(1)

Síníodh an Comhaontú Comhair maidir le Córas Domhanda Sibhialta um Loingseoireacht Satailíte (GNSS) idir an Comhphobal Eorpach agus aBhallstát, de pháirt amháin, agus an Úcráin (1), den pháirt eile (“an Comhaontú”) ar an 1 Nollaig 2005 agus tháinig sé i bhfeidhm ar an 1 Nollaig 2013.

(2)

Tháinig an Bhulgáir agus an Rómáin chun bheith ina mBallstáit den Aontas ar an 1 Eanáir 2007 agus tháinig an Chróit chun bheith ina Ballstát den Aontas ar an 1 Iúil 2013.

(3)

I gcomhréir le hAirteagal 6(2) d'Ionstraim Aontachais na Bulgáire agus na Rómáine agus Airteagal 6(2) Ionstraim Aontachais na Cróite tá aontachas leis an gComhaontú le comhaontú trí phrótacal a ghabhann leis an gComhaontú. Déantar foráil sna forálacha sin do nós imeachta trína bhfuil an Chomhairle, ag gníomhú di d'aon toil thar ceann na mBallstát, agus an Úcráin, chun prótacal a thabhairt i gcrích.

(4)

Ar an 23 Deireadh Fómhair 2006 agus ar an 14 Meán Fómhair 2012, thug an Chomhairle údarás don Choimisiún tús a chur le caibidlíocht leis na tríú tíortha lena mbaineann d'fhonn prótacail a thabhairt i gcrích a ghabhann le comhaontuithe idirnáisiúnta a thugann an tAontas agus a Bhallstáit i gcrích.

(5)

Rinne an Coimisiún an chaibidlíocht leis an Úcráin maidir leis an bPrótacal a ghabhann leis an gComhaontú Comhair maidir le Córas Domhanda Sibhialta um Loingseoireacht Satailíte (GNSS) idir an Comhphobal Eorpach agus a Bhallstáit agus an Úcráin chun aontachas Phoblacht na Bulgáire, Phoblacht na Cróite agus an Rómáin leis an Aontas Eorpach (“an Prótacal”) a chur san áireamh a thahairt i gcrích go rathúil, trí notes verbales a mhalartú.

(6)

Dá bhrí sin, ba cheart an Prótacal a shíniú thar ceann an Aontais Eorpaigh agus a Bhallstát, faoi réir a thabhairt i gcrích ar dháta eile is déanaí.

(1)

Tá géarchéim COVID-19, a dearbhaíodh ina paindéim ag an Eagraíocht Dhomhanda Sláinte (EDS) an 11 Márta 2020, tar éis dochar nach beag a dhéanamh do shochaí agus do gheilleagar an Aontais, rud a d'fhág gurbh éigean do na Ballstáit sraith de bhearta eisceachtúla a ghlacadh.

(2)

Anuas ar thionchar eacnamaíoch agus sóisialta na paindéime, tá dianbhrú ar chórais cúraim sláinte na mBallstát mar gheall ar an ngéarchéim. Tá méadú ar an éileamh sna Ballstáit go léir ar threalamh agus ar sholáthairtí leighis, ar sheirbhísí poiblí bunriachtanacha agus ar acmhainní táirgeachta le haghaidh ábhair den sórt sin.

(3)

Tá bearta tapa éagsúlaithe ag teastáil chun ligean don Aontas ina iomláine aghaidh a thabhairt ar an ngéarchéim de mheon na dlúthpháirtíochta faoi na srianta atá ann de dheasca scaipeadh tapa an víris. Go háirithe, ba cheart é a bheith d'aidhm ag na bearta sin an bheatha a chaomhnú, fulaingt an duine a chosc agus a mhaolú agus dínit an duine a chaomhnú de réir mar is gá sin de dheasca ghéarchéim reatha COVID-19.

