(1)

An 24 Feabhra 2022, d’fhógair Uachtarán Chónaidhm na Rúise ‘oibríocht mhíleata speisialta’ san Úcráin, agus chuir fórsaí armtha na Rúise tús le cogadh foghach gan chúis gan údar ar an Úcráin. Is sárú follasach ar iomláine chríochach, ar cheannasacht agus ar neamhspleáchas na hÚcráine é an cogadh foghach neamhdhleathach sin, agus is sárú é chomh maith ar an toirmeasc ar úsáid fornirt a chumhdaítear in Airteagal 2(4) de Chairt na Náisiún Aontaithe, ar riail dhomhaolaithe den dlí idirnáisiúnta é, agus ar phrionsabail eile Chairt na Náisiún Aontaithe.

(2)

Ó thús chogadh foghach na Rúise ar an Úcráin, cogadh atá gan chúis, gan údar, tá tacaíocht nach raibh a leithéid tugtha riamh roimhe d’athléimneacht eacnamaíoch, shóisialta, airgeadais agus cosanta na hÚcráine slógtha ag an Aontas, a Bhallstáit agus institiúidí airgeadais Eorpacha. Comhcheanglaítear leis an tacaíocht sin tacaíocht ó bhuiséad an Aontais, lena n-áirítear cúnamh eisceachtúil macrairgeadais agus tacaíocht ón mBanc Eorpach Infheistíochta agus ón mBanc Eorpach Athfhoirgníochta agus Forbartha, arna ráthú go hiomlán nó go páirteach le buiséad an Aontais, chomh maith le tacaíocht airgeadais bhreise ó na Ballstáit.

(3)

Le Cinneadh (AE) 2022/313 (3), Cinneadh (AE) 2022/1201 (4), Cinneadh (AE) 2022/1628 (5) agus Rialachán (AE) 2022/2463 (6) ó Pharlaimint na hEorpa agus ón gComhairle, i dteannta a chéile, cuireadh EUR 25 200 000 000 de chúnamh macrairgeadais ar fáil don Úcráin le linn 2022 agus 2023. Ba ghné thábhachtach í an tacaíocht sin d’athléimneacht mhaicreacnamaíoch agus airgeadais na hÚcráine tráth a bhí sí ag teastáil go mór.

(4)

Le Rialachán (AE) 2024/792 ó Pharlaimint na hEorpa agus ón gComhairle (7), bunaíodh an tSaoráid don Úcráin mar ionstraim mheántéarmach eisceachtúil lena dtugtar le chéile an tacaíocht dhéthaobhach a sholáthair an tAontas don Úcráin, rud lena n-áirithítear comhordú agus éifeachtúlacht (‘an tSaoráid don Úcráin’). Le linn na tréimhse ó 2024 go 2027, cuidíonn an tSaoráid don Úcráin le haghaidh a thabhairt ar riachtanais mhaoiniúcháin na hÚcráine agus rannchuidíonn sí lena riachtanais téarnaimh, atógála agus nuachóiriúcháin, agus, an tráth céanna, tacaíonn sí le hiarracht athchóirithe na hÚcráine mar chuid dá conair i dtreo aontachas leis an Aontas.

(5)

Le Rialachán (AE) 2024/2773 ó Pharlaimint na hEorpa agus ón gComhairle (8), bunaíodh an Sásra Comhair le haghaidh Iasachtaí don Úcráin agus soláthraíodh cúnamh macrairgeadais eisceachtúil don Úcráin. Ba í an cúnamh sin ranníocaíocht an Aontais mar chuid de thionscnamh G7 ‘Iasachtaí lena nGéaraítear an tIoncam Urghnách don Úcráin’ (‘mear-iasachtaí G7’), a chuidigh i dteannta a chéile chun aghaidh a thabhairt ar bhearna mhaoiniúcháin na hÚcráine do 2025.

(6)

Tá damáiste ollmhór déanta ag cogadh foghach na Rúise ar an Úcráin san Úcráin féin, agus is é EUR 506 000 000 000 na costais téarnaimh agus atógála a mheastar a tabhaíodh go dtí an 31 Nollaig 2024. Thairis sin, chaill an Úcráin rochtain ar mhargaí airgeadais idirnáisiúnta agus tháinig laghdú mór ar ioncam poiblí, agus an tráth céanna, tá méadú mór tagtha ar chaiteachas poiblí. I bhfianaise an mhéid sin, is féidir a bheartú go mbeidh riachtanais chistiúcháin shubstainteacha ag an Úcráin sna blianta amach romhainn.

(7)

An 9 Meán Fómhair 2025 chuir an Úcráin iarraidh oifigiúil isteach chuig an gCiste Airgeadaíochta Idirnáisiúnta (CAI) ar chlár nua chun riachtanais mhaoiniúcháin bhreise a chumhdach ó 2026 go 2029. Thiocfadh an clár sin i gcomharbas ar chur chun feidhme rathúil chlár CAI atá ann cheana, ar dá bhun a bhfuil ocht n-athbhreithniú curtha i gcrích ag an Úcráin, ach ina gcuirtear san áireamh gur leanadh de chogadh foghach na Rúise ar an Úcráin. Tá cumas CAI dul ar aghaidh leis an gclár nua ag brath ar dhearbhuithe leordhóthanacha maoiniúcháin a fháil ó chomhpháirtithe, lena n-áirítear an tAontas.

(8)

D’ainneoin na n-iarrachtaí leanúnacha idirnáisiúnta ar theacht ar réiteach síochánta ar an gcoinbhleacht, tá damáiste suntasach déanta do bhonneagar criticiúil cosanta, sibhialtach agus fuinnimh na hÚcráine mar thoradh ar fhadú chogadh foghach na Rúise ar an Úcráin, rud a fhágann gur gá acmhainní substaintiúla breise a shlógadh chun aghaidh a thabhairt ar riachtanais mhaoiniúcháin láithreacha na hÚcráine.

(9)

Is bagairt straitéiseach gheopholaitiúil ar an Aontas trí chéile é cogadh foghach na Rúise ar an Úcráin agus ní mór do na Ballstáit an fód a sheasamh go láidir in éineacht le chéile dá bharr. Tá sé ríthábhachtach, dá bhrí sin, tacaíocht ón Aontas a úsáid go tapa agus a bheith in ann an tacaíocht sin a oiriúnú go solúbtha d’fhóirithint láithreach agus d’athshlánú gearrthéarmach ar an mbealach chun atógáil amach anseo a bhaint amach.

(10)

I gcomhréir leis na hAirteagail maidir le Freagracht na Stát i leith Gníomhartha Éagóracha ar Leibhéal Idirnáisiúnta, arna nglacadh in 2001 ag Coimisiún Dlí Idirnáisiúnta na Náisiún Aontaithe ag a thríú seisiún is caoga, agus arna dtabhairt faoi deara ag Comhthionól Ginearálta na Náisiún Aontaithe i Rún 56/83, agus i ndlí idirnáisiúnta an ghnáis, tá oibleagáid ar an Rúis – mar an stát freagrach – cúiteamh iomlán a dhéanamh as an díobháil a rinneadh mar thoradh ar a cogadh foghach ar an Úcráin.

(11)

Le Cinneadh (CBES) 2022/335 ón gComhairle (9) agus Rialachán (AE) 2022/334 ón gComhairle (10), cuirtear toirmeasc ar idirbhearta a bhaineann le bainistiú cúlchistí agus sócmhainní de chuid Bhanc Ceannais na Rúise, lena n-áirítear idirbhearta le haon duine dlítheanach, eintiteas nó comhlacht atá ag gníomhú thar ceann Bhanc Ceannais na Rúise, nó faoina threoir. Sna conclúidí uaithi an 27 Meitheamh 2024, an 17 Deireadh Fómhair 2024 agus an 19 Nollaig 2024, dúirt an Chomhairle Eorpach freisin, faoi réir dhlí an Aontais, gur cheart sócmhainní na Rúise leanúint de bheith blocáilte go dtí go gcuirfidh an Rúis deireadh lena cogadh foghach ar an Úcráin agus go gcúiteoidh sí an Úcráin as an damáiste atá déanta ag an gcogadh sin.

