(1)

Leis an Iarscríbhinn a ghabhann le Rialachán (AE) Uimh. 609/2013 leagtar síos liosta de chuid an Aontais de shubstaintí a fhéadfar a chur le ceann amháin nó níos mó de na catagóirí bia dtagraítear in Airteagal 1(1) den Rialachán sin.

(2)

San Iarscríbhinn a ghabhann le Rialachán (AE) Uimh. 609/2013 údaraítear faoi láthair gur féidir L-meitiolfóláit chailciam a chur mar fhoinse fóláite le bia chun críoch speisialta míochaine agus mar ionadach ar an aiste bia iomlán chun meáchan a rialú.

(3)

Tar éis iarratas a dhéanamh ina n-iarrtar go n-údarófar freisin L-meitiolfóláit chailciam a úsáid mar fhoinse fóláite i mbainne foirmle do naíonáin, i mbainne foirmle leantach, i mbia gránachbhunaithe próiseáilte agus i mbia do naíonáin, ar na leibhéil is gá chun na ceanglais maidir le comhdhéanamh fóláite a chomhlíonadh, ar ceanglais iad a leagtar amach i reachtaíocht an Aontais maidir leis na hearraí bia sin, d’iarr an Coimisiún ar an Údarás Eorpach um Shábháilteacht Bia (“an tÚdarás”) tuairim a thabhairt maidir le sábháilteacht agus bith-infhaighteacht na substainte sin nuair a chuirtear leis na hearraí bia lena mbaineann í. Sa tuairim uaidh an 27 Samhain 2019 (2), tháinig an tÚdarás ar an gconclúid gur foinse í L-meitiolfóláit chailciam óna bhfuil fóláit ar fáil go bitheolaíoch agus go bhfuil sí sábháilte faoi na húsáidí atá beartaithe agus faoi na leibhéil úsáide atá beartaithe maidir leis an spriocdhaonra, is é sin naíonáin (<12 mhí) agus leanaí óga (12-<36 mhí).

(4)

Measann an Coimisiún go dtugann tuairim an Údaráis forais leordhóthanacha lena shuí nach ábhar imní í L-meitiolfóláit chailciam mar fhoinse fóláite nuair a úsáidtear í i mbainne foirmle do naíonáin, i mbainne foirmle leantach, i mbia gránachbhunaithe próiseáilte agus i mbia do naíonáin ar na leibhéil is gá. Dá bhrí sin, ba cheart L-meitiolfóláit chailciam a chur san áireamh sa liosta a leagtar amach san Iarscríbhinn a ghabhann le Rialachán (AE) Uimh. 609/2013 mar fhoinse fóláite sna catagóirí bia sin.

(5)

Ba cheart, dá bhrí sin, Rialachán (AE) Uimh. 609/2013 a leasú dá réir sin.

(1)

Le Rialachán Tarmligthe (AE) 2016/127 (2) ón gCoimisiún, leagtar síos, ceanglais shonracha comhdhéanaimh le haghaidh bainne foirmle do naíonáin agus bainne foirmle leantach a mhonaraítear as hidrealasáit próitéine. Foráiltear le Rialachán Tarmligthe (AE) 2016/127 go mbeidh feidhm ag a fhorálacha maidir le bainne foirmle do naíonáin agus bainne foirmle leantach a mhonaraítear as hidrealasáití próitéine ón 22 Feabhra 2021.

(2)

Ceadaíodh hidrealasáití próitéine a úsáid i mbainne foirmle do naíonáin agus bainne foirmle leantach faoi Threoir 2006/141/CE (3). Sa tuairim ón Údarás Eorpach um Shábháilteacht Bia (“Údarás”) maidir le comhdhéanamh fíor-riachtanach bainne foirmle do naíonáin agus bainne foirmle leantach, mar sin féin, (4), thug an tÚdarás dá aire nach mór sábháilteacht agus oiriúnacht gach foirmle shonrach ina bhfuil hidrealasáití próitéine a bhunú trí bhíthin meastóireacht chliniciúil.

(3)

Ní bhfuair ach foirmle amháin atá ar an margadh faoi láthair measúnú dearfach ón Údarás go dtí seo. Comhfhreagraíonn a chomhdhéanamh do na ceanglais dá bhforáiltear i Rialachán Tarmligthe (AE) 2016/127.

