31.12.2008   

MT

Il-Ġurnal Uffiċjali ta’ l-Unjoni Ewropea

532

(1)

Fi Frar 1994, il-Kunsill impona, bir-Regolament (KE) Nru 229/94 (2) dazji anti-dumping definittivi fuq importazzjonijiet ta’ etanolamini (prodott konċernat) li joriġinaw fl-Istati Uniti ta’ l-Amerika (“USA”). Id-dazji ħadu l-forma ta’ dazji varjabbli bbażati fuq il-prezz minimu fuq it-tliet tipi ta’ etanolamini, jiġifieri monoetanolamina (MEA), dietanolamina (DEA) u trietanolamina (TEA).

(2)

Wara talba mill-Conseil européen des fédérations de l'industrie chimique (CEFIC), fi Frar 1999 inbdiet reviżjoni ta’ skadenza u interim skond l-Artikoli 11(2) u 11(3) tar-Regolament bażiku. Bir-Regolament (KE) Nru 1603/2000 (3) il-Kunsill ikkonkluda dawn ir-reviżjonijiet u impona miżuri anti-dumping definittivi fuq importazzjonijiet ta’ etanolamini li joriġinaw fl-Istati Uniti ta’ l-Amerika. Il-forma tal-miżuri nbidlet meta dawn ħadu l-forma ta’ dazju fiss speċifiku għal kull tunnellata tat-tipi kollha ta’ etanolamini. Tnejn mit-tliet kumpanniji li jibbenefikaw minn dazju anti-dumping definittiv kienu d-Dow Chemical Company u l-Union Carbide Corporation.

(3)

Wara l-irtirar ta’ investiment tan-negozju fl-etanolamini tad-Dow Chemical Company fil-kumpannija INEOS LLC, id-dazju anti-dumping individwali ta’ EUR 69,40 għal kull tunnellata applikabbli għad-Dow Chemical Company kien attribwit lill-INEOS LLC (4). Madankollu, minħabba li fis-6 ta’ Frar 2001, id-Dow Chemical Company akkwistat l-ishma kollha tal-Union Carbide Corporation, kumpannija li tibbenfika minn dazju anti-dumping individwali ta’ EUR 59,25 għal kull tunnellata, id-Dow Chemical Company xorta għadha attiva fin-negozju ta’ etanolamini. Il-Union Carbide Corporation għadha teżisti iżda saret parti mill-grupp Dow Chemical Company u ma għad għandha l-ebda attività indipendenti ta’ produzzjoni.

(4)

Wara l-pubblikazzjoni f’Novembru 2004 ta’ avviż ta’ skadenza imminenti tal-miżuri anti-dumping applikabbli għal importazzjonijiet ta’ etanolamini li joriġinaw fl-Istati Uniti ta’ l-Amerika (5), fil-25 ta’ April 2005, il-Kummissjoni rċeviet talba għal reviżjoni skond l-Artikolu 11(2) tar-Regolament bażiku.

(5)

It-talba saret miċ-CEFIC f’isem il-produtturi li jirrappreżentaw proporzjon maġġuri, f’dan il-każ ta’ aktar minn 75 %, tal-produzzjoni totali tal-Komunità ta’ l-etanolamini.

(6)

It-talba kienet ibbażata fuq ir-raġunijiet li l-iskadenza tal-miżuri x’aktarx ser twassal għal kontinwazzjoni jew rikorrenza ta’ l-iddampjar u ħsara lill-industrija tal-Komunità. Wara li ddeterminat, wara konsultazzjoni mal-Kumitat Konsultattiv, li kienet teżisti xhieda suffiċjenti għall-bidu ta’ reviżjoni ta’ skadenza, il-Kummissjoni bdiet, b’avviż tal-bidu, investigazzjoni (6) skond l-Artikolu 11(2) tar-Regolament bażiku.

(7)

Is-servizzi tal-Kummissjoni avżaw uffiċjalment lill-produtturi Komunitarji, lill-produtturi li jesportaw fl-Istati Uniti ta’ l-Amerika, lill-importaturi/kumerċjanti, lill-industriji utenti magħrufin li huma konċernati, kif ukoll lill-awtoritajiet ta’ l-Istati Uniti ta’ l-Amerika bil-bidu tar-reviżjoni. Il-partijiet interessati ingħataw l-opportunità li jgħarrfu ħsibijiethom bil-miktub u li jitolbu smigħ fil-limitu ta’ żmien stabbilit fl-avviż tal-bidu.

(8)

Is-servizzi tal-Kummissjoni bagħtu kwestjonarji lill-partijiet kollha magħrufin li huma konċernati u lil dawk li talbu kwestjonarju fil-limitu ta’ żmien stabbilit fl-avviż tal-bidu.

(9)

Il-Kummissjoni tat ukoll lill-partijiet konċernati direttament l-opportunità li jgħarrfu ħsibijiethom bil-miktub u li jitolbu smigħ fil-limitu ta’ żmien stabbilit fl-avviż tal-bidu.

(10)

Kienu rċevuti tweġibiet għall-kwestjonarju minn żewġ produtturi esportaturi fl-Istati Uniti ta’ l-Amerika u mid-disa’ importaturi relatati tagħhom fil-Komunità, importatur relatat wieħed fl-Isvizzera, tliet prodotturi Komunitarji (“il-produtturi Komunitarji applikanti”), u utent industrijali wieħed fil-Komunità. Produttur Komunitarju wieħed ma weġibx bis-sħiħ għall-kwestjonarju u ppreżenta biss informazzjoni konċiża u żewġ utenti industrijali fil-Komunità għarrfu ħsibijiethom.

(11)

Is-servizzi tal-Kummissjoni fittxew u vverifikaw l-informazzjoni kollha meqjusa meħtieġa bil-għan li tkun stabbilita l-probabbiltà ta’ kontinwazzjoni jew rikorrenza ta’ importazzjonijiet li jkunu l-oġġett ta’ dumping u ħsara u biex jiġi stabbilit l-interess tal-Komunità. Twettqu żjarat ta’ verifika fil-postijiet tal-kumpanniji li ġejjin:

(12)

L-investigazzjoni rigward il-kontinwazzjoni jew ir-rikorrenza ta’ importazzjonijiet li jkunu l-oġġett ta’ dumping u ħsara kopriet il-perijodu mill-1 ta’ Lulju 2004 sat-30 ta’ Ġunju 2005 (l-“RIP”). L-eżami tax-xejriet rilevanti għall-valutazzjoni tal-probabbiltà ta’ kontinwazzjoni jew rikorrenza ta’ ħsara kopra l-perijodu mill-1 ta’ Jannar 2002 sat-tmiem ta’ l-RIP (“perijodu kunsidrat”).

(13)

Il-prodott konċernat huwa l-istess bħal dak kopert mill-investigazzjonijiet preċedenti. L-etanolamini jinkisbu billi l-ossidu ta’ l-etilene (EO), li huwa fih innifsu riżultat ta’ reazzjoni ta’ ethylene u ossiġnu, jirreaġixxi ma’ l-ammonja. Din is-sintesi twassal għal tliet reazzjonijiet li jikkompetu u għal tliet tipi differenti ta’ etanolamini: monoetanolamina (MEA), dietanolamina (DEA) u trietanolamina (TEA), skond in-numru ta’ drabi li l-EO jintrabat. In-numru massimu ta’ kombinazzjonijiet huwa limitat bin-numru ta’ elementi ta’ l-idroġenu fl-ammonja, jiġifieri tlieta. Il-proporzjonijiet tat-tliet tipi fl-eżitu totali huma determinati mid-disinn ta’ l-istallazzjoni tal-produzzjoni, iżda jistgħu, sa ċertu punt, ikunu kontrollati mir-relazzjoni ammonja/EO (ir-relazzjoni “molar”). L-istallazzjonijiet Komunitarji huma tipikament ibbażati fuq in-nafta bħala trasportatur ta’ l-enerġija, waqt li l-istallazzjonijiet ta’ l-Istati Uniti huma bbażati fuq il-gass naturali.

(14)

Il-prodott konċernat jintuża bħala intermedjarju u/jew addittiv għal surfaktanti użati f’deterġenti u prodotti għall-kura personali, kosmetiċi, fertilizzanti u aġenti għall-protezzjoni ta’ l-għelejjel (glifosati), inibituri tal-korrużjoni, żjut għal-lubrikazzjoni, awżiljarji tat-tessuti u rattaba tat-tessuti (fabric softeners) (esterkwati), kimiċi għall-fotografika, karta u xogħlijiet tal-metall, bħala għajnuna għad-dħin u l-għaqda għall-produzzjoni tas-siment u bħala għajnuna għall-assorbiment għall-għerik tal-gass (il-gass jissaffa billi jitneħħew l-aċidi). Sa minn tard fl-2004, il-bidu ta’ l-2005, il-prodott beda jintuża wkoll dejjem aktar għat-trattament ta’ l-injam. Finalment, il-prodott jista’ jintuża wkoll mill-manifatturi nfushom jew mill-manifatturi relatati tagħhom fil-produzzjoni ta’ ethylene amines.

(15)

Bħal fl-investigazzjonijiet preċedenti, intwera li l-prodott konċernat prodott fl-Istati Uniti ta’ l-Amerika u mibjugħ lill-Komunità huwa identiku f’termini ta’ karatterisitiċi fiżiċi u tekniċi għall-prodott li huwa prodott u mibjugħ fil-Komunità mill-produtturi Komunitarji u li ma hemm l-ebda differenza fl-użu bejn iż-żewġ prodotti. Instab ukoll li l-prodott konċernat prodott fl-Istati Uniti ta’ l-Amerika u mibjugħ lill-Komunita huwa identiku għal dak mibjugħ fis-suq domestiku ta’ l-Istati Uniti. Għalhekk, dawn il-prodotti kollha għandhom ikunu kunsidrati li huma prodotti simili fit-tifsira ta’ l-Artikolu 1(4) tar-Regolament bażiku.

(16)

Skond l-Artikolu 11(2) tar-regolament bażiku, kien eżaminat jekk kienx qed isir dumping bħalissa u, jekk dan huwa minnu, jekk l-iskadenza tal-miżuri hijiex probabbli li twassal għal kontinwazzjoni jew rikorrenza ta’ importazzjonijiet li huma l-oġġett ta’ dumping.

(17)

Mill-erba’ produtturi ta’ l-Istati Uniti li jesportaw imsemmijin fl-ilment, tnejn ikkooperaw fl-investigazzjoni.

