|
TUAIRIM |
|
Coiste Eacnamaíoch agus Sóisialta na hEorpa |
|
Leasú ar bhunghníomhartha an Chomhbheartais Talmhaíochta – simpliú |
|
_____________ |
|
Togra le haghaidh Rialachán ó Pharlaimint na hEorpa agus ón gComhairle lena leasaítear Rialacháin (AE) 2021/2115 agus (AE) 2021/2116 a mhéid a bhaineann le caighdeáin maidir le dea-riocht talmhaíochta agus comhshaoil talún, scéimeanna aeráide, comhshaoil agus leasa ainmhithe, leasuithe ar Phleananna Straitéiseacha CBT, athbhreithniú ar Phleananna Straitéiseacha CBT agus díolúintí ó rialuithe agus pionóis
|
|
NAT/932 |
|
Rapóirtéir: Stoyan TCHOUKANOV |
GA
|
Comhairliúchán |
Comhairle an Aontais Eorpaigh, 19/3/2024, Parlaimint na hEorpa, 22/3/2024 |
|
Bunús dlí |
Airteagal 43(2) agus Airteagal 304 den Chonradh ar Fheidhmiú an Aontais Eorpaigh |
|
An rannóg atá freagrach |
Talmhaíocht, Forbairt Tuaithe agus an Comhshaol |
|
Dáta a glactha sa seisiún iomlánach |
24/4/2024 |
|
Seisiún iomlánach Uimh. |
587 |
|
Toradh na vótála
|
200/1/8 |
1.Conclúidí agus moltaí
1.1Is díol sásaimh do Choiste Eacnamaíoch agus Sóisialta na hEorpa (CESE) go bhfuil roinnt beart á moladh ag an gCoimisiún Eorpach, i gcomhréir leis na tuairimí a d’fhoilsigh CESE roimhe seo 1 , chun breis solúbthachta a thabhairt d’fheirmeoirí an Aontais agus an t‑ualach riaracháin atá orthu a laghdú, d’fhonn an biafhlaitheas a neartú agus cur le hioncam na bhfeirmeoirí. Meabhraíonn sé freisin nach mór, i ndeireadh na dála, tacú le córais bhia inbhuanaithe sa Chomhbheartas Talmhaíochta (CBT), fiú más leagan simplithe de a bheidh le cur i bhfeidhm, sin le go bhféadfar aghaidh a thabhairt ar na riachtanais shochaíocha agus éiceolaíocha, rud a chabhróidh le spriocanna forbartha inbhuanaithe na Náisiún Aontaithe a bhaint amach. Mar sin féin, ba mhaith le CESE aird a tharraingt ar roinnt de na srianta agus na héiginnteachtaí atá sa togra reatha.
1.2Ar an gcéad dul síos, meabhraíonn CESE nach leigheasóidh an togra seo an phríomhfhadhb atá ag na feirmeoirí, sin le rá go bhfuil an luach á dháileadh go míchothrom ar fud shlabhra an tsoláthair bia, rud a chuireann bac ar na feirmeoirí ioncam cóir a fháil dá dtáirgí bia (tá ioncam feirmeoirí thart ar 40 % níos ísle ná an meánioncam sna hearnálacha neamhthalmhaíochta) 2 , 3 . Dá bhrí sin, iarrann CESE go ndéanfaí na gnéithe eile a mhol an Coimisiún Eorpach sa phacáiste 4 (maidir le conarthaí, comhlachais táirgeoirí, scéimeanna deonacha, cleachtais éagóracha trádála agus an fhaireachlann maidir le costais táirgthe, corrlaigh agus cleachtais trádála) a chur i láthair agus a ghlacadh go tapa. Tá na gnéithe sin uile chomh práinneach lena chéile; is gnéithe iad a chabhróidh leis an gcuspóir foriomlán a bhaint amach, mar atá, ioncam níos cothroime a thabhairt d’fheirmeoirí agus na glúnta óga a mhealladh i dtreo na feirmeoireachta. Ba cheart tuilleadh tacaíochta a thabhairt freisin do chur chun cinn slabhraí soláthair gairide agus scéimeanna cáilíochta agus a áirithiú go dtugtar tosaíocht dóibh i nósanna imeachta soláthair na mBallstát, lena n‑áirítear trí spriocanna éigeantacha a leagan síos do na Ballstáit maidir lena gcruthú nó lena bhfeabhsú; is bealach é sin trínar féidir cur leis an mbreisluach a bhaineann leis na feirmeacha agus leis an gcumas tuillimh iontu. Tá géarghá le méadú suntasach ar ioncam na bhfeirmeoirí le go mbeidh siad in ann teacht isteach maith a shaothrú agus tuilleadh a dhéanamh ar mhaithe leis an gcomhshaol trí bhearta a chur i bhfeidhm maidir leis an nglasú.
