(1)

Maidir le roinnt de na K-fhachtóirí de réir bhrí Airteagal 4(1), pointe (26) de Rialachán (AE) 2019/2033, ní éilítear sonraíochtaí breise ina leith toisc go bhforbraítear go mion sa Rialachán sin na modhanna lena dtomhaistear iad. Is amhlaidh atá i gcás an K-fhachtóra “riosca an ghlansuímh” (K-NPR), a dhíorthaítear ó Rialachán (AE) Uimh. 575/2013 ó Pharlaimint na hEorpa agus ón gComhairle (2), chomh maith leis an K-fhachtóir “riosca comhchruinnithe” (K-CON) agus an K-fhachtóir “mainneachtain an chontrapháirtí trádála” (K-TCD), a úsáideann cur i bhfeidhm simplithe na gceanglas comhfhreagrach faoin Rialachán sin. I gcásanna eile, áfach, amhail “sócmhainní faoi bhainistiú” (AUM), “airgead cliaint atá ar seilbh” (CMH), “orduithe cliaint arna láimhseáil” (COH), “sócmhainní atá á gcoimirciú agus á riar” (ASA) agus “sreabhadh trádála laethúil” (DTF), bhainfeadh na modhanna chun na fachtóirí sin a thomhas tairbhe as tuilleadh soiléirithe.

(2)

Ba cheart do K-fhachtóirí gach gníomhaíocht a dhéanann gnólacht infheistíochta a ghabháil chun na rioscaí a léiriú go leordhóthanach. Ag cur san áireamh gur duine nádúrtha nó dlítheanach é gníomhaire faoi cheangal a ghníomhaíonn ach amháin thar ceann gnólachta infheistíochta áirithe agus faoi fhreagracht iomlán agus neamhchoinníollach an ghnólachta infheistíochta sin, is gá a áirithiú go n-áirítear aon ghníomhaíocht de chuid gníomhaire faoi cheangal in K-fhachtóirí AUM, ASA, CMH agus COH an ghnólachta infheistíochta.

(3)

Tá seirbhís infheistíochta na “comhairle infheistíochta” dá dtagraítear in Iarscríbhinn I, Roinn A, pointe 5 a ghabhann le Treoir 2014/65/AE ó Pharlaimint na hEorpa agus ón gComhairle (3) ar leithligh ón tseirbhís choimhdeach maidir le “comhairle le gnóthais maidir le struchtúr caipitil, straitéis thionsclaíoch agus ábhair ghaolmhara agus comhairle agus seirbhísí gaolmhara a bhaineann le cumaisc agus le ceannach gnóthas” dá dtagraítear in Iarscríbhinn I, Roinn B, pointe 3, a ghabhann leis an Treoir sin. I bhfianaise an méid sin agus ar bhonn an tsainmhínithe ar “comhairle infheistíochta de chineál leanúnach” atá in Airteagal 4(1), pointe 21, de Rialachán (AE) 2019/2033, i gcás nach n-áirítear an tseirbhís choimhdeach réamhluaite, is gá a shonrú gur cheart aon sócmhainn faoi bhainistíocht a bhaineann leis an tseirbhís choimhdeach sin a eisiamh chun críocha an K-AUM a ríomh.

(4)

D’fhonn tomhas comhsheasmhach AUM agus ASA a áirithiú agus K-AUM agus K-ASA á ríomh, ba cheart ionstraimí airgeadais a luacháil ag a luach cóir i gcomhréir le caighdeáin chuntasaíochta is infheidhme, ionas go mbeifear in ann margadhluach na n-ionstraimí airgeadais a léiriú, i gcás ina mbeidh fáil orthu.

(5)

Ós rud é go bhfuil an riosca do chliaint a bhaineann le bainistiú an airgid thirim curtha san áireamh cheana féin le calabrú na comhéifeachta maidir le CMH i dTábla 1 d’Airteagal 15 de Rialachán (AE) 2019/2033, níor cheart na méideanna a áirítear i dtomhas CMH a chur san áireamh i dtomhas an AUM. Thairis sin, chun aon chomhaireamh dúbailte a sheachaint agus riachtanais chaipitil á ríomh, níor cheart na méideanna a measadh cheana féin chun CMH a thomhas a chur san áireamh i dtomhas an ASA.

