11.5.2007

MT

Il-Ġurnal Uffiċjali ta’ l-Unjoni Ewropea

L 122/30

---

DEĊIŻJONI TAL-KUNSILL

tat-18 ta’ Settembru 2006

dwar l-iffirmar u l-applikazzjoni provviżorja tal-Ftehim bejn il-Komunità Ewropea u r-Repubblika tal-Paragwaj dwar ċerti aspetti tas-servizzi ta’ l-ajru

(2007/323/KE)

IL-KUNSILL TA’ L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 80(2) flimkien ma’ l-ewwel sentenza ta’ l-ewwel subparagrafu ta’ l-Artikolu 300(2) tiegħu,

Wara li kkunsidra l-proposta mill-Kummissjoni,

Billi:

(1)	Fil-5 ta’ Ġunju 2003, il-Kunsill iddeċieda li jawtorizza lill-Kummissjoni tiftaħ negozjati ma’ pajjiżi terzi dwar il-bdil ta’ ċerti dispożizzjonijiet fi ftehim bilaterali eżistenti bi ftehim Komunitarju.

(2)	Il-Kummissjoni nnegozjat, f'isem il-Komunità, Ftehim mar-Repubblika tal-Paragwaj dwar ċerti aspetti tas-servizzi ta’ l-ajru konformement mal-mekkaniżmi u d-direttivi fl-Anness ma’ dik id-Deċiżjoni.

(3)	Suġġett għall-konklużjoni tiegħu f'data aktar 'il quddiem, il-Ftehim negozjat mill-Kummissjoni għandu jiġi ffirmat u applikat provviżorjament,

IDDEĊIEDA KIF ĠEJ:

Artikolu 1

L-iffirmar tal-Ftehim bejn il-Komunità Ewropea u r-Repubblika tal-Paragwaj dwar ċerti aspetti tas-servizzi ta’ l-ajru huwa b'dan approvat f'isem il-Komunità, suġġett għall-konklużjoni tal-Ftehim imsemmi.

It-test tal-Ftehim huwa anness ma’ din id-Deċiżjoni.

Artikolu 2

Il-President tal-Kunsill huwa b'dan awtorizzat jinnomina l-persuna jew il-persuni bis-setgħa li jiffirmaw il-Ftehim.

Artikolu 3

Sa meta jidħol fis-seħħ, il-Ftehim għandu jiġi applikat provviżorjament mill-ewwel jum ta’ l-ewwel xahar wara d-data li fiha l-partijiet ikunu nnotifikaw lil xulxin bit-tlestija tal-proċeduri meħtieġa għal dan il-għan.

Artikolu 4

Il-President tal-Kunsill huwa b'dan awtorizzat jagħmel in-notifika prevista fl-Artikolu 9(2) tal-Ftehim.

---

11.5.2007

MT

Il-Ġurnal Uffiċjali ta’ l-Unjoni Ewropea

L 122/31

---

FTEHIM

bejn il-Komunità Ewropea u r-Repubblika tal-Paragwaj dwar ċerti aspetti tas-servizzi ta’ l-ajru

IL-KOMUNITÀ EWROPEA

minn naħa waħda, u

IR-REPUBBLIKA TAL-PARAGWAJ

min-naħa l-oħra

(minn hawn ‘il quddiem msejħa “l-Partijiet”)

JINNUTAW li ġew konklużi ftehim ta’ servizzi bilaterali ta’ l-ajru bejn diversi Stati Membri tal-Komunità Ewropea u r-Repubblika tal-Paragwaj li fihom dispożizzjonijiet li jmorru kontra l-liġi Komunitarja Ewropea,

JINNUTAW li l-Komunità Ewropea għandha l-kompetenza esklussiva fir-rigward ta’ bosta aspetti li jistgħu jiġu inklużi fi ftehim ta’ servizzi bilaterali ta’ l-ajru bejn l-Istati Membri tal-Komunità Ewropea u pajjiżi terzi,

JINNUTAW li skond il-liġi tal-Komunità Ewropea t-trasportaturi bl-ajru Komunitarji stabbiliti f’xi wieħed mill-Istati Membri għandhom id-dritt għal aċċess mhux diskriminatorju għar-rotot ta’ l-ajru bejn l-Istati Membri tal-Komunità Ewropea u pajjiżi terzi,

