This document is an excerpt from the EUR-Lex website
Document 32019D2230
Council Implementing Decision (EU) 2019/2230 of 19 December 2019 amending Decision 2007/884/EC authorising the United Kingdom to continue to apply a measure derogating from Articles 26(1)(a), 168 and 169 of Directive 2006/112/EC on the common system of value added tax
Deċiżjoni ta’ Implimentazzjoni tal-Kunsill (UE) 2019/2230 tad-19 ta’ Diċembru 2019 li temenda d-Deċiżjoni 2007/884/KE li tawtorizza lir-Renju Unit ikompli japplika miżura ta’ deroga mill-Artikoli 26(1)(a), 168 u 169 tad-Direttiva 2006/112/KE dwar is-sistema komuni ta’ taxxa fuq il-valur miżjud
Deċiżjoni ta’ Implimentazzjoni tal-Kunsill (UE) 2019/2230 tad-19 ta’ Diċembru 2019 li temenda d-Deċiżjoni 2007/884/KE li tawtorizza lir-Renju Unit ikompli japplika miżura ta’ deroga mill-Artikoli 26(1)(a), 168 u 169 tad-Direttiva 2006/112/KE dwar is-sistema komuni ta’ taxxa fuq il-valur miżjud
ST/14088/2019/INIT
ĠU L 333, 27.12.2019, p. 146–148
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 31/12/2019
Relation | Act | Comment | Subdivision concerned | From | To |
---|---|---|---|---|---|
Modifies | 32007D0884 | Sostituzzjoni | artikolu 3 | 01/01/2020 |
27.12.2019 |
MT |
Il-Ġurnal Uffiċjali tal-Unjoni Ewropea |
L 333/146 |
DEĊIŻJONI TA’ IMPLIMENTAZZJONI TAL-KUNSILL (UE) 2019/2230
tad-19 ta’ Diċembru 2019
li temenda d-Deċiżjoni 2007/884/KE li tawtorizza lir-Renju Unit ikompli japplika miżura ta’ deroga mill-Artikoli 26(1)(a), 168 u 169 tad-Direttiva 2006/112/KE dwar is-sistema komuni ta’ taxxa fuq il-valur miżjud
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra d-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (1), u b’mod partikolari l-Artikolu 395(1) tagħha,
Wara li kkunsidra l-proposta mill-Kummissjoni Ewropea,
Billi:
(1) |
L-Artikoli 168 u 169 tad-Direttiva 2006/112/KE jistabbilixxu d-dritt ta’ persuni taxxabbli għat-tnaqqis tat-taxxa fuq il-valur miżjud (VAT) imposta fuq il-provvisti ta’ merkanzija u ta’ servizzi li jkunu rċevew u li jintużaw għall-finijiet tat-tranżazzjonijiet taxxabbli tagħhom jew għal ċerti finijiet oħra. Il-punt (a) tal-Artikolu 26(1) ta’ dik id-Direttiva jittratta dwar l-użu ta’ assi ta’ negozju għall-użu privat ta’ persuni taxxabbli jew tal-persunal tagħhom jew, b’mod aktar ġenerali, għal finijiet minbarra dawk tan-negozju tagħhom bħala provvista ta’ servizzi bi ħlas. |
(2) |
Id-Deċiżjoni tal-Kunsill 2007/884/KE (2) tawtorizza lir-Renju Unit jirrestrinġi sal-50 % d-dritt tal-kerrej jew tal-lessee ta’ karozza biex inaqqas il-VAT taħt l-Artikolu 168 jew 169 tad-Direttiva 2006/112/KE fuq il-kiri jew il-leasing ta’ karozza f’każ li l-karozza ma tintużax esklussivament għall-finijiet ta’ negozju. Hija tawtorizza wkoll lir-Renju Unit biex ma jittrattax bħala provvista ta’ servizzi bi ħlas l-użu privat ta’ karozza użata għall-finijiet ta’ negozju mikrija jew leased minn persuna taxxabbli. Dawk il-miżuri (il-“miżuri ta’ deroga”) jneħħu l-ħtieġa li l-kerrej jew il-lessee ta’ karozza użata għall-finijiet ta’ negozju jżomm rekords tal-kilometraġġ privat magħmul f’dik il-karozza jew li jġarrab il-VAT fuq il-kilometraġġ privat fattwalment magħmul f’dik il-karozza. Id-Deċiżjoni 2007/884/KE tiskadi fil-31 ta’ Diċembru 2019. |
(3) |
