31.1.2015   

MT

Il-Ġurnal Uffiċjali tal-Unjoni Ewropea

L 26/1

(1)

Il-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima (“il-Protokoll ta' Kjoto”) daħal fis-seħħ fis-16 ta' Frar 2005 u jinkludi impenji legalment vinkolanti għat-tnaqqis tal-emissjonijiet għall-ewwel perijodu ta' impenn tal-Protokoll fis-seħħ mill-2008 sal-2012, għall-partijiet elenkati fl-Anness B tiegħu. L-Unjoni approvat il-Protokoll ta' Kjoto permezz tad-Deċiżjoni tal-Kunsill 2002/358/KE (1). L-Unjoni u l-Istati Membri tagħha rratifikaw il-Protokoll ta' Kjoto u qablu li iwettqu l-impenji tagħhom taħt l-ewwel perijodu ta' impenn b'mod konġunt. L-Islanda rratifikat il-Protokoll ta' Kjoto fit-23 ta' Mejju 2002.

(2)

Fil-laqgħa tiegħu tal-15 ta' Diċembru 2009, il-Kunsill laqa' talba mill-Islanda biex twettaq l-impenji tagħha b'mod konġunt mal-Unjoni u l-Istati Membri tagħha fit-tieni perijodu ta' impenn u talab lill-Kummissjoni biex tippreżenta rakkomandazzjoni għall-ftuħ tan-negozjati meħtieġa dwar ftehim mal-Islanda li jkun f'konformità mal-prinċipji u l-kriterji stabbiliti fil-pakkett Klima u Enerġija tal-Unjoni.

(3)

Fil-Konferenza ta' Doha dwar il-Klima li saret f'Diċembru 2012, il-partijiet kollha tal-Protokoll ta' Kjoto qablu mal-Emenda ta' Doha li tistabbilixxi t-tieni perijodu ta' impenn tal-Protokoll ta' Kjoto, li jibda fl-1 ta' Jannar 2013 u jintemm fil-31 ta' Diċembru 2020. L-Emenda ta' Doha temenda l-Anness B tal-Protokoll ta' Kjoto, tistabbilixxi aktar impenji ta' mitigazzjoni legalment vinkolanti għall-partijiet elenkati f'dak l-Anness għat-tieni perijodu ta' impenn, u temenda u telabora iktar id-dispożizzjonijiet li jikkonċernaw l-implimentazzjoni tal-impenji tal-partijiet matul it-tieni perijodu ta' impenn.

(4)

Il-miri għall-Unjoni, l-Istati Membri tagħha u l-Islanda huma elenkati fl-Emenda ta' Doha b'nota ta' qiegħ il-paġna li tiddikjara li dawk il-miri huma bbażati fuq il-fehim li huma ser jitwettqu b'mod konġunt, f'konformità mal-Artikolu 4 tal-Protokoll ta' Kjoto. L-Unjoni, l-Istati Membri tagħha u l-Islanda ħarġu wkoll stqarrija konġunta mal-adozzjoni tal-Emenda ta' Doha fit-8 ta' Diċembru 2012, fejn esprimew l-intenzjoni tagħhom li jwettqu l-impenji tagħhom għat-tieni perijodu ta' impenn b'mod konġunt. L-istqarrija ġiet maqbula waqt laqgħa ad hoc tal-Ministri tal-UE f'Doha u ġiet approvata mill-Kunsill fis-17 ta' Diċembru 2012.

(5)

F'dik l-istqarrija l-Unjoni, l-Istati Membri tagħha u l-Islanda ddikjaraw, f'konformità mal-Artikolu 4(1) tal-Protokoll ta' Kjoto li jippermetti li l-partijiet iwettqu l-impenji tagħhom b'mod konġunt taħt l-Artikolu 3 tal-Protokoll ta' Kjoto, li l-Artikolu 3(7ter) tal-Protokoll ta' Kjoto ser jiġi applikat għall-ammont assenjat b'mod konġunt skont il-ftehim dwar it-twettiq konġunt mill-Unjoni, l-Istati Membri tagħha, il-Kroazja u l-Islanda u li mhux ser jiġi applikat għall-Istati Membri, il-Kroazja jew l-Islanda individwalment.

(6)

L-Artikolu 4(1) tal-Protokoll ta' Kjoto jirrikjedi li l-partijiet jaqblu li jwettqu l-impenji tagħhom b'mod konġunt skont Artikolu 3 tal-Protokoll ta' Kjoto sabiex fil-Ftehim jistabbilixxu l-livell ta' emissjoni rispettiv allokat lil kull wieħed mill-partijiet għal dak il-Ftehim. L-Artikolu 4(2) tal-Protokoll ta' Kjoto jirrikjedi li l-partijiet tal-ftehim ta' twettiq konġunt jinnotifikaw lis-Segretarjat tal-Protokoll ta' Kjoto dwar it-termini ta' dak il-Ftehim fid-data tad-depożitu tal-istrumenti tagħhom ta' ratifika jew ta' approvazzjoni.

(7)

Fis-17 ta' Diċembru 2013, il-Kunsill awtorizza lill-Kummissjoni biex tiftaħ negozjati dwar Ftehim ta' twettiq konġunt bejn l-Unjoni, l-Istati Membri tagħha u l-Islanda.

(8)

Il-Kummissjoni nnegozjat, f'isem l-Unjoni, Ftehim bejn l-Unjoni Ewropea u l-Istati Membri tagħha, minn naħa, u l-Islanda dwar il-parteċipazzjoni tal-Islanda, min-naħa l-oħra, fit-twettiq konġunt tal-impenji tal-Unjoni Ewropea, l-Istati Membri tagħha u l-Islanda għat-tieni perijodu ta' impenn tal-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima (“il-Ftehim”).

(9)

Biex jiġi żgurat li l-impenji tal-Islanda fit-twettiq konġunt huma stabbiliti u applikati b'mod mhux diskriminatorju, billi jittrattaw l-Islanda u l-Istati Membri bl-istess mod, il-livell tal-emissjonijiet għall-Islanda ġie stabbilit b'tali mod li jkun konsistenti kemm mal-impenn ta' tnaqqis tal-emissjonijiet kwantifikati miktuba fit-tielet kolonna tal-Anness B tal-Protokoll ta' Kjoto, kif emendat mill-Emenda ta' Doha, u kemm mal-leġiżlazzjoni tal-Unjoni, inkluż il-pakkett dwar il-Klima u l-Enerġija tal-2009 u l-prinċipji u l-kriterji li fuqhom l-objettivi f'dik il-leġiżlazzjoni huma bbażati.

(10)

Il-Ftehim għandu jiġi ffirmat f'isem l-Unjoni, soġġett għall-konklużjoni tiegħu f'data aktar tard,