TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2016/1036 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (1) (‘an bun-Rialachán’), agus go háirithe Airteagal 14(5) de,

Tar éis na Ballstáit a chur ar an eolas,

De bharr an mhéid seo a leanas:

(1)

An 31 Deireadh Fómhair 2024, d’fhógair an Coimisiún Eorpach (‘an Coimisiún’), trí fhógra a foilsíodh in Iris Oifigiúil an Aontais Eorpaigh (2) (‘an fógra tionscnaimh’), gur tionscnaíodh imeachtaí frithdhumpála maidir le hallmhairí clóiríde coilín isteach san Aontas de thionscnamh Dhaon-Phoblacht na Síne.

(2)	Tionscnaíodh na himeachtaí seo tar éis gearán a chuir tionscal an Aontais isteach an 17 Meán Fómhair 2024 thar cheann táirgeoirí a bhfuil níos mó ná 25 % de tháirgeacht iomlán clóiríde coilín an Aontais acu.

1. TÁIRGE ATÁ FAOI RÉIR A CHLÁRAITHE

(3)

Is í clóiríd choilín (‘CC’), i ngach foirm agus íonacht, bíodh sí ar iompróir nó ná bíodh, an táirge atá faoi réir a chláraithe (‘an táirge lena mbaineann’), ag a bhfuil íoschion clóiríde coilín 30 % de réir meáchain, seachas teitrihiodráit chlóiríde choilín fosfairile chailciam ag a bhfuil uimhir CAS 72556-74-2, atá aicmithe faoi láthair faoi chóid AC ex 2923 10 00 , ex 2309 90 31 , ex 2309 90 96 , ex 2106 agus 3824 99 96 (cód breise TARIC 89ID) agus de thionscnamh Dhaon-Phoblacht na Síne.

2. CLÁRÚ

(4)

Faoi Airteagal 14(5) den bhun-Rialachán, féadfar allmhairí an táirge lena mbaineann a chur faoi réir a gcláraithe chun a áirithiú go bhféadfar na dleachtanna sin a ghearradh go cúlghabhálach, má chomhlíontar na coinníollacha is gá, ar na hallmhairí cláraithe i gcomhréir leis na forálacha dlí is infheidhme, i gcás ina mbeadh torthaí ar na himscrúduithe as a dtiocfadh forchur dleachtanna frithdhumpála.

(5)

Chinn an Coimisiún, ar a thionscnamh féin, allmhairí an táirge lena mbaineann a chur faoi réir a gcláraithe faoi Airteagal 14(5) den bhun-Rialachán. Na coinníollacha le haghaidh bhailiú cúlghabhálach na ndleachtanna, más ann dóibh, déanfar measúnú orthu sa Rialachán lena bhforchuirfear dleachtanna cinntitheacha.

(6)	Aon dliteanas a bheadh ann amach anseo, is as torthaí an imscrúdaithe frithdhumpála a thiocfadh sé.

(7)

De réir na ríomhanna arna soláthar sa ghearán inar iarradh imscrúdú frithdhumpála a thionscnamh, meastar corrlaigh dhumpála idir 26 % agus 121 % agus meánleibhéal díothaithe díobhála idir 85 % agus 86 % a bheith ann le haghaidh an táirge lena mbaineann sa tréimhse ón 1 Aibreán 2023 go dtí an 31 Márta 2024. De ghnáth, dhéanfaí méid an dliteanais a d’fhéadfadh a bheith ann amach anseo a shocrú ar an leibhéal is ísle den dá leibhéal sin de réir Airteagal 7(2) den bhun-Rialachán.

(8)

Mar sin féin, ag an gcéim seo ní féidir leis an gCoimisiún an méid dliteanais a d’fhéadfaí a bheith ann amach anseo a mheas. Dá bhrí sin, is ar mhaithe le faisnéis amháin atá na méideanna a luaitear sa ghearán agus ní féidir a bheith ag súil leis an leibhéal iarbhír dliteanais a bhunófar mar thoradh ar an imscrúdú a bheith bunaithe orthu.

3. PRÓISEÁIL SONRAÍ PEARSANTA

(9)

Aon sonraí pearsanta a bhailítear i gcomhthéacs an chlárúcháin seo, déanfar iad a láimhseáil i gcomhréir le Rialachán (AE) 2018/1725 (3) ó Pharlaimint na hEorpa agus ón gComhairle maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin,

TAR ÉIS AN RIALACHÁN SEO A GHLACADH:

Airteagal 1

1. Leis seo, ordaítear do na húdaráis chustaim, faoi Airteagal 14(5) de Rialachán (AE) 2016/1036, na céimeanna iomchuí a ghlacadh chun allmhairí clóiríde coilín isteach san Aontas a chlárú, i ngach foirm agus íonacht, bíodh sí ar iompróir nó ná bíodh, ag a bhfuil íoschion clóiríde coilín 30 % de réir meáchain, seachas teitrihiodráit chlóiríde choilín fosfairile chailciam ag a bhfuil uimhir CAS 72556-74-2, atá aicmithe faoi láthair faoi chóid AC ex 2923 10 00 , ex 2309 90 31 , ex 2309 90 96 , ex 2106 agus 3824 99 96 (cód breise TARIC 89ID) agus de thionscnamh Dhaon-Phoblacht na Síne.

2. Rachaidh an clárúchán in éag 9 mí tar éis dháta theacht i bhfeidhm an Rialacháin seo.

Airteagal 2

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 20 Eanáir 2025.

Thar ceann an Choimisiúin

An tUachtarán

Ursula VON DER LEYEN

(3) Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, ELI: http://data.europa.eu/eli/reg/2018/1725/oj).