This document is an excerpt from the EUR-Lex website
Document 32012D0769
2012/769/EU: Council Implementing Decision of 4 December 2012 amending Decision 2009/790/EC authorising the Republic of Poland to apply a measure derogating from Article 287 of Directive 2006/112/EC on the common system of value added tax
2012/769/UE: Deċiżjoni ta’ Implimentazzjoni tal-Kunsill tal- 4 ta’ Diċembru 2012 li temenda d-Deċiżjoni 2009/790/KE li tawtorizza lir-Repubblika tal-Polonja li tapplika miżura ta’ deroga mill-Artikolu 287 tad-Direttiva 2006/112/KE dwar is-sistema komuni ta’ taxxa fuq il-valur miżjud
2012/769/UE: Deċiżjoni ta’ Implimentazzjoni tal-Kunsill tal- 4 ta’ Diċembru 2012 li temenda d-Deċiżjoni 2009/790/KE li tawtorizza lir-Repubblika tal-Polonja li tapplika miżura ta’ deroga mill-Artikolu 287 tad-Direttiva 2006/112/KE dwar is-sistema komuni ta’ taxxa fuq il-valur miżjud
ĠU L 338, 12.12.2012, p. 27–28
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
In force
Relation | Act | Comment | Subdivision concerned | From | To |
---|---|---|---|---|---|
Modifies | 32009D0790 | Emenda | artikolu 2 | ||
Extended validity | 32009D0790 | 31/12/2015 |
12.12.2012 |
MT |
Il-Ġurnal Uffiċjali tal-Unjoni Ewropea |
L 338/27 |
DEĊIŻJONI TA’ IMPLIMENTAZZJONI TAL-KUNSILL
tal-4 ta’ Diċembru 2012
li temenda d-Deċiżjoni 2009/790/KE li tawtorizza lir-Repubblika tal-Polonja li tapplika miżura ta’ deroga mill-Artikolu 287 tad-Direttiva 2006/112/KE dwar is-sistema komuni ta’ taxxa fuq il-valur miżjud
(2012/769/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 291(2) tiegħu,
Wara li kkunsidra d-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (1), u b’mod partikolari l-Artikolu 395(1) tagħha,
Wara li kkunsidra l-proposta mill-Kummissjoni Ewropea,
Billi:
(1) |
F’ittra rreġistrata mas-Segretarjat Ġenerali tal-Kummissjoni fit-12 ta’ April 2012, il-Polonja talbet awtorizzazzjoni biex testendi l-applikazzjoni ta’ miżura ta’ deroga mill-punt 14 tal-Artikolu 287 tad-Direttiva 2006/112/KE sabiex tkompli teżenta mit-taxxa fuq il-valur miżjud (VAT) lil persuni taxxabbli li d-dħul annwali tagħhom mhuwiex ogħla mill-ekwivalenti fil-valuta nazzjonali għal EUR 30 000 bir-rata tal-konverżjoni fil-jum tal-adeżjoni tal-Polonja mal-Unjoni. Permezz ta’ dik il-miżura, dawk il-persuni taxxabbli se jkomplu jiġu eżentati minn ċerti obbligazzjonijiet jew mill-obbligazzjonijiet kollha fir-rigward tal-VAT imsemmija fil-Kapitoli 2 sa 6 tat-Titolu XI tad-Direttiva 2006/112/KE. |
(2) |
F’konformità mat-tieni subparagrafu tal-Artikolu 395(2) tad-Direttiva 2006/112/KE, il-Kummissjoni infurmat lill-Istati Membri l-oħra permezz ta’ ittri li jġibu d-data tas-17 u t-18 ta’ Lulju 2012 bit-talba magħmula mill-Polonja. Permezz ta’ ittra li ġġib id-data tat-19 ta’ Lulju 2012, il-Kummissjoni nnotifikat lill-Polonja li kellha l-informazzjoni kollha meħtieġa biex tqis it-talba. |
