(1)

Leagtar amach in Airteagal 36(1) de Rialachán (AE) 2018/848 ceanglais áirithe i ndáil le grúpaí oibreoirí. Ar mhaithe le léirmhíniú comhchuibhithe ar ghaireacht gheografach na mball de ghrúpa oibreoirí, ba cheart a lua go sainráite nach mór do na baill a gcuid gníomhaíochtaí a dhéanamh sa tír chéanna.

(2)

Chun íoscheanglais a bhunú maidir le cur ar bun agus feidhmiú an chórais um rialuithe inmheánacha (CRI), ba cheart na gnéithe seo a leanas a shainiú: clárú ball, cigireachtaí inmheánacha, formheas ball nua nó aonad táirgthe nua nó gníomhaíochtaí ball atá ann cheana, oiliúint cigirí CRI, bearta le déanamh i gcásanna neamhchomhlíontachta agus inrianaitheacht inmheánach.

(3)

Sa chomhthéacs sin, ba cheart an ceanglas a chur leis an méid sin maidir le bainisteoir ar CRI agus cigire CRI amháin nó níos mó a cheapadh chun a áirithiú go gcuirfidh an pearsanra inniúil an córas um rialuithe inmheánacha chun feidhme mar is cuí.

(4)

Ina theannta sin, chun foráil a dhéanamh do chreat um measúnú comhchuibhithe le haghaidh CRI, is iomchuí liosta cásanna a mheastar atá easnamhach a chur san áireamh.

(5)

Dá bhrí sin, ba cheart Rialachán (AE) 2018/848 a leasú dá réir.

(6)

Ar mhaithe le soiléireacht agus deimhneacht dhlíthiúil, ba cheart feidhm a bheith ag an Rialachán seo ó dháta chur i bhfeidhm Rialachán (AE) 2018/848,

(1)

Le Rialachán Tarmligthe (AE) 2020/427 ón gCoimisiún (2) leasaíodh le déanaí pointe 1.3 de Chuid I d’Iarscríbhinn II a ghabhann le Rialachán (AE) 2018/848 maidir le síolta péactha orgánacha chun a dtáirgeadh ó shíolta orgánacha a áirithiú. Ós rud é go n-áirítear bachlóga, buinneáin agus biolar ar shíolta péactha (3), ar féidir leo na cúltaiscí sna síolta a úsáid go heisiach le go bpéacfaidís, níor cheart ach uisce a úsáid le haghaidh táirgeadh orgánach. Dá bhrí sin, ní mór a shoiléiriú go bhfuil an maolú ar shaothrú a bhaineann le hithir i gcás síolta péactha teoranta do thaisiú síolta agus ba cheart a dhearbhú go sainráite nach bhfuil cead damhna fáis a úsáid, ach amháin go gceadaítear damhna támh a úsáid chun na síolta a choinneáil tais i gcás ina bhfuil comhábhair an damhna tháimh sin údaraithe i gcomhréir le hAirteagal 24 de Rialachán (AE) 2018/848.

(2)

Maidir le cinn siocaire, is féidir dhá chéim a bheith ina dtimthriall táirgthe sonrach, ceann amháin in ithir agus ceann eile ar a dtugtar “céim fórsála”, ar féidir leis a bheith in ithir, ach ar féidir leis a bheith in uisce nó i substráití freisin. Dá bhrí sin, ní mór a shoiléiriú go n-áirítear tumadh in uisce glan ar an maolú ar shaothrú a bhaineann le hithir i gcás cinn siocaire agus nach gceadaítear damhna támh a úsáid ach amháin i gcás ina bhfuil a chomhábhair údaraithe i gcomhréir le hAirteagal 24 de Rialachán (AE) 2018/848.

