(1)

Le Rialachán (AE) 2018/1240, bunaítear an Córas Eorpach um Fhaisnéis agus Údarú Taistil (ETIAS), córas is infheidhme maidir le náisiúnaigh tríú tír atá díolmhaithe ón gceanglas víosa agus atá ag iarraidh dul isteach ar chríoch na mBallstát.

(2)

Is éard is aidhm don Rialachán seo na rialacha agus na coinníollacha maidir leis an iarratas fíorúcháin ó iompróirí a leagan síos mar aon le forálacha a bhunú maidir le cosaint sonraí agus slándáil le haghaidh scéim fíordheimhniúcháin na n-iompróirí, sin agus nósanna imeachta cúltaca a bhunú i gcás dodhéantacht theicniúil. Na hoibleagáidí a leagtar amach sa Rialachán seo, is oibleagáidí iad atá infheidhme maidir le haeriompróirí, iompróirí ar muir agus iompróirí idirnáisiúnta a iompraíonn grúpaí i gcóistí thar tír, ar iompróirí iad a bhíonn ag teacht isteach ar chríoch na mBallstát.

(3)

De bhun Airteagal 45(1) de Rialachán (AE) 2018/1240, beidh ar aeriompróirí, iompróirí ar muir agus iompróirí idirnáisiúnta a iompraíonn daoine i gcóistí thar tír iarratas a sheoladh chuig ETIAS chun a fhíorú an bhfuil údarú taistil bailí ina seilbh ag na taistealaithe atá faoi réir ceanglas i dtaobh údarú taistil. Is trí gheata iompróra a rochtain ar bhealach slán a dhéanfar an t-iarratas sin.

(4)

Ba cheart do na hiompróirí scéim fíordheimhniúcháin a úsáid chun rochtain a fháil ar an gcomhéadan iompróra. Leis an Rialachán Cur Chun Feidhme seo, ba cheart foráil a dhéanamh maidir leis na rialacha cosanta sonraí agus na rialacha slándála is infheidhme maidir leis an scéim fíordheimhniúcháin de bhun Airteagal 45(3) de Rialachán (AE) 2018/1240 ionas nach mbeidh rochtain ar an ngeata iompróra ach ag na hiompróirí amháin.

(5)

Chun gur féidir leo a gcuid oibleagáidí a chomhlíonadh, ba cheart rochtain ar an ngeata iompróra a thabhairt d’iompróirí atá ag oibriú agus a iompraíonn paisinéirí isteach ar chríoch na mBallstát.

(6)

Ba cheart rialacha teicniúla maidir le formáid na dteachtaireachtaí agus maidir leis an scéim fíordheimhniúcháin a leagan síos chun gur féidir le hiompróirí nascadh leis an ngeata iompróra agus é a úsáid, rud atá le sonrú sna treoirlínte teicniúla ar cuid de na sonraíochtaí teicniúla dá dtagraítear in Airteagal 73 de Rialachán (AE) 2018/1240 iad agus atá le glacadh ag Gníomhaireacht an Aontais Eorpaigh chun bainistiú oibríochtúil a dhéanamh ar chórais mhórscála TF sa limistéar saoirse, slándála agus ceartais (eu-LISA).

(7)

Ba cheart d’iompróirí a bheith in ann é a chur in iúl má bhíonn paisinéirí ann nach dtagann faoi raon feidhme Rialachán (AE) 2018/1240, agus sna cásanna sin, ba cheart don gheata iompróra freagra uathoibríoch “Ní bhaineann le hábhar” a thabhairt d’iompróirí, gan gá leis an mBunachar Sonraí inléite amháin a chuardach ná logáil a dhéanamh.