(4)

Ráig mhórscála thrasnáisiúnta is ea í ráig COVID-19 agus dá réir sin tá gá le freagairt chuimsitheach. Na bearta dá bhforáiltear faoin Sásra Aontais um Chosaint Shibhialta (“rescEU”) a bhunaítear le Cinneadh Uimh. 1313/2013/AE ó Pharlaimint na hEorpa agus ón gComhairle (1) agus ionstraimí eile atá ann cheana ón Aontas, tá siad teoranta ó thaobh scála de agus dá bhrí sin ní féidir freagairt leordhóthanach a thabhairt ná aghaidh a thabhairt go héifeachtach ar iarmhairtí mórscála ghéarchéim COVID-19 laistigh den Aontas.

(5)

Dá bhrí sin, is rud riachtanach é an tacaíocht éigeandála faoi Rialachán (AE) 2016/369 ón gComhairle (2) a ghníomhachtú.

(6)

Chun foráil a dhéanamh maidir leis an leibhéal solúbthachta is gá chun freagairt chomhordaithe fhadtréimhseach a áirithiú i gcás imthosca gan choinne faoi mar atá i gcás ghéarchéim COVID-19, e.g. soláthairtí leighis agus cógas a sholáthar, bearta téarnaimh, taighde leighis ábhartha, is gá a áirithiú gur féidir na gealltanais bhuiséadacha a dhéantar le linn na tréimhse gníomhachtaithe a úsáid chun gealltanais dhlíthiúla a thabhairt i gcrích le linn thréimhse iomlán na tréimhse gníomhachtaithe, gan dochar do na rialacha ginearálta airgeadais is infheidhme maidir le buiséad ginearálta an Aontais a leagtar síos in Airteagal 114(2) de Rialachán (AE, Euratom) 2018/1046 ó Pharlaimint na hEorpa agus ón gComhairle (3). Costais a thabhaítear faoi ghealltanais dhlíthiúla den sórt sin ba cheart iad a bheith incháilithe le haghaidh thréimhse iomlán a gcur chun feidhme.

(7)

Chun cóir chomhionann agus cothrom na Féinne a áirithiú do gach Ballstát is gá chomh maith foráil a dhéanamh maidir le hincháilitheacht aisghníomhach costas ó dháta gníomhachtaithe na tacaíochta, lena n‐áirítear gníomhaíochtaí a cuireadh i gcrích cheana féin, ar choinníoll gur cuireadh tús leo tar éis an dáta sin.

(8)

Chun cineál coimhdeach na tacaíochta éigeandála faoi Rialachán (AE) 2016/369 a chaomhnú, níor cheart tacaíocht den sórt sin ach a bheith comhlántach d'aon chúnamh a chuirfear ar fáil faoi ionstraimí eile de chuid an Aontais.

(9)

I gcomhthéacs ghéarchéim COVID-19 is léir gur gá raon feidhme Rialachán (AE) 2016/369 a leathnú chun maoiniú a sholáthar do riachtanais phráinneacha le haghaidh trealamh leighis agus ábhair leighis a chumhdach, amhail aerálaithe riospráide agus feisteas cosanta, soláthairtí ceimiceacha le haghaidh tástálacha, na costais le haghaidh cógas, soláthairtí agus ábhair eile a fhorbairt, a tháirgeadh agus a dháileadh. Ba cheart socrú a dhéanamh chun gurbh fhéidir gníomhaíochtaí a mhaoiniú chun tacú leis na céimeanna is gá chun formheas a fháil le haghaidh táirgí leighis a úsáid.

(10)

Chun maolú ar an ngéarbhrú atá ar lucht saothair leighis agus ar acmhainní stáit de dheasca acmhainneacht neamhleor seirbhísí poiblí bunriachtanacha, agus chun inmharthanacht an chórais cúraim sláinte a chothabháil, ba cheart tacaíocht a thabhairt, ó thaobh airgeadais nó eagrúcháin de, d'atreisiú agus do mhalartú sealadach gairmithe leighis mar aon le cóir leighis a chur ar othair ó Bhallstáit eile.

(11)

Ba cheart do ghairmithe i réimse an chúraim sláinte agus na lóistíochta oiliúint a fháil freisin i bhfianaise an chomhraic in aghaidh góchumadh soláthairtí cúraim sláinte.