(12)

Ina theannta sin, le Rialachán (AE) 2025/2600 ón gComhairle (11), cuirtear toirmeasc ar aistriú sócmhainní nó cúlchistí Bhanc Ceannais na Rúise ar bhonn sealadach go dtí go gcuirfidh an Rúis deireadh lena cogadh foghach ar an Úcráin, go dtí go dtabharfaidh an Rúis cúiteamh don Úcráin a mhéid is gá chun atógáil a cheadú gan iarmhairtí díobhálacha eacnamaíocha nó airgeadais a bheith ann don Aontas agus go dtí go scoirfidh gníomhaíochtaí na Rúise i gcomhthéacs a cogaidh fhoghaigh ar an Úcráin go hoibiachtúil de bheith ina riosca tromchúiseach go mbeidh deacrachtaí tromchúiseacha ann do gheilleagar an Aontais agus a Bhallstát.

(13)

Sna conclúidí uaithi an 18 Nollaig 2025, chomhaontaigh an Chomhairle Eorpach iasacht EUR 90 000 000 000 a thabhairt don Úcráin le haghaidh na mblianta 2026 agus 2027 bunaithe ar iasachtaíocht an Aontais ar na margaí caipitil a bhfuil lamháil bhuiséad an Aontais mar thaca léi. Leagadh amach freisin sna conclúidí ón gComhairle Eorpach, trí bhíthin comhar feabhsaithe de bhun Airteagal 20 den Chonradh ar an Aontas Eorpach (CAE), nach mbeidh tionchar ag aon slógadh acmhainní ó bhuiséad an Aontais, ina cháil mar ráthaíocht don iasacht sin, ar oibleagáidí airgeadais Phoblacht na Seice, na hUngáire ná na Slóvaice. Ar an dáta céanna, chomhaontaigh 25 Bhallstát nár cheart don Úcráin an iasacht a aisíoc go dtí go bhfaigheadh sí an cúiteamh. Go dtí sin, ba cheart sócmhainní Bhanc Ceannais na Rúise a bheith blocáilte i gcónaí agus ba cheart don Aontas a cheart úsáid a bhaint astu chun an iasacht a aisíoc a fhorchoimeád, i gcomhréir iomlán le dlí an Aontais agus leis an dlí idirnáisiúnta. Chuir na Ballstáit sin i dtreis a thábhachtaí atá na gnéithe seo a leanas i ndáil leis an iasacht: tionscail chosanta na hEorpa agus na hÚcráine a neartú; an Úcráin a bheith ag leanúint den smacht reachta a chaomhnú, lena n-áirítear comhrac an éillithe; agus cineál sonrach beartais slándála agus cosanta Ballstát áirithe agus leasanna slándála agus cosanta na mBallstát uile.

(14)

An 29 Eanáir 2026, ghlac an Chomhairle Cinneadh (AE) 2026/258 lena n-údaraítear comhar feabhsaithe idir an Bheilg, an Bhulgáir, an Danmhairg, an Ghearmáin, an Eastóin, Éire, an Ghréig, an Spáinn, an Fhrainc, an Chróit, an Iodáil, an Chipir, an Laitvia, an Liotuáin, Lucsamburg, Málta, an Ísiltír, an Ostair, an Pholainn, an Phortaingéil, an Rómáin, an tSlóivéin, an Fhionlainn agus an tSualainn maidir le bunú Iasachta don Úcráin.

(15)

I bhfianaise staid mhaoiniúcháin na hÚcráine, a chriticiúla atá sé go mbeadh na hacmhainní ag an Úcráin chun fogha na Rúise a chomhrac agus, i gcás inar féidir, chun í féin a atógáil, is iomchuí go gcuirfeadh an tAontas tacaíocht bhreise ar fáil chun aghaidh a thabhairt ar cheanglais phráinneacha mhaoiniúcháin na hÚcráine agus chun cur chun feidhme chlár CAI a éascú. Chuige sin, is iomchuí ionstraim a bhunú chun cúnamh ón Aontas a sholáthar don Úcráin in 2026 agus 2027 i bhfoirm iasachta atá le haisíoc trí chúiteamh atá dlite ón Rúis (‘an Iasacht Tacaíochta don Úcráin’).

(16)

Leis an Iasacht Tacaíochta don Úcráin, ba cheart cúnamh airgeadais a sholáthar don Úcráin ar bhealach intuartha, leanúnach, ordúil, solúbtha agus tráthúil d’fhonn tacú leis an Úcráin a riachtanais mhaoiniúcháin agus chosanta a chumhdach, go háirithe na riachtanais sin a eascraíonn as cogadh foghach na Rúise ar an Úcráin. Go sonrach, le hIasacht Tacaíochta don Úcráin ba cheart tacú le cobhsaíocht mhacrairgeadais san Úcráin agus a maoiniú seachtrach a éascú agus tacú le hacmhainneacht thionsclaíoch na hÚcráine i dtaca leis an gcosaint trí chomhar eacnamaíoch, airgeadais agus teicniúil, agus ar an gcaoi sin rannchuidiú le buntáiste míleata cáilíochtúil a sholáthar don Úcráin.

(17)

Leis an Iasacht Tacaíochta don Úcráin, faoi réir coinníollacha, ba cheart tacaíocht a sholáthar don Úcráin i bhfoirm iasachta suas le EUR 90 000 000 000. I bhfianaise phrionsabal na bainistíochta fónta airgeadais, ba cheart don Choimisiún an Iasacht Tacaíochta don Úcráin a chur ar fáil don Úcráin i dtráthchodanna, a fhéadfar a eisíoc i dtráinse amháin nó níos mó.

(18)

Ba cheart an tacaíocht faoin Iasacht Tacaíochta don Úcráin a chur ar fáil faoin réamhchoinníoll go leanfadh an Úcráin de shásraí éifeachtacha daonlathacha a chaomhnú agus a urramú, lena n-áirítear córas parlaiminteach ilpháirtí agus an smacht reachta, agus urraim do chearta an duine a ráthú, lena n-áirítear cearta daoine ar de ghrúpaí mionlaigh iad. Mar chuid de chaomhnú agus urramú an smachta reachta, ba cheart an t-éilliú a chomhrac.

(19)

Ba cheart an cúnamh airgeadais agus eacnamaíoch atá ar fáil faoin Iasacht Tacaíochta don Úcráin a chur ar fáil don Úcráin i gcomhréir lena riachtanais mhaoiniúcháin. Chuige sin, ba cheart don Úcráin Straitéis de chuid na hÚcráine um Maoiniú a thíolacadh maidir lena riachtanais mhaoiniúcháin agus lena foinsí maoiniúcháin. Ba cheart an phríomhfhaisnéis maidir le staid bhuiséadach, airgeadais agus eacnamaíoch na hÚcráine a bheith i Straitéis na hÚcráine um Maoiniú, chomh maith leis an tacaíocht atá á fáil ag an Úcráin ón gcomhphobal idirnáisiúnta.

