REGOLAMENT TAL-KUMMISSJONI (UE) …/…

ta’ 15.12.2020

li jemenda l-Anness XVII tar-Regolament (KE) Nru 1907/2006 tal-Parlament Ewropew u tal-Kunsill dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta' sustanzi kimiċi (REACH), fir-rigward ta’ sustanzi karċinoġeniċi, mutaġeniċi jew tossiċi għar-riproduzzjoni (CMR), tagħmir kopert mir-Regolament (UE) 2017/745 tal-Parlament Ewropew u tal-Kunsill, inkwinanti organiċi persistenti, ċerti sustanzi jew taħlitiet likwidi, nonilfenol u metodi ta’ ttestjar għall-ażokoloranti

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1907/2006 tal-Parlament Ewropew u tal-Kunsill tat-18 ta’ Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta' sustanzi kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE tal-Kummissjoni 1 , u b’mod partikolari l-Artikoli 68(2) u 131 tiegħu,

Billi:

(1)L-entrata 3 tal-Anness XVII tar-Regolament (KE) Nru 1907/2006 fiha diversi referenzi għat-tikkettar b’R65, li huwa wieħed mill-“Frażijiet R” standard, li jindika riskji speċjali kkawżati mill-perikli assoċjati mal-użu tas-sustanza li ġew stabbiliti fid-Direttiva tal-Kunsill 67/548/KEE 2 . Billi dik id-Direttiva ġiet revokata, ir-referenzi għal R65 għandhom jitħassru mill-entrata 3.

(2)Skont il-paragrafu 6 tal-entrata 3 tal-Anness XVII tar-Regolament (KE) Nru 1907/2006, fit-8 ta’ Lulju 2015 l-Aġenzija Ewropea għas-Sustanzi Kimiċi ħejjiet dossier b’konformità mal-Artikolu 69 ta’ dak ir-Regolament u kkonkludiet li ma hemmx bżonn li tiġi proposta emenda tar-restrizzjoni stabbilita f’dik l-entrata. Għaldaqstant, il-paragrafi 6 u 7 tal-entrata 3 saru superfluwi u għandhom jitħassru.

(3)L-entrati 22, 67 u 68 tal-Anness XVII tar-Regolament (KE) Nru 1907/2006 jistabbilixxu r-restrizzjonijiet fir-rigward tal-pentaklorofenol u l-imlieħ u l-esteri tiegħu, l-aċidu bis(pentabromofenil) u l-aċidu perfluworoottanojku u l-imlieħ tiegħu. Hekk kif jiġu stabbiliti restrizzjonijiet aktar ħorox għal dawk is-sustanzi fir-Regolament (UE) 2019/1021 tal-Parlament Ewropew u tal-Kunsill 3 , jenħtieġ li jitħassru l-entrati 22, 67 u 68 tal-Anness XVII tar-Regolament (KE) Nru 1907/2006.

(4)L-entrata 46 tal-Anness XVII tar-Regolament (KE) Nru 1907/2006, kif ġiet inkluża għall-ewwel darba fir-Regolament (KE) Nru 1907/2006, ma fiha l-ebda numru tal-CAS jew numri tal-KE għan-nonilfenol. Ir-Regolament tal-Kummissjoni (KE) Nru 552/2009 4 żied numru CAS u numru KE għal dik l-entrata, bl-intenzjoni li jiċċaraha u jippermetti lill-operaturi u lill-awtoritajiet tal-infurzar japplikawha b’mod korrett. Madankollu, dik iż-żieda kellha l-effett mhux intenzjonat li issa, l-entrata 46 ma tkoprix l-iżomeri kollha tan-nonilfenol. L-intenzjoni tal-leġislatur fiż-żmien tal-adozzjoni tar-restrizzjoni għalhekk jenħtieġ li tiġi riflessa billi jitħassru dawk in-numri.

(5)L-entrati 28, 29 u 30 tal-Anness XVII tar-Regolament (KE) Nru 1907/2006 jipprojbixxu t-tqegħid fis-suq u l-użu għall-forniment lill-pubbliku ġenerali ta' sustanzi li huma kklassifikati bħala sustanzi karċinoġeniċi, mutaġeniċi jew tossiċi għar-riproduzzjoni (CMR), tal-kategoriji 1A jew 1B, u elenkati fl-Appendiċi minn 1 sa 6 ta’ dak l-Anness, u ta' taħlitiet li jkun fihom sustanzi bħal dawn f'konċentrazzjonijiet ogħla minn dawk speċifikati.