(6)

Leis an sainmhíniú ar CMH in Airteagal 4(1), pointe 28, de Rialachán (AE) 2019/2033 mar aon le haithris (24) den Rialachán sin, soiléirítear na méideanna atá le meas chun CMH a thomhas. Dá bhrí sin, is leor tuilleadh sonraithe a dhéanamh ar na gnéithe oibríochtúla atá fágtha den mhodh chun an CMH a thomhas d’fhonn stóinseacht fhigiúirí CMH a áirithiú, go háirithe trí róspleáchas ar thuairisciú seachtrach a sheachaint agus trí dhíriú ar thaifid chuntasaíochta inmheánacha an ghnólachta infheistíochta agus ar na figiúirí a úsáidtear le haghaidh an réitigh inmheánaigh.

(7)

Ba cheart go n-áireofaí ar na modhanna chun na méideanna atá le háireamh mar ghlacadh agus tarchur orduithe agus forghníomhú orduithe sa COH rialacha sonracha maidir leis an gcás nach bhfuil praghsanna margaidh ar fáil go héasca toisc nach bhfuil siad sna horduithe. Is gá na difríochtaí idir an cás maidir le forghníomhú orduithe agus an cás maidir le glacadh agus tarchur orduithe a léiriú, de réir mar a d’fhéadfadh difríochtaí a bheith ann i ngach cás idir praghsanna agus uainiú ag ar cheart na horduithe a thaifeadadh chun COH a thomhas. Thairis sin, i gcás orduithe a ghlacadh agus a tharchur, go háirithe, is tagairt níos fearr chun na críche sin iad na horduithe tarchurtha ná na horduithe a fuarthas, toisc go bhféadfadh nach dtarchuirfí na horduithe a fuarthas.

(8)

Ós rud é go bhfuil an tseirbhís infheistíochta um “ghlacadh agus tarchur orduithe maidir le hionstraim airgeadais amháin nó níos mó” dá dtagraítear in Iarscríbhinn I, Roinn A, pointe 1, a ghabhann le Treoir 2014/65/AE éagsúil le gníomhaíochtaí infheistíochta “Oibriú Saoráidí Trádála Iltaobhacha nó Eagraithe -MTFanna, OTFanna” dá dtagraítear i bpointí 8 agus 9 de, is gá a shoiléiriú nach n-áireofar leasanna ceannaigh agus díola a thugtar le chéile i MTFanna agus in OTFanna arna n-oibriú ag an ngnólacht infheistíochta chun na trádálacha K-COH in airgead tirim nó na díorthaigh KCO a ríomh.

(9)

Ós rud é go bhfuil na ceanglais chaipitil ar ghnólachtaí infheistíochta faoi Rialachán (AE) 2019/2033 bunaithe ar na K-fhachtóirí lena gcumhdaítear na seirbhísí agus na gníomhaíochtaí ar fad a áirítear in Iarscríbhinn I a ghabhann le Treoir 2014/65/AE, is gá rialacha a leagan síos maidir le hoiriúnú na modhanna sin sna cásanna sin ina bhféadfadh comhaireamh dúbailte a bheith ann murach sin. Is amhlaidh atá, go háirithe, i gcás seirbhísí coimhdeacha áirithe nach féidir a dhéanamh ach i gcomhar le seirbhísí agus gníomhaíochtaí a liostaítear in Iarscríbhinn I, Roinn A, a ghabhann leis an Treoir sin. Dá bhrí sin, orduithe a bhaineann leis an tseirbhís choimhdeach dá dtagraítear in Iarscríbhinn I, Roinn B, pointe 3, a ghabhann le Treoir 2014/65/AE (comhairle le gnóthais maidir le struchtúr caipitil, straitéis thionsclaíoch agus ábhair ghaolmhara agus comhairle agus seirbhísí gaolmhara a bhaineann le cumaisc agus le ceannach gnóthas), ar orduithe iad a bhaineann le comhairle faoi idirbhearta idir infheisteoirí, i gcás idirbhearta airgeadais chorparáidigh nó idirbhearta cothromais phríobháidigh, níor cheart iad a áireamh i dtomhas an AUM, ná i dtomhas COH, toisc go bhfuil siad san áireamh leis na K-fhachtóirí sin cheana féin.