(20)

Ba cheart don Choimisiún measúnú a dhéanamh ar Straitéis na hÚcráine um Maoiniú gan moill mhíchuí agus ba cheart dó gníomhú i ndlúthchomhar leis an Úcráin. I bhfianaise scála mór riachtanais na hÚcráine maidir le cúnamh buiséadach agus cúnamh le haghaidh acmhainneacht thionsclaíoch i dtaca leis an gcosaint araon, chomh maith leis na srianta atá ar roinnt comhpháirtithe seachtracha ó thaobh tacaíocht a sholáthar, is iomchuí dáileadh táscach na hIasachta Tacaíochta don Úcráin idir an dá riachtanas maoiniúcháin sin a leagan síos. Agus é á áirithiú go dtabharfar aghaidh go hiomlán ar riachtanais airgeadais na hÚcráine le haghaidh 2026 arna ríomh ag CAI, ba cheart an dáileadh sin a bheith táscach chun a chur san áireamh go bhfuil imthosca ag athrú a d’fhéadfadh tionchar a imirt ar riachtanais mhaoiniúcháin na hÚcráine agus chun a áirithiú go leanfar d’aghaidh a thabhairt ar na riachtanais sin ar bhealach intuartha, leanúnach, ordúil, solúbtha agus tráthúil. Ina mheasúnú ar Straitéis na hÚcráine um Maoiniú, ba cheart don Choimisiún breithniú a dhéanamh ar chomhsheasmhacht na bearna maoiniúcháin sheachtraigh a bhfuil coinne léi leis an dáileadh táscach sin.

(21)

I bhfianaise a thábhachtaí atá éifeachtaí airgeadais na mbeart a fhorchuirtear, ba cheart cumhachtaí cur chun feidhme a thabhairt don Chomhairle agus ba cheart di gníomhú ar bhonn togra ón gCoimisiún. Ba cheart don Chomhairle an measúnú ar Straitéis na hÚcráine um Maoiniú a fhormheas trí bhíthin cinneadh cur chun feidhme, ar cheart di féachaint lena ghlacadh gan moill mhíchuí. Leis an gcinneadh cur chun feidhme sin, ba cheart an méid cúnaimh atá le cur ar fáil don Úcráin chun cuidiú ó thaobh chur chun feidhme Straitéis na hÚcráine um Maoiniú de a chinneadh, lena n-áirítear an méid le haghaidh cúnamh buiséadach agus an méid chun tacú le hacmhainneacht thionsclaíoch na hÚcráine i dtaca leis an gcosaint.

(22)

Ba cheart cúnamh airgeadais agus eacnamaíoch i bhfoirm cúnaimh bhuiséadaigh a chur ar fáil d’fhonn tacú leis an Úcráin a riachtanais mhaoiniúcháin a chumhdach. Ba cheart an chúnamh airgeadais agus eacnamaíoch faoin Rialachán seo a bheith ina ionchur tábhachtach i dtéarnamh eacnamaíoch iarchogaidh na hÚcráine, ina fás fadtéarmach agus ina rathúnas a mbeidh ról tábhachtach acu uile i gcomhaontú síochána a dhéanfar amach anseo. Chun solúbthacht a áirithiú agus aghaidh á tabhairt ar na riachtanais sin, is iomchuí modhanna iomadúla seachadta a úsáid, agus ba cheart an deis a bheith ann tacaíocht a sholáthar trí chúnamh macrairgeadais agus trí iasacht atá le cur chun feidhme de bhun Chaibidil III de Rialachán (AE) 2024/792.

(23)

Is ionstraim mheántéarmach í an tSaoráid don Úcráin a bhfuil sé ina chuspóir aici tacú le téarnamh agus atógáil na hÚcráine, lena comhtháthú de réir a chéile sa mhargadh inmheánach, chomh maith le, inter alia, glacadh agus cur chun feidhme na n-athchóirithe polaitiúla, institiúideacha, dlí, riaracháin, sóisialta agus eacnamaíocha is gá chun í a ailíniú le luachanna an Aontais agus chun í a ailíniú de réir a chéile le rialacha, caighdeáin, beartais agus cleachtais an Aontais (‘acquis’) d’fhonn ballraíocht a bheith aici amach anseo san Aontas, agus ar an gcaoi sin rannchuidiú leis an gcobhsaíocht fhrithpháirteach, leis an tslándáil fhrithpháirteach, leis an tsíocháin fhrithpháirteach, leis an rathúnas frithpháirteach agus leis an inbhuanaitheacht fhrithpháirteach. Is iomchuí, dá bhrí sin, foráil a dhéanamh maidir le méideanna a eascraíonn as an Iasacht Tacaíochta don Úcráin a úsáid tríd an tSaoráid don Úcráin. Déantar foráil i gCaibidil III de Rialachán (AE) 2024/792 maidir le maoiniú don Úcráin a sholáthrófar ar fáil nuair a chomhlíonfar go sásúil na coinníollacha a leagtar síos sa Phlean don Úcráin, ina leagtar amach clár oibre athchóirithe agus infheistíochta na hÚcráine. Ba cheart an Plean don Úcráin a thabhairt cothrom le dáta chun an cúnamh buiséadach breise sin a léiriú, lena n-áirítear bearta chun an smacht reachta agus comhrac an éillithe a neartú.

(24)

Ba cheart cúnamh macrairgeadais a nascadh le coinníollacha beartais atá le leagan amach i meabhrán tuisceana (‘an Meabhrán Tuisceana’). Ba cheart gealltanais athchóiriúcháin láidre uaillmhianacha ón Úcráin a áireamh sa Mheabhrán Tuisceana, lena n-áirítear na gealltanais go neartófaí slógadh ioncaim chun tacú le riachtanais mhaoiniúcháin na hÚcráine agus dul i ngleic le bunchúiseanna an éillithe san cistí poiblí, lena n-áirítear trí inbhuanaitheacht agus cáilíocht an chaiteachais phoiblí a fheabhsú agus trí chur le héifeachtúlacht, trédhearcacht agus cuntasacht na gcóras um bainistiú airgeadais phoiblí. Ba cheart an Úcráin a bheith in ann an cúnamh macrairgeadais sin a úsáid chun cuidiú ó thaobh cúiteamh a mhaoiniú, mar chineál leorghnímh, do na daoine aonair sin a ndearnadh damáiste dóibh de dheasca ghníomhaíochtaí neamhdhleathacha na Rúise, lena n-áirítear tríd an gCoimisiún Éileamh don Úcráin a bunaíodh faoi choimirce Chomhairle na hEorpa. Ba cheart líon uasta agus luach táscach na dtráthchodanna le haghaidh an chúnaimh macrairgeadais a shocrú leis an gcinneadh cur chun feidhme ón gComhairle lena bhformheastar an measúnú ar Straitéis na hÚcráine um Maoiniú. I bhfianaise phrionsabal na bainistíochta fónta airgeadais agus chun bainistiú leachtachta údaráis na hÚcráine a éascú agus intuarthacht a áirithiú, ba cheart, i bprionsabal, ceithre thráthchuid den chúnamh macrairgeadais sin a thabhairt ar a mhéad.

(25)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus ar chúiseanna a bhaineann leis an éifeachtúlacht, ba cheart an chumhacht a thabhairt don Choimisiún coinníollacha le haghaidh an chúnaimh macrairgeadais a chaibidil le húdaráis na hÚcráine faoi mhaoirseacht choiste ionadaithe na mBallstát Rannpháirteach (‘an coiste’) i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (12). I bhfianaise an tionchair shuntasaigh a d’fhéadfadh a bheith ag an gcúnamh, is iomchuí an nós imeachta scrúdúcháin mar a shonraítear i Rialachán (AE) Uimh. 182/2011 a úsáid. Agus méid na hIasachta Tacaíochta don Úcráin á chur san áireamh, ba cheart feidhm a bheith ag an nós imeachta scrúdúcháin maidir le glacadh an Mheabhráin Tuisceana agus maidir le haon chás ina ndéanfaí an Iasacht Tacaíochta a laghdú nó a chur ar ceal.