JIKKUNSIDRAW il-ftehim bejn il-Komunità Ewropea u ċerti pajjiżi terzi li jipprovdu l-possibbiltà għaċ-ċittadini ta’ tali pajjiżi terzi li jakkwistaw sehem fi trasportaturi bl-ajru liċenzjati konformement mal-liġi tal-Komunità Ewropea,

JAGĦRFU li ċerti dispożizzjonijiet tal-ftehim dwar servizzi bilaterali ta’ l-ajru bejn Stati Membri tal-Komunità Ewropea u r-Repubblika tal-Paragwaj, li huma kontra l-liġi Komunitarja Ewropea, għandhom jinġiebu konformi ma’ dawn sabiex tiġi stabbilita bażi legali tajba għas-servizzi ta’ l-ajru bejn il-Komunità Ewropea u r-Repubblika tal-Paragwaj u sabiex tiġi ppreżervata l-kontinwità ta’ tali servizzi ta’ l-ajru,

JINNUTAW li mhuwiex għan tal-Komunità Ewropea, bħala parti minn dawn in-negozjati, li jiżdied il-volum totali ta’ traffiku ta’ l-ajru bejn il-Komunità Ewropea u r-Repubblika tal-Paragwaj, li jiġi milqut il-bilanċ bejn trasportaturi bl-ajru tal-Komunità u trasportaturi bl-ajru tar-Repubblika tal-Paragwaj, jew li jiġu negozjati emendi għad-dispożizzjonijiet ta’ ftehim bilaterali eżistenti dwar servizzi ta’ l-ajru fir-rigward ta’ drittijiet tat-traffiku.

FTIEHMU KIF ĠEJ:

Artikolu 1

Dispożizzjonijiet ġenerali

1.   Għall-finijiet ta’ dan il-Ftehim “Stati Membri” għandha tfisser l-Istati Membri tal-Komunità Ewropea, “l-Istati Membri tal-LACAC” għandha tfisser l-Istati Membri tal-Kummissjoni ta’ l-Avjazzjoni Ċivili ta’ l-Amerika Latina.

2.   Ir-referenzi f’kull ftehim elenkat fl-Anness I għal ċittadini ta’ l-Istat Membru li jkun Parti għall-ftehim konċernat għandhom jinftiehmu bħala referenzi għaċ-ċittadini ta’ l-Istati Membri tal-Komunità Ewropea.

3.   Ir-referenzi f’kull ftehim elenkat fl-Anness I għal trasportaturi bl-ajru jew linji ta’ l-ajru ta’ l-Istat Membru li jkun Parti għall-ftehim konċernat għandhom jinftiehmu bħala referenzi għat-trasportaturi bl-ajru jew linji ta’ l-ajru nominati minn dak l-Istat Membru.

Artikolu 2

Nomina, Awtorizzazzjoni u Revoka

1.   Id-dispożizzjonijiet fil-paragrafi 2 u 3 għandhom jieħdu post id-dispożizzjonijiet korrispondenti fl-Artikoli elenkati fl-Anness II (a) u (b) rispettivament, relattivament għan-nomina ta’ trasportatur bl-ajru mill-Istat Membru kkonċernat, għall-awtorizzazzjonijiet u permessi tiegħu mogħtija mir-Repubblika tal-Paragwaj, u relattivament għar-rifjut, revoka, sospensjoni jew limitazzjoni ta’ l-awtorizzazzjonijiet jew permessi tat-trasportatur bl-ajru, rispettivament.

Id-dispożizzjonijiet fil-paragrafi 4 u 5 għandhom jieħdu post id-dispożizzjonijiet korrispondenti fl-Artikoli elenkati fl-Anness II (a) u (b) rispettivament, relattivament għan-nomina ta’ trasportatur bl-ajru mir-Repubblika tal-Paragwaj, għall-awtorizzazzjonijiet u permessi tiegħu mogħtija mill-Istat Membru, u relattivament għar-rifjut, revoka, sospensjoni jew limitazzjoni ta’ l-awtorizzazzjonijiet jew permessi tat-trasportatur bl-ajru, rispettivament.

