(1)

Tá sonraí agus táscairí staidrimh ina gcnámh droma ag beartais stuama fhianaise-bhunaithe. I gcomhthéacs na straitéise Eoraip 2020 agus i gcomhthéacs rialachas eacnamaíoch a neartú, tá ról ríthábhachtach ag táscairí sóisialta maidir le bonn eolais a chur faoi phríomhthosaíochtaí an Aontais agus maidir le tacú leis na tosaíochtaí sin. Baineann na tosaíochtaí sin go háirithe le fás agus cruthú post atá cuimsitheach, inbhuanaithe; le comhtháthú sóisialta, le bochtaineacht, neamhionannais agus eisiamh sóisialta a laghdú; le cuimsiú daoine faoi mhíchumas, agus le cóir chomhionann; agus le scileanna, le soghluaisteacht agus leis an ngeilleagar digiteach. Go háirithe, tá gá le táscairí sóisialta chun bonn fónta staidrimh a chur ar fáil lenar féidir forbairt agus faireachán a dhéanamh ar na beartais a thugann an tAontas gona Bhallstáit isteach chun aghaidh a thabhairt ar na tosaíochtaí sin. Tá gá le staidreamh sóisialta ardcháilíochta chun athléimneacht an Aontais agus a spriocanna comhtháite a fheabhsú, agus chun a leibhéil leasa shóisialta a choimeád. Tá sonraí fónta fíor-thábhachtach mar sciath cosanta ar an mífhaisnéis.

(2)

spriocanna sóisialta sa seimeastar Eorpach a neartú, tá ról an-tábhachtach ag staidreamh sóisialta, agus ní mór infhaighteacht na dtáscairí sóisialta a fheabhsú d’fhonn a áirithiú go gcuirfear ar fáil iad in am trátha le haghaidh na gcreataí beartas ábhartha. Dá gcuirfí feabhas ar ghné shóisialta an tseimeastair Eorpaigh chuirfí feabhas freisin ar athléimneacht an Aontais agus a spriocanna comhtháthaithe agus d’áireofaí go gcoinneofaí leibhéil leasa.

(3)

I gcomhréir leis an tionscnamh “Beyond GDP” (Thar OTI), is den tábhacht aghaidh a thabhairt ar ghnéithe sóisialta an dul chun cinn le táscairí láidre a dhíríonn ar staid na saoránach, a chuireann síos ar dháiltí na ndálaí ábhartha maireachtála agus éagothromaíochtaí chomh maith le hilghnéithe éagsúla na cáilíochta beatha a fhiosrú.

(4)

Ba cheart staidreamh sóisialta Eorpach a chur ar fáil ar bhonn cóir chomhionann do gach cineál úsáideora, amhail lucht ceaptha beartas, riaracháin phoiblí, taighdeoirí, ceardchumainn, mic léinn, ionadaithe ón tsochaí shibhialta lena n‐áirítear ó eagraíochtaí neamhrialtasacha, agus saoránaigh, ar cheart dóibh bheith in ann rochtain a fháil gan bhac agus go héasca ar staidreamh trí bhunachair sonraí de chuid an Choimisiúin (Eurostat) ar a shuíomh gréasáin agus ina chuid foilseachán. I ndáil leis an méid sin, ba cheart tráthúlacht agus áisiúlacht úsáideora shuíomh gréasáin an Choimisiúin (Eurostat) a fheabhsú a thuilleadh.

(5)

Is den ríthábhacht dá bhrí sin táscairí sóisialta a bheith den ardcháilíocht is gá, go háirithe i dtéarmaí a chruinne, a thráthúla, a inúsáidte agus a inrochtana atá siad, a ábhartha, a inoiriúnaithe atá siad d’iarrataí ó úsáideoirí nua, agus a inchomparáide, a chomhleanúnaí agus a éifeachtúla atá siad freisin. Tá sé fíor-riachtanach tráthúlacht na dtáscairí sóisialta a fheabhsú ionas go mbeidh siad ar fáil in am trátha do na creataí beartas ábhartha, lena n‐áirítear an Seimeastar Eorpach. Ina theannta sin, mar thoradh ar tháscairí níos cruinne agus níos tráthúla d’fhéadfadh tairbhe suntasach a bheith ann maidir le faireachán a dhéanamh ar Spriocanna Forbartha Inbhuanaithe na Náisiún Aontaithe.