(10)

Déantar foráil i Rialachán (AE) 2019/2033 maidir le dhá chomhéifeacht éagsúla chun COH a thomhas i dTábla 1 dá Airteagal 15, ceann amháin le haghaidh trádálacha in airgead tirim agus ceann ar leithligh le haghaidh díorthach. Ba cheart tuilleadh soiléirithe a chur ar fáil maidir le conas trádálacha a leithdháileadh idir an dá aicme ionstraime agus maidir leis an modh luachála a bheidh le húsáid i ngach cás. Go háirithe, ba cheart díorthaigh a áireamh i dtomhas K-fhachtóirí bunaithe ar an luach barúlach agus ar na trádálacha in airgead tirim ar an margadhluach toisc go ndéantar comhéifeachtaí na K-fhachtóirí a chalabrú ar an mbonn sin.

(11)

Is gá ríomh méid bharúlaigh díorthaigh a shonrú toisc nach bhfuil rialacha i Rialachán (AE) 2019/2033 maidir leis an gcaoi ar féidir é a ríomh. Ós rud é go leagtar síos in Airteagal 29(3) de Rialachán (AE) 2019/2033 rialacha maidir leis an gcaoi ar féidir méid barúlach díorthach a ríomh chun críocha TCD a ríomh, agus chun comhsheasmhacht a áirithiú i dtomhas an TCD agus an DTF, ba cheart go mbeadh feidhm ag na rialacha sin chun méid barúlach díorthaigh a thomhas freisin chun an DTF a thomhas.

(12)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Baincéireachta Eorpach (ÚBE).

(13)

Tá comhairliúcháin phoiblí oscailte déanta ag ÚBE maidir leis na dréachtchaighdeáin theicniúla rialála ar a bhfuil an Rialachán seo bunaithe; tá anailís déanta aige ar na costais agus ar na tairbhí a d’fhéadfadh a bheith ag baint leo ann agus d’iarr sé comhairle ón nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (4). Chuaigh ÚBE i gcomhairle freisin leis an Údarás Eorpach um Urrúis agus Margaí sular chuir sé isteach na dréachtchaighdeáin theicniúla ar a bhfuil an Rialachán seo bunaithe,

(1)

Déantar sainmhíniú ar chuntais leithscartha i bpointe (49) d’Airteagal 4(1) de Rialachán (AE) 2019/2033 chun críocha Thábla 1 in Airteagal 15(2) den Rialachán sin. Chun a chur ar chumas gnólachtaí infheistíochta comhéifeachtaí níos ísle a chur i bhfeidhm chun an ceanglas cistí dílse a ríomh “airgead cliant ar seilbh”, i gcás ina bhfuil airgead cliant ar seilbh i gcuntais leithscartha, ba cheart a shonrú i dtaobh choincheap na gcuntas leithscartha go nglactar leis na coinníollacha lena n-áirithítear cosaint ar airgead cliant i gcás chliseadh gnólachta infheistíochta. Ós rud é go leagtar amach na coinníollacha sin in Airteagal 2(1) de Threoir Tharmligthe (AE) 2017/593 ón gCoimisiún (2), is iomchuí tagairt a dhéanamh do na coinníollacha céanna chun coincheap na gcuntas leithscartha a shonrú faoin Rialachán seo. Dá bhrí sin, ba cheart a bhunú leis an Rialachán seo sraith ceanglas atá cosúil leo siúd a leagtar síos in Airteagal 2(1) de Threoir Tharmligthe (AE) 2017/593.

(2)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Baincéireachta Eorpach faoi bhráid an Choimisiúin.

