4.4.2012   

MT

Il-Ġurnal Uffiċjali tal-Unjoni Ewropea

L 98/13

(1)

Ir-Regolament tal-Kummissjoni (KE) Nru 474/2006 tat-22 ta’ Marzu 2006 li jistabbilixxi l-lista Komunitarja ta’ kumpaniji tal-ajru li huma soġġetti għal projbizzjoni fuq l-operat fl-Unjoni skont il-Kapitolu II tar-Regolament (KE) Nru 2111/2005.

(2)

F’konformità mal-Artikolu 4(3) tar-Regolament (KE) Nru 2111/2005, ċerti Stati Membri u l-Aġenzija Ewropea dwar is-Sigurtà fl-Avjazzjoni (minn issa ’l quddiem, l-"EASA") ikkomunikaw lill-Kummissjoni informazzjoni li hija rilevanti fil-kuntest tal-aġġornar tal-lista Komunitarja. Informazzjoni rilevanti kienet ikkomunikata wkoll minn pajjiżi terzi. Abbażi ta’ dan, il-lista Komunitarja għandha tkun aġġornata.

(3)

Il-Kummissjoni infurmat lit-trasportaturi tal-ajru kollha kkonċernati b'mod dirett jew inkella, meta dan ma kienx prattikabbli, permezz tal-awtoritajiet responsabbli għas-sorveljanza regolatorja tagħhom, u indikat il-fatti u l-kunsiderazzjonijiet essenzjali li fuqhom għandha tkun imsejsa deċiżjoni biex timponi fuqhom projbizzjoni fuq l-operat fl-Unjoni Ewropea jew biex timmodifika l-kundizzjonijiet ta’ projbizzjoni fuq l-operat imposta fuq trasportatur tal-ajru li huwa inkluż fil-lista Komunitarja.

(4)

Il-Kummissjoni tat opportunità lit-trasportaturi tal-ajru kkonċernati biex jikkonsultaw id-dokumenti pprovduti mill-Istati Membri, sabiex iressqu kummenti bil-miktub u biex jagħmlu preżentazzjoni orali quddiem il-Kummissjoni fi żmien għaxart (10) ijiem tax-xogħol u lill-Kumitat għas-Sikurezza tal-Ajru stabbilit bir-Regolament tal-Kunsill (KEE) Nru 3922/1991 tas-16 ta’ Diċembru dwar l-armonizzazzjoni tal-ħtiġijiet tekniċi u proċeduri amministrattivi fil-qasam tal-avjazzjoni ċivili (3).

(5)

Il-Kumitat għas-Sikurezza tal-Ajru sema’ l-preżentazzjonijiet tal-EASA dwar ir-riżultati tal-analiżi tar-rapporti ta' verifika [audit] imwettqa mill-Organizzazzjoni Internazzjonali tal-Avjazzjoni Ċivili (minn issa 'l quddiem l-ICAO) fil-qafas tal-Programm Universali ta' Verifika tas-Sorveljanza (Universal Safety Oversight Audit Programme - USOAP). L-Istati Membri ġew mistiedna jagħtu prijorità lil spezzjonijiet fir-rampa fuq it-trasportaturi tal-ajru li huma d-detenturi ta’ liċenzji fi Stati li għalihom l-ICAO identifika tħassib sinifikanti dwar is-sikurezza jew li għalihom l-EASA ikkonkludiet li hemm nuqqasijiet sinifikanti fis-sistema tas-sorveljanza tas-sikurezza. Minkejja l-konsultazzjonijiet imwettqa mill-Kummissjoni skont ir-Regolament (KE) Nru 2011/2005, dan se joffri l-possibbiltà li tinkiseb aktar informazzjoni dwar il-prestazzjoni tas-sikurezza fuq it-trasportaturi tal-ajru li huma detentrui ta’ liċenzji f’dawk l-Istati.

(6)

Il-Kumitat għas-Sikurezza tal-Ajru sema’ l-preżentazzjonijiet tal-EASA dwar il-proġetti ta' assistenza teknika mwettqa fi Stati affettwati mir-Regolament (KE) Nru 2111/2005. Il-Kumitat ġie infurmat dwar it-talbiet għal aktar assistenza u kooperazzjoni teknika sabiex titjieb il-kapaċità amministrattiva u teknika tal-awtoritajiet tal-avjazzjoni ċivili bl-għan li jiġu solvuti nuqqasijiet ta' konformità mal-istandards internazzjonali applikabbli. L-Istati Membri kienu mistiedna jirrispondu għal dawn it-talbiet fuq bażi bilaterali f’koordinazzjoni mal-Kummissjoni u mal-EASA.

(7)

Ir-Regolament (KE) Nru 474/2006 għandu għalhekk jiġi emendat skont dan.

(8)

Wara l-analiżi mill-EASA ta' informazzjoni li tirriżulta minn spezzjonijiet fir-rampa mwettqa fuq inġenji tal-ajru ta’ ċerti trasportaturi tal-ajru li huma d-detenturi ta’ liċenzji fl-Unjoni Ewropea jew wara spezzjonijiet ta' standardizzazzjoni mwettqa mill-EASA kif ukoll spezzjonijiet u verifiki [audits] speċifiċi għal ċerti oqsma mwettqa mill-awtoritajiet nazzjonali tal-avjazzjoni tagħhom, uħud mill-Istati Membri wettqu ċerti miżuri ta’ infurzar. Huma infurmaw lill-Kummissjoni u lill-Kumitat għas-Sikurezza tal-Ajru b’dawn il-miżuri: Il-Ġermanja infurmat li bosta trasportaturi tal-ajru Ġermaniżi kienu taħt sorveljanza rinfurzata, inklużi Air Alliance Express u Air Traffic GmbH Dusseldorf, il-Latvja infurmat li ċ-Ċertifikat ta' Operatur tal-Ajru (AOC) ta' Inversija ġie rrevokat fid-19 ta' Jannar 2012; l-Italja infurmat li l-AOC ta' ItaliAirlines ġie rrevokat u li l-liċenzja ta' trasport tal-ajru miżmuma mit-trasportatur tal-ajru Livingston tibqa' sospiża; il-Greċja infurmat li fit-28 ta' Frar 2012 tneħħiet is-sospensjoni fuq il-liċenzja kummerċjali tat-trasportatur tal-ajru Hellenic Imperial Airways iżda dan baqa' taħt sorveljanza għolja, u li kienet ġiet introdotta wkoll sorveljanza addizjonali għat-trasportaturi tal-ajru Sky wings Airlines u Hermes Airlines; il-Pajjiżi l-Baxxi infurmaw li l-AOC ta' Solid-air kien irrevokat fit-28 ta' Diċembru 2011 u li l-AOC ta' Amsterdam Airlines ġie rrevokat fis-6 ta' Frar 2012; Spanja infurmat li l-AOC ta' Zorex baqa' sospiż mis-7 ta' Diċembru 2011; l-Isvezja infurmat li l-AOC ta' AirSweden Aviation AB kien irrevokat fl-10 ta' Jannar 2012, li l-AOC tat-trasportatur tal-ajru Flyg Centrum AB kien irrevokat fis-16 ta' Diċembru 2011 u li t-trasportatur tal-ajru Nova Air jibqa' taħt sorveljanza għolja; ir-Rumanija infurmat li sal-20 ta' Marzu 2012, l-AOC ta' Direct Aero Services kien ġie rrevokat.

