ANNESS

1.   Impjanti ta’ kombustjoni li għandhom jiġu inklużi fil-pjan nazzjonali tranżitorju [tranżizzjonali]

Partijiet mill-impjanti ta’ kombustjoni (eż. unità ta’ kombustjoni individwali waħda jew aktar li jaqsmu ċumnija komuni ma’ unitajiet oħra jew li huma f'sitwazzjoni kif stabbilit fl-Artikolu 29(2) tad-Direttiva 2010/75/UE) ma għandhomx jaqgħu taħt pjan nazzjonali tranżitorju [tranżizzjonali] (1).

Għall-finijiet tat-tieni inċiż, punt (b) tal-Artikolu 32(1) tad-Direttiva 2010/75/UE, impjanti ta’ kombustjoni li jaqgħu taħt dik id-dispożizzjoni jinkludu wkoll impjanti li mhumiex imħaddma minn operatur ta’ raffinerija, iżda jinsabu ġewwa r-raffinerija u jużaw il-fjuwils imsemmija f'dak il-punt.

L-impjanti ta’ kombustjoni li se jkunu soġġetti għad-dispożizzjonijiet tal-Kapitolu IV tad-Direttiva 2010/75/UE rigward impjanti ta’ inċinerazzjoni tal-iskart u impjanti ta’ koinċinerazzjoni tal-iskart fi kwalunkwe ħin matul l-applikazzjoni tal-pjan nazzjonali tranżitorju [tranżizzjonali] ma għandhomx jiġu inklużi fil-pjan nazzjonali tranżizzjonali.

2.   Dejta dwar l-impjanti ta’ kombustjoni li għandha tiġi inkluża fil-pjan nazzjonali tranżitorju [tranżizzjonali]

Il-pjan nazzjonali tranżizzjonali għandu jinkludi lista tal-impjanti ta’ kombustjoni kollha li jkopri u d-dejta kollha li tikkonċerna dawn l-impjanti li ntużat sabiex jiġu kkalkolati l-limiti massimi ta’ emissjoni.

Id-dejta għal kull impjant li għandha tiġi inkluża hija relatata mal-kapaċità termali kklassifikata totali [total rated thermal input], il-fjuwils użati u l-karatteristiċi tat-tħaddim ta’ kull impjant ta’ kombustjoni matul il-perjodu tal-implimentazzjoni tal-pjan nazzjonali tranżitorju [tranżizzjonali].

Bħala minimu, id-dejta li ġejja għandha tiġi inkluża fil-pjan nazzjonali tranżitorju [tranżizzjonali] għal kull wieħed mill-impjanti ta’ kombustjoni li jaqgħu taħtu:

1.	L-isem u l-post tal-impjant ta’ kombustjoni (2);

2.	Id-data li fiha ngħata l-ewwel permess għall-impjant ta’ kombustjoni;

3.

Id-data li fiha ġiet ippreżentata l-applikazzjoni għall-ewwel permess għall-impjant ta’ kombustjoni flimkien mad-data li fiha l-impjant ta’ kombustjoni tħaddem għall-ewwel darba; Nota: Din l-informazzjoni hija meħtieġa biss f'każ li l-impjant ta’ kombustjoni ngħata l-ewwel permess tiegħu wara s-27 ta’ Novembru 2002, iżda li beda jitħaddem mhux aktar tard mis-27 ta’ Novembru 2003.

4.	Kull estensjoni b'tal-inqas 50 MW tal-kapaċità termali kklassifikata totali tal-impjant ta’ kombustjoni, li tkun seħħet bejn is-27 ta’ Novembru 2002 u l-31 ta’ Diċembru 2010 (li tindika l-kapaċità miżjuda f'MW) (3);

5.	Il-kapaċità termali kklassifikata totali (MW) ta’ kull impjant ta’ kombustjoni fil-31 ta’ Diċembru 2010;

6.

Numru annwali ta’ sigħat ta’ tħaddim (4) ta’ kull impjant ta’ kombustjoni, fuq medja tal-perjodu 2001-2010; Nota: Din l-informazzjoni hija meħtieġa biss f'każ fejn jintużaw valuri speċifiċi ta’ limitu tal-emissjonijiet għal impjanti ta’ kombustjoni li jitħaddmu għal inqas minn 1 500 siegħa fis-sena sabiex tiġi kkalkolata l-kontribuzzjoni tal-impjant ta’ kombustjoni għal-limitu/i massimu/i tal-emissjonijiet.