(12)

I bhfianaise iarmhairtí mórscála COVID-19, tá gá le rannpháirtíocht mhear chuimsitheach ó na páirtithe ábhartha go léir lena n‐áirítear údaráis phoiblí, soláthraithe poiblí agus príobháideacha cúraim phríomhúil agus ospidéil agus tithe altranais. Teastaíonn gníomhaíochtaí chun an brú ar an mbonneagar sláinte a mhaolú agus chun tacú le grúpaí daoine leochaileacha atá i mbaol.

(13)

Chun aghaidh a thabhairt ar ghanntanais soláthair, ba cheart tacú le hacmhainn táirgeachta le haghaidh táirgí leighis fíor-riachtanacha amhail cógas, tástálacha diagnóiseacha, soláthairtí saotharlainne, feisteas cosanta, agus ba cheart maoiniú a sholáthar chun stoc de na táirgí sin a choinneáil ar bun.

(14)

Ba cheart cúnamh trí bhíthin airgeadais nó eagrúcháin a thabhairt do mhodhanna tástála breise nó malartacha lena méadaítear acmhainn agus taighde leighis ábhartha.

(15)

Tá deacrachtaí suntasacha dlíthiúla agus praiticiúla le sárú ag údaráis chonarthacha na mBallstát maidir le soláthairtí nó seirbhísí a cheannach i gcásanna éigeandála. Chun ligean do na húdaráis chonarthacha an tairbhe is mó is féidir a bhaint as acmhainneacht an mhargaidh inmheánaigh i dtéarmaí barainneacht scála agus comhroinnt riosca-tairbhe, tá sé thar a bheith tábhachtach cur leis na féidearthachtaí don Choimisiún soláthairtí nó seirbhísí a cheannach thar ceann na mBallstát. Ba cheart é a chur ar a chumas don Choimisiún na nósanna imeachta soláthair ábhartha a dhéanamh. I gcás ina ndéanfadh údarás conarthach Bhallstáit codanna áirithe den nós imeachta, comórtas faoi chomhaontú réime a athoscailt nó conarthaí aonair a dheonú bunaithe ar chóras ceannaigh dinimiciúil cuir i gcás, bheadh an t‐údarás conarthach sin freagrach as na céimeanna a dhéanfadh sé.

(16)

I gcásanna éigeandála, i gcás inar gá soláthar comhpháirteach a dhéanamh idir an Coimisiún agus údarás conarthach amháin ó na Ballstáit nó níos mó, ba cheart do na Ballstáit a bheith in ann na hacmhainní arna soláthar go comhpháirteach a cheannach, a fháil ar cíos nó a fháil ar léas ina n‐iomláine.

(17)

Ba cheart don Choimisiún a bheith in ann soláthairtí agus seirbhísí, lena n‐áirítear soláthairtí agus seirbhísí ar cíos, a cheannach, a stocáil, a athdhíol agus a dheonú do Bhallstáit nó d’eagraíochtaí comhpháirtíochta arna roghnú ag an gCoimisiún.

(18)

Ba cheart, dá bhrí sin, Rialachán (AE) 2016/369 a leasú dá réir.

(19)

Tá sé dearbhaithe ag na Ballstáit, mar pháirtithe sa Chomhaontú maidir le Soláthar Comhpháirteach dá dtagraítear in Airteagal 5 de Chinneadh Uimh. 1082/2013/AE (4), go n-aontaíonn siad nósanna imeachta leanúnacha maidir le soláthar comhpháirteach faoin Airteagal sin a chur san áireamh sa nós imeachta mearsholáthair a bhunaítear leis an Rialachán seo, faoi na coinníollacha a leagtar síos ann.