(3)

Le hAirteagal 25l(3)(b) de Rialachán (CE) Uimh. 889/2008 ón gCoimisiún (4), ceadaíodh colaistéaról orgánach a úsáid chun beatha nádúrtha a fhorlíonadh le linn na céime ramhraithe agus céimeanna níos luaithe i saol séaclaí peinéideacha agus cloicheáin fionnuisce (Macrobrachium spp.). Is gá, dá bhrí sin, foráil a dhéanamh maidir le beatha a fhorlíonadh le colaistéaról orgánach le haghaidh na séaclaí agus na gcloicheán sin i bpointe 3.1.3.4 de Chuid III d’Iarscríbhinn II a ghabhann le Rialachán (AE) 2018/848.

(4)

In 2019, agus an dréacht de Rialachán Tarmligthe (AE) 2020/427 á phlé, d’iarr roinnt Ballstát go ndéanfaí athbhreithniú ar rialacha eile a bhaineann le dobharshaothrú orgánach. Is é an sainghrúpa um chomhairle theicniúil maidir le táirgeacht orgánach (EGTOP), a bunaíodh le Cinneadh 2017/C 287/03 ón gCoimisiún (5), a rinne measúnú ar na hiarrataí sin. Agus conclúidí EGTOP a foilsíodh (6)i mí Eanáir 2020 á gcur san áireamh, shainaithin an Coimisiún gur gá na rialacha táirgthe atá ann faoi láthair maidir le hainmhithe dobharshaothraithe a thabhairt cothrom le dáta, go háirithe maidir le cóireálacha tréidliachta.

(5)

D’ainneoin na gceanglas a bhaineann le galair a chosc, cosúil leis an moladh maidir le rialú bitheolaíoch seadán lena dtugtar tús áite d’úsáid éisc níos glaine agus d’úsáid fionnuisce, uisce mara agus tuaslagán clóiríde sóidiam, ceadaítear líon teoranta cóireálacha faoi láthair, i gcás ina mbíonn dianfhadhb le seadáin, ar bhonn ginearálta le haghaidh gach speiceas. Bunaithe ar chonclúidí thuasluaite EGTOP, is iomchuí leasú a dhéanamh ar na forálacha atá ann faoi láthair maidir le cóireálacha seadán agus a leagtar amach i bpointe 3.1.4.2. de Chuid III d’Iarscríbhinn II a ghabhann le Rialachán (AE) 2018/848, trí chur chuige atá níos sainiúla ó thaobh speicis de a thabhairt isteach chun gur fearr a thabharfar aghaidh ar riachtanais ainmhithe dobharshaothraithe gan cineál orgánach an táirgthe a chur i mbaol.

(6)

Go háirithe, i bhfianaise fhad athraitheach thimthriall táirgthe na speiceas, seachas an bradán, agus i bhfianaise na féidearthachta seadáin a bheith ann sa tréimhse óg, chomh maith leis an gclaonadh atá ag oibreoirí aon chóireáil a chur ar athlá a mhéid is féidir de bharr na teorann minicíochta, tuairiscíodh ráta ard mortlaíochta i measc gealóg agus iasc óg sa chéad bhliain den tsaolré. Dá bhrí sin, maidir le speicis eile seachas bradán, is iomchuí minicíocht agus líon uasta na gcóireálacha seadán a ailíniú leis na teorainneacha minicíochta a leagtar síos le haghaidh táirgí eile míochaine tréidliachta allapatacha atá sintéisithe go ceimiceach chun idirghníomhú a cheadú nuair a bhíonn géarghá leis agus chun ráta ard mortlaíochta a sheachaint sna chéad chéimeanna den tsaolré.

(7)

A mhéid a bhaineann le bradán, agus fad an timthrialla táirgthe agus an gá lena áirithiú nach mbeidh míolta mara ann laistigh den tréimhse i bhfíoruisce á gcur san áireamh, ba cheart na teorainneacha minicíochta atá ann faoi láthair agus líon uasta na gcúrsaí le haghaidh cóireálacha seadán a choinneáil ar bun.