(3)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo ann agus d'iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (3),

(1)

Bunaítear le Rialachán (AE) Uimh. 236/2012 an oibleagáid fógra a thabhairt d’údaráis inniúla maidir le glansuíomhanna gearra suntasacha i ndáil le scairchaipiteal eisithe cuideachta is cuideachta a bhfuil scaireanna aici a ligtear isteach chun a dtrádála ar ionad trádála san Aontas, i gcás ina sroicheann an suíomh an tairseach fógartha ábhartha nó ina dtiteann sé faoi bhun na tairsí sin. Is gá don Choimisiún faireachán a dhéanamh cé acu atá tairseach fógartha den sórt sin fós iomchuí i bhfianaise forbairtí i margaí airgeadais nó nach bhfuil, agus measúnú a dhéanamh cé acu is gá an tairseach sin a mhodhnú i gcomhréir le hAirteagal 5(4) den Rialachán sin nó nach gá.

(2)

Go luath in 2020, d’eascair brú substaintiúil díola agus luaineacht neamhghnách as ráig dhomhanda COVID-19, arbh é a bhí mar thoradh orthu bíseanna móra praghsanna anuas a rinne difear d’eisitheoirí i ngach earnáil ar fud na margaí airgeadais. Bhain an tÚdarás Eorpach um Urrúis agus Margaí (ESMA) úsáid as a chumhachtaí idirghabhála in imthosca eisceachtúla chun an tairseach ábhartha fógartha i leith glansuíomhanna gearra suntasacha i scaireanna a ísliú go sealadach, chun feabhas a chur ar ghníomhaíochtaí faireacháin ESMA agus rialtóirí araon ar shuíomhanna den sórt sin, a chinneadh cé acu a d’fhéadfadh gníomhartha níos déine a bheith iomchuí nó nach bhféadfadh agus a bheith in ann freagairt go tapa.

(3)

Maidir leis an tairseach fógartha ábhartha níos ísle i leith glansuíomhanna gearra suntasacha i scaireanna, ar tairseach í atá i bhfeidhm le 12 mhí as a chéile, de bhrí nach bhféadfaí síneadh a chur a thuilleadh leis an tairseach sin mar bheart éigeandála, mar gheall ar dhálaí margaidh a bhfuil feabhas páirteach tagtha orthu, is iomchuí measúnú a dhéanamh ar an tionchar atá ag beart den sórt sin agus cinneadh a dhéanamh ar cheart beart buan a dhéanamh de tríd an tairseach sin a chur in ionad na tairsí atá ann cheana. Maidir leis sin, cuireann an Coimisiún san áireamh an tuairim (2) a d’eisigh ESMA an 13 Bealtaine 2021.

(4)

Cuireadh béim leis na forbairtí a rinneadh le déanaí i margaí airgeadais a bhreathnaigh an Coimisiún, mar shampla an éagobhsaíocht a d’eascair as ráig dhomhanda COVID-19, a d’fhág gur minice a théann rialtóirí agus ESMA in iontaoibh bearta éigeandála ar dhíol folamh, chomh maith leis an riosca méadaitheach go mbeadh infheisteoirí miondíola páirteach i gcúngach gearr, ar an tábhacht a bhaineann le faisnéis bhreise a bhailiú ar ghlansuíomhanna gearra suntasacha i scaireanna ar bhonn buan, rud atá criticiúil chun críoch faireachais margaidh. Maidir leis sin, measúnaíodh i dtuairim ESMA gur chuir an tairseach fógartha ábhartha níos ísle feabhas mór ar an trédhearcacht agus ar an bhfaireachán ar ghlansuíomhanna gearra suntasacha i scaireanna ar leibhéal aonair, ar leibhéal earnála agus ar fud an mhargaidh, agus gur tháinig méadú ar an éifeachtúlacht rialála dá bharr sin. Mheas ESMA freisin gur cheart costais imeallacha chur chun feidhme ag rannpháirtithe sa mhargadh a bheith diomaibhseach, de bhrí go bhfuil tairseach den sórt sin á cur i bhfeidhm acu le roinnt míonna. Thairis sin, measann an Coimisiún gur cheart éiginnteacht i leith na hoibleagáide tuairiscithe rialála a sheachaint agus gur cheart rialacha agus oibleagáidí ina leith sin a bheith cobhsaí. Ar an mbonn sin, agus moltaí a leagtar amach i dtuairim ESMA á gcur san áireamh, ar moltaí iad a n-aontaíonn an Coimisiún leo, is iomchuí an tairseach fógartha ábhartha atá ann cheana a leasú agus é a shocrú go buan ag 0,1 %.