(9)

Wara deċiżjoni li ttieħdet fl-aħħar laqgħa tal-Kumitat għas-Sikurezza tal-Ajru f'Novembru 2011 (4), l-awtoritajiet kompetenti tal-Albanija rrappurtaw li qed javvanzaw fl-implimentazzjoni tal-pjan ta' azzjoni tagħhom, ukoll jekk kien hemm xi dewmien fir-rigward tal-akkwist fit-tul ta' spetturi kwalifikati. Qed issir insistenza mal-Albanija sabiex tħaffef il-miżuri biex tiżviluppa l-kapaċità tal-awtorità tagħha għas-sorveljanza tas-sikurezza. L-EASA se tkompli timmonitorja l-progress tal-azzjonijiet korrettivi u se twettaq spezzjoni komprensiva ta' segwitu f'Ottubru 2012 sabiex tivverifa jekk l-implimentazzjoni tal-pjanijiet ta' azzjoni kinitx waħda sodisfaċenti. Il-Kumitat għas-Sikurezza tal-Ajru se jivvaluta mill-ġdid is-sitwazzjoni abbażi tar-riżultati ta' din l-ispezzjoni.

(10)

L-awtoritajiet kompetenti ta' Franza rrappurtaw li ma setgħux joħorġu awtorizzazzjoni lil Comlux Aruba N.V., trasportatur tal-ajru ċċertifikat f'Aruba, minħabba l-eżistenza ta' nuqqasijiet fis-sikurezza identifikati waqt valutazzjoni tal-kwestjonarju tekniku ppreżentat mill-operatur għall-fini li jirċievi l-awtorizzazzjoni ta' nżul f’dak l-Istat Membru, u nnotifikaw il-konklużjoni tagħhom lill-Istati Membri permezz tal-bażi tad-dejta tal-SAFA (5).

(11)

Il-Kummissjoni, wara li qieset dawk in-nuqqasijiet, bdiet konsultazzjoni mal-awtoritajiet kompetenti ta' Aruba u mat-trasportatur tal-ajru, li permezz tagħhom esprimiet t-tħassib dwar is-sikurezza tal-operat ta' Comlux Aruba N.V. fl-UE u talbet kjarifiki rigward l-azzjonijiet li twettqu mill-awtoritajiet kompetenti kif ukoll mit-trasportatur biex jindirizzaw dawn in-nuqqasijiet.

(12)

L-awtoritajiet kompetenti ta’ Aruba u t-trasportatur tal-ajru għamlu sottomissjonijiet bil-miktub u attendew il-laqgħa mal-Kummissjoni, mal-EASA u ma’ xi membri tal-Kumitat għas-Sikurezza tal-Ajru fl-20 ta' Frar 2012. Abbażi tal-informazzjoni provduta, u minkejja li l-kwistjonijiet tas-sikurezza identifikati minn Franza jidher li ġew indirizzati, kien identifikat tħassib ulterjuri fir-rigward tas-sede prinċipali tan-negozju tal-operatur. It-trasportatur iddikjara li l-uffiċċju tiegħu f’Aruba huwa limitat għal żewġ segretarji biss u li l-uffiċċju ewlieni fejn huma eżerċitati l-kontroll operattiv tal-operazzjonijiet ta' titjir u l-ajrunavigabbiltà kontinwa ma jinsabx f'Aruba. Madankollu, l-awtoritajiet kompetenti ta’ Aruba infurmaw li wettqu reviżjoni tal-leġiżlazzjoni tal-avjazzjoni ċivili sabiex jiżguraw li t-trasportaturi tal-ajru ċċertifikati f’Aruba jkollhom is-sede prinċipali tan-negozju tagħhom stabbiliti f'dak l-Istat u li Comlux Aruba kien mitlub juri li s-sede prinċipali tan-negozju huwa stabbilit f'Aruba mhux aktar tard mill-1 ta’ Awwissu 2012.

(13)

Il-Kummissjoni tieħu nota u se timmonitorja aktar l-azzjonijiet amministrattivi u legali meħuda mill-awtoritajiet kompetenti ta’ Aruba biex jiżguraw li t-trasportaturi tal-ajru ċċertifikati f'dak l-Istat għandhom is-sede prinċipali tan-negozju tagħhom stabbiliti f' dak l-Istat stess.

(14)

Trasportaturi tal-ajru ċċertifikati fir-Repubblika Demokratika tal-Kongo ilhom elenkati fl-Anness A minn Marzu 2006 (6). Waslet informazzjoni li l-awtoritajiet kompetenti tar-Repubblika Demokratika tal-Kongo kienu ħarġu liċenzja ġdida lit-trasportatur tal-ajru Jet Congo Airways. L-awtoritajiet kompetenti tar-Repubblika Demokratika tal-Kongo naqsu milli jwieġbu talba għall-informazzjoni mill-Kummissjoni u naqsu milli jipprovdu l-evidenza li s-sorveljanza tas-sikurezza tat-trasportatur tal-ajru ġdid tikkonforma bis-sħiħ ma' standards internazzjonali tas-sikurezza applikabbli. Għalhekk, abbażi tal-kriterji komuni, ġie vvalutat li dan it-trasportatur tal-ajru għandu jiddaħħal ukoll fl-Anness A.

(15)

Kienu rrappurtati bosta inċidenti fatali li jinvolvu trasportaturi tal-ajru ċċertifikati fir-Repubblika Demokratika tal-Kongo minn mindu saret l-aħħar lagħqa tal-Kumitat għas-Sikurezza tal-Ajru. Fit-30 ta’ Jannar 2012, inġenju tal-ajru tat-tip Antonov 28 bil-marka tar-reġistrazzjoni 9Q-CUN operat minn TRACEP Congo Aviation ikkraxxja, li wassal għat-telf totali tal-inġenju tal-ajru u għal 4 imwiet. Fit-12 ta’ Frar 2012, inġenju tal-ajru tat-tip Gulfstream IV, bil-marka tar-reġistrazzjoni N25A, operat minn Katanga Express ikkraxxja, li wassal għat-telf totali tal-inġenju tal-ajru u għal 6 imwiet. L-awtoritajiet kompetenti tar-Repubblika Demokratika tal-Kongo madankollu ma tawx tweġiba għal talbiet għall-informazzjoni mill-Kummissjoni dwar is-sejbiet preliminari tal-investigazzjonijiet tal-inċidenti.

