(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear i liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

An 30 Iúil 2019 chuir an chuideachta Nutri’Earth (‘an t-iarratasóir’) iarratas faoi bhráid an Choimisiúin ar údarú i gcomhréir le hAirteagal 10(1) de Rialachán (AE) 2015/2283 chun púdar larbhaí iomlána Tenebrio molitor (minphéist bhuí) atá cóireáilte le UV a chur ar mhargadh an Aontais mar bhia núíosach. D’iarr an t-iarratasóir go n-úsáidfí an púdar a fhaightear de larbhaí iomlána Tenebrio molitor agus atá cóireáilte le UV in arán agus rollaí, cácaí, táirgí pasta-bhunaithe, táirgí prátaí próiseáilte, cáis agus táirgí cáise, agus compóití torthaí agus glasraí atá beartaithe don phobal i gcoitinne.

(4)

An 30 Iúil 2019 chuir an t-iarratasóir iarraidh faoi bhráid an Choimisiúin go gcosnófaí staidéir agus sonraí eolaíocha dílseánaigh arna gcur isteach chun tacú leis an iarratas, is iad sin, tuairisc mhionsonraithe ar an bpróiseas táirgthe (3) agus torthaí mionsonraithe na n-anailísí ar chomhdhéanamh (4).

(5)

An 17 Bealtaine 2020 d’iarr an Coimisiún ar an Údarás Eorpach um Shábháilteacht Bia (‘an tÚdarás’) measúnú a dhéanamh ar phúdar larbhaí iomlána Tenebrio molitor atá cóireáilte le UV mar bhia núíosach.

(6)

An 28 Márta 2023 ghlac an tÚdarás tuairim eolaíoch uaidh maidir le ‘Safety of UV-treated powder of whole yellow mealworm (Tenebrio molitor larva) as a novel food pursuant to Regulation (EU) 2015/2283’ [an tSábháilteacht a bhaineann le púdar minphéisteanna buí iomlána (larbha Tenebrio molitor) mar bhia núíosach de bhun Rialachán (AE) 2015/2283’] (5) i gcomhréir le hAirteagal 11 de Rialachán (AE) 2015/2283.

(7)

Sa tuairim eolaíoch uaidh, tháinig an tÚdarás ar an gconclúid go bhfuil púdar larbhaí iomlána Tenebrio molitor atá cóireáilte le UV sábháilte faoi na coinníollacha úsáide atá beartaithe agus ag na leibhéil úsáide atá beartaithe. Dá bhrí sin, is leor an foras sa tuairim eolaíoch sin chun a shuí, maidir le púdar larbhaí iomlána Tenebrio molitor atá cóireáilte le UV, nuair a úsáidtear é in arán agus rollaí, cácaí, táirgí pasta-bhunaithe, táirgí prátaí próiseáilte, cáis agus táirgí cáise, agus compóití torthaí agus glasraí atá beartaithe don phobal i gcoitinne, go gcomhlíonann sé na coinníollacha maidir lena chur ar an margadh i gcomhréir le hAirteagal 12(1) de Rialachán (AE) 2015/2283.

(8)

Sa tuairim sin, thug an tÚdarás dá aire freisin nach gcuireann an púdar a fhaightear de larbhaí iomlána Tenebrio molitor go mór le méid an vitimín D3 in aiste bia an duine, cé go gcuireann an chóireáil UV a dhéantar air le méid an vitimín D3 atá sa bhia núíosach é féin. Mar sin féin, agus é á chur san áireamh go bhféadfadh sé go mbeadh ann, sna bianna ina bhfuil an bia núíosach, do mhéid vitimín D a áirítear suntasach de réir Phointe 2 de Chuid A d’Iarscríbhinn XIII a ghabhann le Rialachán (AE) Uimh. 1169/2011 ó Pharlaimint na hEorpa agus ón gComhairle (6), measann an Coimisiún gurb iomchuí tomhaltóirí a chur ar an eolas faoi sin. Sna cásanna sin, beidh an ráiteas ‘tá vitimín D a ghintear trí chóireáil UV ann’ ag gabháil le hainmniú an bhia núíosaigh agus beidh méid an vitimín D atá ann sa dearbhú maidir le cothú.

(9)

Ar bhonn na fianaise teoranta atá foilsithe maidir le hailléirgí bia a nasctar le larbhaí Tenebrio molitor a thomhailt agus na fianaise a léiríonn go bhfuil roinnt próitéiní a d’fhéadfadh a bheith ailléirgineach in orgánaigh den fhíleam Arthropoda lena mbaineann Tenebrio molitor, tháinig an tÚdarás ar an gconclúid sa tuairim uaidh go bhféadfadh tomhaltas an bhia núíosaigh íogrú i leith próitéiní larbhaí Tenebrio molitor a spreagadh. Dá bhrí sin, mhol an tÚdarás tuilleadh taighde a dhéanamh ar an ailléirgineacht a bhaineann le larbhaí Tenebrio molitor.