(4)

Tá measúnú á dhéanamh ag an Údarás faoi láthair ar shábháilteacht agus oiriúnacht roinnt comhdhéanamh eile, a chomhfhreagraíonn d’fhoirmlí atá curtha ar an margadh go dlíthiúil i gcomhréir le Treoir 2006/141/CE.

(5)

Féadfar na ceanglais dá bhforáiltear i Rialachán Tarmligthe (AE) 2016/127 a nuashonrú le go bhféadfar foirmle a mhonaraítear as hidrealasáití próitéine a bhfuil comhdhéanamh ag baint leis atá éagsúil leis an gcomhdhéanamh a ndearnadh measúnú dearfach air a chur ar an margadh, tar éis don Údarás meastóireacht cás ar chás a dhéanamh ar a sábháilteacht agus a n-oiriúnacht

(6)

De dheasca phaindéim COVID-19 agus an ghéarchéim sláinte a bhaineann léi, mar sin féin, bhí moill ar mheasúnuithe eolaíocha a dhéanamh ar an bhfoirmle a bhfuil meastóireacht á déanamh uirthi ag an Údarás faoi láthair.

(7)

Chun míshocrachtaí a d’fhéadfadh a bheith ann sa mhargadh a sheachaint, is gá cur i bhfeidhm na gceanglas maidir le bainne foirmle do naíonáin agus bainne foirmle leantach a mhonaraítear as hidrealasáití próitéine a chur siar ar feadh tréimhse ama a mheastar a bheith iomchuí chun éifeachtaí phaindéim COVID-19 ar an meastóireacht a rinne an tÚdarás a chúiteamh.

(8)

I bhfianaise an ghá le míshocrachtaí sa mhargadh a sheachaint, ba cheart don Rialachán seo teacht i bhfeidhm mar ábhar práinne lá a fhoilsithe in Iris Oifigiúil an Aontais Eorpaigh.

(9)

Ba cheart, dá bhrí sin, Rialachán Tarmligthe (AE) 2016/127 ón gCoimisiún a leasú dá réir sin.

(1)

Le Rialachán Tarmligthe (AE) 2019/625 ón gCoimisiún (2), leagtar síos na ceanglais maidir le coinsíneachtaí, inter alia, seilidí ullmhaithe a theacht isteach san Aontas.

(2)

De réir Airteagal 1(2)(a)(i) agus (iii) de Rialachán Tarmligthe (AE) 2019/625, ní mór tríú tíortha atá ag onnmhairiú coinsíneachtaí seilidí ullmhaithe chuig an Aontas a liostú, agus ní mór deimhniú oifigiúil a bheith ag gabháil le gach coinsíneacht seilidí ullmhaithe. Ba cheart feidhm a bheith ag ceanglais chomhchosúla freisin maidir le seilidí beo atá ceaptha lena gcaitheamh ag an duine.

(3)

Chun na seilidí atá faoi réir ceanglais maidir le teacht isteach san Aontas a shainaithint go soiléir, ba cheart sainmhíniú ar sheilidí a thabhairt isteach i Rialachán Tarmligthe (AE) 2019/625.

(4)

Níor cheart feidhm a bheith ag Rialachán Tarmligthe (AE) 2019/625 maidir le samplaí d’earraí atá ceaptha lena gcaitheamh ag an duine, a n-allmhairítear chun críche anailíse ar tháirgí agus tástála cáilíochta gan iad a bheith curtha ar an margadh agus, dá bhrí sin, nach riosca iad don tsláinte phoiblí. Ba cheart Airteagal 1(3) a leasú dá réir. Foráiltear le hAirteagal 12 de Rialachán Tarmligthe (AE) 2019/625 maidir le ceanglais allmhairiúcháin i gcás coinsíneachtaí táirgí ilchodacha dá dtagraítear le cóid Chórais Chomhchuibhithe (“Cóid CC”) faoi cheannteidil áirithe de Chuid a Dó d’Iarscríbhinn I a ghabhann le Rialachán (CEE) Uimh. 2658/87 ón gComhairle (3). Is iomchuí tagairt a dhéanamh do chóid na hAinmníochta Comhcheangailte (AC) i gcomhréir le Rialachán (AE) 2017/625. Ina theannta sin, tá cóid táirgí ilchodacha áirithe in easnamh in Airteagal 12 de Rialachán Tarmligthe (AE) 2019/625. Is iomchuí, dá bhrí sin, na cóid AC sin a chur leis.

(5)

Ba cheart coinsíneachtaí seilidí beo agus táirgí ilchodacha a chuirtear ar an margadh lena gcaitheamh ag an duine a bheith faoi réir deimhniú aonair maidir le teacht isteach san Aontas chun an riosca nach gcomhlíonfar ceanglais an Aontais maidir le sábháilteacht bia a laghdú. Le deimhniú ar chomhlíonadh cheanglais an Aontais, rannchuidítear freisin le ceanglais infheidhme an Aontais a mheabhrú d’oibreoirí gnó bia agus d’údaráis inniúla tríú tíortha nó réigiún díobh.

(6)

Déantar foráil in Airteagal 7 de Rialachán Tarmligthe (AE) 2019/625 maidir le ceanglais i dtaca le hamhábhair a mhonarú le haghaidh allmhairiú coinsíneachtaí feola úire, feola mionaithe, ullmhóidí feola, táirgí feola, feola inneall-scartha agus amhábhar atá ceaptha chun geilitín agus collaigin a tháirgeadh chun riosca féideartha don tsláinte phoiblí a sheachaint. Tá lamhnáin agus inní a úsáidtear chun cásálacha a tháirgeadh faoi réir cóireáil lena ndíothaítear aon riosca don tsláinte phoiblí. Is iomchuí, dá bhrí sin, go gceadófar gur ó sheamlais faoi mhaoirseacht na n-údarás inniúil náisiúnta a thiocfaidh na hamhábhair chun cásálacha a tháirgeadh agus ba cheart Airteagal 7 a leasú dá réir.

(7)

Bunaítear le hAirteagal 13 de Rialachán Tarmligthe (AE) 2019/625 nach bhféadfaidh aon choinsíneacht de tháirgí liostaithe áirithe teacht isteach san Aontas ach amháin má tá deimhniú oifigiúil ag gabháil leis an gcoinsíneacht. Ní áirítear táirgí ilchodacha i liosta na dtáirgí nach mór deimhniú oifigiúil a bheith ag gabháil leo.

(8)

Braitheann an riosca a bhaineann le catagóirí áirithe táirgí ilchodacha ar an gcineál comhábhar agus ar a ndálaí stórála. Dá bhrí sin, ba cheart coinsíneachtaí na dtáirgí sin a chuirtear ar an margadh lena gcaitheamh ag an duine a bheith faoi réir dheimhniúchán aonair gach coinsíneachta lena dtabhairt isteach san Aontas lena gcur ar an margadh. Le deimhniú ar chomhlíonadh cheanglais an Aontais, féadfar rannchuidiú freisin le ceanglais infheidhme an Aontais a mheabhrú d’oibreoirí gnó bia agus d’údaráis inniúla tríú tíortha nó réigiún díobh.

(9)

Táirgí áirithe ilchodacha fadré nach bhfuil aon táirge feola eile iontu seachas geilitín nó collaigin nó táirgí an-mhínphróiseáilte, ní riosca iad don tsláinte phoiblí ná do shláinte ainmhithe mar gheall ar chineál na cóireála is gá chun táirgí feola den sórt sin a mhonarú. Ba cheart fianú príobháideach, seachas deimhniú oifigiúil, a bheith ag gabháil leis na táirgí ilchodacha sin.

(10)

Ba cheart, dá bhrí sin, Rialachán Tarmligthe (AE) 2019/625 a leasú dá réir sin.

(11)

Ós rud é go bhfuil feidhm ag Airteagail 12 agus 14 de Rialachán Tarmligthe (AE) 2019/625 ón 21 Aibreán 2021, ba cheart feidhm a bheith ag na leasuithe ar Airteagail is ábhartha d’Airteagail 12 agus 14 ón dáta sin freisin,

(1)

Le Rialachán Cur Chun Feidhme (AE) 2017/375 ón gCoimisiún (2), rinneadh athnuachan ar fhormheas na substainte gníomhaí prósulfúrón mar shubstaint atá le hionadú i gcomhréir le Rialachán (CE) Uimh. 1107/2009.

(2)

Le formheas na substainte gníomhaí prósulfúrón, mar a leagtar amach i gCuid E den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (3), áiríodh leis sin srian go mbeadh úsáid prósulfúróin teoranta d’aon úsáid amháin gach 3 bliana ar an ngort céanna ag uasdáileog de 20 g de shubstaint ghníomhach in aghaidh an heicteáir.

(3)

I gcomhréir le hAirteagal 7(1) de Rialachán (CE) Uimh. 1107/2009, an 12 Deireadh Fómhair 2016, chuir Syngenta Crop Protection AG iarratas faoi bhráid an Bhallstáit is rapóirtéir ainmnithe, an Fhrainc, ag iarraidh leasú ar na coinníollacha maidir le formheas prósulfúróin chun deireadh a chur leis an srian sin. Chinn an Ballstát is rapóirtéir ainmhithe an t-iarratas a bheith inghlactha.

(4)

Rinne an Ballstát is rapóirtéir ainmnithe measúnú ar úsáid leasaithe na substainte gníomhaí prósulfúrón i ndáil leis na héifeachtaí a d’fhéadfadh a bheith ann ar shláinte an duine agus ar shláinte ainmhithe agus ar an gcomhshaol i gcomhréir le forálacha Airteagal 4 de Rialachán (CE) Uimh. 1107/2009, agus d’ullmhaigh sé tuarascáil athbhreithnithe maidir le measúnú ar athnuachan, agus cuireadh an tuarascáil sin faoi bhráid an Údaráis Eorpaigh um Shábháilteacht Bia (“an tÚdarás”) agus an Choimisiúin an 5 Aibreán 2018.

(5)

I gcomhréir le hAirteagal 12(1) de Rialachán (CE) Uimh. 1107/2009, scaip an tÚdarás an tuarascáil athbhreithnithe maidir le measúnú ar athnuachan ar an iarratasóir agus ar na Ballstáit chun barúlacha a fháil agus chuir sé ar fáil don phobal í. I gcomhréir le hAirteagal 12(3) de Rialachán (CE) Uimh. 1107/2009, iarradh faisnéis bhreise ar an iarratasóir. Rinne an Fhrainc meastóireacht ar an bhfaisnéis bhreise agus chuir sí tuarascáil athbhreithnithe maidir le measúnú ar athnuachan faoi bhráid an Choimisiúin agus an Údaráis an 28 Feabhra 2019.

(6)

An 15 Meitheamh 2020, chuir an tÚdarás a chonclúidí (4) in iúl don Choimisiún i dtaobh an bhféadfaí a bheith ag súil leis go gcomhlíonfaidh an tsubstaint ghníomhach prósulfúrón na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(7)

Chuir an Coimisiún aguisín a ghabhann leis an tuarascáil athbhreithnithe maidir le prósulfúrón agus dréacht-Rialachán freisin faoi bhráid an Bhuanchoiste um Plandaí, Ainmhithe, Bia agus Beatha an 23 Deireadh Fómhair 2020.

(8)

Iarradh ar an iarratasóir barúlacha a chur isteach maidir leis an aguisín a ghabhann leis an tuarascáil athbhreithnithe.

(9)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad a bhfuil an tsubstaint ghníomhach prósulfúrón ann, i gcás ina mbaintear úsáid as an táirge sin go bliantúil, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009. Dá bhrí sin, is iomchuí deireadh a chur leis an srian lena dteorannaítear úsáid prósulfúróin d’aon úsáid amháin gach 3 bliana ar an ngort céanna ag uasdáileog de 20 g de shubstaint ghníomhach in aghaidh an heicteáir.

(10)

Dá bhrí sin, ba cheart Rialacháin Cur Chun Feidhme (AE) 2017/375 agus Uimh. 540/2011 a leasú dá réir.

(11)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Is iomchuí foráil i ndáil le faisnéis taraife cheangailteach arna heisiúint i leith na n-earraí a bhaineann leis an Rialachán seo, faisnéis nach bhfuil i gcomhréir leis an Rialachán seo, go bhféadfaidh an sealbhóir, ar feadh tréimhse áirithe, leanúint air ag agairt na faisnéise sin i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Na bearta dá bhforáiltear sa Rialachán seo, is bearta iad atá i gcomhréir le tuairim an Choiste um an gCód Custaim,