7.	Sustanzi li jniġġsu li l-impjant ta’ kombustjoni konċernat mhuwiex kopert għalihom mill-pjan nazzjonali tranżitorju [tranżizzjonali] (jekk ikun hemm) (5).

8.	L-ammont annwali ta’ fjuwil użat (TJ/sena), fuq medja tal-perjodu 2001-2010, maqsum f'6 tipi ta’ fjuwils: faħam, linjite, bijomassa, karburanti [fjuwils] solidi oħrajn, fjuwils likwidi, fjuwils gassużi (6);

9.

Rata tal-fluss annwali ta’ gassijiet ta’ skart (Nm3/sena), fuq medja tal-perjodu 2001-2010 (7); Nota 1: Fil-każ ta’ impjanti ta’ kombustjoni li jqabbdu diversi tipi ta’ fjuwils u/jew li jikkonsistu f'diversi tipi ta’ impjanti, trid tiġi pprovduta r-rata tal-fluss ta’ gassijiet ta’ skart għal kull tip ta’ fluwil u/jew għal kull tip ta’ impjant ta’ kombustjoni b'mod separat (8). Nota 2: Jekk ir-rata tal-fluss ta’ gassijiet ta’ skart hija kkalkolata mill-ammont ta’ fjuwil użat (u mhux ibbażata fuq flussi ta’ gassijiet ta’ skart attwalment immonitorjati), il-fattur (jew il-fatturi, f'każ ta’ diversi tipi ta’ fjuwils jew ta’ impjanti ta’ kombustjoni) użat għall-kalkolu (Nm3/GJ) għandu jiġi rrapportat.

10.

Kwantità ta’ użu ta’ kubrit permezz ta’ fjuwils solidi indiġeni (9) użati (tunnellati ta’ S/sena), fuq medja tal-perjodu 2001-2010; Nota: Din l-informazzjoni hija meħtieġa biss f'każ fejn l-impjant ta’ kombustjoni juża fjuwils solidi indiġeni u fejn tintuża r-rata minima ta’ “desulphurisation” sabiex tiġi kkalkolata l-kontribuzzjoni tal-impjant ta’ kombustjoni għal-limitu massimu tal-emissjonijiet għad-diossidu tal-kubrit (għall-2016 u/jew għall-2019).

Fejn impjanti ta’ kombustjoni koperti mill-pjan nazzjonali tranżitorju [tranżizzjonali] huma turbini tal-gass jew magni tal-gass, il-pjan nazzjonali tranżitorju [tranżizzjonali] jrid jindika dan b'mod speċifiku.

3.   Determinazzjoni tal-limiti massimi tal-emissjonijiet

3.1.   Metodu ta’ kalkolu għall-kontribuzzjonijiet tal-pjanti individwali għal-limiti massimi tal-emissjonijiet tal-2016 u l-2019

3.1.1.   Każ ġenerali

Sabiex jiġu stabbiliti l-limiti massimi tal-emissjonijiet applikabbli għal sustanzi li jniġġsu għas-snin 2016 u 2019, il-kontribuzzjoni ta’ kull impjant ta’ kombustjoni mogħtija f'tunnellati fis-sena (tpa – “tonnes per annum”) għandha tiġi kkalkolata permezz tal-ekwazzjoni li ġejja:

Kontribuzzjoni għal-limitu (tpa) = Ir-rata tal-fluss ta’ gassijiet ta’ skart (Nm3pa) × ELV (mg/Nm3) × 1,0 × 10–9

fejn:

—

“Ir-rata tal-fluss ta’ gassijiet ta’ skart” hija r-rata ta’ fluss volumetrika ta’ gassijiet ta’ skart mogħtija f'metri kubi fis-sena (Nm3pa), fuq medja tas-snin 2001-2010. Hija mogħtija f'temperatura (273 K) u pressjoni (101,3 kPa) standard, fil-kontenut relevanti ta’ ossiġnu ta’ referenza (jiġifieri, l-istess wieħed bħal dak użat għall-valur ta’ limitu tal-emissjonijiet (ELV – “valur ta’ limitu tal-emissjonijiet”)) u wara l-korrezzjoni għall-kontenut ta’ fwar tal-ilma;

