(1)

Id-Direttiva 2009/16/KE tal-Parlament Ewropew u tal-Kunsill (1) tistabbilixxi r-reġim legali tal-Unjoni dwar il-kontroll mill-Istat tal-port, filwaqt li tifformula mill-ġdid u ssaħħaħ il-leġislazzjoni preċedenti tal-Unjoni li ilha fis-seħħ f'dan il-qasam mill-1995. Ir-reġim legali tal-Unjoni dwar il-kontroll mill-Istat tal-port huwa bbażat fuq il-Memorandum ta' Qbil ta' Pariġi dwar il-Kontroll mill-Istat tal-Port (il-"MtQ ta' Pariġi"), li ġie ffirmat f'Pariġi fis-26 ta' Jannar 1982.

(2)

Fir-rigward tal-Istati Membri tal-Unjoni, id-Direttiva 2009/16/KE ġġib b'mod effettiv il-proċeduri, l-istrumenti u l-attivitajiet tal-MtQ ta' Pariġi fil-kamp ta' applikazzjoni tal-liġi tal-Unjoni. Bis-saħħa ta' dik id-Direttiva, ċerti deċiżjonijiet meħuda mill-Kumitat tal-Kontroll mill-Istat tal-Port stabbilit taħt it-Taqsima 7 tal-MtQ ta' Pariġi ("PSCC") isiru vinkolanti għall-Istati Membri tal-Unjoni.

(3)

Il-PSCC jiltaqa' kull sena. Matul id-deliberazzjonijiet tiegħu jiddeċiedi dwar ċerti kwistjonijiet li jkollhom effetti legali.

(4)

Skont l-Artikolu 218(9) tat-Trattat dwar il-Funzjonament tal-Unjoni Ewropea (TFUE), il-pożizzjoni li għandha tiġi adottata f'isem l-Unjoni f'korp stabbilit bi ftehim, meta dak il-korp jiġi biex jadotta atti li jkollhom effetti legali, għandha tiġi adottata permezz ta' Deċiżjoni tal-Kunsill, fuq proposta mill-Kummissjoni.

(5)

Ir-regoli interni tal-MtQ ta' Pariġi jagħmluha diffiċli li tiġi stabbilita pożizzjoni li għandha tiġi adottata f'isem l-Unjoni f'konformità mal-Artikolu 218(9) TFUE b'mod f'waqtu għal kull laqgħa annwali tal-PSCC. Għalhekk ikun effiċjenti li tali pożizzjoni tiġi stabbilita fuq bażi multiannwali u li tkun tikkonsisti minn prinċipji gwida u orjentazzjonijiet, flimkien ma' qafas għall-ispeċifikazzjonijiet tagħha minn sena għall-oħra. Barra minn hekk, ħafna mis-suġġetti li jiġu diskussi fil-laqgħat annwali tal-PSCC jikkonċernaw kwistjonijiet ta' kontroll mill-Istat tal-port li ġeneralment huma koperti minn att legali uniku tal-Unjoni, jiġifieri d-Direttiva 2009/16/KE. Għaldaqstant, fiċ-ċirkostanzi partikolari li japplikaw għall-MtQ ta' Pariġi, huwa possibbli li tiġi stabbilita pożizzjoni ġenerali li għandha tiġi adottata f'isem l-Unjoni għal diversi laqgħat tal-PSCC.

(6)

L-Unjoni mhijiex parti kontraenti tal-MtQ ta' Pariġi. Huwa għalhekk neċessarju li l-Kunsill jawtorizza lill-Istati Membri biex jaġixxu f'konformità mal-pożizzjoni li għandha tiġi adottata f'isem l-Unjoni u biex jesprimu l-kunsens tagħhom li jintrabtu bid-deċiżjonijiet meħuda mill-PSCC.

(7)

Id-diskussjonijiet tekniċi u l-kooperazzjoni ma' pajjiżi terzi membri tal-MtQ ta' Pariġi fi ħdan il-PSCC huma ta' importanza kbira biex jiġu żgurati l-effettività u l-funzjonament tajjeb tal-MtQ ta' Pariġi.

(8)

Jenħtieġ li din id-Deċiżjoni tkopri l-perijodu mill-2020 sal-2024,