29.6.2016   

MT

Il-Ġurnal Uffiċjali tal-Unjoni Ewropea

L 171/153

(1)

Ir-Regolament (UE) Nru 575/2013 tal-Parlament Ewropew u tal-Kunsill (4) jagħti eżenzjoni lid-ditti tal-investiment li n-negozju ewlieni tagħhom ikun jikkonsisti b'mod esklussiv mill-forniment ta' servizzi tal-investimenti jew minn attivitajiet relatati mal-istrumenti finanzjarji stabbiliti fil-punti 5, 6, 7, 9 u 10 tat-Taqsima C tal-Anness I tad-Direttiva 2004/39/KE tal-Parlament Ewropew u tal-Kunsill (5) u li għalihom ma kinitx tapplika, fil-31 ta' Diċembru 2006, id-Direttiva tal-Kunsill 93/22/KEE (6) (“negozjanti tal-komoditajiet”) mir-rekwiżiti ta' skoperturi kbar u minn rekwiżiti ta' fondi proprji. Dawk l-eżenzjonijiet japplikaw sal-31 ta' Diċembru 2017.

(2)

Ir-Regolament (UE) Nru 575/2013 jirrikjedi woll mill-Kummissjoni li tħejji, sal-31 ta' Diċembru 2015, rapport dwar reġim xieraq għas-superviżjoni prudenzjali tan-negozjanti tal-komoditajiet. Barra minn hekk, dak ir-Regolament jirrikjedi mill-Kummissjoni li tħejji, sal-istess data, rapport dwar reġim xieraq għas-superviżjoni prudenzjali b'mod ġenerali tad-ditti tal-investiment. Fejn xieraq, dawk ir-rapporti għandhom jiġu segwiti bi proposti leġiżlattivi.

(3)

Bħalissa qed isir rieżami tat-trattament prudenzjali ta' ditti tal-investiment (“rieżami tad-ditti tal-investiment”), inklużi negozjanti tal-komoditajiet, iżda għadu ma tlestiex. Il-finalizzazzjoni ta' dak ir-rieżami u l-adozzjoni ta' kwalunkwe leġiżlazzjoni ġdida li tista' tkun meħtieġa fid-dawl ta' dak ir-rieżami se jkunu konklużi biss wara l-31 ta' Diċembru 2017.

(4)

Taħt ir-reġim eżistenti, wara l-31 ta' Diċembru 2017, in-negozjanti tal-komoditajiet se jsiru soġġetti għar-rekwiżiti ta' skoperturi kbar u ta' rekwiżiti ta' fondi proprji. Dan jista' jġegħelhom biex iżidu b'mod sinifikanti l-ammont ta' fondi proprji li huma jkunu jeħtieġu sabiex ikomplu bl-attivitajiet tagħhom u dan jista' għalhekk iżid il-kosti relatati tat-twettiq ta' tali attivitajiet.

(5)

Id-deċiżjoni li jiġu applikati r-rekwiżiti ta' skoperturi kbar u rekwiżiti ta' fondi proprji għan-negozjanti tal-komoditajiet ma għandhiex tittieħed bħala riżultat ta' eżenzjoni li tkun skadiet. Minflok, dik id-deċiżjoni għanda tkun waħda mmotivata bir-reqqa, ibbażata fuq konklużjonijiet tar-rieżami tad-ditti tal-investiment, u għanda tkun espressa b'mod ċar fil-leġiżlazzjoni.

(6)

Għandha għalhekk tiġi stabbilita data ġdida sa meta l-eżenzjonijiet għan-negozjanti tal-komoditajiet għandhom ikomplu japplikaw. Ir-Regolament (UE) Nru 575/2013 għandu għalhekk jiġi emendat kif meħtieġ,

(1)

fl-Artikolu 493(1), it-tieni sentenza hija sostitwita b'dan li ġej:

“Din l-eżenzjoni hija disponibbli sal-31 ta' Diċembru 2020 jew sad-data tad-dħul fis-seħħ ta' kwalunkwe emenda skont il-paragrafu 2 ta' dan l-Artikolu, skont liema minnhom tiġi l-aktar kmieni.”;

(2)

fl-Artikolu 498(1), it-tieni subparagrafu huwa sostitwit b'dan li ġej:

“Din l-eżenzjoni għandha tapplika sal-31 ta' Diċembru 2020 jew sad-data tad-dħul fis-seħħ ta' kwalunkwe emenda skont il-paragrafi 2 u 3, skont liema minnhom tiġi l-aktar kmieni.”.