(6)

D’fhonn measúnú a dhéanamh ar staid teaghlach agus daoine, tá sé tábhachtach ioncam a thomhas agus meastachán a dhéanamh ar an leibhéal íosta acmhainní atá riachtanach chun bheith rannpháirteach ar bhealach leordhóthanach sa tsochaí. Ní mór mar sin bailiú sonraí agus modheolaíocht na dtáscairí caighdeánaithe a fheabhsú chun meastacháin tagartha buiséid a chur ar fáil ar bhonn réigiúnach, chomh maith le hiarracht a dhéanamh cumhdach níos fearr a bhaint amach do na daonraí lena mbaineann. Ba cheart do na sonraí staidrimh bunús láidir a thabhairt chun táscairí a bhunú atá oiriúnaithe d’éagsúlacht na n‐úsáideoirí a d’fhéadfadh a bheith ann.

(7)

Is ar bhonn an ioncaim a bhíonn acu a dhéantar an measúnú ar staid na dteaghlach. Is den tábhacht é freisin, áfach, tomhaltas, saibhreas agus fiachais, lena n‐áirítear fiachais a d’fheadfadh a bheith ann in airgeadra eachtrach, a thomhas, ó pheirspictíocht teaghlaigh agus ó pheirspictíocht mhaicreacnamaíoch araon. Ina theannta sin, is feiniméan ilghnéitheach í an bhochtaineacht, go háirithe an bhochtaineacht leanaí, nach iad dálaí maireachtála ábhartha amháin atá i gceist léi (amhail an leibhéal ioncaim, tomhaltais, saibhris agus fiachais), ach sláinte, oideachas agus rochtain ar sheirbhísí agus úsáid na seirbhísí sin freisin. Sa bhreis air sin, d’fhonn aghaidh a thabhairt go leordhóthanach ar an dífhostaíocht, go háirithe dífhostaíocht i measc na hóige, agus ar threochtaí nua fostaíochta, go háirithe i gcomhthéacs an gheilleagair dhigitigh, tá sé tábhachtach sonraí staidrimh a bheith ann atá forleathan, fónta agus inchomparáide.

(8)

Faoi láthair bailítear staidreamh Eorpach a bhaineann le daoine agus le teaghlaigh ar bhonn roinnt gníomhartha reachtacha lena gcumhdaítear suirbhéanna ar dhaoine agus ar theaghlaigh, staidreamh déimeagrafach, daonáirimh agus áirimh thithíochta chomh maith le sonraí a bhailítear den chuid is mó ó fhoinsí riaracháin. Ina theannta sin bailítear roinnt sonraí ó shuirbhéanna gnó. In ainneoin feabhsuithe suntasacha a rinneadh le blianta beaga anuas is gá bailiú sonraí don staidreamh a chomhtháthú agus a chuíchóiriú a thuilleadh agus é sin a dhéanamh ar bhealach níos iomláine. D’fhonn sonraí fónta a fháil do thaighde agus do cheapadh beartas, ní mór infheistíocht a mhéadú i mbailiúcháin sonraí ardcháilíochta atá níos cruinne agus níos iomláine, mar gur réamhchoinníoll don cheapadh beartas freagrach iad sonraí fónta.

(9)

Chun feabhas a chur ar cháilíocht agus éifeachtúlacht na sonraí, ba cheart úsáid taifead riaracháin a spreagadh a mhéid is féidir. A bhuí le dul chun cinn sa teicneolaíocht, tá méadú mór tagtha cheana féin ar an úsáid is féidir a bhaint as foinsí riaracháin chun críocha staidrimh. Ba cheart úsáid foinsí riaracháin a chur chun cinn go gníomhach a thuilleadh i réimse an staidrimh shóisialta agus ba cheart freisin cáilíocht, agus go háirithe cruinneas, tráthúlacht agus inchomparáideacht an staidrimh sin a áirithiú. Foinsí sonraí eile atá oiriúnaithe do dhaoine nó d’ábhair ábhartha nach féidir rochtain a fháil orthu trí thaifid riaracháin, ba cheart iad a choinneáil, agus an ceart sonraí pearsanta a bheith cosanta á chaomhnú ag an am céanna.