(6)Is-sustanzi kklassifikati bħala CMR huma elenkati fil-Parti 3 tal-Anness VI tar-Regolament (KE) Nru 1272/2008 tal-Parlament Ewropew u tal-Kunsill 5 .

(7)Wara l-aħħar emenda tal-Appendiċijiet minn 1 sa 6 tal-Anness XVII tar-Regolament (KE) Nru 1907/2006 bir-Regolament tal-Kummissjoni (UE) Nru 2018/675 6 biex jitqiesu l-klassifikazzjonijiet il-ġodda tas-sustanzi bħala CMR skont ir-Regolament (KE) Nru 1272/2008, il-Parti 3 tal-Anness VI tar-Regolament (KE) Nru 1272/2008 ġiet emendata mir-Regolament tal-Kummissjoni (UE) 2018/1480 7 u mir-Regolament Delegat tal-Kummissjoni (UE) 2020/217 8 . Huwa xieraq li s-sustanzi CMR tal-kategoriji 1A jew 1B elenkati fir-Regolamenti (UE) 2018/1480 u (UE) 2020/217 li għadhom kif ġew ikklassifikati jiżdiedu fl-Appendiċijiet minn 1 sa 6 tal-Anness XVII tar-Regolament (KE) Nru 1907/2006.

(8)Ir-Regolament (UE) 2017/745 tal-Parlament Ewropew u tal-Kunsill 9 jistabbilixxi r-regoli dwar it-tqegħid fis-suq, id-disponibbiltà fis-suq jew it-tqegħid fl-użu ta’ apparati mediċi għall-użu mill-bniedem, aċċessorji għal tali apparati u ċerti gruppi ta’ prodotti mingħajr skop mediku maħsub. Billi r-Regolament (UE) 2017/745 fih xi dispożizzjonijiet dwar is-sustanzi CMR, u biex tiġi evitata regolamentazzjoni doppja, l-apparati fil-kamp ta’ applikazzjoni tar-Regolament (UE) 2017/745 jeħtieġ li jiġu eżentati mir-restrizzjonijiet stabbiliti fl-entrati 28–30 tal-Anness XVII tar-Regolament (KE) Nru 1907/2006.

(9)It-tħassir tal-entrata 68 tal-Anness XVII tar-Regolament (KE) Nru 1907/2006 jenħtieġ japplika mid-data tal-applikazzjoni tad-dispożizzjoni rilevanti tar-Regolament Delegat tal-Kummissjoni (UE) Nru 2020/784 10 , bl-inklużjoni tal-aċidu perfluworoottanojku u l-imlieħ tiegħu fl-Anness I tar-Regolament (UE) 2019/1021.

(10)Il-klassifikazzjonijiet tas-sustanzi introdotti bir-Regolament (UE) 2018/1480 japplikaw mill-1 ta’ Mejju 2020. Il-partijiet ikkonċernati għandhom jingħataw żmien biżżejjed biex jieħdu l-miżuri xierqa biex jikkonformaw mar-restrizzjoni introdotta minn dan ir-Regolament fir-rigward ta’ sustanzi kklassifikati bħala CMR tal-kategorija 1A jew 1B bir-Regolament (UE) 2018/1480. Perjodu ta’ sitt xhur għandu jkun biżżejjed. Id-data tal-applikazzjoni ma twaqqafx lill-operaturi milli japplikaw ir-restrizzjonijiet relatati mas-sustanzi CMR tal-kategorija 1A jew 1B ikklassifikati skont ir-Regolament (UE) 2018/1480 aktar kmieni.

(11)Ir-Regolament (UE) 2020/217 japplika mill-1 ta’ Ottubru 2021. Ir-restrizzjoni introdotta minn dan ir-Regolament fir-rigward ta’ sustanzi kklassifikati bħala CMR tal-kategorija 1A jew 1B bir-Regolament (UE) 2020/217 għalhekk jenħtieġ li tapplika mill-1 ta’ Ottubru 2021. Id-data tal-applikazzjoni ma twaqqafx lill-operaturi milli japplikaw ir-restrizzjonijiet relatati mas-sustanzi CMR tal-kategorija 1A jew 1B ikklassifikati skont ir-Regolament (UE) 2020/217 aktar kmieni.