—

L-“ELV” huwa l-valur ta’ limitu tal-emissjonijiet relevanti għas-sustanz li tniġġes konċernata mogħti f'mg/Nm3, bis-suppożizzjoni li l-kontenut ta’ ossiġnu skont il-volum fil-gassijiet ta’ skart huwa ta’ 6 % fil-każ ta’ fjuwils solidi, 3 % fil-każ ta’ fjuwils likwidi u gassużi (għal impjanti ta’ kombustjoni għajr turbini tal-gass jew magni tal-gass) u 15 % fil-każ ta’ turbini tal-gass u magni tal-gass.

Id-dettalji dwar kif jiġu stabbiliti l-valuri ta’ limitu tal-emissjonijiet għall-kalkolu tal-limiti massimi tal-emissjonijiet tal-2016 u tal-2019 huma pprovduti fit-taqsimiet 3.2 u 3.3.

3.1.2.   Każ speċifiku ta’ impjanti li jqabbdu diversi tipi ta’ fjuwils u/jew li jikkonsistu f'diversi tipi ta’ pjanti

L-ekwazzjoni msemmija fit-taqsima 3.1.1 ma tistax tintuża għal impjanti ta’ kombustjoni li qabbdu diversi tipi ta’ fjuwils fil-perjodu 2001-2010 (b'mod simultanju tjew le) jew li jikkonsistu f'diversi tipi ta’ pjanti.

Dawk l-impjanti ta’ kombustjoni jeħtieġu l-applikazzjoni ta’ valuri ta’ limitu tal-emissjonijiet u/jew kundizzjonijiet ta’ referenza differenti għall-kalkolu tal-kontribuzzjoni tagħhom għal-limiti massimi tal-emissjonijiet. Għalhekk, għandu jintuża l-metodu li ġej.

Kontribuzzjoni għal-limitu (tpa) = Σ [Ir-rata tal-fluss ta’ gassijiet ta’ skart (Nm3pa) × ELV (mg/Nm3) × 1,0 × 10–9]

Din l-ekwazzjoni timplika li, għal kull tip ta’ fjuwil użat fil-perjodu 2001-2010, il-volum annwali medju ta’ gassijiet ta’ skart (Nm3 fis-sena) huwa mmultiplikat bil-valur ta’ limitu tal-emissjonijiet relevanti (li jikkorrispondi għall-kapaċità termali kklassifikata totali tal-impjant ta’ kombustjoni sħiħ). Imbagħad, ir-riżultati ta’ dawn il-multiplikazzjonijiet jingħaddu għat-tipi kollha ta’ fjuwils użati.

Għandu jiġi żgurat li, għal kull tip ta’ fjuwil, il-volum ta’ gassijiet ta’ skart u l-valur ta’ limitu tal-emissjonijiet multiplikati jingħataw fl-istess kontenut ta’ ossiġnu ta’ referenza.

L-istess approċċ japplika f'każijiet fejn, fil-perjodu 2001-2010, billi jitqies l-Artikolu 29(1) u (2) tad-Direttiva 2010/75/UE, impjant ta’ kombustjoni waħdu kkonsista f'kombinazzjoni ta’ tipi differenti ta’ impjanti. Xi eżempji ta’ turija huma:

—	turbina tal-gass waħda jew aktar kombinata(i) ma’ tip wieħed ieħor jew aktar ta’ impjanti ta’ kombustjoni;

—	magna tal-gass waħda jew aktar kombinata(i) ma’ tip wieħed ieħor jew aktar ta’ impjanti ta’ kombustjoni.

3.1.3.   Rata minima ta’ “desulphurisation” (MDR – “Minimum Rate of Desulphurisation”)

L-ekwazzjoni msemmija fit-taqsima 3.1.1 ma tistax tintuża għal impjanti ta’ kombustjoni li jqabbdu fjuwil solidu indiġenu (10) u li ma jistgħux jikkonformaw mal-valuri ta’ limitu tal-emissjonijiet relevanti stabbiliti għad-diossidu tal-kubrit fid-Direttiva 2010/75/UE minħabba l-karatteristiċi ta’ dan il-fjuwil.

