(1)

Bhí de thoradh ar an ionradh a rinne Cónaidhm na Rúise ar an Úcráin an 24 Feabhra 2022 insreabhadh ollmhór daoine easáitithe ón Úcráin isteach i roinnt Ballstát. Leis sin, cuirtear brú as an nua ar acmhainní airgeadais na mBallstát chun déileáil le riachtanais phráinneacha i réimse na himirce, an bhainistithe teorainneacha agus na slándála a bheidh fós ann tar éis 2022 i bhfianaise chineál agus mhéid na géarchéime.

(2)

Ón 1 Eanáir 2014, tá tacaíocht á fáil ag beartas gnóthaí baile an Aontais um imirce, bainistiú teorainneacha agus slándáil i bhfoirm maoiniú ón gCiste um Thearmann, Imirce agus Lánpháirtíocht, a bunaíodh le Rialachán (AE) Uimh. 516/2014 ó Pharlaimint na hEorpa agus ón gComhairle (2), agus ón gCiste Slándála Inmheánaí, arb é atá ann an ionstraim le haghaidh tacaíocht airgeadais do theorainneacha seachtracha agus do víosaí, a bunaíodh le Rialachán (AE) Uimh. 515/2014 ó Pharlaimint na hEorpa agus ón gComhairle (3), agus an ionstraim le haghaidh tacaíocht airgeadais do chomhar póilíneachta, don choireacht a chosc agus a chomhrac, agus do bhainistíocht géarchéime, a bunaíodh le Rialachán (AE) Uimh. 513/2014 ó Pharlaimint na hEorpa agus ón gComhairle (4) (“Cistí Gnóthaí Baile 2014-2020”).

(3)

Is gá síneadh bliana a chur le tréimhse cur chun feidhme Chistí Gnóthaí Baile 2014-2020 chun ligean do na Ballstáit méideanna nár caitheadh ó na cláir sin a úsáid go hiomlán, agus, más gá, athbhreithniú tapa a dhéanamh ar chur chun feidhme na gclár atá acu de réir mar is gá chun aghaidh a thabhairt ar na dúshláin gan choinne atá ag teacht chun cinn mar thoradh ar an ionradh ar an Úcráin.

(4)

Is gá foráil a dhéanamh maidir le tuilleadh solúbthachta ó thaobh úsáid acmhainní atá curtha in áirithe faoi Rialachán (AE) Uimh. 516/2014 lena gcuirtear cosc faoi láthair ar mhéideanna nár caitheadh ó thréimhse chlársceidealaithe 2014-2020 a úsáid le haghaidh gníomhaíochtaí chun aghaidh a thabhairt ar riachtanais phráinneacha atá ag teacht chun cinn mar thoradh ar an ionradh ar an Úcráin.

(5)

Le Rialachán (AE) Uimh. 514/2014 ó Pharlaimint na hEorpa agus ón gComhairle (5), leagtar síos rialacha ginearálta maidir le cur chun feidhme Chistí Gnóthaí Baile 2014-2020 i ndáil le, inter alia, maoiniúchán caiteachais agus an tréimhse cur chun feidhme. Leis na rialacha sin, cuirtear srian le hincháilitheacht eisíocaíochtaí na mBallstát go dtí an 30 Meitheamh 2023 ar a dhéanaí agus socraítear an 31 Nollaig 2023 mar dheireadh na tréimhse cur chun feidhme.

(6)

An 1 Eanáir 2021, faoin gCreat Airgeadais Ilbhliantúil le haghaidh 2021-2027, tháinig pacáiste athnuaite cistí i réimse na himirce agus an bhainistithe teorainneacha i bhfeidhm i bhfoirm an Chiste nua um Thearmann, Imirce agus Lánpháirtíocht, a bunaíodh le Rialachán (AE) 2021/1147 ó Pharlaimint na hEorpa agus ón gComhairle (6), na hIonstraime le haghaidh Tacaíocht Airgeadais don Bhainistiú Teorainneacha agus don Bheartas Víosaí, a bunaíodh le Rialachán (AE) 2021/1148 ó Pharlaimint na hEorpa agus ón gComhairle (7), agus an Chiste Slándála Inmheánaí, a bunaíodhe le Rialachán (AE) 2021/1149 ó Pharlaimint na hEorpa agus ón gComhairle (8) (“Cistí Gnóthaí Baile 2021-2027”).

(7)

Cé gur tháinig Cistí Gnóthaí Baile 2021-2027 i bhfeidhm an 15 Iúil 2021, agus infheidhmeacht chúlghabhálach acu ón 1 Eanáir 2021, níor formheasadh cláir na mBallstát uile go fóill.

(8)

Chun leanúnachas a áirithiú maidir le cur chun feidhme chuspóirí beartais Chistí Gnóthaí Baile 2014-2020 agus 2021-2027 agus chun go mbeifear in ann aistriú rianúil a dhéanamh idir na tréimhsí clársceidealaithe le haghaidh 2014-2020 agus le haghaidh 2021-2027, rud a laghdódh an t-ualach riaracháin ar na Ballstáit, is gá go mbeidh forluí áirithe ann idir cur chun feidhme na n-ionstraimí cistiúcháin sin. Aithnítear an gá sin go sainráite le Cistí Gnóthaí Baile 2021-2027 agus le Rialachán (AE) 2021/1060 ó Pharlaimint na hEorpa agus ón gComhairle (9), lena gceadaítear incháilitheacht chúlghabhálach caiteachais ón 1 Eanáir 2021.