(16)

It-trasportaturi tal-ajru kollha ċċertifikat fil-Ginea Ekwatorjali ilhom elenkati fl-Anness A minn Marzu 2006 (7). Il-Kummissjoni u l-EASA kellhom laqgħa ta' konsultazzjoni mal-awtoritajiet kompetenti tal-Ginea Ekwatorjali (DGAC) fit-22 ta’ Frar 2012. Matul din il-laqgħa, DGAC ippreżenta l-progress li sar sa dakinhar sabiex ittaffi t-tħassib dwar is-sikurezza identifikat mill-Organizzazzjoni Internazzjonali tal-Avjazzjoni Ċivili (ICAO) fl-okkażjoni tal-verifika [audit] mwettqa fl-2007 fil-qafas tal-Programm Universali ta' Verifika tas-Sorveljanza tas-Sikurezza (USOAP).

(17)

Id-DGAC ipprovda lill-Kummissjoni l-evidenza tal-irtirar taċ-Ċertifikati ta' Operaturi tal-Ajru tat-trasportaturi tal-ajru li ġejjin: GETRA, Guinea Airways, UTAGE, Euroguineana de Aviacion y Transportes, General Work Aviacion, Star Equatorial Airlines u EGAMS. Peresss li dawn it-trasportaturi tal-ajru ċċertifikati fil-Ginea Ekwatorjali konsegwentement waqqfu l-attivitajiet tagħhom, dawn għandhom jitneħħew mill-Anness A.

(18)

DGAC ipprovda lill-Kummissjoni informazzjoni li tindika li Ċertifikat ta' Operatur tal-Ajru ngħata lit-trasportaturi tal-ajru Punto Azul. Madankollu, billi d-DGCA ma pprovdiex evidenza li s-sorveljanza tas-sikurezza ta' dan it-trasportatur tal-ajru huwa żgurat b’konformità mal-istandards internazzjonali tas-sikurezza, abbażi tal-kriterji komuni, ġie vvalutat li dan it-trasportatur għandu jiddaħħal fl-Anness A.

(19)

Il-Kummissjoni nnutat il-progress imwettaq mill-awtoritajiet kompetenti tal-Ginea Ekwatorjali u tħeġġiġhom ikomplu bl-isforzi tagħhom lejn it-twaqqif ta’ sistema ta' sorveljanza tal-avjazzjoni ċivili konformi mal-istandards internazzjonali tas-sikurezza.

(20)

Konsultazzjonijiet mal-awtoritajiet kompetenti tal-Indoneżja (id-DGCA) ikomplu bil-għan li jiġi mmonitorjat il-progress tad-DGCA fl-iżgurar tas-sorveljanza tas-sikurezza tat-trasportaturi kollha tal-ajru ċċertifikati fl-Indoneżja b'konformità mal-istandards internazzjonali tas-sikurezza. Fis-7 ta' Frar 2012 saret vidjokonferenza bejn il-Kummissjoni, l-EASA u d-DGCA. Id-DGCA kkonferma li baqgħu javvanzaw u infurma dwar aktar azzjonijiet ta’ infurzar rigward ċerti trasportaturi tal-ajru taħt is-sorveljanza tagħhom: b'mod partikolari, li ġew sospiżi l-AOCs ta' Kartika Airlines, Mimika Air, Riau Airlines u Survei Udara Penas.

(21)

Id-DGCA informa u pprovda wkoll konferma li l-AOC ta' Megantara ġie rrevokat fit-13 ta’ Awwissu 2010. Għaldaqstant, abbażi tal-kriterji komuni, ġie vvalutat li dan it-trasportatur tal-ajru għandu jitneħħa mill-Anness A.

(22)

Id-DGCA informa wkoll li AOCs ġodda kienu nħarġu għal TransNusa Aviation Mandiri fid-19 ta’ Awwissu 2011, għal Enggang Air Service fl-1 ta’ Marzu 2010, għal Surya Air fit-8 ta’ April 2011, għal Ersa Eastern Aviation fid-9 ta’ Settembru 2011 u għal Matthew Air Nusantara fl-20 ta’ Settembru 2011. Madankollu, billi d-DGCA ma pprovdiex evidenza li s-sorveljanza tas-sikurezza ta' dawn it-trasportaturi tal-ajru huwa żgurat b’konformità mal-istandards internazzjonali tas-sikurezza, abbażi tal-kriterji komuni, ġie vvalutat li dawn it-trasportaturi għandhom jiddaħħlu wkoll fl-Anness A.

(23)

Il-Kummissjoni nnutat il-progress kontinwu mill-awtoritajiet kompetenti tal-Indoneżja u tħeġġiġhom ikomplu x-xogħol sod tagħhom ta' twaqqif ta’ sistema ta' sorveljanza tal-avjazzjoni ċivili konformi bis-sħiħ mal-istandards internazzjonali tas-sikurezza u se tirrevedi l-każ qabel il-laqgħa li jmiss tal-Kumitat għas-Sikurezza tal-Ajru.

(24)

Abbażi tal-inċident fatali fit-13 ta’ Mejju 2010 ta' inġenju tal-ajru tat-tip Airbus A330 operat mill-Afriqiyah Airways, u ta’ evidenza verifikata ta' nuqqasijiet fis-sikurezza identifikati mill-programm tal-SAFA li jikkonċernaw Afriqiyah Airways (8) u United Aviation (9), il-Kummissjoni bdiet diskussjonijiet mal-Awtoritajiet Kompetenti tal-Libja (LCAA) f’Ottubru 2010. Dawn id-diskussjonijiet ġew interrotti minħabba l-gwerra ċivili Libjana.

(25)

Il-konsultazzjonijiet reġgħu bdew f'Ottubru 2011 u l-LCAA infurmat li kienet issospendiet iċ-Ċertifikati ta' Operaturi tal-Ajru (AOCs) Libjani kollha u li kienet se twettaq proċess ta' ċertifikazzjoni mill-ġdid qabel it-tneħħija tas-sospensjoni tal-AOCs. Matul l-verifiki [audits] bħala parti minn dan il-proċess ta' ċertifikazzjoni mill-ġdid, l-LCAA skopriet kwistjonijiet ta' sikurezza sinifikanti li jikkonċernaw Afriqiyah Airways, l-aktar fil-qasam tat-taħriġ tal-bdoti, nuqqas ta' impjegati tal-manutenzjoni, u tagħmir insuffiċjenti biex jitwettqu l-kompiti ta' manutenzjoni. Madankollu, ftit wara l-verifika [audit], l-LCAA ħarġet AOC lil Afriqiyah Airways.

