(1)

Is éard atá sa mhargadh inmheánach limistéar gan teorainneacha inmheánacha ina n-áirithítear saorghluaiseacht earraí i gcomhréir leis na Conarthaí. Tá toirmeasc ar shrianta cainníochtúla ar allmhairí agus ar gach beart comhéifeachta idir na Ballstáit. Cumhdaíonn an toirmeasc sin aon bheart náisiúnta a d'fhéadfadh bacainn a chur, go díreach nó go hindíreach, go hiarbhír nó go féideartha, ar thrádáil earraí laistigh den Aontas. Áirithítear saorghluaiseacht earraí sa mhargadh inmheánach trí chomhchuibhiú rialacha ar leibhéal an Aontais lena leagtar síos ceanglais choiteanna maidir le hearraí áirithe a chur ar an margadh nó, i gcás earraí nó gnéithe d'earraí nach gcumhdaítear go hiomlán faoi rialacha an Aontais um chomhchuibhiú, trí phrionsabal an aitheantais fhrithpháirtigh a chur i bhfeidhm arna sainiú ag Cúirt Bhreithiúnais an Aontais Eorpaigh.

(2)

Tá prionsabal an aitheantais fhrithpháirtigh a fheidhmíonn go maith ina chomhlánú bunriachtanach ar chomhchuibhiú rialacha ar leibhéal an Aontais, go háirithe nuair a chuirtear san áireamh go bhfuil gnéithe comhchuibhithe agus neamhchomhchuibhithe araon ag a lán earraí.

(3)

Is féidir constaicí ar shaorghluaiseacht earraí idir na Ballstáit a chruthú go neamhdhleathach más rud é, in éagmais rialacha de chuid an Aontais um chomhchuibhiú lena gcumhdaítear earraí nó gnéithe áirithe d'earraí, go gcuireann údarás inniúil Ballstáit rialacha náisiúnta i bhfeidhm i leith earraí den chineál sin atá ar an margadh go dleathach i mBallstát eile, lena gceanglaítear nach mór do na hearraí ceanglais theicniúla áirithe a chomhlíonadh, mar shampla ceanglais a bhaineann le hainmniú, foirm, méid, meáchan, comhdhéanamh, cur i láthair, lipéadú nó pacáistiú. D'fhéadfadh sé a bheith ina shárú ar Airteagal 34 agus Airteagal 36 den Chonradh ar Fheidhmiú an Aontais Eorpaigh (CFAE) na rialacha sin a chur i bhfeidhm maidir le hearraí atá ar an margadh go dleathach i mBallstát eile, fiú má tá feidhm ag na rialacha sin maidir le gach earra, gan idirdhealú.

(4)

Eascraíonn prionsabal an aitheantais fhrithpháirtigh ó chásdlí Chúirt Bhreithiúnais an Aontais Eorpaigh. De réir an phrionsabail sin, ní fhéadfaidh na Ballstáit toirmeasc a chur ar dhíol earraí ar a gcríoch ar earraí iad atá ar an margadh go dleathach i mBallstát eile, fiú amháin sa chás ina ndearnadh na hearraí a tháirgeadh i gcomhréir le rialacha teicniúla difriúla, lena n-áirítear earraí nach bhfuarthas trí phróiseas monaraíochta. Ní prionsabal absalóideach atá i gceist le prionsabal an aitheantais fhrithpháirtigh, áfach. Féadfaidh Ballstáit srian a chur ar mhargú earraí atá ar an margadh go dleathach i mBallstát eile, i cás ina bhfuil údar cuí leis na srianta sin ar na forais atá leagtha amach in Airteagal 36 den CFAE, nó ar bhonn cúiseanna sáraitheacha eile a bhaineann le leas an phobail, aitheanta ag casdlí Chúirt Bhreithiúnais an Aontais Eorpaigh maidir le saorghluaiseacht earraí, agus i gcásanna ina bhfuil na srianta sin comhréireach leis an aidhm atá á saothrú. Forchuirtear leis an Rialachán seo oibleagáid chun a mhíniú go soiléir cad is údar le rochtain ar an margadh a shrianadh nó a dhiúltú.

(5)

Maidir le coincheap na gcúiseanna sáraitheacha eile a bhaineann le leas an phobail, coincheap atá ag teacht chun cinn i gcónaí atá ann, a d'fhorbair Cúirt Bhreithiúnais an Aontais Eorpaigh ina cásdlí maidir le hAirteagal 34 agus Airteagal 36 den CFAE. I gcás ina bhfuil difríochtaí dlisteanacha idir Ballstát amháin agus ceann eile, d'fhéadfadh cúiseanna sáraitheacha den sórt sin a bheith ina n-údar cuí ag na húdaráis inniúla rialacha náisiúnta teicniúla a chur i bhfeidhm. Ní mór údar cuí, dlisteanach, iomchuí a thabhairt i gcónaí i ndáil le cinntí riaracháin, áfach, agus ní mór i gcónaí prionsabal na comhréireachta a urramú, agus ní mór don údarás inniúil an cinneadh is lú srian is féidir a dhéanamh. Chun feidhmiú an mhargaidh inmheánaigh i gcomhair earraí a fheabhsú, ba cheart na rialacha náisiúnta teicniúla a bheith oiriúnach don fheidhm agus níor cheart bacainní neamhtharaife díréireacha a chruthú leo. Ina theannta sin, i gcás cinntí riaracháin lena ndéantar rochtain ar an margadh a shrianadh nó a dhiúltú i leith earraí a chuirtear ar an margadh go dleathach i mBallstát eile, ní ceadmhach iad a bheith bunaithe ar an bhfíric go gcomhlíonann na hearraí faoi mheasúnú an cuspóir poiblí dlisteanach arna shaothrú ag an mBallstát ar bhealach seachas an bealach ina gcomhlíonann earraí sa Bhallstát sin an cuspóir sin agus ar an bhfíric sin amháin. Chun cabhrú leis na Ballstáit, ba cheart don Choimisiún treoir nach bhfuil ceangailteach a sholáthar maidir le cásdlí Chúirt Bhreithiúnais an Aontais Eorpaigh maidir le coincheap na gcúiseanna sáraitheacha a bhaineann le leas an phobail agus maidir le conas prionsabal an aitheantais fhrithpháirtigh a chur i bhfeidhm. Ba cheart an deis a bheith ag údaráis inniúla chun ionchur a sholáthar agus aiseolas maidir leis an treoir a thabhairt.

(6)

Ina Chonclúidí maidir le Beartas an Mhargaidh Aonair an Nollaig 2013, thug an Chomhairle Iomaíochais ar aird gurb amhlaidh, d'fhonn feabhas a chur ar chreatchoinníollacha le haghaidh gnólachtaí agus tomhaltóirí sa Mhargadh Aonair, gur cheart na hionstraimí ábhartha uile a úsáid go hiomchuí, lena n-áirítear aitheantas frithpháirteach. Thug an Chomhairle cuireadh don Choimisiún tuairisc a thabhairt ar chásanna ina bhfuil feidhmiú phrionsabal an aitheantais fhrithpháirtigh fós neamhleor nó ina mbaineann fadhbanna leis. Ina Chonclúidí maidir le Beartas an Mhargaidh Aonair i mí Feabhra 2015, mhol an Chomhairle Iomaíochais go láidir don Choimisiún bearta a ghlacadh lena áirithiú go mbeadh feidhm éifeachtach ag prionsabal an aitheantais fhrithpháirtigh, agus moltaí a thabhairt ar aghaidh chun na críche sin.

(7)

Glacadh Rialachán (CE) Uimh. 764/2008 ó Pharlaimint na hEorpa agus ón gComhairle (3) d'fhonn éascú do chur i bhfeidhm phrionsabal an aitheantais fhrithpháirtigh, trí nósanna imeachta a bhunú i dtreo gur lú an seans go gcruthófar constaicí neamhdhleathacha i leith saorghluaiseacht earraí a cuireadh ar an margadh go dleathach cheana i mBallstát eile. D'ainneoin gur glacadh an Rialachán sin, tá cuid mhór fadhbanna ann fós maidir le prionsabal an aitheantais fhrithpháirtigh a chur i bhfeidhm. Léiríodh sa mheastóireacht a rinneadh idir 2014 agus 2016 nach bhfeidhmíonn prionsabal an aitheantais fhrithpháirtigh mar is cheart agus gur teoranta an éifeacht a bhí ag Rialachán (CE) Uimh. 764/2008 maidir le cur i bhfeidhm an phrionsabail sin a éascú. Theip ar na huirlisí agus na ráthaíochtaí nós imeachta a cuireadh i bhfeidhm leis an Rialachán sin san aidhm a bhí leo cur i bhfeidhm phrionsabal an aitheantais fhrithpháirtigh a fheabhsú. Mar shampla, is ar éigean atá aon chur amach ag oibreoirí eacnamaíocha ar ghréasán na bPointí Teagmhála do Tháirgí a cuireadh i bhfeidhm chun faisnéis a sholáthar d'oibreoirí eacnamaíocha maidir le rialacha náisiúnta is infheidhme agus maidir le cur i bhfeidhm phrionsabal an aitheantais fhrithpháirtigh, agus is ar éigean a bhaineann siad aon úsáid as. Laistigh den ghréasán sin, ní leor an comhar idir na húdaráis náisiúnta. Is annamh a chomhlíontar an ceanglas i dtaobh fógra a thabhairt faoi chinntí riaracháin lena ndéantar rochtain ar an margadh a shrianadh nó a dhiúltiú. Fágann sé sin go bhfuil constaicí ar shaorghluaiseacht earraí sa mhargadh inmheánach fós.