(9)

D’ainneoin na bhforálacha sin chun cuidiú chun an bhearna a laghdú idir Cistí Gnóthaí Baile 2014-2020 agus Cistí Gnóthaí Baile 2021-2027, tá baol ann go mbeidh bearna shuntasach chistiúcháin ag na Ballstáit mar gheall ar dháta deiridh chur chun feidhme Chistí Gnóthaí Baile 2014-2020 agus na dátaí a thuartar le haghaidh fhormheas na gclár faoi Chistí Gnóthaí Baile 2021-2027. D’fhéadfadh fadhbanna leachtachta a bheith mar thoradh ar an mbearna chistiúcháin sin mar gheall ar an mbrú breise atá ar imirce agus bainistiú teorainneacha na mBallstát tar éis insreabhadh ollmhór na ndaoine easáitithe ón Úcráin.

(10)

Is measa an baol go mbeadh bearna shuntasach chistiúcháin ann mar gheall ar an gcaoi a leanann Cistí Gnóthaí Baile 2014-2020 timthriall níos giorra chun gealltanais bhuiséadacha a chur chun feidhme (riail N+2), timthriall nach bhfuil ailínithe le hionstraimí cistiúcháin eile de chuid an Aontais faoi bhainistíocht roinnte, amhail cistí comhtháthaithe, a bhfuil feidhm ag tréimhse cur chun feidhme níos faide (N+3) maidir leo. Tá feidhm ag an riail N+3 maidir le Cistí Gnóthaí Baile 2021-2027 mar a leagtar amach i Rialachán (AE) 2021/1060. Is é atá i gceist leis an riail N+3 go gcaithfear gealltanas a dhéantar i mbliain N a chumhdach go hiomlán leis an méid céanna réamh-mhaoinithe agus éileamh íocaíochta eatramhaí roimh an 31 Nollaig i mbliain N+3 (mar shampla, caithfear gealltanas a dhéantar in 2014 a chumhdach go hiomlán le réamh-mhaoiniú agus éilimh íocaíochtaí roimh an 31 Nollaig 2017). Déantar an méid nach gcumhdaítear a shaoradh, rud a chiallaíonn go gcailleann an Ballstát an cistiú ábhartha.

(11)

Leis an bhfaisnéis atá ar fáil maidir leis an staid mar atá ó thaobh cur chun feidhme sna Ballstáit, léirítear go bhfuil baol mór ann go saorfar cistí a d’fhéadfaí a úsáid ar shlí eile chun aghaidh a thabhairt ar riachtanais nua atá tagtha chun cinn. Tá an baol sin ann mar gheall, i bpáirt, ar chúiseanna nach bhfuil smacht ag na Ballstáit orthu, amhail moilleanna ar chur chun feidhme in 2020-2021 arbh í paindéim COVID-19 ba chúis leo. Idir an dá linn, dá gcuirfí síneadh bliana leis an sprioc-am chun cistí a chur chun feidhme, bheadh na Ballstáit in ann úsáid iomlán a bhaint as na gealltanais bhuiséadacha laistigh de chláir 2014-2020 chun aghaidh a thabhairt ar na dúshláin atá rompu anois de bharr an chogaidh san Úcráin.

(12)

Le Rialachán (AE) Uimh. 514/2014, aithnítear, i bhfianaise imthosca nua nó imthosca gan choinne, ar thionscnamh ón gCoimisiún nó ón mBallstát lena mbaineann, go bhféadfar clár náisiúnta formheasta a athscrúdú agus, más gá, a athchóiriú don tréimhse atá fágtha den tréimhse chlársceidealaithe. Is iomchuí a mheas gurb ionann an cogadh san Úcráin agus “imthosca nua nó imthosca gan choinne” lena dtugtar údar le hathscrúdú agus atreorú oibríochtúil a dhéanamh ar chlár, i bhfianaise na riachtanas nua agus laistigh de chuspóirí sonracha an chláir arna ghlacadh roimhe sin.

(13)

Chun rochtain leanúnach a thabhairt do na Ballstáit ar mhéideanna nár caitheadh faoi Chistí Gnóthaí Baile 2014-2020, is gá síneadh bliana a chur le tréimhse incháilitheachta na gcistí sin agus na hathruithe riachtanacha gaolmhara a dhéanamh ar na dátaí is infheidhme maidir le cur chun feidhme, tuairisciú, meastóireacht agus dúnadh na gclár, agus ar na dátaí a bhaineann le méideanna saortha.

(14)

Chun a áirithiú go dtugtar an síneadh ar an tréimhse incháilitheachta isteach ar an mbealach is soiléire is féidir, is gá dáta sonrach deiridh amháin a leagan síos faoina gcaithfear an caiteachas a bheith tabhaithe agus eisíoctha araon.

(15)

Le Rialachán (AE) 2018/2000 ó Pharlaimint na hEorpa agus ón gComhairle (10), leasaíodh Rialachán (AE) Uimh. 516/2014 chun rochtain a scaoileadh ar acmhainní atá curtha in áirithe chun iarratasóirí ar chosaint idirnáisiúnta agus tairbhithe de chosaint idirnáisiúnta a aistriú agus chun go mbeifí in ann na hacmhainní sin a úsáid le haghaidh gníomhaíochtaí áirithe eile faoin gclár náisiúnta. Is gá prionsabal sin na solúbthachta a leathnú chun aghaidh a thabhairt ar riachtanais phráinneacha i bhfianaise imthosca nua nó imthosca gan choinne, go háirithe chun aghaidh a thabhairt ar na riachtanais nua tearmainn agus bainistithe imirce atá ag na Ballstáit atá ag teacht chun cinn mar thoradh ar an ionradh ar an Úcráin.