(5)

Ba cheart, dá bhrí sin, Rialachán (AE) Uimh. 236/2012 a leasú dá réir sin,

(1)

Is galar víreasach tógálach é fiabhras Afracach na muc a bhíonn ar mhuc-ainmhithe atá ar coimeád agus ar mhuc-ainmhithe fiáine agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

I gcás ráige d’fhiabhras Afracach na muc i measc muc-ainmhithe fiáine, tá riosca tromchúiseach ann go bhféadfadh an galar sin leathadh chuig muc-ainmhithe fiáine eile agus chuig bunaíochtaí muc-ainmhithe atá ar coimeád.

(3)

Le Rialachán Tarmligthe (AE) 2020/687 (2) ón gCoimisiún forlíontar na rialacha i dtaca le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair i gcatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil in Airteagail 63 go 66 de Rialachán Tarmligthe (AE) 2020/687 maidir le bearta áirithe atá le glacadh i gcás dearbhú oifigiúil ar ráig galair i gcatagóir A i measc ainmhithe fiáine, lena n-áirítear fiabhras Afracach na muc i measc muc-ainmhithe fiáine. Leis na forálacha sin déantar foráil, go háirithe, maidir le crios ionfhabhtaithe a bhunú, maille le toirmisc ar ghluaiseachtaí ainmhithe fiáine de speicis liostaithe agus táirgí de bhunadh ainmhíoch díobh.

(4)

Leagtar síos le Rialachán Cur Chun Feidhme (AE) 2021/605 ón gCoimisiún (4) bearta speisialta rialaithe galar maidir le fiabhras Afracach na muc. Go háirithe, i gcás ráige den ghalar sin i measc muc-ainmhithe fiáine i limistéar de Bhallstát, déantar foráil le hAirteagal 3, pointe (b), den Rialachán Cur Chun Feidhme sin maidir le crios ionfhabhtaithe a bhunú i gcomhréir le hAirteagal 63 de Rialachán Tarmligthe (AE) 2020/687. Ina theannta sin, déantar foráil in Airteagal 6 den Rialachán Cur Chun Feidhme sin go bhfuil an limistéar sin le liostú mar chrios srianta II i gCuid II d’Iarscríbhinn I a ghabhann leis agus go bhfuil an limistéar ionfhabhtaithe, a bhunaítear i gcomhréir le hAirteagal 63 de Rialachán Tarmligthe (AE) 2020/687, le coigeartú gan mhoill chun go gcuimseofar, ar a laghad, an crios srianta II. Maidir leis na bearta rialaithe speisialta a bhaineann le fiabhras Afracach na muc a leagtar síos i Rialachán Cur Chun Feidhme (AE) 2021/605, áirítear leo, inter alia, toirmisc ar ghluaiseachtaí coinsíneachtaí de mhuc-ainmhithe a choimeádtar i gcriosanna srianta II agus táirgí ó na hainmhithe sin lasmuigh de na criosanna srianta sin.

(5)

Chuir an Iodáil an Coimisiún ar an eolas faoi stad fhiabhras Afracach na muc ina críoch faoi láthair, tar éis ráig den ghalar sin i measc muc-ainmhithe fiáine i réigiún Piedmont a deimhníodh an 6 Eanáir 2022. Dá réir sin, ceanglaítear ar údarás inniúil an Bhallstáit sin crios ionfhabhtaithe a bhunú i gcomhréir le Rialachán Tarmligthe (AE) 2020/687 agus Rialachán Cur Chun Feidhme (AE) 2021/605.