Permezz ta’ ittra rreġistrata mal-Kummissjoni fit-2 ta’ April 2019, ir-Renju Unit talab awtorizzazzjoni biex ikompli japplika l-miżuri ta’ delega awtorizzati bid-Deċiżjoni 2007/884/KE. |
(4) |
Permezz tal-ittra bid-data tad-29 ta’ April 2019, il-Kummissjoni infurmat lill-Istati Membri l-oħra skont l-Artikolu 395(2) tad-Direttiva 2006/112/KE bit-talba li għamel ir-Renju Unit. Permezz tal-ittra bid-data tat-2 ta’ Mejju 2019, il-Kummissjoni nnotifikat lir-Renju Unit li hija kellha l-informazzjoni kollha meħtieġa biex tikkunsidra t-talba. |
(5) |
Fid-29 ta’ Marzu 2017, ir-Renju Unit tal-Gran Brittanja u l-Irlanda ta’ Fuq (ir-’’Renju Unit’’) ippreżenta n-notifika tal-intenzjoni tiegħu li joħroġ mill-Unjoni skont l-Artikolu 50 tat-Trattat dwar l-Unjoni Ewropea (TUE). Taħt l-Artikolu 50(3) TUE, it-Trattati jieqfu japplikaw għar-Renju Unit mid-data tad-dħul fis-seħħ ta’ ftehim dwar il-ħruġ jew, jekk dan ma jintlaħaqx, sentejn wara dik in-notifika, sakemm il-Kunsill Ewropew, bi ftehim mar-Renju Unit, ma jiddeċidix b’mod unanimu li jestendi dak il-perijodu. Wara li laħaq qbil dwar l-ewwel estensjoni fit-22 ta’ Marzu 2019, u t-tieni estensjoni fil-11 ta’ April 2019, il-Kunsill Ewropew adotta d-Deċiżjoni (UE) 2019/1810 (3) fid-29 ta’ Ottubru 2019, li fiha qabel, wara talba ulterjuri mir-Renju Unit, li jestendi l-perijodu previst fl-Artikolu 50(3) TUE sal-31 ta’ Jannar 2020. |
(6) |
F’konformità mal-Artikolu 50 TUE, l-Unjoni Ewropea nnegozjat mar-Renju Unit ftehim li jistabbilixxi l-arranġamenti għall-ħruġ tiegħu, b’kont meħud tal-qafas għar-relazzjoni futura tiegħu mal-Unjoni (’’Ftehim dwar il-Ħruġ’’). Fil-11 ta’ Jannar 2019, il-Kunsill adotta d-Deċiżjoni (UE) 2019/274 dwar l-iffirmar tal-Ftehim dwar il-Ħruġ (4). Wara negozjati ulterjuri bejn in-negozjaturi tal-Unjoni u dawk tar-Renju Unit matul ix-xhur ta’ Settembru u Ottubru 2019, intlaħaq qbil dwar test rivedut tal-Ftehim dwar il-Ħruġ, li ġie approvat mill-Kunsill Ewropew fis-17 ta’ Ottubru 2019. Fil-21 ta’ Ottubru 2019, il-Kunsill adotta d-Deċiżjoni (UE) 2019/1750 dwar l-iffirmar tal-Ftehim dwar il-Ħruġ (5). Ir-Raba’ Parti tal-Ftehim dwar il-Ħruġ (6) tipprevedi perijodu ta’ tranżizzjoni li jibda mid-data tad-dħul fis-seħħ tal-Ftehim dwar il-Ħruġ u li jintemm fil-31 ta’ Diċembru 2020. Matul il-perijodu ta’ tranżizzjoni, u sakemm il-Ftehim dwar il-Ħruġ ma jipprevedix mod ieħor, il-liġi tal-Unjoni għandha tkompli tapplika għar-Renju Unit, u fir-Renju Unit. |
(7) |
Din id-Deċiżjoni għandha, fi kwalunkwe każ, tieqaf milli tapplika għar-Renju Unit, u fir-Renju Unit, mill-jum wara dak li fih it-Trattati ma jibqgħux japplikaw għar-Renju Unit skont l-Artikolu 50(3) TUE, jew, jekk ikun daħal fis-seħħ ftehim dwar il-ħruġ konkluż mar-Renju Unit f’konformità mal-Artikolu 50(2) TUE, mill-jum wara dak li fih jintemm il-perijodu ta’ tranżizzjoni, jew fil-31 ta’ Diċembru 2022, skont liema minnhom tiġi l-ewwel. |
(8) |
Flimkien mat-talba tiegħu, ir-Renju Unit ippreżenta rapport lill-Kummissjoni f’konformità mat-tieni paragrafu tal-Artikolu 3 tad-Deċiżjoni 2007/884/KE li jinkludi reviżjoni tal-persentaġġ tar-restrizzjoni applikata fuq id-dritt għal tnaqqis tal-VAT. L-informazzjoni pprovduta mir-Renju Unit turi li persentaġġ ta’ restrizzjoni ta’ 50 % tibqa’ riflessjoni ġusta taċ-ċirkostanzi reali fir-rigward tal-proporzjon ta’ użu għall-finijiet ta’ negozju ma’ dak mhux għall-finijiet ta’ negozju tal-vetturi affettwati mill-miżuri ta’ deroga. Madankollu, jenħtieġ li l-estensjoni tal-miżuri ta’ deroga tkun limitata għaż-żmien meħtieġ biex tiġi evalwata l-effettività tal-miżuri ta’ deroga u l-adegwatezza tal-persentaġġ. Għalhekk jenħtieġ li r-Renju Unit ikun awtorizzat ikompli japplika l-miżuri ta’ deroga għal perijodu ta’ żmien limitat. |