Għal impjanti bħal dawn, il-kalkolu tal-kontribuzzjonijiet tagħhom għal-limitu massimu tal-emissjonijiet applikabbli għad-diossidu tal-kubrit jista' jkun ibbażat fuq l-applikazzjoni tar-rati minimi relevanti ta’ “desulphurisation” (11) minflok fuq il-valuri ta’ limitu tal-emissjonijiet għad-diossidu tal-kubrit.

F'dak il-każ, il-kontribuzzjoni tal-impjant ta’ kombustjoni għal-limitu massimu tal-emissjonijiet ta’ diossidu tal-kubrit mogħtija f'tunnellati fis-sena (tpa) għandha tiġi kkalkolata billi tintuża l-ekwazzjoni li ġejja:

Kontribuzzjoni għal-limitu massimu tal-SO2 (tpa) = Input tal-kubrit (tpa) × (1 – (MDR/100)) × 2

fejn:

—	“L-input tal-kubrit” huwa l-kwantità annwali ta’ kubrit (S) li jinstab fil-fjuwil solidu indiġenu li ntuża fl-impjant ta’ kombustjoni, mogħtija f'tunnellati fis-sena (tpa), fuq medja tal-perjodu 2001-2010.

—	“MDR” hija r-rata minima relevanti ta’ “desulphurisation”, mogħtija f'perċentwal.

Id-dettalji dwar kif tiġi stabbilita r-rata minima relevanti tad-“desulphurisation” sabiex jiġu kkalkolati l-limiti massimi tal-emissjonijiet ta’ diossidu tal-kubrit tal-2016 u l-2019 huma pprovduti fit-taqsimiet 3.2 u 3.3.

3.2.   Valuri ta’ limitu tal-emissjonijiet relevanti u r-rati minimi ta’ “desulphurisation” sabiex jiġu kkalkolati l-limiti massimi tal-emissjonijiet tal-2016

Skont l-Artikolu 32(3) tad-Direttiva 2010/75/UE, il-limitu/i massimu/i tal-emissjonijiet għas-sena 2016 għandu/hom jiġu kkalkolati fuq il-bażi tal-valuri ta’ limitu tal-emissjonijiet relevanti stabbiliti fl-Annessi III sa VII għad-Direttiva 2001/80/KE jew, fejn din tkun applikabbli, fuq il-bażi tar-rata minima ta’ “desulphurisation” stabbilita fl-Anness III għad-Direttiva 2001/80/KE. Għalhekk, il-kalkolu tal-limiti massimi tal-emissjonijiet tal-2016 huwa bbażat fuq il-valuri ta’ limitu tal-emissjonijiet relevanti u fuq l-MDR, li kienu jkunu applikabbli fl-1 ta’ Jannar 2016 għall-impjant ta’ kombustjoni konċernat skont id-Direttiva 2001/80/KE, billi jittieħdu f'kunsiderazzjoni d-dispożizzjonijiet li ġejjin (12).

Il-valuri ta’ limitu tal-emissjonijiet u l-MDR għandhom jiġu stabbiliti fuq il-bażi tal-kapaċità termali kklassifikata totali tal-impjant ta’ kombustjoni sħiħ fil-31 ta’ Diċembru 2010, it-tip(i) ta’ fjuwils użati u n-numru annwali ta’ sigħat ta’ tħaddim fuq medja tal-perjodu 2001-2010. Fejn l-impjanti ta’ kombustjoni ġew estiżi b'tal-inqas 50 MW fil-perjodu bejn is-27 ta’ Novembru 2002 u l-31 ta’ Diċembru 2010, għandhom jiġu applikati r-regoli għall-kalkoli tal-valuri ta’ limitu tal-emissjonijiet relevanti kif stabbiliti fl-Artikolu 10 tad-Direttiva 2001/80/KE.