1.3Tacaíonn CESE, i bpriosabal, leis an tsolúbthacht a thugtar do na Ballstáit – agus, dá bharr sin, d’fheirmeoirí an Aontais – chun na cleachtais feirmeoireachta a chur in oiriúint ar bhealach dinimiciúil do na dálaí réigiúnacha1. Mar sin féin, meabhraíonn CESE nár cheart breathnú ar bheartais an chomhshaoil agus na haeráide ná ar chaighdeáin shóisialta mar ualach ach mar chuid de na réitigh agus na treoirlínte fadtéarmacha le haghaidh na bpróiseas cinnteoireachta sna blianta amach romhainn1, agus nár cheart a thuiscint leis an gcoincheap ‘solúbthacht’ gur maolú ar na huaillmhianta agus lagú ar na haidhmeanna glasa sa leagan athbhreithnithe de CBT a bheidh i gceist. Cuireann CESE in iúl gur tugadh isteach coincheap na coinníollachta chun na préimheanna in aghaidh an heicteáir (‘tacaíocht bhunúsach ioncaim i dtaobh na hinbhuanaitheachta’) a dhlisteanú i dtuairim na gcáiníocóirí. Mura mbeidh na feirmeoirí inmharthana ar bhonn eacnamaíoch, ní bheifear in ann spriocanna níos uaillmhianaí i dtaobh an chomhshaoil a leagan síos, lena n‑áirítear tríd an gcoinníollacht. Beidh ar na feirmeoirí leanúint den phróiseas oiriúnaithe don athrú aeráide agus díriú ar ghníomhaíochtaí ceangailteacha chun an leibhéal carbóin a ísliú, etc. Tá feirmeoirí ag éirí níos neamhchosanta ar an athrú aeráide agus bíonn orthu déileáil le dálaí adhaimsire níos minice ná riamh, rud a d’fhéadfadh cur isteach ar a gcumas oibriú de réir sprioc-amanna agus tráthchláir oiriúnacha, mar shampla i gcás barra cumhdaigh a chur. Fágann na maoluithe sealadacha atá beartaithe a chur i bhfeidhm i gcás dálaí adhaimsire agus an simpliú atá beartaithe maidir leis an gcuraíocht, an cumhdach ithreach agus athchóiriú na bhféarthailte buana, go mbeidh feirmeoirí in ann aire a thabhairt dá gcuid talún ar an gcaoi is fearr is féidir agus a mhéid is féidir de réir na ndálaí aeráide.
1.4Meabhraíonn CESE gur gá an margadh inmheánach a chosaint agus an iomaíocht chóir a áirithiú le haghaidh fheirmeoirí agus FBManna an Aontais trí bhíthin comhaontuithe trádála cothroma agus bearta trádála uathrialacha le tríú tíortha ina leagfaí síos na caighdeáin sláinte, shóisialta agus chomhshaoil maidir le hallmhairí agus na caighdeáin sin a bheith coibhéiseach ar a laghad leis na caighdeáin a cheanglaítear san Aontas1. Tá gá freisin le clásail chosanta arbh éasca leas a bhaint astu agus arbh éifeachtach iad i gcás suaitheadh sa mhargadh (clásail chomhuaineacha, an chómhalartacht).
1.5Ullmhaíodh an t‑athchóiriú ar CBT sula raibh trácht ar bith ar COVID-19 agus fogha na Rúise faoin Úcráin, dhá rud a d’fhág gur casta i bhfad staid eacnamaíoch na bhfeirmeoirí anois, rud nárbh fhéidir a thuar roimhe seo. Chun tacú le hinbhuanaitheacht agus neamhspleáchas fadtéarmach tháirgeadh bia an Aontais, ba cheart níos mó a dhéanamh sa leagan reatha de CBT chun tacú le feirmeoirí atá tiomanta d’éiciscéimeanna nó d’éicisheirbhísí eile, amhail caomhnú na bithéagsúlachta, trí bhíthin buiséad a sholáthar atá i gcomhréir leis an méid a bhfuiltear ag súil a bhaint amach.
1.6Measann CESE gur cheart tacaíocht iomchuí a thabhairt do na feirmeoirí agus iad i mbun an aistrithe, agus gur cheart na héifeachtaí seachtracha dearfacha maidir leis an tírdhreach, an bhithéagsúlacht, an comhshaol agus an aeráid a bhaineann le roinnt gníomhaíochtaí talmhaíochta sonracha a dhreasú tríd an gcistiú poiblí nó trí chonarthaí príobháideacha 5 . Sa chomhthéacs sin, tá CESE den tuairim go bhféadfadh sé, i gcás na mbeart atá beartaithe maidir leis na ‘gnéithe neamhtháirgiúla’ mar a thugtar orthu, lena gceadaítear d’fheirmeoirí sciar dá dtalamh arúil a fhágáil bán nó gnéithe nua tírdhreacha a chruthú sna limistéir sin (agus, á dhéanamh sin, tacaíocht airgeadais bhreise a fháil trí éiciscéim), go mbeadh torthaí níos dearfaí orthu ná mar a leagadh amach le CBT i dtosach, ar choinníoll go gcuirfí acmhainní airgeadais breise iomchuí ar fáil. D’fhágfadh sin go mbeadh CBT éifeachtach go héiceolaíoch agus, freisin, go mbeadh gnólachtaí talmhaíochta in ann aistriú céim ar chéim idir seo agus an chéad tréimhse chistiúcháin eile a phleanáil.
1.7Dá bhrí sin, tá CESE ag tathant ar an gCoimisiún Eorpach agus ar na Ballstáit a áirithiú go mbeidh an cistiú i gcomhréir leis an uaillmhian a comhaontaíodh, is é sin CBT atá inbhuanaithe ó thaobh an gheilleagair de, níos glaise agus níos córa a bheith ann. Molann CESE go ndéanfadh na Ballstáit measúnú ar thionchar na mbeart simpliúcháin sin a luaithe is féidir in 2025, ag féachaint go háirithe do na héifeachtaí a d’fhéadfadh a bheith acu ar ioncam na bhfeirmeoirí agus ar mhéid iomlán na ndromchlaí nó na ngnéithe a d’úsáidfí ar mhaithe leis an mbithéagsúlacht.