(16)

Chun rochtain a scaoileadh ar gach ciste atá ar fáil agus chun nach gcaillfí iad trí shaoradh acmhainní nár úsáideadh, acmhainní a cuireadh in áirithe roimhe sin le haghaidh cuspóirí sonracha áirithe faoi Rialachán (AE) Uimh. 516/2014, lena n-áirítear acmhainní le haghaidh gníomhaíochtaí sonracha agus le haghaidh Chlár Athlonnaithe an Aontais, is gá solúbthacht a thairiscint do na Ballstáit chun na hacmhainní sin a úsáid go heisceachtúil i bhfianaise imthosca nua nó imthosca gan choinne, amhail na himthosca sin atá ag teacht chun cinn mar thoradh ar an ionradh ar an Úcráin.

(17)

Chun feabhas a chur ar raon feidhme na bhfoinsí cistiúcháin atá ar fáil chun cuidiú le déileáil le himeachtaí gan choinne amach anseo, is iomchuí an deis a thabhairt do na Ballstáit agus do dheontóirí poiblí nó príobháideacha eile, le linn thréimhse chlársceidealaithe 2021-2027, ranníocaíochtaí airgeadais breise a dhéanamh leis an mbainistiú tearmainn agus imirce, i bhfoirm ioncam sannta seachtrach. Is é a bheidh i gceist leis an ioncam sannta seachtrach sin ranníocaíocht thiomnaithe ó na Ballstáit agus ó dheontóirí poiblí nó príobháideacha eile chun ítimí sonracha caiteachais a mhaoiniú faoin gCiste um Thearmann, Imirce agus Lánpháirtíocht le haghaidh 2021-2027, agus leis an ioncam sannta seachtrach sin, beidh beart ullmhachta breise ann chun gníomhaíochtaí tearmainn agus imirce a chistiú sna Ballstáit le linn géarchéimeanna amhail an ghéarchéim atá ag teacht chun cinn mar thoradh ar an ionradh ar an Úcráin.

(18)

An tacaíocht a sholáthraítear faoin gCiste um Thearmann, Imirce agus Lánpháirtíocht le haghaidh 2014-2020 agus faoin gCiste um Thearmann, Imirce agus Lánpháirtíocht le haghaidh 2021-2027, tá sí comhlántach le gníomhaíochtaí a mhaoinítear faoi chistí eile de chuid an Aontais, go háirithe faoin mbeartas comhtháthaithe, chun an tionchar is mó is féidir a bhaint as an gcistiú atá ar fáil.

(19)

Ós rud é nach féidir leis na Ballstáit cuspóirí an Rialacháin seo a ghnóthú go leordhóthanach agus, de bharr fhairsinge nó éifeachtaí na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach (CAE). I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(20)

I bhfianaise na práinne a bhaineann le hacmhainní airgeadais a chur ar fáil do na Ballstáit chun déileáil le riachtanais i réimse na himirce, an bhainistithe teorainneacha agus na slándála arb é insreabhadh ollmhór daoine easáitithe ón Úcráin is cúis leo, meastar gurb iomchuí an eisceacht ar an tréimhse 8 seachtaine dá bhforáiltear in Airteagal 4 de Phrótacal Uimh. 1 maidir le ról na bparlaimintí náisiúnta san Aontas Eorpach, atá i gceangal le CAE, leis an gConradh ar Fheidhmiú an Aontais Eorpaigh (CFAE) agus leis an gConradh ag bunú an Chomhphobail Eorpaigh do Fhuinneamh Adamhach, a agairt.

(21)

I gcomhréir le hAirteagal 1 agus Airteagal 2 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal le CAE agus le CFAE, agus gan dochar d’Airteagal 4 den Phrótacal sin, níl Éire rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(22)

I gcomhréir le hAirteagal 1 agus Airteagal 2 de Phrótacal Uimh. 22 maidir le seasamh na Danmhairge, atá i gceangal le CAE agus le CFAE, níl an Danmhairg rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(23)

Ba cheart, dá bhrí sin, Rialacháin (AE) Uimh. 514/2014, (AE) Uimh. 516/2014 agus (AE) 2021/1147 a leasú dá réir sin.

(24)

Ba cheart don Rialachán seo a theacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh chun acmhainní airgeadais a chur ar fáil do na Ballstáit go práinneach chun déileáil le riachtanais i réimse na himirce, an bhainistithe teorainneacha agus na slándála arb é insreabhadh ollmhór daoine easáitithe ón Úcráin is cúis leo,

(1)

Comhlíonann an tsubstaint teitreitil-luaidhe na critéir maidir le haicmiú mar shubstaint atá tocsaineach i leith an atáirgthe (catagóir 1A) i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle (2) agus, dá bhrí sin, comhlíonann sí na critéir maidir le cuimsiú in Iarscríbhinn XIV a ghabhann le Rialachán (CE) Uimh. 1907/2006, critéir a leagtar amach in Airteagal 57, pointe (c) den Rialachán sin.

(2)

An tsubstaint alcól 4,4’-bis(démheitiolaimín)-4"-(meitiolaimín)trítile (ag a bhfuil ≥ 0,1 % de chéatón Michler (Uimh. CE 202-027-5) nó de bhun Michler (Uimh. CE 202-959-2)), comhlíonann sí na critéir maidir le haicmiú mar shubstaint atá carcanaigineach (catagóir 1B) i gcomhréir le Rialachán (CE) Uimh. 1272/2008 agus, dá bhrí sin, comhlíonann sí na critéir maidir le cuimsiú in Iarscríbhinn XIV a ghabhann le Rialachán (CE) Uimh. 1907/2006, critéir a leagtar amach in Airteagal 57, pointe (a) den Rialachán sin.