(12)Ir-Regolament tal-Kummissjoni (UE) Nru 2017/776 11 għamel xi bidliet fit-titoli u fin-numerazzjoni fil-Parti 3 tal-Anness VI tar-Regolament (KE) Nru 1272/2008. L-emendi korrispondenti għall-entrati 28, 29 u 30 fil-kolonna 1 tal-Anness XVII tar-Regolament (KE) Nru 1907/2006 saru permezz tar-Regolament (UE) Nru 2018/675. Jenħtieġ li jsiru bidliet simili għat-titoli tal-Appendiċi minn 1 sa 6 tal-Anness XVII tar-Regolament (KE) Nru 1907/2006.

(13)L-Appendiċi 10 tal-Anness XVII tar-Regolament (KE) Nru 1907/2006 jelenka l-metodi ta’ ttestjar għall-ażokoloranti għall-finijiet tal-entrata 43 ta’ dak l-Anness. Diversi metodi ta’ ttestjar elenkati huma skaduti u ġew sostitwiti mill-Kumitat Ewropew għall-Istandardizzazzjoni b’metodi ta’ ttestjar aktar aġġornati. Għalhekk, l-Appendiċi 10 għandu jiġi emendat biex jirrifletti dawk il-bidliet.

(14)Għaldaqstant jenħtieġ li r-Regolament (KE) Nru 1907/2006 jiġi emendat skont dan.

(15)Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 133(1) tar-Regolament (KE) Nru 1907/2006,

ADOTTAT DAN IR-REGOLAMENT:

Artikolu 1

L-Anness XVII tar-Regolament (KE) Nru 1907/2006 huwa emendat skont l-Anness ta’ dan ir-Regolament.

Artikolu 2

1.Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

2.Il-punt (6) tal-Anness għandu japplika mill-4 ta’ Lulju 2020.

Il-punt (8)(b) tal-Anness għandu japplika skont dan li ġej:.

–ir-ringieli dwar il-kobalt, il-benżo[rst]pentafen u d-dibenżo[b,def] krisen; id-dibenżo[a,h]piren għandhom japplikaw mill-1 ta’ Ottubru 2021;

–ir-ringieli li jikkonċernaw il-1,2-diidrossibenżen; il-pirokateċol, l-aċetaldelid; l-etanal u s-spirodiklofen (ISO); 3-(2,4-diklorofenil)-2-osso-1-ossaspiro[4.5]dek-3-en-4-il 2,2-dimetilbutirat għandu japplika minn[Uffiċċju tal-Pubblikazzjonijiet: jekk jogħġbok daħħal id-data — sitt xhur wara d-dħul fis-seħħ ta’ dan ir-Regolament emendatorju] .

Il-Punt 11(b) tal-Anness għandu japplika mill-1 ta’ Ottubru 2021.

Il-punt (12)(b) tal-Anness għandu japplika kif ġej:

–ir-ringieli dwar il-kobalt, l-ossidu tal-etilene; l-ossiran, l-etanol, 2,2'-iminobis-, id-derivati tan-N-(C13–15 alkil ramifikat u lineari), il-ftalat tad-diisoeżil, l-alosulfuron metil (ISO); il-metil-3-kloro-5-{[(4,6-dimetossipirimidin-2il)karbamojl]sulfamojl} -1-metil1H-pirazol-4-karbossilat, 2-metilimidazole u dibutilbis (pentan-2,4-dionato-O,O’)landa għandhom japplikaw mill-1 ta’ Ottubru 2021;

–ir-ringieli dwar it-2-benżil-2-dimetilammino-4’-morfolinobutirofenon, propikonażol (ISO); (2RS,4RS;2RS,4SR)-1-{[2-(2,4-diklorofenil) -4-propil-1,3-diossolan-2-il]metil}-1H-1,2,4-triażol u 1-vinilimidażol għandhom japplikaw minn [Uffiċċju tal-Pubblikazzjonijiet: jekk jogħġbok daħħal id-data — sitt xhur wara d-dħul fis-seħħ ta’ dan ir-Regolament emendatorju] .

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, 15.12.2020

(1)    ĠU L 396, 30.12.2006, p. 1.

