22.3.2018   

MT

Il-Ġurnal Uffiċjali tal-Unjoni Ewropea

L 79/55

(1)

Permezz tad-Deċiżjoni 96/228/KE (1), il-Kummissjoni kienet approvat l-iskema ta' għajnuna nazzjonali fit-tul għall-agrikoltura fir-reġjuni tat-Tramuntana tal-Iżvezja (“l-iskema tal-għajnuna Nordika”) kif innotifikat mill-Iżvezja skont l-Artikolu 143 tal-Att tal-Adeżjoni fir-rigward tal-awtorizzazzjoni skont l-Artikolu 142 tal-Att tal-Adeżjoni. Id-Deċiżjoni 96/228/KE ġiet sostitwita bid-Deċiżjoni tal-Kummissjoni C(2010) 6050 (2). Dik id-Deċiżjoni ġiet emendata l-aħħar bid-Deċiżjoni ta' Implimentazzjoni tal-Kummissjoni C(2015)6592 (3).

(2)

Permezz ta' ittra tas-17 ta' Novembru 2017, l-Iżvezja pproponiet li l-Kummissjoni temenda d-Deċiżjoni C(2010) 6050 sabiex tiġi ssimplifikata l-amministrazzjoni tal-iskema u biex jitqies it-tibdil fil-politika agrikola komuni, kif ukoll l-iżviluppi ekonomiċi fl-agrikoltura fir-reġjuni tat-Tramuntana tal-Iżvezja. Fis-6 ta' Diċembru 2017, l-Iżvezja bagħtet iktar informazzjoni dwar il-proposta lill-Kummissjoni.

(3)

Minħabba l-emendi li saru fid-Deċiżjoni C(2010) 6050 u l-għadd ta' emendi preċedenti, jixraq li dik id-Deċiżjoni tiġi sostitwita b'Deċiżjoni ġdida.

(4)

L-għajnuna nazzjonali fit-tul imsemmija fl-Artikolu 142 tal-Att tal-Adeżjoni hija maħsuba biex tiżgura li l-attività agrikola tinżamm fir-reġjuni tat-Tramuntana kif determinat mill-Kummissjoni.

(5)

Meta jitqiesu l-fatturi msemmija fl-Artikolu 142(1) u (2) tal-Att tal-Adeżjoni, jixraq li jiġu speċifikati l-unitajiet amministrattivi, miġbura skont is-sottoreġjuni, li jinsabu fit-Tramuntana tat-62 parallel jew ħdejn dak il-parallel, u li huma milquta minn kundizzjonijiet klimatiċi komparabbli li jagħmlu l-attività agrikola partikolarment diffiċli. Dawn is-sottoreġjuni għandhom densità tal-popolazzjoni ta' 10 abitanti jew inqas għal kull kilometru kwadru, erja agrikola użata (EAU) meqjusa li jiffurmaw 10 % jew inqas tal-erja tas-superfiċje sħiħa tal-muniċipalità, u parti mill-EAU ta' 20 % jew inqas użata għal għelejjel li jinħartu maħsuba għall-konsum mill-bniedem. Is-sottoreġjuni mdawra minn oħrajn f'dawn iż-żoni jenħtieġ li jiġu inklużi, anki meta dawn ma jissodisfawx l-istess rekwiżiti.

(6)

Sabiex tiġi ffaċilitata l-amministrazzjoni tal-iskema u biex tiġi kkordinata ma' appoġġ skont ir-Regolament (UE) Nru 1305/2013 tal-Parlament Ewropew u tal-Kunsill (4), jixraq li fiż-żoni li jirċievu l-għajnuna skont din id-Deċiżjoni jiġu inklużi l-istess unitajiet muniċipali bħal dawk li jappartjenu għaż-żona delimitata skont it-tieni subparagrafu tal-Artikolu 32(2) tar-Regolament (UE) Nru 1305/2013 tal-Programm tal-Iżvilupp Rurali.

(7)

Bl-użu tal-istatistika nazzjonali disponibbli bħala bażi u bil-ħsieb li tiġi żgurata applikazzjoni uniformi tas-setturi kollha ta' produzzjoni, jenħtieġ li s-sena 1993 tkun il-perjodu referenzjarju li jrid jitqies fir-rigward tal-iżvilupp tal-produzzjoni agrikola u l-livell tal-appoġġ ġenerali.

