-Istati Membri jkunu jistgħu jagħtu pagamenti bil-quddiem sa 100 % tal-appoġġ finanzjarju lill-organizzazzjonijiet tal-produtturi għal dak l-appoġġ.

(8)

Minħabba t-tfixkil għall-għarrieda fl-attivitajiet tas-sajd u tal-akkwakultura li kien hemm minħabba t-tifqigħa ta’ COVID-19, u r-riskju li ġej minnu ta’ theddid għas-swieq tal-prodotti tas-sajd u tal-akkwakultura, huwa xieraq li jiġi stabbilit mekkaniżmu għall-ħżin tal-prodotti tas-sajd u tal-akkwakultura maħsubin għall-konsum mill-bniedem. Dan se jkollu l-għan li jżid l-istabbiltà fis-suq, li jtaffi r-riskju li t-tali prodotti jintremew jew jintużaw għal għanijiet oħrajn minflok bħala ikel għall-bnedmin, u li jikkontribwixxi biex jitnaqqas l-impatt tal-kriżi fuq il-qligħ minn fuq dawn il-prodotti. Jenħtieġ li dak il-mekkaniżmu jkun jippermetti lill-produtturi fil-qasam tas-sajd u tal-akkwakultura jużaw l-istess tekniki ta’ preservazzjoni jew ta’ konservazzjoni għal speċijiet simili biex ikun żgurat li tinżamm il-kompetizzjoni ġusta bejn il-produtturi.

(9)

Minħabba li d-domanda għall-prodotti tas-sajd u tal-akkwakultura naqset ħafna għall-għarrieda minħabba t-tifqigħa ta’ COVID-19, jenħtieġ li l-kwantitajiet eliġibbli għall-għajnuna għall-ħżin ikunu jistgħu jiżdiedu għal 25 % tal-kwantitajiet annwali tal-prodotti kkonċernati li jitqiegħdu għall-bejgħ mill-organizzazzjoni tal-produtturi kkonċernata.

(10)

Sabiex l-Istati Membri jkunu jistgħu jirreaġixxu mill-ewwel għat-tifqigħa għall-għarrieda u mhux prevedibbli tal-COVID-19, jenħtieġ li jkollhom id-dritt jistabbilixxu prezzijiet skattaturi għall-organizzazzjonijiet tal-produtturi tagħhom biex jiskattaw il-mekkaniżmu tal-ħżin. Jenħtieġ li dawk il-prezzijiet skattaturi jiġu stabbiliti b’tali mod li tinżamm il-kompetizzjoni ġusta bejn l-operaturi.

(11)

L-appoġġ mill-FEMS jenħtieġ li jkun disponibbli wkoll għal miżuri biex jikkumpensaw għat-telf ekonomiku li jirriżulta mit-tifqigħa ta’ COVID-19 għal operaturi fis-sajd, il-farming, l-ipproċessar u l-kummerċjalizzazzjoni ta' ċerti prodotti tas-sajd u tal-akkwakultura mir-reġjuni ultraperiferiċi, b'mod partikolari dak li jirriżulta mid-deterjorament fil-prezz tal-ħut jew minn żieda fl-ispejjeż ta' ħżin. Jenħtieġ li l-Kummissjoni tapprova, mingħajr dewmien, tali miżuri proposti mill-Istati Membri.

(12)

Minħabba li l-għan ta’ dan ir-Regolament, jiġifieri biex jittaffa l-impatt soċjali u ekonomiku tat-tifqigħa ta’ COVID-19 fuq is-settur tas-sajd u tal-akkwakultura, ma jistax jinkiseb b’mod suffiċjenti mill-Istati Membri iżda pjuttost jista’, minħabba l-iskala u l-effetti tal-azzjoni proposta, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea (‘TUE’). F’konformità mal-prinċipju ta’ proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak il-għan.

(13)

Minħabba l-urġenza li jingħata l-appoġġ meħtieġ, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(14)

Fid-dawl tat-tifqigħa ta’ COVID-19 u l-urġenza biex jiġi indirizzat l-impatt soċjali u ekonomiku tagħha fuq is-settur tas-sajd u tal-akkwakultura, tqies li huwa xieraq li tiġi prevista eċċezzjoni għall-perijodu ta’ tmien ġimgħat imsemmi fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, anness mat-TUE, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea għall-Enerġija Atomika.

(15)

Għalhekk jenħtieġ li r-Regolamenti (UE) Nru 508/2014 u (UE) Nru 1379/2013 jiġu emendati skont dan,