(18)

Iż-żewġ produtti li jesportaw li kkooperaw irrappreżentaw 100 % ta’ l-importazzjonijiet lejn il-Komunità waqt l-RIP, li kienu jammontaw għal 41 000 tunnellata. L-importazzjonijiet fil-Komunità tal-prodott konċernat li joriġinaw fl-Istati Uniti ta’ l-Amerika rrappreżentaw 16,7 % tal-konsum Komunitarju waqt l-RIP bi tnaqqis minn 29 % waqt il-perijodu ta’ investigazzjoni preċedenti (1998).

(19)

Rigward iż-żewġ produtturi li jesportaw ta’ l-Istati Uniti li kkooperaw, kien stabbilit il-valur normali għal kull tip ta’ prodott konċernat, ibbażat fuq il-prezz imħallas jew pagabbli fis-suq domestiku fl-Istati Uniti ta’ l-Amerika minn konsumaturi mhux relatati skond l-Artikolu 2(1) tar-Regolament bażiku, għaliex dan il-bejgħ instab li sar fi kwantitajiet suffiċjenti u waqt l-andament ordinarju tal-kummerċ.

(20)

Bħal fl-investigazzjoni preċedenti ta’ reviżjoni oriġinali, din l-investigazzjoni għal darba oħra wriet li ż-żewġ produtturi li jesportaw ta’ l-Istati Uniti li kkoperaw esportaw il-prodott konċernat lill-Komunità permezz ta’ kumpanniji li huma relatati. Bħala konsegwenza, u skond l-Artikolu 2(9) tar-Regolament bażiku, il-prezzijiet ta’ l-esportazzjoni kienu mibnijin abbażi tal-prezzijiet li bihom il-prodott importat kien mibjugħ mill-ġdid l-ewwel lill-konsumaturi indipendenti fil-Komunità. Ingħata spazju għall-ispejjeż li saru bejn l-importazzjoni u l-bejgħ mill-ġdid, inkluż l-ispejjeż tal-bejgħ, ġenerali u amministrattivi u l-profitt imwettaq fil-Komunità mill-kumpanniji ta’ importazzjoni waqt l-RIP.

(21)

Il-valur normali tqabbel mal-prezz ta’ l-esportazzjoni medju għal kull tip ta’ prodott konċernat, fuq bażi ex-works u fl-istess livell ta’ kummerċ. Skond l-Artikolu 2(10) tar-Regolament bażiku, u għall-fini li jkun żgurat tqabbil ġust, kienu kunsidrati d-differenzi fil-fatturi li kienu mitlubin u murijin li jaffetwaw il-prezz u l-komparabbiltà tal-prezz. Saru aġġustamenti għal trasport tal-merkanzija fl-art u fl-oċeani, tnaqqis differiti, spejjeż ta’ maniġġar u mballaġġ, spejjeż ta’ kreditu u dazji ta’ importazzjoni, li kollha tnaqqsu mill-prezzijiet tal-bejgħ mill-ġdid sabiex tintlaħaq il-bażi ta’ ex-works.

(22)

Skond l-Artikolu 2(11) tar-Regolament bażiku, il-marġni ta’ importazzjonijiet li huma l-oġġett ta’ dumping kien stabbilit għal kull tip ta’ prodott abbażi ta’ paragun tal-valur normali medju peżat mal-prezzijiet ta’ l-esportazzjoni medji peżati fl-istess livell ta’ kummerċ. Dan it-tqabbil wera l-eżistenza ta’ importazzjonijiet li huma l-oġġett ta’ dumping waqt l-RIP, anke jekk f’livell aktar baxx minn dak stabbilit fir-reviżjoni preċedenti. Il-marġni ta’ importazzjonijiet li huma l-oġġett ta’ dumping medju peżat imfisser bħala perċentwali tal-valur CIF fil-fruntiera Komunitarja kien ta’ 4,8 % għall-INEOS u 20,3 % għad-Dow Chemical.

(23)

Wara l-analiżi ta’ l-eżistenza ta’ importazzjonijiet li huma l-oġġett ta’ dumping waqt l-RIP, kienet eżaminata l-probabbiltà ta’ kontinwazzjoni ta’ importazzjonijiet li huma l-oġġett ta’ dumping.

(24)

It-tneħħija tal-miżuri tkun tippermetti lill-esportaturi li jnaqqsu l-prezzijiet ta’ l-esportazzjoni tagħhom. Tnaqqis fil-prezzijiet ta’ l-esportazzjoni jagħmel lill-prodott ta’ l-Istati Uniti aktar attraenti fis-suq Komunitarju. Kieku l-prezzijiet ta’ l-esportazzjoni kellhom jitnaqqsu skond il-livell tad-dazji, il-marġni ta’ l-importazzjonijiet li huma l-oġġett ta’ dumping osservati waqt l-RIP jkunu 13,4 % għall-INEOS u 28,3 % għad-Dow Chemical.

(25)

Huwa stmat li l-kapaċità ta’ produzzjoni mhux użata fl-Istati Uniti waqt l-RIP hija madwar 90 000 tunnellata. Din kienet kalkulata abbażi ta’ informazzjoni minn żewġ produtturi li jesportaw kif ukoll minn informazzjoni minn ġurnali ewlenin dwar is-suq. Meta mqabbel ma’ kapaċità totali istallata stmata fl-Istati Uniti ta’ l-Amerika ta’ 650 000 tunnellata, it-total stmat tad-domanda sodisfatta u l-użu captive ta’ 560 000 tunnellata jimplika rata ta’ utilizzazzjoni tal-kapaċita ta’ 86 %, li huwa pjuttost baxx meta jkunu kunsidrati l-kondizzjonijiet tas-suq favorevoli waqt l-RIP. Ir-rata ta’ utilizzazzjoni tal-kapaċità relattivament baxxa kienet konsegwenza ta’ problemi operattivi f’ċerti faċilitajiet tal-produzzjoni. Il-kapaċità ta' riżerva ta’ 90 000 tunnellata għandha titqabbel mal-volum ta’ esportazzjonijiet mill-Istati Uniti lill-Komunità waqt l-RIP (41 088 tunnellata) u l-konsum totali tal-Komunità (246 670 tunnellata). Fi kliem ieħor, hemm potenzjal konsiderevoli biex jiżdiedu l-esportazzjonijiet mill-Istati Uniti u biex jieħdu f’idejhom parti kbira mis-suq Komunitarju. Il-propensità ta’ esportazzjonijiet miżjudin lill-Komunità hija appoġġata wkoll mill-espansjoni tal-kapaċità ta’ 45 000 tunnellata li seħħet fl-2006 fil-Messiku u fil-Brażil, it-tnejn swieq ta’ esportazzjoni importanti għall-produtturi ta’ l-Istati Uniti.

(26)

Bħala konklużjoni, hemm xi kapaċità ta' riżerva disponibbli li tista’ tintuża biex ikun prodott aktar l-etanolamini u biex dan jinbiegħ fis-suq Komunitarju jekk jitneħħew il-miżuri.

(27)

Is-suq ta’ l-etanolamini kien ikkaratterizzat minn tkabbir qawwi fid-domanda għad-DEA fis-snin 2000-2001, xprunata mill-użu tad-DEA fil-produzzjoni ta’ l-erbiċidi glifosati, li huma użati fi proċess li jippermetti lil għelejjel ġenetikament modifikati biex jirreżistu t-tali erbiċidi. Id-domanda għat-TEA hija speċifikament immexxija mill-użu fis-settur tas-siment u mill-produtturi tar-rattaba tat-tessuti. Sa mill-2004, is-suq għall-MEA żdied konsiderevolment wara Regolament ta’ l-Istati Uniti, effettiv mill-1 ta’ Jannar 2005, li jipprojbixxi l-użu ta’ prodotti bbażati fuq metall alternattiv għat-trattament ta’ l-injam, li kkawża domanda addizzjonali għall-MEA stmata għal 80 000 tunnellata. Bħala konsegwenza, il-livell tal-prezz dinji ta’ l-etanolamini huwa għoli minħabba domanda għolja.

(28)

L-investigazzjoni wriet li bħala medja, il-prezzijiet domestiċi ta’ l-Istati Uniti huma ogħla mill-prezzijiet medji tal-bejgħ fis-suq Komunitarju. L-utenti industrijali jidhru li jakkwistaw kundizzjonijiet simili fuq iż-żewġt iswieq għaliex ħafna drabi dawn huma kumpanniji multinazzjonali li jinnegozjaw l-akkwist tas-sorsi tagħhom fuq bażi dinjija u jagħżlu l-fornituri li huma kapaċi jfornu fuq skala simili. Madankollu, il-prezz domestiku ta’ l-Istati Uniti għat-tipi kollha ta’ etanolamini nstab li huwa ogħla meta mgħoddi għall-kummerċjanti u d-distributuri. Dan it-tip ta’ bejgħ fis-suq domestiku ta’ l-Istati Uniti huwa tipikament imwettaq fuq il-post (spot basis), waqt li l-bejgħ fis-suq Komunitarju huwa aktar stabbilit abbażi ta’ kuntratt b’terminu fiss. Dan jimplika li l-prezzijiet tal-bejgħ fil-Komunità huma stabbiliti għal perijodu itwal u huma aktar stabbli.

(29)

Il-bejgħ lill-kummerċjanti u d-distributuri miż-żewġ produtturi li jesportaw li kkoperaw jirrappreżenta biss 13 % tal-volumi mibjugħin fis-suq domestiku ta’ l-Istati Uniti u 32 % tal-bejgħ fis-suq Komunitarju, iżda l-prezzijiet domestiċi ta’ l-Istati Uniti kienu bħala medja 35 % ogħla mill-prezzijiet Komunitarji għal dan il-livell ta’ kummerċ. Dan appoġġa l-konklużjoni li, meta tiġi kunsidrata n-natura ta’ bejgħ fuq il-post lill-kummerċjanti u lid-distributuri, il-prezzijiet domestiċi ta’ l-Istati Uniti qed jadattaw aktar rapidament għall-varjazzjonijiet fil-prezz. Għalhekk, fil-kuntest ta’ prezzijiet li qed jiżdiedu, il-prezzijiet domestiċi ta’ l-Istati Uniti ser ikollhom tendenza li jkunu relattivament ogħla mill-prezzijiet Komunitarji. Min-naħa l-oħra, dan il-livell ta’ kummerċ jirrappreżenta l-iżgħar parti tal-bejgħ fis-swieq kemm domestiċi ta’ l-Istati Uniti kif ukoll f’dawk Komunitarji.

(30)

Għall-utenti industrijali, li jikkostitwixxu l-maġġoranza tal-konsumaturi, it-tmiem tal-miżuri probabbilment ma jinfluwenzax il-livell tal-prezz li bih jinbiegħu l-etanolamini fis-suq Komunitarju, għaliex kien osservat li l-piż tal-miżuri nġarr mill-produtturi li jesportaw ta’ l-Istati Uniti. F’dan ix-xenarju, dawn ta’ l-aħħar jistgħu jilħqu bejgħ li jħalli aktar profitt u jkollhom inċentiv biex iżidu l-esportazzjonijiet lejn is-suq Komunitarju. Madankollu, dawn l-utenti industrijali jistgħu jużaw l-għejbien tal-miżuri bħala għodda fin-negozjati biex jiġi akkwistat prezz aħjar kemm mill-produtturi li jesportaw ta’ l-Istati Uniti kif ukoll mill-industrija Komunitarja.

(31)

Il-prezzijiet ta’ l-esportazzjoni tal-prodott meta mqabblin mas-swieq ta’ l-esportazzjoni ewlenin oħrajn, jiġifieri lejn il-Kanada u lejn l-Amerika t’Isfel, ma juru l-ebda struttura regolari. Il-prezzijiet tal-bejgħ huma xi drabi aktar baxxi u xi drabi ogħla milli fl-Istati Uniti ta’ l-Amerika u lejn is-suq Komunitarju skond il-kondizzjonijiet tal-bejgħ. Normalment, volumi aktar baxxi trasbordati jinvolvu prezzijiet tal-bejgħ ogħla.

(32)

Fil-qosor, għaż-żewġ produtturi li jesportaw li kkoperaw, is-suq ta’ l-Istati Uniti fil-prinċipju jibqa’ l-aktar suq tal-bejgħ importanti. Madankollu, jekk jiġi kunsidrat li 17 % tal-produzzjoni kienet esportata waqt l-RIP, il-bejgħ lill-Komunita u lill-bqija tad-dinja jibqa’ jkollu rwol importanti fl-użu ġenerali u l-probabbilità qligħ tal-kapaċitajiet tal-produzzjoni istallati.

(33)

Fuq perijodu ta’ żmien qasir, rigward iż-żewġ produtturi ta’ l-Istati Uniti li kkooperaw, jista’ jkun mistenni li l-volumi ta’ importazzjoni tagħhom ser jibqgħu ta’ l-inqas stabbli. Fil-fatt, anke bil-miżuri fis-seħħ u minkejja l-attrazzjoni tas-suq ta’ l-Istati Uniti, huma xorta komplew iservu lill-klijenti tagħhom ibbażati fil-Komunità. Tnaqqis fil-volumi ta’ esportazzjoni jista’ possibbilment ikun mistenni mill-produttur ta’ l-Istati Uniti INEOS wara li dan jittieħed mill-Innovene, bil-faċilitajiet tal-produzzjoni tiegħu fil-Komunità, ladarba l-kumpannija tkun solviet ix-xkiel fil-faċilitajiet tal-produzzjoni akkwistati u tkun espandiet bl-istallazzjoni ta’ kapaċità ġdida fil-Komunità, li mhijiex mistennija li ssir operattiva qabel l-2008. Fl-istess ħin huwa mistenni li l-produtturi li jesportaw ta’ l-Istati Uniti jkunu sewwew il-ħsara mill-urugan iffaċċjata fit-tieni nofs ta’ l-2005 u jerġgħu jsiru operattivi għal kollox fit-tieni nofs ta’ l-2006, il-bidu ta’ l-2007, biex b’hekk jipproduċu kwantitajiet addizzjonali li jistgħu jinbiegħu fis-suq Komunitarju.

(34)

Rigward il-produtturi ta’ l-Istati Uniti li ma kkooperawx, li kienu jammontaw għal 27 % tal-kapaċità tal-produzzjoni ta’ l-Istati Uniti waqt l-RIP, ma jistax ikun eskluż li jerġgħu jibdew jesportaw mill-ġdid lejn il-Komunità, jekk il-miżuri jitħallew jiskadu.

(35)

Twettqet ukoll analiżi ta’ żviluppi possibbli għal perijodu ta’ żmien medju (sa 5 snin) tal-kapaċità tad-domanda u l-produzzjoni fil-Komunità, fl-Istati Uniti ta’ l-Amerika u fil-kumplament tad-dinja. Kien analizzat ukoll kif is-sitwazzjoni mistennija tad-domanda u l-forniment ser taffettwa l-livelli tal-prezzijiet fil-Komunità. Iċ-ċifri kollha fil-premessi li ġejjin huma bbażati fuq informazzjoni mogħtija mill-kumpanniji BASF, Dow u INEOS u l-pubblikazzjonijiet ta’ referenza ewlenin ta’ l-industrija kimika mill-PCI u t-Tecnon.

(36)

Meta jiġu kunsidrati l-prekawzjonijiet tal-produtturi kemm ta’ l-Istati Uniti kif ukoll Komunitarji dwar il-kapaċità ta’ domanda u produzzjoni futura, it-tkabbir fis-suq Komunitarju huwa previst li jkun aktar baxx milli fil-bqija tad-dinja. Ir-rata ta’ tkabbir medju Komunitarju proġettata fuq bażi annwali hija ta’ madwar 3 % fuq perijodu ta’ żmien medju, meta mqabbla ma’ 7 % fl-Asja u 4,2 % mbassra mad-dinja kollha.

(37)

Fl-2004, id-domanda fis-suq Ewropew qabżet il-kapaċità ta’ produzzjoni istallata Komunitarja b’madwar 40 000 tunnellata. Fl-Istati Uniti ta’ l-Amerika eżistiet sitwazzjoni bil-maqlub, fejn il-kapaċità eżistenti kienet madwar 90 000 tunnellata ogħla mill-użu u l-bejgħ effettivi tal-prodott, li madankollu ma affetwatx b’mod negattiv il-livelli għoljin tal-prezzijiet minħabba problemi operattivi tal-produzzjoni li llimitaw il-forniment lill-konsumaturi. Meta r-rati ta’ tkabbir proġettati jiġu konfrontati bl-espansjonijiet tal-kapaċità mħabbrin, tista’ tkun mistennija xi kapaċità eċċessiva fuq id-domanda fis-suq Komunitarju sa mill-2008, b’mod partikolari minħabba l-implimentazzjoni li x’aktarx ser isseħħ tal-pjanijiet ta’ investiment ta’ l-INEOS fil-Komunità, li żżid il-kapaċità istallata fil-Komunità minn kwart sa terz. Huwa mistenni li tali espansjoni tal-kapaċità ma ssirx operattiva qabel kmieni fl-2008. Għalkemm tali żjieda fil-kapaċità tista’ fl-istess waqt tkun parzjalment ikkumpensata minn tnaqqis fl-importazzjonijiet fil-Komunità u bejgħ ta’ esportazzjoni miżjud mill-produtturi Komunitarji, huwa mistenni li l-kapaċità istallata totali fil-Komunità mill-produtturi kollha ser taqbeż id-domanda fis-suq Komunitarju waqt l-2008.

(38)

Abbażi ta’ l-evidenza għad-dispożizzjoni tal-Kummissjoni, il-kapaċità eċċessiva preżenti fl-Istati Uniti ta’ l-Amerika hija mistennija li tkompli ta’ l-inqas fuq perijodu ta’ żmien qasir minħabba li d-domanda domestika, għalkemm qed tikber, mhux ser tassorbi l-kapaċità addizzjonali li ser terġa’ ssir operattiva. Fuq perijodu ta’ żmien itwal sa l-2010, il-kapaċità eċċessiva hija mistennija li tisparixxi u dan inaqqas l-inċentiv tal-produtturi ta’ l-Istati Uniti għall-esportazzjoni. Fl-istess waqt hemm tbassir ta’ nuqqasijiet sostanzjali fl-Asja. Dan huwa muri mill-fatt li d-Dow Chemical iffurmat joint-venture mal-Petronas, imsejħa Optimal, u istallat kapaċità ta’ 75 000 tunnellata fil-Malasja, iddedikata biex isservi lis-suq Asjatiku ta’ l-etanolamini.

(39)

B’mod aktar ġenerali, sa l-2010, il-kapaċità ta’ produzzjoni dinjija x’aktarx tkun żdiedet minn madwar 1 300 000 tunnellata għal 1 785 000 tunnellata. Din tinkludi kapaċità ġdida istallata fil-Komunità (+ 205 000), fl-Istati Uniti ta’ l-Amerika (+80 000), fl-Għarabja Sawdita (+ 100 000) u fl-Asja (+ 100 000). Id-domanda dinjija b’rata ta’ tkabbir imbassra ta’ 4,2 % sa l-2010 tkun żdiedet bejn 1 550 000 tunnellata u 1 700 000 tunnellata. B’kunsiderazzjoni li xi kapaċità ta’ bilanċ favorevoli huwa dejjem assorbit minn waqfiet għaż-żamma fl-ordni u li għalhekk huwa meħtieġ ċertu lqugħ, it-tbassir għall-2010 juri kapaċità eċċessiva fil-Komunità, ekwilibriju fl-Istati Uniti ta’ l-Amerika u nuqqas fl-Asja u fil-kumplament tad-dinja. Fil-qosor, l-espansjonijiet varji tal-kapaċità ma jindikawx propensità għal produtturi li jesportaw ta’ l-Istati Uniti li jwettqu dumping fis-suq Komunitarju minħabba t-tqabbil probabbli tal-provvista u d-domanda fil-livell dinji. Għandu madankollu jkun innotat li din hija valutazzjoni li tirreferi għall-iżviluppi fuq terminu ta’ żmien medju, jiġifieri 2008-2010.

(40)

Huwa mfakkar li nstab li jeżisti dumping waqt l-RIP għaż-żewġ produtturi li jesportaw li kkooperaw, madankollu f’livell aktar baxx mill-investigazzjoni preċedenti ta’ reviżjoni.