(8)

Skont l-Artikolu 142 tal-Att tal-Adeżjoni, l-ammont totali tal-għajnuna mogħtija jenħtieġ li jkun biżżejjed biex tinżamm attività agrikola fir-reġjuni tat-Tramuntana tal-Iżvezja, iżda l-appoġġ ġenerali ma għandux jaqbeż il-livell tal-appoġġ waqt il-perjodu referenzjarju ta' qabel l-adeżjoni, li jrid jiġi stabbilit. Sabiex jingħata appoġġ skont l-Artikolu 142 tal-Att tal-Adeżjoni f'livell adegwat, filwaqt li jitqiesu l-ispejjeż tal-produzzjoni attwali mingħajr ma jinqabeż il-livell tal-appoġġ stabbilit waqt il-perjodu referenzjarju ta' qabel l-adeżjoni, jixraq li meta jiġi stabbilit il-livell massimu tal-għajnuna permess skont dak l-Artikolu, jitqies l-iżvilupp fl-indiċi tal-prezzijiet tal-konsumatur mill-1993 sal-2017 fl-Iżvezja.

(9)

Għaldaqstant, abbażi tad-dejta tal-2017 u meta jitqiesu l-perjodi tar-rapportar ta' ħames snin stabbiliti fl-Artikolu 143(2) tal-Att tal-Adeżjoni, jenħtieġ li l-ammont massimu ta' għajnuna annwali jiġi stabbilit għal SEK 422,92 miljun, ikkalkulat bħala medja fuq perjodu ta' ħames snin mill-1 ta' Jannar 2018 sal-31 ta' Diċembru 2022.

(10)

Sabiex tiġi ssimplifikata l-iskema tal-għajnuna Nordika u biex l-Iżvezja jkollha l-flessibilità biex l-għajnuna tingħata lil setturi ta' produzzjoni differenti, jenħtieġ li jiġi stabbilit ammont massimu ta' għajnuna medja annwali għall-appoġġ totali, inkluż appoġġ massimu separat għall-produzzjoni u t-trasport tal-ħalib tal-baqra bil-ħsieb li tiġi żgurata d-distribuzzjoni bilanċjata tal-appoġġ.

(11)

Jenħtieġ li din l-għajnuna tingħata kull sena abbażi tal-fatturi ta' produzzjoni (unitajiet ta' bhejjem u ettari), minbarra l-ħalib tal-baqra li jenħtieġ li jingħata abbażi tal-unitajiet ta' produzzjoni (kilogrammi) fi ħdan il-limiti totali stabbiliti b'din id-Deċiżjoni.

(12)

Bil-ħsieb li jiġu permessi reazzjonijiet rapidi għall-volatilità tal-prezzijiet tal-produzzjoni agrikola u li jinżammu l-attivitajiet agrikoli fir-reġjuni tat-Tramuntana tal-Iżvezja, jixraq li għal kull sena kalendarja, l-Iżvezja titħalla tistabbilixxi l-ammont tal-għajnuna għal kull settur fi ħdan kategorija ta' għajnuna u għal kull unità ta' produzzjoni.

(13)

Jenħtieġ li l-Iżvezja tiddistingwi l-għajnuna fir-reġjuni tat-Tramuntana tagħha u tistabbilixxi ammonti ta' għajnuna annwali skont is-severità tal-iżvantaġġi naturali u kriterji oġġettivi, trasparenti u ġustifikati oħra marbuta mal-għanijiet stipulati fit-tielet subparagrafu tal-Artikolu 142(3) tal-Att tal-Adeżjoni, li huma ż-żamma tal-produzzjoni primarja u l-iproċessar tradizzjonali adattati b'mod partikolari għall-kundizzjonijiet klimatiċi tar-reġjuni kkonċernati, it-titjib fl-istrutturi għall-produzzjoni, il-kummerċjalizzazzjoni u l-ipproċessar tal-prodotti agrikoli, li jiġi ffaċilitat id-disponiment ta' dawn il-prodotti, u li jiġi żgurat il-ħarsien tal-ambjent u l-konservazzjoni tal-pajżaġġ.

(14)

Jenħtieġ li l-għajnuna titħallas kull sena abbażi tan-numru attwali tal-fatturi ta' produzzjoni eliġibbli. Madankollu, jenħtieġ li l-Iżvezja titħalla tħallas l-għajnuna f'pagamenti kull xahar għall-ħalib tal-baqra, għat-tiġieġ tal-bajd u għall-ħnieżer għall-qatla, kif ukoll għat-trasport tal-ħalib tal-baqra. L-għajnuna għall-ħalib tal-baqra għandha tkun ibbażata fuq il-produzzjoni attwali sabiex tiġi żgurata l-kontinwità fil-produzzjoni.

