(1)

Is den ríthábhacht é dálaí maithe oibre a bheith ag tiománaithe agus dálaí cothroma gnó a bheith ag gnóthais iompair de bhóthar chun earnáil iompair de bhóthar atá slán, éifeachtúil, agus cuntasach i dtéarmaí sóisialta a chruthú ar mhaithe leis an neamh-idirdhealú a áirithiú agus chun oibrithe cáilithe a mhealladh. Chun an próiseas sin a éascú, tá sé bunriachtanach rialacha sóisialta an Aontais maidir le hiompar de bhóthar a bheith soiléir, comhréireach, oiriúnach don chuspóir, agus éasca iad a chur chun feidhme agus a chur i bhfeidhm ar bhealach éifeachtach agus comhsheasmhach ar fud an Aontais.

(2)

Tar éis meastóireacht a dhéanamh ar a éifeachtaí agus a éifeachtúla a bhí cur chun feidhme na sraithe reatha de rialacha sóisialta an Aontais san iompar de bhóthar, agus go háirithe Rialachán (CE) Uimh. 561/2006 ó Pharlaimint na hEorpa agus ón gComhairle (4), sainaithníodh laigí áirithe i gcur chun feidhme an chreata dhlíthiúil sin. Mar gheall ar rialacha doiléire ó thaobh thréimhsí scíthe seachtainiúla, áiseanna scíthe agus sosanna le linn sealaíochta, mar aon le easpa rialacha maidir le tiománaithe ag filleadh ar an mbaile, bíonn léirmhínithe agus cleachtais forfheidhmiúcháin éagsúla ann ó Bhallstát go Ballstát. Ghlac roinnt Ballstát bearta aontaobhacha le déanaí, rud a chuir leis an éiginnteacht dhlíthiúil agus leis an gcóir neamh-chomhionann do thiománaithe agus d’oibreoirí. Mar sin féin, tá éifeacht ag na huastréimhsí tiomána in aghaidh an lae agus in aghaidh na seachtaine ó thaobh feabhas a chur ar dhálaí sóisialta na dtiománaithe agus ar an tsábháilteacht ar bhóithre i gcoitinne. Is gá leanúint gan stad de na hiarrachtaí chun comhlíonadh a áirithiú.

(3)

Chun sábháilteacht ar bhóithre a chur chun cinn, is den tábhacht gnóthais iompair a spreagadh cultúr sábháilteachta a ghlacadh chucu féin, cultúr sábháilteachta a gcloífear leis ar gach leibhéal. Go háirithe, chun sáruithe ar rialacha tiomána agus scíthe a sheachaint, nó le nach gcuirfear sábháilteacht ar bhóithre i mbaol, níor cheart go gceadófaí pá ar bhonn feidhmíochta a nascadh leis an am is gá chun paisinéirí a iompar chuig a gcinn scríbe nó chun earraí a sheachadadh.

(4)

Sa mheasúnú ex-post ar Rialachán (CE) Uimh. 561/2006, dearbhaíodh gurb é is mó ba chúis le forfheidhmiú neamh-chomhsheasmhach agus mí-éifeachtach rialacha sóisialta an Aontais go raibh na rialacha doiléir, gur úsáideadh na huirlisí rialaithe ar bhealach mí-éifeachtúil neamh-chomhionann agus nár leor an comhar riaracháin idir na Ballstáit.

(5)

D’fhonn an tsoiléireacht agus an chomhsheasmhacht a fheabhsú, ba cheart an díolúine a thugtar d’úsáid neamhthráchtála feithicle ó raon feidhme Rialachán (CE) Uimh. 561/2006 a shainmhíniú.

(6)

Chomh maith leis sin, tá rialacha atá soiléir, oiriúnach, comhréireach agus a fhorfheidhmítear go cothrom, ríthábhachtach ó thaobh cuspóirí beartais áirithe a bhaint amach, mar atá dálaí oibre na dtiománaithe a fheabhsú agus, go háirithe, iomaíocht atá gan saobhadh agus atá cothrom a áirithiú idir oibreoirí agus rannchuidiú le sábháilteacht ar bhóithre do úsáideoirí uile na mbóithre.

(7)

Tharla sé nach raibh na ceanglais atá ann cheana maidir le sosanna oiriúnach ná praiticiúil i leith tiománaithe atá ag tiomáint mar chuid d’fhoireann. Dá bhrí sin, is iomchuí an ceanglas maidir le taifeadadh sosanna a oiriúnú do shonraíocht na n-oibríochtaí iompair a dhéanann tiománaithe a bhíonn ag tiomáint mar chuid d’fhoireann, gan sábháilteacht an tiománaí agus an tsábháilteacht ar bhóithre a chur i mbaol.

(8)

Caitheann tiománaithe atá i mbun oibríochtaí cian-iompair idirnáisiúnta earraí tréimhsí fada as a mbailte. Féadfar go gcuirfidh na ceanglais atá ann faoi láthair maidir leis an scíth sheachtainiúil fad nach gá leis na tréimhsí sin. Dá bhrí sin, ba mhaith an rud é an fhoráil maidir le tréimhsí scíthe seachtainiúla a oiriúnú sa chaoi gur fusa do thiománaithe oibríochtaí idirnáisiúnta iompair a dhéanamh i gcomhréir leis na rialacha agus a mbaile a shroicheadh i gcomhair a dtréimhse scíthe seachtainiúil rialta, agus cúiteamh iomlán a fháil as na tréimhsí scíthe seachtainiúla laghdaithe. I bhfianaise na ndifríochtaí idir iompar paisinéirí agus iompar earraí, níor cheart feidhm a bheith ag an bhféidearthacht sin maidir le tiománaithe atá ag gabháil d’iompar paisinéirí.

(9)

Ba cheart aon solúbthacht maidir le sceidealú thréimhsí scíthe na dtiománaithe a bheith trédhearcach agus intuartha don tiománaí agus níor cheart an tsolúbthacht sin sábháilteacht ar bhóithre a chur i mbaol ar bhealach ar bith, trí thuirse na dtiománaithe a mhéadú, nó na dálaí oibre a mheath. Leis an tsolúbthacht sin, mar sin, níor cheart go dtiocfadh aon athrú ar am oibre reatha an tiománaí ná ar an uastréimhse choicísiúil thiomána agus ba cheart í a bheith faoi réir rialacha níos déine maidir leis an gcúiteamh as scíth laghdaithe.

(10)

Chun a áirithiú nach mbaintear mí-úsáid as an solúbthacht sin, is den bhunriachtanas é raon feidhme na forála a shainiú go soiléir, agus foráil a dhéanamh maidir le rialuithe iomchuí chomh maith. Ba cheart, dá bhrí sin, an raon feidhme a theorannú do na tiománaithe sin a chaitheann a dtréimhsí scíthe seachtainiúla laghdaithe, le linn na tréimhse tagartha, lasmuigh de Bhallstáit an ghnóthais agus lasmuigh de thír áit chónaithe an tiománaí. Is féidir é sin a sheiceáil trí na taifid tacagraif a cheadú cois bóthair agus ag an áitreabh an ghnóthais iompair, toisc go bhfuil suíomh thús agus dheireadh na scíthe iontu agus faisnéis maidir le tiománaithe aonair.

(11)

Chun forfheidhmiú éifeachtach a ráthú, tá sé bunriachtanach go mbeadh na húdaráis inniúla ábalta, agus seiceálacha cois bóthair á ndéanamh acu, a fhionnadh go rabhthas ag cloí go cuí le tréimhsí tiomána agus le tréimhsí scíthe ar lá déanta na seiceála agus i rith na 56 lá roimhe sin.

(12)

Leis an dul chun cinn mear sa teicneolaíocht, tá uathoibriú á dhéanamh de réir a chéile ar chórais tiomána sa chaoi gur lú ionchuir díreach an tiománaí nó nach gá an t-ionchuir sin ar chor ar bith. Chun aghaidh a thabhairt ar na hathruithe sin, d’fhéadfadh sé gur ghá an reachtaíocht reatha, lena n-áirítear rialacha maidir le hamanna tiomána agus scíthe, a oiriúnú chun sábháilteacht ar bhóithre agus cothrom na Féinne a ráthú agus dálaí oibre a fheabhsú, agus é a chur ar chumas an Aontais, ag an am céanna, a bheith ina cheannródaí ó thaobh nuatheicneolaíochtaí agus nuachleachtais nuálacha de. Dá bhrí sin, ba cheart don Choimisiún tuarascáil lena ndéantar meastóireacht ar úsáid córas tiomána uathrialaí sna Ballstáit, lena n-áirítear na tairbhí a bhaineann le teicneolaíochtaí tiomána uathrialaí. Ba cheart togra reachtach, más iomchuí, a bheith ag gabháil leis an tuarascáil sin.

(13)

D’fhonn forás sóisialta a chur chun cinn, is iomchuí an áit a shonrú inar féidir tréimhsí scíthe seachtainiúla a ghlacadh, le háirithiú go mbaineann tiománaithe leas as dálaí scíthe leordhóthanacha. Tá tábhacht ar leith le cáilíocht na cóiríochta le linn na dtréimhsí scíthe seachtainiúla rialta, agus ba cheart don tiománaí an scíth sin a chaitheamh lasmuigh de chábán na feithicle i gcóiríocht oiriúnach, ar chostas an ghnóthais iompair mar fhostóir. Chun dea-dhálaí oibre agus sábháilteachta na dtiománaithe a áirithiú, is iomchuí go soiléireofaí an ceanglas ar thiománaithe go gcuirfear cóiríocht ardchaighdeáin atá oiriúnach do gach inscne ar fáil dá dtréimhsí scíthe seachtainiúla rialta má ghlactar as baile iad.

(14)

Is gá freisin a fhoráil a dhéanamh do ghnóthais iompair obair na dtiománaithe a eagrú sa chaoi nach mbeidh na tréimhsí as baile níos faide ná mar is gá agus go bhféadfaidh tiománaithe tairbhe a bhaint as tréimhsí scíthe fada arna nglacadh mar chúiteamh as tréimhsí scíthe seachtainiúla laghdaithe. Ba cheart, agus an filleadh á eagrú, go bhféadfaí ionad oibríochtúil an ghnóthais ina Bhallstát bunaíochta a shroicheadh nó áit chónaithe an tiománaí agus go mbeadh saoirse ag na tiománaithe an áit a roghnú ina gcaitheann siad a dtréimhse scíthe. Chun a léiriú go bhfuil a oibleagáidí maidir le heagrú an fhillte rialta á gcomhlíonadh ag an ngnóthas iompair, ba cheart go mbeadh sé in ann taifid tacagraif, uainchláir dualgais na dtiománaithe nó doiciméadacht eile a úsáid. Ba cheart go mbeadh fianaise den sórt sin ar fáil ag a áitreabh lena cur i láthair má iarrann na húdaráis rialaithe í.

(15)

Cé nach féidir tréimhsí scíthe sheachtainiúla rialta agus tréimhsí scíthe níos faide a thógáil san fheithicil nó i limistéar páirceála, ach amháin i gcóiríocht oiriúnach, a d’fhéadfadh a bheith in aice le limistéar páirceála, is den ríthábhacht tiománaithe a chur ar a gcumas limistéir pháirceála a aimsiú atá slán sábháilte agus a bhfuil leibhéil iomchuí slándála agus saoráidí cuí ar fáil iontu. Tá staidéar déanta ag an gCoimisiún cheana féin le féachaint cén chaoi a bhféadfaí forbairt limistéar páirceála ar ardchaighdeán a spreagadh, lena n-áirítear na híoscheanglais is gá. Dá réir sin, ba cheart don Choimisiún caighdeáin a fhorbairt i ndáil le limistéir pháirceála shábháilte shlána. Leis na caighdeáin sin, ba cheart go gcuirfí limistéir pháirceála shábháilte shlána chun cinn. Féadfar na caighdeáin a athbhreithniú chun rochtain níos fearr ar bhreoslaí malartacha a chur san áireamh, i gcomhréir le beartais lena ndéantar an bonneagar sin a fhorbairt. Is den tábhacht freisin limistéir pháirceála a choinneáil saor ó oighear agus sneachta.

(16)

Ba cheart go mbeadh limistéir pháirceála shábháilte shlána faoi réir nósanna imeachta iniúchóireachta lena ndéanfaí iad a dheimhniú i gcomhréir le caighdeáin an Aontais. Ba cheart a áirithiú freisin, leis na nósanna imeachta iniúchóireachta sin, go ndéantar na caighdeáin sin a chomhlíonadh i gcónaí. Ba cheart, dá bhrí sin, a chur de chúram ar an gCoimisiún nós imeachta deimhniúcháin a ullmhú chun limistéir pháirceála shábháilte shlána a fhorbairt san Aontas.

(17)

Is chun leasa na sábháilteachta agus an fhorfheidhmiúcháin ar bhóithre go mbeadh gach tiománaí go hiomlán ar an eolas faoi na rialacha maidir le tréimhsí tiomána agus scíthe agus faoin gcontúirt a bhaineann le tuirse. I dtaca leis sin, is den tábhacht go mbeadh teacht éasca ar fhaisnéis faoi na saoráidí scíthe atá ar fáil. Dá bhrí sin, ba cheart don Choimisiún faisnéis a chur ar fáil maidir le limistéir pháirceála shábháilte shlána trí láithreán gréasáin atá áisiúil don úsáideoir. Ba cheart an fhaisnéis sin a choinneáil cothrom le dáta.