(10)

I dteachtaireacht ón gCoimisiún an 10 Lúnasa 2009 maidir le modh táirgthe staidreamh an Aontais Eorpaigh: Fís do na deich mbliana atá Romhainn, leagtar béim ar an méadú atá tagtha ar úsáid ilfhoinsí sonraí agus ar úsáid modhanna nuálacha bailithe sonraí chomh maith lena thábhachtaí atá sé, níos mó ná riamh, coincheapa staidrimh agus modhanna staidrimh a chomhchuibhiú ar fud na bhfearann. Iarradh san Fhís dlí nua staidrimh a thionscnamh lena bhféadfaí aghaidh a thabhairt ar réimsí níos leithne.

(11)

In 2011 d’fhormhuinigh an Coiste um an Chóras Staidrimh Eorpach (CSE) arna bhunú le Rialachán (CE) Uimh. 223/2009 ó Pharlaimint na hEorpa agus ón gComhairle (2) Meabhrán Wiesbaden maidir le Dearadh Nua Coincheapúil don Staidreamh Teaghlaigh agus don Staidreamh Sóisialta inar dúradh gur cheart cuíchóiriú a dhéanamh ar na suirbhéanna Eorpacha lena gcuirtear sonraí ar fáil a bhaineann le daoine agus le teaghlaigh agus mar aon leis sin gur cheart úsáid a bhaint as bailiúcháin micreashonraí nach mbailítear chomh minic sin chun na bunsuirbhéanna sóisialta sin a chomhlánú. Ina theannta sin, ba cheart feabhas a chur ar an rochtain ar shonraí riaracháin agus ba cheart forbairt a dhéanamh ar leibhéal an Aontais agus ar an leibhéal náisiúnta ar athúsáid foinsí sonraí atá ann cheana agus ar rochtain ar fhoinsí nua sonraí.

(12)

Tá an Córas Staidrimh Eorpach (CSE) tiomanta do dhul i dteagmháil le gach úsáideoir, ar bhealach réamhghníomhach, trína gcuid éileamh a chomhlíonadh ar bhealach freagrúil agus don chomhar a neartú idir an Coimisiún (Eurostat), na hinstitiúidí staidrimh náisiúnta (ISNanna), na bainc cheannais náisiúnta, an Coiste Comhairleach Eorpach um Staidreamh agus Gníomhaireachtaí an Aontais. Tá sé fíorthábhachtach dá bharr sin go gcuirfí san áireamh go cuí, agus na suirbhéanna sóisialta á n‐oiriúnú agus á nuachóiriú, gach ionchur ó gheallsealbhóirí, lena n‐áirítear ionchur ó lucht ceaptha beartas, taighdeoirí agus acadóirí, ó tháirgeoirí sonraí, ón tsochaí shibhialta agus ó ghrúpaí leasmhara eile.

(13)

Is gá na forbairtí sin a chuíchóiriú de réir a chéile agus is gá dlí staidrimh i réimse an staidrimh shóisialta a nuachóiriú d’fhonn a áirithiú go ndéantar na táscairí sóisialta ardcháilíochta a tháirgeadh ar bhealach atá níos comhtháite, níos inoiriúnaithe, níos solúbtha, níos éifeachtúla agus níos tráthúla d’fhonn freagairt d’fhorbairtí sa tsochaí. Ag an am céanna, ní mór an aird chuí a thabhairt ar riachtanais na n‐úsáideoirí, ar an ualach ar fhreagróirí, ar chumais agus ar acmhainní na mBallstát, ar iontaofacht agus cruinneas na modhanna a úsáidtear, ar an bhféidearthacht theicniúil a bhaineann le staidreamh a chur ar fáil, ar an tréimhse inar féidir staidreamh a chur ar fáil agus ar iontaofacht na dtorthaí.

(14)

Go háirithe, níor cheart, le haon bheart a dhéanfaí chun an Rialachán seo a chur i bhfeidhm, costais shuntasacha bhreise a fhorchur lena mbeadh ualach díréireach nó gan údar á chur ar na freagróirí agus ar na Ballstáit.

(15)

Le Rialachán (CE) Uimh. 223/2009, tugtar an creat dlíthiúil ginearálta do Staidreamh Eorpach agus, in Airteagal 13 de, bunaítear an clár staidrimh Eorpach. Leis an Rialachán seo, bunaítear creat sonrach don staidreamh Eorpach a bhaineann le daoine agus le teaghlaigh, bunaithe ar shonraí ar an leibhéal aonair arna mbailiú ó shamplaí. Sonraítear ann na sonraí agus an fhaisnéis atá le bailiú ag na Ballstáit agus le tarchur chuig an gCoimisiún (Eurostat) agus na buncheanglais cháilíochta nach mór a chomhlíonadh. Déantar foráil ann maidir le sonraíochtaí teicniúla níos mionsonraithe a bheith sna gníomhartha tarmligthe agus cur chun feidhme. Leis an Rialachán is féidir na bailiúcháin éagsúla sonraí a chomhtháthú le chéile agus a chomhtháthú le húsáid taifead riaracháin agus, ag an am céanna, agus an dlí atá ann cheana á chomhdhlúthú agus á shimpliú, i gcomhréir leis an gclár staidrimh Eorpach.

(16)

Rinneadh dlí an Aontais maidir le staidreamh sóisialta bunaithe ar shonraí ar an leibhéal aonair a oiriúnú chun freagairt do riachtanais áirithe beartas tráth a ghlactha. Réadúlachtaí nua, mear-athraitheacha, áfach, is saintréithe don réimse sóisialta. Tá dálaí agus feiniméin nua shóisialta ag teacht chun cinn agus mar gheall orthu sin ní mór an creat dlíthiúil reatha a nuashonrú ar leibhéal an Aontais. Leis an Rialachán seo mar sin ba cheart bunús fónta staidrimh a chur ar fáil lena gcumhdófaí agus lena léireofaí riachtanais reatha agus lena bhféadfaí sonraí staidrimh a fhorbairt agus a tháirgeadh a bheadh freagrúil do riachtanais lucht ceaptha beartas, úsáideoirí agus an phobail i gcoitinne amach anseo, agus inchomparáideacht staidrimh ar an leibhéal idirnáisiúnta á cur san áireamh. Ba cheart, leis an rialachán seo, foráil a dhéanamh, go háirithe d’ard-solúbthacht i ndáil le forbairtí breise i réimse an staidrimh a bhaineann le daoine agus le teaghlaigh. Tá sé ríthábhachtach freisin go ndéanfaí bailiú sonraí agus na hathruithe teicneolaíocha is déanaí á n‐úsáid.

(17)

Chun an creat tagartha don staidreamh sóisialta Eorpach bunaithe ar shonraí arna mbailiú ó shamplaí a chuíchóiriú agus a réasúnú ar bhealach níos fearr, ba cheart an staidreamh Eorpach atá ann cheana, a bhaineann le daoine agus le teaghlaigh agus atá bunaithe ar shonraí ar an leibhéal aonair, a thabhairt le chéile in aon chreat amháin. Chinnteofaí dá bharr sin go ndéanfaí an staidreamh sóisialta Eorpach bunaithe ar shonraí arna mbailiú ó shamplaí agus lena n‐áirítear na fearainn arb iad lucht saothair, ioncam agus dálaí maireachtála, sláinte, oideachas agus oiliúint, úsáid na dteicneolaíochtaí faisnéise agus cumarsáide, úsáid ama agus tomhaltas, go ndéanfaí sin a tháirgeadh ar bhealach níos comhsheasmhaí agus níos comhordaithe.