(3)

Táirgí imoibriúcháin de 1,3,4-tiadé-asóilidín-2,5-déthión, d’fhormaildéad agus de 4-heiptilfeanól, é brainseach agus líneach (RP-HP) (ina bhfuil ≥ 0,1 % w/w 4-heiptilfeanól, é brainseach agus líneach), is substaintí iad a bhfuil airíonna suaite inchríneach iontu a bhfuil fianaise eolaíoch ann ina leith go bhfuil éifeachtaí ar dóigh dóibh a bheith tromchúiseach ar an gcomhshaol. Is cúis imní iad na substaintí sin a oiread céanna leis na substaintí eile a liostaítear in Airteagal 57, pointí (a) go (e), de Rialachán (CE) Uimh. 1907/2006 agus, dá bhrí sin, comhlíonann siad na critéir maidir le cuimsiú in Iarscríbhinn XIV a ghabhann leis an Rialachán sin, critéir a leagtar amach in Airteagal 57, pointe (f), den Rialachán sin.

(4)

An tsubstaint 10-eitil-4,4-dé-ochtail-7-ocsó-8-ocsá-3,5-déthia-4-stánáit-teitreadeacánóáit 2-eitilheicsile (DOTE), comhlíonann sí na critéir maidir le haicmiú mar shubstaint atá tocsaineach i leith an atáirgthe (catagóir 1B) i gcomhréir le Rialachán (CE) Uimh. 1272/2008 agus, dá bhrí sin, comhlíonann sí na critéir maidir le cuimsiú in Iarscríbhinn XIV a ghabhann le Rialachán (CE) Uimh. 1907/2006, critéir a leagtar amach in Airteagal 57, pointe (c) den Rialachán sin.

(5)

Mais imoibriúcháin de 10-eitil-4,4-dé-ochtail-7-ocsó-8-ocsá-3,5-déthia-4-stánáit-teitreadeacánóáit 2-eitilheicsile agus de 10-eitil-4-[[2-[(2-eitilheicsil)ocsa]-2-ocsó-eitil]tia]-4-ochtail-7-ocsó-8-ocsá-3,5-déthia-4-stánáit-teitreadeacánóáit 2-eitilheicsile (mais imoibriúcháin de DOTE agus MOTE), is substaintí iad a chomhlíonann na critéir maidir le haicmiú mar shubstaint atá tocsaineach i leith an atáirgthe (catagóir 1B) i gcomhréir le Rialachán (CE) Uimh. 1272/2008 agus, dá bhrí sin, comhlíonann sí na critéir maidir le cuimsiú in Iarscríbhinn XIV a ghabhann le Rialachán (CE) Uimh. 1907/2006, critéir a leagtar amach in Airteagal 57, pointe (c) den Rialachán sin.

(6)

Sainaithníodh na substaintí thuasluaite uile mar shubstaintí a chomhlíonann na critéir dá dtagraítear in Airteagal 57 de Rialachán (CE) Uimh. 1907/2006 agus cuimsítear iad i liosta na n-iarrthóirí ar chuimsiú in Iarscríbhinn XIV a ghabhann leis an Rialachán sin amach anseo. Ina theannta sin, thug an Ghníomhaireacht Eorpach Ceimiceán (‘an Ghníomhaireacht’) tús áite do chuimsiú na substaintí sin san Iarscríbhinn sin sa mholadh uaithi an 1 Deireadh Fómhair 2019 (3).

(7)

Rinne an Ghníomhaireacht comhairliúchán poiblí maidir leis an dréachtmholadh uaithi, comhairliúchán inar iarradh ar pháirtithe leasmhara barúlacha a thíolacadh. Ina theannta sin, fuair an Coimisiún aighneachtaí ó pháirtithe leasmhara mar fhreagra ar ghlaonna ar fhaisnéis i ndáil leis na tionchair eacnamaíocha, shóisialta, shláinte agus chomhshaoil a d’fhéadfadh a bheith ann (costais agus sochair) dá gcuimseofaí in Iarscríbhinn XIV a ghabhann le Rialachán (CE) Uimh. 1907/2006 na substaintí arna moladh ag an nGníomhaireacht sa dréachtmholadh uaithi.

(8)

Dá bhrí sin, ba cheart na substaintí thuasluaite a chuimsiú in Iarscríbhinn XIV a ghabhann le Rialachán (CE) Uimh. 1907/2006.

(9)

I gcás na substaintí uile a ndéantar leis an Rialachán seo iad a chuimsiú in Iarscríbhinn XIV a ghabhann le Rialachán (CE) Uimh. 1907/2006, ba cheart dáta a leagan síos óna dtoirmiscfear a gcur ar an margadh agus a n-úsáid ach amháin má thugtar údarú, de réir mar a cheanglaítear le hAirteagal 58(1), pointe (c)(i), de Rialachán (CE) Uimh. 1907/2006, agus cumas na Gníomhaireachta chun iarratais ar údarú a láimhseáil á chur san áireamh. I gcás na substaintí sin, níl aon chúis ann ar cheart an dáta dá dtagraítear in Airteagal 58(1), pointe (c)(ii) de Rialachán (CE) Uimh. 1907/2006 a leagan síos níos luaithe ná 18 mí roimh an dáta dá dtagraítear in Airteagal 58(1), pointe (c)(i) den Rialachán sin.

(10)

In Airteagal 58(1), pointe (e) i gcomhar le hAirteagal 58(2) de Rialachán (CE) Uimh. 1907/2006, foráiltear go bhféadfaí díolúintí a thabhairt i leith úsáidí nó catagóirí úsáide i gcásanna ina bhforchuireann reachtaíocht shonrach de chuid an Aontais íoscheanglais maidir le sláinte an duine nó an comhshaol a chosaint, rud lena n-áirithítear rialú cuí ar na rioscaí. I gcomhréir leis an bhfaisnéis atá ar fáil, ní iomchuí díolúintí a leagan síos bunaithe ar na forálacha sin.