Għat-turbini tal-gass kollha inklużi fil-pjan nazzjonali tranżitorju [tranżizzjonali], il-valur ta’ limitu tal-emissjonijiet relevanti li jikkonċerna l-ossidi tan-nitroġenu huwa dak stabbilit fil-Parti B tal-Anness VI għad-Direttiva 2001/80/KE, irrispettivament mill-Artikolu 2(7)(j) tad-Direttiva 2001/80/KE.

Minħabba li ma ġew stabbiliti l-ebda valuri ta’ limitu tal-emissjonijiet fid-Direttiva 2001/80/KE għall-magni tal-gass, il-valur ta’ limitu tal-emissjonijiet relevanti għall-ossidi tan-nitroġenu huwa dak stabbilit fil-Parti 1 tal-Anness V għad-Direttiva 2010/75/UE.

Għal impjanti ta’ kombustjoni li kienu qed jużaw tipi differenti ta’ fjuwil fil-perjodu 2001-2010, il-valuri ta’ limitu tal-emissjonijiet relevanti għandhom jiġu elenkati għal kull fjuwil individwali. It-taqsima 3.1.2 tipprovdi dettalji dwar il-metodu li għandu jintuża sabiex tiġi kkalkolata l-kontribuzzjoni ta’ kull waħda minn dawk l-impjanti għal-limiti massimi tal-emissjonijiet.

Id-Direttiva 2001/80/KE tippermetti lil ċerti impjanti ta’ kombustjoni li jitħaddmu għal inqas minn 1 500 siegħa (bħala medja rikorrenti fuq perjodu ta’ 5 snin) sabiex jikkonformaw ma’ valuri ta’ limitu tal-emissjonijiet inqas stretti. Dawn tal-aħħar jistgħu jintużaw biss għall-kalkolu tal-kontribuzzjoni ta’ impjant individwali għal-limitu massimu tal-emissjonijiet tal-2016 jekk in-numru medju ta’ sigħat ta’ tħaddim tal-impjant matul il-perjodu 2001-2010 jkun inqas minn 1 500 siegħa fis-sena.

Ħarsa ġenerali lejn il-valuri ta’ limitu tal-emissjonijiet relevanti kif stabbiliti fl-Annessi III sa VII tad-Direttiva 2001/80/KE u tal-MDR relevanti stabbilita fl-Anness III għad-Direttiva 2001/80/KE hija pprovduta fit-Tabelli C.1, C.2 u C.3 fl-Appendiċi Ċ għal dan l-Anness (13).

3.3.   Valuri ta’ limitu tal-emissjonijiet relevanti u r-rati minimi ta’ “desulphurisation” għall-kalkolu tal-limiti massimi tal-emissjonijiet tal-2019

Skont l-Artikolu 32(3) tad-Direttiva 2010/75/UE, il-limiti massimi tal-emissjonijiet għas-sena 2019 għandhom jiġu kkalkolati fuq il-bażi tal-valuri ta’ limitu tal-emissjonijiet relevanti stabbiliti fil-Parti 1 tal-Anness V għad-Direttiva 2010/75/UE jew fejn dawn ikunu applikabbli, ir-rati relevanti ta’ “desulphurisation” stabbiliti fil-Parti 5 tal-Anness V għad-Direttiva 2010/75/UE. Għalhekk, il-kalkolu tal-limiti massimi tal-emissjonijiet tal-2019 huwa bbażat fuq il-valuri ta’ limitu tal-emissjonijiet relevanti u fuq l-MDR, li jkunu applikabbli fl-1 ta’ Jannar 2019 skont id-Direttiva 2010/75/UE għall-impjant ta’ kombustjoni konċernat

Il-valuri ta’ limitu tal-emissjonijiet u l-MDR għandhom jiġu stabbiliti fuq il-bażi tal-kapaċità termali kklassifikata totali tal-impjant ta’ kombustjoni sħiħ fil-31 ta’ Diċembru 2010, tat-tip(i) ta’ fjuwil użat u n-numru annwali ta’ sigħat ta’ tħaddim fuq medja tal-perjodu 2001-2010.

Ħarsa ġenerali lejn il-valuri ta’ limitu tal-emissjonijiet relevanti kif stabbiliti fil-Parti 1 tal-Anness V għad-Direttiva 2010/75/UE u tal-MDR relevanti stabbilita fil-Parti 5 tal-Anness V għad-Direttiva 2010/75/UE hija pprovduta fit-Tabelli D.1, D.2 u D.3 fl-Appendiċi D ta’ dan l-Anness.