(10)

Chun aghaidh a thabhairt ar mholadh an Údaráis, tá an Coimisiún ag féachaint faoi láthair ar bhealaí inar féidir an taighde is gá a dhéanamh maidir le hailléirgineacht larbhaí Tenebrio molitor. Go dtí go ndéanfaidh an tÚdarás measúnú ar na sonraí ón taighde sin, agus ós rud é go bhfuil an fhianaise a nascann tomhaltas larbhaí Tenebrio molitor go díreach le cásanna d’íogrú príomha agus d’ailléirgí teoranta go dtí seo, measann an Coimisiún nár cheart a áireamh i gcoinníollacha úsáide an bhia núíosaigh aon cheanglas sonrach maidir le lipéadú a bhaineann le hacmhainneacht púdair a fhaightear de larbhaí iomlána Tenebrio molitor agus atá cóireáilte le UV a bheith ina chúis le híogrú príomha.

(11)

Mheas an Coimisiún sa tuairim uaidh freisin go bhféadfadh tomhaltas an phúdair a fhaightear de larbhaí iomlána Tenebrio molitor agus atá cóireáilte le UV a bheith ina chúis le frithghníomhuithe ailléirgeacha i ndaoine a bhfuil ailléirge orthu le crústach agus fíneoga deannaigh. Thairis sin, thug an tÚdarás dá aire go bhféadfadh ailléirginí breise a bheith ann sa bhia núíosach, sa chás go mbeadh na hailléirginí céanna sa tsubstráit lena mbeathaítear na feithidí. Dá bhrí sin, maidir leis na bianna ina bhfuil an púdar a fhaightear de larbhaí iomlána Tenebrio molitor agus atá cóireáilte le UV, is iomchuí go ndéantar iad a lipéadú go cuí i gcomhréir le Airteagal 9 de Rialachán (AE) 2015/2283.

(12)

Sa tuairim eolaíoch uaidh, thug an tÚdarás dá aire freisin go raibh a chonclúid maidir le sábháilteacht an phúdair a fhaightear de larbhaí iomlána Tenebrio molitor agus atá cóireáilte le UV bunaithe ar na staidéir agus sonraí eolaíocha maidir leis an tuairisc mhionsonraithe ar an bpróiseas táirgthe agus ar torthaí mionsonraithe na n-anailísí ar chomhdhéanamh, staidéir agus sonraí nach bhféadfadh sé measúnú a dhéanamh ar an mbia núíosach ná teacht ar a chonclúid dá n-uireasa.

(13)

D’iarr an Coimisiún ar an iarratasóir soiléiriú breise a thabhairt maidir leis an réasúnú a cuireadh ar fáil i dtaca lena éileamh dílseánaigh ar na staidéir agus na sonraí eolaíocha sin, agus soiléiriú a thabhairt maidir lena éileamh ar cheart eisiach tagartha a bheith aige ina leith i gcomhréir le hAirteagal 26(2), pointe (b) de Rialachán (AE) 2015/2283.

(14)

Dhearbhaigh an t-iarratasóir go raibh cearta tagartha dílseánaigh agus eisiacha aige ar na staidéir agus sonraí sin maidir leis an tuairisc mhionsonraithe ar an bpróiseas táirgthe agus maidir le torthaí mionsonraithe na n-anailísí ar chomhdhéanamh, faoin dlí náisiúnta tráth a chuir sé an t-iarratas isteach, agus nach féidir le tríú páirtithe rochtain dhlíthiúil a fháil ar na sonraí sin, iad a úsáid ná tagairt a dhéanamh dóibh.

(15)

Rinne an Coimisiún measúnú ar an bhfaisnéis uile a sholáthair an t-iarratasóir agus mheas sé go raibh bunús leordhóthanach tugtha aige gur comhlíonadh na ceanglais a leagtar síos in Airteagal 26(2) de Rialachán (AE) 2015/2283. Dá bhrí sin, na staidéir agus na sonraí eolaíocha maidir leis an tuairisc mhionsonraithe ar an bpróiseas táirgthe agus maidir le torthaí mionsonraithe na n-anailísí ar chomhdhéanamh, ba cheart iad sin a chosaint i gcomhréir le hAirteagal 27(1) de Rialachán (AE) 2015/2283. Dá réir sin, is é an t-iarratasóir amháin ba cheart a údarú chun púdar a fhaightear de larbhaí iomlána Tenebrio molitor agus atá cóireáilte le UV a chur ar an margadh laistigh den Aontas ar feadh tréimhse 5 bliana ó theacht i bhfeidhm an Rialacháin seo.

(16)

Mar sin féin, maidir leis an údarú ar phúdar a fhaightear de larbhaí iomlána Tenebrio molitor agus atá cóireáilte le UV agus an tagairt do na staidéir agus na sonraí eolaíocha atá i gcomhad an iarratasóra a shrianadh d’úsáid an iarratasóra amháin, ní chuirfidh an srianadh sin cosc ar iarratasóirí eile cur isteach ar údarú ina dhiaidh sin chun an bia núíosach céanna a chur ar an margadh ar choinníoll gur ar fhaisnéis a fuarthas go dlíthiúil agus a thacaíonn leis an údarú sin atá a n-iarratas bunaithe.

(17)

Ba cheart púdar a fhaightear de larbhaí iomlána Tenebrio molitor agus atá cóireáilte le UV a áireamh i liosta an Aontais de bhianna núíosacha a leagtar amach i Rialachán Cur Chun Feidhme (AE) 2017/2470. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(18)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,