(8)

Ba cheart feidhm a bheith ag an Rialachán seo maidir le haeriompróirí, iompróirí ar muir agus iompróirí idirnáisiúnta a iompraíonn grúpaí i gcóistí thar tír, ar iompróirí iad a bhíonn ag teacht isteach ar chríoch na mBallstát. Féadfar seiceálacha teorann maidir le dul isteach ar chríoch na mBallstáit a dhéanamh roimh bhordáil. San cásanna sin, ba cheart iompróirí a scaoileadh ón oibleagáid stádas údaraithe taistil na dtaistealaithe a fhíorú.

(9)

I gcomhréir le hAirteagal 83 de Rialachán (AE) 2018/1240, le linn na hidirthréimhse agus na dtréimhsí cairde, ba cheart na rialacha is infheidhme maidir le hiompróirí a oiriúnú do dhálaí sonracha na dtréimhsí sin. Ba cheart cead a bheith ag taistealaithe dul isteach gan údarú taistil le linn na hidirthréimhse toisc gur cheart an t-údarú sin a bheith roghnach. Tiocfaidh tréimhse chairde i ndiaidh na hidirthréimhse agus lena linn sin ba cheart cead a bheith ag taistealaithe dul isteach ar chríoch na mBallstát gan údarú taistil más é sin an chéad uair dóibh dul isteach le linn na tréimhse cairde sin.

(10)

Chun a áirithiú go bhfuil an t-iarratas fíorúcháin bunaithe ar fhaisnéis atá cothrom le dáta a mhéid is féidir, níor cheart iarratais a chur isteach níos luaithe ná 48 n-uair an chloig roimh an am imeachta sceidealaithe.

(11)

I gcás na bpaisinéirí a bhfuil sé de cheangal orthu údarú taistil bailí a bheith ina seilbh acu, má sheolann na hiompróirí iarratas chuig an gcomhéadan iompróra laistigh de 48 n-uair an chloig roimh an am sceidealaithe taistil agus má fhaigheann siad “CGL” mar fhreagra, ba cheart a mheas ansin go bhfuil údarú taistil bailí ina seilbh ag na paisinéirí sin. D’fhéadfadh sé go mbeadh imthosca ann nach mbeadh an t-iompróir in ann dul ar aghaidh leis an iarratas dá dtagraítear in Airteagal 45(1) de Rialachán (AE) 2018/1240 i ngeall ar chliseadh teicniúil a tharlaíonn laistigh d’aon chomhpháirt den Chóras Eorpach um Fhaisnéis agus Údarú Taistil. Chun srian a chur leis na hiarmhairtí díobhálacha a d’fhéadfadh a bheith ina dtoradh ar chliseadh den sórt sin, is gá na rialacha mionsonraithe maidir leis na nósanna imeachta cúltaca dá bhforáiltear in Airteagal 46 de Rialachán (AE) 2018/1240 a leagan síos.

(12)

Na sonraí a bhfuil rochtain ag na hiompróirí orthu, chun a áirithiú go bhfuil na sonraí sin cruinn agus comhleanúnach leis na sonraí atá stóráilte i sa Chóras Eorpach um Fhaisnéis agus Údarú Taistil, ba cheart an bunachar sonraí inléite amháin dá dtagraítear in Airteagal 45(4) de Rialachán (AE) 2018/1240 a nuashonrú de réir mar is gá.

(13)

Ba cheart don Choimisiún, do eu-LISA agus do na Ballstáit féachaint leis na hiompróirí aitheanta uile a chur ar an eolas faoin mbealach agus faoin am ar féidir leo clárú. Tar éis don iompróir an próiseas clárúcháin a chur i gcrích go rathúil agus, i gcás inarb ábhartha, tar éis dó an tástáil a chur i gcrích go rathúil freisin, ba cheart do eu-LISA an t-iompróir sin a nascadh leis an gcomhéadan iompróra.

(14)

Ba cheart rochtain a bheith ag iompróirí ar fhoirm ghréasáin ar shuíomh gréasáin poiblí trínar féidir leo cúnamh a iarraidh. Nuair atá cúnamh á iarraidh acu, ba cheart do na hiompróirí admháil ina bhfuil uimhir ticéid a fháil. Féadfaidh eu-LISA nó Láraonad ETIAS teagmháil a dhéanamh leis na hiompróirí a fuair ticéad, trí aon mhodh is gá, lena n-áirítear ar an nguthán, chun freagairt leormhaith a thabhairt dóibh.