Għal impjanti ta’ kombustjoni li kienu qed jużaw tipi differenti ta’ fjuwil fil-perjodu 2001-2010, il-valuri ta’ limitu tal-emissjonijiet relevanti għandhom jiġu elenkati għal kull fjuwil individwali. It-taqsima 3.1.2 tipprovdi dettalji dwar il-metodu li għandu jintuża sabiex tiġi kkalkolata l-kontribuzzjoni ta’ kull waħda minn dawk l-impjanti għal-limiti massimi tal-emissjonijiet.

Id-Direttiva 2010/75/UE tippermetti lil ċerti impjanti ta’ kombustjoni li jitħaddmu għal inqas minn 1 500 siegħa (bħala medja rikorrenti fuq perjodu ta’ 5 snin) sabiex jikkonformaw ma’ valuri ta’ limitu tal-emissjonijiet inqas stretti. Dawn tal-aħħar jistgħu jintużaw biss għall-kalkolu tal-kontribuzzjoni ta’ impjant għal-limitu massimu tal-emissjonijiet tal-2019 jekk in-numru medju ta’ sigħat ta’ tħaddim tal-impjant matul il-perjodu 2001-2010 jkun inqas minn 1 500 siegħa fis-sena.

3.4.   Kalkolu tal-limiti massimi tal-emissjonijiet

3.4.1.   Kalkolu tal-limiti massimi tal-emissjonijiet tal-2016 u tal-2019

Għas-snin 2016 u 2019, it-total ta’ limiti massimi tal-emissjonijiet għal kull sustanza li tniġġes għandu jiġi stabbilit billi jingħaddu l-kontribuzzjonijiet ta’ kull impjant individwali għal-limiti massimi tal-emissjonijiet rispettivi:

limitu massimu2016 (tpa) = Σ [kontribuzzjoni tal-impjant individwali għal-limitu massimu tal-2016]

limitu massimu2019 (tpa) = Σ [kontribuzzjoni tal-impjant individwali għal-limitu massimu tal-2019]

3.4.2.   Kalkolu tal-limiti massimi tal-emissjonijiet tal-2017, l-2018 u l-2020

Il-limiti massimi għas-sena 2017 (limitu massimu2017) għandhom jiġu kkalkolati billi tintuża l-ekwazzjoni li ġejja:

Il-limiti massimi għas-sena 2018 (limitu massimu2018) għandhom jiġu kkalkolati billi tintuża l-ekwazzjoni li ġejja:

Il-limiti massimi għall-ewwel simestru tal-2020 (limitu massimu2020) huma nofs il-limiti massimi għall-2019:

4.   Bidliet sussegwenti għall-pjanijiet nazzjonali tranżitorji [tradizzjonali]

Tal-inqas, l-Istati Membri għandhom jinformaw lill-Kummissjoni dwar dan li ġej:

(a)

l-impjanti ta’ kombustjoni li jirrikorru għad-deroga għal tul ta’ ħajja limitat skont l-Artikolu 33 tad-Direttiva 2010/75/UE; Nota: Filwaqt li l-Istati Membri għandhom jikkomunikaw il-pjanijiet nazzjonali tranżitorji tagħhom lill-Kummissjoni sa mhux aktar tard mill-1 ta’ Jannar 2013, l-operaturi għandhom sal-1 ta’ Jannar 2014 sabiex jinnotifikaw lill-awtorità kompetenti dwar jekk jixtiqux jirrikorru għad-deroga għal tul ta’ ħajja limitat. Għalhekk, impjant ta’ kombustjoni jista' inizjalment jiġi inkluż fil-pjan nazzjonali tranżitorju [tranżizzjonali] ppreżentat lill-Kummissjoni qabel ma jkun soġġett għal deroga għal tul ta’ ħajja limitat. Imbagħad, l-impjant ta’ kombustjoni jrid jitneħħa mill-pjan nazzjonali tranżitorju [tranżizzjonali] ladarba l-awtorità kompetenti tiġi notifikata mill-operatur tal-impjant ta’ kombustjoni bid-deċiżjoni li jirrikorri għad-deroga għal tul ta’ ħajja limitat. Imbagħad, il-kontribuzzjonijiet għal-limitu/i massimu/i tal-emissjonijiet applikabbli għal kull impjant ta’ kombustjoni li jkun jaqa' taħt l-Artikolu 33 tad-Direttiva 2010/75/UE iridu jitnaqqsu mil-limitu/i massimu/i tal-emissjonijiet kif ikkalkolat fl-aħħar verżjoni aċċettata tal-pjan nazzjonali tranżitorju [tranżizzjonali] (jew, jekk l-ebda pjan bħal dan ma ġie aċċettat, kif ikkalkolat fl-aħħar verżjoni tal-pjan nazzjonali tranżitorju [tranżizzjonali] ppreżentat lill-Kummissjoni).