(20)

Tá bonn cirt le dámhachtain láithreach agus feidhmíocht láithreach na gconarthaí a eascraíonn as nósanna imeachta soláthair a dhéantar chun críocha an Rialacháin seo i bhfianaise na fíorphráinne a bhaineann leis an ngéarchéim sláinte atá ann faoi láthair. Chuige sin go sonrach, ní mór maoluithe a cheadú ar fhorálacha sonracha de Rialachán (AE, Euratom) 2018/1046 agus Cinneadh 1082/2013/AE. Agus frithbhearta leighis á ndáileadh faoi na nósanna imeachta soláthair sin, ba cheart aon eochair leithdháilte a d’fhéadfadh a bheith comhaontaithe ag na Ballstáit a urramú. Féadfaidh Stáit LEE ar sínitheoirí iad leis an gComhaontú maidir le Soláthar Comhpháirteach chun frithbhearta leighis a sholáthar a chomhaontú go mbeidh a rannpháirtíocht i soláthar frithbheart leighis arna bhainistiú ag an Aontas faoi réir na rialacha agus na gcoinníollacha atá sa Rialachán, mar is ábhartha, agus sa chás sin comhaontaíonn an Coimisiún rannpháirtíocht na Stát sin a bhainistiú i nósanna imeachta sonracha soláthair ina gcinneann siad páirt a ghlacadh.

(21)

Ní bheidh acmhainneacht iomlán na mbeart á saothrú ach amháin má shroicheann na frithbhearta leighis arna soláthar faoi na nósanna imeachta meara, comhpháirteacha na seirbhísí sláinte sna Ballstáit gan aon mhoill. Moltar do na Ballstáit, dá bhrí sin, sreabha bunriachtanacha iompair a choinneáil ag gluaiseacht, go háirithe trí lánaí tosaíochta ainmnithe, lánaí glasa, ag trasnuithe teorann ar an ngréasán tras-Eorpach iompair (TEN-T) agus trí oibríochtaí aerlastais a éascú i rith ráige COVID-19. Ba cheart leas a bhaint as acmhainní iompair an tSásra Aontais um Chosaint Shibhialta mar is gá. Chun na críche sonraí sin, ní mór maolú ar Airteagal 1(6) de Chinneadh 1313/2013/AE maidir le Sásra Aontais um Chosaint Shibhialta a cheadú.

(22)

I bhfianaise na staide a bhaineann le géarchéim COVID-19, ba cheart don Rialachán seo teacht i bhfeidhm mar ábhar práinne.

(23)

D'fhonn cóir chomhionann agus cothrom na Féinne a áirithiú do na Ballstáit go léir agus chun cumhdach a sholáthar beag beann ar an uair a tháinig ann don ráig i ngach Ballstát is gá feidhm a bheith ag an Rialachán seo ón 1 Feabhra 2020,

(1)

Shínigh an tAontas an Conradh lena mbunaítear an Comhphobal Iompair ("TCT") i gcomhréir le Cinneadh (AE) 2017/1937 ón gComhairle (1). An 4 Márta 2019 formheasadh é thar ceann an Aontais Eorpaigh trí bhíthin Chinneadh (AE) 2019/392 ón gComhairle (2). Tháinig sé i bhfeidhm an 1 Bealtaine 2019.

(2)

De bhun Airteagal 35 den TCT, tá an Coiste Stiúrtha Réigiúnach an Chomhphobal Iompair (“an Coiste Stiúrtha”) chun buiséad an Chomhphobail Iompair a ghlacadh gach bliain.

(3)

Tá Coiste Stiúrtha le cinneadh a ghlacadh maidir le buiséad an Chomhphobail Iompair do 2020 chun a áirithiú go gcuirfear TCT chun feidhme.

(4)

Is iomchuí an seasamh atá le glacadh thar ceann an Aontais sa Choiste Stiúrtha a bhunú, toisc gur gá an cinneadh sin atá le glacadh ar an gCoiste Stiúrtha chun gur féidir le Buanrúnaíocht an Chomhphobail Iompair feidhmiú agus toisc go mbeidh éifeachtaí dlíthiúla ag an gcinneadh sin i leith an Aontais.

(5)

Le cumhachtú an Choimisiúin chun buiséad an Chomhphobail Iompair a chur chun feidhme go sealadach ní athraítear bunchineál na gcumhachtaí a thugtar don institiúid sin leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh,