(1)

Le forbairtí teicneolaíocha is féidir cur chuige samhaltaithe a úsáid chun measúnú a dhéanamh ar sheasmhacht feidhmíochta táirgí foirgníochta. Leis an dul chun cinn teicneolaíoch sin is féidir córas measúnaithe agus fíoraithe a bhunú nuair a chuirtear i bhfeidhm bailiú sonraí le haghaidh luachanna ionchuir, toimhdí agus samhaltú le tacaíocht ó bhogearraí nó gan tacaíocht ó bhogearraí.

(2)

Sa rún ó Pharlaimint na hEorpa maidir le cur chun feidhme Rialachán (AE) Uimh. 305/2011 (2), cuireadh fáilte roimh chuspóir an Choimisiúin an earnáil foirgníochta a dhéanamh níos inbhuanaithe trí aghaidh a thabhairt ar fheidhmíocht inbhuanaitheachta táirgí foirgníochta, mar a fógraíodh sa Phlean Gníomhaíochta don Gheilleagar Ciorclach (3). Sna Conclúidí ón gComhairle maidir leis an nGeilleagar Ciorclach san Earnáil Foirgníochta an 28 Samhain 2019 (4), áitíodh ar an gCoimisiún ciorclaíocht táirgí foirgníochta a éascú. Sa Teachtaireacht ón gCoimisiún in 2020 dar teideal ‘Straitéis nua Tionsclaíochta don Eoraip’ (5) cuireadh béim ar an ngá atá ann aghaidh a thabhairt ar inbhuanaitheacht táirgí foirgníochta agus leagadh béim ar thimpeallacht thógtha níos inbhuanaithe a bheith riachtanach d’aistriú na hEorpa i dtreo neodracht aeráide. An Teachtaireacht ón gCoimisiún in 2021 dar teideal ‘Straitéis Tionsclaíochta Nua 2020 a nuashonrú: Margadh Aonair níos láidre a thógáil do théarnamh na hEorpa’ (6) aithníodh an fhoirgníocht mar cheann de na héiceachórais tosaíochta a bhfuil na dúshláin is tábhachtaí rompu a chomhlíonann spriocanna aeráide agus inbhuanaitheachta agus glacadh leis an gclaochlú digiteach, agus a bhfuil iomaíochas na hearnála foirgníochta ag brath air. I ngeall ar fhorbairtí teicneolaíocha ó thaobh measúnú saolré de, tá saintréithe sár-riachtanacha áirithe a bhaineann le buncheanglas 3 i leith oibreacha foirgníochta (sláinteachas, sláinte agus an comhshaol) agus le buncheanglas 7 i leith oibreacha foirgníochta (úsáid inbhuanaithe acmhainní nádúrtha) ar fáil le cur chun feidhme sa chreat rialála le haghaidh táirgí foirgníochta. Is iomchuí, dá bhrí sin, rialacha a leagan síos chun feidhmíocht inbhuanaitheachta comhshaoil táirgí foirgníochta a dhearbhú.

(3)

Chun freagairt don dul chun cinn teicneolaíoch, ba cheart Iarscríbhinn V a ghabhann le Rialachán (AE) Uimh. 305/2011 a oiriúnú trí mheasúnú agus fíorú nua ar sheasmhacht feidhmíochta AVCP 3+ a chur leis lena sainítear na cúraimí atá le déanamh sa phróiseas lena measúnaítear agus lena bhfíoraítear seasmhacht feidhmíochta táirgí foirgníochta nuair a chuirtear i bhfeidhm bailiú sonraí le haghaidh luachanna ionchuir, toimhdí agus samhaltú le tacaíocht ó bhogearraí nó gan tacaíocht ó bhogearraí. Tá gá le leasú den sórt sin chun a áirithiú go mbeidh monaróirí in ann measúnú a dhéanamh ar na saintréithe sár-riachtanacha a bhaineann le hinbhuanaitheacht chomhshaoil a dtáirgí.

(4)

Chun é a chur ar a gcumas do mhonaróirí rochtain a fháil ar an margadh inmheánach ar bhealach níos éifeachtúla agus, ar an gcaoi sin, rannchuidiú le hiomaíochas níos fearr sa tionscal foirgníochta ina iomláine, ba cheart córas nua AVCP 3+ a bheith infheidhme maidir le saintréithe sár-riachtanacha lena dtugtar aghaidh ar inbhuanaitheacht chomhshaoil. Má chuirtear córas nua AVCP i bhfeidhm, níor cheart ualach riaracháin breise a bheith ar mhonaróirí a bhfuil an toimhde acu cheana go mbaineann a dtáirgí leibhéal nó aicme áirithe feidhmíochta amach gan tástáil ná ríomh. Dá bhrí sin, ba cheart a shoiléiriú nach bhfuil feidhm ag an gcóras nua AVCP 3+ maidir leis na táirgí sin nach dteastaíonn tástáil ná ríomh ina leith faoi láthair.

(5)

Tá dlúthnasc idir forálacha an Rialacháin seo, ós rud é go mbaineann siad le soiléiriú an chórais AVCP is infheidhme maidir le saintréithe sár-riachtanacha lena dtugtar aghaidh ar inbhuanaitheacht chomhshaoil, mar aon leis an ngá atá ann athruithe teicneolaíochta a chur san áireamh lena bhforáiltear do mheasúnú samhaltaithe ar na saintréithe sin agus córas nua a thabhairt isteach chun seasmhacht feidhmíochta a mheasúnú agus a fhíorú (AVCP 3+). Chun comhleanúnachas idir na forálacha sin a áirithiú, is gá a áireamh in aon Rialachán amháin an soiléiriú ar an gcóras is infheidhme chun measúnú a dhéanamh ar na saintréithe sár-riachtanacha i ndáil le hinbhuanaitheacht chomhshaoil táirgí foirgníochta agus an leasú iarmhartach ar Iarscríbhinn V a ghabhann le Rialachán (AE) Uimh. 305/2011.

(6)

Dá bhrí sin, ba cheart Rialachán (AE) Uimh. 305/2011 a leasú dá réir sin,