(3) |
Skont il-punt 14 tal-Artikolu 287 tad-Direttiva 2006/112/KE, il-Polonja tista’ tagħti eżenzjoni mill-VAT lill-persuni taxxabbli li d-dħul annwali tagħhom mhuwiex ogħla mill-ekwivalenti fil-valuta nazzjonali għal EUR 10 000 bir-rata tal-konverżjoni fil-jum tal-adeżjoni tagħha mal-Unjoni. |
(4) |
Permezz tad-Deċiżjoni tal-Kunsill 2009/790/KE tal-20 ta’ Ottubru 2009 li tawtorizza lir-Repubblika tal-Polonja biex tapplika miżura ta’ deroga mill-Artikolu 287 tad-Direttiva 2006/112/KE dwar is-sistema komuni ta’ taxxa fuq il-valur miżjud (2), il-Polonja kienet awtorizzata, sal-31 ta’ Diċembru 2012 u bħala miżura ta’ deroga, li teżenta mill-VAT lill-persuni taxxabbli li d-dħul annwali tagħhom mhuwiex ogħla mill-ekwivalenti fil-valuta nazzjonali għal EUR 30 000 bir-rata tal-konverżjoni fil-jum tal-adeżjoni tagħha mal-Unjoni. Peress li dan il-limitu ogħla rriżulta f’obbligazzjonijiet tal-VAT imnaqqsa għall-iżgħar negozji, filwaqt li dawn tal-aħħar għadhom jistgħu jagħżlu l-arranġamenti normali tal-VAT skont l-Artikolu 290 tad-Direttiva 2006/112/KE, il-Polonja għandha tiġi awtorizzata biex tapplika l-miżura għal perijodu limitat ieħor. |
(5) |
Fil-proposta tagħha tad-29 ta’ Ottubru 2004 għal Direttiva tal-Kunsill li temenda d-Direttiva 77/388/KEE, issa Direttiva 2006/112/KE, bil-għan li tissimplifika l-obbligazzjonijiet tat-taxxa fuq il-valur miżjud, il-Kummissjoni inkludiet dispożizzjonijiet li għandhom l-għan li jippermettu lill-Istati Membri li jiffissaw limitu annwali ta’ dħul għall-iskema ta’ eżenzjoni mill-VAT sa EUR 100 000 jew l-ekwivalenti fil-valuta nazzjonali, bil-possibbiltà li dan l-ammont jiġi aġġornat kull sena. It-talba għal estensjoni ppreżentata mill-Polonja hija f’konformità ma’ dik il-proposta. |
(6) |
Mill-informazzjoni pprovduta mill-Polonja, il-miżura wasslet għal tnaqqis stmat fuq l-ammont globali fid-dħul baġitarju mill-VAT ta’ madwar 0,14 %. |
(7) |
Il-miżura ta’ deroga m’hu ser ikollha l-ebda impatt negattiv fuq ir-riżorsi proprji tal-Unjoni li jirriżultaw mill-VAT. |
(8) |
Id-Deċiżjoni 2009/790/KE għandha għalhekk tiġi emendata kif meħtieġ, |
ADOTTA DIN ID-DEĊIŻJONI:
Artikolu 1
Fl-Artikolu 2 tad-Deċiżjoni 2009/790/KE, id-data “31 ta’ Diċembru 2012” tinbidel b’dik tal-“31 ta’ Diċembru 2015”.
Artikolu 2
Din id-Deċiżjoni għandha ssir effettiva fil-jum tan-notifika tagħha.
Artikolu 3
Din id-Deċiżjoni hija indirizzata lir-Repubblika tal-Polonja.
Magħmul fi Brussell, l-4 ta’ Diċembru 2012.
Għall-Kunsill
Il-President
V. SHIARLY
(1) ĠU L 347, 11.12.2006, p. 1.
(2) ĠU L 283, 30.10.2009, p. 53.