—

Filwaqt li n-notifika tal-PŻE ta’ April 2010 ppjanat għal defiċit ta’ 4,1 % tal-PDG fl-2010, l-eżitu reali kien konsiderevolment aħjar b’defiċit ta’ 2,5 % tal-PDG.

—

L-eżitu tad-defiċit li kien aħjar milli ppjanat huwa primarjament minħabba tkabbir ekonomiku akbar milli mistenni u sitwazzjoni aħjar fis-suq tax-xogħol li ta spinta lid-dħulijiet mit-taxxa (partikolarment mill-VAT u t-taxxa fuq l-introjtu), filwaqt li t-tkabbir tan-nefqa baqa’ kumplessivament imrażżan.

—

It-tbassir tar-rebbiegħa 2011 mis-servizzi tal-Kummissjoni jipprojetta li d-defiċit jinżel aktar għal 1 % tal-PDG fl-2011. Bl-istess mod, l-aġġornament tal-2011 tal-programm ta’ stabilità jipprojetta defiċit ta’ 0,9 % tal-PDG fl-2011. It-titjib tal-bilanċ fiskali mis-sena preċedenti huwa xprunat minn fatturi ċikliċi, li jirriflettu l-kontinwazzjoni mistennija tal-attività ekonomika relattivament robusta, u xi żidiet ta’ taxxa diskrezzjonarji (l-aktar taxxi fuq l-enerġija u l-prodotti) b’valur ta’ madwar 0,5 % tal-PDG. Huwa previst kemm mis-servizzi tal-Kummissjoni kif ukoll fl-aġġornament tal-2011 tal-programm ta’ stabilità li d-defiċit jitjieb aktar marġinalment għal 0,7 % tal-PDG fl-2012.

—

Skont it-tbassir tar-rebbiegħa 2011 mis-servizzi tal-Kummissjoni u l-bilanċi strutturali (rikalkolati mis-servizzi tal-Kummissjoni abbażi tal-informazzjoni fl-aġġornament tal-aħħar programm ta’ stabilità, bl-użu tal-metodoloġija maqbula bejn kulħadd) fl-2011, il-bilanċ strutturali huwa stmat li jilħaq livell aktar favorevoli mill-objettiv ta’ terminu medju, li huwa stipulat mill-awtoritajiet Finlandiżi bħala surplus strutturali ta’ 0,5 % tal-PDG. Madankollu, il-bilanċ strutturali huwa stmat li jiddgħajjef kemm xejn u jispiċċa fin-negattiv fit-terminu l-medju. It-tnaqqis li jidher fl-estimi tal-bilanċ strutturali jirriżulta minn defiċit nominali ġeneralment stabbli fi sfond ta’ projettazzjonijiet favorevoli għat-tkabbir ekonomiku li jxejjen id-diskrepanza fl-output li bħalissa hija kbira. Konsegwentement, u sakemm ma jittiħdux aktar miżuri, fl-2015 il-bilanċ baġitarju, wara li jitnaqqsu l-fatturi ċikliċi u l-miżuri ta’ darba u oħrajn temporanji, bħalissa qed jiġi stmat li jiċċaqlaq kemm xejn taħt il-parametru referenzjarju minimu ta’ - 1,2 % tal-PDG, li fi flutwazzjonijiet ċikliċi normali jiżgura marġini ta’ sikurezza kontra l-ksur tat-3 % tal-valur referenzjarju tal-PDG. Il-projettazzjonijiet tal-programm ta’ stabilità, li jestendu sal-2015, ibassru li d-defiċit tal-amministrazzjoni pubblika jistabilizza għal madwar 1 % tal-PDG fl-2013-2015.

—

It-tbassir tar-rebbiegħa 2011 mis-servizzi tal-Kummissjoni jipprojetta li l-proporzjon ta’ dejn jiżdied minn 48,4 % tal-PDG irreġistrat fl-2010 għal 52,2 % tal-PDG fl-2012. L-aġġornament tal-programm ta’ stabilità jipprojetta li l-proporzjon tad-dejn jitla’ għal 51,3 % tal-PDG sal-2012.