(41)

Meta mqabbel ma’ l-investigazzjoni preċedenti ta’ reviżjoni, is-sehem fis-suq ta’ l-importazzjonijiet ta’ l-Istati Uniti naqas minn 29 % għal 16,7 %. Jidher li hemm kapaċità żejda ta’ 90 000 tunnellata fl-Istati Uniti ta’ l-Amerika, bir-rata ta’ utilizzazzjoni baxxa waqt l-IP tkun konsegwenza ta’ ġrajjiet temporanji, u l-użu ta’ 27 % stmati tal-kapaċità ta’ istallazzjoni ta’ l-Istati Uniti ma setax ikun investigat minħabba n-nuqqas ta’ kooperazzjoni. Ma jistax jitwarrab għal kollox li dawn il-produtturi li ma kkooperawx ser jirritornaw fis-suq Komunitarju bi prezzijiet li hu huma l-oġġett ta’ dumping jekk il-miżuri jitħallew jiskadu. Għalkemm id-domanda fis-suq ta’ l-Istati Uniti hija mistennija li tkun aktar b’saħħitha milli fil-Komunità, il-kapaċità eċċessiva fl-Istati Uniti ta’ l-Amerika hija mistennija biss li tkun assorbita fuq perijodu ta’ żmien medju. Barra minn hekk, sabiex jinżamm il-qligħ tal-kapaċitajiet tal-produzzjoni istallati, bħalissa jeżisti inċentiv għall-produtturi kollha biex iżidu l-bejgħ tagħhom fis-suq Komunitarju, jekk il-miżuri jkunu revokati.

(42)

Bħala konklużjoni, hemm il-probabbiltà ta’ kontinwazzjoni ta’ dumping u riskju ta’ żjieda fil-volum ta’ importazzjonijiet possibbli li twettaq pressjoni ’l isfel fuq il-prezzijiet fil-Komunità, ta’ l-inqas fuq perijodu ta’ żmien qasir, jekk il-miżuri jkunu revokati.

(43)

It-tliet produtturi Komunitarji applikanti kkooperaw bis-sħiħ fl-investigazzjoni. Waqt l-RIP, huma rrappreżentaw 80 % tal-produzzjoni Komunitarja. Hemm produttur Komunitarju addizjonali ta’ appoġġ li ppreżenta informazzjoni b’mod partikolari rigward il-produzzjoni tiegħu iżda li ma weġibx għall-kwestjonarju sħiħ. Għalhekk, huwa kellu jiġi kunsidrat bħala mhux kooperanti.

(44)

Għandu jkun innotat li sa mir-Regolament tal-Kunsill (KE) Nru 1603/2000 ta’ l-20 ta’ Lulju 2000 li ppubblika l-miżuri li bħalissa huma fis-seħħ, il-Union Carbide Ltd (Renju Unit), li ttieħdet mid-Dow Chemical Company, m’għadhiex tipproduċi aktar l-etanolamini fil-Komunità. Barra minn hekk, il-BP Chemicals biddlet isimha għal Innovene u l-Condea biddlet isimha għal Sasol. Finalment, l-INEOS Oxide Ltd., il-kumpannija omm ibbażata fir-Renju Unit ta’ l-INEOS Americas LLC, akkwistat lill-Innovene fis-16 ta’ Diċembru 2005. Iż-żewġ kumpanniji, l-INEOS Americas LLC u l-Innovene, komplew jikkooperaw bis-sħiħ fil-proċedura.

(45)

Fuq din il-bażi, it-tliet produtturi Komunitarji huma l-BASF AG, l-Innovene u s-Sasol u huma jikkostitwixxu l-industrija Komunitarja skond l-Artikolu 4(1) u l-Artikolu 5(4) tar-Regolament bażiku.

(46)

L-investigazzjoni uriet li, bħal fl-investigazzjoni preċedenti ta’ reviżjoni, parti mill-produzzjoni ta’ l-etanolamini fil-Komunità hija intenzjonata għal użu intern jew captive. Is-sehem huwa stmat għal madwar terz tal-produzzjoni totali Komunitarja, bħalma kien waqt l-investigazzjoni preċedenti ta’ reviżjoni. Instabet produzzjoni captivea fil-post ta’ wieħed mill-produtturi inklużi fl-industrija Komunitarja. Dan il-produttur imexxi impjant li huwa mmarkat u użat għall-għan uniku ta’ użu captive. L-investigazzjoni kkonfermat li l-produtturi Komunitarji applikanti ma jixtrux il-prodott konċernat għal għanijiet ta’ kummerċ jew għall-użu captive tagħhom minn partijiet indipendenti, kemm ġewwa kif ukoll barra l-Komunità. L-etanolamina għall-użu captive għalhekk mhijiex kunsidrata li hija f’kompetizzjoni ma’ l-etanolamina disponibbli fis-suq Komunitarju (minn hawn ’il quddiem is-suq ħieles).

(47)

Id-determinazzjoni tal-konsum Komunitarju totali kienet ibbażata fuq il-kombinazzjoni ta’ produzzjoni bit-tneħħija ta’ esportazzjonijiet tal-produtturi kollha fil-Komunità u l-importazzjonijiet minn pajjiżi terzi fis-suq Komunitarju. Meta mqabbel mas-sena 2002, il-konsum waqt l-RIP żdied b’29 % jew bi 83 000 tunnellata. It-tkabbir kien aktar ovvju bejn l-2002 u l-2003 (+ 17 % jew +48 000 tunnellata) iżda kompla waqt l-2004 u l-RIP, għalkemm b’pass aktar bil-mod. Il-konsum kien qed jiżdied bħala konsegwenza tad-domanda akbar għall-etanolamini, abbażi ta’ qasam ta’ applikazzjoni usa’ u dejjem jespandi. L-aktar mexxejja importanti tad-domanda sa mill-2002 kienu d-DEA għall-produzzjoni tal-glifosat, it-TEA għall-esterkwati u l-MEA għat-trattament ta’ l-injam.

(48)

Il-konsum tas-suq ħieles żdied bi 32 % (jew b’60 000 tunnellata) waqt il-perijodu kunsidrat b’żjieda ta’ 20 % (jew 37 000 tunnellata) bejn l-2002 u l-2003.

(49)

Rigward is-suq captive, il-konsum żdied bi 23 % jew bi 22 000 tunnellata minħabba żjieda fl-użu ta’ etanolamini fil-proċessi tal-produzzjoni ta’ kimiċi oħrajn.

(50)

Il-volum ta’ l-importazzjonijiet fil-Komunità mill-Istati Uniti ta’ l-Amerika naqas bi 12 % bejn l-2002 u l-2003 u baqa’ f’dan il-livell sa issa. Is-sehem mis-suq kien determinat abbażi tal-konsum tas-suq ħieles fil-Komunità u naqas minn 24,7 % għal 16,7 % matul il-perijodu kunsidrat, li jikkostitwixxi telf ta’ 8 punti perċentwali. In-nuqqas fl-importazzjonijiet u s-sehem mis-suq bejn l-2002 u l-2003 kkoinċidew ma’ tnaqqis ġenerali ta’ 7 % fil-prezz medju ta’ l-importazzjoni. Bejn l-2002 u l-2003, il-produtturi li jesportaw ta’ l-Istati Uniti ma pparteċipawx fl-espansjoni tal-konsum tas-suq ħieles Komunitarju. Barra minn hekk, wara l-2003, il-produtturi li jesportaw ta’ l-Istati Uniti ma żiedux sehemhom mis-suq, għalkemm il-prezzijiet ta’ l-importazzjoni reġgħu żdiedu. F’suq tal-bejjiegħa, tali attrattiva miżjuda normalment kienet tikkawża bejgħ addizzjonali, iżda l-produtturi li jesportaw ta’ l-Istati Uniti ma ġewx lura lejn is-suq Komunitarju kif mistenni, minħabba problemi operattivi u kondizzjonijiet aktar attraenti fis-suq domestiku ta’ l-Istati Uniti.

(51)

Għandu jkun innotat li l-prezzijiet ta’ hawn fuq inġabru mill-istatistiċi ta’ l-importazzjoni tal-Eurostat. Huma ma jiddistingwux it-taħlita tal-prodotti u jinkludu diversi kondizzjonijiet tal-bejgħ li ma jistgħux jitqabblu bejn l-importazzjonijiet li huma oġġett ta’ dumping u l-prezzijiet tal-produtturi Komunitarji fl-istess livell ta’ kummerċ imwettaq u spejgat fil-premessa (53) hawn isfel. Matul il-perijodu kunsidrat, il-prezz medju ta’ l-importazzjoni żdied modestament bi 2 %. L-importazzjonijiet kollha fil-Komunità li oriġinaw fl-Istati Uniti ta’ l-Amerika saru permezz ta’ importaturi relatati u l-prezzijiet ta’ l-importazzjoni għalhekk huma prezzijiet ta’ trasferiment fil-grupp tal-kumpannija. Fl-investigazzjoni preċedenti ta’ reviżjoni, tali prezzijiet ta’ l-importazzjoni nstabu li kienu stabbiliti artifiċjalment sabiex ta’ l-inqas jassorbu parzjalment il-miżuri anti-dumping li kienu fis-seħħ dak iż-żmien. L-importaturi relatati fil-Komunità ġarrbu telfiet sinifikattivi waqt l-RIP preċedenti u l-marġni li rrealizzaw bejn il-prezz tal-bejgħ (il-prezz reali ta’ l-importazzjoni) u l-prezz tal-bejgħ mill-ġdid fis-suq Komunitarju ma kinux suffiċjenti biex ikopru l-ispejjeż li kellhom bejn l-importazzjoni u l-bejgħ mill-ġdid. Din kienet ir-raġuni għaliex l-investigazzjoni preċedenti ta’ reviżjoni wasslet għal reviżjoni tal-forma tal-miżuri anti-dumping u li kienu imposti rati ta’ dazju fissi speċifiċi għal kull tunnellata.

(52)

F’din l-investigazzjoni ta’ reviżjoni, kemm il-produtturi li jesportaw ta’ l-Istati Uniti u l-importatturi relatati tagħhom fil-Komunità nstabu li għamlu profitti waqt l-RIP u l-marġni relatati ta’ l-importaturi nstabu li kienu konformi mal-kondizzjonijiet tas-suq. Il-livelli tal-prezz tal-bejgħ imqabblin mal-valur normali u/jew l-ispiża tal-produzzjoni ppermettew profitti adatti għall-kumpanniji kollha involuti fis-swieq ikkaratterizzati minn prezzijiet tal-bejgħ għoljin.