(2)    Id-Direttiva tal-Kunsill 67/548/KEE tas-27 ta' Ġunju 1967 rigward l-approssimazzjoni tal-liġijiet, tar-regolamenti u tad-dispożizzjonijiet amministrattivi dwar il-klassifikazzjoni, l-imballaġġ u l-ittikkettjar ta' sustanzi perikolużi (ĠU 196, 16.8.1967, p. 1).

(3)    Ir-Regolament (UE) 2019/1021 tal-Parlament Ewropew u tal-Kunsill tal-20 ta’ Ġunju 2019 dwar il-pollutanti organiċi persistenti (ĠU L 169, 25.6.2019, p. 45).

(4)    Ir-Regolament tal-Kummissjoni (KE) Nru 552/2009 tat-22 ta' Ġunju 2009 li jemenda r-Regolament (KE) Nru 1907/2006 tal-Parlament Ewropew u tal-Kunsill dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta' sustanzi kimiċi (REACH) fir-rigward tal-Anness XVII (ĠU L 164, 26.6.2009, p. 7).

(5)    Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta’ Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1).

(6)    Ir-Regolament tal-Kummissjoni (UE) 2018/675 tat-2 ta' Mejju 2018 li jemenda l-Appendiċijiet tal-Anness XVII tar-Regolament (KE) Nru 1907/2006 tal-Parlament Ewropew u tal-Kunsill dwar ir-Reġistrazzjoni, il-Valutazzjoni, l-Awtorizzazzjoni u r-Restrizzjoni ta' Sustanzi Kimiċi (REACH) fir-rigward tas-sustanzi CMR (ĠU L 114, 4.5.2017, p. 4).

(7)    Ir-Regolament tal-Kummissjoni (UE) 2018/1480 tal-4 ta’ Ottubru 2018 li jemenda, għall-finijiet tal-adattament tiegħu għall-progress tekniku u xjentifiku, ir-Regolament (KE) Nru 1272/2008 tal-Parlament Ewropew u tal-Kunsill dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, u li jikkoreġi r-Regolament tal-Kummissjoni (UE) 2017/776 (ĠU L 251, 5.10.2018, p. 1).

(8)    Ir-Regolament Delegat tal-Kummissjoni (UE) 2020/217 tal-4 ta’ Ottubru 2019 li jemenda, għall-finijiet tal-adattament tiegħu għall-progress tekniku u xjentifiku, ir-Regolament (KE) Nru 1272/2008 tal-Parlament Ewropew u tal-Kunsill dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, u li jikkoreġi dak ir-Regolament (ĠU L 44, 18.2.2018, p. 1).

(9)    Ir-Regolament (UE) 2017/745 tal-Parlament Ewropew u tal-Kunsill tas-7 ta’ April 2017 dwar apparati mediċi, li jemenda d-Direttiva 2001/83/KE, ir-Regolament (KE) Nru 178/2002 u r-Regolament (KE) Nru 1223/2009 u li jħassar id-Direttivi tal-Kunsill 90/385/KEE u 93/42/KEE (ĠU L 117, 5.5.2017, p. 1)

(10)    Ir-Regolament Delegat tal-Kummissjoni (UE) 2020/784 tat-8 ta’ April 2020 li jemenda l-Anness I tar-Regolament (UE) 2019/1021 tal-Parlament Ewropew u tal-Kunsill rigward l-elenkar tal-aċidu perfluworoottanojku (PFOA), l-imlieħ tiegħu u l-komposti relatati mal-PFOA (ĠU L 188, 15.06.2020, p.1).

(11)    Ir-Regolament tal-Kummissjoni (UE) 2017/776 tal-4 ta’ Mejju 2017 li jemenda, għall-finijiet tal-adattament tiegħu għall-progress tekniku u xjentifiku, ir-Regolament (KE) Nru 1272/2008 tal-Parlament Ewropew u tal-Kunsill dwar il-klassifikazzjoni, l-ittikkettar u l-imballaġġ tas-sustanzi u t-taħlitiet (ĠU L 116, 5.5.2017, p. 1).