(26)

Il-Kummissjoni, l-EASA u bosta membri tal-Kumitat għas-Sikurezza tal-Ajru kellhom aktar konsultazzjonijiet mal-LCAA, Afriqiyah Airways, ma’ Libyan Airlines u ma’ Global Aviation fit-22 ta’ Frar 2012. Madankollu, l-LCAA naqset milli tipprovdi l-informazzjoni mitluba sa issa, partikolarment il-lista tat-trasportaturi tal-ajru ċċertifikati fil-Libja, l-AOCs korrispondenti kollha u l-ispeċifikazzjonijiet tal-operat mehmuża magħhom, ir-rapporti ta' verifika [audit] mwettqa qabel ma tneħħew is-sospensjonijiet, flimkien ma' evidenza li n-nuqqasijiet identifikati waqt dawn l-verifiki [audits] kienu magħluqa b'mod sodisfaċenti. Barra minn hekk, huma indikaw li l-investigazzjonijiet dwar l-inċident ta' Afriqiyah Airways sabu għadd ta' diffikultajiet u ma wasslu għall-ebda konklużjoni s'issa.

(27)

Il-Ministru tat-Trasport tal-Libja, l-LCAA, Afriqiyah Airways u Libyan Airlines għamlu preżentazzjonijiet lill-Kumitat għas-Sikurezza tal-Ajru fl-20 ta' Marzu 2012. Il-Ministru rrikonoxxa li s-sistema Libjana tas-sikurezza tal-avjazzjoni ma kinitx qed tikkonforma mal-istandards tal-ICAO. Hu stabbilixxa pjanijiet biex jirrimedja s-sitwazzjoni permezz ta' programm ta' 3 snin bl-assistenza ta' għarfien espert estern dwar is-sikurezza.

(28)

Il-Ministru rrikonoxxa waqt il-Kumitat għas-Sikurezza tal-Ajru u l-LCAA kkonfermat bil-miktub fit-22 ta' Marzu 2012 li, minħabba n-nuqqasijiet identifikati fis-sikurezza fis-sistema ta’ sorveljanza tal-Libja, it-trasportaturi tal-ajru Libjani mhux se jitħallew joperaw fl-Unjoni Ewropea, fin-Norveġja, fl-Islanda u fl-Isvizzera mill-inqas sat-22 ta’ Novembru 2012, u li l-AOCs tagħhom se jiġu emendati kif xieraq biex jirriflettu dawn ir-restrizzjonijiet. Huwa stqarr ulterjurment li kien ġie ffurmat Kumitat biex imexxi 'l quddiem il-ħidma ta' rikostruzzjoni tas-sistema Libjana tas-sikurezza tal-avjazzjoni. Huwa stqarr li l-awtoritajiet kompetenti tal-Libja se jaħdmu mill-qrib mal-Kummissjoni u se jipprovdu aġġornamenti regolari sabiex jipprovdu evidenza tal-progress.

(29)

Il-Kumitat ħa nota tal-azzjoni deċiżiva tal-awtoritajiet Libjani u talab li, mhux aktar tard mill-20 ta' April 2012, l-LCAA tipprovdi lill-Kummissjoni pjan ta' azzjoni korrettiva li tindirizza bis-sħiħ it-talbiet pendenti kollha għal informazzjoni u jistipula azzjonijiet speċifiċi u d-dati ta' mira biex jindirizzaw in-nuqqasijiet fis-sistema tagħhom ta' sorveljanza.

(30)

Il-Kummissjoni u l-Kumitat għas-Sikurezza tal-Ajru rrikonoxxew id-diffikultajiet sinifikanti li l-Libja tiffaċċja wara l-kunflitt u ħadu nota tal-impenn qawwi mill-Ministru biex jiġi stabbilit proċess ta' rikostruzzjoni. Il-Kummissjoni tħeġġeġ lil LCAA biex tkompli bid-djalogu miftuħ u kostruttiv tagħha li ġie stabbiliti mal-Kummissjoni mat-tmiem tal-kunflitt riċenti. Madankollu, jekk l-LCAA tonqos milli tinfurza r-restrizzjonijiet li ħabbret, il-Kummissjoni se tkun mġiegħla tieħu miżuri immedjati ta' salvagwardja skont l-Artikolu 5(1) tar-Regolament (KE) Nru 2111/2005 tal-Parlament Ewropew u tal-Kunsill.

(31)

Is-sitwazzjoni tas-sikurezza tal-avjazzjoni fil-Libja se tiġi analizzata mill-Kumitat għas-Sikurezza tal-Ajru fil-laqgħa tiegħu skedata għal Novembru 2012 fejn se tiġi vvalutata l-effettività tal-azzjonijiet meħuda mill-awtoritajiet kompetenti tal-Libja.

(32)

It-trasportaturi tal-ajru ċċertifikati fil-Mawritanja ilhom elenkati fl-Anness A minn Novembru 2010 (10). L-awtoritajiet kompetenti tal-Mawritanja (ANAC) infurmaw dwar il-ħruġ ta’ AOC ġdid lit-trasportatur tal-ajru Mauritania Airlines mingħajr ma wrew li s-sorveljanza tas-sikurezza ta' dan it-trasportatur tal-ajru tikkonforma bis-sħiħ ma' standards internazzjonali tas-sikurezza applikabbli. B'mod partikolari, l-AOC tiegħu kien maħruġ fit-8 ta’ Mejju 2011 mingħajr ma ngħata evidenza li bosta nuqqasijiet identifikati waqt iċ-ċertifikazzjoni inizjali tal-linja tal-ajru (analiżi tad-dokumentazzjoni tal-proċeduri operattivi u ta' manutenzjoni ta' April 2011 u verifiki fuq il-post mwettqa bejn it-3 u l-5 ta’ Mejju 2011) ġew effettivament rettifikati qabel il-ħruġ tal-AOC. L-AOC inħareġ ukoll mingħajr ma ġie żgurat minn qabel jekk l-operatur kellux l-approvazzjonijiet xierqa għall-ajrunavigabbiltà kontinwa u l-manutenzjoni. Barra minn hekk, ma ġiet provduta l-ebda evidenza li t-trasportatur tal-ajru huwa soġġett għal sorveljanza kontinwa skont l-istandards internazzjonali tas-sikurezza. Għalhekk, abbażi tal-kriterji komuni, ġie vvalutat li dan it-trasportatur tal-ajru għandu jiddaħħal ukoll fl-Anness A.

(33)

L-ANAC infurmat ukoll li l-AOC ta' Mauritania Airways skada fil-15 ta’ Diċembru 2010 u ma ġiex imġedded billi t-trasportatur tal-ajru waqqaf l-attività tiegħu. Għaldaqstant, abbażi tal-kriterji komuni, ġie vvalutat li dan it-trasportatur tal-ajru għandu jitneħħa mill-Anness A.