(11)

Le linn an chomhairliúcháin phoiblí a rinne an Ghníomhaireacht maidir lena dréachtmholadh, níor cuireadh aon bharúil shonrach isteach maidir le díolúintí a d’fhéadfadh a bheith ann le haghaidh taighde agus forbairt atá dírithe ar tháirgí agus ar phróisis. Dá bhrí sin agus ar bhonn na faisnéise atá ar fáil, ní iomchuí na díolúintí sin a leagan síos.

(12)

Toisc nach bhfuil ach faisnéis theoranta ar fáil maidir le húsáidí na substaintí a chuimsítear in Iarscríbhinn XIV a ghabhann le Rialachán (CE) Uimh. 1907/2006 maidir leis an Rialachán seo, ní iomchuí tréimhsí athbhreithnithe dá dtagraítear in Airteagal 58(1), pointe (d) den Rialachán sin a leagan síos ag an gcéim seo.

(13)

Comhlíonann na substaintí 2-meatocsa-eatánól (EGME) agus 2-eatocsa-eatánól (EGEE) na critéir maidir le haicmiú mar shubstaint atá tocsaineach i leith an atáirgthe (catagóir 1B) i gcomhréir le Rialachán (CE) Uimh. 1272/2008 agus, dá bhrí sin, comhlíonann siad na critéir maidir le cuimsiú in Iarscríbhinn XIV a ghabhann le Rialachán (CE) Uimh. 1907/2006, critéir a leagtar amach in Airteagal 57, pointe (c) den Rialachán sin. I gcomhréir le hIarscríbhinn XVII a ghabhann le Rialachán (CE) Uimh. 1907/2006, tá srian ar an dá shubstaint a chur ar an margadh agus a úsáid leo féin, mar chomhábhair de chuid substaintí eile nó i meascáin atá le soláthar don phobal i gcoitinne. A mhéid a bhaineann le hoibrithe a chosaint, leagadh síos teorainnluachanna táscacha nochta ceirde i gcás na substaintí sin ar leibhéal an Aontais le Treoir 2009/161/AE ón gCoimisiún (4) de réir mar a fhoráiltear i dTreoir 98/24/CE ón gComhairle (5). Ós rud é nach bhfuil na luachanna sin ceangailteach, d’fhéadfadh sé go mbeadh éagsúlacht ann maidir le cur chun feidhme na Treorach sin ag na Ballstáit. Tá measúnú á dhéanamh ag an gCoimisiún féachaint céard é an cur chuige rialála is iomchuí maidir leis na substaintí sin. Dá bhrí sin, is iomchuí a gcuimsiú in Iarscríbhinn XIV a ghabhann le Rialachán (CE) Uimh. 1907/2006 a chur ar fionraí.

(14)

Na substaintí ainhidríd chioglaiheacsán-1,2-décarbocsaileach [1], ainhidríd chis-cioglaiheacsán-1,2-décarbocsaileach [2], ainhidríd tras-cioglaiheacsán-1,2-décarbocsaileach [3] (HHPA) agus ainhidríd heicsihidrimeitioltalach [1], ainhidríd heicsihidri-4-meitioltalach [2], ainhidríd heicsihidri-1-meitioltalach [3], ainhidríd heicsihidri-3-meitioltalach [4] (MHHPA), comhlíonann siad na critéir maidir le haicmiú mar íogróir riospráide (catagóir 1) i gcomhréir le Rialachán (CE) Uimh. 1272/2008. Tháinig an Ghníomhaireacht ar an gconclúid go bhfuil fianaise eolaíoch ann maidir le héifeachtaí ar shláinte an duine ar dóigh dóibh a bheith tromchúiseach, éifeachtaí as a n-eascraíonn a oiread céanna imní agus a eascraíonn as substaintí eile a liostaítear in Airteagal 57, pointí (a) go (e), de Rialachán (CE) Uimh. 1907/2006 agus, dá bhrí sin, go gcomhlíonann na substaintí sin na critéir maidir le cuimsiú in Iarscríbhinn XIV a ghabhann leis an Rialachán sin agus a leagtar amach in Airteagal 57, pointe (f), den Rialachán sin. De réir na faisnéise atá ar fáil, úsáidtear na substaintí sin ar láithreáin thionsclaíocha, áit a mbíonn nochtadh na n-oibrithe do na substaintí ar an bpríomhábhar imní agus nach mbíonn aon úsáid ghairmiúil ann agus nach mbíonn aon úsáid ar siúl ag tomhaltóirí. A mhéid a bhaineann le hoibrithe a chosaint, níl aon teorainnluach táscach nochta ceirde leagtha síos i gcás na substaintí sin ar leibhéal an Aontais i gcomhréir le Treoir 98/24/CE, agus d’fhéadfadh sé a bheith deacair leibhéal sábháilte nochta a leagan síos maidir le híogróir riospráide. Tá measúnú á dhéanamh ag an gCoimisiún féachaint céard é an cur chuige rialála is iomchuí maidir leis na substaintí sin. Dá bhrí sin, is iomchuí cuimsiú na substaintí sin in Iarscríbhinn XIV a ghabhann le Rialachán (CE) Uimh. 1907/2006 a chur ar fionraí.