(b)	l-impjanti ta’ kombustjoni li huma magħluqa (jiġifieri dawk l-impjanti li ma għadhomx jitħaddmu b'mod definittiv) jew li l-kapaċità termali kklassifikata totali tagħhom tnaqqas għal inqas minn 50 MW;

(c)

l-impjanti ta’ kombustjoni li se jibdew jikkoinċineraw l-iskart wara l-31 ta’ Diċembru 2015 u li għaldaqstant ikunu jaqgħu taħt il-Kapitolu IV tad-Direttiva 2010/75/UE. Nota: Kif imsemmi fl-Artikolu 32(3) tad-Direttiva 2010/75/UE, fejn impjant inkluż fil-pjan nazzjonali tranżitorju [tranżizzjonali] jkun magħluq jew ma jibqax jaqa' aktar fl-ambitu tal-Kapitolu III tad-Direttiva 2010/75/UE, dan ma għandux jirriżulta f'żieda fl-emissjonijiet annwali totali mill-impjanti li jifdal koperti mill-pjan nazzjonali tranżitorju [tranżizzjonali].

Għall-finijiet tal-Artikolu 32(6) tad-Direttiva 2010/75/UE, l-Istati Membri ma għandhomx l-obbligu li jikkomunikaw lill-Kummissjoni din l-informazzjoni li ġejja minħabba li l-bidliet sussegwenti li jirreferu għalihom ma għandhomx jaffettwaw il-limitu/i massimu/i tal-emissjonijiet applikabbli:

—	tnaqqis jew żieda tal-kapaċità termali kklassifikata totali wara l-31 ta’ Diċembru 2010 (għajr tnaqqis għal inqas minn 50 MW);

—	tnaqqis jew żieda tan-numru ta’ sigħat ta’ tħaddim wara l-2010;

—	bidla fl-użu tal-fjuwil (tip, kwantità) li sseħħ wara l-2010 (għajr bidla għall-inċenerazzjoni ta’ skart, li tkun tikkwalifika lill-impjant bħala impjant ta’ koinċenerazzjoni tal-iskart li tikkaġuna l-esklużjoni tiegħu mill-pjan nazzjonali tranżitorju [tranżizzjonali]).

Il-bidliet li jaffettwaw isem l-impjant (eż. minħabba bidla fl-operatur) għandhom jiġu rrapportati permezz ta’ inventarji tal-emissjonijiet li għandhom jiġu pprovduti mill-Istati Membri skont l-Artikolu 6(3) ta’ din id-Deċiżjoni u skont l-Artikolu 72(3) tad-Direttiva 2010/75/UE.

---

(1)  L-istess regola tapplika rigward l-Artikoli 33, 34 u 35 tad-Direttiva 2010/75/UE. Konsegwentement, parti minn impjant ta’ kombustjoni ma tistax tkun koperta mid-dispożizzjonijiet tal-Artikoli 33, 34 jew 35, filwaqt li parti (jew partijiet) oħra ta’ dak l-impjant tkun inkluża fil-pjan nazzjonali tranżitorju [tranżizzjonali].