ANNESS

L-Anness XVII tar-Regolament (KE) Nru 1907/2006 huwa emendat kif ġej:

(1)Il-kolonna 2 tal-entrata 3 hija emendata kif ġej:

(a)    il-paragrafu 3 huwa sostitwit b’dan li ġej:

“3. Ma għandhomx jitqiegħdu fis-suq jekk dawn ikollhom aġent tal-kulur, sakemm ma jkunx jinħtieġ għal finijiet fiskali jew bħala fwieħa jew għat-tnejn u jekk dawn:

- jistgħu jintużaw bħala fjuwil f’lampi dekorattivi għall-forniment lill-pubbliku ġenerali, u,

- joħolqu periklu għall-aspirazzjoni u jkunu indikati bil-figura H304 fuq it-tikketta tagħhom.”,

(b)    il-paragrafu 5 huwa sostitwit b’dan li ġej:

“5. Bla ħsara għall-implimentazzjoni ta’ dispożizzjonijiet tal-Unjoni oħrajn relatati mal-klassifikazzjoni, mal-imballaġġ u mal-ittikkettjar ta’ sustanzi u taħlitiet, min iforni għandu jiżgura, qabel it-tqegħid fis-suq, li dawn ir-rekwiżiti jkunu ssodisfati:

(a) iż-żjut tal-lampi, ittikkettjati b’H304, maħsuba għall-forniment lill-pubbliku ġenerali jkunu viżibbli, u mmarkati b’mod li jinqraw ċar u ma jitħassarx kif ġej: “Żomm il-lampi mimlijin b’dan il-likwidu ’l bogħod mit-tfal”; u, sal-1 ta’ Diċembru 2010, “Belgħa żgħira taż-żejt tal-lampi — jew anke l-issuffjar tal-ftila tal-lampi — tista’ twassal għal ħsara fil-pulmun li jhedded il-ħajja”;

(b) il-fluwidi tal-lajters tal-grill, ittikkettjati b’H304, maħsuba għall-forniment lill-pubbliku ġenerali jiġu mmarkati b’mod li jinqara ċar u li ma jitħassarx sal-1 ta’ Diċembru 2010 kif ġej: “Belgħa żgħira tal-likwidu tal-lajters tal-grill tista’ twassal għal ħsara fil-pulmun li jhedded il-ħajja”;

(c) iż-żjut tal-lampi u l-lajters tal-grill, ittikkettjati b’H304, maħsuba għall-forniment lill-pubbliku ġenerali huma ppakkjati f’kontenituri suwed opaki li ma jaqbżux il-litru sal-1 ta’ Diċembru 2010.”,

   (c)    jitħassar il-paragrafu 6,

   (d)    jitħassar il-paragrafu 7;

(2)titħassar l-entrata 22;

(3)Fl-entrati 28–30, il-punt (f) li ġej huwa miżjud fil-paragrafu 2 tal-kolonna 2:

“(f) apparati koperti mir-Regolament (UE) 2017/745 ”.

(4)Fl-entrata 46, jitħassru r-referenzi għan-numru tal-CAS u għan-numru tal-KE fil-paragrafu (a) tal-kolonna 1;

(5)titħassar l-entrata 67;

(6)titħassar l-entrata 68;

(7)It-titlu tal-Appendiċi 1 hu sostitwit b’dan li ġej:

“Entrata 28 — Karċinoġeni: Il-kategorija 1A”;

(8)L-Appendiċi 2 huwa emendat kif ġej:

(a)    it-titolu jinbidel b'dan li ġej:”.

“Entrata 28 — Karċinoġeni: Kategorija 1B”,

(b)    l-entrati li ġejjin jiddaħħlu fit-tabella skont l-ordni tan-numri tal-indiċi stabbiliti hemmhekk:

“kobalt	027-001-00-9	231-158-0	7440-48-4”
“benżo[rst]pentafen	601-090-00-X	205-877-5	189-55-9”
“dibenżo[b,def]krisen; dibenzo[a,h]piren	601-091-00-5	205-878-0	189-64-0”
“1,2-diidrossibenżen; pirokatekol;	604-016-00-4	204-427-5	120-80-9”
“aċetaldeid; etanal	605-003-00-6	200-836-8	75-07-0”
“spirodiklofen (ISO); 3-(2,4-diklorofenil)-2-osso-1-ossaspiro[4.5]dek-3-en-4-il 2,2-dimetilbutirat	607-730-00-4	—	148477-71-8”;

(9)It-titlu tal-Appendiċi 3 huwa sostitwit b’dan li ġej:""

“Entrata 29 — mutaġeni ta’ ċelloli ġerminali: Il-kategorija 1A”;

(10)It-titlu tal-Appendiċi 4 huwa sostitwit b’dan li ġej:""

“Entrata 29 — mutaġeni taċ-ċelloli ġerminali: Il-kategorija 1B”;

(11)L-Appendiċi 5 huwa emendat kif ġej:

(a)    it-titolu huwa sostitwit b'dan li ġej:”.