(15)

An tsubstaint 1,6,7,8,9,14,15,16,17,17,18,18-dóideacaclóraipeantaiciogla[12.2.1.16,9.02,13.05,10]ochtaideaca-7,15-dé-éin (‘Dechlorane Plus’™) (rud a chumhdaíonn aon cheann dá fhrith-isiméirí nó dá shin-isiméirí aonair, nó aon chuingir de), is substaint an-mharthanach an-bhithcharnach í, i gcomhréir leis na critéir a leagtar amach in Iarscríbhinn XIII a ghabhann le Rialachán (CE) Uimh. 1907/2006, agus dá bhrí sin, comhlíonann sí na critéir maidir le cuimsiú in Iarscríbhinn XIV a ghabhann leis an Rialachán sin a leagtar amach in Airteagal 57, pointe (e), de. Ullmhaíodh sainchomhad a bhaineann le hIarscríbhinn XV chun úsáidí na substainte sin a shrianadh. Ina theannta sin, tá bearta déanta chun an tsubstaint sin a chuimsiú i gCoinbhinsiún Stócólm ar Thruailleáin Orgánacha Mharthanacha (6). A luaithe a bheidh substaint faoi réir an Choinbhinsiúin sin, déanfar monarú, cur ar an margadh agus úsáid na substainte sin a thoirmeasc, a chéimniú amach a luaithe is féidir nó a shrianadh ar leibhéal an Aontais le Rialachán (AE) 2019/1021 ó Pharlaimint na hEorpa agus ón gComhairle (7). Substaintí ar toirmisceadh gach úsáid díobh le reachtaíocht eile de chuid an Aontais, ní féidir iad a liostú in Iarscríbhinn XIV a ghabhann le Rialachán (CE) Uimh. 1907/2006. Chun cur chuige rialála comhsheasmhach a áirithiú, ba cheart toradh na dtionscnamh sin a chur san áireamh sula ndéanfar cinneadh maidir le “Dechlorane Plus”™ a chuimsiú in Iarscríbhinn XIV a ghabhann le Rialachán (CE) Uimh. 1907/2006. Dá bhrí sin, is iomchuí cuimsiú na substainte sin in Iarscríbhinn XIV a ghabhann le Rialachán (CE) Uimh. 1907/2006 a chur ar fionraí.

(16)

Na seacht gcomhdhúil luaidhe, dé-ocsóibis(stéarató)tríluaidhe; aigéid shailleacha, C16-18, salainn luaidhe; fosfónáit dé-ocsaíde tríluaidhe; aigéad sulfarúil, salann luaidhe, débhunata; [Talató(2-)]dé-ocsóthríluaidhe; comhlíonann déhiodrocsaíd bhis(carbónáit) tríluaidhe agus sulfáit ocsaíde luaidhe na critéir maidir le haicmiú mar shubstaint atá tocsaineach i leith an atáirgthe (catagóir 1A) i gcomhréir le Rialachán (CE) Uimh. 1272/2008 agus, dá bhrí sin, comhlíonann siad na critéir maidir le cuimsiú in Iarscríbhinn XIV a ghabhann le Rialachán (CE) Uimh. 1907/2006, critéir a leagtar amach in Airteagal 57, pointe (c) den Rialachán sin. Is i gclóiríd pholaivinile athchúrsáilte (PVC) a bhíonn na substaintí sin den chuid is mó agus ní féidir iad a bhaint leis an teicneolaíocht atá ann faoi láthair. Tá an Coimisiún ag obair ar Rialachán chun úsáid luaidhe agus a comhdhúile a thoirmeasc in earraí PVC agus chun srian a chur ar earraí PVC a bhfuil níos mó ná 0,1 % luaidhe iontu a chur ar an margadh, maille le beagán maoluithe. Ina theannta sin, teorainnluach táscach nochta ceirde an Aontais atá ceangailteach faoi láthair agus an teorainnluach bitheolaíoch atá ceangailteach faoi láthair maidir le comhdhúile luaidhe a leagadh síos faoi Threoir 98/24/CE, tá siad sin faoi athbhreithniú. Dá bhrí sin agus i bhfianaise an phlé leanúnaigh maidir le srian a chur ar úsáid luaidhe agus a cuid comhdhúl chomh maith le bearta níos déine a d’fhéadfaí a ghlacadh ag an láthair oibre, cinneadh maidir leis na substaintí sin a chuimsiú in Iarscríbhinn XIV a ghabhann le Rialachán (CE) Uimh. 1907/2006, is iomchuí an cinneadh sin a chur ar fionraí.

(17)

Comhlíonann an tsubstaint iseapróipilidéindéfheanól (Bisfeanól A; BPA) na critéir maidir le haicmiú mar shubstaint atá tocsaineach i leith an atáirgthe (catagóir 1B) i gcomhréir le Rialachán (CE) Uimh. 1272/2008. Tá airíonna suaite inchríneach aige freisin a bhfuil fianaise eolaíoch ann ina leith go bhfuil éifeachtaí aige ar shláinte an duine agus ar an gcomhshaol, éifeachtaí ar dóigh dóibh a bheith tromchúiseach. Is substaint é as a n-eascraíonn oiread céanna imní agus a eascraíonn as substaintí eile a liostaítear in Airteagal 57, pointí (a) go (e), de Rialachán (CE) Uimh. 1907/2006. Dá bhrí sin, comhlíonann sé na critéir maidir le cuimsiú in Iarscríbhinn XIV a ghabhann le Rialachán (CE) Uimh. 1907/2006 a leagtar amach in Airteagal 57, pointí (c) agus (f), den Rialachán sin. Tá sainchomhad a bhaineann le hIarscríbhinn XV á ullmhú chun srian a chur le húsáid Bisfeanól-A agus le húsáid na mbisfeanól a bhfuil baint struchtúrach acu leis agus lena mbaineann ábhair imní den chineál céanna maidir leis an gcomhshaol. Is é atá i gceist leis an srian sin úsáidí Bisfeanól-A a thiocfadh faoin gcóras údarúcháin a chumhdach. Dá bhrí sin, is iomchuí cuimsiú na substainte sin in Iarscríbhinn XIV a ghabhann le Rialachán (CE) Uimh. 1907/2006 a chur ar fionraí. Dá bhrí sin, ba cheart Rialachán (CE) Uimh. 1907/2006 a leasú dá réir sin.