(8)

Thairis sin, tá sé tábhachtach na forálacha atá ann faoi láthair a shoiléiriú, trí theorainn fhoriomlán shoiléir a leagan síos maidir le líon uasta na gcóireálacha seadán is féidir a riar, beag beann ar an speiceas lena mbaineann.

(9)

Ba cheart, dá bhrí sin, Iarscríbhinn II a ghabhann le Rialachán (AE) 2018/848 a leasú dá réir.

(10)

Ar mhaithe le soiléireacht agus deimhneacht dhlíthiúil, ba cheart feidhm a bheith ag an Rialachán seo ó dháta chur i bhfeidhm Rialachán (AE) 2018/848,

(1)

I gcomhréir le hAirteagal 17(5) de Rialachán (CE) Uimh. 110/2008 ó Pharlaimint na hEorpa agus ón gComhairle (2), tá scrúdú déanta ag an gCoimisiún ar iarratas na hUngáire an 14 Deireadh Fómhair 2016 maidir le clárú an táisc gheografaigh “Nagykunsági szilvapálinka”.

(2)

Rialachán (AE) 2019/787 a thagann in ionad Rialachán (CE) Uimh. 110/2008, tháinig sé i bhfeidhm an 25 Bealtaine 2019. I gcomhréir le hAirteagal 49(1) den Rialachán sin, déantar Caibidil III de Rialachán (CE) Uimh. 110/2008, maidir le tásca geografacha, a aisghairm le héifeacht ón 8 Meitheamh 2019.

(3)

Ar chinneadh don Choimisiún go bhfuil an t-iarratas i gcomhréir le Rialachán (CE) Uimh. 110/2008, d’fhoilsigh sé príomhshonraíochtaí an chomhaid theicniúil in Iris Oifigiúil an Aontais Eorpaigh (3) faoi mar a fhoráiltear le hAirteagal 17(6) den Rialachán sin, i gcomhréir leis an gcéad fhomhír d’Airteagal 50(4) de Rialachán (AE) 2019/787.

(4)

I gcomhréir le hAirteagal 27(1) de Rialachán (AE) 2019/787, níor tugadh aon fhógra freasúra don Choimisiún.

(5)

Dá bhrí sin, ba cheart an tásc “Nagykunsági szilvapálinka” a chlárú mar thásc geografach,

(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun an t-údarú sin a dheonú.

(2)

Chuir Taminco BVBA iarratas isteach i gcomhréir le hAirteagal 13(3) de Rialachán (CE) Uimh. 1831/2003 lenar moladh ainm shealbhóir an údaraithe a athrú a mhéid a bhaineann le Rialachán Cur Chun Feidhme (AE) Uimh. 371/2011 ón gCoimisiún (2). Mhaígh an t-iarratasóir gur athchóirigh an Bheilg a Cód Cuideachtaí agus Comhlachas (“Wetboek van Vennootschappen en Verenigingen”), rud a thug athrú isteach le haghaidh gach eintiteas Beilgeach. Mar chuid den reachtaíocht athraithe, athraíodh an cineál cuideachta “belsoten vennootschap met beperkte aansprakelijkheid” (“BVBA”), ar ina cháil sin atá Taminco i mbun a ghnó, go dtí an cineál cuideachta “besloten vennootschap” (“BV”). Tá an chuideachta fós ina cuideachta phríobháideach faoi dhliteanas teoranta de réir dhlíthe na Beilge. Ciallaíonn sin go mbeidh Taminco ag trádáil mar “Taminco BV” amhail ón 1 Eanáir 2021. Bhí na sonraí tacaíochta ábhartha ag gabháil leis an iarratas.

(3)

Is athrú glan riaracháin é an t-athrú sin atá beartaithe i dtéarmaí an údaraithe agus ní dhéanfar measúnú nua ar an mbreiseán lena mbaineann. Cuireadh an tÚdarás Eorpach um Shábháilteacht Bia ar an eolas faoin iarratas.