(9) |
Jenħtieġ li tiġi stabbilita data ta’ skadenza biex tintalab awtorizzazzjoni għal kwalunkwe estensjoni ulterjuri tal-miżuri ta’ deroga wara l-2022, jekk applikabbli. Jenħtieġ li r-Renju Unit ikun meħtieġ ukoll jippreżenta rapport flimkien ma’ kwalunkwe tali talba għal estensjoni, inkluża reviżjoni tal-persentaġġ tar-restrizzjoni applikata fuq id-dritt għat-tnaqqis tal-VAT. |
(10) |
Il-miżuri ta’ deroga mhuma ser ikollhom l-ebda impatt negattiv fuq ir-riżorsi proprji tal-Unjoni derivati mill-VAT. |
(11) |
Għalhekk, jenħtieġ li d-Deċiżjoni 2007/884/KE tiġi emendata skont dan, |
ADOTTA DIN ID-DEĊIŻJONI:
Artikolu 1
L-Artikolu 3 tad-Deċiżjoni 2007/884/KE huwa sostitwit b’dan li ġej:
‘Artikolu 3
Din id-Deċiżjoni għandha tiskadi fil-jum wara dak li fih it-Trattati jieqfu japplikaw għar-Renju Unit skont l-Artikolu 50(3) TUE, jew, jekk ikun daħal fis-seħħ ftehim dwar il-ħruġ konkluż mar-Renju Unit f’konformità mal-Artikolu 50(2) TUE, mill-jum wara dak li fih jintemm il-perijodu ta’ tranżizzjoni, jew fil-31 ta’ Diċembru 2022, skont liema jiġi l-ewwel.
Kwalunkwe talba għall-awtorizzazzjoni ta’ estensjoni tal-miżuri ta’ deroga awtorizzati b’din id-Deċiżjoni, jekk applikabbli, għandha tiġi ppreżentata lill-Kummissjoni sal-1 ta’ April 2022. It-talba għandha tkun akkumpanjata minn rapport li jinkludi reviżjoni tal-persentaġġ tar-restrizzjoni applikata fuq id-dritt għal tnaqqis tal-VAT fuq l-ispejjeż ta’ kiri jew lease ta’ karozzi li ma jintużawx esklussivament għall-finijiet ta’ negozju.’.
Artikolu 2
Din id-Deċiżjoni għandha ssir effettiva fid-data tan-notifika tagħha.
Din id-Deċiżjoni għandha tapplika mill-1 ta’ Jannar 2020.
Artikolu 3
Din id-Deċiżjoni hija indirizzata lir-Renju Unit tal-Gran Brittanja u l-Irlanda ta’ Fuq.
Magħmul fi Brussell, id-19 ta’ Diċembru 2019.
Għall-Kunsill
Il-President
K. MIKKONEN
(1) ĠU L 347, 11.12.2006, p. 1.
(2) Id-Deċiżjoni tal-Kunsill 2007/884/KE tal-20 ta’ Diċembru 2007 li tawtorizza lir-Renju Unit ikompli japplika miżura ta’ deroga mill-Artikoli 26(1)(a), 168 u 169 tad-Direttiva 2006/112/KE dwar is-sistema komuni ta’ taxxa fuq il-valur miżjud (ĠU L 346, 29.12.2007, p. 21).
(3) Id-Deċiżjoni tal-Kunsill Ewropew (UE) 2019/1810 meħuda bi qbil mar-Renju Unit tad-29 ta’ Ottubru 2019 li testendi l-perijodu taħt l-Artikolu 50(3) TUE (ĠU L 278 I, 30.10.2019, p. 1).
(4) Id-Deċiżjoni tal-Kunsill (UE) 2019/274 tal-11 ta’ Jannar 2019 dwar l-iffirmar, f’isem l-Unjoni Ewropea u l-Komunità Ewropea tal-Enerġija Atomika, tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill- Komunità Ewropea tal-Enerġija Atomika (ĠU L 47 I, 19.2.2019, p. 1).
(5) Id-Deċiżjoni tal-Kunsill (UE) 2019/1750 tal-21 ta’ Ottubru 2019 li temenda d-Deċiżjoni (UE) 2019/274 dwar l-iffirmar, f’isem l-Unjoni Ewropea u l-Komunità Ewropea tal-Enerġija Atomika, tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (ĠU L 274 I, 28.10.2019, p. 1).
(6) Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika, (ĠU C 384 I, 12.11.2019, p. 1).