(1)

Le Treoir 2006/74/CE ón gCoimisiún (2), cuimsíodh pirimeatanail mar shubstaint ghníomhach in Iarscríbhinn I a ghabhann le Treoir 91/414/CEE (3) ón gComhairle.

(2)

Maidir leis na substaintí gníomhacha a chuimsítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí pirimeatanail, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 30 Meitheamh 2026.

(4)

Cuireadh iarratas faoi bhráid Phoblacht na Seice, an Ballstát is rapóirtéir, agus faoi bhráid na hOstaire, an Ballstát is comh-rapóirtéir, chun formheas na substainte gníomhaí pirimeatanail a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) agus laistigh den tréimhse ama dá bhforáiltear san Airteagal sin.

(5)

Chuir na hiarratasóirí an sainchomhad athnuachana is gá faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 31 Lúnasa 2017. Sa dréacht-tuarascáil uaidh maidir le measúnú ar athnuachan, mhol an Ballstát is rapóirtéir go ndéanfaí an formheas maidir le pirimeatanail a athnuachan.

(7)

Chuir an tÚdarás an sainchomhad achomair forlíontach ar fáil don phobal. Scaip an tÚdarás an dréacht-tuarascáil maidir le measúnú ar athnuachan ar na hiarratasóirí agus ar na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 16 Nollaig 2019, d’iarr an tÚdarás faisnéis bhreise ar na hiarratasóirí maidir le hairíonna suaiteora inchrínigh pirimeatanaile de bhun Airteagal 13(3a), an chéad fhomhír, de Rialachán Cur Chun Feidhme (AE) Uimh. 844/2012. Chuir na hiarratasóirí faisnéis isteach chun go mbeadh an tÚdarás in ann an measúnú a chur i gcrích i dtaobh an gcomhlíontar na critéir eolaíocha chun airíonna suaiteora inchrínigh a chinneadh a leagtar amach i bpointí 3.6.5 agus 3.8.2 d’Iarscríbhinn II a ghabhann le Rialachán (CE) Uimh. 1107/2009, mar a tugadh isteach le Rialachán (AE) 2018/605 ón gCoimisiún (6).

(9)

I mí Mheán Fómhair 2022 rinne an Ballstát is rapóirtéir dréacht-tuarascáil cothrom le dáta maidir le measúnú ar athnuachan a chur ar fáil don Údarás, do na Ballstáit agus don Choimisiún. Sa tuarascáil sin, rinne an Ballstát is rapóirtéir breithniú ar an bhfaisnéis bhreise maidir leis na critéir chun airíonna suaiteora inchrínigh a shainaithint agus mhol sé formheas pirimeatanaile a athnuachan.

(10)

An 3 Meán Fómhair 2024, chuir an tÚdarás an chonclúid (7) uaidh in iúl don Choimisiún inar léiríodh, agus na critéir formheasa a leagtar síos in Iarscríbhinn II a ghabhann le Rialachán (CE) Uimh. 1107/2009 á gcur san áireamh, gur féidir coinne a bheith leis go gcomhlíonfaidh táirgí cosanta plandaí ina bhfuil pirimeatanail na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(11)

Chuir an Coimisiún tuarascáil athnuachana faoi bhráid an Bhuanchoiste um Plandaí, Ainmhithe, Bia agus Beatha an 1 Deireadh Fómhair 2025 mar aon le dréacht den Rialachán seo an 10 Nollaig 2025.

(12)

D’iarr an Coimisiún ar na hiarratasóirí a mbarúlacha a chur isteach maidir le conclúid an Údaráis agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, maidir leis an tuarascáil athnuachana. Chuir na hiarratasóirí a mbarúlacha isteach, barúlacha a scrúdaíodh go cúramach agus a cuireadh san áireamh.

(13)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad agus ina bhfuil an tsubstaint ghníomhach pirimeatanail, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(14)

Dá bhrí sin, is iomchuí formheas pirimeatanaile a athnuachan.

(15)

I gcomhréir le hAirteagal 14(1) de Rialachán (CE) Uimh. 1107/2009, i gcomhar le hAirteagal 6 de, agus i bhfianaise an eolais eolaíoch theicniúil reatha agus i bhfianaise thoradh an mheasúnaithe riosca, is gá, áfach, foráil a dhéanamh maidir le coinníollacha agus srianta áirithe.