(8)

Tá roinnt easnamh i Rialachán (CE) Uimh. 764/2008, agus dá bhrí sin ba cheart é a athbhreithniú agus a neartú. Ar mhaithe le soiléire, ba cheart an Rialachán seo a chur in ionad Rialachán (CE) Uimh. 764/2008. Ba cheart nósanna imeachta soiléire a bhunú leis an Rialachán seo chun saorghluaiseacht earraí atá ar an margadh go dleathach i mBallstát eile a áirithiú agus chun a áirithiú nach féidir an tsaorghluaiseacht a theorannú ach amháin i gcás ina bhfuil forais dhlisteanacha leasa phoiblí ag na Ballstáit chun é sin a dhéanamh agus ina bhfuil bonn cirt leis an srian agus é comhréireach. Ba cheart go n-áiritheofaí leis an Rialachán seo go gcomhlíonann oibreoirí eacnamaíocha agus údaráis náisiúnta araon na cearta agus na hoibleagáidí atá ann a eascraíonn as prionsabal an aitheantais fhrithpháirtigh.

(9)

Níor cheart don Rialachán seo dochar a dhéanamh don chomhchuibhiú breise a dhéanfaí ar choinníollacha i leith earraí a chur ar an margadh d'fhonn feidhmiú an mhargaidh inmheánaigh a fheabhsú, i gcás inarb iomchuí.

(10)

D'fhéadfadh bacainní trádála teacht freisin ó chineálacha eile beart a thagann faoi raon feidhme Airteagal 34 agus Airteagal 36 den CFAE. Is féidir, mar shampla, sonraíochtaí teicniúla a chuirfear i dtoll a chéile maidir le nósanna imeachta um sholáthar poiblí nó ceanglais i dtaobh teangacha oifigiúla a úsáid sna Ballstáit a áireamh ar na bearta sin. Ní rialacha teicniúla náisiúnta iad bearta den sórt sin de réir bhrí an Rialacháin seo, áfach, agus ní thagann siad faoina raon feidhme.

(11)

Uaireanta tugtar éifeacht do rialacha teicniúla náisiúnta i mBallstát le nós imeachta um réamhúdarú, nach mór formheas foirmiúil a fháil faoi ó údarás inniúil sular féidir na hearraí a chur ar an margadh ansin. Is srian é nós imeachta um réamhúdarú, ann féin, ar shaorghluaiseacht earraí. Dá bhrí sin, d'fhonn údar cuí a bheith leis maidir le prionsabal bunúsach na saorghluaiseachta earraí laistigh den mhargadh inmheánach, ní mór cuspóir leasa phoiblí arna shainaithint i ndlí an Aontais a bheith á shaothrú le nós imeachta den sórt sin, agus ní mór é a bheith comhréireach agus neamh-idirdhealaitheach. Déantar a mheas an gcomhlíonann nós imeachta den sórt sin dlí an Aontais i bhfianaise na gcoinníollacha a leagtar amach i gcásdlí Chúirt Bhreithiúnais an Aontais Eorpaigh. Dá bhrí sin, ba cheart cinntí riaracháin lena ndéantar rochtain ar an margadh a shrianadh nó a dhiúltú go heisiach ar na forais nach ann do réamhúdarú bailí i leith na n-earraí a eisiamh ó raon feidhme an Rialacháin seo. Nuair a dhéanfar iarratas ar réamhúdarú éigeantach i leith earraí, áfach, aon chinneadh riaracháin i dtaobh diúltú don iarratas ar bhonn riail theicniúil náisiúnta is infheidhme sa Bhallstát sin, níor cheart é a dhéanamh ach i gcomhréir leis an Rialachán seo, ionas go mbeidh an t-iarratasóir in ann leas a bhaint as an nós imeachta cosanta dá bhforáiltear sa Rialachán seo. Beidh an rud céanna i gceist le réamhúdarú deonach earraí, i gcás inarb ann dó.

(12)

Tá sé tábhachtach a shoiléiriú go bhfuil táirgí talmhaíochta ar na cineálacha earraí a chumhdaítear leis an Rialachán seo. Áirítear sa téarma “táirgí talmhaíochta” táirgí iascaigh, dá bhforáiltear in Airteagal 38(1) den CFAE. Chun cabhrú na cineálacha earraí atá faoi réir an Rialacháin seo a shainaithint, ba cheart don Choimisiún measúnú a dhéanamh ar a indéanta atá sé liosta táscach táirgí a fhorbairt le haghaidh aitheantas frithpháirteach agus ar na tairbhí a bhaineann leis sin.

(13)

Tá sé tábhachtach freisin a shoiléiriú go n-áirítear leis an téarma “táirgeoir” ní hamháin monaróirí earraí, ach daoine a tháirgeann earraí nach bhfuarthas trí phróiseas monaraithe, lena n-áirítear táirgí talmhaíochta, chomh maith le daoine a chuirfidh iad féin i láthair mar tháirgeoirí earraí.

(14)

Cinntí ó chúirteanna nó ó bhinsí náisiúnta ina ndéantar measúnú ar dhlíthiúlacht cásanna inarb amhlaidh, de bharr chur i bhfeidhm riail theicniúil náisiúnta, go ndiúltaítear d'earraí atá ar an margadh go dleathach i mBallstát amháin rochtain ar mhargadh i mBallstát eile, agus cinntí ó chúirteanna nó ó bhinsí náisiúnta lena gcuirtear pionóis i bhfeidhm, ba cheart iad a eisiamh ó raon feidhme an Rialacháin seo.

(15)

Chun tairbhe a bhaint as prionsabal an aitheantais fhrithpháirtigh, ní mór earraí a bheith ar an margadh go dleathach i mBallstát eile. Ba cheart a shoiléiriú, chun go measfar gur earraí iad atá ar an margadh go dleathach i mBallstát eile, nach mór d'earraí na rialacha ábhartha is infheidhme sa Bhallstát sin a chomhlíonadh, agus nach mór iad a bheith ar fáil d'úsáideoirí deiridh sa Bhallstát sin.

(16)

Chun feasacht a mhúscailt i measc na n-údarás náisiúnta agus oibreoirí eacnamaíocha maidir le prionsabal an aitheantais fhrithpháirtigh, ba cheart do na Ballstáit breithniú a dhéanamh faoi fhoráil a dhéanamh ina rialacha náisiúnta teicniúla do “chlásail margaidh aonair”, atá soiléir agus gan débhrí d'fhonn chur i bhfeidhm an phrionsabail sin a éascú.

(17)

Tá éagsúlacht shuntasach ó Bhallstát go Ballstát idir an fhianaise a cheanglaítear chun a léiriú go bhfuil earraí ar an margadh go dleathach i mBallstát eile. Tá sé sin ina chúis le hualaí, moilleanna agus costais bhreise d'oibreoirí eacnamaíocha nach bhfuil gá leo, agus fágann sé nach féidir le húdaráis náisiúnta an fhaisnéis a fháil is gá chun na hearraí a mheas go tráthúil. D'fhéadfadh sé sin bac a chur ar fheidhmiú phrionsabal an aitheantais fhrithpháirtigh. Dá bhrí sin, tá sé riachtanach é a fhágáil níos éasca ag oibreoirí eacnamaíocha a léiriú go bhfuil a gcuid earraí curtha ar an margadh go dleathach i mBallstát eile. Ba cheart d'oibreoirí eacnamaíocha tairbhe a bhaint as féindearbhú, faoina dhéanfar gach faisnéis is gá a sholáthar d'údaráis inniúla maidir leis na hearraí agus lena a mhéid a chomhlíonann siad na rialacha is infheidhme sa Bhallstát eile sin. Níor cheart go gcuirfeadh úsáid dearbhuithe deonacha cosc ar údaráis náisiúnta cinntí riaracháin a dhéanamh lena gcuirfear srian leis an rochtain nó lena ndiúltaítear rochtain ar an margadh, ar choinníoll go mbeidh cinntí den sórt sin comhréireach, go bhfuil údar maith leo agus go n-urramófar leo prionsabal an aitheantais fhrithpháirtigh agus go bhfuil siad i gcomhréir leis an Rialachán seo.

(18)

Ba cheart go bhféadfadh an táirgeoir, an t-allmhaireoir nó an dáileoir dearbhú a chur i dtoll a chéile faoi earraí a chur ar an margadh go dleathach chun críocha aitheantas frithpháirteach (“dearbhú um aitheantas frithpháirteach”). Is é an táirgeoir is fearr atá in ann an fhaisnéis a sholáthar sa dearbhú um aitheantas frithpháirteach ós rud é bhfuil an aithne is fearr aige siúd ar a chuid earraí agus go bhfuil an fhianaise aige atá riachtanach chun an fhaisnéis atá sa dearbhú um aitheantas frithpháirteach a fhíorú. Ba cheart go mbeadh an táirgeoir in ann sainordú a thabhairt d'ionadaí údaraithe dearbhuithe den sórt sin a chur i dtoll a chéile ar son an táirgeora agus faoi fhreagracht an táirgeora. I gcás nach féidir leis an oibreoir eacnamaíoch ach an fhaisnéis faoina dhlíthiúla atá sé na hearraí sa dearbhú a chur ar an margadh a sholáthar, ba cheart go bhféadfadh oibreoir eacnamaíoch eile an fhaisnéis a sholáthar go bhfuil na hearraí á gcur ar fáil d'úsáideoirí deiridh sa Bhallstát lena mbaineann, ar choinníoll go nglacann an t-oibreoir eacnamaíoch sin freagracht as an bhfaisnéis a cuireadh ar fáil sa dearbhú um aitheantas frithpháirteach agus go bhfuil sé in ann an fhianaise a sholáthar atá riachtanach chun an fhaisnéis seo a fhíorú.