(15)

Rialachán Cur Chun Feidhme (AE) 2021/1217 ón gCoimisiún (2) lena leagtar síos na rialacha agus na coinníollacha maidir le hiarratais fíorúcháin ó iompróirí, forálacha maidir le cosaint sonraí agus slándáil le haghaidh scéim fíordheimhniúcháin na n-iompróirí, mar aon le nósanna imeachta cúltaca i gcás dodhéantacht theicniúil. Is gá tuilleadh sonraithe a dhéanamh ar na nósanna imeachta cúltacai gcás dodhéantacht theicniúil. Ar mhaithe le soiléire, ba cheart Rialachán nua a chur in ionad an Rialacháin sin.

(16)

Ós rud é go gcuireann Rialachán (AE) 2018/1240 le acquis Schengen, thug an Danmhairg fógra an 21 Nollaig 2018 maidir lena chinneadh Rialachán (AE) 2018/1240 a chur chun feidhme ina dlí náisiúnta, i gcomhréir le hAirteagal 4 de Phrótacal Uimh. 22 maidir le seasamh na Danmhairge, prótacal atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh. Dá bhrí sin, tá an Danmhairg faoi cheangal ag an Rialachán seo.

(17)

Is é atá sa Rialachán seo forbairt ar fhorálacha acquis Schengen nach bhfuil Éire rannpháirteach iontu, toisc go dtagann sé lasmuigh de raon feidhme na mbeart dá bhforáiltear i gCinneadh 2002/192/CE ón gComhairle (3). dá bhrí sin, níl Éire rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(18)

A mhéid a bhaineann leis an Íoslainn agus leis an Iorua, is é atá sa Rialachán seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis (4) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE ón gComhairle (5).

(19)

A mhéid a bhaineann leis an Eilvéis, is é atá sa Rialachán seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (6) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE, arna léamh i gcomhar le hAirteagal 3 de Chinneadh 2008/146/CE ón gComhairle (7).

(20)

A mhéid a bhaineann le Lichtinstéin, is é atá sa Rialachán seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (8) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE arna léamh i gcomhar le hAirteagal 3 de Chinneadh 2011/350/AE ón gComhairle (9).

(21)

A mhéid a bhaineann leis an gCipir, leis an mBulgáir, leis an Rómáin agus leis an gCróit, is é atá sa Rialachán seo gníomh atá ag cur le acquis Schengen nó atá gaolmhar leis ar dhóigh eile, de réir bhrí Airteagal 3(1) d’Ionstraim Aontachais 2003, Airteagal 4(1) d’Ionstraim Aontachais 2005 agus Airteagal 4(1) d’Ionstraim Aontachais 2011 faoi seach.

(22)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (10) agus thug sé tuairim uaidh an 30 Aibreán 2021.

(23)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste um Theorainneacha Cliste (ETIAS),

(1)

Foráiltear le Rialachán (AE) 2015/2283 nach bhféadfar ach bianna núíosacha atá údaraithe agus a áirítear ar liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta an Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

Ar liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470, áirítear galachta-olagaisiúicríd mar bhia núíosach údaraithe.

(4)

De bhun Airteagal 5 den Rialachán (CE) Uimh. 258/97 ó Pharlaimint na hEorpa agus ón gComhairle (3), tá galachta-olagaisiúicríd údaraithe lena chur ar an margadh mar bhia núíosach a mbainfear úsáid as i roinnt bianna, lena n-áirítear bainne foirmle do naíonáin agus bainne foirmle leantach do naíonáin mar a shainmhínítear i Rialachán (AE) Uimh. 609/2013 ó Pharlaimint na hEorpa agus ón gComhairle (4).