(34)

Il-Mawritanja infurmat li ttieħdu azzjonijiet deċiżivi li jwasslu għal bidliet pożittivi fis-sistema ta' sorveljanza tas-sikurezza tagħha, inkluża l-emenda tal-leġiżlazzjoni tal-avjazzjoni ċivili biex tallinjahom mal-Annessi għall-Konvenzjoni ta’ Chicago u bidliet fil-ġestjoni, l-istruttura u l-persunal tal-ANAC. Il-proċessi għaċ-ċertifikazzjoni u s-sorveljanza kontinwa tat-trasportaturi tal-ajru wkoll ġew aġġornati u se jsiru applikabbli fil-futur qarib.

(35)

Filwaqt li jiġi rikonoxxut li l-Mawritanja għad fadlilha ħidma x’titwettaq biex tindirizza s-sejbiet kollha, l-ICAO infurmat li l-impenn tal-Mawritanja biex jiġu solvuti n-nuqqasijiet tas-sikurezza identifikati waqt il-verifika [audit] mwettqa fl-2008 huwa ta' min ifaħħru. L-Istat ipprovda aġġornamenti regolari tal-pjan ta’ azzjoni korrettiva tiegħu u kien irrappurtat progress sinifikanti mill-Istat. Il-Missjoni ta' Validazzjoni Koordinata tal-ICAO (ICAO Coordinated Validation Mission - ICVM) skedata għal Mejju 2012 se tkun pass importanti biex jiġi vvalidat il-progress milħuq.

(36)

Il-Kummissjoni tilqa’ b'sodisfazzjon il-progress irrappurtat mill-awtoritajiet kompetenti tal-Mawritanja fir-rettifika tan-nuqqasijiet identifikati mill-ICAO u tħeġġeġ lil dawn l-awtoritajiet biex isegwu l-azzjonijiet tagħhom b’determinazzjoni b'kooperazzjoni dovuta mal-ICAO. Il-Kumitat għas-Sikurezza tal-Ajru se jivvaluta mill-ġdid is-sitwazzjoni skont ir-riżultati tal-Missjoni Koordinata ta' Validazzjoni tal-ICAO.

(37)

Il-Kummissjoni kompliet il-konsultazzjonijiet tagħha mal-Awtorità Kompetenti tal-Pakistan (PCAA) u Pakistan International Airways (PIA), u ltaqgħat magħhom fl-20 ta' Frar 2012 biex tirrivedi l-progress tagħhom fit-teħid tal-azzjonijiet deskritti fil-Pjanijiet ta' Azzjoni Korrettiva (Corrective Action Plans - CAP) tagħhom.

(38)

Il-PCAA rrappurtat u pprovdiet evidenza li kienet żiedet il-livell tas-sorveljanza tal-PIA, ħadet azzjoni regolatorja li tissospendi xi Liċenzji ta’ Manutenzjoni, u kienet talbet tibdiliet sinifikanti għas-Sistema tal-Ġestjoni tal-Kwalità tal-PIA. Huma rrappurtaw dwar l-eżitu b’suċċess tal-verifika [audit] tal-ICAO f'Ġunju 2011 u spjegat il-pjanijiet tagħhom li jadottaw regolamenti ġodda li jirriflettu r-regoli ta’ Parti 145 tal-EASA.

(39)

Il-PIA rrappurtat li l-azzjonijiet stipulati fil-pjan ta' azzjoni korrettiva tagħha issa ġew kompluti, ħlief għal spezzjonijiet approfonditi ta' erba' inġenji tal-ajru li kienu attwalment għaddejjin mill-manutenzjoni. Huma kkonfermaw li bħalissa kien għaddej programm estensiv ta' taħriġ u li kien se jkompli.

(40)

L-EASA infurmat lill-Kumitat għas-Sikurezza tal-Ajru li s-sejbiet tal-ispezzjonijiet tal-SAFA tal-inġenji tal-ajru PIA kienu wasslu għall-ftuħ ta' proċedura ta' sospensjoni tal-approvazzjoni tal-organizzazzjoni tal-manutenzjoni tal-Parti 145 tal-EASA fil-11 ta’ Novembru 2011. Filwaqt li l-EASA nnutat li l-pjan ta’ azzjoni korrettiva tal-PIA deher li identifika l-kwistjonijiet rilevanti ta' sikurezza, dawn ma setgħux jiddependu fuq il-PCAA biex tikkontrolla effettivament il-prestazzjoni tal-istandards ta' manutenzjoni tal-PIA u l-EASA ma kellha l-ebda għażla ħlief li tissospendi l-approvazzjoni tal-Parti 145 tal-EASA fis-6 ta' Marzu 2012.

(41)

Il-Kummissjoni nnutat il-progress imwettaq kemm mill-PCAA kif ukoll mill-PIA biex jindirizzaw it-tħassib identifikat dwar is-sikurezza, iżda kkonfermat li, jekk jinqala’ kwalunkwe avveniment sinifikanti li jagħti lok għal tħassib mill-ġdid, allura jkollha tittieħed azzjoni biex jitrażżan ir-riskju għas-sikurezza. Għaldaqstant, l-Istati Membri għandhom ikomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni ta’ spezzjonijiet fir-rampa li għandhom isiru fuq l-inġenji tal-arju ta’ dan it-trasportatur skont ir-Regolament tal-Kummissjoni (KE) Nru 351/2008 tas-16 ta’ April 2008 li jimplimenta d-Direttiva 2004/36/KE tal-Parlament Ewropew u tal-Kunsill rigward il-prijoritizzazzjoni ta' spezzjonijiet fir-rampa ta' inġenji ta' l-ajru li jużaw ajruporti tal-Komunità (11).

(42)

It-trasportaturi tal-ajru ċċertifikati fil-Filippini ilhom elenkati fl-Annes A mill-31 ta' Marzu 2010 (12). L-awtoritajiet kompetenti tal-Filippini (CAAP) infurmaw dwar il-ħruġ ta' Ċertifikati ta' Operaturi tal-Ajru ġodda lit-trasportaturi tal-ajru Aero Equipment Aviation Inc, AirAsia Philippines Certeza Infosys Corp., Mid-Sea Express, Southern Air Flight Services, NorthSky Air Inc., Island Helicopter Services. Is-CAAP ma weġbitx b'mod adegwat lit-talbiet għall-informazzjoni mill-Kummissjoni, u, b'mod partikolari, naqset milli tipprovdi l-AOC ta’ dawn it-trasportaturi tal-ajru flimkien mal-ispeċifikazzjonijiet kompleti tal-operat; is-CAAP naqset ukoll milli turi li ċ-ċertifikazzjoni u s-sorveljanza kontinwa ta' dawn it-trasportaturi tal-ajru jikkonformaw bis-sħiħ ma' standards internazzjonali applikabbli tas-sikurezza. Għalhekk, abbażi tal-kriterji komuni, ġie vvalutat li dawn it-trasportaturi tal-ajru għandhom jiddaħħlu wkoll fl-Anness A.