(6)

Chun suaithí neamhriachtanacha ar thrádáil laistigh den Aontas agus bacainní ar thrádáil ag tríú tíortha nach bhfuil údar leo a sheachaint, is gá an crios ionfhabhtaithe i dtaca le fiabhras Afracach na muc san Iodáil a shainaithint ar leibhéal an Aontais i gcomhar leis an mBallstát sin.

(7)

Chun leathadh fhiabhras Afracach na muc a chosc, go dtí go liostófar an limistéar san Iodáil atá buailte ag an ráig seo a tharla le déanaí mar chrios srianta II i gCuid II d’Iarscríbhinn I a ghabhann le Rialachán Cur Chun Feidhme (AE) 2021/605, maidir leis na bearta rialaithe speisialta a bhaineann le fiabhras Afracach na muc a leagtar síos ann, a bhfuil feidhm acu maidir le gluaiseachtaí coinsíneachtaí de mhuc-ainmhithe a choimeádtar i gcriosanna srianta II agus táirgí de na hainmhithe sin lasmuigh de na criosanna sin, ba cheart feidhm a bheith acu maidir le gluaiseachtaí na gcoinsíneachtaí sin ón gcrios ionfhabhtaithe arna bhunú ag an Iodáil tar éis na ráige sin a tharla le déanaí, chomh maith leis na bearta sin a leagtar síos in Airteagail 63 go 66 de Rialachán Tarmligthe (AE) 2020/687.

(8)

Dá réir sin, ba cheart an crios ionfhabhtaithe sin a liostú san Iarscríbhinn a ghabhann leis an gCinneadh seo agus ba cheart é a bheith faoi réir na bearta rialaithe speisialta a bhaineann le fiabhras Afracach na muc a bhfuil feidhm acu maidir le criosanna srianta II a leagtar síos i Rialachán Cur Chun Feidhme (AE) 2021/605. Mar gheall ar an staid eipidéimeolaíoch nua seo a bhaineann le fiabhras Afracach na muc, áfach, agus an riosca láithreach méadaithe atá ann go leathfar an galar á chur san áireamh , níor cheart gluaiseachtaí coinsíneachtaí de mhuc-ainmhithe a choimeádtar agus de tháirgí de na hainmhithe sin ón gcrios ionfhabhtaithe chuig Ballstáit eile agus chuig tríú tíortha a údarú i gcomhréir leis an Rialachán Cur Chun Feidhme sin. Ba cheart fad an chriosúcháin sin a leagan síos sa Chinneadh seo freisin.

(9)

Dá bhrí sin, chun na rioscaí a eascróidh as an ráig d’fhiabhras Afracach na muc a tharla le déanaí i measc muc-ainmhithe fiáine san Iodáil a mhaolú, níor cheart don Iodáil gluaiseachtaí coinsíneachtaí de mhuc-ainmhithe a choimeádtar sa chrios ionfhabhtaithe agus de tháirgí de na hainmhithe sin chuig Ballstáit eile agus chuig tríú tíortha a údarú go dtí dáta dhul in éag an Chinnidh seo.

(10)

I bhfianaise phráinn na staide eipidéimeolaíche san Aontas a mhéid a bhaineann le leathadh fhiabhras Afracach na muc, tá sé tábhachtach go mbeadh feidhm ag na bearta a leagtar síos sa Chinneadh Cur Chun Feidhme seo a luaithe is féidir.

(11)

Dá réir sin, go dtí go bhfaighfear tuairim ón mBuanchoiste um Plandaí, Ainmhithe, Bia agus Beatha, ba cheart an crios ionfhabhtaithe san Iodáil a bhunú láithreach agus a liostú san Iarscríbhinn a ghabhann leis an gCinneadh seo, mar aon le fad an chriosúcháin sin a shocrú.

(12)

Tá an Cinneadh seo le hathbhreithniú ag an gcéad chruinniú eile den Bhuanchoiste um Plandaí, Ainmhithe, Bia agus Beatha,