(1)

Le Rialachán Cur Chun Feidhme (AE) 2020/617 ón gCoimisiún (2) rinneadh formheas na substainte gníomhaí meatalacsail-M a athnuachan.

(2)

Sna coinníollacha i ndáil le formheas na substainte gníomhaí meatalacsail-M, mar a chuirtear isteach i gCuid B den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (3) le Rialachán Cur Chun Feidhme (AE) 2020/617, áirítear uasleibhéal 0,18 g/kg le haghaidh an eisíontais CGA226048 (eistear 1-meatocsacarbóinil-eitile aigéid 2-[(2,6-démheitil-feinil)-(2-meatocsaicéitil)-aimínea]-próipianaigh) mar aon le srian go bhfuil úsáid ábhair cosanta plandaí ina bhfuil meatalacsail M le haghaidh cóireáil síolta le teorannú do shíolta atá beartaithe lena gcur i dtithe gloine.

(3)

I gcomhréir le hAirteagal 7(1) de Rialachán (CE) Uimh. 1107/2009, an 17 Meitheamh 2020, chuir Syngenta Crop Protection AG iarratas faoi bhráid an Bhallstáit is rapóirtéir, an Bheilg, inar iarradh leasú ar choinníollacha formheasa meatalacsail-M, chun deireadh a chur leis an srian a bhaineann le cur síolta agus chun uasleibhéal an eisíontais CGA226048 sna coinníollacha formheasa sin a thabhairt cothrom le dáta. Chinn an Ballstát is rapóirtéir an t-iarratas a bheith inghlactha.

(4)

Rinne an Ballstát is rapóirtéir measúnú ar úsáid nua bheartaithe na substainte gníomhaí meatalacsail-M agus leibhéal uasdátaithe beartaithe an eisíontais CGA226048 i ndáil leis na héifeachtaí a d’fhéadfadh a bheith ann ar shláinte an duine agus ar shláinte ainmhithe agus ar an gcomhshaol i gcomhréir le hAirteagal 4 de Rialachán (CE) Uimh. 1107/2009, agus d’ullmhaigh sé tuarascáil athbhreithnithe maidir le measúnú ar athnuachan, agus cuireadh an tuarascáil sin faoi bhráid an Údaráis Eorpaigh um Shábháilteacht Bia ('an tÚdarás') agus an Choimisiúin an 9 Márta 2021.

(5)

I gcomhréir le hAirteagal 12(1) de Rialachán (CE) Uimh. 1107/2009, scaip an tÚdarás an tuarascáil athbhreithnithe maidir le measúnú ar athnuachan ar an iarratasóir agus ar na Ballstáit chun barúlacha a fháil agus chuir sé ar fáil don phobal í. I gcomhréir le hAirteagal 12(3) de Rialachán (CE) Uimh. 1107/2009, iarradh faisnéis bhreise ar an iarratasóir. Rinne an Ballstát is rapóirtéir meastóireacht ar an bhfaisnéis bhreise agus chuir sé an tuarascáil athbhreithnithe maidir le measúnú ar athnuachan faoi bhráid an Choimisiúin agus an Údaráis an 13 Aibreán 2023.

(6)

An 3 Deireadh Fómhair 2023, chuir an tÚdarás a chonclúid in iúl don Choimisiún (4) i dtaobh an bhféadfadh coinne a bheith leis go gcomhlíonfaidh úsáid nua bheartaithe na substainte gníomhaí meatalacsail-M agus leibhéal uasdátaithe beartaithe an eisíontais CGA226048 na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(7)

Sa chonclúid ón Údarás, suíodh go gcomhlíontar na critéir formheasa dá bhforáiltear in Airteagal 4 de Rialachán (CE) Uimh. 1107/2009 toisc go bhfuil leibhéal níos ísle ná 10 g/kg ann i gcás eisíontais CGA226048.