(5)

Rinne Rialachán Cur Chun Feidhme (AE) 2021/900 ón gCoimisiún (5) leasú ar choinníollacha úsáide an bhia núíosaigh galachta-olagaisiúicríd. Go háirithe, méadaíodh ar leibhéal úsáide an bhia núíosaigh galachta-olagaisiúicríd i bhforbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle (6) ó 0,333 kg galachta-olagaisiúicríd/kg de chuid forbhia (33,3 %) go dtí 0,450 kg galachta-olagaisiúicríd/kg de chuid forbhia (45,0 %) don phobal i gcoitinne, seachas naíonáin agus leanaí óga.

(6)

Rinne Rialachán Cur Chun Feidhme (AE) 2022/684 ón gCoimisiún (7) leasú ar choinníollacha úsáide an bhia núíosaigh galachta-olagaisiúicríd. Go háirithe, leathnaíodh úsáid galachta-olagaisiúcríde chuig bianna breise, is iad sin, milseogra déiríochta, cáis agus cáis phróiseáilte, im agus saillte inleata.

(7)

An 29 Meitheamh 2020, chuir an chuideachta GLNP BV (“an t-iarratasóir”) iarratas faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 le haghaidh athrú i gcoinníollacha úsáide an bhia núíosaigh galachta-olagaisiúicríd. D’iarr an t-iarratasóir úsáid galachta-olagaisiúcríde a leathnú chuig bianna chun críocha speisialta míochaine mar a shainmhínítear i Rialachán (AE) Uimh. 609/2013 atá beartaithe don phobal i gcoitinne, seachas naíonáin agus leanaí óga.

(8)

I gcomhréir le hAirteagal 10(3) de Rialachán (AE) 2015/2283, chuaigh an Coimisiún i gcomhairle leis an Údarás Eorpach um Shábháilteacht Bia (“an tÚdarás”) an 12 Iúil 2021, agus d’iarr an Coimisiún ar an Údarás tuairim eolaíoch a thabhairt ar an athrú ar choinníollacha úsáide an bhia núíosaigh galachta-olagaisiúicríd.

(9)

An 28 Feabhra 2022, ghlac an tÚdarás a thuairim eolaíoch maidir le “Sábháilteacht an leathnaithe ar úsáid galachta-olagaisiúicrídí mar bhia núíosach i mbia chun críocha speisialta míochaine de bhun Rialachán (AE) 2015/2283” (8) i gcomhréir le hAirteagal 11 de Rialachán (AE) 2015/2283.

(10)

Sa tuairim eolaíoch uaidh, tháinig an tÚdarás ar an gconclúid go bhfuil an t-athrú atá beartaithe sábháilte faoi na coinníollacha úsáide atá beartaithe, agus dá bhrí sin is iomchuí coinníollacha úsáide galachta-olagaisiúcríde a leasú.

(11)

Leis an bhfaisnéis a sholáthraítear san iarratas agus sa tuairim ón Údarás, tá forais leordhóthanacha ann chun a shuíomh go bhfuil na hathruithe ar choinníollacha úsáide an bhia núíosaigh i gcomhréir le coinníollacha Airteagal 12(1) de Rialachán (AE) 2015/2283 agus ba cheart iad a fhormheas.

(12)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis an bhforas agus leis na nósanna imeachta chun an t-údarú sin a dheonú.

(2)

I gcomhréir le hAirteagal 7(1) de Rialachán (CE) Uimh. 1831/2003, cuireadh isteach iarratas maidir le húdarú ullmhóid Propionibacterium freudenreichii DSM 33189 agus Lentilactobacillus buchneri DSM 12856. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóid Propionibacterium freudenreichii DSM 33189 agus Lentilactobacillus buchneri DSM 12856 mar bhreiseán beathaithe le haghaidh gach speicis ainmhíoch, ullmhóid atá le haicmiú i gcatagóir na mbreiseán “breiseáin theicneolaíocha”.