(43)

Kienu rrappurtati bosta inċidenti fatali li jinvolvu trasportaturi tal-ajru ċċertifikati fil-Filippini minn meta saret l-aħħar laqgħa tal-Kumitat għas-Sikurezza tal-Ajru. Fl-10 ta’ Diċembru 2011, inġenju tal-ajru tat-tip Beechcraft 65-80 bil-marka tar-reġistrazzjoni RP-C824 operat minn Aviation Technology Innovator ikkraxxja fl-Iskola Elementari Felixberto Serrano ħdejn Manila, li wassal għat-telf totali tal-inġenju tal-ajru kif ukoll għal tal-anqas 14–il mewta; is-CAAP ma weġbitx lit-talbiet għall-informazzjoni mill-Kummissjoni dwar is-sejbiet preliminari tal-investigazzjoni tal-inċidenti; is-CAAP sempliċiment irrappurtat li l-AOC kien "inattiv/irrinunzjat" mingħajr ma ġie ddkjarat, madankollu, minn meta jew mingħajr ma ġiet ipprovduta l-evidenza relatata. Inċident fatali ieħor seħħ fl-4 ta’ Marzu 2012, li kien jinvolvi inġenju tal-ajru tat-tip Cessna 172S irreġistrat EP-C209 operat minn Avia Tours, li wassal għat-telf totali tal-inġenju tal-ajru kif ukoll żewġ imwiet; għalkemm is-CAAP pprovdiet informazzjoni preliminari dwar l-inċident, il-validità tal-AOC ma setgħax tiġi aċċertata billi r-rapport preliminari tal-inċident jindika li l-AOC huwa validu sal-14 ta' Awissu 2012 filwaqt li l-informazzjoni pprovduta mis-CAAP turi li l-AOC kien skada fl-14 ta' Frar 2012.

(44)

Is-CAAP infurmat li bosta operaturi għandhom AOC "inattiv/irrinunzjat" jew ġew iċċertifikati mill-ġdid skont Parti-11 tal-PCAR maħsuba għal operazzjonijiet fl-ajru. Madankollu, is-CAAP naqset milli tipprovdi l-evidenza li l-AOC korrispondenti ġie rrevokat u evidenza li dawn l-operaturi ma kienux iżjed involuti fit-trasport kummerċjali bl-ajru. Għaldaqstant, abbażi tal-kriterji komuni, ġie vvalutat li dawn it-trasportaturi għandhom jibqgħu fl-Anness A.

(45)

F'Jannar 2012, l-Amministrazzjoni Federali tal-Avjazzjoni (FAA) tal-Istati Uniti wettqet analiżi teknika fil-Filippini li damet ġimgħa sabiex tivvaluta l-progress tas-CAAP lejn il-konformità mal-istandards internazzjonali tas-sikurezza. Is-CAAP naqset milli tipprovdi informazzjoni dettaljata dwar l-eżitu ta' din l-analiżi. Madankollu, l-ebda bidla ma ġiet innutata fil-valutazzjoni tal-Filippini mill-FAA, li s’issa jibqgħu fil-kategorija 2, jiġifieri mhux konformi mal-istandards internazzjonali tas-sikurezza.

(46)

Wara l-laqgħa tal-Kumitat għas-Sikurezza tal-Ajru li saret f'Novembru 2011 (13) fejn l-awtoritajiet kompetenti tar-Russja (Aġenzija Federali Russa tat-Trasport bl-Ajru, FATA) infurmaw u pprovdew evidenza li l-operazzjonijiet tat-trasportaturi tal-ajru Aviastar-TU, UTAir-Cargo, Tatarstan Airlines, Daghestan Airlines, Yakutia u Vim Avia (Vim Airlines) kienu ġew parzjalment jew totalment ristretti għal raġunijiet ta' sikurezza, il-Kummissjoni kellha konsultazzjonijiet b’mod attiv mal-FATA sabiex issegwi l-iżviluppi.

(47)

Saru laqgħat ta' konsultazzjoni fi Brussell fid-19 ta’Diċembru 2011 u l-21 ta’Frar 2012 bejn il-FATA u l-Kummissjoni, l-EASA u ċerti Membri tal-Kumitat għas-Sikurezza tal-Ajru. Il-FATA infurmat dwar l-intenzjoni tagħha li tneħħi r-restrizzjonijiet imposti fuq parti mill-flotta ta' Tatarstan Airlines (inġenji tal-ajru tat-tip B737-500, B737-400, B737-300, Tupolev 154M u Yakovlev Yak-42), Aviastar-TU (inġenji tal-ajru tat-tip Tupolev Tu-204) u Yakutia (inġenji tal-ajru tat-tip Boeing B757-200, B737-300 u B737-800) hekk kif il-FATA kienet sodisfatta bir-riżultati tal-ispezzjoni li twettqu fuq dawn it-trasportaturi,

(48)

Il-FATA pprovdiet wkoll evidenza ta' aktar azzjonijiet ta’ infurzar. B'mod partikolari, l-AOC ta' Daghestan Airlines ġie rrevokat fid-19 ta 'Diċembru 2011 minħabba tħassib li jirriżulta mill-verifika [audit] mwettqa fuq it-trasportatur tal-ajru. Il-FATA infurmat li kienet talbet lil UTAir-Cargo biex tistabbilixxi azzjonijiet korrettivi addizzjonali qabel ma setgħu jitneħħew ir-restrizzjonijiet fuq il-flotta tagħha.

(49)

Sabiex jiġi żgurat li l-miżuri meħuda mill-FATA jwasslu għal titjib sostenibbli tas-sikurezza, l-Istati Membri se jkomplu jivverifikaw l-konformità effettiva tat-trasportaturi tal-ajru Russi mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li għandhom jitwettqu fuq l-inġenji tal-arju ta’ dawn it-trasportaturi skont ir-Regolament (KE) Nru 351/2008 u jistgħu jieħdu miżuri kif meħtieġ biex jiżguraw li dawn ir-rekwiżiti huma infurzati. Il-Kummissjoni se tkompli timmonitorja r-riżultati tagħhom.

(50)

L-FATA kkonfermat li VIM AVIA jibqa' soġġett għal restrizzjonijiet operattivi li jeskludu t-titjiriet lejn l-UE (inżul u titjiriet li jgħaddu fuq it-territorju konċernat) fuq il-flotta kollha tiegħu (8 inġenji tal-ajru tat-tip Boeing B757-200) sakemm issir l-implimentazzjoni sħiħa ta' pjan ta' azzjoni korrettiva.

(51)

Waqt il-laqgħa msemmija qabel li saret fil-21 ta’ Frar 2012 Vim Avia ġie biex jippreżenta l-investimenti fis-sikurezza, b’mod partikolari f’termini ta’ taħriġ, iżda naqas milli juri li rnexxilu jistabbilixxi sistema ta' ġestjoni tas-sikurezza li tiffunzjona. It-trasportatur ma kienx għadu f'pożizzjoni li juri li dawn l-investimenti kienu operattivi u effettivi.