(53)

It-tqabbil tal-prezzijiet ta’ l-importazzjoni CIF fil-fruntieri Komunitarji mitlubin lil konsumaturi indipendenti jinkludu dazji anti-dumping bil-prezzijiet ex-worksta’ l-industrija tal-Komunità, għall-istess tipi ta’ prodott u fuq l-istess livell ta’ kummerċ, wassal għall-istabbiliment ta’ tnaqqis fil-prezzijiet tal-bejgħ ta’ l-industrija Komunitarja ta’ bejn 7,3 % u 17,5 %.

(54)

L-importazzjonijiet minn pajjiżi terzi naqsu bin-nofs matul il-perijodu kunsidrat. Is-sehem mis-suq tal-pajjiżi l-oħrajn ewlenin li jesportaw, l-aktar ir-Russja u l-Iran, tassew sar marġinali. Skond l-industrija ta’ l-utenti, din it-tendenza lejn it-tnaqqis hija dovuta għall-fatt li kien diffiċli li jinkisbu eżattament il-kwantitajiet rikjesti fid-data preċiża tat-twassil fiż-żewġ pajjiżi msemmijin qabel.

(55)

Matul il-perijodu kunsidrat, il-produzzjoni żdiedet b’41 %. Fl-istess waqt il-kapaċità kienet estiża bi 18 %. Dan wassal għal titjib fl-utilizzazzjoni tal-kapaċità minn 78,4 % għal 93,2 %.

(56)

Iż-żjieda fil-kapaċità tal-produzzjoni bejn l-2002 u l-2003 hija marġinali u tirrifletti xi titjib fl-effiċjenza. Mill-2004 ’l quddiem, jista’ jiġi osservat tneħħija intensiva ta’ aktar bottlenecking u espansjonijiet ġodda tal-kapaċità.

(57)

Il-livell ta’ l-inventarji huwa mqabbel fl-aħħar ta’ kull sena 2002 sa l-2004 u jvarja sa ċertu punt skond l-ordnijiet. Il-livell fl-aħħar tar-RIP huwa aktar baxx, iżda juri s-sitwazzjoni fit-30 ta’ Ġunju 2005 u għalhekk m’huwiex proprjament komparabbli ma’ l-inventarji fl-aħħar tas-sena. Dan minħabba l-fatt li, minħabba domanda ftit aktar baxxa mill-utenti industrijali waqt ix-xhur tas-sajf, il-kumpanniji jiskedaw produzzjoni u manutenzjoni aktar baxxi tal-faċilitajiet tal-produzzjoni.

(58)

Il-volum tal-bejgħ industrijali Komunitarju lil konsumaturi mhux relatati żdied b’35 % matul il-perijodu kunsidrat. Kemm is-sehem mis-suq tal-konsum Komunitarju totali u l-konsum tas-suq ħieles jindikaw li wara telf tas-sehem fis-suq bejn l-2002 u l-2003, is-sehem fis-suq stabbilizza u kien ta’ 48 % meta mqabbel mal-konsum totali rispettivament ta’ 71,3 % fis-suq ħieles waqt l-RIP. Il-livell medju tal-prezz tal-bejgħ lil konsumaturi mhux relatati segwa mudell simili u wara tnaqqis ta’ 5 % bejn l-2002 u l-2003, il-livell tal-prezz fis-suq ħieles waqt l-RIP kien ta’ 17 % ogħla mill-2002.

(59)

Meta mqabblin mal-livell tal-prezz waqt l-RIP ta’ l-investigazzjoni preċedenti ta’ reviżjoni, li kkoinċida mas-sena kalendarja 1998, il-prezzijiet tal-bejgħ fl-2004 u waqt l-RIP preżenti kienu bħala medja 22,7 % u 37,5 % ogħla rispettivament mill-1998. L-ebda fattura ma tinħareġ fir-rigward tal-produzzjoni destinata għal konsum captive li huwa użat f’faċilitajiet integrati tal-produzzjoni.

(60)

Il-konsum kien ilu jiżdied kontinwament waqt l-aħħat deċennju, minn 152 000 tunnellata fl-1995 għal 367 000 tunnellata waqt l-RIP, li jirrappreżenta żjieda annwali ta’ 9,7 %. Iż-żjieda l-aktar reċenti ta’ konsum matul il-perijodu kunsidrat, mill-2002 sa l-RIP, kienet ta’ 10,7 % fuq bażi annwali, meta mqabbla ma’ żjieda annwali tal-kapaċità ta’ 7 %. Din l-evoluzzjoni appoġġat livelli tal-prezzijiet għoljin fil-Komunità u fl-istess ħin imbuttat lill-industrija Komunitarja lejn titjib importanti fir-rati ta’ utilizzazzjoni tal-kapaċità minn 78,4 % għal 93,2 %, li wassal għal żjieda annwali fil-produzzjoni ta’ 14,5 %. F’termini assoluti l-produzzjoni żdiedet b’84 000 tunnellata meta mqabbla maż-żjieda fil-konsum ta’ 83 000 tunnellata, u l-kapaċità espandiet biss bi 48 500 tunnellata.

(61)

Id-domanda għolja u dejjem tiżdied meta mqabbla mal-pass aktar bil-mod ta’ l-espansjoni tal-kapaċità u t-tnaqqis ġenerali ta’ l-importazzjonijiet sostenew il-livell tal-prezz ta’ l-etanolamina fil-Komunità. Barra minn hekk, il-marġni tal-bejgħ ma kienu influwenzati kważi xejn mill-ispiża sħiħa tal-produzzjoni għal kull tunnellata matul il-perijodu kunsidrat, għaliex iż-żjieda fil-prezz kienet dovuta l-aktar għal żviluppi fis-suq. Iż-żjieda fl-ispiża tal-produzzjoni ta’ 5,9 % bejn l-2004 u r-RIP kienet il-konsegwenza taż-żjieda fil-prezz tan-nafta, li huwa element bażiku ta’ l-enerġija (energy driver) ibbażata fuq iż-żejt użat fil-produzzjoni ta’ l-ossidu ta’ l-etilene, il-materja prima prinċipali fil-produzzjoni ta’ l-etanolamina fil-Komunità.

(62)

L-impjiegi fil-livell ta’ l-industrija Komunitarja għall-prodott simili baqgħu stabbli waqt il-perijodu kunsidrat. Il-proċess tal-produzzjoni huwa fil-biċċa l-kbira awtomatizzat u għalhekk ma jinkludix xogħol intensiv. Fl-istess ħin, minħabba t-titjib kostanti u t-tneħħija tal-bottlenecks ta’ l-istallazzjonijiet tal-produzzjoni, il-produttività żdiedet bi 42 % matul il-perijodu kunsidrat.

(63)

Matul il-perijodu kunsidrat, il-pagi żdiedu bi 11 % b’massimu fl-2004 u dan jista’ jkun attribwit għall-isforzi ta’ ristrutturazzjoni u tnaqqis ta' impjegati minn wieħed mill-produtturi Komunitarji li ressqu lment. Il-paga medja għal kull impjegat segwiet l-istess mudell.

(64)

Il-qligħ matul il-perijodu kunsidrat tal-bejgħ tas-suq ħieles tal-prodott konċernat lil partijiet mhux relatati fil-Komunità żdied minn 2,8 % fl-2002 għal 15,5 % waqt ir-RIP, wara tnaqqis ta’ 1,1 % fl-2003. Dan it-titjib tal-qligħ sa mill-2003 għandu jittieħed fil-kuntest ta’ importazzjonijiet stabbli mill-Istati Uniti ta’ l-Amerika, u domanda dejjem tiżdied, bil-konsegwenza kemm ta’ volumi tal-bejgħ ikbar kif ukoll ta’ livell tal-prezz tal-bejgħ miżjud, li waqt l-2004 u r-RIP kienu aktar pronunċjati miż-żjieda ta’ l-ispiża tal-produzzjoni.

(65)

Il-livelli tal-prezz akkwistati fil-Komunità jiddeterminaw jekk il-kumpanniji humiex inklinati li jibnu kapaċità addizzjonali. Matul il-perijodu 2002-2003, ir-redditu fuq l-investiment ma kienx kunsidrat għoli biżżejjed sabiex jiggarantixxi għall-istallazzjoni ta’ istallazzjonijiet addizzjonali tal-produzzjoni. Bħala konsegwenza, il-kumpanniji illimitaw lilhom infushom għal xi tneħħija ta’ bottlenecking u għal titjib fl-effiċjenza. Id-domanda li kontinwament tiżdied ikkombinata ma’ żjieda limitata fil-kapaċità biss appoġġat livell ogħla tal-prezzijiet, sa ċert punt li sa mill-2004 reġa’ sar realistiku li jkunu implimentati proġetti ta’ investiment li preċedentement kienu ġew posposti.

(66)

Rigward l-kapaċità li jinstab il-kapital, għandu jkun innotat li l-produzzjoni ta’ l-etanolamina hija biss parti żgħira mill-produzzjoni ġenerali tal-prodotti kimiċi mill-industrija Komunitarja, li l-aktar tirrappreżenta kumpanniji kimiċi internazzjonali maġġuri, li jgawdu minn livelli ġenerali għoljin ta’ likwidità u awto-finanzjament u affidabbiltà fir-rigward tal-kreditu. Għalhekk, l-industrija Komunitarja b’mod ġenerali ma kellhiex problemi ewlenin biex issib il-kapital.

(67)

L-evoluzzjoni tal-likwidità hija xhieda oħra ta’ l-għaqda bejn il-livelli tal-prezzijiet, il-qligħ u r-redditu fuq l-investiment. Wara livelli baxxi ta’ likwidità fl-2002 u l-2003, l-industrija Komunitarja reġgħet lura għal ċifri b’żewġ numri għal-likwidità meta mqabbla mal-fatturat sa mill-2004 u l-livell tagħha għal bosta mill-kumpanniji huwa għoli biżżejjed sabiex il-fondi jkunu diretti lejn investimenti ġodda fin-negozju ta’ l-etanolamini.

(68)

L-industrija Komunitarja bbenefikat minn tkabbir fis-suq matul il-perijodu kunsidrat, li jidher miż-żjieda fis-sehem tas-suq tagħha tal-konsum totali minn 45,9 % għal 48 % u s-sehem tas-suq tal-konsum ħieles tagħha minn 69,9 % għal 71,3 %.

(69)

L-importazzjoni li hi l-oġġett ta’ dumping kompliet waqt ir-RIP, anke jekk f’livelli aktar baxxi minn dawk stabbiliti fl-investigazzjoni preċedenti ta’ reviżjoni.