(18)

Chun sábháilteacht agus slándáil leanúnach na limistéar pairceála a áirithiú, ba cheart an chumhacht chun gníomhartha a ghlacadh de réir Airteagal 290 den Chonradh ar Fheidhmiú an Aontais Eorpaigh a tharmligean don Choimisiún i ndáil le caighdeáin a bhunú don leibhéal seirbhíse i limistéir pháirceála shábháilte shlána agus nósanna imeachta chun sábháilteacht agus slándáil na limistéar páirceála a dheimhniú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (5). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, gheobhaidh Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus beidh rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bheidh ag déileáil le hullmhú na ngníomhartha tarmligthe.

(19)

Leis na treoirlínte athbhreithnithe TEN-T arna mbunú le Rialachán (AE) Uimh. 1315/2013 ó Pharlaimint na hEorpa agus ón gComhairle (6), beartaítear limistéir pháirceála a fhorbairt ar mhótarbhealaí tuairim is gach 100 km chun spás páirceála ina bhfuil leibhéal iomchuí sábháilteachta agus slándála a chur ar fáil d’úsáideoirí tráchtála bóthair. Chun dlús a chur le tógáil bonneagair páirceála leordhóthanaigh agus chun an tógáil sin a chur chun cinn, is den tábhacht go mbeadh deiseanna leordhóthanacha ar fáil don chómhaoiniú ón Aontas i gcomhréir le gníomhartha dlí an Aontais atá ann faoi láthair agus a bheidh ann amach anseo lena mbunaítear na coinníollacha don tacaíocht airgeadais sin.

(20)

Baineann iompar ar bhád farantóireachta nó ar iarnród maidir le cuid den turas le roinnt mhaith oibríochtaí iompair bóthair laistigh den Aontas. Ba cheart, dá bhrí sin, forálacha iomchuí soiléire maidir le tréimhsí scíthe agus sosanna a leagan síos le haghaidh na n-oibríochtaí sin.

(21)

Uaireanta, bíonn imthosca gan choinne ann do thiománaithe a chiallaíonn nach féidir leo, gan rialacha an Aontais a shárú, an ceann scríbe a shroicheadh a rabhthas ag súil tréimhsí scíthe seachtainiúla a ghlacadh ann. Tá sé inmhianaithe é a dhéanamh níos fusa do thiománaithe na himthosca a láimhseáil agus é a chur ar a gcumas an ceann scríbe le haghaidh tréimhse scíthe seachtainiúla a shroicheadh. Is ionann imthosca eisceachtúla agus imthosca meara atá dosheachanta agus nárbh fhéidir a thuar roimh ré, rud a fhágann – gan choinne – nach féidir forálacha an Rialacháin a chur i bhfeidhm ina n-iomláine ar feadh tréimhse ghearr. Dá bhrí sin, ní féidir tagairt a dhéanamh, ar mhodh córasach, do na himthosca sin chun comhlíonadh an Rialacháin seo a sheachaint. D’fhonn forfheidhmiú cuí a áirithiú, ba cheart don tiománaí na himthosca eisceachtúla a dhoiciméadú ar imthosca iad is cúis le himeacht ó na rialacha. Ina theannta sin, ba cheart beart cosanta a bheith ann chun a áirithiú nach bhfuil an tréimhse tiomána iomarcach.

(22)

Chun neamhréireachtaí idir na cleachtais forfheidhmiúcháin a laghdú agus a chosc agus chun feabhas breise a chur ar éifeachtacht agus éifeachtúlacht an fhorfheidhmithe trasteorann, tá sé ríthábhachtach rialacha soiléire a chur ar bun le haghaidh comhar riaracháin tráthrialta idir na Ballstáit.

(23)

Ba cheart do na Ballstáit na bearta uile is gá a dhéanamh chun a áirithiú go ndéanfar na rialacha náisiúnta maidir le pionóis is infheidhme maidir le sáruithe ar Rialachán (CE) Uimh. 561/2006 agus ar Rialachán (AE) Uimh. 165/2014 ó Pharlaimint na hEorpa agus ón gComhairle (7) a chur chun feidhme ar bhealach a bheidh éifeachtach, comhréireach agus athchomhairleach. Is den tábhacht go n-áiritheofaí rochtain éasca ag gairmithe ar fhaisnéis maidir le pionóis a bhfuil feidhm acu i ngach Ballstát. D’fhéadfadh an tÚdarás Eorpach Saothair, a bunaíodh le Rialachán (AE) 2019/1149 ó Pharlaimint na hEorpa agus ón gComhairle (8), é sin a éascú tríd an bhfaisnéis a chur ar fáil tríd an suíomh gréasáin aonair uile-Aontais atá mar thairseach aonair chun rochtain a fháil ar fhoinsí agus ar sheirbhísí faisnéise ar leibhéal an Aontais agus ar an leibhéal náisiúnta i ngach teanga oifigiúil de chuid an Aontais, a bunaíodh le Rialachán (AE) 2018/1724 ó Pharlaimint na hEorpa agus ón gComhairle (9).

(24)

Chun a áirithiú go mbeidh coinníollacha aonfhoirmeacha ann maidir le Rialachán (CE) Uimh. 561/2006 a chur chun feidhme, ba cheart cumhachtaí cur chun feidhme a thabhairt don Choimisiún chun aon fhoráil sa Rialachán sin a shoiléiriú agus chun modhanna comhchoiteanna a bhunú maidir lena gcur i bhfeidhm agus a bhforfheidhmiú. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa (10).

(25)

Chun coinníollacha aonfhoirmeacha a áirithiú maidir le Rialachán (AE) Uimh. 165/2014 a chur chun feidhme, ba cheart cumhachtaí cur chun feidhme a thabhairt don Choimisiún chun forálacha mionsonraithe a leagan síos maidir le cur i bhfeidhm aonfhoirmeach na hoibleagáide i dtaca le taifead agus stóráil sonraí a bhaineann le haon trasnú teorann a dhéanfaidh an fheithicil, agus na gníomhaíochtaí agus forálacha mionsonraithe is gá maidir le cur i bhfeidhm aonfhoirmeach na bhforálacha maidir le ceanglais sonraí agus feidhmeanna agus maidir le tacagraif a shuiteáil. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011.

(26)

Chun feabhas a chur ar chost-éifeachtúlacht fhorfheidhmiú na rialacha sóisialta, ba cheart na córais tacagraif atá ann faoi láthair agus na córais tacagraif chliste a shaothrú go hiomlán agus ba cheart na tacagraif chliste a dhéanamh éigeantach freisin le haghaidh feithiclí tráchtála éadroma os cionn meáchain áirithe a oibríonn in iompar idirnáisiúnta ar fruiliú agus ar luaíocht. Dá bhrí sin, ba cheart feidhmiúlachtaí an tacagraif a fheabhsú chun gur féidir suíomh a aimsiú ar bhealach níos cruinne.

(27)

Le cost-éifeachtúlacht fhorfheidhmiú na rialacha sóisialta, forbairt ghasta teicneolaíochtaí nua, an digitiú ar fud gheilleagar an Aontais agus an gá le cothrom na Féinne idir cuideachtaí san iompar idirnáisiúnta de bhóthar, is gá an idirthréimhse do shuiteáil na dtacagraf cliste i bhfeithiclí cláraithe a ghiorrú. Le tacagraif chliste, rannchuideofar le rialuithe simplithe agus, ar an dóigh sin, éascófar obair na n-údarás náisiúnta.

(28)

D’fhonn a áirithiú go mbaineann na tiománaithe, na hoibreoirí agus na húdaráis rialaithe, a luaithe agus is féidir, leas as na buntáistí a bhaineann le tacagraif chliste, lena n-áirítear an taifeadadh uathoibrithe a dhéanann siad ar thrasnuithe teorann, ba cheart gléasanna den sórt sin a shuiteáil sna flíteanna feithiclí atá ann cheana, laistigh de thréimhse ama iomchuí tar éis theacht i bhfeidhm na bhforálacha mionsonraithe teicniúla. Le tréimhse ama den sórt sin, beidh leordhóthain ama ann don ullmhúchán.

(29)

I gcás na bhfeithiclí sin nach bhfuil tacagraif chliste iontu, ba cheart trasnú teorainneacha Ballstát a thaifeadadh sa tacagraf ag an gcéad áit ar féidir stopadh ag an teorainn nó tar éis na teorann.

(30)

Is cuid thábhachtach d’obair na dtiománaithe é gníomhaíochtaí a thaifeadadh sa tacagraf. Dá bhrí sin, tá sé ríthábhachtach go gcuirfear an oiliúint chuí ar fáil do thiománaithe maidir le conas gnéithe nua de thacagraif atá á dtabhairt isteach sa mhargadh a úsáid. Mar fhostóirí, ba cheart do ghnóthais iompair na costais a bhaineann leis an oiliúint sin a íoc.

(31)

Le héagsúlacht na ngléasanna tacagraif atá in úsáid agus mearfhorbairt na dteicnící ionramhála sofaisticiúla, is dúshlán é ag oifigigh rialaithe a bhíonn comhlíonadh dhlí ábhartha an Aontais in earnáil an iompair de bhóthar á sheiceáil acu. Is fíor sin go háirithe sa chás ina ndéantar na seiceálacha sin cois bóthair. Is den ríthábhacht, dá bhrí sin, go gcuirfí oiliúint iomchuí ar oifigigh rialaithe chun a áirithiú go dtuigeann siad go maith na forbairtí teicneolaíochta agus na teicnící ionramhála is déanaí.

(32)

D’fhonn an t-ualach atá ar oibreoirí agus ar údaráis rialaithe a laghdú i gcás ina mbaineann an t-oifigeach rialaithe an séala de thacagraf chun críocha rialaithe, ba cheart an t-athshéalú á dhéanann oifigeach rialaithe a cheadú faoi imthosca áirithe a bhfuil doiciméadú maith déanta orthu.

(33)

Agus na forbairtí leanúnacha maidir leis an teicneolaíocht á gcur san áireamh, tá an Coimisiún ag féachaint an bhféadfaí réitigh theicniúla nua a fhorbairt a mbeadh na tairbhí céanna agus an tslándáil chéanna ag roinnt leo agus atá ag roinnt leis an tacagraf cliste, ar an gcostas céanna nó níos ísle.

(34)

Tá sé tábhachtach go mbeadh oibreoirí iompair de bhóthar atá bunaithe i dtríú tíortha faoi réir rialacha atá coibhéiseach le rialacha an Aontais agus iad i mbun oibríochtaí iompair de bhóthair ar chríoch an Aontais Eorpaigh. Ba cheart don Choimisiún measúnú a dhéanamh ar chur i bhfeidhm an phrionsabail seo ar leibhéal an Aontais agus réitigh oiriúnacha a mholadh a bheidh le caibidil ag an Aontas i gcomhthéacs an Chomhaontuithe Eorpaigh maidir le hObair Foirne Feithiclí ag gabháil d’Iompar Idirnáisiúnta de Bhóthar (“Comhaontú AETR”).

(35)

Tá difear idir iompar earraí agus iompar daoine. Dá bhrí sin, ba cheart don Choimisiún a mheas ar cheart rialacha níos iomchuí a mholadh, go háirithe maidir le seirbhísí ócáideacha mar a shainítear iad i bpointe 4 d’Airteagal 2 de Rialachán (CE) Uimh. 1073/2009 ó Pharlaimint na hEorpa agus ón gComhairle (11).

(36)

Ós rud é nach féidir leis na Ballstáit cuspóirí an Rialacháin seo, eadhon an tsábháilteacht ar bhóithre agus dálaí oibre a fheabhsú do thiománaithe laistigh den Aontas trí chomhchuibhiú a dhéanamh ar na rialacha maidir le hamanna tiomána, sosanna agus tréimhsí scíthe agus trí chomhchuibhiú a dhéanamh ar na rialacha maidir le húsáid agus forfheidhmiú tacagraf a ghnóthú go leordhóthanach agus, mar gheall ar nádúr na gcuspóirí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(37)

Ba cheart Rialacháin (CE) Uimh. 561/2006 agus (AE) Uimh. 165/2014 a leasú dá réir sin,

(1)

Leis an taithí a fuarthas maidir le cur chun feidhme Rialachán (CE) Uimh. 1071/2009 (4) agus Rialachán (CE) Uimh. 1072/2009 (5) ó Pharlaimint na hEorpa agus ón gComhairle, nochtadh go bhféadfaí feabhas a chur ar na rialacha dá bhforáiltear sna rialacháin sin i dtaca le roinnt pointí.

(2)

Go dtí seo, agus mura ndéantar foráil dóibh sa dlí náisiúnta, ní bhíonn feidhm ag na rialacha i dtaca le rochtain ar ghairm an oibreora iompair de bhóthar maidir le gnóthais atá ag gabháil do ghairm an oibreora tarlaithe de bhóthar amháin trí bhíthin feithiclí nach mó a mais ualaithe ceadaithe ná 3,5 tonna nó cónaisc feithiclí nach dtéann thar sin. Tá méadú tagtha ar líon na ngnóthas sin atá gníomhach in oibríochtaí iompair náisiúnta agus idirnáisiúnta araon. De thoradh air sin, tá cinneadh déanta ag roinnt Ballstát na rialacha i dtaca le rochtain ar ghairm an oibreora iompair de bóthar, dá dtagraítear i Rialachán (CE) Uimh. 1071/2009, a chur i bhfeidhm maidir leis na gnóthais sin. Chun aon lúb ar lár a d’fhéadfadh a bheith ann a sheachaint agus chun íosleibhéal gairmiúlachta a áirithiú in earnáil a úsáideann mótarfheithiclí atá ceaptha go heisiach chun earraí a iompar agus nach mó a mais ualaithe ceadaithe ná 3,5 tonna i bhfoirm rialacha comhchoiteanna, agus dá bhrí sin le gur cosúla lena chéile na coinníollacha iomaíochta idir na hoibreoirí ar fad, ba cheart an Rialachán sin a leasú. Ba cheart na ceanglais chun rochtain a fháil ar an ngairm a bheith éigeantach d’oibreoirí a úsáideann mótarfheithiclí nó cónaisc feithiclí atá ceaptha go heisiach chun earraí a iompar agus a bhfuil mais ualaithe ceadaithe acu atá níos mó ná 2,5 tonna agus nach mó ná 3,5 tonna agus atá rannpháirteach san iompar idirnáisiúnta.

(3)

Faoi Rialachán (CE) Uimh. 1072/2009, tá gníomhaíochtaí áirithe tarlaithe idirnáisiúnta díolmhaithe ón ngá le ceadúnas Comhphobail chun dul isteach sa mhargadh Eorpach tarlaithe de bhóthar. Faoi chuimsiú eagrú an mhargaidh sin, gnóthais tarlaithe de bhóthar atá ag iompar earraí i mótarfheithiclí nó cónaisc feithiclí nach mó a mais ualaithe ceadaithe ná 2,5 tonna, ba cheart na gnóthais sin a dhíolmhú ón ngá le ceadúnas Comhphobail nó údarú eile iompair a bheith acu.

(4)

Cé go bhfuil feithiclí a bhfuil a mais ualaithe ceadaithe faoi leibhéal áirithe díolmhaithe ó raon feidhme Rialachán (CE) Uimh. 1071/2009, tugtar an fhéidearthacht do na Ballstáit, leis an Rialachán sin, cuid de na forálacha nó na forálacha uile atá ann a chur i bhfeidhm maidir le feithiclí den sórt sin.

(5)

Faoi láthair, tá na Ballstáit i dteideal ceanglais eile atá sa bhreis ar na ceanglais a shonraítear i Rialachán (CE) Uimh. 1071/2009 a chur ar rochtain ar ghairm an oibreora iompair de bhóthar. Níor léiríodh go raibh gá leis an bhféidearthacht seo chun freagairt do riachtanais ríthábhachtacha agus mar gheall air sin bhí éagsúlachtaí ann maidir le rochtain den sórt sin. Dá bhrí sin, ba cheart deireadh a chur léi.

(6)

Chun feiniméan na “cuideachtaí caocha”, mar a thugtar orthu, a chomhrac, agus iomaíocht chóir agus cothrom na Féinne sa mhargadh inmheánach a ráthú, ní mór a áirithiú go bhfuil fíorláithreacht leanúnach ag oibreoirí iompair de bhóthar atá bunaithe i mBallstát sa Bhallstát sin agus gur as an áit sin a dhéanann siad a gcuid gnó. Dá bhrí sin, agus i bhfianaise na taithí a fuarthas, is gá na forálacha maidir le bunaíocht éifeachtach agus chobhsaí a bheith ann a shoiléiriú agus a neartú, agus forchur ualach riaracháin díréireach a sheachaint san am céanna.

(7)

Ba cheart fíorláithreacht leanúnach sa Bhallstát bunaíochta a cheangal ar an ngnóthas, go háirithe, oibríochtaí iompair a dhéanamh leis an trealamh teicniúil iomchuí suite sa Bhallstát sin.

(8)

Le Rialachán (CE) Uimh. 1071/2009, ceanglaítear ar ghnóthais a n-oibríochtaí a dhéanamh go héifeachtach agus go leanúnach leis an trealamh agus na saoráidí teicniúla iomchuí ag lárionad oibríochta atá suite sa Bhallstát bunaíochta, agus ceadaítear, leis an Rialachán sin, ceanglais bhreise ar an leibhéal náisiúnta, arb é an ceann is coitianta díobh spásanna páirceála a bheith ar fáil sa Bhallstát bunaíochta. Mar sin féin, níor leor na ceanglais sin a cuireadh i bhfeidhm go héagothrom chun fíornasc a áirithiú leis an mBallstát sin d’fhonn cuideachtaí caocha a chomhrac go héifeachtúil agus chun an baol an chabatáiste chórasaigh agus tiománaithe fáin a laghdú, ar tiománaithe iad a eagraítear ag gnóthas chuig nach bhfilleann na feithiclí. Ós rud é go bhféadfadh sé go dteastódh rialacha sonracha maidir leis an gceart bunaíochta agus soláthar seirbhísí chun feidhmiú cuí an mhargaidh inmheánaigh i réimse an iompair a áirithiú, is iomchuí na ceanglais bhunaíochta a chomhchuibhiú tuilleadh agus na ceanglais a bhaineann le láithreacht na bhfeithiclí a úsáideann an t-oibreoir iompair sa Bhallstát bunaíochta a neartú. Trí íostréimhse shoiléir a shainiú faoi nach mór don fheithicil teacht ar ais, rannchuidítear lena áirithiú gur féidir na feithiclí sin a chothabháil mar is ceart leis an trealamh teicniúil atá suite sa Bhallstát bunaíochta, agus éascaítear rialuithe.

Ba cheart an timthriall a leagtar síos don fhilleadh sin a shioncrónú le hoibleagáid an ghnóthais iompair faoi Rialachán (CE) Uimh. 561/2006 ó Pharlaimint na hEorpa agus ón gComhairle (6) maidir le hoibríochtaí a eagrú ar bhealach a chuireann ar chumas an tiománaí filleadh abhaile gach 4 seachtaine, ar a laghad, ionas gur féidir an dá oibleagáid a chomhlíonadh má fhilleann an tiománaí leis an bhfeithicil gach dara timthriall dar fad 4 seachtaine ar a laghad. Leis an sioncronú sin, neartaítear ceart fillte an tiománaí agus laghdaítear an baol nach dtabharfar an fheithicil ar ais ach ar mhaithe leis an gceanglas bunaíochta nua sin a chomhlíonadh. Níor cheart, áfach, go bhfágfadh an ceanglas maidir le filleadh ar an mBallstát bunaíochta go gcaithfí líon sonrach oibríochtaí a dhéanamh sa Bhallstát bunaíochta ná go gcuirfí teorainn ar shlí eile leis an bhféidearthacht a bhíonn ag oibreoirí seirbhísí a sholáthar ar fud an mhargaidh inmheánaigh.

(9)

Sa mhéid go mbraitheann rochtain ar ghairm an oibreora iompair de bhóthar ar dea-cháil an ghnóthais lena mbaineann, is gá soléirithe a dhéanamh maidir leis na daoine nach mór a gcuid iompair a chur san áireamh, maidir leis na nósanna imeachta riaracháin nach mór iad a leanúint agus na tréimhsí feithimh maidir le hathshlánú i gcás ina gcailleann bainisteoir iompair a dhea-cháil.

(10)

I bhfianaise an tionchar a d’fhéadfadh a bheith acu ar na coinníollacha maidir le hiomaíocht chóir sa mhargadh iompair de bhóthar, ba cheart sáruithe tromchúiseacha ar rialacha náisiúnta cánach a chur leis na gnéithe ábhartha maidir le measúnú a dhéanamh ar dhea-cháil.

(11)

I bhfianaise an tionchar a d’fhéadfadh a bheith acu ar an margadh iompair de bhóthar agus ar an gcosaint shóisialta oibreoirí, ba cheart sáruithe tromchúiseacha ar dhlí an Aontais maidir le hoibrithe a phostú in earnáil an iompair de bhóthar, cabatáiste agus ar an dlí is infheidhme maidir le hoibleagáidí conarthacha a chur leis na gnéithe ábhartha maidir le measúnú a dhéanamh ar dhea-cháil.

(12)

Mar gheall ar thábhacht na hiomaíochta córa sa mhargadh inmheánach, ba cheart sáruithe ar dhlí an Aontais atá ábhartha don cheist seo, lena n-áirítear rialacha maidir le rochtain ar an margadh amhail rialacha cabatáiste, a chur san áireamh sa mheasúnú ar dhea-cháil na mbainisteoirí iompair agus na ngnóthas iompair. Ba cheart téarmaí an chumhachtaithe a shoiléiriú dá réir sin, ar dá mbun a bhfuil an Choimisiúin chun leibhéal tromchúise na sáruithe ábhartha a shainiú.

(13)

Bhí deacrachtaí ag údaráis inniúla náisiúnta maidir le sainaithint na ndoiciméad a bhféadfaidh gnóthais a chur isteach chun a seasamh airgeadais a chruthú, go háirithe in éagmais cuntais dheimhnithe bhliantúla. Ba cheart soiléiriú a dhéanamh ar na rialacha maidir leis an bhfianaise a theastaíonn chun seasamh airgeadais a chruthú.

(14)

Maidir le gnóthais atá ag gabháil do ghairm an oibreora tarlaithe de bhóthair trí bhíthin mótarfheithiclí nó cónaisc feithiclí atá ceaptha go heisiach chun earraí a iompair, atá rannpháirteach san iompar idirnáisiúnta agus ar mó ná 2,5 tonna a mais ualaithe ceadaithe ach nach mó ná 3,5 tonna í, ba cheart leibhéal íosta seasaimh airgeadais a bheith ag na gnóthais sin, chun a áirithiú go bhfuil na modhanna acu oibríochtaí a chur i gcrích ar bhonn cobhsaí agus fadtéarmach. Ós rud é, áfach, go mbíonn teorainn ar mhéid na n-oibríochtaí a dhéantar leis na feithiclí sin de ghnáth, níor cheart na ceanglais chomhfhreagracha maidir leis an seasamh airgeadais a bheith chomh crua céanna leis na ceanglais atá i bhfeidhm maidir le hoibreoirí a úsáideann feithiclí thar an teorainn sin. Ba cheart cónaisc feithiclí a chur san áireamh agus an seasamh airgeadais a cheanglaítear á chinneadh. Ba cheart don údarás inniúil an leibhéal níos airde den cheanglas airgeadais a chur i bhfeidhm i gcás gur mó mais ualaithe ceadaithe an chónaisc feithiclí ná 3,5 tonna.

(15)

Chun caighdeáin arda a choinneáil agus a chruthú do ghnóthais gan tionchair dhiúltacha a chruthú ar an margadh inmheánach san iompar de bhóthar, ba cheart a cheadú do na Ballstáit na ceanglais airgeadais lena dtagraítear d’úsáid feithiclí troma a cur i bhfeidhm maidir leis na gnóthais atá bunaithe ar a gcríocha i leith feithiclí nach mó a mais ualaithe ceadaithe ná 3,5 tonna.

(16)

Chun earnáil iontaofa an iompair de bhóthar a áirithiú agus chun feabhas a chur ar bhailiú fiach chuig comhlachtaí faoi rialú an dlí phoiblí, ba cheart an fhéidearthacht a bheith ag na Ballstáit comhlíonadh a cheangal i ndáil le hoibleagáidí íocaíochta i gcás eintiteas poiblí, mar shampla fiachais chánach breisluacha agus ranníocaíochtaí slándála sóisialta, agus a cheangal nach mbeidh gnóthais faoi réir imeachtaí a tugadh isteach chun a gcuid sócmhainní a chosaint.

(17)

Ba cheart an fhaisnéis faoi oibreoirí iompair atá sna cláir leictreonacha náisiúnta a bheith chomh hiomlán agus chomh cothrom le dáta agus is féidir d’fhonn léargas leordhóthanach a bheith ag na húdaráis náisiúnta atá i gceannas ar fhorfheidhmiú na rialacha ábhartha maidir leis na hoibreoirí atá faoi imscrúdú. Go háirithe, le faisnéis maidir le cláruimhir na bhfeithiclí atá ar fáil do na hoibreoirí agus grádú riosca na n-oibreoirí, ba cheart go mbeadh forfheidhmiú náisiúnta agus trasteorann níos fearr i gcás forálacha Rialacháin (CE) Uimh. 1071/2009 agus (CE) Uimh. 1072/2009. Ba cheart na rialacha ar an gclár leictreonach náisiúnta a leasú dá réir.

(18)

Chun coinníollacha aonfhoirmeacha a áirithiú le haghaidh chur chun feidhme na Treorach seo, ba cheart cumhachtaí cur chun feidhme a thabhairt don Choimisiún chun na nósanna imeachta teicniúla faoina gceadaítear go leictreonach cláir leictreonacha náisiúnta na mBallstát eile, inter alia, a ghlacadh. I measc na nósanna imeachta sin, d’fhéadfadh nósanna imeachta a bheith i gceist chun a áirithiú gur féidir leis na húdaráis inniúla rochtain a fháil, le linn seiceálacha cois bóthair, ar an rátáil chomhchuibhithe riosca atá ag gnóthas faoi Airteagal 9 de Threoir 2006/22/CE ó Pharlaimint na hEorpa agus ón gComhairle (7). Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (8).

(19)

Ní théann an sainmhíniú maidir leis an sárú is tromchúisí a bhaineann le dul thar an teorainn tiomána laethúil, dá bhforáiltear in Iarscríbhinn IV de Rialachán (CE) Uimh. 1071/2009, leis an bhforáil ábhartha atá ann cheana a leagtar síos i Rialachán (CE) Uimh. 561/2006. Leis an neamhréireacht sin, cruthaítear éiginnteacht agus cleachtais éagsúla i measc údaráis náisiúnta agus, mar thoradh air sin, cruthaítear deacrachtaí maidir le forfheidhmiú na rialacha atá i gceist. Ba cheart an sainmhíniú sin a shoiléiriú dá bharr sin chun comhsheasmhacht a áirithiú idir an dá Rialachán.

(20)

I dtaca leis na rialacha maidir le hiompar náisiúnta a dhéanann tarlóirí neamhchónaitheacha ar bhonn sealadach i mBallstát óstach (“cabatáiste”), ba cheart go mbeidís soiléir, simplí agus éasca a fhorfheidhmiú, agus ag an am céanna an leibhéal léirscaoilte atá bainte amach go dtí seo á choimeád.

(21)

Ba cheart d’oibríochtaí cabatáiste cuidiú le lódfhachtóir feithiclí tromshaothair a mhéadú agus turais fholmha a laghdú, agus ba cheart iad a cheadú fad is nach dtéitear ina mbun ar shlí a chruthaíonn gníomhaíocht bhuan nó leanúnach laistigh den Bhallstát lena mbaineann. Chun a áirithiú nach ndéantar oibríochtaí cabatáiste ar shlí a chruthaíonn gníomhaíocht bhuan nó leanúnach, níor cheart cead a thabhairt do tharlóirí oibríochtaí cabatáiste a dhéanamh sa Bhallstát céanna laistigh de thréimhse áirithe ama tar éis deireadh thréimhse oibríochtaí cabatáiste.

(22)

Cé gur baineadh tairbhe as an léirscaoileadh breise a bunaíodh in Airteagal 4 de Threoir 92/106/CEE ón gComhairle (9) i gcomparáid le cabatáiste faoi Rialachán (CE) Uimh. 1072/2009 maidir le hiompar comhcheangailte a chur chun cinn agus cé gur chóir, i bprionsabal, é sin a choinneáil ar bun, is gá a áirithiú nach mbaintear mí-úsáid as. Is léir ón taithí a fuarthas, i gcodanna áirithe den Aontas, go bhfuiltear tar éis úsáid chórasach a bhaint as an bhforáil sin chun dul timpeall ar chineál sealadach an chabatáiste agus mar bhonn le láithreacht leanúnach feithiclí i mBallstát seachas Ballstát bunaíochta an ghnóthais. Tá an baol ann gurb í an dumpáil shóisialta a bheidh mar thoradh ar chleachtais éagóracha den sórt sin agus go gcuirfear i mbaol an urraim nach mór a thabhairt don chreat dlíthiúil a bhaineann le cabatáiste. Ba cheart, dá bhrí sin, go bhféadfadh Ballstát maolú ó Airteagal 4 de Threoir 92/106/CEE agus na forálacha a bhaineann le cabatáiste i Rialachán (CE) Uimh. 1072/2009 a chur i bhfeidhm chun aghaidh a thabhairt ar fhadhbanna den sórt sin, trí theorainn chomhréireach a thabhairt isteach maidir le láithreacht leanúnach feithiclí laistigh dá gcríoch.

(23)

Is réamhriachtanas é d’iomaíocht chóir sa mhargadh inmheánach go ndéanfaí na rialacha a fhorfheidhmiú go héifeachtach agus go héifeachtúil. Tá sé riachtanach tuilleadh digitithe a dhéanamh ar an bhforfheidhmiú chun an acmhainn forfheidhmithe a mhéadú, chun laghdú a dhéanamh ar ualaigh riaracháin neamhriachtanacha ar oibreoirí iompair idirnáisiúnta agus, go háirithe, ar fhiontair bheaga agus mheánmhéide, chun díriú ar bhealach níos fearr ar oibreoirí iompair ardriosca agus chun cleachtais chalaoiseacha a bhrath. Ba cheart na modhanna a shoiléiriú lenar féidir le hoibreoirí iompair de bhóthar a chruthú go bhfuil siad ag comhlíonadh na gceanglas maidir le hoibríochtaí cabatáiste. Ba cheart seiceálacha cois bóthair a bheith bunaithe ar dhoiciméid iompair agus ar thaifid tacagraif, má tá fáil orthu. Chun go mbeadh sé níos simplí do na húdaráis inniúla faisnéis ábhartha agus a láimhseáil a chur ar fáil dá réir, ba cheart úsáid agus tarchur faisnéis leictreonach maidir le hiompar a aithint mar mhodh chun comhlíonadh a chruthú. Ba cheart go ndéanfaí an fhormáidiú a úsáidfear chun na críche sin iontaofacht agus barántúlacht a áirithiú. Agus breithniú á dhéanamh ar mhalartú éifeachtach leictreonach faisnéise a bheith ag tarlú níos minice i gcúrsaí iompair agus lóistíochta, tá sé tábhachtach comhleanúnachas a áirithiú sna creata rialála agus forálacha a bhunú lena dtugtar aghaidh ar shimpliú na nósanna imeachta rialacháin.

(24)

Is iad gnóthais iompair seolaithe na rialacha ar iompar idirnáisiúnta agus mar sin, tá siad faoi réir iarmhairtí aon sáruithe a dhéanann siad. Chun mí-úsáid a dhéanfadh gnóthais a dhéanann conarthaí le hoibreoirí tarlaithe maidir le seirbhísí iompair de bhóthar a chosc, áfach, ba cheart do Bhallstáit foráil a dhéanamh do rialacha soiléire agus intuartha maidir le smachtbhannaí i gcoinne coinsíneoirí, seoltóirí lasta, conraitheoirí agus fochonraitheoirí i gcás ina raibh a fhios acu, nó, i bhfianaise na n-imthosca ábhartha uile gur cheart a fhios a bheith acu, go mbaineann sáruithe ar Rialachán (CE) Uimh. 1072/2009 leis na seirbhísí a choimisiúnaigh siad.

(25)

Beidh ról tábhachtach maidir le cuidiú leis na Ballstáit rialacha an Rialacháin seo a fhorfheidhmiú go leordhóthanach ag an Údarás Eorpach Saothair, Údarás a chumhdaíonn Rialachán (CE) Uimh. 1071/2009 faoina raon feidhme gníomhaíochtaí mar a leagtar amach in Airteagal 1(4) de Rialachán (AE) 2019/1149 ó Pharlaimint na hEorpa agus ón gComhairle (10). Bainfidh an ról seo go háirithe le seiceálacha comhbheartaithe, le héascú an chomhair agus an mhalartaithe faisnéise idir na Ballstáit, le cur chun cinn agus comhroinnt an dea-chleachtais, le tacú le fothú acmhainní, le hoiliúint agus le feachtais ardaithe feasachta.

(26)

Chun forbairtí ar an margadh agus dul chun cinn teicniúil a chur san áireamh, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún chun Iarscríbhinní I, II agus III a ghabhann le Rialachán (CE) Uimh. 1071/2009 agus chun Iarscríbhinní I, II agus III a ghabhann le Rialachán (CE) Uimh. 1072/2009 a leasú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (11). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, gheobhaidh Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus beidh rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bheidh ag déileáil le hullmhú na ngníomhartha tarmligthe.

(27)

Ós rud é nach féidir leis na Ballstáit cuspóirí an Rialacháin seo, eadhon leibhéal comhchuibhiúcháin a thabhairt isteach i gcásanna áirithe nach bhfuil comhchuibhithe go fóill le dlí an Aontais, go háirithe maidir le hiompar le feithiclí tráchtála éadroma agus cleachtais forfheidhmiúcháin, agus chun coinníollacha iomaíochta a mheas agus chun forfheidhmiú a fheabhsú, a ghnóthú go leordhóthanach ach mar gheall ar nádúr na gcuspóirí arna saothrú in éineacht le cineál trasteorann an iompair de bhóthar, gur fearr is féidir na cuspóirí a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach é. I gcomhréir le prionsabal na comhréireachta, a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí arna saothrú a ghnóthú.

(28)

Dá bhrí sin, ba cheart Rialacháin (CE) Uimh. 1071/2009, (CE) Uimh. 1072/2009 agus Rialachán (AE) Uimh. 1024/2012 ó Pharlaimint na hEorpa agus ón gComhairle (12) a leasú dá réir,

(1)

Tá éifeachtacht an iompair agus na lóistíochta lastais ríthábhachtach d’iomaíochas gheilleagar an Aontais agus don fhás a thiocfaidh air, d’fheidhmiú an mhargaidh inmheánaigh agus do chomhtháthú sóisialta agus eacnamaíoch gach réigiúin de chuid an Aontais.

(2)

Is é is aidhm don Rialachán seo digitiú iompair agus lóistíochta lastais a spreagadh chun costais riaracháin a laghdú, cumas forfheidhmiúcháin na n-údarás inniúil a fheabhsú, agus éifeachtúlacht agus inbhuanaitheacht an iompair a fheabhsú.

(3)

Maidir le gluaiseacht earraí, lena n-áirítear dramhaíl, déantar méid mór faisnéise a mhalartú, agus é sin ar pháipéar go fóill, i measc gnóthaí, agus idir gnóthaí agus údaráis inniúla. Is ualach suntasach riaracháin ar oibreoirí lóistíochta doiciméid pháipéir a úsáid agus is costas breise é ar oibreoirí lóistíochta agus tionscail ghaolmhara (amhail trádáil agus monarú), go háirithe ar FBManna, agus bíonn tionchar diúltach aige ar an gcomhshaol.

(4)

Meastar gur de bharr gan aon chreat dlíthiúil aonfhoirmeach a bheith ann ar leibhéal an Aontais lena gceanglófaí ar údaráis inniúla glacadh le faisnéis ábhartha iompair lastais, arna ceangal le reachtaíocht, i bhfoirm leictreonach, an phríomhchúis leis an easpa dul chun cinn i dtreo an tsimplithe agus na héifeachtachta níos mó a bheadh ann dá mbeadh modh leictreonach ar fáil. Dá nglacfadh údaráis inniúla le faisnéis i bhfoirm leictreonach lena raibh sonraíochtaí comhchoiteanna, ní hamháin gurbh fhusa an chumarsáid idir na húdaráis inniúla agus na hoibreoirí eacnamaíocha ach, go hindíreach, b’fhusa freisin cumarsáid leictreonach aonfhoirmeach shimplithe idir gnó amháin agus gnó eile a fhorbairt ar fud an Aontais. Bheadh coigilteas suntasach ar chostais riaracháin ann freisin d’oibreoirí eacnamaíocha, agus go háirithe do FBManna, a dhéanann suas tromlach mór na gcuideachtaí iompair agus lóistíochta laistigh den Aontas.

(5)

I roinnt réimsí de dhlí iompair an Aontais, ceanglaítear ar údaráis inniúla glacadh le faisnéis dhigitithe, ach ní bhaineann sé sin le gníomhartha dlí ábhartha uile an Aontais ná baol air. Ba cheart go bhféadfaí úsáid a bhaint as modh leictreonach chun faisnéis rialála faoi iompar earraí a chur ar fáil d’údaráis inniúla ar fud chríoch an Aontais maidir le gach céim ábhartha d’oibríochtaí iompair a dhéantar laistigh den Aontas. Lena chois sin, ba cheart feidhm a bheith ag an bhféidearthacht sin maidir leis an bhfaisnéis rialála ar fad, agus maidir le gach modh iompair.

(6)

Dá bhrí sin, ba cheart a cheangal ar údaráis inniúla glacadh le faisnéis a chuirtear ar fáil go leictreonach i gcás ina mbíonn oibleagáid ar oibreoirí eacnamaíocha faisnéis a chur ar fáil mar fhianaise go bhfuil na ceanglais a leagtar síos i ngníomhartha dlí de chuid an Aontais arna gcumhdach ag an Rialachán seo, á gcomhlíonadh. Ina theannta sin, ba cheart a chumhdach leis an gceanglas sin faisnéis a iarrann na húdaráis mar fhaisnéis bhreise i gcomhréir le forálacha na ngníomhartha dlí sin de chuid an Aontais, mar shampla, nuair atá faisnéis áirithe ar iarraidh. Ba cheart feidhm a bheith ag an méid sin freisin i gcás ina gceanglaítear le dlí náisiúnta go soláthraítear faisnéis rialála arb ionann í, go hiomlán nó i bpáirt, agus an fhaisnéis atá le cur ar fáil de bhun na gníomhartha dlí sin de chuid an Aontais a thagann faoi raon feidhme an Rialacháin seo. Ba cheart d’údaráis iarracht a dhéanamh freisin cumarsáid leictreonach a dhéanamh leis na hoibreoirí eacnamaíocha lena mbaineann maidir leis an bhfaisnéis sin. Ba cheart cumarsáid den sórt sin a bheith gan dochar do na forálacha ábhartha de ghníomhartha dlí de chuid an Aontais agus den dlí náisiúnta a bhaineann le bearta leantacha le linn seiceálacha faisnéise rialála nó ina ndiaidh. Maidir leis an oibleagáid atá ar údaráis inniúla glacadh le faisnéis a chuireann oibreoirí eacnamaíocha ar fáil go leictreonach, ba cheart feidhm a bheith ag an oibleagáid sin freisin aon uair a cheanglaítear le forálacha de ghníomhartha dlí de chuid an Aontais nó dlí náisiúnta a thagann faoi raon feidhme an Rialacháin seo faisnéis dá dtagraítear freisin i gcoinbhinsiúin idirnáisiúnta ábhartha amhail na coinbhinsiúin lena rialaítear na conarthaí idirnáisiúnta iompair sna modhanna éagsúla iompair, mar shampla Coinbhinsiún na Náisiún Aontaithe maidir leis an gConradh maidir le hIompar Idirnáisiúnta Earraí de Bhóthar, an Coinbhinsiún maidir le hIompar Idirnáisiúnta d’Iarnród (COTIF), Rún 672 an Comhlachas Aeriompair Idirnáisiúnta maidir le R-bhille Aeriompair, an Coinbhinsiún maidir le hAontú Rialacha Áirithe i dtaca le hIompar Idirnáisiúnta d’Aer (Coinbhinsiún Montréal) agus Coinbhinsiún Bhúdaipeist maidir leis an gConradh um Iompar Earraí ar Uiscebhealaí Intíre.

(7)

Ós rud é nach bhfuil sé beartaithe leis an Rialachán seo ach an soláthar faisnéise idir na hoibreoirí eacnamaíocha agus na húdaráis inniúla a éascú agus a spreagadh trí mhodh leictreonach, ba cheart é a bheith gan dochar d’fhorálacha de ghníomhartha dlí de chuid an Aontais ná den dlí náisiúnta lena gcinntear ábhar na faisnéise rialála agus níor cheart, go háirithe, aon cheanglas breise um fhaisnéis rialála nó ceanglas breise teanga a fhorchur leis. Cé go bhfuil sé beartaithe leis an Rialachán seo go bhféadfar an ceanglas um fhaisnéis rialála a chomhlíonadh trí mhodh leictreonach seachas trí bhíthin doiciméid pháipéir, tá sé gan dochar don fhéidearthacht atá ag na hoibreoirí eacnamaíocha lena mbaineann an fhaisnéis sin a chur i láthair i bhformáid páipéir, mar a fhoráiltear dó i bhforálacha ábhartha de ghníomhartha dlí de chuid an Aontais nó sa dlí náisiúnta, agus ba cheart é a bheith gan dochar do cheanglais ábhartha de chuid an Aontais i ndáil leis na doiciméid is gá a úsáid chun an fhaisnéis a chur i láthair ar bhealach struchtúrtha. Ba cheart don Rialachán seo a bheith gan dochar, freisin, d’fhorálacha Rialacháin (CE) Uimh. 1013/2006 ó Pharlaimint na hEorpa agus ón gComhairle (3) maidir le nós imeachta maidir le loingsithe dramhaíola agus do na forálacha a thagraíonn do rialuithe atá le déanamh ag oifigí custaim. Lena chois sin, ba cheart don Rialachán seo a bheith gan dochar do na forálacha maidir le hoibleagáidí tuairiscithe, lena n-áirítear i ndáil le hinniúlachtaí custaim nó le hinniúlachtaí údarás eile, mar a leagtar amach i Rialachán (AE) Uimh. 952/2013 ó Pharlaimint na hEorpa agus ón gComhairle (4) nó i ngníomhartha cur chun feidhme nó tarmligthe a glacadh faoin Rialacháin sin nó i Rialachán (AE) 2019/1239 ó Pharlaimint na hEorpa agus ón gComhairle (5).

(8)

Is féidir costais riaracháin ar oibreoirí eacnamaíocha a laghdú agus éifeachtúlacht údarás inniúil a fheabhsú trí mhodh leictreonach a úsáid chun faisnéis rialála a mhalartú. Bheadh ar oibreoirí eacnamaíocha agus ar údaráis inniúla araon na bearta is gá a dhéanamh, le go bhféadfaí malartuithe leictreonacha a dhéanamh ar fhaisnéis rialála faoi iompar lastais (eFTI) i bhformáid atá meaisín-inléite trí ardáin atá bunaithe ar fhaisnéis agus cumarsáid teicneolaíochta (ardáin eFTI), lena n-áirítear an trealamh is gá a fháil. Ba cheart d’oibreoirí eacnamaíocha lena mbaineann, áfach, leanúint de bheith freagrach as faisnéis a sholáthar i bhformáid atá inléite ag an duine nuair a iarrann údaráis inniúla orthu go sonrach sin a dhéanamh chun go bhféadfadh údaráis inniúla a ndualgais a chomhlíonadh i gcásanna nach bhfuil rochtain ar ardán eFTI ar fáil.

(9)

Chun gur féidir le hoibreoirí eacnamaíocha faisnéis ábhartha a chur ar fáil i bhfoirm leictreonach ar an dóigh chéanna i ngach Ballstát, is gá brath ar shonraíochtaí comhchoiteanna agus ba cheart don Choimisiún na sonraíochtaí comhchoiteanna sin a ghlacadh trí bhíthin gníomhartha tarmligthe agus gníomhartha cur chun feidhme dá dtagraítear sa Rialachán seo.

(10)

Le sonraíochtaí comhchoiteanna, maidir le sainiú agus tréithe teicniúla na n-eilimintí sonraí, ba cheart idir-inoibritheacht sonraí a áirithiú trí thacar cuimsitheach amháin sonraí a bhunú a d’úsáidfí chun an fhaisnéis a chur in iúl go leictreonach. Ba cheart na heilimintí sonraí uile a chomhfhreagraíonn do na ceanglais faisnéise atá sna forálacha ábhartha de ghníomhartha dlí de chuid an Aontais agus den dlí náisiúnta a bheith sa tacar cuimsitheach sonraí sin, i gcás nach n-áirítear gach eilimint sonraí atá coiteann do cheann amháin nó níos mó fothacar ach an t-aon uair amháin.

(11)

Le sonraíochtaí comhchoiteanna, ba cheart nósanna imeachta comhchoiteanna agus rialacha mionsonraithe a leagan síos maidir le rochtain ag údaráis inniúla ar an bhfaisnéis sin agus an phróiseáil a dhéanann siad uirthi, lena n-áirítear aon chumarsáid ghaolmhar idir údaráis inniúla agus na hoibreoirí eacnamaíocha lena mbaineann, amhail iarrataí ar fhaisnéis bhreise, atá riachtanach chun gur féidir le húdaráis inniúla a n-inniúlachtaí forfheidhmithe rialála faoi seach a fhorchur i gcomhréir leis na forálacha ábhartha de ghníomhartha dlí de chuid an Aontais agus an dlí náisiúnta.

(12)

Agus na sonraíochtaí comhchoiteanna sin á leagan síos, ba cheart aird chuí a thabhairt ar na sonraíochtaí ábhartha um malartú sonraí a leagtar síos i ngníomhartha dlí ábhartha de chuid an Aontais, agus atá sna caighdeáin ábhartha Eorpacha agus idirnáisiúnta maidir le malartú sonraí, lena n-áirítear caighdeáin ilmhódacha na bprionsabal agus na moltaí a leagtar amach sa Teachtaireacht ón gCoimisiún an 23 Márta 2017 dar teideal “An Creat Eorpach Idir-Inoibritheachta - Straitéis um Chur chun Feidhme”, ina soláthraítear cur chuige maidir le seachadadh seirbhísí poiblí digiteacha Eorpacha arna chomhaontú go comhchoiteann ag na Ballstáit. Ina theannta sin, ba cheart cúram cuí a dhéanamh go mbeadh na sonraíochtaí seo i gcónaí neodrach ó thaobh na teicneolaíochta de agus oscailte do theicneolaíochtaí nuálacha.

(13)

D’fhonn costais a íoslaghdú ar údaráis inniúla agus oibreoirí eacnamaíocha araon, d’fhéadfaí bunú pointí rochtana do na húdaráis inniúla a mheas. Is mar idirghabhálaithe idir na hardáin eFTI agus údaráis inniúla, agus mar sin amháin, a d’fheidhmeodh na pointí rochtana sin agus, dá bhrí sin, na sonraí eFTI a mbíonn an rochtain orthu á láimhseáil ag na pointí rochtana sin, níor cheart dóibh na sonraí sin a stóráil ná a phróiseáil ach amháin i gcás meiteashonraí a bhaineann le próiseáil sonraí eFTI, amhail logaí oibriúcháin atá riachtanach chun críoch faireacháin nó staidrimh. D’fhéadfadh Ballstáit a chomhaontú pointí rochtana comhpháirteacha a bhunú dá gcuid údarás inniúil faoi seach freisin.

(14)

Ba cheart, leis an Rialachán seo, na ceanglais fheidhmiúla is infheidhme a bhunú maidir le hardáin eFTI ar cheart d’oibreoirí eacnamaíocha úsáid a bhaint astu chun an fhaisnéis rialála faoi iompar lastais a chur ar fáil d’údaráis inniúla i bhfoirm leictreonach chun na coinníollacha a chomhlíonadh le go mbeadh ceangal ar údaráis inniúla glacadh leis an bhfaisnéis sin, mar a leagtar síos sa Rialachán seo. Ba cheart ceanglais a bhunú chomh maith do sholáthraithe seirbhísí ardáin tríú páirtí (soláthraithe seirbhísí eFTI). Leis na ceanglais sin, ba cheart a áirithiú, go sonrach, nach féidir sonraí eFTI ar fad a phróiseáil ach amháin i gcomhréir le córas cuimsitheach cearta-bhunaithe um rialú rochtana lena sanntar feidhmiúlachtaí, gur féidir rochtain láithreach a bheith ag gach údarás inniúil ar na sonraí sin i gcomhréir lena n-inniúlachtaí forfheidhmithe rialála faoi seach, gur cheart próiseáil sonraí pearsanta trí mhodh leictreonach, ar sonraí iad a éilítear mar chuid den fhaisnéis rialála faoi iompar lastais, a dhéanamh i gcomhréir le Rialachán (AE) 2016/679 ó Pharlaimint na hEorpa agus ón gComhairle (6), agus nuair a bhíonn faisnéis tráchtála íogair á próiseáil, go ndéantar an phróiseáil sin ar bhealach ina n-urramaítear rúndacht na faisnéise sin.

(15)

Ba cheart don Choimisiún sonraíochtaí a ghlacadh maidir leis na ceanglais fheidhmiúla maidir le hardáin eFTI. Agus na sonraíochtaí sin á nglacadh ag an gCoimisiún, ba cheart dó féachaint le hidir-inoibritheacht ardáin eFTI a áirithiú, chun malartú sonraí idir na hardáin sin a éascú agus chun deis a thabhairt d’oibreoirí eacnamaíocha an t-ardán eFTI is rogha leo a úsáid. Chun cur chun feidhme a éascú agus na costais a íoslaghdú, ba cheart don Choimisiún na réitigh theicniúla ábhartha agus na caighdeáin arna n-úsáid ag córais TFC atá ann cheana a chur san áireamh freisin. Ag an am céanna, ba cheart don Choimisiún a áirithiú go mbeidh na sonraíochtaí sin fós neodrach ó thaobh na teicneolaíochta de a mhéid is féidir, chun nuálaíocht leanúnach a spreagadh agus chun gaibhniú teicneolaíochta a sheachaint.

(16)

Chun muinín na n-oibreoirí eacnamaíocha agus na n-údarás inniúil araon a fhorbairt maidir le comhlíonadh na gceanglas feidhmiúil sin ag ardáin eFTI agus ag soláthraithe seirbhísí eFTI, ba cheart do na Ballstáit córas deimhniúcháin a chur i bhfeidhm a mbeadh taca curtha faoi ag creidiúnú i gcomhréir le Rialachán (CE) Uimh. 765/2008 ó Pharlaimint na hEorpa agus ón gComhairle (7). Chun leas a bhaint as na tairbhí deimhnithe, moltar do sholáthraithe córas TFC atá in úsáid cheana a áirithiú go gcomhlíonann na córais sin na ceanglais maidir le hardáin eFTI a leagtar síos sa Rialachán seo a lorg, agus iarratas a dhéanamh ar dheimhniú. Ba cheart go ndéanfaí an deimhniú ar chórais TFC gan mhoill.

(17)

A bhuí le hardáin eFTI a úsáid, tugtar ráthaíochtaí d’oibreoirí eacnamaíocha go nglacfar le faisnéis rialála agus tugtar rochtain iontaofa shlán ar an bhfaisnéis sin d’údaráis inniúla. Mar sin féin, d’ainneoin na hoibleagáide ar gach údarás inniúil glacadh leis an bhfaisnéis a chuirtear ar fáil trí ardán eFTI deimhnithe i gcomhréir leis an Rialachán seo, ba cheart go bhféadfaí úsáid a bhaint as córais TFC eile má roghnaíonn an Ballstát déanamh amhlaidh. Ag an am céanna, níor cheart de thoradh an Rialacháin seo cosc a chur ar úsáid ardáin eFTI idir gnó amháin agus gnó eile, nó cosc a chur ar fheidhmiúlachtaí breise ar ardáin eFTI, ar choinníoll nach ndéanann sé sin difear dochrach do phróiseáil na faisnéise rialála a thagann faoi raon feidhme an Rialacháin seo i gcomhréir le ceanglais an Rialacháin seo.

(18)

Chun coinníollacha aonfhoirmeacha i dtaca le cur chun feidhme na hoibleagáide glacadh le faisnéis rialála a chuirtear ar fáil i bhfoirm leictreonach de bhun an Rialacháin seo a áirithiú, ba cheart cumhachtaí cur chun feidhme a thabhairt don Choimisiún. Go sonrach, ba cheart cumhachtaí cur chun feidhme a thabhairt don Choimisiún chun nósanna imeachta comhchoiteanna agus rialacha mionsonraithe a bhunú d’údaráis inniúla maidir le rochtain a fháil agus próiseáil a dhéanamh ar an bhfaisnéis rialála sin i gcás ina gcuirfidh na hoibreoirí eacnamaíocha lena mbaineann an fhaisnéis sin ar fáil go leictreonach, lena n-áirítear rialacha mionsonraithe agus sonraíochtaí teicniúla, chun rialacha sonraíochtaí mionsonraithe a bhunú le haghaidh chur chun feidhme na gceanglas maidir le hardáin eFTI agus soláthraithe seirbhísí eFTI. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (8).

(19)

Chun cur i bhfeidhm cuí an Rialacháin seo a áirithiú, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i ndáil le Cuid A d’Iarscríbhinn I a leasú, chun aon ghníomhartha tarmligthe nó cur chun feidhme arna nglacadh ag an gCoimisiún agus lena mbunaítear ceanglais nua an Aontais um fhaisnéis rialála i dtaca le hiompar earraí a chur san áireamh; agus i ndáil le Cuid B d’Iarscríbhinn I a leasú, chun liostaí na gceanglas um fhaisnéis rialála i ndlí náisiúnta dar thug na Ballstáit fógra don Choimisiún ina leith i gcomhréir leis an Rialachán seo a chur san áireamh, agus chun aon fhoráil nua den dlí náisiúnta ábhartha a chur san áireamh lena dtugtar isteach athruithe ar na ceanglais náisiúnta um fhaisnéis rialála, nó lena leagtar síos ceanglais nua ábhartha um fhaisnéis rialála a thagann faoi raon feidhme an Rialacháin seo agus dar thug na Ballstáit fógra don Choimisiún ina leith i gcomhréir leis an Rialachán seo; agus i dtaca leis an Rialachán seo a fhorlíonadh trí thacar comhchoiteann sonraí agus fothacair chomhchoiteanna sonraí a bhunú agus a leasú i ndáil leis na ceanglais ábhartha um fhaisnéis rialála a chumhdaítear leis an Rialachán seo; agus trí ghnéithe teicniúla áirithe den Rialachán seo a chomhlánú, is é sin maidir leis na rialacha i ndáil le deimhniú agus úsáid mharc deimhniúcháin na n-ardán eFTI agus i ndáil le deimhniú agus úsáid mharc deimhniúcháin na soláthraithe seirbhísí eFTI. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (9).

Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe. Ina theannta sin, tá sé tábhachtach maidir le forbairt agus ullmhú na ngníomhartha sin go mbeidh na geallsealbhóirí ábhartha uile rannpháirteach sna fóraim iomchuí, amhail an grúpa saineolaithe a bunaíodh le Cinneadh ón gCoimisiún an 13 Meán Fómhair 2018 ina gcuirtear ar bun “an Fóram Digiteach Iompair agus Lóistíochta”.

(20)

Ós rud é nach féidir leis na Ballstáit cuspóirí an Rialacháin seo a ghnóthú go leordhóthanach, eadhon cur chuige aonfhoirmeach a áirithiú maidir le glacadh ag údaráis inniúla le faisnéis faoi iompair lastais a chuirtear ar fáil go leictreonach agus, de bharr an ghá atá le ceanglais chomhchoiteanna a bhunú, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(21)

Ba cheart an próiseáil sonraí pearsanta trí mhodhanna leictreonacha a bhfuil gá leis mar chuid den fhaisnéis rialála maidir le hiompair lasta a dhéanamh i gcomhréir le Rialachán (AE) 2016/679.

(22)

Ba cheart don Choimisiún meastóireacht a dhéanamh ar an Rialachán seo. Ba cheart faisnéis a bhailiú chun bonn eolais a chur faoin meastóireacht sin, agus chun measúnú a dhéanamh ar fheidhmíocht an Rialacháin seo i gcoinne an cuspóir atá á shaothrú léi.

(23)

Ar mhaithe le forfheidhmiú éifeachtach agus éifeachtúil, ní mór rochtain dhíreach agus fíor-ama a bheith ag gach údarás inniúil ar fhaisnéis rialála ábhartha i bhfoirm leictreonach. Chuige sin, agus i gcomhréir leis an bprionsabal “digiteach mar réamhshocrú”, mar a luadh sa Teachtaireacht ón gCoimisiún an 19 Aibreán 2016 dar teideal “Plean Gníomhaíochta Ríomhrialtais an Aontais Eorpaigh 2016-2020 – Dlús a chur le claochlú digiteach rialtais”, ba cheart tús áite a thabhairt d’úsáid an mhodha leictreonaigh chun faisnéis rialála a mhalartú idir na hoibreoirí eacnamaíocha agus údaráis inniúla. Dá bhrí sin, ba cheart don Choimisiún measúnú a dhéanamh ar thionscnaimh a d’fhéadfadh a bheith ann d’fhonn oibleagáid a bhunú ar oibreoirí eacnamaíocha modh leictreonach a úsáid chun faisnéis rialála a chur ar fáil d’údaráis inniúla. Ba cheart don Choimisiún tionscnaimh chomhfhreagracha a mholadh, i gcás inarb iomchuí, lena n-áirítear leasuithe a d’fhéadfaí a dhéanamh ar an Rialachán seo agus ar ghníomhartha dlí ábhartha eile de chuid an Aontais. D’fhonn feabhas a chur ar chumas forfheidhmiúcháin na n-údarás inniúla agus d’fhonn costais a íoslaghdú ar na húdaráis inniúla agus ar na hoibreoirí eacnamaíocha araon, ba cheart don Choimisiún breithniú a dhéanamh freisin ar bhearta breise amhail idir-inoibritheacht fheabhsaithe chórais agus ardáin TFC agus pointe rochtana comhchoiteann ar na córais agus na hardáin sin a úsáidtear chun faisnéis rialála a thaifeadadh agus a phróiseáil dá bhforáiltear i ndlí éagsúil iompair de chuid an Aontais.

(24)

Ní féidir an Rialachán seo a chur i bhfeidhm go héifeachtúil go dtí go gcuirfear na gníomhartha tarmligthe agus cur chun feidhme dá bhforáiltear ann i bhfeidhm. Ar an gcúis sin, tá oibleagáid dhlíthiúil ar an gCoimisiún na gníomhartha tarmligthe agus cur chun feidhme sin a ghlacadh agus ba cheart dó tosú láithreach ag obair orthu chun a áirithiú go nglacfar na sonraíochtaí ábhartha go tráthúil, i gcás inar féidir, roimh na spriocdhátaí faoi seach a leagtar síos sa Rialachán seo. Is den riachtanas é na gníomhartha tarmligthe agus cur chun feidhme sin a ghlacadh go tráthúil chun go mbeidh go leor ama ag na Ballstáit agus ag na hoibreoirí eacnamaíocha na bearta is gá a dhéanamh i gcomhréir leis an Rialachán seo. Dá bhrí sin, ba cheart tréimhsí cur i bhfeidhm éagsúla sa Rialachán seo a leagan amach dá réir.

(25)

Ar an gcaoi chéanna, ba cheart oibleagáid na mBallstát fógra a thabhairt, faoin Rialachán seo, a dhéanamh laistigh de 1 bhliain ón dáta a dtiocfaidh an Rialachán seo i bhfeidhm, chun gur féidir leis an gCoimisiún an chéad ghníomh tarmligthe de bhun an Rialacháin seo, a ghlacadh go tráthúil.

(26)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 28(2) de Rialachán (CE) Uimh. 45/2001 ó Pharlaimint na hEorpa agus ón gComhairle (10),

(1)

Chun earnáil iompair de bhóthar atá sábháilte, éifeachtúil agus freagrach go sóisialta a chruthú, is gá dálaí oibre leordhóthanacha agus cosaint shóisialta a áirithiú do thiománaithe, ar thaobh amháin, agus dálaí oiriúnacha a áirithiú do ghnólachtaí agus don iomaíocht chóir d’oibreoirí iompair de bhóthar (“oibreoirí”), ar an taobh eile. I bhfianaise ardleibhéal shoghluaisteacht an lucht saothair in earnáil an iompair de bhóthar, tá gá le rialacha earnáilsonracha chun a áirithiú go mbainfear amach an chothromaíocht idir saoirse na n-oibreoirí chun seirbhísí trasteorann a sholáthar, saorghluaiseacht earraí, dálaí oibre leordhóthanacha agus cosaint shóisialta do thiománaithe.

(2)

I bhfianaise ardleibhéal na soghluaisteachta a bhaineann go dúchasach le seirbhísí iompair de bhóthar, ní mór aird ar leith a thabhairt ar a áirithiú go mbainfidh tiománaithe leas as na cearta a bhfuil siad ina dteideal agus nach mbeidh ar oibreoirí, ar fiontair bheaga iad a bhformhór, déileáil le bacainní riaracháin díréireacha nó le rialuithe idirdhealaitheacha a chuirfeadh bac míchuí ar an tsaoirse atá acu seirbhísí trasteorann a sholáthar. Ar an gcúis chéanna, ní mór aon rialacha náisiúnta a chuirtear i bhfeidhm maidir le hiompar de bhóthar a bheith comhréireach agus údar cuí a bheith leo, á chur san áireamh gur gá dálaí leordhóthanacha oibre agus cosaint shóisialta do thiománaithe a áirithiú agus feidhmiú na saoirse seirbhísí iompair de bhóthar a sholáthar atá bunaithe ar an iomaíocht chóir idir oibreoirí náisiúnta agus oibreoirí coigríche a éascú.

(3)

An chothromaíocht idir dálaí sóisialta agus oibre do thiománaithe a fheabhsú agus éascú a dhéanamh ar fheidhmiú na saoirse seirbhísí iompair de bhóthar a sholáthar atá bunaithe ar an iomaíocht chóir idir oibreoirí náisiúnta agus oibreoirí ón gcoigríoch, tá an chothromaíocht sin ríthábhachtach d’fheidhmiú rianúil an mhargaidh inmheánaigh.

(4)

Tar éis meastóireacht a dhéanamh ar éifeachtacht agus éifeachtúlacht reachtaíocht shóisialta an Aontais mar atá faoi láthair in earnáil an iompair de bhóthar, sainaithníodh lúba áirithe ar lár sna forálacha atá ann cheana agus easnaimh áirithe ina bhforfheidhmiú, amhail na cinn a bhaineann le húsáid a bhaint as cuideachtaí caocha. Ina theannta sin, tá roinnt neamhréireachtaí i léirmhíniú, cur i bhfeidhm agus cur chun feidhme na bhforálacha sin idir na Ballstáit, rud a chruthaíonn ualach trom riaracháin do thiománaithe agus oibreoirí. Cruthaíonn sé sin éiginnteacht dhlíthiúil, rud atá díobhálach do dhálaí oibre agus sóisialta tiománaithe agus do na dálaí iomaíochta córa d’oibreoirí san earnáil.

(5)

Chun a áirithiú go ndéanfar Treoracha 96/71/CE (4) agus 2014/67/AE (5) ó Pharlaimint na hEorpa agus ón gComhairle a chur i bhfeidhm mar is ceart, ba cheart na rialuithe agus an comhar ar leibhéal an Aontais chun dul i ngleic le calaois i ndáil le tiománaithe a phostú a neartú.

(6)

D’aithin an Coimisiún, sa togra uaidh an 8 Márta 2016 le haghaidh athbhreithniú ar Threoir 96/71/CE, go dtarraingnítear anuas le cur chun feidhme na Treorach sin ceisteanna agus deacrachtaí sonracha dlíthiúla in earnáil an iompair de bhóthar atá fíor-shoghluaiste agus léirigh sé gurbh fhearr aghaidh a thabhairt ar na saincheisteanna sin trí bhíthin reachtaíocht earnáilsonrach maidir le hiompar de bhóthar.

(7)

Chun cur chun feidhme éifeachtach comhréireach Threoir 96/71/CE in earnáil an iompair de bhóthar a áirithiú, is gá rialacha earnáilsonracha a bhunú lena léireofar sainiúlachtaí an lucht saothair atá fíor-shoghluaiste in earnáil an iompair de bhóthar agus lena gcruthófar cothromaíocht idir cosaint shóisialta na dtiománaithe agus saoirse na n-oibreoirí seirbhísí iompair trasteorann a sholáthar. Tá feidhm ag na forálacha maidir le hoibrithe a phostú, i dTreoir 96/71/CE, agus ag na forálacha maidir le forfheidhmiú na bhforálacha sin, i dTreoir 2014/67/AE, i leith earnáil an iompair de bhóthar agus ba cheart iad a chur faoi réir na rialacha sonracha a leagtar síos sa Treoir seo.