(15)

Jenħtieġ li jiġi evitat ir-riskju li jingħata kumpens żejjed lill-prodotturi billi jiġu rkuprati pagamenti mhux dovuti mill-iktar fis u sa mhux aktar tard mill-1 ta' Ġunju tas-sena ta' wara.

(16)

Kif previst fl-Artikolu 142(2) tal-Att ta' Adeżjoni, jenħtieġ li l-għajnuna mogħtija skont din id-Deċiżjoni ma twassalx għal żieda fil-produzzjoni ġenerali meta mqabbla mal-livell ta' produzzjoni tradizzjonali fiż-żona koperta mill-iskema tal-għajnuna Nordika.

(17)

Għaldaqstant, hemm bżonn li jiġi stabbilit numru massimu annwali ta' fatturi ta' produzzjoni eliġibbli għal kull kategorija ta' għajnuna, u ammont massimu annwali eliġibbli għall-produzzjoni tal-ħalib tal-baqra, fl-istess livell jew inqas minn dak tal-perjodi referenzjarji.

(18)

Sabiex jiġu rispettati l-medji ta' ħames snin, meta n-numru ta' fatturi ta' produzzjoni f'kategorija, jew l-ammont ta' produzzjoni tal-ħalib tal-baqra, jaqbeż il-livell massimu f'sena partikolari, jenħtieġ li n-numru ta' fatturi ta' produzzjoni jew l-ammont ta' ħalib tal-baqra eliġibbli jitnaqqas b'numru korrispondenti ta' fatturi ta' produzzjoni fis-sena kalendarja ta' wara s-sena li jinqabeż l-ammont massimu, għajr għall-għajnuna għat-trasport tal-ħalib tal-baqra, għat-tiġieġ tal-bajd u għall-ħnieżer għall-qatla, u għall-ħalib tal-baqra li l-ammont eliġibbli għalihom jista' jitnaqqas b'ammont li jikkorrispondi għall-ammont żejjed fl-aħħar xahar tas-sena li fiha jinqabeż l-ammont massimu.

(19)

L-Iżvezja trid tagħti l-informazzjoni dwar l-implimentazzjoni u l-effetti tal-għajnuna lill-Kummissjoni, skont l-Artikolu 143(2) tal-Att tal-Adeżjoni. Sabiex jiġu vvalutati aħjar l-effetti fit-tul tal-għajnuna u bil-ħsieb li jiġu stabbiliti l-livelli tal-għajnuna bħala medji ta' ħames snin, huwa xieraq li jsir rapport fuq l-effetti soċjoekonomiċi tal-għajnuna kull ħames snin u jingħataw rapporti annwali li jkun fihom informazzjoni finanzjarja jew ta' implimentazzjoni oħra meħtieġa biex tiġi żgurata l-konformità mal-kundizzjonijiet stabbiliti f'din id-Deċiżjoni.

(20)

Huwa xieraq li jiġu speċifikati r-regoli applikabbli għall-emendi tal-iskema introdotti mill-Kummissjoni jew proposti mill-Iżvezja sabiex jitħarsu l-aspettattivi leġittimi tal-benefiċjarji tal-għajnuna u biex tiġi żgurata l-kontinwità tal-iskema ħalli jkunu jistgħu jiġu segwiti b'mod effiċjenti l-għanijiet tal-Artikolu 142 tal-Att tal-Adeżjoni.

(21)

Jenħtieġ li l-Iżvezja tiżgura li jittieħdu l-miżuri ta' kontroll xierqa fejn jidħlu l-benefiċjarji tal-għajnuna. Sa fejn huwa possibbli, jenħtieġ li dawk il-miżuri ta' kontroll ikunu allinjati ma' dawk imwettqa skont il-politika agrikola komuni, sabiex tiġi żgurata l-effettività ta' dawk il-miżuri u t-trasparenza fl-implimentazzjoni tal-iskema tal-għajnuna Nordika.

(22)

Sabiex jintlaħaq l-għan taż-żamma ta' produzzjoni, kif iddikjarat fl-Artikolu 142 tal-Att tal-Adeżjoni, u biex tiġi ffaċilitata l-amministrazzjoni tal-għajnuna, jenħtieġ li din id-Deċiżjoni tapplika mill-1 ta' Jannar 2018.