(70)

Kif muri fuq, l-industrija Komunitarja tassew kellha l-opportunità li tirkupra mid-dumping preċedenti, b’mod partikolari f’termini ta’ prezzijiet tal-bejgħ u tal-qligħ.

(71)

Il-volumi ta’ esportazzjoni ta’ l-industrija Komunitarja lil pajjiżi terzi żdiedu bi 11 % matul il-perijodu kunsidrat, u dan jikkorrispondi għal 4 % bħala medja fuq il-bażi annwali, u dan huwa fil-biċċa l-kbira konformi ma’ l-espansjoni tal-konsum dinji. Dan juri li l-industrija Komunitarja hija kompetittiva fis-swieq dinjin.

(72)

Il-volum ta’ etanolamina kkunsmat fis-suq Komunitarju espanda b’29 % waqt li l-importazzjonijiet mill-Istati Uniti ta’ l-Amerika naqsu bi 11 % matul il-perijodu kunsidrat. Fl-istess waqt, l-industrija Komunitarja setgħet iżżid il-volum tal-bejgħ tagħha u b’hekk tistabbilizza u saħansitra żżid kemmxejn sehemha fis-suq.

(73)

Is-sitwazzjoni ekonomika ta’ l-industrija Komunitarja tjiebet fir-rigward ta’ bosta mill-indikaturi ekonomiċi: il-produzzjoni (+ 41 %), il-kapaċità tal-produzzjoni (+ 18 %) u l-kapaċità ta’ l-utilizzazzjoni, il-volum tal-bejgħ (+ 35 % jew +45 000 tunnellata) u l-valur (+ 58 %), il-produttività, is-sehem fis-suq (+ 2 punti perċentwali), il-likwidità u l-qligħ, l-investimenti u r-redditu fuq l-investiment. L-iżvilupp ta’ l-ispejjeż tal-produzzjoni għal kull tunnellata baqa’ taħt l-iżvilupp tal-prezzijiet tal-bejgħ. L-industrija Komunitarja bbenefikat ukoll mit-tkabbir fis-suq Komunitarju u żammet il-pass ma’ l-evoluzzjoni fid-domanda dinjija hekk kif l-attività ta’ esportazzjoni tagħha żdiedet bi 11 % fil-volum.

(74)

Biex nikkonkludu, fid-dawl ta’ l-iżvilupp pożittiv ta’ l-indikaturi pertinenti għall-industrija Komunitarja, l-industrija Komunitarja hija kunsidrata li tinsab f’sitwazzjoni tajba. Ma setax ikun stabbilit li d-danni materjali komlpew. Għalhekk, kien eżaminat jekk hemmx il-probabbiltà ta’ rikorrenza ta’ ħsara jekk il-miżuri jitħallew jaqgħu.

(75)

Huwa mfakkar li l-produtturi li jesportaw fl-Istati Uniti ta’ l-Amerika kienu għadhom qed jipprattikaw l-esportazzjoni li hi l-oġġett ta’ dumping waqt ir-RIP, anke jekk f’livell imnaqqas meta mqabbel ma’ l-investigazzjoni preċedenti. It-tneħħija tal-miżuri tista’, li kieku l-prezzijiet ta’ l-esportazzjoni kellhom jitnaqqsu proporzjonalment, twassal għal marġni ta’ dumping ta’ bejn 13,4 % u 28,3 % għall-produtturi li jesportaw li kkooperaw, waqt li l-imġiba tal-produtturi li ma kooperawx, li rrappreżentaw 42 % ta’ l-importazzjonijiet fl-investigazzjoni oriġinali, għada mhux magħrufa. Madankollu, dawn ta’ l-aħħar, peress li huma soġġetti għall-ogħla miżuri anti-dumping, ikollhom l-akbar inċentiva biex jerġgħu lura lejn is-suq Komuniatrju, li kieku l-miżuri kellhom jitwaqqfu.

(76)

Fl-istess ħin huwa stmat li bħalissa teżisti kapaċità żejda ta’ 90 000 tunnellata fis-suq ta’ l-Istati Uniti, ladarba l-problemi operattivi u l-effett ta’ l-urugan ikunu rimedjati.

(77)

Għalhekk kien konkluż li hemm il-probabbiltà ta’ kontinwazzjoni ta’ l-iddampjar u r-riskju ta’ żjieda fil-volum ta’ importazzjonijiet li jeżerċitaw pressjoni ’l isfel fuq il-prezzijiet fil-Komunità, ta’ l-inqas għal perijodu ta’ żmien qasir, li kieku l-miżuri kellhom jiġu revokati.

(78)

Ġeneralment żjieda fl-importazzjonijiet li huma l-oġġett ta’ dumping teżerċita pressjoni ’l isfel tal-livell tal-prezz tal-bejgħ u dan jaffettwa b’mod negattiv il-qligħ ta’ l-industrija Komunitarja kif ukoll l-irkupru finanzjarju tagħha li kien osservat waqt il-perijodu kunsidrat. F’dan il-kuntest, għandu jkun innotat li l-livell ta’ bejgħ bi prezz inqas jonqos sostanzjalment jekk il-miżuri jkunu revokati.

(79)

Huwa mistenni li l-produtturi ta’ l-Istati Uniti sa ċertu punt ser jirrideriġu mill-ġdid l-użu tal-materja prima ewlenija, l-ossidu ta’ l-etilene (EO), mill-produzzjoni tal-monoetileneglikol (MEG) għall-produzzjoni ta’ l-etanolamina.

(80)

Il-materja prima EO hija użata fil-produzzjoni ta’ prodotti jew derivattivi kimiċi oħrajn, l-aktar il-glikoli ta’ l-etilene u b’mod partikolari l-monoetileneglikol (MEG). Il-kapaċità ta’ l-EO hija limitata biss għal ftit postijiet fid-dinja minħabba n-natura ferm splussiva u tossika tagħha, soġġetta għal regolamenti ambjentali, tas-saħħa, tas-sigurtà u tad-difiża speċjali. Bħala konsegwenza, l-allokazzjoni ta’ l-EO tiddependi fuq il-prezzijiet tas-suq tad-derivattivi tagħha.

(81)

Storikament, teżisti ċerta ġerarkija fil-livelli tal-prezz: il-prezz ta’ l-etilene kien ogħla mill-MEG u l-prezz ta’ l-etanolamina kien ogħla kemm mill-prezz ta’ l-etilene kif ukoll minn dak tal-MEG. Madankollu, sa mill-2003, il-prezzijiet tal-MEG fil-Komunità żdiedu ferm u saru ogħla mill-prezzijiet ta’ l-etalina u f’ċerti perijodi ta’ żmien anke ogħla mill-prezzijiet ta’ l-etanolamina. Bħala konsegwenza, l-EO kien ingħata direzzjoni ġdida dejjem aktar lejn il-produzzjoni tal-MEG, biex b’hekk inħolqot skarsezza relattiva ta’ l-EO fis-suq, li fl-istess ħin ikkontribwixxiet biex il-prezzijiet ta’ l-etanolamina jibqgħu relattivament f’livell għoli.

(82)

Madankollu, il-pajjiżi tal-Lvant Nofsani bħalissa qegħdin jinvestu fil-kapaċità ta’ l-etilene glikol ibbażat fuq in-nafta. Kapaċità ġdida ta’ produzzjoni tal-MEG hija mistennija li ssir operattiva f’perijodu ta’ żmien qasir fil-Kuwajt (bil-parteċipazzjoni tad-Dow Chemical), fl-Għarabja Sawdija u fl-Iran. Meta jitqies il-fatt li n-nafta hija materjal ibbażat fuq iż-żejt, dawn il-pajjiżi ser ikollhom vantaġġ komparattiv ċar f’termini ta’ spiża. Huwa għalhekk raġonevoli li jkun mistenni li l-prezz tal-MEG jorħos fuq perijodu ta’ żmien qasir u, li l-produtturi ta’ l-US ikollhom possibbiltajiet imnaqqsa biex ibigħu MEG b’mod partikolari fl-Asja, fejn l-attivitajiet Ċiniżi tat-tessuti u l-poljester diġà jieħdu aktar minn 30 % tal-konsum dinji tal-MEG. Dan ikun il-każ b’mod partikolari għal wieħed mill-produtturi li jesporta mhux kooperanti li bħalissa huwa esportatur importanti tal-MEG fl-Asja. Bħala konsegwenza, jista’ jkun mistenni li l-produtturi ta’ l-Istati Uniti ser iduru lejn il-produzzjoni ta’ aktar etanolamina, biex b’hekk jeżerċitaw pressoni ’l isfel fuq il-prezzijiet u joħolqu ħtieġa li jinstabu kljienti addizzjonali barra s-suq domestiku ta’ l-Istati Uniti u għalhekk iduru għas-suq Komunitarju.

(83)

Meta wieħed iżomm quddiem għajnejh is-sitwazzjoni stabbli attwali ta’ l-industrija Komunitarja, il-probabbiltà ta’ rikorrenza ta’ ħsara kkważata minn pressjoni ’l isfel fuq il-prezzijiet tiddependi wkoll fuq il-kobor ta’ tali tnaqqis fil-prezz u l-evoluzzjoni ta’ fatturi oħrajn, bħall-ispiża tal-produzzjoni u l-possibbiltà li ż-żidiet fil-prezzijiet jiġu trasferiti għal fuq il-klijenti. F’dan ir-rigward, kien investigat x’kienet is-sitwazzjoni wara r-RIP.

(84)

Inġabret data addizzjonali sabiex ikun verifikat jekk il-konklużjonijiet miksubin abbażi ta’ l-analiżi tal-perijodu kunsidrat u b’mod aktar partikolari r-RIP baqgħux validi waqt it-tieni nofs ta’ l-2005 u l-ewwel ħames xhur ta’ l-2006.

(85)

Waqt it-tieni semestru ta’ l-2005, il-prezzijiet fis-suq Komunitarju għat-tipi kollha ta’ etanolamini komplew jogħlew bejn 11,4 % u 14,7 %. Iż-żjieda fil-prezz medju fis-suq ta’ l-Istati Uniti kienet aktar qawwija bi 22 %. Il-ħsara mill-urugan f’Louisiana kienet primarjament responsabbli għan-nuqqasijiet okkażjonali fis-suq domestiku ta’ l-Istati Uniti.

(86)

Din l-evoluzzjoni kompliet fl-ewwel ħames xhur ta’ l-2006 iżda b’pass ferm aktar bil-mod: il-prezzijiet fis-suq Komunitarju żdiedu bejn 2,8 % sa 4 % u fis-suq domestiku ta’ l-Istati Uniti b’9,9 %, dan juri fejqan gradwali tal-problemi operattivi u ta’ ħsara lokali.

(87)

Meta mqabblin mar-RIP, il-prezzijiet taż-żejt żdiedu konsiderevolment waqt l-ewwel nofs ta’ l-2005 u kienu bħala medja xi 30 % ogħla. Dan affettwa aktar il-prezz tan-nafta, li ż-żieda tiegħu bdiet fit-tieni nofs tar-RIP (l-ewwel semestru ta’ l-2005). Il-prezzijiet ta’ importazzjoni ta’ l-Istati Uniti fil-Komunità jidhru li jaġġustaw aktar bil-mod għaż-żjieda fil-prezzijiet tal-materja prima, parzjalment minħabba l-aġġustament aktar bil-mod tal-prezzijiet tal-kuntratti u fi sforz biex ikun protett is-sehem mis-suq u parzjalment minħabba li l-istallazzjonijiet tal-produzzjoni tal-produtturi ta’ l-Istati Uniti huma bbażati fuq il-gass minflok fuq in-nafta, biż-żidiet fil-prezz tal-gass isegwu bil-mod iż-żidiet fil-prezz taż-żejt.

(88)

Il-prezzijiet taż-żejt komplew jiżdiedu bħala medja b’10 % fl-ewwel ħames xhur ta’ l-2006, u dawn affettwaw b’mod negattiv il-qligħ ta’ l-industrija Komunitarja minħabba l-evoluzzjoni ’l fuq tal-prezz tal-bejgħ osservat.

(89)

L-investigazzjoni tal-ġrajjiet wara l-IP tidher li tipponta lejn punt ta’ dawrien fl-evoluzzjoni ta’ l-etanolamina fis-suq Komunitarju. Il-prezzijiet tal-bejgħ jidher li laħqu limitu massimu u għal ċerti tipi ta’ etanolamina anke wrew nuqqas minuri. Hemm indikazzjonijiet li żjieda fl-ispiża tal-produzzjoni mhux ser tkun tradotta faċilment fi prezzijiet tal-bejgħ lill-klijent aktar għoljin. Madankollu, mhuwiex ċar f’dan il-mument kemm iż-żjieda fl-ispiża għall-produzzjoni u l-pressjoni ’l isfel fuq il-qligħ ser jinvolvu sitwazzjoni ta’ ħsara għall-industrija Komunitarja fuq perijodu ta’ żmien medju.

(90)

Fil-każ li l-miżuri jkunu revokati, hemm probabbiltà fuq perijodu ta’ żmien qasir ta’ żjieda sinjifikanti ta’ importazzjonijiet li jkunu l-oġġett ta’ dumping ta’ l-Istati Uniti lejn il-Komunità bi pressjoni ’l isfel fuq il-prezzijiet bħala konsegwenza.

(91)

Fuq perijodu ta’ żmien medju, dan jista’ jkun aggravat b’żjieda fil-produzzjoni ta’ l-etanolamina fl-Istati Uniti bħala reazzjoni għall-opportunitajiet ta’ bejgħ ta’ MEG imnaqqsin, li jkun jeħtieġ li l-produtturi ta’ l-Istati Uniti jsibu swieq tal-bejgħ addizzjonali u b’hekk jirriderieġu volumi akbar lejn is-suq Komunitarju.

(92)

It-tmiem apparenti taż-żjieda tal-prezzijiet tal-bejgħ fil-bidu ta’ l-2006 u l-evoluzzjoni avversa ta’ l-ispiża tal-produzzjoni minħabba l-evoluzzjoni tal-prezz taż-żejt ukoll jidher li affettwa b’mod negattiv il-qligħ ta’ l-industrija Komunitarja.

(93)

Dawn il-fatturi kollha jippuntaw lejn il-probabbiltà tar-rikorrenza tal-ħsara. Madankollu, xi wħud mill-konklużjonijiet ta’ hawn fuq huma bbażati fuq ġrajjiet li probabbilment iseħħu fuq perijodu ta’ żmien medju.

(94)

Skond l-Artikolu 21 tar-Regolament bażiku, kien eżaminat jekk iż-żamma tal-miżuri anti-dumping li bħalissa huma fis-seħħ tkunx kontra l-interess Komunitarju b’mod ġenerali. Id-determinazzjoni ta’ l-interess Komunitarju kienet ibbażata fuq apprezzament ta’ l-interessi varji kollha involuti, jiġifieri dawk ta’ l-industrija Komunitarja, l-importaturi, in-negozjanti, il-bejjiegħa bl-ingrossa u l-utenti industrijali tal-prodott konċernat.

(95)

Għandu jkun imfakkar li fl-investigazzjonijiet preċedenti, l-impożizzjoni ta’ miżuri ma kinitx kunsidrata kontra l-interess Komunitarju. Barra minn hekk, l-investigazzjoni preżenti hija reviżjoni ta’ skadenza, u b’hekk tanalizza sitwazzjoni li fiha diġà hemm fis-seħħ miżuri anti-dumping.

(96)

Fuq din il-bażi kien eżaminat jekk, minkejja l-konklużjoni tal-probabbiltà ta’ kontinwazzjoni ta’ dumping u l-probabbiltà ta’ rikorrenza ta’ ħsara, jeżistux raġunijiet kostrinġenti li jwasslu għall-konklużjoni, f’dan il-każ partikolari, li mhuwiex fl-interess tal-Komunità li jinżammu l-miżuri.

(97)

Huwa mfakkar li d-dumping waqt l-RIP kien għadu preżenti u li teżisti l-probabbiltà ta’ kontinwazzjoni ta’ dumping tal-prodott konċernat li joriġina mill-Istati Uniti ta’ l-Amerika u ta’ rikorrenza ta’ ħsara lill-industrija Komunitarja.

(98)

L-industrija Komunitarja tat prova li hija industrija vijabbli u kompetittiva, u dan kien ikkonfermat mill-iżvilupp pożittiv ta’ bosta mill-indikaturi ekonomiċi, b’mod partikolari l-qligħ, il-likwidità u r-redditu fuq l-investiment. Il-miżuri anti-dumping imposti preċedentement ikkontribwixxew għal-livell tal-prezz preżenti fis-suq Komunitarju, u ppermettew lill-industrija Komunitarja biex terġa’ tikseb qligħ li tippermetti redditu suffiċjenti fuq l-investiment, sa punt fejn l-investimenti f’kapaċità ġdida jsiru aktar possibbli. B’mod partikolari l-produttur li jesporta ta’ l-Istati Uniti, l-INEOS, li wara li ġie akkwistat minn Innovene sar de facto produttur Komunitarju, ħabbar investimenti importanti fil-Komunità. Il-kontinwazzjoni tal-miżuri tikkontribwixxi wkoll għaż-żamma tal-qligħ ta’ dan il-proġett ta’ investiment. Għalhekk, huwa fl-interess ta’ l-industrija Komunitarja li żżomm miżuri kontra importazzjonijiet li jkunu l-oġġett ta’ dumping mill-Istati Uniti ta’ l-Amerika.

(99)

Minħabba n-nuqqas ta’ kooperazzjoni min-negozjanti u l-bejjiegħa bl-ingrossa, kien konkluż li n-nuqqas jew il-kontinwazzjoni ta’ miżuri fil-parti l-kbira ma taffettwax lil dawn il-partijiet. Barra minn hekk, l-investigazzjoni ma wrietx l-eżistenza ta’ xi importatur mhux relatat; l-importazzjonijiet kollha fil-Komunità tal-prodott konċernat li joriġina fl-Istati Uniti ta’ l-Amerika jidhru li jittrasferixxu għal fuq importaturi relatati mal-produtturi li jesportaw ta’ l-Istati Uniti.

(100)

Il-kontinwazzjoni tal-miżuri mhux ser tbiddel is-sitwazzjoni preżenti ta’ l-importaturi relatati, li nstab li wettqu profitti waqt ir-RIP f’marġni konformi mal-kondizzjonijiet tas-suq. Huwa minnu li t-twaqqif tal-miżuri jista’ jkun fl-interess ta’ l-importaturi relatati fil-każ li l-livell tal-prezz tal-bejgħ lill-kljienti ma jkunx affettwat u fil-każ li l-produtturi li jesportaw ta’ l-Istati Uniti ma jitolbux parti minn jew il-marġni tal-profitt żejjed riżultanti kollu meta jiffisaw il-prezzijiet li bihom l-importaturi relatati jistgħu jixtru l-etanolamina.

(101)

Fuq il-bażi tal-fatt li l-kontinwazzjoni tal-miżuri tkun tirrappreżenta t-tieni tiġdid tal-miżuri anti-dumping, ingħatat attenzjoni partikolari għall-interess ta’ l-utenti ta’ l-industrija.

(102)

F’din l-investigazzjoni pparteċipaw biss utenti min-negozju ta’ l-esterquat għal rattaba tat-tessuti. Utent industrijali wieħed, li jirrappreżenta madwar 14 % ta’ l-importazzjonijiet totali ta’ l-Istati Uniti waqt ir-RIP, wieġeb għall-kwestjonarju, tnejn oħrajn urew fehmiethom u għaddew informazzjoni dwar l-istruttura ta’ l-ispejjeż tal-produzzjoni tal-prodotti lesti. L-esterquats huma prodotti abbażi tat-TEA u huma użati bħala rattaba tat-tessuti, ikkummerċjalizzati mill-hekk imsejħin “soapers” bħal Procter & Gamble, Unilever, Henkel, Benckiser u Colgate. Dawn l-utenti industrijali jargumentaw li ż-żjieda tal-prezz tat-TEA qed ipoġġi n-negozji tagħhom fil-periklu u li jeżisti nuqqas tal-provvista fis-suq Komunitarju. Iż-żewġ fatturi jittaffew li kieku l-miżuri anti-dumping jitħallew jiskadu. Barra minn hekk, il-kontinwazzjoni tal-produzzjoni fil-Komunità hija allegatament fil-periklu jekk il-qligħ tan-negozju ta’ l-esterquat ma jitjibx.