(26)

Leis an Iasacht Tacaíochta don Úcráin, ba cheart cúnamh airgeadais agus eacnamaíoch a sholáthar don Úcráin mar thír atá i mbun cogaidh, a bhfuil dlúthnasc idir a cobhsaíocht airgeadais agus a cumas í féin a chosaint ar fhogha na Rúise agus a mbraitheann a cobhsaíocht airgeadais ar an gcumas sin. Tugann an méid sin údar le méid sonrach den chúnamh airgeadais agus eacnamaíoch don Úcráin a úsáid chun cur le cumas na hÚcráine déileáil le riachtanais bhuiséadacha i ndáil le hacmhainneacht na tíre a cumais chosanta agus mhíleata a neartú, agus ar an gcaoi sin rannchuidiú le buntáiste míleata cáilíochtúil a thabhairt don Úcráin. Ba cheart é a bheith d’aidhm ag an gcúnamh airgeadais agus eacnamaíoch sin a chur ar a cumas don Úcráin mór-infheistíochtaí poiblí práinneacha a dhéanamh chun tacú le tionscal cosanta na hÚcráine agus a comhtháthú i dtionscal cosanta na hEorpa mar fhreagairt ar an ngéarchéim atá ann faoi láthair agus ina diaidh a éascú. Ba cheart don chúnamh airgeadais agus eacnamaíoch sin rannchuidiú, go háirithe, le hatógáil, téarnamh agus nuachóiriú Bhonn Tionsclaíoch agus Teicneolaíoch Chosaint na hÚcráine, d’fhonn a hullmhacht thionsclaíoch i réimse na cosanta a mhéadú, agus a lánpháirtiú de réir a chéile amach anseo i mBonn Tionsclaíoch agus Teicneolaíoch na Cosanta Eorpaí á chur san áireamh agus trí thacaíocht a thabhairt d’infhaighteacht thráthúil táirgí cosanta agus táirgí eile chun críoch cosanta, trí chomhar idir an tAontas agus an Úcráin.

(27)

Ba cheart cúnamh airgeadais agus eacnamaíoch chun tacú le hacmhainneacht thionsclaíoch na hÚcráine i dtaca leis an gcosaint a chur ar fáil le haghaidh gníomhaíochtaí, caiteachas agus bearta a bhaineann le táirgí cosanta nó táirgí eile chun críoch cosanta a chomhlíonann critéir incháilitheachta áirithe. Chun Bonn Tionsclaíoch agus Teicneolaíoch Cosanta na hÚcráine a threisiú go práinneach ar bhealach éifeachtúil uathrialach, ba cheart na critéir incháilitheachta sin a struchtúrú ar bhealach lena ndíreofar na gníomhaíochtaí, an caiteachas agus na bearta chun tacú le hacmhainneacht thionsclaíoch na hÚcráine i dtaca leis an gcosaint i dtreo Bonn Tionsclaíoch agus Teicneolaíoch Chosaint na hÚcráine a atógáil, a théarnamh agus a nuachóiriú, agus a lánpháirtiú de réir a chéile i mBonn Tionsclaíoch agus Teicneolaíoch na Cosanta Eorpaí á chur san áireamh. Sa chomhthéacs sin, agus scrúdú á dhéanamh ar cé acu atá nó nach bhfuil monaróirí faoi rialú tríú tíortha nó eintiteas tríú tír, ba cheart rialú a thuiscint mar an cumas tionchar cinntitheach a imirt ar eintiteas dlítheanach, go díreach nó go hindíreach, trí eintiteas dlítheanach idirmheánach amháin nó níos mó.

(28)

Chun go mbeidh an Úcráin in ann an cúnamh airgeadais agus eacnamaíoch a úsáid ar an mbealach is oiriúnaí do na himthosca, is iomchuí cead a thabhairt di na cistí a úsáid chun tacú le hacmhainneacht thionsclaíoch na hÚcráine i dtaca leis an gcosaint trí mhodhanna cur chun feidhme éagsúla a léiríonn éagsúlacht na riachtanas. Leis na cistí, féadfar rannchuidiú freisin leis an Ionstraim um Thacaíocht don Úcráin a bunaíodh le Rialachán (AE) 2025/2643 ó Pharlaimint na hEorpa agus ón gComhairle (13), leis an gCreat Infheistíochta don Úcráin a bunaíodh le Rialachán (AE) 2024/792 le haghaidh earraí dé-úsáide nó le cláir eile de chuid an Aontais. Thairis sin, ba cheart é a chur ar chumas na hÚcráine leis na cistí idirghabháil ollmhór a dhéanamh maidir leis an éileamh ar tháirgí cosanta chun na dálaí oiriúnacha a chruthú d’fhonn infheistíochtaí ollmhóra a dhreasú chun borradh a chur faoin acmhainneacht táirgeachta agus chun táirgí nua a fhorbairt. Chun na críche sin, ba cheart cead a bheith ag an Úcráin na cistí a úsáid chun soláthairtí ollmhóra táirgí cosanta a sheoladh, ar táirgí iad a dhéantar as Bonn Teicneolaíoch agus Tionsclaíoch Chosaint na hÚcráine agus as Bonn Tionsclaíoch agus Teicneolaíoch na Cosanta Eorpaí trí sholáthairtí faoin Ionstraim um Ghníomhaíocht Slándála don Eoraip (‘ionstraim SAFE’) a bunaíodh le Rialachán (AE) 2025/1106 ón gComhairle (14) nó, faoi réir bailíochtuithe, faoi mhodhanna cur chun feidhme eile.

(29)

I gcás táirgí áirithe a bhaineann le cosaint nach bhfuil a mbunteicneolaíochtaí ar fáil go forleathan san Aontas, agus a bhféadfadh sé a bheith deacair táirgí eile a chur ina n-ionad ar mórscála, amhail córais aerchosanta agus frithdhiúracán agus cumasóirí straitéiseacha, ba cheart coinníollacha breise a bheith ina gceanglais chun a áirithiú go mbeidh fórsa armtha na hÚcráine saor chun na táirgí sin a úsáid gan srianta arna bhforchur ag tríú tíortha. Dá bhrí sin, i gcás na dtáirgí cosanta sin, ba cheart é a bheith de chumas ag an monaróir cinneadh a dhéanamh, gan aon srian arna fhorchur ag tríú tíortha ná ag eintitis tríú tír, maidir le sainmhíniú, oiriúnú nó éabhlóid dhearadh na dtáirgí cosanta arna soláthar, lena n-áirítear an t-údarás dlíthiúil comhpháirteanna atá faoi réir srianta arna bhforchur ag tríú tíortha nó ag eintitis tríú tír a ionadú nó a bhaint.