(52)

L-FATA infurmat li l-operatur kien mistenni li jlesti l-azzjonijiet rimedjali u korrettivi kollha sal-1 ta' April 2012. Wara, l-FATA indikat li se twettaq spezzjoni tat-trasportatur tal-ajru biex tivverifika jekk is-sejbiet kollha ġewx indirizzati b'mod sodisfaċenti sabiex tiddeċiedi jekk ir-restrizzjonijiet attwali setgħux jiġu mneħħija. L-FATA qablet li tipprovdi lill-Kummissjoni rapporti ta’ progress dwar l-implimentazzjoni ta’ miżuri korrettivi mit-trasportatur u r-riżultati tal-ispezzjoni sussegwenti.

(53)

Fid-dawl ta' dak imsemmi hawn fuq, u filwaqt li jitqiesu l-azzjonijiet effettivi ta’ infurzar meħuda mill-awtoritajiet kompetenti tar-Russja, jidher li għadu kmieni wisq biex tiġi vvalutata mill-ġdid is-sitwazzjoni ta' dan it-trasportatur tal-ajru. Il-Kummissjoni se teżamina s-sitwazzjoni ta' Vim Avia f'Kumitat għas-Sikurezza tal-Ajru futur, abbażi ta' rapporti pprovduti mill-awtoritajiet kompetenti tar-Russja u dwar id-deċiżjoni tagħhom rigward it-tkomplija ta' restrizzjonijiet attwali.

(54)

Teżisti evidenza vverifikata ta’ nuqqasijiet serji fis-sikurezza min-naħa tat-trasportatur tal-ajru Conviasa ċċertifikat fil-Venezwela. Dawn in-nuqqasijiet ġew identifikati mill-awtoritajiet kompetenti ta’ Spanja waqt l-ispezzjonijiet fir-rampa li twettqu taħt il-programm tas-SAFA (14). Conviasa wera nuqqas ta’ ħila li jindirizza dawn in-nuqqasijiet fis-sikurezza. Conviasa ma weġibx f'waqtu u b'mod adegwat għan-nuqqasijiet kollha nnotifikati mill-awtorità tal-avjazzjoni ċivili ta’ Spanja. Ir-ripetizzjoni ta’ dawn in-nuqqasijiet ta’ konformità turi nuqqasijiet sistematiċi fis-sikurezza fil-qasam tal-operat u tal-manutenzjoni.

(55)

Conviasa esperjenza bosta inċidenti, inklużi żewġ inċidenti fatali, waħda fit-13 ta’ Settembru 2010 fir-rigward ta’ inġenju tal-ajru tat-tip ATR42 bil-marka tar-reġistrazzjoni YV-1010 u oħra fit-30 ta’ Awwissu 2008 fir-rigward ta’ inġenju tal-ajru tat-tip Boeing B737-200 bil-marka tar-reġistrazzjoni YV-102T. Ir-riżultati ta' investigazzjonijiet dwar il-kawża ta’ inċidenti bħal dawn ma ġewx ikkomunikati lill-Kummissjoni mill-awtoritajiet kompetenti tal-Venezwela u l-Kummissjoni lanqas mhija konxja ta' kwalunkwe rakkomandazzjoni biex jiġu evitati okkorrenzi oħrajn.

(56)

Il-Kummissjoni, wara li qieset in-nuqqasijiet imsemmija hawn fuq, bdiet konsultazzjoni mal-awtoritajiet kompetenti tal-Venezwela f’Awwissu 2011, li fiha esprimiet tħassib serju dwar is-sikurezza tal-operat ta’ Conviasa u talbet għal kjarifiki rigward l-azzjonijiet imwettqa mill-awtoritajiet kompetenti kif ukoll mit-trasportatur biex iwieġbu għal dawn in-nuqqasijiet.

(57)

Dawn l-awtoritajiet naqsu milli jwieġbu f'waqtu u b'mod adegwat għall-inkjesti mill-Kummissjoni rigward is-sorveljanza tas-sikurezza ta’ Conviasa, għaliex ma ġietx sottomessa l-informazzjoni mitluba, b’mod partikolari l-informazzjoni dwar il-progress tal-investigazzjoni tal-inċident, ir-rakkomandazzjonijiet li jirriżultaw minn dawn l-investigazzjonijiet, l-azzjonijiet meħuda biex jiġu indirizzati l-kawżi possibbli tal-inċidenti u l-ispeċifikazzjonijiet, rekwiżiti u restrizzjonijiet tal-operazzjonijiet tat-trasportatur mehmuża mal-AOC.

(58)

Conviasa u l-awtoritajiet kompetenti tal-Venezwela għamlu preżentazzjonijiet lill-Kumitat għas-Sikurezza tal-Ajru fil-21 ta' Marzu 2012. It-trasportatur tal-ajru indika li kien ħa azzjonijiet li jsaħħu l-kontrolli interni, it-taħriġ u l-implimentazzjoni tas-sistema għall-ġestjoni tas-sikurezza, u li qed ikunu kkunsidrati aktar azzjonijiet għall-futur. Huwa stqarr li ntwieġbu s-sejbiet kollha identifikati fl-ispezzjonijiet fir-rampa. Il-Kumitat innota li kien hemm ħidma kontinwa konsiderevoli bejn it-trasportatur tal-ajru u l-awtoritajiet kompetenti ta' Spanja. Madankollu t-trasportatur tal-ajru naqas milli jispjega r-repetizzjoni tan-nuqqasijiet ta' konformità tas-sejbiet ta' natura simili identifikati fl-ispezzjonijiet sussegwenti. It-trasportatur tal-ajru naqas wkoll milli jipprovdi kwalunkwe informazzjoni dwar il-kawżi tal-inċidenti fatali imsemmija hawn fuq u l-azzjonijiet meħuda biex jevita r-ripetizzjoni tagħhom. It-trasportatur tal-ajru wkoll naqas milli jippreżenta informazzjoni bażika dwar il-flotta li jopera u ma pprovdiex l-ispeċifikazzjonijiet, ir-rekwiżiti u r-restrizzjonijiet tal-operazzjonijiet tat-trasportatur mehmuża mal-AOC tiegħu.

(59)

Fid-dawl ta’ dan ta’ hawn fuq, abbażi tal-kriterji komuni, ġie vvalutat li Conviasa ma jissodisfax l-istandards rilevanti tas-sikurezza u li għalhekk għandu jiddaħħal fl-Anness A.

(60)

Teżisti evidenza vverifikata ta’ nuqqasijiet fis-sikurezza min-naħa tat-trasportatur tal-ajru Línea Tuística Aerotuy ċċertifikat fil-Venezwela. Dawn in-nuqqasijiet ġew identifikati minn Franza, matul spezzjonijiet fir-rampa mwettqa skont il-Programm SAFA (15).