(18)

Tá na bearta dá bhforáiltear sa Rialachán seo i gcomhréir leis an tuairim ón gCoiste arna bhunú le hAirteagal 133 de Rialachán (CE) Uimh. 1907/2006,

(1)

Is galar víreasach tógálach é fiabhras Afracach na muc a bhíonn ar mhuc-ainmhithe atá ar coimeád agus ar mhuc-ainmhithe fiáine agus d’fhéadfadh tionchar tromchúiseach a bheith ag an ngalar ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

Glacadh Rialachán Cur Chun Feidhme (AE) 2021/605 ón gCoimisiún (2), faoi chuimsiú Rialachán (AE) 2016/429, agus leagtar síos leis bearta speisialta rialaithe galar maidir le fiabhras Afracach na muc atá le cur i bhfeidhm ar feadh tréimhse theoranta ama ag na Ballstáit a liostaítear in Iarscríbhinn I a ghabhann leis (na Ballstáit lena mbaineann), i gcriosanna srianta I, II agus III a liostaítear san Iarscríbhinn sin.

(3)

Na limistéir a liostaítear mar chriosanna srianta I, II agus III in Iarscríbhinn I a ghabhann le Rialachán Cur Chun Feidhme (AE) 2021/605, tá siad bunaithe ar staid eipidéimeolaíoch fhiabhras Afracach na muc san Aontas. Is le Rialachán Cur Chun Feidhme (AE) 2021/491 ón gCoimisiún (3) a leasaíodh Iarscríbhinn I a ghabhann le Rialachán Cur Chun Feidhme (AE) 2021/605 go deireanach tar éis athruithe sa staid eipidéimeolaíoch maidir leis an ngalar sin sa Laitvia agus sa tSlóvaic.

(4)

Aon leasú ar chriosanna srianta I, II agus III in Iarscríbhinn I a ghabhann le Rialachán Cur Chun Feidhme (AE) 2021/605, ba cheart iad a bheith bunaithe ar an staid eipidéimeolaíoch maidir le fiabhras Afracach na muc sna limistéir atá buailte ag an ngalar sin agus ar staid eipidéimeolaíoch fhoriomlán fhiabhras Afracach na muc sa Bhallstát lena mbaineann, ar an leibhéal riosca maidir le leathadh breise an ghalair sin, ar phrionsabail agus critéir atá bunaithe ar an eolaíocht i dtaca le criosú a shainiú go geografach de bharr fhiabhras Afracach na muc, agus ar threoirlínte an Aontais a comhaontaíodh leis na Ballstáit ag an mBuanchoiste um Plandaí, Ainmnithe, Bia agus Beatha, treoirlínte atá ar fáil ar shuíomh gréasáin an Choimisiúin (4). Ina theannta sin, ba cheart caighdeáin idirnáisiúnta a chur san áireamh sna leasuithe sin, caighdeáin amhail Cód um Shláinte na nAinmhithe Talún (5) ón Eagraíocht Dhomhanda um Shláinte Ainmhithe, agus ba cheart a chur san áireamh freisin an bonn cirt a thug údaráis inniúla na mBallstát lena mbaineann leis an gcriosú.

(5)

Ó bhí dáta glactha Rialachán Cur Chun Feidhme (AE) 2022/491 ann, bhí ráigeanna nua d’fhiabhras Afracach na muc ann i muc-ainmhithe fiáine sa Laitvia agus sa Pholainn. Ina theannta sin, tá feabhas tagtha ar an staid eipidéimeolaíoch i gcriosanna áirithe a liostaítear mar chriosanna srianta III agus II sa Pholainn maidir le muc-ainmhithe atá ar coimeád agus muc-ainmhithe fiáine, i ngeall ar na bearta rialaithe galar atá á gcur i bhfeidhm ag an mBallstát sin i gcomhréir le reachtaíocht an Aontais.

(6)

Ina theannta sin, i mí an Mhárta 2022, tugadh faoi deara roinnt ráigeanna d’fhiabhras Afracach na muc i muc-ainmhithe fiáine i gcontae Dienvidkurzemes na Laitvia i limistéar a liostaítear faoi láthair mar chrios srianta II in Iarscríbhinn I a ghabhann le Rialachán Cur Chun Feidhme (AE) 2021/605, atá suite i gcóngar limistéir a liostaítear mar chrios srianta I faoi láthair. Na ráigeanna sin d’fhiabhras Afracach na muc i muc-ainmhithe fiáine, tá leibhéal méadaithe riosca ag baint leo, rud ba cheart a léiriú san Iarscríbhinn sin. Dá réir sin, an limistéar sin den Laitvia a liostaítear faoi láthair mar chrios srianta I san Iarscríbhinn sin, é suite i gcóngar an limistéir a liostaítear i gcrios srianta II atá buailte ag na ráigeanna sin d’fhiabhras Afracach na muc a tharla le déanaí, ba cheart é a liostú feasta mar chrios srianta II san Iarscríbhinn sin seachas mar chrios srianta I, agus ní mór teorainneacha reatha chrios srianta I a athshainiú chun na ráigeanna sin a tharla le déanaí a chur san áireamh.