2.   Malli tirċievi nomina mingħand Stat Membru, ir-Repubblika tal-Paragwaj għandha tagħti l-awtorizzazzjonijiet u l-permessi adegwati bl-anqas dewmien proċedurali, sakemm:

(i)	it-trasportatur bl-ajru jkun stabbilit, skond it-Trattat li jistabbilixxi l-Komunità Ewropea, fit-territorju ta’ l-Istat Membru nominanti u jkollu Liċenzja Operattiva valida skond il-liġi tal-Komunità Ewropea; u

(ii)	ikun eżerċitat u miżmum kontroll regolatorju effettiv tat-trasportatur bl-ajru mill-Istat Membru responsabbli għall-ħruġ taċ-Ċertifikat tiegħu ta’ Operatur ta’ l-Ajru u l-awtorità aeronawtika relevanti tkun identifikata biċ-ċar fin-nomina; u

(iii)

it-trasportatur bl-ajru jkun il-proprjetà ta’, direttament jew permezz ta’ maġġoranza azzjonarja, u jkun effettivament kontrollat mill-Istati Membri u/jew miċ-ċittadini ta’ l-Istati Membri, jew minn Stati oħra elenkati fl-Anness III u/jew miċ-ċittadini ta’ tali Stati oħra.

3.   Ir-Repubblika tal-Paragwaj tista’ tirrifjuta, tirrevoka, tissospendi jew tillimita l-awtorizzazzjonijiet jew il-permessi ta’ trasportatur bl-ajru nominat minn Stat Membru fejn:

(i)	it-trasportatur bl-ajru ma jkunx stabbilit, taħt it-Trattat li jistabbilixxi l-Komunità Ewropea, fit-territorju ta’ l-Istat Membru nominanti jew ma jkollux Liċenzja Operattiva valida skond il-liġi tal-Komunità Ewropea; jew

(ii)	ma jkunx eżerċitat jew miżmum kontroll regolatorju effettiv tat-trasportatur bl-ajru mill-Istat Membru responsabbli għall-ħruġ taċ-Ċertifikat tiegħu ta’ Operatur ta’ l-Ajru, jew l-awtorità aeronawtika relevanti ma tkunx identifikata biċ-ċar fin-nomina; jew

(iii)

it-trasportatur bl-ajru ma jkunx il-proprjetà ta’ u ma jkunx effettivament kontrollat direttament jew permezz ta’ maġġoranza azzjonarja mill-Istati Membri u/jew minn ċittadini ta’ Stati Membri, jew minn Stati oħra elenkati fl-Anness III u/jew miċ-ċittadini ta’ tali Stati oħra; jew

(iv)

it-trasportatur bl-ajru jkun diġà awtorizzat li jopera taħt ftehim bilaterali bejn ir-Repubblika tal-Paragwaj u Stat Membru ieħor u r-Repubblika tal-Paragwaj turi li, bl-eżerċizzju tad-drittijiet fuq it-traffiku taħt dan il-Ftehim fuq rotta li tinkludi punt f’dak l-Istat Membru l-ieħor, dan jevita r-restrizzjonijiet fuq id-drittijiet tat-traffiku imposti minn dak il-ftehim l-ieħor; jew

(v)

it-trasportatur bl-ajru jkollu Ċertifikat ta’ Operatur ta’ l-Ajru maħruġ minn Stat Membru u ma jkun jeżisti ebda ftehim bilaterali dwar is-servizzi ta’ l-ajru bejn ir-Repubblika tal-Paragwaj u dak l-Istat Membru, u lit-trasportatur bl-ajru nominat mir-Repubblika tal-Paragwaj jkunu ġew miċhuda d-drittijiet tat-traffiku lejn dak l-Istat Membru.

Bl-eżerċizzju tad-dritt tagħha taħt dan il-paragrafu, ir-Repubblika tal-Paragawaj ma għandhiex tiddiskrimina bejn trasportaturi bl-ajru Komunitarji abbażi tan-nazzjonalità.