(16)

Is iomchuí é, go háirithe, uasmhéideanna a leagan síos maidir le cianaimíd, anailín agus aicéitiolaicéatón arb eisíontais tocsaineolaíocha iad a d’fhéadfadh a bheith san ábhar teicniúil mar a mhonaraítear é chun a áirithiú nach n-eascróidh aon iarmhairt dhíobhálach ar shláinte an duine as an tsubstaint ghníomhach pirimeatanail a úsáidtear i dtáirgí cosantacha plandaí.

(17)

Ar bhonn na dtorthaí ón measúnú riosca is gá freisin a iarraidh ar Bhallstáit aire ar leith a thabhairt do chosaint oibreoirí, daoine ar an láthair, cónaitheoirí, orgánaigh uisceacha, beacha agus pailneoirí nuair a thugtar faoi mheasúnuithe ar údarú na dtáirgí cosantacha plandaí ina bhfuil pirimeatanail. Déanfaidh Ballstáit úsáid trealaimh cosanta pearsanta chomh maith le bearta maolaithe riosca eile a fhorchur, nuair is iomchuí, chun neamhchosaint oibreoirí, daoine ar an láthair, cónaitheoirí, orgánach uisceach, beach agus pailneoirí a laghdú.

(18)

Suíodh sainmhínithe sealadacha ar iarmhair chun measúnú a dhéanamh ar an riosca do thomhaltóirí maidir le tráchtearraí áirithe ar de bhunadh plandaí nó ainmhíoch iad, chomh maith le tráchtearraí próiseáilte áirithe eile, mar gheall ar bhearna eolais i ndáil le tocsaineacht meitibilití i bpirimeatanail a d’fhéadfadh a bheith sna tráchtearraí sin: meitibilít M605F004 agus a comhchuingeacha agus meitibilít M605F007. Ba cheart do na hiarratasóirí tuilleadh faisnéise a chur ar fáil maidir le tocsaineacht na meitibilíte M605F004 lena n-áirítear a comhchuingeacha chomh maith le meitibilít M605F007 ionas gur féidir sainmhínithe sonracha ar iarmhair a shocrú i ndáil leis na tráchtearraí sin.

(19)

Sa bhreis air sin, d’fhonn muinín sa chonclúid a mhéadú go bhfuil an mheitibilít U2 san ithir ag méid nach gcruthóidh gá lena sainaithint de réir na gceanglas sonraí le haghaidh substaintí gníomhacha (8), agus, mar sin, nach bhfuil gá le measúnú riosca ar an meitibilít U2 ina dhiaidh sin i ndáil le nochtadh don ithir, uisce dromchla, dríodar agus screamhuisce, ba cheart do na hiarratasóirí faisnéis deimhniúcháin maidir le díghrádú pirimeatanaile sna hithreacha a chur ar fáil.

(20)

Mar fhocal scoir, i bhfianaise gur forbraíodh eolas teicniúil agus eolaíoch nua maidir leis an measúnú ar na héifeachtaí a d’fhéadfadh a bheith ag próisis chóireáilte uisce ar iarmhair substaintí gníomhacha nó ag a meitibilítí in uisce astarraingthe chun uisce óil a tháirgeadh i rith an phróisis mheasúnuithe, eolas nach raibh ar fáil ag an am nuair a cuireadh isteach an comhad forlíontach faoi phirimeatanail, is é sin, Treoirdhoiciméad (9), ba cheart do na hiarratasóirí faisnéis deimhniúcháin a chur ar fáil maidir le tionchar na bpróiseas cóireáilte uisce ar iarmhair phirimeatanaile nó a meitibilítí agus a d’fhéadfadh a bheith in uisce astarraingthe d’fhonn uisce óil a tháirgeadh.

(21)

Is iomchuí, dá bhrí sin, formheas pirimeatanaile a athnuachan faoi réir na gcoinníollacha a leagtar amach san Iarscríbhinn a ghabhann leis an Rialachán seo. Ba cheart Rialachán Cur Chun Feidhme (AE) Uimh. 540/2011 a leasú dá réir.

(22)

Le Rialachán Cur Chun Feidhme (AE) 2025/99 ón gCoimisiún (10), cuireadh síneadh leis an tréimhse formheasa le haghaidh pirimeatanaile go dtí an 30 Meitheamh 2026 chun go bhféadfar an próiseas athnuachana a thabhairt chun críche sula dtéann tréimhse formheasa na substainte gníomhaí sin in éag. Ós rud é go ndearnadh cinneadh maidir leis an athnuachan roimh dhul in éag na tréimhse formheasa sin ar cuireadh síneadh léi, áfach, ba cheart feidhm a bheith ag an Rialachán seo tráth is luaithe ná an dáta sin.

(23)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,