(7)

Ina theannta sin, i mí Aibreáin 2022, tugadh faoi deara go raibh ráig amháin d’fhiabhras Afracach na muc i muc-ainmhí fiáin i réigiún Pomorskie sa Pholainn i limistéar a liostaítear faoi láthair mar chrios srianta II in Iarscríbhinn I a ghabhann le Rialachán Cur Chun Feidhme (AE) 2021/605, áit atá suite i gcóngar limistéir a liostaítear faoi láthair mar chrios srianta I. An ráig nua sin d’fhiabhras Afracach na muc i muc-ainmhithe fiáine, tá leibhéal méadaithe riosca ag baint léi, rud ba cheart a léiriú san Iarscríbhinn sin. Dá réir sin, an limistéar sin den Pholainn a liostaítear faoi láthair mar chrios srianta I san Iarscríbhinn sin, é suite i gcóngar an limistéir a liostaítear i gcrios srianta II atá buailte ag an ráig seo d’fhiabhras Afracach na muc a tharla le déanaí, ba cheart é a liostú feasta mar chrios srianta II san Iarscríbhinn sin seachas mar chrios srianta I, agus ní mór teorainneacha reatha chrios srianta I a athshainiú chun an ráig seo a tharla le déanaí a chur san áireamh.

(8)

Tar éis na ráigeanna nua sin d’fhiabhras Afracach na muc a tharla le déanaí i muc-ainmhithe fiáine san Laitvia agus sa Pholainn, agus an staid eipidéimeolaíoch reatha maidir le fiabhras Afracach na muc san Aontas a chur san áireamh, rinneadh criosú sna Ballstáit sin a athmheasúnú agus a nuashonrú. Ina theannta sin, na bearta bainistithe riosca a bhí i bhfeidhm, rinneadh iad a athmheasúnú agus a nuashonrú. Ba cheart na hathruithe sin a léiriú in Iarscríbhinn I a ghabhann le Rialachán Cur Chun Feidhme (AE) 2021/605.

(9)

Thairis sin, agus éifeachtacht na mbeart rialaithe galar maidir le fiabhras Afracach na muc a chur san áireamh i gcás muc-ainmhithe atá ar coimeád i gcriosanna srianta III a liostaítear in Iarscríbhinn I a ghabhann le Rialachán Cur Chun Feidhme (AE) 2021/605 atá á gcur i bhfeidhm sa Pholainn i gcomhréir le Rialachán Tarmligthe (AE) 2020/687 ón gCoimisiún, agus go háirithe na bearta sin a leagtar síos in Airteagail 22, 25 agus 40 de, agus i gcomhréir leis na bearta maolaithe riosca maidir le fiabhras Afracach na muc a leagtar amach i gCód OIE, criosanna áirithe i réigiún Warmińsko – Mazurskie sa Pholainn, a liostaítear faoi láthair mar chriosanna srianta III in Iarscríbhinn I a ghabhann le Rialachán Cur Chun Feidhme (AE) 2021/605, ba cheart iad a liostú mar chriosanna srianta II feasta san Iarscríbhinn sin, toisc nach raibh aon ráig d’fhiabhras Afracach na muc ann i muc-ainmhithe atá ar coimeád sna criosanna srianta III sin le 3 mhí anuas. Ba cheart na criosanna srianta III sin a liostú feasta mar chriosanna srianta II agus staid eipidéimeolaíoch fhiabhras Afracach na muc atá ann faoi láthair á cur san áireamh.

(10)

Ina theannta sin, agus éifeachtacht na mbeart rialaithe galar maidir le fiabhras Afracach na muc a chur san áireamh i gcás muc-ainmhithe atá ar coimeád agus muc-ainmhithe fiáine i gcriosanna srianta III a liostaítear in Iarscríbhinn I a ghabhann le Rialachán Cur Chun Feidhme (AE) 2021/605 atá á gcur i bhfeidhm sa Pholainn i gcomhréir le Rialachán Tarmligthe (AE) 2020/687 ón gCoimisiún, agus go háirithe na bearta sin a leagtar síos in Airteagail 22, 25 agus 40 de, agus i gcomhréir leis na bearta maolaithe riosca maidir le fiabhras Afracach na muc a leagtar amach i gCód OIE, criosanna áirithe i réigiúin Podkarpackie agus Małopolskie sa Pholainn, a liostaítear faoi láthair mar chriosanna srianta III in Iarscríbhinn I a ghabhann le Rialachán Cur Chun Feidhme (AE) 2021/605, ba cheart iad a liostú mar chriosanna srianta I feasta san Iarscríbhinn sin, toisc nach raibh aon ráig d’fhiabhras Afracach na muc ann i muc-ainmhithe atá ar coimeád le 3 mhí anuas ná i muc-ainmhithe fiáine le 12 mhí anuas sna criosanna srianta I sin. Ba cheart na criosanna srianta III sin a liostú feasta mar chriosanna srianta I agus staid eipidéimeolaíoch fhiabhras Afracach na muc atá ann faoi láthair á cur san áireamh.

(11)

Ar mhaithe leis na forbairtí is déanaí i staid eipidéimeolaíoch fhiabhras Afracach na muc san Aontas a chur san áireamh, agus ar mhaithe le dul i ngleic leis na rioscaí a bhaineann le leathadh an ghalair sin ar bhealach réamhghníomhach, ba cheart criosanna srianta nua de mhéid leordhóthanach a chríochú sa Laitvia agus sa Pholainn, agus ba cheart iad a liostú go cuí mar chriosanna srianta I agus II in Iarscríbhinn I a ghabhann le Rialachán Cur Chun Feidhme (AE) 2021/605. Ó tharla go bhfuil an staid maidir le fiabhras Afracach na muc an-dinimiciúil san Aontas, cuireadh na limistéar máguaird san áireamh nuair a bhí na criosanna srianta nua sin á gcríochú.

(12)

I bhfianaise phráinn na staide eipidéimeolaíche san Aontas maidir le leathadh fhiabhras Afracach na muc, tá sé tábhachtach, maidir leis na leasuithe atá le déanamh ag an Rialachán Cur Chun Feidhme seo ar Iarscríbhinn I a ghabhann le Rialachán Cur Chun Feidhme (AE) 2021/605, go dtiocfaidh siad i bhfeidhm a luaithe is féidir.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,