(8)

Mar gheall ar nádúr fíor-shoghluaiste na hearnála iompair, ní dhéantar, de ghnáth, tiománaithe a phostú faoi chonarthaí seirbhíse chuig Ballstát eile ar feadh tréimhsí fada, rud a tharlaíonn in amanna in earnálacha eile. Dá bhrí sin, ba cheart a shoiléiriú go sainráite cé na himthosca nach mbeidh feidhm, maidir leis na tiománaithe sin, ag na rialacha maidir le postú fadtéarmach i dTreoir 96/71/CE.

(9)

Ba cheart rialacha earnáil sonracha cothromaithe maidir le postú a bheith bunaithe ar nasc leordhóthanach a bheith idir an tiománaí agus an tseirbhís a sholáthraítear, agus críoch Ballstáit óstaigh. Le héascú a dhéanamh ar fhorfheidhmiú na rialacha sin, ba cheart idirdhealú a dhéanamh idir cineálacha éagsúla oibríochtaí iompair ag brath ar a mhéid atá siad nasctha le críoch an Bhallstáit óstaigh.

(10)

I gcás ina dtéann tiománaí i mbun oibríochtaí iompair déthaobhacha ón mBallstát ina bhfuil an gnóthas bunaithe (“Ballstát bunaíochta”) go dtí críoch Ballstáit eile nó go dtí tríú tír nó ar ais go dtí an Ballstát bunaíochta, bíonn dlúthnasc idir cineál na seirbhíse agus an Ballstát bunaíochta. D’fhéadfadh sé go ndéanfadh tiománaí roinnt oibríochtaí iompair déthaobhacha le linn aon turais amháin. Srian díréireach ar an tsaoirse a bheadh ann seirbhísí iompair de bhóthar trasteorann a sholáthar dá mbeadh feidhm ag na rialacha maidir le postú, agus ar an gcaoi sin ag na téarmaí agus coinníollacha fostaíochta a ráthaítear sa Bhallstát óstach, i leith na n-oibríochtaí déthaobhacha sin.

(11)

Ba cheart a shoiléiriú nach ionann iompar idirnáisiúnta idirthurais trí chríoch Bhallstáit agus postú. Is saintréithe de chuid oibríochtaí den sórt sin go dtrasnaíonn an tiománaí an Ballstát gan lasta a lódáil nó a dhílódáil agus gan paisinéirí a phiocadh suas ná a ligean amach agus, dá bhrí sin, níl aon nasc suntasach idir gníomhaíochtaí an tiománaí agus an Ballstát trína ndéantar idirthuras. Dá bhrí sin, ní dhéanann stadanna a bhaineann, mar shampla, le cúiseanna sláinteachais difear do cháiliú láithreacht an tiománaí i mBallstát mar idirthuras.

(12)

Nuair a bhíonn tiománaí i mbun oibríocht iompair chomhcheangailte, bíonn dlúthnasc idir cineál na seirbhíse a sholáthraítear le linn na céime bóthair tosaigh nó deiridh leis an mBallstát bunaíochta más oibríocht iompair dhéthaobhach an chéim bhóthair inti féin. Os a choinne sin, nuair a dhéantar an oibríocht iompair le linn na céime bóthair sa Bhallstát óstach nó nuair is oibríocht idirnáisiúnta iompair neamh-dhéthaobhach í, is leor an nasc idir críoch an Bhallstáit óstaigh agus ar an ábhar sin ba cheart feidhm a bheith ag na rialacha maidir le postú.

(13)

I gcás ina ndéanann tiománaí cineálacha eile oibríochtaí, go háirithe oibríochtaí cabatáiste nó oibríochtaí iompair idirnáisiúnta neamh-dhéthaobhacha, is leor an nasc le críoch an Bhallstáit óstaigh. Is ann don nasc i gcás oibríochtaí cabatáiste mar a shainmhínítear i Rialacháin (CE) Uimh. 1072/2009 (6) agus (CE) Uimh. 1073/2009 (7) ó Pharlaimint na hEorpa agus ón gComhairle ós rud é go mbíonn an oibríocht iompair ina hiomláine á déanamh i mBallstát óstach agus dá bhrí sin go mbíonn dlúthnasc idir an tseirbhís agus críoch an Bhallstáit óstaigh. Is saintréith a bhaineann le hoibríocht iompair idirnáisiúnta neamh-dhéthaobhach go mbíonn an tiománaí i mbun iompar idirnáisiúnta lasmuigh de Bhallstát bunaíochta an ghnóthais a dhéanann an postú. Bíonn nasc idir na seirbhísí a chuirtear ar fáil dá bharr leis na Ballstáit óstacha lena mbaineann seachas leis an mBallstát bunaíochta féin. Sna cásanna sin, ní bhíonn rialacha earnáilsonracha de dhíth ach amháin maidir le riachtanais riaracháin agus bearta rialaithe.

(14)

Ba cheart do na Ballstáit a áirithiú, i gcomhréir le Treoir 2014/67/AE, go gcuirfear ar fáil ar bhealach inrochtana agus trédhearcach do ghnóthais iompair ó Bhallstáit eile agus do thiománaithe ar postú na téarmaí agus coinníollacha fostaíochta dá dtagraítear in Airteagal 3 de Threoir 96/71/CE, ar téarmaí agus coinníollacha iad a leagtar síos le forálacha náisiúnta reachtaíochta, rialúcháin nó riaracháin, nó le comhaontuithe comhchoiteanna nó dámhachtain eadrána ar fógraíodh iad a bheith infheidhme ina gcríocha go huilíoch nó atá infheidhme ar bhealach eile i gcomhréir le hAirteagal 3(1) agus (8) de Threoir 96/71/CE. Ba cheart a áireamh leis sin, i gcás inarb ábhartha, na téarmaí agus coinníollacha fostaíochta sin a leagtar síos le comhaontuithe comhchoiteanna is infheidhme go ginearálta maidir le gach gnóthas comhchosúil sa limistéar geografach lena mbaineann. Ba cheart a chumhdach leis an bhfaisnéis ábhartha, go háirithe, na comhghnéithe den luach saothair atá éigeantach faoi na hionstraimí sin. I gcomhréir le Treoir 2014/67/AE, caithfear rannpháirtíocht na gcomhpháirtithe sóisialta a lorg.

(15)

Bíonn dúshlán roimh oibreoirí an Aontais i bhfoirm iomaíocht mhéadaitheach ó oibreoirí atá bunaithe i dtríú tíortha. Dá bhrí sin, tá sé ríthábhachtach a áirithiú nach ndéanfar leithcheal ar oibreoirí an Aontais. De réir Airteagal 1(4) de Threoir 96/71/CE, ní ceadmhach caitheamh ar bhonn níos fabhraí le gnóthais atá bunaithe i Stát nach Ballstát é ná mar a chaitear le gnóthais atá bunaithe i mBallstát. Ba cheart feidhm a bheith ag an bprionsabal sin freisin maidir leis na rialacha sonracha maidir le postú dá bhforáiltear sa Treoir seo. Go háirithe, ba cheart feidhm a bheith aige i gcás ina ndéanann oibreoirí tríú tír oibríochtaí iompair faoi chomhaontuithe déthaobhacha nó iltaobhacha lena ndeonaítear rochtain ar mhargadh an Aontais.

(16)

Tá córas cuótaí iltaobhach Chomhdháil Eorpach na nAirí Iompair (“ECMT”) ar cheann de na príomhionstraimí lena rialaítear an rochtain a bhíonn ag oibreoirí tríú tír ar mhargadh an Aontais agus an rochtain a bhíonn ag oibreoirí an Aontais ar mhargaí tríú tír. Déantar líon na gceadanna a shanntar do gach Ballstát in ECMT a chinneadh ar bhonn bliantúil. Ní mór do na Ballstáit a n-oibleagáid a chomhlíonadh gan leithcheal a dhéanamh ar ghnóthais de chuid an Aontais, lena n-áirítear nuair a bheidh coinníollacha á gcomhaontú acu maidir le rochtain a fháil ar mhargadh an Aontais laistigh de ECMT.

(17)

Is ag an Aontas atá an chumhacht, mar chuid dá inniúlachtaí seachtracha eisiacha, an Comhaontú Eorpach maidir le hObair Foirne Feithiclí ag gabháil d’Iompar Idirnáisiúnta de Bhóthar (“AETR”) a chaibidliú agus a thabhairt i gcrích. I gcomhréir le hAirteagal 2(3) de Rialachán (CE) Uimh. 561/2006 ó Pharlaimint na hEorpa agus ón gComhairle (8), ba cheart don Aontas na sásraí rialaithe sin is féidir a úsáid chun rialú a dhéanamh ar urramú na rialacha sóisialta náisiúnta agus rialacha sóisialta an Aontais a dhéanann gnóthais tríú tír a ailíniú leis na sásra rialaithe lena mbíonn feidhm maidir le gnóthais de chuid an Aontais.

(18)

Chonacthas go raibh deacrachtaí i ndáil leis na rialacha maidir le hoibrithe a phostú a shonraítear i dTreoir 96/71/CE agus na rialacha maidir leis na ceanglais riaracháin a leagtar síos i dTreoir 2014/67/AE a chur i bhfeidhm i leith earnáil an iompair de bhóthar atá fíor-shoghluaiste. Gineadh éiginnteacht dhlíthiúil agus ualach trom riaracháin d’oibreoirí neamhchónaitheacha an Aontais leis na bearta náisiúnta neamh-chomhordaithe maidir leis na forálacha i dtaca le hoibrithe a phostú in earnáil an iompair de bhóthar a chur i bhfeidhm agus a fhorfheidhmiú. As sin, tháinig srianta míchuí ar an tsaoirse seirbhísí iompair trasteorann a sholáthar, maille le fo-éifeachtaí diúltacha ar phoist agus ar iomaíochas na n-oibreoirí. Dá bhrí sin, is gá ceanglais riaracháin agus bearta rialaithe a chomhchuibhiú. D’fhágfadh sin nach gcuirfí moilleanna neamhriachtanacha ar oibreoirí.

(19)

Chun forfheidhmiú éifeachtach éifeachtúil na rialacha earnáilsonracha maidir le hoibrithe a phostú a áirithiú agus chun ualach riaracháin míréireach ar oibreoirí neamhchónaitheacha an Aontais a sheachaint, ba cheart ceanglais shonracha riaracháin agus bearta sonracha rialaithe a bhunú in earnáil an iompair de bhóthar, agus leas iomlán á bhaint as uirlisí rialaithe amhail an tacagraf digiteach. Chun faireachán a dhéanamh ar chomhlíonadh na n-oibleagáidí a leagtar amach sa Treoir seo agus i dTreoir 96/71/CE, agus, ag an am céanna, chun castacht an chúraim sin a laghdú, níor cheart na Ballstáit a bheith a fhorchur ar oibreoirí ach na ceanglais riaracháin agus na bearta rialaithe a shonraítear sa Treoir seo, ar ceanglais agus bearta iad atá curtha in oiriúint d’earnáil an iompair de bhóthar.

(20)

Bíonn gá ag gnóthais iompair le cinnteacht dhlíthiúil maidir leis na rialacha agus na ceanglais nach mór dóibh iad a chomhlíonadh. Ba cheart do na rialacha agus na ceanglais sin a bheith soiléir, intuigthe agus inrochtana go héasca ag gnóthais iompair, agus ba cheart a bheith in ann, mar gheall orthu, seiceálacha éifeachtacha a dhéanamh. Tá sé tábhachtach nach dtabharfar isteach ualach riaracháin nach gá le rialacha nua agus go gcuirfear san áireamh iontu leasanna fiontar beag agus meánmhéide.

(21)

Ba cheart an t-ualach riaracháin agus na cúraimí bainistithe doiciméad a bheidh ar thiománaithe a bheith réasúnta. Dá bhrí sin, cé gur cheart roinnt doiciméad a bheith ar fáil san fheithicil le cigireacht a dhéanamh orthu le linn seiceálacha cois bóthair, ba cheart do na hoibreoirí agus, i gcás inar gá, údaráis inniúla Bhallstát bunaíochta an oibreora doiciméid eile a chur ar fáil tríd an gcomhéadan poiblí atá nasctha le Córas Faisnéise an Mhargaidh Inmheánaigh (“IMI”) a bunaíodh le Rialachán (AE) Uimh. 1024/2012 ó Pharlaimint na hEorpa agus ón gComhairle (9). Ba cheart do na húdaráis inniúla úsáid a bhaint as an gcreat le haghaidh cúnamh frithpháirteach idir Ballstáit a leagtar amach i dTreoir 2014/67/AE.

(22)

Chun an rialú ar chomhlíonadh na rialacha maidir le postú a leagtar amach sa Treoir seo a éascú, ba cheart d’oibreoirí iompair de bhóthar dearbhú maidir le postú a chur faoi bhráid údaráis inniúla na mBallstát ina ndéanann siad tiománaithe a phostú.

(23)

Chun an t-ualach riaracháin ar oibreoirí a laghdú, is gá simpliú a dhéanamh ar an bpróiseas lena seoltar agus lena nuashonraítear dearbhuithe maidir le postú. Dá bhrí sin, ba cheart don Choimisiún comhéadan poiblí ilteangach a fhorbairt, comhéadan ar a mbeidh rochtain ag oibreoirí agus trínar féidir leo faisnéis maidir le postú a thíolacadh agus a nuashonrú agus doiciméid ábhartha eile a chur faoi bhráid IMI, de réir mar is gá.

(24)

Ós rud é go mbíonn ról ríthábhachtach ag comhpháirtithe sóisialta maidir le reachtaíocht shóisialta in earnáil an iompair de bhóthar a fhorfheidhmiú i roinnt Ballstát, ba cheart cead a bheith ag na Ballstáit an fhaisnéis ábhartha a roinneadh trí IMI a sholáthar do chomhpháirtithe sóisialta náisiúnta chun comhlíonadh na rialacha maidir le postú a sheiceáil, agus chun na críche sin amháin, agus Rialachán (AE) 2016/679 ó Pharlaimint na hEorpa agus ón gComhairle (10) á urramú ag an am céanna. Ba cheart an fhaisnéis ábhartha a sholáthar do na comhpháirtithe sóisialta trí mhodhanna eile seachas trí IMI.

(25)

Chun coinníollacha aonfhoirmeacha a áirithiú maidir leis an Treoir seo a chur chun feidhme, ba cheart cumhachtaí cur chun feidhme a thabhairt don Choimisiún chun feidhmiúlachtaí an chomhéadain poiblí atá nasctha leis an IMI a shonrú. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (11).

(26)

Tá sé ríthábhachtach na rialacha maidir le ham oibre agus am scíthe a fhorfheidhmiú go hiomchuí, go héifeachtach agus go comhsheasmhach chun feabhas a chur ar shábháilteacht ar bhóithre, chun dálaí oibre tiománaithe a chosaint agus chun saobhadh iomaíochta de thoradh neamh-chomhlíontachta a chosc. Dá bhrí sin, tá sé inmhianaithe raon feidhme na gceanglas forfheidhmithe aonfhoirmeach atá ann cheana a leagtar amach i dTreoir 2006/22/CE ó Pharlaimint na hEorpa agus ón gComhairle (12) a leathnú ionas go gcumhdófaí rialú chomhlíonadh na bhforálacha ama oibre a leagtar amach i dTreoir 2002/15/CE ó Pharlaimint na hEorpa agus ón gComhairle (13).

(27)

I bhfianaise na sraithe sonraí atá riachtanach chun rialuithe ar chomhlíonadh na rialacha maidir le ham oibre a leagtar amach i dTreoir 2002/15/CE a dhéanamh, braitheann méid na seiceálacha cois bóthair ar theicneolaíocht chumasúcháin a fhorbairt agus a thabhairt isteach, rud a fhágann gur féidir tréimhsí ama leordhóthanacha a chumhdach. Ba cheart seiceálacha cois bóthair a bheith teoranta do na gnéithe sin is féidir a sheiceáil go héifeachtúil tríd an tacagraf agus an trealamh taifeadta gaolmhar ar bord, agus níor cheart seiceálacha cuimsitheacha a dhéanamh ach ar an áitreabh amháin.

(28)

Ba cheart seiceálacha cois bóthair a dhéanamh go héifeachtúil agus go gasta, d’fhonn na seiceálacha sin a chur i gcrích sa tréimhse ama is giorra is féidir agus leis an moill is lú is féidir don tiománaí. Ba cheart idirdhealú soiléir a dhéanamh idir oibleagáidí na n-oibreoirí agus oibleagáidí na dtiománaithe.

(29)

Ba cheart an comhar idir údaráis forfheidhmithe na mBallstát a chur chun cinn a thuilleadh trí sheiceálacha comhbheartaithe; ba cheart do na Ballstáit féachaint leis na seiceálacha comhbheartaithe sin a dhéanamh ar an áitreabh chomh maith. D’fhéadfadh ról tábhachtach maidir le cúnamh a thabhairt do na Ballstáit seiceálacha comhbheartaithe a dhéanamh a bheith ag an Údarás Eorpach Saothair, a chumhdaíonn raon feidhme a ghníomhaíochtaí, mar a leagtar amach in Airteagal 1(4) de Rialachán (AE) 2019/1149 ó Pharlaimint na hEorpa agus ón gComhairle (14) Treoir 2006/22/CE.

(30)

Is léir go bhfuil an comhar riaracháin idir na Ballstáit maidir le cur chun feidhme na rialacha sóisialta in earnáil an iompair de bhóthar neamh-leordhóthanach, rud a fhágann go bhfuil an forfheidhmiú trasteorann níos deacra, neamhéifeachtúil agus neamh-chomhsheasmhach. Dá bhrí sin, is gá creat a bhunú le haghaidh cumarsáid éifeachtach agus cúnamh frithpháirteach, lena n-áirítear sonraí a mhalartú maidir le sáruithe agus faisnéis a mhalartú maidir le dea-chleachtais forfheidhmiúcháin.

(31)

D’fhonn comhar éifeachtach riaracháin agus malartú éifeachtach faisnéise a chothú, le Rialachán (CE) Uimh. 1071/2009 ó Pharlaimint na hEorpa agus ón gComhairle (15), ceanglaítear ar na Ballstáit a gcláir leictreonacha náisiúnta a idirnascadh trí chóras Chlár Eorpach na nGnóthas Iompair de Bhóthar (ERRU). Ba cheart raon na faisnéise is féidir a rochtain tríd an gcóras sin agus na seiceálacha cois bóthair á ndéanamh a mhéadú.

(32)

Chun an chumarsáid idir na Ballstáit a éascú agus a fheabhsú, chun a áirithiú go gcuirtear rialacha sóisialta i bhfeidhm ar bhealach níos aonfhoirmí in earnáil an iompair de bhóthar agus chun comhlíonadh riachtanas riaracháin arna dhéanamh ag oibreoirí agus tiománaithe á bpostú acu a éascú, ba cheart don Choimisiún modúl nua amháin nó níos mó a fhorbairt do IMI. Tá sé tábhachtach go gceadaítear le IMI seiceálacha bailíochta a dhéanamh ar dhearbhuithe maidir le postú le linn seiceálacha cois bóthair.

(33)

Ba cheart an malartú faisnéise i gcomhthéacs an chomhair riaracháin éifeachtaigh agus an chúnaimh fhrithpháirtigh idir na Ballstáit a bheith i gcomhréir leis na rialacha maidir le cosaint sonraí pearsanta a leagtar síos i Rialacháin (AE) 2016/679 agus (AE) 2018/1725 ó Pharlaimint na hEorpa agus ón gComhairle (16). Ba cheart an malartú faisnéise trí IMI Rialachán (AE) Uimh. 1024/2012 a chomhlíonadh chomh maith.

(34)

Chun éifeachtacht, éifeachtúlacht agus comhsheasmhacht an fhorfheidhmithe a fheabhsú, is inmhianaithe gnéithe na gcóras rátála riosca náisiúnta atá ann cheana a fhorbairt agus úsáid na gcóras sin a mhéadú. Le rochtain ar na sonraí atá i gcórais rátála riosca rialuithe, is fearr a bheadh údaráis rialaithe inniúla na mBallstát lena mbaineann in ann seiceálacha a dhíriú ar oibreoirí neamhchomhlíontacha. Le foirmle chomhchoiteann chun an rátáil riosca atá ag gnóthas iompair a ríomh, ba cheart rannchuidiú le cóir níos cothroime d’oibreoirí le linn seiceálacha.

(35)

Mar thoradh ar theacht i bhfeidhm Chonradh Liospóin, ba cheart na cumhachtaí a tugadh don Choimisiún faoi Threoir 2006/22/CE a ailíniú le hAirteagail 290 agus 291 den Chonradh ar Fheidhmiú an Aontais Eorpaigh (CFAE).

(36)

Chun coinníollacha aonfhoirmeacha a áirithiú maidir le Treoir 2006/22/CE a chur chun feidhme, ba cheart cumhachtaí cur chun feidhme a thabhairt don Choimisiún chun íoschéadatán na laethanta arna n-oibriú ag tiománaithe seiceáilte ag na Ballstáit a mhéadú go 4 %; chun sainmhínithe chatagóirí an staidrimh atá le bailiú a shoiléiriú tuilleadh; chun comhlacht a ainmniú maidir le malartú sonraí, taithí agus faisnéise idir na Ballstáit a chur chun cinn ar bhealach gníomhach; chun foirmle chomhchoiteann a bhunú chun an rátáil riosca atá ag gnóthas a ríomh; chun treoirlínte a bhunú ar an gcleachtas forfheidhmiúcháin is fearr; chun cur chuige comhchoiteann a bhunú maidir le tréimhsí oibre eile a thaifeadadh agus a rialú agus maidir le taifeadadh agus rialú tréimhsí seachtaine ar a laghad ina mbeidh an tiománaí ar shiúl ón bhfeithicil agus neamhábalta tabhairt faoi aon ghníomhaíochtaí leis an bhfeithicil sin; chun cur chuige comhchoiteann a chur chun cinn maidir leis an Treoir sin a chur chun feidhme; agus chun comhleanúnachas sa chur chuige idir údaráis forfheidhmithe agus léirmhíniú comhchuibhithe ar Rialachán (CE) Uimh. 561/2006 idir údaráis forfheidhmithe a spreagadh agus chun an t-idirphlé idir an earnáil iompair agus na húdaráis forfheidhmithe a éascú. Go háirithe, agus gníomhartha cur chun feidhme á nglacadh aige maidir le foirmle chomhchoiteann a bhunú chun an rátáil riosca atá ag gnóthas a ríomh, ba cheart don Choimisiún cóir chomhionann do ghnóthais a áirithiú agus na critéir a shonraítear sa Treoir seo á gcur san áireamh. Ba cheart na cumhachtaí cur chun feidhme sin a fheidhmiú i gcomhréir le Rialachán (AE) Uimh. 182/2011.

(37)

Chun forbairtí sa dea-chleachtas a léiriú i dtaca le seiceálacha agus trealamh caighdeánach a bheith ar fáil d’aonaid forfheidhmithe agus chun ualú tromchúiseachta na sáraithe i Rialachán (CE) Uimh. 561/2006 nó (AE) Uimh. 165/2014 ó Pharlaimint na hEopa agus ón gComhairle (17) a leagan síos nó a thabhairt cothrom le dáta, ba cheart an chumhacht chun gníomhartha a ghlacadh i gcomhréir le hAirteagal 290 den CFAE a tharmligean chuig an gCoimisiún i dtaca le hIarscríbhinní I agus II agus Iarscríbhinn III de Threoir 2006/22/CE, faoi seach, a leasú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (18). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(38)

Ba cheart, dá bhrí sin, Treoir 2006/22/CE a leasú dá réir sin.

(39)

Is iad seolaithe na rialacha áirithe speisialta maidir le postú iad gnóthais iompair agus glacann siad le hiarmhairtí aon sáruithe ar na rialacha sin a dhéanann siad. Mar sin féin, chun cosc a chur ar mhí-úsáid a dhéanfadh gnóthais a dhéanann conarthaí le hoibreoirí tarlaithe maidir le seirbhísí iompair de bhóthar, ba cheart do na Ballstáit foráil a dhéanamh do rialacha soiléire intuartha maidir le smachtbhannaí i gcoinne coinsíneoirí, seoltóirí lasta, conraitheoirí agus fochonraitheoirí i gcásanna ina raibh a fhios acu, nó, i bhfianaise na n-imthosca ábhartha uile gur cheart a fhios a bheith acu, go mbaineann sáruithe ar rialacha speisialta maidir le postú leis na seirbhísí a choimisiúnaigh siad.

(40)

Chun dálaí iomaíochta córa agus cothrom na Féinne a áirithiú d’oibrithe agus do ghnólachtaí, is gá dul chun cinn a dhéanamh i dtreo forfheidhmiú cliste agus an tacaíocht go léir is gá a sholáthar do thabhairt isteach iomlán agus úsáid córas rátála riosca.

(41)

Ba cheart don Choimisiún meastóireacht a dhéanamh ar thionchar chur i bhfeidhm agus fhorfheidhmiú na rialacha maidir le hoibrithe a phostú in earnáil an iompair de bhóthar agus tuarascáil ar thorthaí na meastóireachta sin a chur faoi bhráid Pharlaimint na hEorpa agus na Comhairle, maille le togra reachtach i gcás inarb iomchuí.

(42)

Ós rud é nach féidir leis na Ballstáit cuspóirí na Treorach seo, eadhon dálaí oibre leordhóthanacha agus cosaint shóisialta do thiománaithe a áirithiú, ar thaobh amháin, agus dálaí oiriúnacha do ghnólachtaí agus d’iomaíocht chóir d’oibreoirí, ar an taobh eile, a ghnóthú go leordhóthanach agus, de bharr fhairsinge agus éifeachtaí na Treorach seo, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(43)

Ba cheart feidhm a bheith ag na bearta náisiúnta lena dtrasuítear an Treoir seo ón dáta 18 mí tar éis dháta theacht i bhfeidhm na Treorach seo. Tá feidhm le bheith ag Treoir (AE) 2018/957 ó Pharlaimint na hEorpa agus ón gComhairle (19) maidir le hearnáil an iompair de bhóthar, i gcomhréir le hAirteagal 3(3) den Treoir sin, ón 2 Feabhra 2022,