(19)

Ba cheart faisnéis chruinn iomlán ar na hearraí a bheith i gcónaí sa dearbhú um aitheantas frithpháirteach. Dá bhrí sin, ba cheart an dearbhú a choimeád cothrom le dáta d'fhonn athruithe a léiriú, mar shampla athruithe ar na rialacha teicniúla náisiúnta.

(20)

D'fhonn a áirithiú gur faisnéis chuimsitheach í an fhaisnéis arna soláthar i ndearbhú um aitheantas frithpháirteach, ba cheart struchtúr comhchuibhithe maidir le dearbhuithe den sórt sin a leagan síos lena úsáid ag oibreoirí eacnamaíocha ar mian leo na dearbhuithe sin a dhéanamh.

(21)

Tá sé tábhachtach a áirithiú go gcomhlánófar an dearbhú um aitheantas frithpháirteach go fírinneach cruinn. Dá bhrí sin, is gá ceangal a chur ar na hoibreoirí eacnamaíocha a bheith freagrach as an bhfaisnéis a sholáthraíonn siad sa dearbhú um aitheantas frithpháirteach.

(22)

D'fhonn cur le héifeachtúlacht agus iomaíochas gnólachtaí atá ag feidhmiú i réimse na n-earraí nach gcumhdaítear le reachtaíocht chomhchuibhithe de chuid an Aontais, ba cheart an deis a bheith ann tairbhe a bhaint as teicneolaíochtaí faisnéise nua ar mhaithe le héascú do sholáthar an dearbhaithe um aitheantas frithpháirteach. Dá bhrí sin, ba cheart go mbeadh oibreoirí eacnamaíocha in ann a ndearbhuithe um aitheantas frithpháirteach a chur ar fáil don phobal ar líne ar an gcoinníoll go mbeadh an dearbhú um aitheantas frithpháirteach inrochtana go héasca agus i bhformáid iontaofa.

(23)

Ba cheart don Choimisiún a áirithiú go gcuirtear teimpléad i gcomhair an dearbhaithe um aitheantas frithpháirteach agus treoirlínte chun an dearbhú a chomhlánú ar fáil ar an Tairseach Aonair Dhigiteach i ngach ceann de theangacha oifigiúla an Aontais.

(24)

Ba cheart feidhm a bheith ag an Rialachán seo freisin maidir le hearraí nach bhfuil ach roinnt gnéithe díobh cumhdaithe ag reachtaíocht an Aontais um chomhchuibhiú. Más rud é, de bhun reachtaíocht an Aontais um chomhchuibhiú, go gceanglaítear ar oibreoir eacnamaíoch dearbhú comhréireachta de chuid AE a chur i dtoll a chéile chun comhlíonadh na reachtaíochta sin a léiriú, ba cheart go gceadófaí don oibreoir eacnamaíoch sin an dearbhú um aitheantas frithpháirteach dá bhforáiltear sa Rialachán seo a bheith i gceangal leis an dearbhú comhréireachta de chuid an Aontais.

(25)

I gcás ina gcinnfidh oibreoirí eacnamaíocha gan úsáid a bhaint as an dearbhú um aitheantas frithpháirteach, ba cheart é a bheith faoi údaráis inniúla an Bhallstáit is ceann scríbe faisnéis shonrach atá sainmhínithe go soiléir a iarraidh a mheasann siad a bheith riachtanach chun measúnú a dhéanamh ar na hearraí, i ndáil le prionsabal na comhréireachta.

(26)

Ba cheart am iomchuí a thabhairt don oibreoir eacnamaíoch chun doiciméid nó aon fhaisnéis eile a iarrfaidh údarás inniúil an Bhallstáit is ceann scríbe a thíolacadh, nó chun aon argóintí nó aon bharúlacha a bhaineann leis an measúnú ar na hearraí i dtrácht a thíolacadh.

(27)

Le Treoir (AE) 2015/1535 ó Pharlaimint na hEorpa agus ón gComhairle (4), ceanglaítear ar na Ballstáit aon dréachtrialachán teicniúil náisiúnta a bhaineann le haon táirge, lena n-áirítear aon táirge talmhaíochta nó táirge iascaireachta, a chur in iúl don Choimisiún agus do na Ballstáit eile, mar aon le ráiteas ar na forais faoinar gá an rialachán sin a achtú. Is gá a áirithiú, áfach, go gcuirfear prionsabal an aitheantais fhrithpháirtigh i bhfeidhm i gceart maidir le hearraí sonracha i gcásanna aonair, tar éis rialachán teicniúil náisiúnta den sórt sin a ghlacadh. Ba cheart nósanna imeachta a leagan síos sa Rialachán seo maidir le cur i bhfeidhm phrionsabal an aitheantais fhrithpháirtigh i gcásanna aonair trína cheangal, mar shampla, ar na Ballstáit a léiriú cé na rialacha teicniúla náisiúnta ar a bhfuil an cinneadh riaracháin bunaithe agus cén foras dlisteanach leasa phoiblí, lena dtugtar údar cuí le feidhmiú na rialach teicniúla náisiúnta sin i ndáil le hearra atá ar an margadh go dleathach i mBallstát eile. Is í comhréireacht na rialach teicniúla náisiúnta an bonn le comhréireacht an chinnidh riaracháin a léiriú, ar a bhfuil an riail sin bunaithe. Mar sin féin, ba cheart gur mar thoradh ar mheastóireacht de réir an cháis a shocrófaí an modh chun comhréireacht an chinnidh riaracháin a léiriú.

(28)

Toisc gur cheart, i gcás cinntí riaracháin lena sriantar nó lena ndiúltaítear rochtain ar an margadh d'earraí atá ar an margadh go dleathach i mBallstát eile, iad a bheith ina n-eisceacht ar an bprionsabal bunúsach maidir le saorghluaiseacht earraí, is gá a áirithiú go mbeidh na cinntí sin ag teacht leis na hoibleagáidí atá ann faoi láthair a eascraíonn as prionsabal an aitheantais fhrithpháirtigh. Dá bhrí sin, is iomchuí nós imeachta soiléir a bhunú lena chinneadh an bhfuil na hearraí sin ar an margadh go dleathach sa Bhallstát eile sin agus, más amhlaidh atá, an bhfuil leasanna dlisteanacha an phobail cumhdaithe le riail náisiúnta theicniúil infheidhme an Bhallstáit is ceann scríbe á gcosaint go leordhóthanach, i gcomhréir le hAirteagal 36 den CFAE agus le cásdlí Chúirt Bhreithiúnais an Aontais Eorpaigh. Ba cheart go n-áiritheofaí leis an nós imeachta sin go bhfuil na cinntí riaracháin arna ndéanamh comhréireach agus go n-urramaítear leo prionsabal an aitheantais fhrithpháirtigh agus go bhfuil siad i gcomhréir leis an Rialachán seo.

(29)

I gcás ina ndéanann údarás inniúil measúnú ar earraí sula ndéanfaidh sé cinneadh cé acu ba cheart nó nár cheart dó rochtain ar an margadh a shrianadh nó a dhiúltú, níor cheart don údáras sin a bheith in ann cinntí a ghlacadh lena gcuirfí ar fionraí rochtain ar an margadh, ach amháin i gcás ina bhfuil gá le hidirghabháil mhear ionas nach ndéanfar dochar do shábháilteacht nó do shláinte na ndaoine, ionas nach ndéanfar dochar don chomhshaol nó ionas nach gcuirfear na hearraí ar fáil i gcásanna ina mbeidh toirmeasc ginearálta ann maidir leis na hearraí sin a chur ar fáil ar chúiseanna a bhaineann leis an moráltacht phoiblí nó leis an tslándáil phoiblí, lena n-áirítear, mar shampla, cosc na coireachta.

(30)

Le Rialachán (CE) Uimh. 765/2008 ó Pharlaimint na hEorpa agus ón gComhairle (5), bunaítear córas creidiúnaithe lena n-áirithítear go nglacfar go frithpháirteach le leibhéal inniúlachta na gcomhlachtaí measúnaithe comhréireachta. Dá bhrí sin, i gcás tuarascálacha tástála nó deimhnithe arna n-eisiúint ag comhlacht measúnaithe comhréireachta atá creidiúnaithe chuige sin, níor cheart d'údaráis inniúla na mBallstát diúltú glacadh leo ar fhorais a bhaineann le hinniúlacht an chomhlachta sin. Ina theannta sin, d'fhonn dúbailt na dtástálacha agus na nósanna imeachta a rinneadh cheana i mBallstát eile a sheachaint a mhéid is féidir, níor cheart do na Ballstáit diúltú glacadh le tuarascálacha tástála agus deimhnithe arna n-eisiúint ag comhlachtaí measúnaithe comhréireachta eile i gcomhréir le dlí an Aontais. Ba cheart do na húdaráis inniúla aird a thabhairt ar ábhar na dtuarascálacha tástála nó na ndeimhnithe arna dtíolacadh.

(31)

Le Treoir 2001/95/CE ó Pharlaimint na hEorpa agus ón gComhairle (6), sonraítear nach féidir ach táirgí sábháilte a chur ar an margadh agus leagtar síos oibleagáidí na dtáirgeoirí agus na ndáileoirí maidir le sábháilteacht na dtáirgí. Tá na húdaráis inniúla i dteideal, de bharr na Treorach sin, aon táirge contúirteach a thoirmeasc láithreach, nó táirgí a d'fhéadfadh a bheith contúirteach a thoirmeasc ar feadh na tréimhse is gá le haghaidh na meastóireachtaí sábháilteachta, na seiceálacha agus na srianta éagsúla. Déantar cur síos sa Treoir sin freisin ar an nós imeachta maidir leis na húdaráis inniúla bearta iomchuí a chur i bhfeidhm, amhail iad siúd dá dtagraítear i bpointe (b) go pointe (f) d'Airteagal 8(1) den Treoir sin, i gcás táirgí lena ngabhann riosca, agus forchuirtear léi freisin oibleagáid ar Bhallstáit fógra a thabhairt don Choimisiún agus do na Ballstáit eile i dtaobh beart den sórt sin. Dá bhrí sin, ba cheart d'údaráis inniúla a bheith in ann leanúint den Treoir sin a chur i bhfeidhm agus go háirithe pointe (b) go pointe (f) d'Airteagal 8(1) agus Airteagal 8(3) den Treoir sin.