(30)

Chun cur chun feidhme rianúil an Rialacháin seo i gcomhar le hionstraim SAFE a áirithiú, is iomchuí coinníollacha incháilitheachta comhchosúla a chur i bhfeidhm. Tacaíonn ionstraim SAFE le soláthar táirgí cosanta mar a shainaithnítear i Rialachán (AE) 2025/1106. Chomhaontaigh an Chomhairle liosta na dtáirgí atá mar chuid de Chatagóirí 1 agus 2, agus tá sé léirithe go bhfuil an liosta sin cuimsitheach go leor chun tacaíocht a cheadú le haghaidh soláthar táirgí a theastaíonn ó na Ballstáit, lena n-áirítear aerardáin. I bhfianaise go bhfuil an staid ar an láthair chatha ag síorathrú, tá sé ríthábhachtach nach gcuirfear srian ar an Úcráin an cúnamh atá de dhíth uirthi a fháil toisc gur ann do liosta táirgí ar féidir tacú leo. Agus é á chur san áireamh gur tír atá i mbun cogaidh í an Úcráin a bhféadfadh a cumas a críoch a chosaint a bheith ag brath ar tháirge ar leith a bheith ar fáil sa ghearrthéarma, ba cheart cead a bheith ag an Úcráin táirgí a fháil nach gcomhlíonann na coinníollacha incháilitheachta sin i gcás nach bhfuil aon táirge coibhéiseach ar fáil trí sholáthar nó i gcás ina bhfuil géarghá le táirge a sheachadadh. D’fhéadfaí a áireamh leis sin córais aerchosanta agus frithdhiúracán, lena n-áirítear idircheapóirí, agus armlón aerárthaí troda, páirteanna spártha agus cumais domhain-ionsaithe, ach gan a bheith teoranta dóibh sin amháin. Maidir le haon mhaolú, ba cheart an t-am chun an táirge a sheachadadh a bheith i gcomhréir le práinn an cháis agus le riachtanais oibríochtúla láithreacha na hÚcráine. Chuige sin, ba cheart don Úcráin an fhaisnéis atá ar fáil go réasúnta di a sholáthar don Choimisiún chun a léiriú go bhfuil gá le maolú, toisc, a fhad agus atá an cogadh ar siúl, agus riachtanais na hÚcráine chomh práinneach sin, nár cheart a cheangal ar an Úcráin taighde forleathan margaidh a dhéanamh. Chun coinníollacha aonfhoirmeacha a áirithiú maidir leis an Rialachán seo a chur chun feidhme, agus ar chúiseanna éifeachtúlachta, ba cheart an chumhacht a thabhairt don Choimisiún na hiarrataí sin ar mhaoluithe a scrúdú faoi mhaoirseacht an choiste i gcomhréir le Rialachán (AE) Uimh. 182/2011. I bhfianaise an tionchair shuntasaigh a d’fhéadfadh a bheith ag an gcúnamh, is iomchuí an nós imeachta scrúdúcháin mar a shonraítear i Rialachán (AE) Uimh. 182/2011 a úsáid. De dheasca na staide eisceachtúla arb é cogadh foghach na Rúise ar an Úcráin is cúis léi agus an ghá atá le táirgí cosanta a bheith ar fáil go tráthúil, is iomchuí an cás cuí-réasúnaithe dá dtagraítear in Airteagal 3(3) de Rialachán (AE) Uimh. 182/2011 a agairt chun tuairim ón gcoiste a cheadú laistigh de theorainn ama a fhéadfaidh cathaoirleach an choiste a leagan síos de réir phráinn an ábhair. I gcás inar gá, ba cheart an nós imeachta i scríbhinn dá dtagraítear in Airteagal 3(5) den Rialachán sin a úsáid.

(31)

Chun go mbeidh tríú tíortha in ann rannchuidiú leis an gcúnamh don Úcráin agus leasanna slándála agus cosanta an Aontais agus na mBallstát á gcoimirciú an tráth céanna agus na comhaontuithe atá ann cheana faoi ionstraim SAFE á gcur san áireamh, is iomchuí foráil a dhéanamh maidir leis an bhféidearthacht na critéir incháilitheachta a leathnú chuig tríú tíortha seachas an Úcráin agus Stáit CSTE LEE nach sáraíonn leasanna slándála agus cosanta an Aontais agus a Bhallstát, ar choinníoll go bhfuil comhaontú tugtha i gcrích ag na tríú tíortha sin leis an Aontas i gcomhréir le hAirteagal 17 de Rialachán (AE) 2025/1106 nó, i gcás nach bhfuil an comhaontú sin tugtha i gcrích acu, ar choinníoll go bhfuil na tíortha sin tar éis dul i mbun Comhpháirtíocht Slándála agus Cosanta leis an Aontas, go bhfuil tacaíocht shuntasach airgeadais agus mhíleata á soláthar acu don Úcráin, agus go bhfuil ranníocaíocht airgeadais chothrom agus chomhréireach á soláthar acu, agus urraim á tabhairt don phrionsabal nach mór aon chomhaontú le tríú tír a bheith bunaithe ar chothromaíocht idir cearta agus oibleagáidí agus nár cheart na cearta céanna ná na tairbhí céanna a bheith ag tríú tír agus atá ag Ballstát Rannpháirteach. Ba cheart féidearthacht den sórt sin, dá bhrí sin, a bheith teoranta do tháirgí cosanta sonracha, agus riachtanais oibríochtúla láithreacha na hÚcráine á gcur san áireamh, ag díriú, go háirithe, ar chórais cosanta aeir agus diúracán, armlón agus diúracáin, ladrainn agus córais frithdhrón ghaolmhara, córais airtléire, lena n-áirítear cumais domhain-ionsaithe, cumasóirí straitéiseacha, amhail aeraistriú straitéiseach, athbhreoslú aer go haer, córais C4ISTAR chomh maith le sócmhainní agus seirbhísí spáis, ach gan a bheith teoranta dóibh sin amháin.

(32)

A mhéid a bhaineann le tríú tíortha a bhfuil comhaontú tugtha i gcrích acu leis an Aontas i gcomhréir le hAirteagal 17 de Rialachán (AE) 2025/1106, ba cheart an chumhacht a thabhairt don Choimisiún gníomhartha tarmligthe a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh chun an Rialachán seo a fhorlíonadh. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (15). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(33)

I bhfianaise a thábhachtaí atá éifeachtaí airgeadais na mbeart a fhorchuirtear agus chun comhsheasmhacht a áirithiú idir réimsí éagsúla ghníomhaíocht sheachtrach an Aontais, ba cheart cumhachtaí cur chun feidhme a thabhairt don Chomhairle agus ba cheart di gníomhú ar bhonn togra ón gCoimisiún maidir leis an bhféidearthacht na rialacha incháilitheachta a leathnú chuig tríú tíortha nach bhfuil comhaontú tugtha i gcrích acu leis an Aontas i gcomhréir le hAirteagal 17 de Rialachán (AE) 2025/1106. Ba cheart don Chomhairle gníomhú trí bhíthin cinneadh cur chun feidhme, ar cheart di féachaint lena ghlacadh gan moill mhíchuí. Leis an gcinneadh cur chun feidhme sin, ba cheart a chinneadh, i ndáil le gach tríú tír, cé na táirgí cosanta atá le cur ar fáil don Úcráin, agus méid na ranníocaíochta airgeadais arna déanamh ag an tríú tír atá i gceist agus méid na tacaíochta airgeadais agus míleata don Úcráin á gcur san áireamh.

(34)

Ní dochar an Rialachán seo don dlí idirnáisiúnta is infheidhme lena dtoirmisctear táirgí agus teicneolaíochtaí cosanta áirithe a úsáid, a fhorbairt nó a tháirgeadh.

(35)

Ba cheart cur chun feidhme an chúnaimh chun tacú le hacmhainneacht thionsclaíoch na hÚcráine i dtaca leis an gcosaint a dhéanamh i gcomhréir le prionsabail na bainistíochta fónta airgeadais lena n-áirithítear go gcosnófar leasanna airgeadais an Aontais mar a leagtar amach in Airteagal 223(4) de Rialachán (AE, Euratom) 2024/2509 ó Pharlaimint na hEorpa agus ón gComhairle (16). D’fhéadfaí ceanglais mhionsonraithe ina leith sin a dhéanamh i gcomhshocrú atá le síniú idir an Coimisiún agus an Úcráin. Thairis sin, chun an cúnamh airgeadais agus eacnamaíoch a fhaightear chun tacú le hacmhainneacht thionsclaíoch na hÚcráine i dtaca leis an gcosaint a bhainistiú, ba cheart don Úcráin cuntas aonair a oscailt trínar féidir an cúnamh sin a bhainistiú, agus ba cheart don Choimisiún a bheith in ann faireachán a dhéanamh ar an gcuntas sin.

(36)

Chun tacú le cur chun feidhme an chúnaimh chun tacú le hacmhainneacht thionsclaíoch na hÚcráine i dtaca leis an gcosaint, ba cheart don Choimisiún Grúpa Saineolaithe um Acmhainneacht Thionsclaíoch Cosanta na hÚcráine a bhunú. Ba cheart don Ghrúpa Saineolaithe sin comhairle a chur ar an gCoimisiún maidir le hábhair a bhaineann leis an gcúnamh chun tacú le hacmhainneacht thionsclaíoch na hÚcráine i dtaca leis an gcosaint.

(37)

Ba cheart don Choimisiún faireachán a dhéanamh ar chur chun feidhme an chúnaimh chun tacú le hacmhainneacht thionsclaíoch na hÚcráine i dtaca leis an gcosaint, lena n-áirítear, go háirithe, seachadadh táirgí. Chuige sin, ba cheart socruithe éagsúla faireacháin a bhunú chun na modhanna éagsúla cur chun feidhme a léiriú.

(38)

Baineann Treoir 2009/81/CE ó Pharlaimint na hEorpa agus ón gComhairle (17), i measc nithe eile, le creat reachtach iomchuí a bhunú maidir le comhordú nósanna imeachta soláthair chun conarthaí a dhámhachtain ar mhaithe le ceanglais slándála na mBallstát agus na hoibleagáidí a eascraíonn as CFAE a chomhlíonadh. Chun an aidhm sin a bhaint amach, freastalaíonn Treoir 2009/81/CE, go háirithe, ar aghaidh a thabhairt ar ghéarchéimeanna, go mór mór trí fhorálacha sonracha a sholáthar a bhfuil feidhm leo i gcásanna práinne de dheasca géarchéime, cuir i gcás na tréimhsí chun tairiscintí a fháil a ghiorrú agus an fhéidearthacht úsáid a bhaint as an nós imeachta idirbheartaithe gan iarratas ar thairiscintí a fhoilsiú roimh ré. Mar sin féin, i gcásanna áirithe práinne, d’fhéadfadh sé nach leor na rialacha sin, go háirithe i gcás nach féidir aghaidh a thabhairt ar an bpráinn a eascraíonn as an ngéarchéim ach amháin tríd an Úcráin agus Ballstát Rannpháirteach amháin ar a laghad a bheith rannpháirteach i soláthar comhoibríoch. I gcásanna áirithe, is minic gurb é an t-aon réiteach atá ann chun leasanna slándála na dtíortha sin a áirithiú creat-chomhaontú nó creatchonradh de chuid Ballstáit Rannpháirtigh atá ann cheana a oscailt d’údaráis chonarthacha na hÚcráine, fiú i gcás nach raibh an Úcráin ina páirtí ann ar dtús agus cé nár foráladh don fhéidearthacht sin sa chreat-chomhaontú bunaidh nó sa chreatchonradh bunaidh. Ós rud é nach bhforáiltear do na féidearthachtaí sin i dTreoir 2009/81/CE tráth theacht i bhfeidhm an Rialacháin seo, déantar foráil leis an Rialachán seo don fhéidearthacht an Treoir sin a chomhlánú nó maolú uirthi sa ghéarchéim atá ann faoi láthair a eascraíonn as cogadh foghach na Rúise ar an Úcráin, ar choinníoll go bhfaighfear comhaontú an ghnóthais a thug an creat-chomhaontú nó an creatchonradh i gcrích. A mhéid a bhaineann le cainníochtaí breise don Úcráin, ba cheart na coinníollacha céanna a bheith ag na húdaráis chonarthacha sin agus atá ag an údarás conarthach bunaidh nó ag an eintiteas conarthach bunaidh a thug an creat-chomhaontú bunaidh nó an creatchonradh bunaidh i gcrích. Ina theannta sin, ba cheart bearta iomchuí trédhearcachta a dhéanamh chun a áirithiú go gcuirfear na páirtithe leasmhara uile ar an eolas.

(39)

Le hionstraim SAFE, soláthraítear cúnamh airgeadais do na Ballstáit, rud a chuireann ar a gcumas dóibh mórinfheistíochtaí poiblí práinneacha a dhéanamh chun tacú le tionscal cosanta na hEorpa mar fhreagairt ar an ngéarchéim a d’eascair as an meath mór ar chomhthéacs slándála an Aontais. Leis an ionstraim sin, thosaigh an tAontas ag tacú leis na Ballstáit ionas gur féidir leo orduithe a dhéanamh go tapa, rud a dhreasaigh earnáil thionsclaíoch na cosanta chun infheistíocht a dhéanamh, sa ghearrthéarma, i neartú na n-acmhainneachtaí táirgeachta chun go mbeidh sí in ann freastal ar riachtanais na mBallstát faoi 2030. Ina theannta sin, leis an Rialachán seo ba cheart tacú le horduithe ón Úcráin a chur le Bonn Tionsclaíoch agus Teicneolaíoch na Cosanta Eorpaí chun tacú leis an gcomhar idir Bonn Teicneolaíoch agus Teicneolaíoch na Cosanta Eorpaí agus Bonn Tionsclaíoch agus Teicneolaíoch Chosaint na hÚcráine. Tá gar-riosca ann go mbeidh tionchar diúltach tromchúiseach ar fheidhmiú cuí an mhargaidh inmheánaigh mar gheall ar éileamh thar a bheith ard ar raon leathan táirgí cosanta. Chun aghaidh a thabhairt ar an riosca sin agus i bhfianaise chuspóir an Rialacháin seo, agus staid shonrach na hÚcráine á cur san áireamh, d’fhéadfadh sé go mbeadh bearta tosaíochta ar leibhéal an Aontais, arb é is aidhm dóibh infhaighteacht na dtáirgí cosanta lena mbaineann a áirithiú, fíor-riachtanach chun dea-fheidhmiú an mhargaidh inmheánaigh le haghaidh táirgí cosanta agus na slabhraí soláthair a bhaineann leis a áirithiú. I ndáil leis sin, ba cheart an Coimisiún a bheith in ann, arna iarraidh sin do Bhallstát Rannpháirteach, úsáid a bhaint as iarrataí a bhfuil rátáil tosaíochta ag baint leo ar mhaithe le soláthar táirgí cosanta a éascú chun cuspóir an Rialacháin seo a chomhlíonadh.

(40)

Is é ba cheart a bheith in iarrataí a bhfuil rátáil tosaíochta ag baint leo iarrataí ón gCoimisiún, ar thionscnamh Ballstáit Rannpháirtigh, ar oibreoirí eacnamaíocha ábhartha atá bunaithe san Aontas glacadh le horduithe táirgí atá ábhartha i gcás géarchéime nó tosaíocht a thabhairt dóibh. Níor cheart na hiarrataí sin a bhfuil rátáil tosaíochta ag baint leo a úsáid ach amháin nuair is gá agus nuair is comhréireach chun a áirithiú gur féidir le slabhraí soláthair cosanta oibriú mar is gnách, agus ba cheart iad a bheith dírithe ar thacaíocht a thabhairt don Úcráin agus deacrachtaí tromchúiseacha os a comhair maidir le hordú a dhéanamh nó conradh a fhorghníomhú chun táirgí cosanta a sholáthar. Ba cheart an deis a bheith ag oibreoirí eacnamaíocha diúltú a bheith faoi réir iarraidh a bhfuil rátáil tosaíochtaí ag baint léi. Ba cheart iarraidh a bhfuil rátáil tosaíochta ag baint léi a dhéanamh ar bhonn sonraí oibiachtúla, fíorasacha, intomhaiste a bhfuil bunús cuí leo. Leis an iarraidh sin, ba cheart aird a thabhairt ar leasanna dlisteanacha na ngnóthas, chomh maith leis an gcostas agus leis an iarracht is gá maidir le haon athrú ar sheicheamh an táirgthe. Nuair a ghlactar léi, ba cheart tosaíocht a bheith ag an oibleagáid an iarraidh a bhfuil rátáil tosaíochta ag baint léi a chomhlíonadh ar aon oibleagáid chun comhlíonadh faoin dlí príobháideach nó poiblí. I bhfianaise a thábhachtaí atá sé soláthar táirgí cosanta a áirithiú, ar earraí iad atá fíor-riachtanach le haghaidh dhea-fheidhmiú an mhargaidh inmheánaigh agus a shlabhraí soláthair, níor cheart comhlíonadh na hoibleagáide maidir le hiarraidh a bhfuil rátáil tosaíochta ag baint léi a dhéanamh a bheith faoi dhliteanas do thríú páirtithe i leith damáistí a d’fhéadfadh eascairt as aon sárú ar oibleagáidí conarthacha arna rialú ag dlí Ballstáit, a mhéid a bhí gá le sárú na n-oibleagáidí conarthacha chun an tosaíocht shainordaithe a chomhlíonadh. I gcás inar ghlac an t-oibreoir eacnamaíoch go sainráite le hiarraidh a bhfuil rátáil tosaíochta ag baint léi agus ina bhfuil gníomh cur chun feidhme glactha ag an gCoimisiún tar éis an ghlactha sin, ba cheart don oibreoir eacnamaíoch coinníollacha uile an ghnímh cur chun feidhme sin a chomhlíonadh. Mura gcomhlíonann an t-oibreoir eacnamaíoch na coinníollacha a leagtar síos sa ghníomh cur chun feidhme, ba cheart an tairbhe a bhaineann le tarscaoileadh dliteanais chonarthaigh a chailleadh mar gheall air sin. I gcás inar d’aon ghnó a dhéantar an neamhchomhlíonadh nó inar mórfhaillí is cúis leis, ba cheart an Coimisiún a bheith in ann fíneáil a fhorchur ar an oibreoir eacnamaíoch lena mbaineann, faoi réir phrionsabal na comhréireachta.

(41)

Ós rud é gur cheart méideanna sonracha a chur ar fáil le haghaidh cúnamh buiséadach agus cúnamh chun tacú le hacmhainneacht thionsclaíoch na hÚcráine i dtaca leis an gcosaint, ba cheart comhleanúnachas agus comhlántacht a áirithiú ina gcur chun feidhme faoi seach.

(42)

Ba cheart feidhm a bheith ag an Rialachán seo gan dochar do cháilíocht shonrach beartais slándála agus cosanta Ballstát áirithe.

(43)

Níl feidhm ag an Rialachán seo maidir le Ballstáit nach bhfuil rannpháirteach sa chomhar feabhsaithe. Sa chomhthéacs sin, ba cheart a mheabhrú nach ndéanann neamh-rannpháirtíocht Ballstát áirithe sa chomhar feabhsaithe iad a dhíolmhú ón oibleagáid forfheidhmiú iomlán Airteagal 325 CFAE agus acquis an Aontais a áirithiú a bhfuil sé d’aidhm aige cosaint leasanna airgeadais an Aontais a áirithiú, lena n-áirítear Rialachán (CE, Euratom) Uimh. 2988/95 ón gComhairle (18), Rialachán (AE, Euratom) Uimh. 883/2013 ó Pharlaimint na hEorpa agus ón gComhairle (19), Treoir (AE) 2017/1371 ó Pharlaimint na hEorpa agus ón gComhairle (20), Rialachán (AE, Euratom) 2024/2509 agus, i gcás inarb infheidhme, Rialachán (AE) 2017/1939 ón gComhairle (21). Dá bhrí sin, ba cheart do na Ballstáit sin agus do na heintitis eacnamaíocha faoina ndlínse comhoibriú go hiomlán leis an gCúirt Iniúchóirí, leis an Oifig Eorpach Frith-Chalaoise (OLAF), leis an gCoimisiún agus, i gcás inarb infheidhme, le hOifig an Ionchúisitheora Phoiblí Eorpaigh (OIPE), agus a n-inniúlachtaí á bhfeidhmiú acu.

(44)

Maidir leis an gComhaontú maidir le hIasacht Tacaíochta don Úcráin atá le tabhairt i gcrích idir an Coimisiún agus údaráis na hÚcráine, ba cheart forálacha a bheith ann atá ailínithe leis na cearta, na freagrachtaí agus na hoibleagáidí dá bhforáiltear sa Chreat-Chomhaontú faoin tSaoráid don Úcráin dá dtagraítear in Airteagal 9 de Rialachán (AE) 2024/792 a síníodh idir an tAontas agus an Úcráin agus a tháinig i bhfeidhm an 20 Meitheamh 2024. Leis na forálacha sin, áiritheofar go gcosnófar ar bhealach éifeachtúil na leasanna airgeadais sin de chuid an Aontais atá nasctha leis an Iasacht Tacaíochta don Úcráin, agus go ndéanfar na bearta iomchuí maidir le calaois, éilliú agus aon neamhrialtachtaí eile a bhaineann leis an gcúnamh a chosc agus a chomhrac. Ina theannta sin, i gcomhréir le Rialachán (AE, Euratom) 2024/2509, tabharfaidh an Comhaontú maidir le hIasacht Tacaíochta don Úcráin na cearta agus an rochtain is gá don Choimisiún, do OLAF, don Chúirt Iniúchóirí agus, i gcás inarb infheidhme, do OIPE, lena n-áirítear ó thríú páirtithe a bhfuil baint acu le cur chun feidhme chistí an Aontais le linn agus i ndiaidh thréimhse infhaighteachta na hIasachta Tacaíochta don Úcráin. Ba cheart don Úcráin neamhrialtachtaí maidir le húsáid na gcistí a thuairisciú don Choimisiún freisin, i gcomhréir leis na nósanna imeachta dá bhforáiltear sa Chreat-Chomhaontú faoin tSaoráid don Úcráin.

(45)

I bhfianaise staid dheacair na hÚcráine mar thoradh ar chogadh foghach na Rúise uirthi agus chun tacú leis an Úcráin ar a conair fhadtéarmach cobhsaíochta, is iomchuí don Aontas an Iasacht Tacaíochta a sholáthar don Úcráin mar iasacht cúláraigh theoranta a bheidh dlite agus iníoctha nuair a gheobhaidh an Úcráin airgead nó sócmhainní neamhairgeadaíochta mar chúiteamh cogaidh, slánaíochtaí nó aon socrú airgeadais ón Rúis, seachas críoch.

(46)

Ba cheart scaoileadh na gcistí faoin Iasacht Tacaíochta don Úcráin a bheith ag brath ar mheasúnú dearfach ón gCoimisiún ar iarraidh ar chistí arna cur isteach ag an Úcráin. I gcás an chúnaimh macrairgeadais, ba cheart nár dhochar an measúnú ar na coinníollacha don mheasúnú ar chomhlíonadh na gcoinníollacha faoi chláir agus ionstraimí eile de chuid an Aontais. Maidir leis an gcúnamh chun tacú le hacmhainneacht thionsclaíoch na hÚcráine i dtaca leis an gcosaint, ba cheart scaoileadh na gcistí a nascadh le conarthaí nó comhaontuithe maidir le gníomhaíochtaí, caiteachas agus bearta chun tacú le hacmhainneacht thionsclaíoch na hÚcráine i dtaca leis an gcosaint a bhaineann le táirgí cosanta nó táirgí eile chun críoch cosanta.

(47)

Leis an Rialachán seo, ba cheart forálacha iomchuí a leagan síos maidir leis an Iasacht Tacaíochta don Úcráin a mhaoiniú.

(48)

I gcomhthéacs riachtanais mhaoiniúcháin na hÚcráine, is iomchuí an cúnamh airgeadais a eagrú faoin straitéis cistiúcháin éagsúlaithe dá bhforáiltear in Airteagal 224 de Rialachán (AE, Euratom) 2024/2509.

(49)

I gcomhréir leis an tacaíocht dhaingean ó 25 Cheann Stáit agus Rialtais ar imeall na Comhairle Eorpaí an 18 Nollaig 2025, ba cheart don Úcráin an Iasacht Tacaíochta don Úcráin a aisíoc a luaithe a gheofar cúiteamh ón Rúis, agus forchoimeádann an tAontas a cheart úsáid a bhaint as sócmhainní na Rúise atá blocáilte san Aontas chun an iasacht a aisíoc, i gcomhréir iomlán le dlí an Aontais agus leis an dlí idirnáisiúnta.

(50)

De mhaolú ar Airteagal 31(3) de Rialachán (AE) 2021/947 ó Pharlaimint na hEorpa agus ón gComhairle (22), níor cheart tacú leis an dliteanas airgeadais ó iasachtaí faoin Rialachán seo leis an Ráthaíocht do Ghníomhaíochtaí Seachtracha, a bunaíodh leis an Rialachán sin. Ba cheart tacaíocht i bhfoirm iasachtaí faoin Rialachán seo a bheith ina cúnamh airgeadais de réir bhrí Airteagal 223(1) de Rialachán (AE, Euratom) 2024/2509. Agus na rioscaí airgeadais agus na ráthaíochtaí atá ann á mbreithniú, níor cheart aon soláthar a dhéanamh don tacaíocht i bhfoirm iasachtaí faoin Rialachán seo, a bheadh le ráthú de bhreis ar na huasteorainneacha, agus, de mhaolú ar Airteagal 214(1) de Rialachán (AE, Euratom) 2024/2509, níor cheart aon ráta soláthair a shocrú.

(51)

I bhfianaise staid na hÚcráine, mar thoradh ar chogadh foghach na Rúise ar an Úcráin agus chun tacú léi ar a conair fhadtéarmach cobhsaíochta, is iomchuí maolú ar Airteagal 223(4), pointe (e), de Rialachán (AE, Euratom) 2024/2509 chun deis a thabhairt don Aontas fóirdheontas i leith costais iasachtaíochta a sholáthar chun na costais a bheadh le híoc ag an Úcráin murach sin a chumhdach. Cuimsíonn na costais sin costais seirbhísíthe fiachais (costas cistiúcháin agus costas bainistithe leachtachta) agus costais riaracháin ghaolmhara. Meastar gurb iomchuí an fóirdheontas i leith costais iasachtaíochta atá le deonú chun éifeachtacht na tacaíochta faoin Iasacht Tacaíochta don Úcráin a áirithiú de réir bhrí Airteagal 223(1) de Rialachán (AE, Euratom) 2024/2509, go háirithe chun nach gcuirfear brú breise ar airgeadas poiblí na hÚcráine.

(52)

I gcomhréir le hAirteagal 332 CFAE, ba cheart do na Ballstáit Rannpháirteacha caiteachas, seachas costais riaracháin a thabhóidh na hinstitiúidí, a thig ón gcomhar feabhsaithe a iompar. Chuige sin, ba cheart do na Ballstáit nach bhfuil rannpháirteach sa chomhar feabhsaithe a bheith i dteideal coigeartú i gcomhréir le hAirteagal 11 de Rialachán (AE, Euratom) Uimh. 609/2014 ón gComhairle (23) maidir le haon chaiteachas oibríochtúil arna íoc ag buiséad an Aontais, lena gcuimsítear go háirithe costais seirbhísithe fiachais, chomh maith le glaonna ar an ráthaíocht. Ba cheart na costais riaracháin a thabhóidh na hinstitiúidí agus an comhar feabhsaithe á chur chun feidhme a íoc as buiséad an Aontais gan aon choigeartú a dhéanamh i gcás na mBallstát nach bhfuil rannpháirteach sa chomhar feabhsaithe.

(53)

Ba cheart don Choimisiún tacaíocht ón Aontas don Úcráin faoin Rialachán seo a bhainistiú.

(54)

Ba cheart an cúnamh don Úcráin faoin Iasacht Tacaíochta don Úcráin a bheith sa bhreis ar an tacaíocht ón Aontas a sholáthraítear faoin tSaoráid don Úcráin agus comhlántach léi. Ba cheart don Choimisiún, i ngach cás inar féidir, féachaint leis an ualach riaracháin agus leis an ualach tuairiscithe ar an Úcráin a íoslaghdú.

(55)

Ba cheart don Choimisiún Cinneadh 2010/427/AE ón gComhairle (24) agus ról na Seirbhíse Eorpaí Gníomhaíochta Seachtraí a chur san áireamh, i gcás inarb iomchuí.

(56)

Ba cheart an coiste inniúil Pharlaimint na hEorpa a bheith in ann a iarraidh ar an gCoimisiún ábhair a bhaineann le cur chun feidhme an Rialacháin seo a phlé san idirphlé maidir leis an Iasacht Tacaíochta don Úcráin. Ba cheart don Choimisiún gnéithe a chur san áireamh a eascraíonn as na tuairimí a cuireadh in iúl tríd an idirphlé maidir leis an Iasacht Tacaíochta don Úcráin, lena n-áirítear na rúin ó Pharlaimint na hEorpa, má sholáthraítear iad.

(57)

Chun a áirithiú go mbeidh Parlaimint na hEorpa agus an Chomhairle in ann cur chun feidhme an Rialacháin seo a leanúint, ba cheart don Choimisiún iad a chur ar an eolas go tráthrialta faoi aon dul chun cinn a dhéantar maidir le cúnamh ón Aontas don Úcráin faoin Rialachán seo agus na doiciméid ábhartha a sholáthar dóibh.

(58)

Chun éifeachtacht leanúnach na socruithe a bhunaítear leis an Rialachán seo a áirithiú, ba cheart don Choimisiún athbhreithniú rialta a dhéanamh ar leordhóthanacht na socruithe sin agus tuairisciú do Pharlaimint na hEorpa agus don Chomhairle maidir leis sin, agus, ar an gcaoi sin, trédhearcacht agus cuntasacht a ráthú.

(59)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011.

(60)

Ós rud é nach féidir leis na Ballstáit cuspóir an Rialacháin seo, eadhon cúnamh airgeadais agus eacnamaíoch a sholáthar don Úcráin le haghaidh 2026 agus 2027 ar bhealach intuartha, leanúnach, ordúil agus tráthúil d’fhonn tacú leis an Úcráin a riachtanais mhaoiniúcháin a eascraíonn as cogadh foghach na Rúise ar an Úcráin a chumhdach, a ghnóthú go leordhóthanach agus, de bharr a fhairsinge agus a éifeachtaí, gur fearr is féidir í a ghnóthú ar leibhéal an Aontais, féadfaidh an tAontas bearta a ghlacadh, i gcás inarb iomchuí trí bhíthin comhar feabhsaithe, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(61)

I bhfianaise na práinne a bhaineann leis na himthosca eisceachtúla atá ann mar thoradh ar chogadh foghach na Rúise gan chúis gan údar ar an Úcráin, meastar gurb iomchuí an eisceacht ar an tréimhse 8 seachtaine dá bhforáiltear in Airteagal 4 de Phrótacal Uimh. 1 maidir le ról na bparlaimintí náisiúnta san Aontas Eorpach, atá i gceangal le CAE, le CFAE agus leis an gConradh ag bunú an Chomhphobail Eorpaigh do Fhuinneamh Adamhach, a agairt.

(62)

I bhfianaise na staide san Úcráin, ba cheart an Rialachán seo a theacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,