32004R0567

Ir-Regolament tal-Kunsill (KE) Nru 567/2004

tat-22 ta’ Marzu 2004

li jemenda r-Regolament (KE) Nru 1257/1999 dwar l-appoġġ għall-iżvilupp rurali mill-Fond Agrikolu Ewropew ta’ Gwida u Garanzija (FAEGG)

IL-KUNSILL TA’ L-UNJONI EWROPEA,

Wara li kkunsidra it-Trattat li jistabbilixxi l-Komunità Ewropea,

Wara li kkunsidra it-Trattat li jikkonċerna l-Adeżjoni tar-Repubblika Ċeka, l-Estonja, Ċipru, il-Latvja, il-Lituwanja, l-Ungerija, Malta, il-Poland, l-Islovenja u l-Islovakkja ma l-Unjoni Ewropea [1], u partikolarment l-Artikolu 2(3) tiegħu,

Wara li kkunsidra l-Att li jikkonċerna l-Adeżjoni tar-Repubblika Ċeka, l-Estonja, Ċipru, il-Latvja, il-Lituwanja, l-Ungerija, Malta, il-Poland, l-Islovenja u l-Islovakkja [2], u partikolarment l-Artikolu 57(2) tiegħu,

Wara li kkunsidra il-proposta mill-Kummissjoni,

Wara li kkunsidra l-opinjoni tal-Parlament Ewropew,

Billi:

(1) Il-Kapitolu Va tar-Regolament tal-Kunsill (KE) Nru 1257/1999 tas-17 ta’ Mejju 1999 dwar is-sostenn għall-iżvilupp rurali mill-Fond Agrikolu Ewopew għal-Gwida u Garanzija (FAEGG) [3] jipprovdi għal mużura ta’ sostenn sabiex tgħin lill-bdiewa ħalli jilħqu in-normi li jorbtu li kienu ġew reċentement introdotti.

(2) Bħala riżultat ta’ l-adeżjoni, il-bdiewa tar-Repubblika Ċeka, l-Estonja, Ċipru, il-Latvja, il-Litwanja, l-Ungherija, Malta, il-Polonja, l-Islovenja u l-Islovakkja għandhom jiffaċċjaw numru akbar ta’ normi ġodda bbażati fuq il-leġislazzjoni tal-Komunità li huma għandhom jirrispettaw mid-data ta’ l-adeżjoni jew minn data aktar tard. Huwa għalhekk essenzjali li jkun ipprovdut sostenn li jkopri mill-anqas parti ta’ l-ispiża ta’ l-investimenti meħtieġa sabiex jintlaħqu dawn in-normi. Għalhekk, derogi speċjali għandhom ikunu stabbiliti għall-implementazzjoni tal-miżuri "ta’ l-akkwist tan-normi" fl-Istati Membri ġodda.

(3) Ir-Regolament (KE) Nru 1257/1999 għandu għalhekk jiġi emendat,

ADOTTA DAN IR-REGOLAMENT:

Artikolu 1

Il-paragrafu 2b li ġej huwa hawnhekk miżjud ma’ l-Artikolu 331 tar-Regolament (KEE) Nru 1257/1999:

"2b. Bħala deroga mill-Artikoli 21a, 21b u 21c, l-ispiża marbuta ma l-investimenti meħtieġa sabiex ikunu konformi man-normi stabbiliti mill-Komunità qabel id-data ta’ l-adeżjoni, u li jorbtu lill-bdiewa minn din id-data, jew minn data aktar tard, għandhom ikunu meqjusa għad-determinazzjoni tal-livell tas-sostenn annwali. Din il-possibbilità hija limitata għall-ewwel tlett snin tal-perijodu ta’ sostenn, sa limitu massimu annwali ta’ EUR 25000 kull razzet. Matul dan il-perijodu ta’ l-investiment, id-degressività li hemm provvediment dwarha fl-Artikolu 21c m’għandhiex tkun applikabbli. Telf ta’ dħul u spejjeż addizzjonali li jirriżultaw mill-konformità man-normi ma jistgħux ikunu meqjusa sat-tmiem tal-perijodu ta’ l-investiment.

L-investimenti sostnuti permezz ta’ l-ewwel subparagrafu m’humiex eliġibbli għas-sostenn li hemm provvediment dwaru fil-Kapitoli I."

Artikolu 2

Dan ir-Regolament għandu jidħol fis-seħħ fl-1 ta’ Mejju 2004 suġġett għad-dħul fis-seħħ ta’ l-Att ta’ l-Adeżjoni tal-2003 [4].

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-23 ta’ Marzu 2004.

Għall-Kunsill

Il-President

J. Walsh

[1] ĠU L 236, tat-23.9.2003, p. 17.

[2] ĠU L 236, tat-23.9.2003, p. 33.

[3] ĠU L 160, tas-26.6.1999, p. 80. Ir-Regolament kif l-aħħar emendat bl-Att ta’ l-Adeżjoni tal-2003.

[4] ĠU L 236, tat-23.9.2003, p. 33.

--------------------------------------------------