(32)

Le Rialachán (CE) Uimh. 178/2002 ó Pharlaimint na hEorpa agus ón gComhairle (7), bunaítear, inter alia, córas mear-rabhaidh chun rioscaí díreacha nó indíreacha do shláinte an duine, a thagann ó bhia nó ó bheathú, a fhógairt. Cuirtear de cheangal ar na Ballstáit fógra a thabhairt don Choimisiún láithreach, tríd úsáid a bhaint as an gcóras mear-rabhaidh, faoi aon bheart a ghlac siad a bhfuil d'aidhm leis srian a chur le bia nó beatha a chur ar an margadh, nó a bhfuil d'aidhm leis bia nó beatha a aistarraingt nó a aisghairm den mhargadh, chun críche sláinte an duine a chosaint, agus ar gá gníomhaíocht ghasta chun é a dhéanamh. Ba cheart údaráis inniúla a bheith in ann leanúint den Rialachán sin a chur i bhfeidhm agus go háirithe Airteagal 50(3) agus Airteagal 54 den Rialachán sin.

(33)

Le Rialachán (AE) 2017/625 ó Pharlaimint na hEorpa agus ón gComhairle (8), bunaítear creat comhchuibhithe de chuid an Aontais chun rialuithe oifigiúla, agus gníomhaíochtaí oifigiúla seachas rialuithe oifigiúla, a eagrú ar fud an tslabhra agraibhia ar fad, agus na rialacha maidir le rialuithe oifigiúla a leagtar síos i Rialachán (CE) Uimh. 882/2004 ó Pharlaimint na hEorpa agus ón gComhairle (9) agus sa reachtaíocht ábhartha earnála an Aontais á gcur san áireamh. Leagtar síos le Rialachán (AE) 2017/625 nós imeachta sonrach d'fhonn a áirithiú, i gcásanna neamhchomhlíonadh na ndlíthe um bia agus beatha nó na rialacha um shláinte ainmhithe agus um leas ainmhithe, go gcuirfidh na hoibreoirí eacnamaíocha cúrsaí ina gceart. Ba cheart údaráis inniúla a bheith in ann leanúint de Rialachán (AE) 2017/625 a chur i bhfeidhm agus go háirithe Airteagal 138 de.

(34)

Le Rialachán (AE) Uimh 1306/2013 ó Pharlaimint na hEorpa agus ón gComhairle (10), bunaítear creat comhchuibhithe de chuid an Aontais chun seiceálacha a dhéanamh i ndáil leis na hoibleagáidí a leagtar síos i Rialachán (AE) Uimh. 1308/2013 ó Pharlaimint na hEorpa agus ón gComhairle (11) i gcomhréir leis na critéir a leagtar síos i Rialachán (CE) Uimh. 882/2004 agus sonraítear go n-áiritheoidh na Ballstáit go mbeidh aon oibreoir a chomhlíonfaidh na hoibleagáidí sin i dteideal a bheith cumhdaithe ag córas seiceálacha. Ba cheart údaráis inniúla a bheith in ann leanúint de Rialachán (AE) Uimh. 1306/2013 a chur i bhfeidhm agus go háirithe Airteagal 90 de.

(35)

Ba cheart a shonrú, le haon chinneadh riaracháin arna ghlacadh ag údaráis inniúla de chuid na mBallstát de bhun an Rialacháin seo, na leigheasanna atá ar fáil don oibreoir eacnamaíoch ionas gur féidir le hoibreoir eacnamaíoch, i gcomhréir leis an dlí náisiúnta, achomharc a dhéanamh in aghaidh an chinnidh nó imeachtaí a thionscnamh os comhair na cúirte náisiúnta inniúla nó os comhair an bhinse náisiúnta inniúil. Ba cheart tagairt a dhéanamh sa chinneadh riaracháin freisin don deis a bheith ag oibreoirí eacnamaíocha an Gréasán um Fhadhbanna sa Mhargadh Inmheánach a Réiteach (SOLVIT) agus an nós imeachta um réiteach fadhbanna dá bhforáiltear sa Rialachán seo a úsáid.

(36)

Is den riachtanas iad réitigh éifeachtacha d'oibreoirí eacnamaíocha ar mian leo rogha eile atá báúil don ghnó a bheith acu agus iad ag cur i gcoinne cinntí riaracháin lena ndéantar rochtain ar an margadh a shrianadh nó a dhiúltú, lena áirithiú go gcuirfear prionsabal an aitheantais fhrithpháirtigh i bhfeidhm mar is ceart agus go comhsheasmhach. D'fhonn a ráthú go mbeidh réitigh den sórt sin ann, agus d'fhonn costais dlí a sheachaint, go háirithe i gcás fiontair bheaga agus mheánmhéide (FBManna), ba cheart nós imeachta neamhbhreithiúnach maidir le réiteach fadhbanna a bheith ar fáil d'oibreoirí eacnamaíocha.

(37)

Seirbhís is ea SOLVIT a sholáthraíonn an riarachán náisiúnta i ngach Ballstát agus a bhfuil sé d'aidhm aige réitigh a fháil do dhaoine aonair agus do ghnólachtaí i gcás ina bhfuil a gcearta sáraithe ag údaráis phoiblí i mBallstát eile. Tá na prionsabail lena rialaítear feidhmiú SOLVIT leagtha amach i Moladh 2013/461/AE ón gCoimisiún (12), agus de réir na bprionsabal sin déanfaidh gach Ballstát foráil do Ionad SOLVIT a mbeidh acmhainní leordhóthanacha daonna agus airgeadais aige le háirithiú go nglacfaidh an Ionad SOLVIT páirt i SOLVIT. Ba cheart don Choimisiún feasacht maidir le SOLVIT agus na tairbhí a bhaineann leis a mhéadú, go háirithe i measc gnólachtaí.

(38)

Is sásra éifeachtach neamhbhreithiúnach maidir le fadhbanna a réiteach é SOLVIT agus soláthraítear saor in aisce é. Feidhmíonn sé faoi réir spriocdhátaí gairide agus soláthraíonn sé réitigh phraiticiúla do dhaoine aonair agus do ghnólachtaí nuair a bhíonn deacrachtaí acu i dtaobh a gcearta Aontais a bheith á n-aithint ag údaráis phoiblí. I gcás ina n-aontóidh an t-oibreoir eacnamaíoch, an tIonad SOLVIT ábhartha agus na Ballstáit lena mbaineann go léir ar an toradh iomchuí, níor cheart gá a bheith le haon ghníomh eile.

(39)

I gcás ina dteipfidh ar chur chuige neamhfhoirmiúil SOLVIT, áfach, agus ina mbeidh amhras ann fós maidir le comhoiriúnacht an chinnidh riaracháin le prionsabal an aitheantais fhrithpháirtigh, ba cheart an chumhacht a thabhairt don Choimisiún breathnú ar an gcás arna iarraidh sin ag aon Ionad SOLVIT lena mbaineann. Tar éis dó a mheasúnú a dhéanamh, ba cheart don Choimisiún tuairim a eisiúint, tuairim a chuirfear in iúl don oibreoir eacnamaíoch lena mbaineann agus do na údaráis inniúla tríd an Ionad SOLVIT is ábhartha agus beidh an tuairim sin le cur san áireamh le linn an nós imeachta SOLVIT. Ba cheart don idirghabháil ón gCoimisiún a bheith faoi réir teorainn ama 45 lá oibre, gan an t-am a áireamh ba ghá chun an fhaisnéis agus na doiciméid bhreise a mheasann sé a bheith riachtanach a fháil ag an gCoimisiún. Má dhéantar an cás a réiteach laistigh den tréimhse sin, níor cheart é a bheith de cheangal ar an gCoimisiún tuairim a eisiúint. Ba cheart cásanna SOLVIT den sórt sin a bheith faoi réir shreabhadh oibre ar leith i mbunachar sonraí SOLVIT agus níor cheart iad a chur san áireamh i staidreamh rialta SOLVIT.

(40)

Níor cheart i dtuairim an Choimisiúin maidir le cinneadh riaracháin lena ndéantar rochtain ar an margadh a shrianadh nó a dhiúltú ach aghaidh a thabhairt ar an gceist an bhfuil an cinneadh riaracháin ag luí le prionsabal an aitheantais fhrithpháirtigh agus le ceanglais an Rialacháin seo. Tá an méid sin gan dochar do chumhachtaí an Choimisiúin faoi Airteagal 258 den CFAE agus don oibleagáid atá ar na Ballstáit dlí an Aontais a chomhlíonadh, agus aghaidh á thabhairt ar fhadhbanna sistéamacha arna sainaithint maidir le prionsabal an aitheantais fhrithpháirtigh a chur i bhfeidhm.