(4)

Is gá téarmaí an údaraithe a athrú chun gur féidir leis an iarratasóir a chearta margaíochta a shaothrú faoin ainm Taminco BV.

(5)

Ba cheart, dá bhrí sin, Rialachán Cur Chun Feidhme (AE) Uimh. 371/2011 a leasú dá réir.

(6)

Ós rud é nach gá an leasú a rinneadh leis an Rialachán seo ar Rialachán Cur Chun Feidhme (AE) Uimh. 371/2011 a chur i bhfeidhm láithreach mar gheall ar chúiseanna sábháilteachta, is iomchuí foráil a dhéanamh maidir le hidirthréimhse ina bhféadfar stoic atá ann cheana a úsáid.

(7)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Le Rialachán (CE) Uimh. 1831/2003 déantar foráil maidir le húdarú breiseán atá le húsáid i gcothú ainmhithe agus maidir leis na forais agus na nósanna imeachta i ndáil leis an údarú sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas go n-údarófaí L-vailín. Bhí na sonraí agus na doiciméid a cheanglaítear faoi Airteagal 7(3) den Rialachán sin ag gabháil leis an iarratas.

(3)

Baineann an t-iarratas le húdarú L-vailín arna tháirgeadh ag Corynebacterium glutamicum CGMCC 7.358 mar bhreiseán beathaithe le haghaidh gach speicis ainmhíoch, ar breiseán é atá le haicmiú sa chatagóir breiseán dar teideal “breiseáin chothaitheacha” agus san fheidhmghrúpa dar teideal “aimíonaigéid, a gcuid salann agus analóga”.

(4)

I dtuairim an 30 Meán Fómhair 2020 (2) ón Údarás Eorpach um Shábháilteacht Bia (“an tÚdarás”), is é an chonclúid ar ar thángthas nach bhfuil éifeacht dhíobhálach ag L-vailín arna tháirgeadh ag Corynebacterium glutamicum CGMCC 7.358, nach bhfuil éifeacht dhíobhálach aige ar shláinte ainmhithe, ar shláinte tomhaltóirí ná ar an gcomhshaol faoi na coinníollacha úsáide atá beartaithe agus aistí bia á bhforlíonadh le méideanna iomchuí de. Maidir le sábháilteacht úsáideora L-vailín arna tháirgeadh ag Corynebacterium glutamicum CGMCC 7.358, ní fhéadfadh an tÚdarás a chur as an áireamh go mbaineann riosca leis an tsubstaint a ionanálú, gur greamaitheoir craicinn nó súl í, ná gur íogróir deirmeach í. Dá bhrí sin, ba cheart bearta cosanta iomchuí a ghlacadh i gcás an bhreiseáin sin chun éifeachtaí díobhálacha ar shláinte an duine a chosc, go háirithe maidir le húsáideoirí an bhreiseáin. Ina theannta sin, tháinig an tÚdarás ar an gconclúid go meastar gur foinse éifeachtúil L-vailín (ar aimíonaigéad riachtanach é) í an tsubstaint le haghaidh cothú ainmhithe, agus gur cheart í a chosaint ar dhíghrádú sa chogansach chun go mbeidh sé éifeachtúil i gcás na n-athchogantach. Ní mheasann an tÚdarás go bhfuil gá le ceanglais shonracha maidir le faireachán iarmhargaidh. Chomh maith leis sin, na tuarascálacha faoin modh anailíse i leith an bhreiseáin beathaithe agus é i mbeathú, tuarascálacha arna gcur isteach ag an tSaotharlann Tagartha a bunaíodh le Rialachán (CE) Uimh. 1831/2003, rinne an tÚdarás na tuarascálacha sin a fhíorú.

(5)

Leis an measúnú ar L-vailín arna tháirgeadh ag Corynebacterium glutamicum CGMCC 7.358, léirítear go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substainte sin a údarú mar a shonraítear san Iarscríbhinn a ghabhann leis an Rialachán seo.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,