(61)

Línea Tuística Aerotuy esperjenza bosta inċidenti, inkluż inċident fatali li jinvolvi inġenju tal-ajru tat-tip Cessna 208B bil-marka tar-reġistrazzjoni YV-1181 fis-17 ta’ April 2009.

(62)

Il-Kummissjoni, wara li qieset in-nuqqasijiet imsemmija hawn fuq, bdiet konsultazzjoni mal-awtoritajiet kompetenti tal-Venezwela f’Awwissu 2011, li fiha esprimiet tħassib serju dwar is-sikurezza tal-operat ta’ Línea Tuística Aerotuy u talbet għal kjarifiki rigward l-azzjonijiet imwettqa mill-awtoritajiet kompetenti kif ukoll mit-trasportatur biex iwieġbu għal dawn in-nuqqasijiet. Dawn l-awtoritajiet ma wieġbux b'mod adegwat u f'waqtu.

(63)

Línea Turística Aerotuy u l-awtoritajiet kompetenti tal-Venezwela għamlu preżentazzjonijiet lill-Kumitat għas-Sikurezza tal-Ajru fil-21 ta' Marzu 2012, akkumpanjati b'sottomissjonijiet bil-miktub. It-trasportatur tal-ajru pprovda l-AOC tiegħu flimkien mal-ispeċifikazzjonijiet operattivi kompleti mehmużin miegħu. It-trasportatur tal-ajru indika li kien ħa azzjonijiet biex jirrimedja n-nuqqasijiet identifikati waqt spezzjonijiet fir-rampa għas-sodisfazzjon tal-awtoritajiet kompetenti ta' Franza u pprovda l-evidenza relatata. It-trasportatur tal-ajru kien kapaċi jipprovdi l-kjarifiki mitluba dwar l-inċidenti fatali msemmija hawn fuq u l-awtoritajiet kompetenti pprovdew ir-rapport dwar l-inċident flimkien mal-konklużjonijiet u rakkomandazzjonijiet relatati. L-awtoritajiet kompetenti tal-Venezwela ddikjaraw wkoll li r-rakkomandazzjonijiet li joħorġu minn rapport tal-investigazzjoni tal-inċident kif ukoll ir-riżultati ta' spezzjonijiet fir-rampa kienu ikkunsidrati kif dovut għas-sorveljanza tat-trasportatur tal-ajru.

(64)

Il-Kummissjoni u l-Kumitat għas-Sikurezza tal-Ajru jieħdu nota tar-reazzjoni tat-trasportatur tal-ajru u tat-trasparenza tiegħu fl-indirizzar tan-nuqqasijiet ta’ sikurezza identifikati. L-Istati Membri madankollu se jkomplu jivverifikaw il-konformità effettiva tat-trasportatur tal-ajru mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li għandhom jitwettqu fuq l-inġenji tal-arju ta’ dawn it-trasportaturi skont ir-Regolament (KE) Nru 351/2008 u jistgħu jieħdu miżuri kif meħtieġ biex jiżguraw li dawn ir-rekwiżiti huma infurzati.

(65)

Teżisti evidenza vverifikata ta’ nuqqasijiet fis-sikurezza min-naħa tat-trasportatur tal-ajru Estelar Latinoamérica ċċertifikat fil-Venezwela. Dawn in-nuqqasijiet ġew identifikati minn Franza, matul spezzjonijiet fir-rampa mwettqa skont il-Programm SAFA (16).

(66)

Il-Kummissjoni, wara li qieset in-nuqqasijiet imsemmija hawn fuq, bdiet konsultazzjoni mal-awtoritajiet kompetenti tal-Venezwela f’Awwissu 2011, li fiha esprimiet tħassib serju dwar is-sikurezza tal-operat ta’ Estelar Latinoamerica u talbet għal kjarifiki rigward l-azzjonijiet li twettqu mill-awtoritajiet kompetenti kif ukoll mit-trasportatur biex iwieġbu għal dawn in-nuqqasijiet. Dawn l-awtoritajiet ma wieġbux b'mod adegwat u f'waqtu.

(67)

Estelar Latinoamerica u l-awtoritajiet kompetenti tal-Venezwela għamlu preżentazzjonijiet lill-Kumitat għas-Sikurezza tal-Ajru fil-21 ta' Marzu 2012, akkumpanjati b'sottomissjonijiet bil-miktub. It-trasportatur tal-ajru pprovda l-AOC tiegħu flimkien mal-ispeċifikazzjonijiet operattivi kompleti mehmużin miegħu. It-trasportatur tal-ajru indika li kien ħa azzjonijiet biex jirrimedja n-nuqqasijiet identifikati waqt spezzjonijiet fir-rampa għas-sodisfazzjon tal-awtoritajiet kompetenti ta' Franza u pprovda l-evidenza relatata. L-awtoritajiet kompetenti indikaw li kienu qed jiżguraw li r-riżultati ta' spezzjonijiet fir-rampa kienu ikkunsidrati kif dovut għas-sorveljanza tat-trasportatur tal-ajru.

(68)

Il-Kummissjoni u l-Kumitat għas-Sikurezza tal-Ajru jieħdu nota tar-reazzjoni tat-trasportatur tal-ajru u tat-trasparenza tiegħu fl-indirizzar tan-nuqqasijiet ta’ sikurezza identifikati. L-Istati Membri madankollu se jkomplu jivverifikaw il-konformità effettiva tat-trasportatur tal-ajru mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li għandhom jitwettqu fuq l-inġenji tal-arju ta’ dawn it-trasportaturi skont ir-Regolament (KE) Nru 351/2008 u jistgħu jieħdu miżuri kif meħtieġ biex jiżguraw li dawn ir-rekwiżiti huma infurzati.

(69)

S’issa ma ġiet ikkomunikata l-ebda evidenza lill-Kummissjoni dwar l-implimentazzjoni sħiħa tal-azzjonijiet ta’ rimedju xierqa mit-trasportaturi tal-ajru l-oħra inklużi fil-lista Komunitarja aġġornata fil-21 ta’ Novembru 2011 u mill-awtoritajiet responsabbli għas-sorveljanza regolatorja ta’ dawn it-trasportaturi tal-ajru. Għalhekk, abbażi tal-kriterji komuni, huwa vvalutat li dawn it-trasportaturi tal-ajru għandhom jibqgħu jkunu soġġetti għal projbizzjoni fuq l-operat (l-Anness A) jew għal restrizzjonijiet operattivi (l-Anness B), skont il-każ.

(70)

Il-miżuri stipulati f’dan ir-Regolament huma skont l-opinjoni tal-Kumitat għas-Sikurezza tal-Ajru,

1.

L-Anness A għandu jinbidel bit-test stipulat fl-Anness A għal dan ir-Regolament.

2.

L-Anness B għandu jinbidel bit-test stipulat fl-Anness B għal dan ir-Regolament.