4.   Malli jirċievi nomina mingħand ir-Repubblika tal-Paragwaj, Stat Membru għandu jagħti l-awtorizzazzjonijiet u l-permessi adegwati bl-anqas dewmien proċedurali, sakemm:

(i)	it-trasportatur bl-ajru jkun stabbilit fir-Repubblika tal-Paragwaj; u

(ii)	ir-Repubblika tal-Paragwaj ikollha u żżomm kontroll regolatorju effettiv tat-trasportatur bl-ajru u tkun responsabbli mill-ħruġ taċ-Ċertifikat tiegħu ta’ Operatur ta’ l-Ajru; u

(iii)

it-trasportatur bl-ajru jkun il-proprjetà ta’ u jkun effettivament kontrollat direttament jew permezz ta’ maġġoranza azzjonarja mill-Istati Membri tal-LACAC u/jew minn ċittadini ta’ Stati Membri tal-LACAC.

5.   Stat Membru jista’ jirrifjuta, jirrevoka, jissospendi jew jillimita l-awtorizzazzjonijiet jew il-permessi ta’ trasportatur bl-ajru mir-Repubblika tal-Paragwaj fejn:

(i)	it-trasportatur bl-ajru ma jkunx stabbilit fir-Repubblika tal-Paragwaj; jew

(ii)	il-kontroll regolatorju effettiv tat-trasportatur bl-ajru ma jkunx eżerċitat jew miżmum mir-Repubblika tal-Paragwaj jew ir-Repubblika tal-Paragwaj ma tkunx responsabbli mill-ħruġ taċ-Ċertifikat tiegħu ta’ Operaturi ta’ l-Ajru; jew

(iii)

it-trasportatur bl-ajru ma jkunx il-proprjetà ta’ u ma jkunx effettivament kontrollat direttament jew permezz ta’ maġġoranza azzjonarja mill-Istati Membri tal-LACAC u/jew minn ċittadini ta’ Stati Membri tal-LACAC; jew

(iv)

it-trasportatur bl-ajru jkun diġà awtorizzat li jopera taħt ftehim bilaterali bejn l-Istat Membru u Stat Membru ieħor tal-LACAC, u l-Istat Membru juri li, bl-eżerċizzju tad-drittijiet fuq it-traffiku taħt dan il-Ftehim fuq rotta li tinkludi punt f’dak l-Istat Membru ieħor tal-LACAC, dan jevita r-restrizzjonijiet fuq id-drittijiet tat-traffiku imposti minn dak il-ftehim l-ieħor.

Artikolu 3

Sigurtà

1.   Id-dispożizzjonijiet fil-paragrafu 2 għandhom jikkomplementaw l-Artikoli elenkati fl-Anness II(ċ).

2.   Fejn Stat Membru jkun innomina trasportatur bl-ajru li l-kontroll regolatorju tiegħu ikun eżerċitat u miżmum minn Stat Membru ieħor, id-drittijiet tar-Repubblika tal-Paragwaj taħt id-dispożizzjonijiet ta’ sigurtà tal-ftehim bejn l-Istat Membru li nnomina t-trasportatur bl-ajru u r-Repubblika tal-Paragwaj għandhom japplikaw b’mod ugwali fir-rigward ta’ l-adozzjoni, l-eżerċizzju jew iż-żamma ta’ l-istandards ta’ sigurtà minn dak l-Istat Membru ieħor u fir-rispett ta’ l-awtorizzazzjoni ta’ l-operazzjoni ta’ dak it-trasportatur bl-ajru.

Artikolu 4

It-tassazzjoni tal-karburant ta’ l-avjazzjoni

1.   Id-dispożizzjonijiet fil-paragrafi 2 u 3 jikkomplementaw id-dispożizzjonijiet korrispondenti fl-Artikoli elenkati fl-Anness II(d).

2.   Minkejja kull dispożizzjoni oħra kontra dan, xejn f’kull wieħed mill-ftehim elenkati fl-Anness II(d) m’għandu jżomm l-Istati Membri milli jimponu taxxi, imposti, dazji, drittijiet jew ħlasijiet fuq karburant li jiġi fornut fit-territorju tagħhom għall-użu f’vettura ta’ l-ajru ta’ trasportatur bl-ajru nominat tar-Repubblika tal-Paragwaj li jopera bejn punt fit-territorju ta’ Stat Membru u punt ieħor fit-territorju ta’ dak l-Istat Membru jew fit-territorju ta’ Stat Membru ieħor.