“Entrata 30 — Tossikanti għar-riproduzzjoni: Kategorija 1A”,

(b) l-entrati li ġejjin jiddaħħlu fit-tabella skont l-ordni tan-numri tal-indiċi stabbiliti hemmhekk:

“klorur metilmerkuriku

080-012-00-0

204-064-2

115-09-3”;

(12)L-Appendiċi 6 jiġi emendat kif ġej:

(a)    it-titolu huwa sostitwit b'dan li ġej:

“Entrata 30 — Tossikanti għar-riproduzzjoni: Kategorija 1B”,

(b)    l-entrati li ġejjin jiddaħħlu fit-tabella skont l-ordni tan-numri tal-indiċi stabbiliti hemmhekk:

“kobalt	027-001-00-9	231-158-0	7440-48-4”
“ossidu tal-etilen; ossiran	603-023-00-X	200-849-9	75-21-8”
“etanol, 2,2'-iminobis-, derivati tan-N-(C13–15-alkil lineari u fi friegħi).	603-236-00-8	308-208-6	97925-95-6”
“2-benżil-2-dimetilammino-4’-morfolinobutirofenon	606-047-00-9	404-360-3	119313-12-1”
“ftalat tad-diisoeżil	607-737-00-2	276-090-2	71850-09-4”
“propikonażol (ISO); (2RS,4RS;2RS,4SR)-1-{[2-(2,4-diklorofenil)-4-propil-1,3-diossolan-2-yl]metil}-1H-1,2,4-triazol	613-205-00-0	262-104-4	60207-90-1”
“1-vinilimidazol	613-328-00-X	214-012-0	1072-63-5”
“ħalosulfuron-metil (ISO); metil 3-kloro-5-{[(4,6dimetossipirimidin-2yl)karbamossil]sulfamojl}-1-metil1H-pirazol-4-karbossilat	613-329-00-5	—	100784-20-1”
“2-metilimidażol	613-330-00-0	211-765-7	693-98-1”
“dibutilbis(pentan-2,4-dijonato-O,O')landa	650-056-00-0	245-152-0	22673-19-4”;

(13)Fl-Appendiċi 10, it-tabella hija sostitwita bit-tabella li ġejja:

“L-Organizzazzjoni Ewropea għall-Istandardizzazzjoni	Referenza u titlu tal-istandard armonizzat	Referenza tal-istandard mibdul
CEN	EN ISO 17234-1:2015 Ġilda – Testijiet kimiċi għad-determinazzjoni ta’ ċerti ażokoloranti fil-ġlud miżbugħa – Parti 1: Determinazzjoni ta’ ċerti ammini aromatiċi dderivati mill-ażokoloranti	EN ISO 17234-1:2010
CEN	EN ISO 17234-2:2011 Ġilda – Testijiet kimiċi għad-determinazzjoni ta’ ċerti ażokoloranti fil-ġlud miżbugħa – Parti 2: Id-determinazzjoni ta’ 4-aminoażobenżen	CEN ISO/TS 17234:2003
CEN	EN ISO 14362-1:2017 Drappijiet - Metodi għad-determinazzjoni ta’ ċerti ammini aromatiċi dderivati mill-ażokoloranti - Parti 1: Detezzjoni tal-użu ta’ ċerti ażokoloranti aċċessibbli bl-estrazzjoni tal-fibri jew mingħajrha	EN 14362-1:2012
CEN	EN ISO 14362-3:2017 Drappijiet - Metodi għad-determinazzjoni ta’ ċerti ammini aromatiċi dderivati mill-ażokoloranti - Parti 3: Sejbien tal-użu ta’ ċerti ażokoloranti, li jistgħu jirrilaxxaw l-4-amminoażobenżen	EN 14362-3:2012”