(41)

Is tábhachtach an rud é don mhargadh inmheánach d'earraí gur féidir le gnólachtaí, go háirithe FBManna, faisnéis iontaofa shonrach a fháil faoin dlí atá i bhfeidhm i mBallstát ar leith. Ba cheart ról tábhachtach a bheith ag Pointí Teagmhála do Tháirgí maidir le héascú don chumarsáid idir údaráis náisiúnta agus oibreoirí eacnamaíocha, trí fhaisnéis a scaipeadh faoi rialacha táirgí sonracha agus faoin gcaoi a gcuirtear prionsabal an aitheantais fhrithpháirtigh i bhfeidhm i gcríoch a mBallstáit. Dá bhrí sin, is gá feabhas a chur ar ról na bPointí Teagmhála do Tháirgí mar phríomhsholáthraithe faisnéise maidir le gach ceann de na rialacha a bhaineann le táirgí, lena n-áirítear rialacha teicniúla náisiúnta atá cumhdaithe faoi aitheantas frithpháirteach.

(42)

D'fhonn saorghluaiseacht earraí a éascú, ba cheart do Phointí Teagmhála do Tháirgí faisnéis a sholáthar, saor in aisce, go leibhéal réasúnta, maidir lena gcuid rialacha náisiúnta teicniúla agus maidir le cur i bhfeidhm phrionsabal an aitheantais fhrithpháirtigh. Ba cheart trealamh agus acmhainní leordhóthanacha a bheith ag Pointí Teagmhála do Tháirgí. Ba cheart dóibh, i gcomhréir le Rialachán (AE) 2018/1724 ó Pharlaimint (13) na hEorpa agus ón gComhairle, faisnéis den sórt sin a sholáthar trí shuíomh gréasáin agus ba cheart dóibh a bheith faoi réir na gcritéar cáilíochta a cheanglaítear leis an Rialachán sin, agus a bheith faoi réir na gcritéar cáilíochta atá leagtha amach sa Rialachán sin. Maidir le cúraimí na bPointí Teagmhála do Tháirgí a bhaineann le haon fhaisnéis den chineál sin a sholáthar, lena n-áirítear cóipeanna leictreonacha den rialacha teicniúla náisiúnta nó rochtain ar líne chuig na rialacha sin, ba cheart iad a chur i gcrích gan dochar do na rialacha náisiúnta lena rialaítear dáileadh na rialacha náisiúnta teicniúla sin. Ina theannta sin, níor cheart a chur de cheangal ar Phointí Teagmhála do Tháirgí go soláthróidís cóipeanna de chaighdeáin nó rochtain ar líne chuig caighdeáin, ar caighdeáin iad atá faoi réir chearta maoine intleachtúla na gcomhlachtaí nó na n-eagraíochtaí um chaighdeánú.

(43)

Tá an comhar idir údaráis inniúla riachtanach i ndáil le feidhmiú réidh phrionsabal an aitheantais fhrithpháirtigh agus i ndáil le cultúr aitheantais fhrithpháirtigh a chruthú. Dá bhrí sin, ba cheart do Phointí Teagmhála do Tháirgí agus do na húdaráis inniúla náisiúnta comhoibriú le chéile agus faisnéis agus saineolais a mhalartú chun a áirithiú go ndéanfar prionsabal an aitheantais fhrithpháirtigh agus an Rialachán seo a chur i bhfeidhm mar is ceart agus go comhsheasmhach.

(44)

Chun críocha fógairt cinntí riaracháin lena ndéantar rochtain ar an margadh a shrianadh nó a dhiúltú, cumarsáid a chumasú idir Pointí Teagmhála do Tháirgí agus comhar riaracháin a áirithiú, is gá rochtain a thabhairt do na Ballstáit ar chóras faisnéise agus cumarsáide.

(45)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (14).

(46)

Más gá sonraí pearsanta a phróiseáil chun críocha an Rialacháin seo, ba cheart próiseáil den sórt sin a dhéanamh i gcomhréir le dlí an Aontais maidir le cosaint sonraí pearsanta. Tá aon phróiseáil ar shonraí pearsanta faoin Rialachán seo faoi réir Rialachán (AE) 2016/679 ó Pharlaimint na hEorpa agus ón gComhairle (15) nó Rialachán (AE) 2018/1725 ó Pharlaimint na hEorpa agus ón gComhairle (16).

(47)

Ba cheart sásraí monatóireachta atá iontaofa agus éifeachtúil a bhunú chun faisnéis a sholáthar maidir le cur i bhfeidhm an Rialacháin seo agus maidir lena thionchar ar shaorghluaiseacht earraí. Níor cheart na sásraí sin a dhul thar a bhfuil riachtanach chun na cuspóirí sin a bhaint amach.

(48)

D'fhonn feasacht a mhéadú faoi phrionsabal an aitheantais fhrithpháirtigh agus d'fhonn a áirithiú go gcuirfear an Rialachán seo i bhfeidhm mar is ceart agus go comhsheasmhach, ba cheart foráil a dhéanamh do mhaoiniú ón Aontas ar fheachtais múscailte feasachta, oiliúint, malartú oifigeach agus ar ghníomhaíochtaí gaolmhara eile a bhfuil sé mar aidhm leo tacú le muinín agus comhar agus feabhas a chur ar mhuinín agus comhar idir údaráis inniúla, Pointí Teagmhála do Tháirgí agus oibreoirí eacnamaíocha.

(49)

D'fhonn leigheas a fháil ar an easpa sonraí cruinne a bhaineann le feidhmiú phrionsabal an aitheantais fhrithpháirtigh agus lena thionchar ar an margadh aonair le haghaidh earraí, ba cheart don Aontas maoiniú a dhéanamh ar bhailiú sonraí den sórt sin.

(50)

Ba cheart leasanna airgeadais an Aontais a chosaint trí bhearta comhréireacha feadh an timthrialla caiteachais, lena n-áirítear neamhrialtachtaí a chosc, a bhrath agus a fhiosrú, cistí a cailleadh, a íocadh go mícheart nó a úsáideadh go mícheart a ghnóthú agus, i gcás inarb iomchuí, pionóis airgeadais agus riaracháin a ghearradh.

(51)

Is iomchuí cur i bhfeidhm an Rialacháin seo a chur siar sa chaoi go mbeidh go leor ama ag údaráis inniúla agus oibreoirí eacnamaíocha chun oiriúnú do na ceanglais atá leagtha síos anseo.

(52)

Ba cheart don Choimisiún meastóireacht a dhéanamh ar an Rialachán seo i bhfianaise na gcuspóirí atá á saothrú leis. Ba cheart don Choimisiún leas a bhaint as na sonraí arna mbailiú ar fheidhmiú phrionsabal an aitheantais fhrithpháirtigh agus a thionchar ar an margadh aonair le haghaidh earraí agus le faisnéis atá ar fáil sa chóras faisnéise agus cumarsáide, chun an Rialachán seo a mheas. Ba cheart an cumas a bheith ag an gCoimisiún iarraidh ar na Ballstáit an fhaisnéis bhreise is gá don mheastóireacht a dhéanamh. De bhun phointe 22 den Chomhaontú Idirinstitiúideach an 13 Aibreán 2016 maidir le Reachtóireacht Níos Fearr (17), ba cheart don mheastóireacht ar an Rialachán seo, ar cheart di a bheidh bunaithe ar éifeachtacht, éifeachtúlacht, ábharthacht, comhleanúnachas agus breisluach, an bunús a sholáthar do mheasúnuithe tionchair ar na roghanna atá ann chun gníomhaíocht bhreise a dhéanamh.

(53)

Ós rud é nach féidir cuspóir an Rialacháin seo, eadhon a áirithiú go bhfuil prionsabal an aitheantais fhrithpháirtigh á chur i bhfeidhm go réidh, go comhsheasmhach agus mar is ceart, á bhaint amach go leordhóthanach ag na Ballstáit ach gur fearr is féidir, dá bhrí sin, de bharr a scála agus a n-éifeachta, iad a bhaint amach ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú,

(1)

Bunús is ea ollioncam náisiúnta ag praghsanna an mhargaidh (OIN) do ríomh an sciar is mó d'acmhainní dílse i mbuiséad ginearálta an Aontais. Is gá, dá bhrí sin, inchomparáideacht, iontaofacht agus uileghabhálacht an chomhiomláin a threisiú tuilleadh.

(2)

I gcás ina bhfuil staitisticí á n-úsáid go díreach chun críocha riaracháin agus chun beartas a cheapadh ar leibhéal an Aontais agus ar an leibhéal náisiúnta, baineann tábhacht ar leith le sláine staidrimh trí urraim a thabhairt do phrionsabail Chód Cleachtais an Staidrimh Eorpaigh, arna athbhreithniú agus arna nuashonrú ag an gCoiste um an gCóras Staidrimh Eorpach (CCSE) ar an 16 Samhain 2017, agus do phrionsabail Rialachán (CE) Uimh. 223/2009 ó Pharlaimint na hEorpa agus ón gComhairle (2).

(3)

Ina theannta sin, tá na sonraí staidrimh sin ina n-uirlis anailíseach thábhachtach le haghaidh beartais eacnamaíocha náisiúnta a chomhordú agus le haghaidh beartais éagsúla de chuid an Aontais, mar aon le haghaidh gníomhaíochtaí taighde.

(4)

I gcomhréir le hAirteagal 2(7) de Chinneadh 2014/335/AE, Euratom ón gComhairle (3), ciallaíonn OIN, chun críocha acmhainní dílse, OIN bliantúil ag praghas an mhargaidh faoin mhodheolaíocht atá leagtha amach in Iarscríbhinn A a ghabhann le Rialachán (AE) Uimh. 549/2013 ó Pharlaimint na hEorpa agus ón gComhairle (4) lenar bunaíodh an Córas Cuntas Eorpach athbhreithnithe (CCE 2010). I gcomhréir le hAirteagal 10(1) de Chinneadh 2014/335/AE, Euratom, agus faoi réir Airteagal 10(2) de, rinneadh Cinneadh 2007/436/CE, Euratom ón gComhairle (5) a aisghairm.

(5)

Tá sé ina bhunriachtanas gur féidir sonraí OIN a chur i gcomparáid le chéile ar fud na mBallstát agus go gcomhlíontar na sainmhínithe ábhartha agus na rialacha cuntasaíochta ábhartha in CCE 2010. Chun na críche sin, ba cheart go bhféadfaí na sainmhínithe agus na rialacha cuntasaíochta in CCE 2010 a chur i bhfeidhm go cuí trí bhíthin na nósanna imeachta agus na sonraí bunúsacha a úsáidtear iarbhír.

(6)

Tá sé ina bhunriachtanas gurb iontaofa atá na foinsí agus na modhanna a úsáidtear chun sonraí OIN a thiomsú. Ciallaíonn sé sin gur cheart teicnící fónta a úsáid a oiread is féidir i leith staitisticí bunúsacha atá láidir, oiriúnach agus cothrom le dáta.

(7)

Tá sé ina bhunriachtanas gur uileghabhálach atá sonraí OIN. Mar sin, ba cheart go dtugann na sonraí sin aird freisin ar na gníomhaíochtaí agus na hidirbhearta neamhfhoirmiúla, neamhchláraithe agus eile nach dtugtar tuairisc orthu i suirbhéanna staidrimh nó nach dtugtar tuairisc orthu d'údaráis fhioscacha, d'údaráis shóisialta ná d'údaráis riaracháin eile. Glactar leis, le clúdach feabhsaithe OIN, go bhfuil boinn oiriúnacha staidrimh agus nósanna imeachta oiriúnacha measúnaithe á bhforbairt chun staidreamh iontaofa a fhorbairt agus, i gcás inarb infheidhme, chun na coigeartuithe is gá a dhéanamh, agus bearnaí agus comhaireamh dúbailte á seachaint.

(8)

Foráiltear le Rialachán (AE, Euratom) Uimh. 608/2014 ón gComhairle (6) do chigireachtaí a dhéanamh sna Ballstáit chun críche acmhainní dílse a fhíorú. Chun críocha OIN a fhíorú, ba cheart don Choimisiún (Eurostat) a bheith i dteideal cuairteanna faisnéise OIN a thabhairt d'fhonn cáilíocht na gcomhiomlán OIN agus a gcomhpháirteanna a fhíorú agus comhlíonadh CCE 2010 a fhíorú mar aon lena áirithiú gurb inchomparáide, iontaofa agus uileghabhálach atá sonraí OIN. Ba cheart don Choimisiún (Eurostat) na rialacha maidir le rúndacht staidrimh a urramú. Tá rannpháirtíocht ionadaithe ó na húdaráis náisiúnta staidrimh sna cuairteanna faisnéise OIN ar Bhallstáit eile bunriachtanach chun trédhearcacht agus cáilíocht an phróisis um fhíorú OIN a mhéadú.

(9)

Chun iontaofacht, uileghabhálacht agus an méid is mó inchomparáideachta is féidir a áirithiú i dtaca le sonraí OIN, i gcomhréir le CCE 2010, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i dtaca leis an liosta saincheisteanna a ndíreofar orthu i ngach timthriall fíorúcháin. Tá sé tábhachtach, go háirithe, go rachaidh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (7). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(10)

Chun coinníollacha aonfhoirmeacha a áirithiú maidir le cur chun feidhme an Rialacháin seo trí chomhiomláin OIN a sholáthar chun críocha acmhainní dílse, ba cheart cumhachtaí cur chun feidhme a thabhairt don Choimisiún chun struchtúr agus socruithe mionsonraithe an fhardail foinsí agus modhanna a bhunú, foinsí agus modhanna a n-úsáidtear chun sonraí agus comhpháirteanna OIN a tháirgeadh, i gcomhréir le hIarscríbhinn A a ghabhann le Rialachán (AE) Uimh. 549/2013, mar aon le tráthchlár le haghaidh nuashonrú agus tarchur an fhardail, agus na bearta ar leith a bheidh dírithe ar inchomparáideacht, iontaofacht agus uileghabhálacht sonraí OIN na mBallstát a fheabhsú i bhfianaise an liosta ceisteanna arna sainmhíniú ag an gCoimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (8).

(11)

Iarradh ar an CCSE, a bunaíodh le Rialachán (CE) Uimh. 223/2009, treoir ghairmiúil a sholáthar i gcomhréir le hAirteagal 7 den Rialachán sin.

(12)

Maidir leis an gCoiste OIN dá dtagraítear in Airteagal 4 de Rialachán (CE, Euratom) Uimh. 1287/2003 ón gComhairle (9), d'eisigh sé tuairimí don Choimisiún, thug sé comhairle don Choimisiún agus chabhraigh sé leis an gCoimisiún a chumhachtaí cur chun feidhme a fheidhmiú. Faoin straitéis maidir le struchtúr nua don Chóras Staidrimh Eorpach lena bhfeabhsófaí comhordú agus comhpháirtíocht i struchtúr soiléir pirimide laistigh den Chóras, ba cheart do CCSE ról comhairleach a bheith aige agus ba cheart dó bheith ina chúnamh don Choimisiún a chumhachtaí cur chun feidhme a fheidhmiú. Chuige sin, ba cheart CCSE a chur in áit an Choiste OIN chun críche cúnamh a thabhairt don Choimisiún a chumhachtaí cur chun feidhme faoin Rialachán seo a fheidhmiú. Mar sin féin, chun críocha feidhmeanna eile ba ghnách leis an gCoiste OIN a chomhlíonadh faoi Rialachán (CE, Euratom) Uimh. 1287/2003, agus nach mbaineann le cabhair maidir le feidhmiú chumhachtaí cur chun feidhme an Choimisiúin, ba cheart don Choimisiún sainghrúpa foirmiúil a bhunú chun cabhrú leis.

(13)

Le Treoir 89/130/CEE, Euratom ón gComhairle (10) agus le Rialachán (CE, Euratom) Uimh. 1287/2003 ón gComhairle, bunaíodh nós imeachta le haghaidh fíorú agus measúnú a dhéanamh ar inchomparáideacht, iontaofacht agus uileghabhálacht shonraí olltáirgeachta náisiúnta (OTN) agus shonraí OIN laistigh den Choiste OTN agus den Choiste OIN, ar coistí iad ina mbíonn na Ballstáit agus an Coimisiún ag obair i ndlúthchomhar le chéile. Ba cheart an nós imeachta sin a choigeartú chun na nithe seo a chur san áireamh: sonraí OIN a úsáid i gcomhréir le CCE 2010 chun críocha acmhainní dílse; an tráthchlár athbhreithnithe le haghaidh acmhainní dílse a chur ar fáil; agus forbairtí nua sa Chóras Staidrimh Eorpach. Ba cheart, dá bhrí sin, Treoir 89/130/CEE, Euratom agus Rialachán (CE, Euratom) Uimh. 1287/2003 a aisghairm,

(1)

Bunaíodh fearann barrleibhéil (TLD) arb é .eu le Rialachán (CE) Uimh. 733/2002 ó Pharlaimint na hEorpa agus ón gComhairle (3) agus le Rialachán (CE) Uimh. 874/2004 ón gCoimisiún (4). Ó glacadh na rialacháin sin, tá athrú mór tagtha ar an gcomhthéacs polaitiúil agus reachtach san Aontas, ar an timpeallacht ar líne agus ar an margadh.

(2)

Mar gheall ar fhorás mear an mhargaidh TLD, agus an tírdhreach digiteach dinimiciúil, tá gá le timpeallacht rialála a sheasfaidh an aimsir agus atá solúbtha. Tá an TLD arb é .eu ar cheann de na cóid tíre TLDanna (ccTLDanna) is mó dá bhfuil ann. Baineann institiúidí, gníomhaireachtaí agus comhlachtaí an Aontais feidhm as an TLD arb é .eu, lena n-áirítear i gcomhair tionscadail agus tionscnaimh Eorpacha. Is é is cuspóir don TLD arb é .eu, trí dhea-bhainistiú, cabhrú chun féiniúlacht an Aontais a fheabhsú agus chun luachanna de chuid an Aontais, amhail an t-ilteangachas, an urraim do phríobháideacht agus do shlándáil úsáideoirí agus an urraim do chearta an duine, mar aon le tosaíochtaí sonracha ar líne, a chur chun chinn ar líne.

(3)

Is cuid riachtanach de struchtúr ordlathach an chórais ainmneacha fearainn (DNS) iad TLDanna lena n-áirithítear córas idir-inoibritheach d'aitheantóirí uathúla, atá ar fáil ar fud an domhain, ar aon fheidhmchlár agus ar aon líonra.

(4)

Ba cheart don TLD arb é .eu úsáid líonraí idirlín, agus rochtain ar líonraí idirlín, a chur chun cinn i gcomhréir le hAirteagal 170 agus Airteagal 171 CFAE, trí chlárú a sholáthar atá comhlánatach le ccTLDanna atá ann cheana agus le clárú domhanda TLDanna cineálacha.

(5)

An TLD arb é .eu, ar lipéad é atá soiléir agus so-aitheanta go héasca, ba cheart go mbeadh sé ina nasc leis an Aontas agus leis an margadh Eorpach atá in-aitheanta go soiléir. Ba cheart go gcuirfeadh sé ar chumas gnóthais, eagraíochtaí agus daoine nádúrtha laistigh den Aontas ainm fearainn a chlárú faoin TLD arb é .eu. Tá tábhacht le hainm fearainn den sórt sin a bheith ann chun féiniúlacht an Aontais ar líne a neartú. Dá bhrí sin, ba cheart Rialachán (CE) Uimh. 733/2002 a leasú chun go bhféadfaidh saoránaigh de chuid an Aontais ainm TLD arb é .eu a chlárú, gan beann ar a n-áit chónaithe, ón 19 Deireadh Fómhair 2019.

(6)

Ba cheart ainmneacha fearainn sa TLD arb é .eu a leithdháileadh ar pháirtithe incháilithe, ach iad a bheith ar fáil.

(7)

Ba cheart don Choimisiún comhar idir an Chlárlann, Oifig Maoine Intleachtúla an Aontais Eorpaigh (EUIPO) agus gníomhaireachtaí eile de chuid an Aontais a chur chun cinn, d'fhonn clárúcháin amhantracha agus mhí-úsáideacha ainmneacha fearainn a chomhrac, lena n-áirítear cibearshuiteoireacht, agus nósanna imeachta simplí riaracháin a sholáthar, go háirithe i gcás fiontair bheaga agus mhéanmhéide (FBManna).

(8)

Chun cosaint níos fearr a áirithiú maidir le ceart na bpáirtithe conradh a dhéanamh leis an gClárlann agus le Cláraitheoirí faoi seach, ba cheart comhlachtaí atá lonnaithe san Aontas díospóidí maidir le clárú ainmneacha fearainn sa TLD arb é .eu a réiteach tríd an dlí náisiúnta ábhartha a chur i bhfeidhm, gan dochar do na cearta agus na hoibleagáidí a aithníonn na Ballstáit nó an tAontas a eascraíonn as ionstraimí idirnáisiúnta.

(9)

Ba cheart don Choimisiún, ar bhonn nós imeachta roghnúcháin atá oscailte, trédhearcach agus neamh-idirdhealaitheach, ag féachaint d'éifeachtúlacht costais agus simplíocht riaracháin, Clárlann a ainmniú don TLD arb é .eu. Chun tacú leis an margadh aonair digiteach, chun féiniúlacht Eorpach ar líne a chruthú agus chun gníomhaíochtaí trasteorann ar líne a spreagadh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i ndáil leis na critéir incháilitheachta agus roghnúcháin agus an nós imeachta chun an Chlárlann a ainmniú. Tá sé ríthábhachtach, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (5). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bheidh ag déileáil le hullmhú na ngníomhartha tarmligthe.

(10)

Chun coinníollacha aonfhoirmeacha a áirithiú maidir le cur chun feidhme an Rialacháin seo, ba cheart cumhachtaí cur chun feidhme a thabhairt don Choimisiún na liostaí d'ainmneacha fearainn atá forchoimeádta agus atá blocáilte ag na Ballstáit a ghlacadh, chun na prionsabail a bheidh le háireamh sa chonradh idir an Coimisiún agus an Chlárlann a bhunú agus chun an Chlárlann a ainmniú ar mhórfhorais práinne a bhfuil údar cuí leo, go háirithe chun leanúnachas na seirbhíse a áirithiú. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (6). Ba cheart na liostaí sin a thiomsú faoi réir infhaighteacht na n-ainmneacha fearainn agus ainmneacha fearainn ar an dara leibhéal atá forchoimeádta nó cláraithe cheana ag na Ballstáit á gcur san áireamh.

(11)

Ba cheart don Choimisiún conradh a dhéanamh leis an gClárlann ainmnithe agus ba cheart a áireamh ann na prionsabail agus na nósanna imeachta mionsonraithe a bhfuil feidhm acu maidir leis an gClárlann i dtaca le heagrú, riar agus bainistiú an TLD arb é .eu. Ba cheart fad cinnte a bheith leis an gconradh agus ba cheart é a bheith in-athnuaite aon uair amháin gan an gá le nós imeachta roghnúcháin nua.

(12)

Ba cheart na prionsabail agus na nósanna imeachta a bhaineann le feidhmiú an TLD arb é .eu a chur i gceangal leis an gconradh idir an Coimisiún agus an Chlárlann ainmnithe.

(13)

Ní dochar an Rialachán seo do chur i bhfeidhm na rialacha maidir le hiomaíocht dá bhforáiltear in Airteagal 101 agus Airteagal 102 CFAE.

(14)

Ba cheart don Chlárlann prionsabail an neamh-idirdhealaithe agus na trédhearcachta a chomhlíonadh, agus ba cheart di bearta a chur chun feidhme chun iomaíocht chothrom a choimirciú, a bheidh le húdarú roimh ré ag an gCoimisiún, go háirithe agus seirbhísí á soláthair ag an gClárlann do ghnóthais lena bhfuil sí in iomaíocht i margaí iartheachtacha.

(15)

Is í an Chorparáid Sannta Ainmneacha agus Uimhreacha Idirlín (ICANN) atá freagrach faoi láthair as comhordú a dhéanamh ar cóid atá in ionannas le ccTLD a tharmligean chuig na Clárlanna. Ba cheart don Chlárlann conradh iomchuí a dhéanamh le ICANN lena ndéanfar foráil maidir leis an gcód ccTLD arb é .eu a tharmligean, agus na prionsabail ábhartha arna nglacadh ag Coiste Comhairleach an Rialtais (GAC) á gcur san áireamh.

(16)

Ba cheart don Chlárlann comhaontú iomchuí eascró a dhéanamh chun leanúnachas na seirbhíse a áirithiú, agus go háirithe chun a áirithiú go bhféadfar leanúint de bheith ag soláthar seirbhísí don phobal idirlín áitiúil, lena laghad cur isteach is féidir, i gcás tarmligean an athuair nó imthosca eile gan choinne a bheith ann. Ba cheart don Chlárlann cóip leictreonach d'inneachar reatha bhunachar sonraí an TLD arb é .eu a chur faoi bhráid an ghníomhaire eascró ar bhonn laethúil.

(17)

Na nósanna imeachta um Réiteach Malartach Díospóide (RMD) a bheidh le glacadh, ba cheart go gcomhlíonfaidís Treoir 2013/11/AE ó Pharlaimint na hEorpa agus ón gComhairle (7) agus ba cheart do dtabharfaidís aird ar na dea-chleachtais idirnáisiúnta sa réimse seo agus go háirithe moltaí ábhartha na hEagraíochta Domhanda um Maoin Intleachtúil, chun a áirithiú go seachnófar clárúcháin amhantracha agus mhí-úsáideacha a mhéid is féidir. Ba cheart go n-urramófaí leis na nósanna imeachta RMD sin rialacha nós imeachta aonfhoirmeacha atá i gcomhréir leo siúd a leagtar amach i mBeartas Aonfhoirmeach ICANN um Réiteach Díospóidí ar Ainmneacha Fearainn.

(18)

Ba cheart foráil a dhéanamh sa bheartas maidir le clárú míchuí ainmneacha fearainn arb iad .eu go ndéanfaidh an Chlárlann na sonraí a gheobhaidh sé a fhíorú, go háirithe sonraí maidir le céannacht na gcláraithe, agus maidir le hainmneacha fearainn a mheasfar le cinneadh deiridh ó chúirt i mBallstát go bhfuil siad clúmhillteach, ciníoch nó contrártha le dlí an Bhallstáit ar bhealach eile, go ndéanfar clárú na n-ainmneacha fearainn sin a chúlghairm nó a bhlocáil amach anseo. Ba cheart don Chlárlann an-chúram a ghlacadh chun cruinneas na sonraí a gheobhaidh sí agus a bheidh ina seilbh aici a áirithiú. Leis an nós imeachta um chúlghairm, ba cheart í deis réasúnach a thabhairt do shealbhóir an ainm fearainn aon sárú ar na critéir incháilitheachta, ar na ceanglais clárúcháin nó ar fhiacha gan íoc a chur ina cheart sula ngabhfaidh éifeacht leis an gcúlghairm.

(19)

Ainm fearainn atá comhionann le hainm, nó atá cosúil leis ar bhealach mearbhlach, a mbunaítear ceart ina leith le dlí an Aontais nó leis an dlí náisiúnta agus a cláraíodh gan cearta ná leas dlisteanach san ainm, ba cheart, i bprionsabal, é a chúlghairm agus, i gcás inar gá, é a aistriú chuig an sealbhóir dlisteanach. I gcás ina n-aimsítear gur úsáideadh ainm fearainn de mheon mímhacánta, ba cheart é a chúlghairm i gcónaí.

(20)

Ba cheart go nglacfadh an Chlárlann beartais shoiléire a bhfuil sé mar aidhm leo a áirithiú go ndéanfar clárúcháin amhantracha ainmneacha fearainn a shainaithint go tráthúil agus, i gcás inar gá, ba cheart go n-oibreodh sí i gcomhar le húdaráis inniúla agus le comhlachtaí poiblí eile is ábhartha don chibearshlándáil agus do shlándáil faisnéise atá rannpháirteach go sonrach sa chomhrac in aghaidh na gclárúchán sin, amhail foirne náisiúnta phráinnfhreagartha ríomhaire (CERTanna).

(21)

Ba cheart don Chlárlann tacú le gníomhaireachtaí forfheidhmithe dlí sa chomhrac in aghaidh na coireachta, trí bhearta teicniúla agus eagraíochtúla a chur chun feidhme a bhfuil sé mar aidhm leo údaráis inniúla a chumasú chun rochtain a bheith acu ar na sonraí atá sa Chlárlann chun críocha coireanna a chosc, a bhrath, a imscrúdú agus a ionchúiseamh, amhail dá bhforáiltear i ndlí an Aontais nó sa dlí náisiúnta.

(22)

Ba cheart an Rialachán seo a chur chun feidhme i gcomhréir leis na prionsabail a bhaineann le príobháideachas agus le cosaint sonraí pearsanta. Ba cheart don Chlárlann rialacha, prionsabail agus treoirlínte ábhartha cosanta sonraí an Aontais a chomhlíonadh, go háirithe ceanglais slándála ábhartha, prionsabail an riachtanais, na comhréireachta, an teorannaithe de réir cuspóra, agus tréimhse coinneála sonraí chomhréireach. Ina theannta sin, ba cheart cosaint sonraí pearsanta trí dhearadh agus cosaint sonraí mar réamhshocrú a bheith leabaithe i ngach córas próiseála sonraí agus i ngach bunachar sonraí arna fhorbairt agus arna chothabháil.