(18)

I gcomhréir le cuspóirí an Rialacháin seo, ba cheart don Choimisiún staidéir féidearthachta agus staidéir phíolótacha a bhunú a mbeadh sé mar aidhm acu cáilíocht na dtacar sonraí agus na dtáscairí sóisialta a fheabhsú. Ba cheart do na staidéir sin inchomparáide sonraí a chumhdach, modheolaíochtaí nua a fhorbairt, bailiú sonraí a nuachóiriú agus éilimh na n‐úsáideoirí a chomhlíonadh, go háirithe aghaidh a thabhairt ar dhaonraí a bhfuil sé deacair teagmháil a dhéanamh leo, sonraí maidir le fo-dhaonraí áirithe, go háirithe maidir leo siúd atá leochaileach, sonraí a chur ar fáil ar leibhéil críochach NUTS 2 agus sonraí a tháirgeadh ar leibhéal mionsonraithe áitiúil ar bhealach costéifeachtach freagrúil. Ba cheart do na Ballstáit oibriú i gcomhar lena chéile maidir leis na staidéir féidearthachta agus na staidéir phíolóta sin agus ba cheart don Choimisiún a bheith ábalta tacaíocht airgeadais a thabhairt lena gcur chun feidhme.

(19)

Le fearainn an lucht saothair, an ioncaim agus na ndálaí maireachtála, d’fhonn oiriúint do riachtanais agus ionchais nua na n‐úsáideoirí, ba cheart é a bheith indéanta sonraí a bhailiú ar ábhair ad hoc ag tráth sonrach ionas gur féidir na hathróga a bhailítear ar bhonn rialta a fhorlíonadh le hathróga comhlántacha, agus ar an dóigh sin gnéithe den lucht saothair, den ioncam agus de dhálaí maireachtála nár scrúdaíodh fós a thabhairt chun solais. I gcásanna lena bhfuil údar cuí, ba cheart é a bheith indéanta topaicí nach ndéantar foráil dóibh sa Rialachán seo a chumhdach sna sonraí sin freisin.

(20)

Ba cheart croí-thacar d’athróga comhchuibhithe a sholáthar le haghaidh gach fearainn, d’fhonn na sonraí atá ar fáil don Coimisiún (Eurostat) a shaothrú agus a scaipeadh ar bhealach níos fearr agus, go háirithe, mar réamhchoinníoll don mheaitseáil sonraí agus don anailís tras-earnálach. Is dócha go mbeidh an cleachtas sin ina chabhair chun acmhainneacht anailíseach na dtacar sonraí a mhéadú trí theicníochtaí samhaltaithe a chur i bhfeidhm agus barainneachtaí scála a bhaint amach.

(21)

Le bailiú sonraí i bhfearainn na húsáide ama agus an tomhaltais ar leibhéal an Aontais, cuirtear sonraí ilchuspóireacha tábhachtacha ar fáil le haghaidh beartas de chuid an Aontais a mbeidh tionchar acu ar shaol na saoránach. Cruthaíodh a thábhachtaí atá sonraí úsáide ama chun comhionannas inscne a mheas, inter alia, ó thaobh freagrachtaí oibre agus cúraim leanaí a bheith á gcomhroinnt nó chun obair gan íocaíocht a thomhas. Is gné thábhachtach de dhálaí maireachtála ábhartha na saoránach é an tomhaltas freisin. Faoi láthair is go deonach a bhailíonn líon mór Ballstát sonraí sa dá fhearann sin, ar bhonn comhaontuithe agus treoirlínte ginearálta, agus ba cheart an méid sin a fhorbairt agus a nuachóiriú a thuilleadh. Ba cheart an bailiú sonraí a bheith éigeantach i ndáil le fearann an tomhaltais, agus roghnach i ndáil le fearann na húsáide ama. I gcás ina gcuirfear sin chun feidhme, ba cheart bailiú den sórt sin a dhéanamh i gcomhréir leis an Rialachán seo, chun inchomparáideacht a áirithiú. San fhadtéarma ba cheart é a bheith mar aidhm ag na Ballstáit uile páirt a ghlacadh sa bhailiú sonraí maidir le fearann na húsáide ama. I gcás inar féidir, ba cheart tacaíocht airgeadais ón Aontas a chur ar fáil chun tacair sonraí a nuachóiriú agus a chur chun feidhme i bhfearainn na húsáide ama agus an tomhaltais.

(22)

I ngeall ar na sainiúlachtaí a bhaineann leo, ní chumhdaíonn an Rialachán seo staidreamh déimeagrafach de réir bhrí Rialachán (AE) Uimh. 1260/2013 ó Pharlaimint na hEorpa agus ón gComhairle (3), daonáirimh agus áirimh thithíochta de réir bhrí Rialachán (CE) Uimh. 763/2008 ó Pharlaimint na hEorpa agus ón gComhairle (4), suirbhéanna gnó ná staidreamh atá bunaithe den chuid is mó ar fhoinsí riaracháin, agus ba cheart mar sin iad a rialú ar leithligh le creataí sainiúla atá curtha in oiriúint dá dtréithe.

(23)

Measadh tráth nach raibh sa staidreamh ach foinse amháin i measc na bhfoinsí iomadúla faisnéise chun críocha beartais a dhéanamh ach bíonn ról lárnach aige sa phróiseas cinnteoireachta anois. Chun cinnteoireacht atá bunaithe ar fhianaise a dhéanamh, teastaíonn staidreamh lena gcomhlíontar critéir ardcháilíochta, mar a leagtar amach i Rialachán (CE) Uimh. 223/2009, i gcomhréir leis na sainchuspóirí a bhfuil siad ag freastal orthu.

(24)

Ní hamháin go bhfuil táscairí sóisialta ardcháilíochta riachtanach chun críocha beartais ach tá siad riachtanach freisin chun críocha taighde agus mar chuid de bhonneagar fónta faisnéise. Maidir le taighdeoirí a bhfuil rochtain uathu ar mhicreashonraí chun críocha eolaíocha, rochtain a dheonaítear dóibh ar bhonn Rialachán (AE) Uimh. 557/2013 ón gCoimisiún (5) i ndáil le rochtain ar shonraí rúnda gan aitheantóirí díreacha chun críocha eolaíocha, rachadh sé go mór chun a leasa dá mbeadh acu tacair sonraí staidrimh atá nasctha ar bhealach níos fearr.

(25)

Trí ghné lena gcinntear folláine ábharach na dteaghlach is ea ioncam, tomhaltas agus saibhreas. Is den tábhacht é a áirithiú gur fearr a dhéanfar tuairisciú ar na gnéithe sin, ar a ndáileadh agus ar a gcomhdháileadh ar fud na dteaghlach, ar an dóigh sin cuirfear san áireamh ar bhealach níos cruinne gurb ann do níos mo ná foinse sonraí amháin agus féachfar lena gcomhúsáid a neartú. Dá bharr sin, ba cheart, leis an Rialachán seo, fearann an tomhaltais a áireamh agus a fheabhsú, agus an nascacht idir na trí cinn sin de ghnéithe a áireamh agus a fheabhsú freisin.

(26)

Le Rialachán (CE) Uimh. 223/2009 ceanglaítear ar na Ballstáit na prionsabail staidrimh agus na critéir cháilíochta a shonraítear sa Rialachán sin a chomhlíonadh. Tá tuarascálacha cáilíochta ríthábhachtach chun cáilíocht measúnú a dhéanamh ar an staidreamh Eorpach a mheasúnú, agus é a fheabhsú agus a chur in iúl. Rinne CCSE caighdeán CSE do Struchtúr na dTuarascálacha Cáilíochta a fhormhuiniú i gcomhréir le hAirteagal 12 den Rialachán sin. Tá Cód Cleachtais an Staidrimh Eorpaigh ina chnámh droma ag creat coiteann cáilíochta CSE, lena mbunaítear caighdeáin d’fhorbairt, do tháirgeadh agus do scaipeadh an staidrimh Eorpaigh. Ba cheart go rannchuideodh an Cód sin chun an tuairisciú cáilíochta a dhéantar faoin Rialachán seo a chomhchuibhiú.

(27)

Áirítear i Rialachán (CE) Uimh. 223/2009 rialacha maidir le tarchur sonraí ó na Ballstáit chuig an gCoimisiún (Eurostat) agus maidir le húsáid na sonraí sin, lena n‐áirítear maidir le tarchur agus cosaint sonraí rúnda. Le bearta a ghlactar i gcomhréir leis an Rialachán seo ba cheart a áirithiú go ndéanfar sonraí rúnda a tharchur agus a úsáid chun críocha staidrimh amháin i gcomhréir le hAirteagail 21 agus 22 de Rialachán (CE) Uimh. 223/2009.

(28)

Tá feidhm ag Rialacháin (AE) 2016/679 (6) agus (AE) 2018/1725 (7) ó Pharlaimint na hEorpa agus ón gComhairle agus ag Treoir 2002/58/CE ó Pharlaimint na hEorpa agus ón gComhairle (8) i ndáil le sonraí pearsanta a chumhdaítear leis an Rialachán seo. Go háirithe, sonraí staidrimh a bhfuil gá leo chun críche forbairt agus faireachán a dhéanamh ar ghníomhaíochtaí agus straitéisí de chuid an Aontais agus ar ghníomhaíochtaí agus straitéisí náisiúnta i réimsí na sláinte poiblí agus i réimse na sláinte agus na sábháilteachta ag an obair, ba cheart a mheas gur sonraí arna bpróiseáil ar mhórchúiseanna a bhaineann le leas an phobail iad.

(29)

Tá gá le staidreamh iontaofa ar an leibhéal náisiúnta agus ar an leibhéal réigiúnach freisin nuair atá inchomparáideacht níos fearr ag teastáil. Tá sé tábhachtach go ndéanfaí sonraí comhiomlánaithe a chur ar fáil le haonaid chríochacha inchomparáide amhail NUTS 2, agus ag an am céanna costas á chur san áireamh agus na hacmhainní iomchuí á gcur ar fáil do na Ballstáit. I gcomhréir le Rialachán (CE) Uimh. 1059/2003 ó Pharlaimint na hEorpa agus ón gComhairle (9), ba cheart gurbh é aicmiú NUTS a d’úsáidfí i dtaca le staidreamh uile na mBallstát a tharchuirtear chuig an gCoimisiún (Eurostat) agus a mhiondealaítear de réir aonaid chríochacha. Dá thoradh sin, d’fhonn staidreamh réigiúnach inchomparáide a bhunú, ba cheart sonraí faoi na haonaid chríochacha a chur ar fáil i gcomhréir le haicmiú NUTS. Sa téarma is faide anonn, ba cheart iarrachtaí a dhéanamh sonraí áitiúla níos mionsonraithe a bhaint amach, bunaithe ar an mbonneagar a cuireadh ar bun le Treoir 2007/2/CE ó Pharlaimint na hEorpa agus ón gComhairle (10).

(30)

D’fhonn forbairtí eacnamaíocha, sóisialta agus teicniúla a chur san áireamh ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (CFAE) a tharmligean chuig an gCoimisiún chun na topaicí mionsonraithe a leagtar amach in Iarscríbhinn I a leasú, an phleanáil rollach ilbhliantúil 8 mbliana a chur ar bun nó a chur in oiriúint le haghaidh sonraí a bhailiú a chumhdaítear leis an Rialachán seo i gcomhréir leis an tréimhsiúlacht a shonraítear in Iarscríbhinn IV, agus líon agus teideal na n-athróg a bhunú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (11). Go háirithe, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle agus na saineolaithe náisiúnta na doiciméid uile ag an am céanna, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(31)

D’fhonn coinníollacha aonfhoirmeacha a áirithiú chun an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún maidir le tuairisciú na n-athróg, le sonraíochtaí teicniúla na dtacar sonraí ar leith, leis na míreanna teicniúla nuair a bhíonn siad i bpáirt ag roinnt tacar sonraí, leis na formáidí teicniúla is gá chun tarchur na faisnéise ó na Ballstáit chuig an gCoimisiún (Eurostat) a éascú, leis na creataí samplála ina leagtar amach, go háirithe íoscheanglais na gcreataí samplála, leis na socruithe maidir leis na tuarascálacha cáilíochta agus ábhar na dtuarascálacha cáilíochta, agus le haon mhaoluithe a dhéanfaí. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (12).

(32)

I gcás ina mbeadh gá le hoiriúnuithe móra ar chóras náisiúnta staidrimh de chuid Ballstáit dá gcuirfí an Rialachán seo chun feidhme, ba cheart don Choimisiún a bheith in ann, i gcásanna lena bhfuil údar cuí agus ar feadh tréimhse theoranta, maoluithe a dheonú do na Ballstáit lena mbaineann. Is féidir oiriúnuithe móra den sórt sin teacht chun cinn go háirithe i gcás inarb éigean tráthúlacht a fheabhsú, dearadh na mbailiúchán sonraí a oiriúnú, lena n‐áirítear rochtain ar fhoinsí riaracháin, nó inarb éigean uirlisí nuálacha nua a cheapadh chun sonraí a tháirgeadh. I gcás inarb iomchuí, ba cheart ranníocaíocht airgeadais ón Aontas ar deontais iad a chur ar fáil do na Ballstáit, go háirithe le haghaidh fothú acmhainní i gcomhréir le hAirteagal (AE, Euratom) 2018/1046 ó Pharlaimint na hEorpa agus ón gComhairle (13).

(33)

Ba cheart an comhar agus an comhordú idir na húdaráis faoi chuimsiú CSE a threisiú chun comhleanúnachas agus inchomparáideacht an staidrimh shóisialta Eorpaigh a áirithiú i gcomhréir leis na prionsabail a leagtar síos in Airteagal 338(2) CFAE. Déanann comhlachtaí eile de chuid an Aontais, go háirithe gníomhaireachtaí de chuid an Aontais, chomh maith leis an bpobal acadúil, bailiú sonraí freisin, amach ó na cinn sin dá dtagraítear sa Rialachán seo. Ba cheart, dá bharr sin, comhar idir gníomhaithe den chineál sin agus iad siúd atá páirteach in CSE a threisiú d’fhonn leas a bhaint as sineirgí.

(34)

Ós rud é nach féidir leis na Ballstáit cuspóir an Rialacháin seo, eadhon creat comhchoiteann a bhunú le haghaidh staidreamh Eorpach a bhaineann le daoine agus le teaghlaigh agus atá bunaithe ar shonraí ar an leibhéal aonair arna mbailiú ó shamplaí, a ghnóthú go leordhóthanach agus, de bharr an chomhchuibhithe, cáilíocht sonraí agus inchomparáideacht sonraí, gur fearr is féidir é a ghnóthú ar leibhéal an Aontais, agus ós rud é go gcuirtear breisluach mór le ceapadh beartas ar leibhéal an Aontais agus na mBallstát trí staidreamh d’ardcháilíocht a bhailítear ar bhealach comhchuibhithe, féadfaidh an tAontas bearta a ghlacadh, i gcomhréir le prionsabail na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta, mar a leagtar amach san Airteagal sin é, ní théann an Rialachán seo thar a bhfuil riachtanach chun an cuspóir sin a ghnóthú.

(35)

Ba cheart go dtiocfadh an staidreamh sóisialta Eorpach bunaithe ar shonraí arna mbailiú ó shamplaí agus go dtiocfadh an próiseas bailithe sonraí chun bheith níos éifeachtúla agus níos ábhartha. Faoi láthair is le roinnt gníomhartha reachtacha ar leith, ar cheart an Rialachán seo a chur ina n-áit, a rialaítear staidreamh Eorpach a bhaineann le daoine agus le teaghlaigh bunaithe ar shonraí ar an leibhéal aonair arna mbailiú ó shamplaí. Is gá, dá bhrí sin, Rialachán (CE) Uimh. 577/98 ón gComhairle (14) agus Rialachán (CE) Uimh. 1177/2003 ó Pharlaimint na hEorpa agus ón gComhairle (15) a aisghairm agus codanna ábhartha de Rialacháin (CE) Uimh. 808/2004 (16), (CE) Uimh. 452/2008 (17), agus (CE) Uimh. 1338/2008 (18) ó Pharlaimint na hEorpa agus ón gComhairle a leasú.

(36)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 28(2) de Rialachán (CE) Uimh. 45/2001 ó Pharlaimint na hEorpa agus ón gComhairle (19) agus thug sé tuairim uaidh an 1 Márta 2017 (20).

(37)

Chuathas i gcomhairle le CCSE,