3.   Minkejja kull dispożizzjoni oħra għall-kuntrarju, xejn f’kull wieħed mill-ftehim elenkati fl-Anness II(d) m’għandu jżomm Stat Membru milli jimponi, fuq bażi mhux diskriminatorja, taxxi, imposti, dazji, drittijiet jew ħlasijiet fuq karburant li jiġi fornut fit-territorju tiegħu għall-użu f’vettura ta’ l-ajru ta’ trasportatur bl-ajru nominat ta’ Stat Membru li jopera bejn punt fit-territorju tar-Repubblika tal-Paragwaj u punt ieħor fit-territorju tar-Repubblika tal-Paragwaj jew fit-territorju ta’ Stat Membru ieħor tal-LACAC.

Artikolu 5

Tariffi għat-trasport

1.   Id-dispożizzjonijiet fil-paragrafi 2 u 3 għandhom jikkomplementaw l-Artikoli elenkati fl-Anness II(e).

2.   It-tariffi li jiġu imposti mit-trasportatur jew trasportaturi bl-ajru nominati mir-Repubblika tal-Paragwaj taħt xi ftehim elenkat fl-Anness I li jkun jinkludi dispożizzjoni elenkata fl-Anness II(e) għal trasport li jseħħ kollu kemm hu fi ħdan il-Komunità Ewropea għandhom ikunu suġġetti għal-liġi tal-Komunità Ewropea. Il-liġi tal-Komunità Ewropea għandha tiġi applikata fuq bażi mhux diskriminatorja.

3.   It-tariffi li jiġu imposti mit-trasportatur jew trasportaturi bl-ajru nominati minn Stat Membru taħt xi ftehim elenkat fl-Anness I li jkun jinkludi dispożizzjoni elenkata fl-Anness II(e) għal trasport bejn ir-Repubblika tal-Paragwaj u xi Stat Membru ieħor tal-LACAC għandhom ikunu suġġetti għal-liġi Paragwajana fir-rigward tal-price leadership. Il-liġi Paragwajana għandha tiġi applikata fuq bażi mhux diskriminatorja.

Artikolu 6

Kompatibbiltà mar-regoli tal-kompetizzjoni

1.   Minkejja kull dispożizzjoni oħra għall-kuntrarju, xejn f’kull wieħed mill-ftehim elenkati fl-Anness I ma għandu:

(i)	jiffavorixxi l-adozzjoni ta’ ftehim bejn intrapriżi, deċiżjonijiet minn assoċjazzjonijiet ta’ impriżi jew prattiċi miftiehma li jipprevjenu, jgħawġu jew jirrestrinġu l-kompetizzjoni,

(ii)	isaħħaħ l-effetti ta’ kwalunkwe ftehim, deċiżjoni jew prattika miftiehma bħal dawn; jew

(iii)

jiddelega lill-operaturi ekonomiċi privati r-responsabbiltà għat-teħid ta’ miżuri li jipprevjenu, jgħawġu jew jirrestrinġu l-kompetizzjoni.

2.   Id-dispożizzjonijiet kontenuti fil-ftehim elenkati fl-Anness I li jkunu inkompatibbli mal-paragrafu 1 ma għandhomx jiġu applikati.

Artikolu 7

Annessi ma’ dan il-ftehim

L-Annessi ma’ dan il-Ftehim għandhom jifformaw parti integranti minnu.

Artikolu 8

Reviżjonijiet jew emendi

Il-Partijiet jistgħu, f’kull waqt, jirrivedu jew jemendaw dan il-Ftehim b’kunsens reċiproku.

Artikolu 9

Dħul fis-seħħ u applikazzjoni provviżorja

1.   Dan il-Ftehim għandu jidħol fis-seħħ meta l-Partijiet ikunu nnotifikaw lil xulxin bil-miktub li l-proċeduri interni rispettivi tagħhom li jkunu meħtieġa għad-dħul fis-seħħ tiegħu ikunu tlestew.

2.   Minkejja l-paragrafu 1, il-Partijiet jaqblu li japplikaw dan il-Ftehim b’mod provviżorju mill-ewwel jum tax-xahar wara d-data li fiha l-Partijiet ikunu nnotifikaw lil xulxin bit-tlestija tal-proċeduri meħtieġa għal dan il-għan.