(8)

Ar bhonn na conclúide ón Údarás, chuir an Coimisiún aguisín a ghabhann leis an tuarascáil athbhreithniúcháin ar mheatalacsail-M mar aon le dréacht-Rialachán faoi bhráid an Bhuanchoiste um Plandaí, Ainmhithe, Bia agus Beatha an 22 Bealtaine 2024.

(9)

Le Rialachán Cur Chun Feidhme ón gCoimisiún (AE) 2024/1718 (5), rinne an Coimisiún leasú ar fhormheas mheatalacsail-M trí uaschion athbhreithnithe CGA226048 a shuí.

(10)

A mhéid a bhaineanna leis an srian i ndáil le síolta cóireáilte a chur, shainaithin an tÚdarás príomhréimse imní. Sainaithníodh riosca ard géar agus fadtéarmach d’éin agus do mhamaigh fhiáine. Sa chonclúid agus ina dhoiciméid chúlra, áfach, tugadh le fios go bhféadfaí úsáid shlán a dhéanamh i gcóireáil agus i gcur síolta spionáiste má thugtar faoi le cruinn-druileáil. I gcomhréir le hAirteagal 31 de Rialachán (CE) Uimh. 178/2002 ó Pharlaimint na hEorpa agus ón gComhairle (6), arna léamh i gcomhar le Rialachán (CE) Uimh. 1107/2009, d’iarr an Coimisiún go soláthróidh an tÚdarás measúnú riosca nuashonraithe ar éin agus ar mhamaigh.

(11)

An 4 Iúil 2025, chuir an tÚdarás a chonclúid nuashonraithe in iúl don Choimisiún (7) i dtaobh an bhféadfadh coinne a bheith leis go gcomhlíonfaidh úsáid nua bheartaithe na substainte gníomhaí meatalacsail-M na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(12)

Shuigh an tÚdarás ina chonclúid nuashonraithe nach bhfuil riosca d’éin agus do mhamaigh fhiáine ag baint le cur síolta atá cóireáilte le táirgí cosanta plandaí ina bhfuil meatalacsail-M lasmuigh de thithe gloine má chuirtear dea-chleachtais talmhaíochta bheachtaithe (DCTanna) i bhfeidhm, go háirithe tríd an ráta síolaithe síolta a theorannú agus trí threalamh cruinn-dhruileála a úsáid.

(13)

Chuir an Coimisiún an dara haguisín a ghabhann leis an tuarascáil athbhreithniúcháin ar mheatalacsail-M mar aon le dréacht den Rialachán sin faoi bhráid an Bhuanchoiste um Plandaí, Ainmhithe, Bia agus Beatha an 10 Nollaig 2025.

(14)

Iarradh ar an iarratasóir barúlacha a chur isteach maidir leis an dara haguisín a ghabhann leis an tuarascáil athbhreithniúcháin.

(15)

Ar bhonn na dtorthaí ón measúnú riosca, meastar go bhfuil sé iomchuí uasráta síolaithe a shocrú ar cheart feidhm a bheith aige mura rud é go léirítear le toradh measúnaithe riosca maidir le síolta a chur, mar chuid d’údarú chun táirgí cosanta plandaí a chur ar an margadh don úsáid sin, nach mbíonn aon éifeacht dho-ghlactha ar éin ná ar mhamaigh mar gheall ar ráta níos airde. Meastar freisin gurb iomchuí a iarraidh go n-úsáidfí trealamh cruinn-druileála. Mar sin, is iomchuí an srian a bhaint, srian lena dteorannaítear úsáid an ábhair cosanta plandaí ina bhfuil meatalacsail-M chun cóireáil a dhéanamh ar shíolta atá beartaithe lena gcur i dtithe gloine amháin.

(16)

Dá bhrí sin, ba cheart Rialacháin Cur Chun Feidhme (AE) 2020/617 agus Uimh. (AE) 540/2011 a leasú dá réir.

(17)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha.