(1)

Cuireadh eatafeanprocs le hIarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineál táirge 8. Dá bhrí sin, de bhun Airteagal 86 de Rialachán (AE) Uimh. 528/2012, measadh an tsubstaint a bheith formheasta faoin Rialachán sin faoi réir na gceanglas a leagtar amach in Iarscríbhinn I a ghabhann le Treoir 98/8/CE.

(2)

An formheas maidir le heatafeanprocs a úsáid i dtáirgí bithicídeacha de chineál táirge 8, bhí sé le dul in éag an 31 Eanáir 2020. An 27 Iúil 2018 cuireadh iarratas isteach, i gcomhréir le hAirteagal 13(1) de Rialachán (AE) Uimh. 528/2012, ar an bhformheas a athnuachan.

(3)

Le Cinneadh Cur Chun Feidhme (AE) 2019/994 ón gCoimisiún (3), chuir an Coimisiún ar atráth go dtí an 31 Deireadh Fómhair 2022 dáta éaga an fhormheasa maidir le heatafeanprocs a úsáid i dtáirgí bithicídeacha de chineál táirge 8, chun go mbeadh go leor ama ann chun scrúdú a dhéanamh ar an iarratas ar an bhformheas a athnuachan. Le Cinneadh Cur Chun Feidhme (AE) 2022/1487 ón gCoimisiún (4), chuir an Coimisiún dáta éaga an fhormheasa sin ar atráth arís go dtí an 31 Deireadh Fómhair 2026, mar gheall ar mhoilleanna a bhain le staidéir ba ghá chun measúnú a dhéanamh ar na critéir chun airíonna suaiteora inchrínigh eatafeanprocs a chinneadh.

(4)

Le Rialachán Cur Chun Feidhme (AE) Uimh. 1036/2013 ón gCoimisiún (5) freisin, formheasadh eatafeanprocs mar shubstaint ghníomhach lena húsáid i dtáirgí bithicídeacha de chineál táirge 18 faoi réir na sonraíochtaí agus na gcoinníollacha a leagtar amach san Iarscríbhinn a ghabhann leis an Rialachán Cur Chun Feidhme sin.

(5)

An formheas maidir le heatafeanprocs a úsáid i dtáirgí bithicídeacha de chineál táirge 18, bhí sé le dul in éag an 30 Meitheamh 2025. An 25 Deireadh Fómhair 2023 cuireadh iarratas isteach, i gcomhréir le hAirteagal 13(1) de Rialachán (AE) Uimh. 528/2012, ar an bhformheas a athnuachan.

(6)

Le Cinneadh Cur Chun Feidhme (AE) 2025/434 ón gCoimisiún (6), chuir an Coimisiún ar atráth go dtí an 31 Nollaig 2027 dáta éaga an fhormheasa maidir le heatafeanprocs a úsáid i dtáirgí bithicídeacha de chineál táirge 18, chun go mbeadh go leor ama ann chun scrúdú a dhéanamh ar an iarratas ar an bhformheas maidir le heatafeanprocs a úsáid i dtáirgí bithicídeacha de chineál táirge 18 a athnuachan.

(7)

Mar sin féin, an t-iarratasóir a chuir isteach na hiarratais ar athnuachan an fhormheasa maidir le heatafeanprocs lena úsáid i dtáirgí bithicídeacha le haghaidh chineálacha táirgí 8 agus 18 araon, chuir sé an Coimisiún ar an eolas an 12 Meitheamh 2025 gur tharraing sé siar an dá iarratas.

(8)

Dá bhrí sin, ós rud é nach bhfuil sé suite go gcomhlíonann eatafeanprocs fós na coinníollacha a leagtar síos in Airteagal 4(1) de Rialachán (AE) Uimh. 528/2012, is de chun Chinneadh Cur Chun Feidhme (AE) 2026/378 ón gCoimisiún (7) ní dhearnadh athnuachan ar an bhformheas maidir le heatafeanprocs lena úsáid i dtáirgí bithicídeacha de chineálacha táirgí 8 agus 18. Dá bhrí sin, maidir le Cinntí Cur Chun Feidhme (AE) 2022/1487 agus (AE) 2025/434 lena gcuirtear ar atráth dátaí éaga an fhormheasa maidir le heatafeanprocs lena úsáid i dtáirgí bithicídeacha de chineálacha táirge 8 agus 18, is iomchuí na cinntí sin faoi seach a aisghairm,