3.   Dawk il-ftehim u arranġamenti oħra bejn Stati Membri u r-Repubblika tal-Paragwaj li, fid-data tal-firma ta’ dan il-Ftehim, ma jkunux għadhom daħlu fis-seħħ u li ma jkunux qegħdin jiġu applikati provviżorjament huma elenkati fl-Anness I(b). Dan il-Ftehim japplika għal kull tali ftehim u arranġament mad-dħul fis-seħħ jew applikazzjoni provviżorja tiegħu.

Artikolu 10

Terminazzjoni

1.   Fejn jiġi tterminat xi wieħed mill-ftehim elenkati fl-Anness I, id-dispożizzjonijiet kollha ta’ dan il-Ftehim relattivi għall-ftehim konċernat elenkat f’dak l-Anness għandhom jintemmu fl-istess waqt.

2.   Fil-każ li l-ftehim kollha elenkati fl-Anness I jiġu tterminati, dan il-Ftehim jiġi tterminat fl-istess waqt.

---

ANNESS I

Lista ta’ ftehim imsemmija fl-Artikolu 1 ta’ dan il-Ftehim

(a)

Ftehim dwar servizzi ta’ l-ajru bejn ir-Repubblika tal-Paragwaj u Stati Membri tal-Komunità Ewropea li, fid-data tal-firma ta’ dan il-Ftehim, kienu ġew konklużi, iffirmati u/jew qegħdin jiġu applikati provviżorjament — Il-Ftehim dwar it-Trasport bl-Ajru bejn ir-Repubblika tal-Paragwaj u r-Repubblika Federali tal-Ġermanja, iffirmat f’Bonn nhar is-26 ta’ Novembru 1974, minn hawn ‘il quddiem imsejjaħ “il-Ftehim Paragwaj – Ġermanja” fl-Anness II; — Il-Ftehim bejn ir-Repubblika tal-Paragwaj u r-Renju tal-Belġju dwar it-trasport bl-ajru skedat, iffirmat f’Asuncion nhar l-1 ta’ Settembru 1972, kif modifikat permezz tan-Nota Miftiehma iffirmata fi Brussel fit-3 ta’ Settembru 1982, minn hawn ‘il quddiem imsejjaħ “il-Ftehim Paragwaj-Belġju” fl-Anness II; — Il-Ftehim bejn il-Gvern tar-Repubblika tal-Paragwaj u l-Gvern ta’ Spanja dwar it-trasport bl-ajru, iffirmat f’Madrid nhar it-12 ta’ Mejju 1976, kif supplimentat permezz tan-Nota Miftiehma iffirmata f’Asuncion nhar it-2 ta’ Novembru 1978, permezz tan-Nota Miftiehma iffirmata f’Asuncion nhar l-1 ta’ Settembru 1985, permezz tan-Nota Miftiehma iffirmata f’Madrid nhar is-6 ta’ Ottubru 1992, minn hawn ‘il quddiem imsejjaħ “il-Ftehim Paragwaj-Spanja” fl-Anness II; — Il-Ftehim bejn ir-Repubblika tal-Paragwaj u r-Renju ta’ l-Olanda dwar it-trasport bl-ajru skedat, iffirmat fl-Aja nhar is-7 ta’ Frar 1974, minn hawn ‘il quddiem imsejjaħ “il-Ftehim Paragwaj-Olanda” fl-Anness II.

(b)

Ftehim dwar servizzi ta’ l-ajru u arranġamenti oħra inizjalati jew iffirmati bejn ir-Repubblika tal-Paragwaj u Stati Membri tal-Komunità Ewropea li, fid-data ta’ l-iffirmar ta’ dan il-Ftehim, kienu għadhom ma daħlux fis-seħħ u mhumiex qegħdin jiġu applikati provviżorjament. — L-abbozz ta’ Ftehim bejn il-Gvern tar-Repubblika tal-Paragwaj u l-Gvern tar-Repubblika Taljana dwar is-servizzi ta’ l-ajru bejn it-territorji rispettivi tagħhom, inizjalat f’Ruma fit-18 ta’ Lulju 1985 bħala Anness man-Nota Miftiehma dwar il-Konsultazzjonijiet, minn hawn ‘il quddiem imsejjaħ “l-Abbozz ta’ Ftehim Paragwaj – Italja” fl-Anness II; — L-abbozz ta’ Ftehim bejn il-Gvern tar-Repubblika tal-Paragwaj u l-Gvern tar-Renju Unit tal-Gran Brittanja u ta’ l-Irlanda ta’ Fuq dwar servizzi ta’ l-ajru, inizjalat f’Asuncion nhar it-28 ta’ Awwissu 1998 bħala Anness B mal-Protokoll Miftiehem bejn l-awtoritajiet aeronawtiċi tar-Repubblika tal-Paragwaj u tar-Renju Unit, minn hawn ‘il quddiem imsejjaħ “l-Abbozz ta’ Ftehim Paragwaj – Renju Unit” fl-Anness II.

---

ANNESS II

Lista ta’ Artikoli fil-ftehim elenkati fl-Anness I u msemmija fl-Artikoli 2 sa 5 ta’ dan il-ftehim

(a)

Nomina: — l-Artikolu 3 tal-Ftehim Paragwaj – Ġermanja; — l-Artikolu 3 tal-Ftehim Paragwaj – Belġju; — l-Artikolu 3 tal-Ftehim Paragwaj – Spanja; — l-Artikolu 4 ta’ l-Abbozz ta’ Ftehim Paragwaj – Italja; — l-Artikolu 3 tal-Ftehim Paragwaj – Olanda; — l-Artikolu 4 ta’ l-Abbozz ta’ Ftehim Paragwaj – Renju Unit

(b)

Rifjut, Revoka, Sospensjoni jew Limitazzjoni ta’ Awtorizzazzjonijiet jew il-Permessi: — l-Artikolu 4 tal-Ftehim Paragwaj – Ġermanja; — l-Artikolu 4 tal-Ftehim Paragwaj – Belġju; — l-Artikolu 4 tal-Ftehim Paragwaj – Spanja; — l-Artikolu 5 ta’ l-Abbozz ta’ Ftehim Paragwaj – Italja; — l-Artikolu 4 tal-Ftehim Paragwaj – Olanda; — l-Artikolu 5 ta’ l-Abbozz ta’ Ftehim Paragwaj – Renju Unit

(ċ)	Kontroll regolatorju: — l-Artikolu 10 ta’ l-Abbozz ta’ Ftehim Paragwaj – Italja; — l-Artikolu 14 ta’ l-Abbozz ta’ Ftehim Paragwaj – Renju Unit;

(d)

It-Tassazzjoni tal-Karburant ta’ l-Avjazzjoni: — l-Artikolu 6 tal-Ftehim Paragwaj – Ġermanja; — l-Artikolu 5 tal-Ftehim Paragwaj – Belġju; — l-Artikolu 5 tal-Ftehim Paragwaj – Spanja; — l-Artikolu 6 ta’ l-Abbozz ta’ Ftehim Paragwaj – Italja; — l-Artikolu 5 tal-Ftehim Paragwaj – Olanda; — l-Artikolu 8 ta’ l-Abbozz ta’ Ftehim Paragwaj – Renju Unit.

(e)

Tariffi għat-Trasport fi ħdan il-Komunità Ewropea: — l-Artikolu 9 tal-Ftehim Paragwaj – Ġermanja; — l-Artikolu 9 tal-Ftehim Paragwaj – Belġju; — l-Artikolu 6 tal-Ftehim Paragwaj – Spanja; — l-Artikolu 8 ta’ l-Abbozz ta’ Ftehim Paragwaj – Italja; — l-Artikolu 9 tal-Ftehim Paragwaj – Olanda; — l-Artikolu 7 ta’ l-Abbozz ta’ Ftehim Paragwaj – Renju Unit

---

ANNESS III

Lista ta’ Stati oħra msemmija fl-Artikolu 2 ta’ dan il-ftehim

(a)	Ir-Repubblika ta l-Iżlanda (taħt il-Ftehim dwar iż-Żona Ekonomika Ewropea);

(b)	Il-Prinċipat ta’ Liechtenstein (taħt il-Ftehim dwar iż-Żona Ekonomika Ewropea);

(ċ)	Ir-Renju tan-Norveġja (taħt il-Ftehim dwar iż-Żona Ekonomika Ewropea);

(d)	Il-Konfederazzjoni Żvizzera (taħt il-Ftehim bejn il-Komunità Ewropea u l-Konfederazzjoni Żvizzera dwar it-Trasport bl-Ajru).