(1)

An 31 Bealtaine 2013, ghlac an Chomhairle Cinneadh 2013/255/CBES (1) agus an 18 Eanáir 2012, ghlac sí Rialachán (AE) Uimh. 36/2012 (2) de bhun ghlacadh na gconclúidí ón gComhairle inar cháin sí an foréigean agus na sáruithe tromchúiseacha forleathana córasacha chearta an duine sa tSiria a tharla sé sin.

(2)

De dheasca chrith talún tragóideach an 6 Feabhra 2023, ghéaraigh ar na dálaí uafásacha a bhí sa tír cheana, agus mhéadaigh fulaingt phobal na Siria.

(3)

Sna conclúidí ón uaithi an 9 Feabhra 2023, d’athdhearbhaigh an Chomhairle Eorpach go bhfuil an tAontas réidh le cúnamh breise a sholáthar chun an fhulaingt a mhaolú sna réigiúin uile atá buailte. D’iarr sí ar na páirtithe uile sa choinbhleacht rochtain dhaonnúil ar íospartaigh an chreatha talún sa tSiria a áirithiú gan beann ar an áit a bhfuil siad lonnaithe agus d’iarr sí ar an bpobal daonnúil, faoi choimirce na Náisiún Aontaithe, seachadadh tapa an chúnaimh a áirithiú.

(4)

Bearta sriantacha an Aontais, lena n-áirítear na bearta sin arna nglacadh i bhfianaise na staide sa tSiria, níl siad ceaptha bac a chur ar an cúnamh daonnúil a sholáthar do dhaoine a bhfuil gá acu leis. Níl srian ar an trádáil i bhformhór na n-earnálacha idir an tAontas agus an tSiria — lena n-áirítear i mbia agus i gcógas — leis na bearta sriantacha a ghlac an Chomhairle i bhfianaise na staide sa tSiria. Thairis sin, a mhéid a bhaineann le bearta aonair, tá eisceachtaí i bhfeidhm chun gur féidir cistí agus acmhainní eacnamaíocha a chur ar fáil do dhaoine ainmnithe agus d’eintitis ainmnithe, i gcás ina bhfuil gá leis na cistí nó leis na hacmhainní eacnamaíocha sin chun fóirithint dhaonnúil a chur ar fáil sa tSiria nó cúnamh a thabhairt don daonra sibhialta sa tSiria agus chun na críche sin amháin. I gcásanna áirithe, is gá réamhúdarú a fháil ón údarás náisiúnta inniúil ábhartha.

(5)

An 23 Feabhra 2023, ghlac an Chomhairle Cinneadh (CBES) 2023/408 (3) agus Rialachán (AE) Uimh. 2023/407 (4), lenar tugadh isteach díolúine maidir le sócmhainní daoine nádúrtha nó dlítheanacha ainmnithe agus sócmhainní eintiteas ainmnithe a reo, agus maidir leis na srianta ar chistí agus acmhainní eacnamaíocha a chur ar fáil dóibh. Chinn an Chomhairle gur cheart feidhm a bheith ag an díolúine chun dul chun tairbhe d’eagraíochtaí idirnáisiúnta agus do chatagóirí sainithe áirithe gníomhaithe a bhfuil baint acu le gníomhaíochtaí daonnúla agus gur cheart feidhm a bheith aici ar feadh tréimhse thosaigh 6 mhí, go dtí an 24 Lúnasa 2023. An 14 Iúil 2023, ghlac an Chomhairle Cinneadh (CBES) 2023/1467 (5) agus Rialachán (AE) 2023/1462 (6), lenar cuireadh síneadh leis an díolúine sin go dtí an 24 Feabhra 2024.

(6)

Chun freagairt do phráinn leanúnach na géarchéime daonnúla sa tSiria atá níos measa mar gheall ar an gcrith talún, agus d’fhonn seachadadh tapa an chunaimh a éascú agus intuarthacht agus deimhneacht dhlíthiúil a chur ar fáil do chatagóirí sainithe áirithe gníomhaithe a bhfuil baint acu le gníomhaíochtaí daonnúla sa tSiria, gníomhaíochtaí a bhaineann leas as an díolúine arna glacadh i gCinneadh (CBES) 2023/408 agus i Rialachán (AE) 2023/407, is iomchuí síneadh a chur leis an díolúine sin go dtí an 1 Meitheamh 2024, i gcomhréir leis an dáta reatha deiridh chur i bhfeidhm Chinneadh 2013/255/CBES.

(7)

Tagann na leasuithe a áirítear sa Rialachán seo faoi raon feidhme an Chonartha agus, dá bhrí sin, tá gá le gníomhaíocht rialála ar leibhéal an Aontais chun iad a chur chun feidhme, go háirithe d’fhonn a áirithiú go gcuirfear i bhfeidhm iad go haonfhoirmeach i ngach Ballstát.

(8)

Ba cheart, da bhrí sin, Rialachán (AE) 36/2012 a leasú dá réir sin,