(103)

Instab li waqt ir-RIP it-TEA rrappreżentat madwar 23 % ta’ l-ispiża totali tal-produzzjoni ta’ l-esterquats, aktar minn 22 % fl-2003 iżda ġeneralment komparabbli mas-sitwazzjoni li eżistiet fl-2002, l-ewwel sena tal-perijodu kunsidrat. Wara r-RIP, minħabba l-evoluzzjoni tal-prezz tat-TEA osservata, l-inċidenza tat-TEA fl-ispiża sħiħa tal-prodott finali hija mistennija li tkun aktar importanti. Huwa ċar li l-eliminazzjoni tal-miżuri anti-dumping, ta’ l-inqas fuq perijodu ta’ żmien qasir, tnaqqas il-piż ta’ l-ispiża tat-TEA bħala materja prima. Dan it-tnaqqis fl-ispiża, fuq il-bażi ta’ l-ipoteżi li l-abolizzjoni tal-miżuri tinbidel bis-sħiħ fi prezz tal-bejgħ aktar baxx, kieku jnaqqas l-ispiża tat-TEA b’bejn wieħed u ieħor 7 %. L-effett fl-ispiża sħiħa tal-produzzjoni ta’ l-oġġetti finali ikun ta’ tnaqqis ta’ madwar 1 %, li jtejjeb il-qligħ bl-istess marġni.

(104)

Instab li l-qligħ fin-negozju ta’ l-esterquat naqset tassew fil-perijodu kunsidrat minn madwar 18 % għal 8 %. Madankollu, in-nuqqas fil-prezz tal-bejgħ ta’ l-esterquats b’6 % matul il-perijodu kkunsirat jidher li kien il-fattur kontribwenti ewlieni, li kkawża l-importanza relattiva ta’ l-ispejjeż tal-produzzjoni fil-prezz tal-bejgħ biex titla’ bi kważi 10 %. Is-settur jidher li għaddej mill-effett ta’ ċaqliq lejn il-Lvant, partikolarment lejn ir-Russja, fejn ġeneralment jistgħu jinstabu soluzzjonijiet bi spiża baxxa, iżda aktar speċifikament għax-xiri tal-materja prima ewlenija l-oħra, jiġifieri l-“aċidu grass thalo”. Dan il-prodott ta’ oriġini bovina jista’ jinbidel b'“palmstyrene” veġetali li l-provvista tiegħu fil-Lvant hija aktar abbundanti. Barra minn hekk, is-soapers, għal raġunijiet ta’ effiċjenza, jitolbu preżenza lokali mill-fornituri tagħhom, li tista’ tkun ir-raġuni prinċipali għal delokalizzazzjoni possibbli barra mill-Komunità.

(105)

Finalment, dak li ngħad dwar in-nuqqas ta’ provvista tat-TEA fis-suq Komunitarju kien eżaminat iżda nstab li ma kienx sostanzjat, ibbażat fuq offerti mressqin minn ċerti produtturi, li ma kinux aċċettati mill-utenti konċernati.

(106)

Fil-qosor, għalkemm huwa rikonoxxut li l-prezz miżjud tat-TEA kellu effett ta’ pressjoni negattiva fuq l-ispiża tal-produzzjoni tal-prodotti lesti ta’ l-utenti industrijali li resqu b’talbiet, din il-pressjoni hija pjuttost limitata u l-abolizzjoni tal-miżuri anti-dumping tipprovdi biss solliev marġinali. Fatturi oħrajn, bħall-ispiża ta’ materja prima oħra u l-ħtiġiet magħmulin mill-konsumaturi tal-prodotti, instabu li għandhom influwenza aktar sinifikanti. Għalhekk, kien deċiż li kontinwazzjoni tal-miżuri mhux ser taffettwa b’mod sinjifikanti lill-utenti industrijali.

(107)

L-investigazzjoni wriet li l-miżuri anti-dumping eżistenti kkontribwixxew għall-irkupru ta’ l-industrija Komunitarja. L-industrija Komunitarja ser tibbenefika minn kontinwazzjoni tal-miżuri billi żżomm il-livelli tal-prezz profittabbli preżenti, li jippermetti aktar investiment. Kieku l-miżuri kellhom jitħallew jiskadu, dan jipperikola dan il-proċess ta’ rkupru. Għalhekk, il-kontinwazzjoni tal-miżuri hija fl-interess ta’ l-industrija Komunitarja.

(108)

Ma jidhirx li jeżistu importaturi mhux relatati u ma kienx hemm preżentazzjonijiet minn negozjanti/bejjiegħa bl-ingrossa mhux relatati. L-importazzjonijiet kollha li joriġinaw fl-Istati Uniti ta’ l-Amerika isiru permezz ta’ negozjanti relatati, li, waqt li l-miżuri kienu għaddejjin, instabu li akkwistaw marġni ta’ profitt konformi mas-suq waqt ir-RIP.

(109)

Barra minn hekk, fil-passat, il-miżuri eżistenti jidhru li ma kellhom l-ebda effett negattiv sinifikanti fuq is-sitwazzjoni ekonomika ta’ l-utenti. Abbażi ta’ l-informazzjoni miġbura waqt l-investigazzjoni preżenti, kwalunkwe żjieda fil-prezz, jekk kien hemm, li rriżultat mill-impożizzjoni ta’ miżuri anti-dumping, ma tidhirx li hija sproporzjonata meta mqabbla mal-benefiċċju lill-industrija Komunitarja milħuq bit-tneħħija tad-distorsjoni fin-negozju kkawżata minn importazzjonijiet li huma l-oġġett ta’ dumping.

(110)

Rigward l-interess Komunitarju, huwa għalhekk konkluż li m’hemm l-ebda raġuni obbligatorja biex ma jitkomplux ikunu imposti miżuri anti-dumping li bħalissa huma fis-seħħ kontra importazzjonijiet ta’ etanolamini li joriġnaw fl-Istati Uniti ta’ l-Amerika.

(111)

Huwa għalhekk kunsidrat adatt li jinżammu l-miżuri anti-dumping attwali kontra importazzjonijiet ta’ etanolamini li joriġinaw fl-Istati Uniti ta’ l-Amerika.

(112)

Il-partijiet kollha kienu infurmati bil-fatti u l-konsiderazzjonijiet essenzjali li abbażi tagħhom kien intenzjonat li jkun rakkomandat li jinżammu l-miżuri eżistenti. Huma ngħataw ukoll perijodu biex jippreżentaw il-kummenti u talbiet sussegwenti għall-kxif.

(113)

L-investigazzjoni wriet li jeżistu kapaċitajiet ta' riżerva fil-pajjiż konċernat u li l-iddampjar kompla waqt ir-RIP. Is-sitwazzjoni ta’ l-industrija Komunitarja tjiebet waqt il-perijodu kunsidrat fir-rigward ta’ bosta mill-fatturi ta’ ħsara l-aktar minħabba l-kondizzjonijiet tas-suq favorevoli mad-dinja kollha. Abbażi ta’ l-iżvilupp pożittiv tas-sitwazzjoni ekonomika ta’ l-industrija Komunitarja, ma setax ikun stabbilit li l-ħsara materjali kompliet. L-investigazzjoni dwar il-probabbiltà ta’ rikorrenza ta’ ħsara madankollu wriet li jeżistu numru ta’ fatturi bħall-kapaċità ta' riżerva fl-Istati Uniti ta’ l-Amerika, l-opportunitajiet ta’ bejgħ imnaqqsin għall-MEG, is-sitwazzjoni ta’ l-etanolamina kemm mad-dinja kollha kif ukoll fil-livell Komunitarju, li kollha jippuntaw lejn il-probabbiltà ta’ rikorrenza ta’ ħsara fuq perijodu ta’ żmien medju.

(114)

Minn dan ta’ hawn fuq isegwi li, kif previst fl-Artikolu 11(2) tar-Regolament bażiku, il-miżuri anti-dumping applikabbli għal importazzjonijiet ta’ etanolamini li joriġinaw fl-Istati Uniti ta’ l-Amerika, imposti bir-Regolament tal-Kunsill (KE) nru 1603/2000, kif emendat l-aħħar b’avviż rigward ir-rata ta’ dazju fissa għal anti-dumping applikabbli għall-INEOS (7), għandhom jinżammu. Huwa kunsidrat ukoll li għandhom jinżammu miżuri għal perijodu addizzjonali ta’ sentejn biss.

(115)

Min-naħa l-oħra, probabbiltà ta’ rikorrenza ta’ dumping li jagħmel ħsara kienet stabbilita abbażi tal-fatti li (i) id-dumping mill-produtturi li jesportaw ta’ l-Istati Uniti kompla irrispettivament mill-miżuri fis-seħħ, u (ii) hemm stennija ta’ importazzjonijiet miżjudin fil-Komunità minħabba l-kapaċità ta’ produzzjoni eċċessiva ta’ 90 000 tunnellata li teżisti fl-Istati Uniti ta’ l-Amerika li ser tkun operattiva mill-ġdid sa l-aħħar ta’ l-2006 u meta jiġi kunsidrat li m’hemm l-ebda domanda domestika korrispondenti biex tassorbi din il-kapaċità fl-Istati Uniti ta’ l-Amerika. Barra minn hekk, il-produttur ewlieni ta’ l-Istati Uniti mhux kooperanti li bħalissa huwa soġġett għall-ogħla dazju anti-dumping u għalhekk għandu l-ogħla inċentiv biex jirritorna lejn is-suq Komunitarju fil-każ li l-miżuri jiskadu, diġà jagħmel użu min-netwerk ta’ distribuzzjoni meħtieġ għaliex ibigħ prodotti kimiċi oħrajn fis-suq Komunitarju.

(116)

Min-naħa l-oħra, il-kapaċità eċċessiva ta’ l-Istati Uniti hija mistennija li tisparixxi gradwalment mhux aktar tard mill-2010 u l-espansjonijiet ta’ kapaċità ppjanati minn wieħed mill-produtturi li jesportaw ta’ l-Istati Uniti kooperanti fil-Komunità huma skedati li jibdew jaħdmu sa l-aħħar ta’ l-2008, jiġifieri sentejn oħra. Il-konsiderazzjonijiet aħħarin, ikkombinati ma’ l-inċertezza li tkompli dwar l-influwenza ta’ l-evoluzzjoni tal-prezzijiet taż-żejt fuq il-qligħ ta’ l-industrija Komunitarja, jiġġustifikaw il-limitazzjoni taż-żamma tal-miżuri għal sentejn.

(117)

Wara dan il-perijodu ta’ sentejn, il-Kummissjoni ser tibda, jekk ikun il-każ, investigazzjoni ta’ reviżjoni ġdida skond l-Artikolu 11 tar-Regolament bażiku ex officio,