(23)

Għalhekk, jenħtieġ li d-Deċiżjoni C(2010) 6050 titħassar b'effett mill-1 ta' Jannar 2018. Huwa xieraq li jiġu previsti miżuri tranżizzjonali fir-rigward tar-rapportar skont l-Artikolu 142 tal-Att tal-Adeżjoni, dwar l-appoġġ imħallas fl-2017 skont id-Deċiżjoni C(2010) 6050,

(a)

kull kilogramma ta' ħalib tal-produzzjoni attwali għall-produzzjoni tal-ħalib tal-baqra;

(b)

kull unità ta' bhejjem għat-trobbija tal-annimali;

(c)

kull ettaru għall-produzzjoni tal-għelejjel u l-ortikultura, inkluż il-frott artab;

(d)

bħala kumpens għall-ispejjeż attwali tat-trasport tal-ħalib tal-baqra, bi tnaqqis ta' kwalunkwe appoġġ pubbliku ieħor għall-istess spejjeż.

(a)

l-identifikazzjoni tal-unitajiet muniċipali li fihom titħallas l-għajnuna permezz ta' mappa dettaljata u fejn meħtieġ permezz ta' dejta oħra;

(b)

il-produzzjoni totali, li tkopri s-sena rrapportata, tas-sottoreġjuni eliġibbli għall-għajnuna skont din id-Deċiżjoni, espressa fi kwantitajiet għal kull wieħed mill-prodotti speċifikati fl-Anness II;

(c)

in-numru totali tal-fatturi ta' produzzjoni u l-kwantitajiet, in-numru tal-fatturi ta' produzzjoni u l-kwantitajiet eliġibbli għall-għajnuna u n-numru tal-fatturi ta' produzzjoni u l-kwantitajiet appoġġati għal kull settur ta' produzzjoni speċifikat fl-Anness II bi tqassim għal kull prodott f'kull settur, inkluż l-indikazzjoni ta' kwalunkwe qbiż tan-numru massimu annwali permess ta' fatturi ta' produzzjoni u kwantitajiet, kif ukoll id-deskrizzjoni tal-miżuri, jekk ikun hemm, meħuda sabiex jiġi evitat il-qbiż;

(d)

l-għajnuna totali mħallsa, l-ammont totali ta' għajnuna għal kull kategorija ta' għajnuna u t-tip ta' produzzjoni, l-ammonti mħallsin lill-benefiċjarji għal kull fattur ta' produzzjoni/unità oħra, kif ukoll il-kriterji biex issir differenza bejn l-ammonti ta' għajnuna għas-sottoreġjuni u t-tipi ta' azjendi agrikoli jew abbażi ta' kunsiderazzjonijiet oħra;

(e)

is-sistema ta' pagament applikata bid-dettalji li jikkonċernaw kwalunkwe ħlas bil-quddiem ibbażati fuq stimi, pagamenti finali, kif ukoll pagamenti żejda osservati u l-irkupru tagħhom;

(f)

l-ammonti tal-għajnuna mħallsa skont l-Artikolu 32 tar-Regolament (UE) Nru 1305/2013 fl-unitajiet amministrattivi koperti b'din id-Deċiżjoni;

(g)

ir-referenzi għal-leġiżlazzjoni nazzjonali fejn tkun implimentata l-għajnuna.

(a)

it-total tal-għajnuna mħallsa matul il-perjodu ta' ħames snin u t-tqassim tiegħu fost il-kategoriji tal-għajnuna, it-tipi ta' produzzjoni u s-sottoreġjuni;

(b)

għal kull kategorija ta' għajnuna, l-ammonti totali tal-produzzjoni kull sena, u għal perjodu ta' ħames snin, in-numru ta' fatturi ta' produzzjoni u l-livelli tad-dħul tal-bdiewa fir-reġjuni eliġibbli għall-għajnuna;

(c)

l-evoluzzjoni tal-produzzjoni agrikola, l-ipproċessar u l-kummerċjalizzazzjoni fil-kuntest soċjali u ekonomiku tar-reġjuni tat-Tramuntana;

(d)

l-effetti tal-għajnuna fuq il-ħarsien tal-ambjent u l-konservazzjoni tal-pajżaġġ;

(e)

il-proposti għall-iżvilupp fuq terminu medju tal-għajnuna bbażati fuq id-dejta ppreżentata fir-rapport.