(4)

Chinn an tÚdarás Eorpach um Shábháilteacht Bia (“an tÚdarás”) ina thuairim an 26 Eanáir 2022 (2) nach bhfuil tionchar díobhálach ag ullmhóid Propionibacterium freudenreichii DSM 33189 and Lentilactobacillus buchneri DSM 12856 ar shláinte ainmhithe, ar shábháilteacht an tomhaltóra ná ar an gcomhshaol, faoi na coinníollacha úsáide atá beartaithe. Chinn sé freisin nach greannaitheoir súl agus craicinn é an breiseán ach gur cheart é a mheas mar íogróir riospráide agus nach bhféadfaí teacht ar aon chonclúid maidir leis an íogrú craicinn a d’fhéadfadh an breiseán a dhéanamh. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe a mhéid a bhaineann le húsáideoirí an bhreiseáin. Ina theannta sin, chinn an tÚdarás go bhféadfadh an ullmhóid atá i gceist feabhas a chur ar leasú na gcothaitheach i sadhlas a ullmhaítear le hábhar a bhfuil sé éasca agus measartha deacair sadhlas a dhéanamh as. D’fhíoraigh sé freisin an tuarascáil ar an modh a úsáidtear chun anailís a dhéanamh ar na breiseáin bheathaithe i mbeatha, tuarascáil arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

Léirítear leis an measúnú ar ullmhóid Propionibacterium freudenreichii DSM 33189 agus Lentilactobacillus buchneri DSM 12856 go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide a údarú faoi mar a shonraítear san Iarscríbhinn a ghabhann leis an Rialachán seo.

(6)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta chun an t-údarú sin a dheonú. Le hAirteagal 10(2) den Rialachán sin foráiltear maidir le hathmheastóireacht ar bhreiseáin a údaraítear de bhun Threoir 70/524/CEE ón gComhairle (2).

(2)

I gcomhréir le Treoir 70/524/CEE údaraíodh eastóscán olibanum gan teorainn ama, mar bhreiseán beathaithe le haghaidh gach speicis ainmhíoch. Ina dhiaidh sin cuireadh an breiseán sin i gClár na mbreiseán beathaithe mar tháirge a bhí ann cheana, i gcomhréir le hAirteagal 10(1)(b) de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh isteach iarratas chun athmheastóireacht a dhéanamh ar eastóscán olibanumasBoswellia serrata Roxb. ex Colebr. le haghaidh capall agus madraí.

(4)

D’iarr an t-iarratasóir go n-aicmeofaí an breiseán i gcatagóir na mbreiseán “breiseáin chéadfacha” agus san fheidhmghrúpa “comhdhúile blaistithe”. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(5)

Chinn an tÚdarás Eorpach um Shábháilteacht Bia (“an tÚdarás”), ina thuairim an 27 Eanáir 2022 (3), nach bhfuil éifeachtaí díobhálacha ag eastóscán olibanumasBoswellia serrata Roxb. ex Colebr. ar shláinte ainmhithe, ar shláinte tomhaltóirí ná ar an gcomhshaol, faoi na coinníollacha úsáide atá beartaithe. Chinn an tÚdarás freisin nár cheart a mheas gur ghreannaitheoir craicinn agus súl é eastóscán olibanumasBoswellia serrata Roxb. ex Colebr., ach in éagmais sonraí, nach fhéadfaí teacht ar aon chonclúid maidir leis an íogrú deirmeach agus riospráide a d’fhéadfadh sé a dhéanamh. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe a mhéid a bhaineann le húsáideoirí an bhreiseáin.

(6)

Ina theannta sin, chinn an tÚdarás go bhfuil eastóscán olibanum as Boswellia serrata Roxb. ex Colebr. aitheanta mar bhlastán bia agus go mbeadh an fheidhm chéanna aici i mbeatha ainmhithe, go bunúsach, is atá aici i mbia, agus dá bhrí sin meastar nach gá le héifeachtúlacht a léiriú a thuilleadh. D’fhíoraigh sé freisin an tuarascáil ar na modhanna a úsáidtear chun anailís a dhéanamh ar an mbreiseán beathaithe agus é i mbeatha, tuarascáil arna cur isteach ag an Saotharlann Tagartha a bunaíodh le Rialachán (CE) Uimh. 1831/2003.