(2)  Kif ġew irraportati fl-inventarji tal-emissjonijiet mfassla skont id-Direttiva 2001/80/KE tal-Parlament Ewropew u tal-Kunsill tat-23 ta’ Ottubru 2001 dwar il-limitazzjoni ta’ l-emissjonijiet ta’ ċerti tniġġis fl-arja minn impjanti kbar tal-kombustjoni (ĠU L 309, 27.11.2001, p. 1).

(3)  Din l-informazzjoni hija meħtieġa sabiex jiġu stabbiliti l-valuri ta’ limitu relevanti tal-emissjoni fl-1 ta’ Jannar 2016 kif stabbilit fl-Artikolu 10 tad-Direttiva 2001/80/KE.

(4)  “sigħat ta’ tħaddim” tfisser iż-żmien, mogħti f'sigħat, li matulu impjant ta’ kombustjoni, sħiħ jew f'parti minnu, jitħaddem u jarmi emissjonijiet fl-arja, esklużi l-perjodi tal-ftuħ u tal-għeluq.

(5)  Pereżempju, turbini tal-gass jistgħu jkunu koperti mill-pjan nazzjonali transżitorju rigward l-emissjonijiet tagħhom ta’ NOx biss. Impjanti oħra jistgħu jiġu koperti minn pjan nazzjonali tranżitorju [tranżizzjonali] għal xi sustanza/i li jniġġsu, filwaqt li jkunu soġġetti għal valuri ta’ limitu tal-emissjoni mill-Anness V għad-Direttiva 2010/75/UE għal sustanzi li jniġġsu oħra.

(6)  Għal impjanti ta’ kombustjoni li, fi kwalunkwe ħin matul il-perjodu 2001-2010, kienu qed jikkoinċineraw skart (eskluż l-iskart li huwa “bijomassa” skont id-definizzjoni fl-Artikolu 3(31)(b) tad-Direttiva 2010/75/UE u kienu konsegwentement koperti mid-Direttiva 2000/76/KE tal-Parlament Ewropew u tal-Kunsill ta’ l-4 ta’ Diċembru 2000 dwar l-inċinerazzjoni ta’ skart (ĠU L 332, 28.12.2000, p. 91)), l-ammont ta’ skart inċinerat matul dak il-perjodu ma għandux ikun inkluż f'dan il-punt.

(7)  Ara t-taqsima 3.1.1 ta’ dan l-Anness rigward il-kundizzjonijiet ta’ referenza applikabbli.

(8)  Ara t-taqsima 3.1.2 ta’ dan l-Anness.

(9)  “fjuwil solidu indiġenu” tfisser fjuwil solidu naturali mqabbad f'impjant ta’ kombustjoni, iddisinjat speċifikament għal dak il-fjuwil u li huwa estratt lokalment.

(10)  Din tapplika għal impjanti ta’ kombustjoni li kienu qed iqabbdu fjuwil solidu indiġenu fil-perjodu 2001-2010.

(11)  “rata ta’ desulfurizzazzjoni” tfisser il-porzjon fuq perjodu speċifiku tal-kwantità ta’ kubrit li ma jintremiex fl-arja minn impjant ta’ kombustjoni meta mqabbla mal-kwantità ta’ kubrit li jinstab fil-fjuwil solidu introdott fil-faċilitajiet tal-impjant ta’ kombustjoni u li jintuża fl-impjant matul l-istess perjodu ta’ żmien.

(12)  Il-valuri ta’ limitu tal-emissjonijiet relevanti għall-kalkolu tal-limiti massimi tal-emissjonijiet mhumiex efettwati mill-inklużjoni ta’ impjant fil-Pjan Nazzjonali ta’ Tnaqqis tal-Emissjonijiet fl-Artikolu 4(6) tad-Direttiva 2001/80/KE.

(13)  Din il-ħarsa ġenerali mhijiex dettaljata. B'mod partikolari, ma tkoprix sitwazzjonijiet fejn impjant ta’ kombustjoni ġie estiż b'tal-inqas 50 MW bejn is-27 ta’ Novembru 2002 u l-31 ta’ Diċembru 2010, li f'dan il-każ anki l-valuri ta’ limitu tal-emissjonijiet elenkati fil-Parti B tal-Annessi III sa VII għad-Direttiva 2001/80/KE huma relevanti (applikazzjoni tal-Artikolu 10 tad-Direttiva 2001/80/KE).