(7)

Léiríonn an measúnú ar eastóscán olibanum as Boswellia serrata Roxb. ex Colebr. go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substainte sin a údarú mar a shonraítear san Iarscríbhinn a ghabhann leis an Rialachán seo.

(8)

Ba cheart foráil a dhéanamh maidir le coinníollacha áirithe chun rialú níos fearr a cheadú. Thar aon ní eile, ba cheart cion molta a léiriú ar lipéad na mbreiseán beathaithe. I gcás ina sárófar an méid sin, ba cheart faisnéis áirithe a shonrú ar lipéad na réamh-mheascán.

(9)

Ós rud é nach bhfuil gá leis na modhnuithe ar na coinníollacha maidir le húdarú na substainte lena mbaineann a chur i bhfeidhm láithreach ar chúiseanna sábháilteachta, is iomchuí idirthréimhse a cheadú do pháirtithe leasmhara chun iad féin a ullmhú chun na ceanglais nua a eascraíonn as an údarú a chomhlíonadh.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Chun coinníollacha aonfhoirmeacha a áirithiú le haghaidh ríomh forálacha teicniúla agus bunchistí dílse ag gnóthais árachais agus athárachais chun críocha Threoir 2009/138/CE, ba cheart faisnéis theicniúil a leagan síos le haghaidh gach dáta tagartha maidir le struchtúir téarma ábhartha ráta úis atá saor ó riosca agus maidir le raonta difríochta bunúsacha chun an coigeartú meaitseála agus na coigeartuithe luaineachta a ríomh.

(2)

Ba cheart do ghnóthais árachais agus athárachais úsáid a bhaint as an bhfaisnéis theicniúil atá bunaithe ar shonraí margaidh a bhaineann le deireadh na míosa roimhe sin a thagann roimh an gcéad dáta tagartha le haghaidh tuarascála a bhfuil feidhm ag an Rialachán seo maidir leis. An 5 Iúil 2022 chuir an tÚdarás Eorpach um Árachas agus Pinsin Cheirde an fhaisnéis theicniúil a bhaineann le sonraí margaidh go dtí deireadh mhí an Mheithimh 2022 ar fáil don Choimisiún. Foilsíodh an fhaisnéis sin an 5 Iúil 2022 i gcomhréir le hAirteagal 77e(1) de Threoir 2009/138/CE.

(3)

I bhfianaise an ghá an fhaisnéis theicniúil a bheith ar fáil láithreach, tá sé tábhachtach go dtiocfaidh an Rialachán seo i bhfeidhm ar bhonn práinne.

(4)

Ar chúiseanna stuamachta, ní mór go n-úsáidfidh gnóthais árachais agus athárachais an fhaisnéis theicniúil chéanna chun forálacha teicniúla agus bunchistí dílse a ríomh gan beann ar an dáta a thuairiscíonn siad dá n-údaráis inniúla. Ba cheart dá bharr sin go mbeadh feidhm ag an Rialachán seo ón gcéad dáta tagartha tuarascála a bhfuil feidhm ag an Rialachán seo maidir leis.

(5)

D’fhonn deimhneacht dhlíthiúil a chur ar fáil a luaithe is féidir, ar mhórchúiseanna práinne a bhaineann le hinfhaighteacht an struchtúir téarma ábhartha ráta úis atá saor ó riosca, tá bonn cirt cuí le bearta dá bhforáiltear sa Rialachán seo a ghlacadh i gcomhréir le hAirteagal 8, i gcomhar le hAirteagal 4 de Rialachán (AE) Uimh. 182/2011 ó Pharlaimint na hEorpa agus ón gComhairle (2),