(23)

D'fhonn maoirseacht thréimhsiúil éifeachtach a áirithiú, ba cheart do chomhlacht neamhspleách iniúchadh a dhéanamh ar an gClárlann, ar chostas na Clárlainne, gach 2 bhliain ar a laghad, chun a dhearbhú, trí bhíthin tuarascáil ar mheasúnú comhréireachta, go gcomhlíonann an Chlárlann na ceanglais a leagtar síos sa Rialachán seo. Ba cheart don Chlárlann an tuarascáil sin a thíolacadh don Choimisiún i gcomhréir lena conradh leis an gCoimisiún.

(24)

Ba cheart foráil a dhéanamh sa chonradh idir an Chlárlann agus an Coimisiún maidir le nósanna imeachta chun eagrú, riar agus bainistiú an TLD arb é .eu ag an gClárlann a fheabhsú i gcomhréir le treoracha an Choimisiúin a eascraíonn as na gníomhaíochtaí maoirseachta amhail dá bhforáiltear sa Rialachán seo.

(25)

Ina conclúidí an 27 Samhain 2014, dár teideal “Rialachas an Idirlín”, d'athdhearbhaigh an Chomhairle tiomantas an Aontais i leith struchtúir rialachais páirtithe leasmhara éagsúla a chur chun cinn atá bunaithe ar shraith chomhleanúnach de phrionsabail dhomhanda i dtaobh rialachas an idirlín. Tagraíonn rialachas chuimsitheach an idirlín d'fhorbairt agus d'fheidhmiú prionsabal chomhroinnte, norm, rialacha, nósanna imeachta cinnteoireachta agus clár lena múnlaítear forás agus úsáid an idirlín ag rialtais, ag an earnáil phríobháideach, ag an tsochaí shibhialta, ag eagraíochtaí idirnáisiúnta agus ag an bpobal teicniúil, ag gníomhú dóibh uile ina róil faoi seach.

(26)

Ba cheart Grúpa Comhairleach na nIl-gheallsealbhóirí .eu a chur ar bun agus é de ról aige comhairle a thabhairt don Choimisiún chun an t-ionchur sa dea-rialachas ar an gClárlann a neartú agus a leathnú. Ba cheart go mbeadh an Grúpa ina léiriú ar shamhail il-gheallsealbhóirí Rialachais an Idirlín, agus a gcomhaltaí, cé is moite díobh siúd a gheofar ó údaráis na mBallstát agus ó eagraíochtaí idirnáisiúnta, ba cheart go gceapfadh an Coimisiún iad ar bhonn nós imeachta oscailte, neamh-idirdhealaitheach agus trédhearcach. An t-ionadaí a gheobhfar ó údaráis na mBallstát, ba cheart é a cheapadh ar bhonn córas uainíochta lena n-áiritheofaí leanúnachas leordhóthanach ó thaobh rannpháirtíocht an Ghrúpa de.

(27)

Ba cheart don Choimisiún meastóireacht a dhéanamh ar éifeachtacht agus ar fheidhmiú an TLD arb é .eu. Ba cheart don mheastóireacht sin féachaint do chleachtais oibre na Clárlainne ainmnithe agus d'ábharthacht chúraimí na Clárlainne. Ina theannta sin, ba cheart don Choimisiún tuarascálacha rialta maidir le feidhmíocht ainm an TLD arb é .eu a chur faoi bhráid Pharlaimint na hEorpa agus na Comhairle.

(28)

Leis an Rialachán seo, urramaítear na cearta bunúsacha agus comhlíontar na prionsabail a aithnítear i gCairt um Chearta Bunúsacha an Aontais Eorpaigh (an “Chairt”), mar a chumhdaítear sna Conarthaí iad, go háirithe cosaint sonraí pearsanta, an tsaoirse chun tuairimí a nochtadh agus faisnéis a fháil, agus cosaint do thomhaltóirí. Ba cheart nósanna imeachta iomchuí de chuid an Aontais a urramú agus deimhin á dheanamh de go ndéanfaidh na forálacha sa dlí náisiúnta lena ndéantar difear don Rialachán seo dlí an Aontais agus, go háirithe, an Chairt a chomhlíonadh. I gcásanna amhrais, ba cheart don Chlárlann treoir a lorg ar an gCoimisiún maidir le comhlíonadh dhlí an Aontais.

(29)

Ós rud é nach féidir leis na Ballstáit cuspóir an Rialacháin seo, eadhon TLD uile-Eorpach a chur chun feidhme sa bhreis ar na ccTLDanna náisiúnta, a ghnóthú go leordhóthanach, agus, de bharr a fhairsinge agus a éifeachtaí, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta, mar a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(30)

Chun srian a chur le haon riosca go dtarlódh suaitheadh i seirbhísí an TLD arb é .eu le linn chur chun feidhme an chreata rialála nua, leagtar síos forálacha idirthréimhseacha sa Rialachán seo.

(31)

Ba cheart, dá bhrí sin, Rialachán (CE) Uimh. 733/2002 a leasú agus a aisghairm, agus ba cheart Rialachán (CE) Uimh. 874/2004 a aisghairm,

(1)

Ón uair a glacadh Rialachán (CE) Uimh. 2560/2001 (4) agus Rialachán (CE) Uimh. 924/2009 (5), tá laghdú mór tagtha ar mhuirir ar íocaíochtaí trasteorann in euro idir na Ballstáit sa limistéar euro chuig leibhéil atá neamhshuntasach i bhformhór mór na gcásanna.

(2)

Is íocaíochtaí trasteorann in euro ó na Ballstáit nach bhfuil sa limistéar euro atá in thart ar 80 % de na híocaíochtaí trasteorann ar fad ó na Ballstáit nach bhfuil sa limistéar euro, áfach. Leanann na muirir ar na híocaíochtaí trasteorann sin de bheith ró-ard i bhformhór na mBallstát nach bhfuil sa limistéar euro, cé go bhfuil rochtain ag soláthraithe seirbhísí íocaíochta atá lonnaithe i mBallstáit nach bhfuil sa limistéar euro ar na bonneagair éifeachtúla chéanna chun na hidirbhearta sin a phróiseáil ar chostas an-íseal is atá ag soláthraithe seirbhísí íocaíochta atá lonnaithe sa limistéar euro.

(3)

Tá ardmhuirir ar íocaíochtaí trasteorann ina mbacainn fós ar ghnólachtaí agus saoránaigh i mBallstáit nach bhfuil sa limistéar euro a lánpháirtiú sa mhargadh inmheánach, agus tá sé sin ag cur isteach ar a n-iomaíochas. Déanann na hardmhuirir sin buanú ar dhá chatagóir úsáideoirí seirbhísí íocaíochta a bheith ann san Aontas: úsáideoirí seirbhísí íocaíochta a bhaineann tairbhe as an limistéar aonair d'íocaíochtaí euro (SEPA), agus úsáideoirí seirbhísí íocaíochta a íocann ardchostais as a n-íocaíochtaí trasteorann in euro.

(4)

Chun feidhmiú an mhargaidh inmheánaigh a éascú agus chun deireadh a chur leis na héagothromaíochtaí idir úsáideoirí seirbhísí íocaíochta sa limistéar euro agus iad sin sna Ballstáit nach bhfuil sa limistéar euro maidir le híocaíochtaí trasteorann in euro, is gá a áirithiú go mbeidh muirir ar íocaíochtaí trasteorann in euro laistigh den Aontas i gcomhréir le muirir ar íocaíochtaí comhfhreagracha náisiúnta a dhéantar in airgeadra náisiúnta an Bhallstáit ina bhfuil soláthraí seirbhísí íocaíochta an úsáideora seirbhíse íocaíochta lonnaithe. Meastar soláthraí seirbhísí íocaíochta a bheith lonnaithe sa Bhallstát ina bhfuil sé ag soláthar a sheirbhísí don úsáideoir seirbhísí íocaíochta.

(5)

Tá muirir comhshó airgeadra ina gcostas suntasach d'íocaíochtaí trasteorann i gcás nach ionann an t-airgeadra atá in úsáid i mBallstát an íocóra agus i mBallstát an íocaí. Ceanglaítear faoi Airteagal 45 de Threoir (AE) 2015/2366 ó Pharlaimint na Eorpa agus ón gComhairle (6) go mbeadh na muirir agus na rátaí malairte a úsáidtear trédhearcach, sonraítear in Airteagal 52(3) den Treoir sin na ceanglais faisnéise i ndáil le hidirbhearta íocaíochta atá cumhdaithe ag creatchonradh agus cumhdaítear in Airteagal 59(2) den Treoir sin na ceanglais faisnéise atá ar pháirtithe a thairgeann seirbhísí comhshó airgeadra ag uathmheaisín bainc (UMB) nó ag an díolphointe. Níl dóthain trédhearcachta ná inchomparáideachta bainte amach ag na ceanglais faisnéise sin ó thaobh muirir comhshó airgeadra de i gcásanna ina ndéantar roghanna eile comhshó airgeadra a thairiscint ag UMB nó ag an díolphointe. Is é an toradh atá ar an easpa trédhearcachta agus inchomparáideachta sin go gcuirtear cosc ar iomaíochas a dhéanfadh laghdú ar mhuirir comhshó airgeadra agus go méadaítear an riosca go roghnóidh íocóirí roghanna costasacha comhshó airgeadra. Is gá, dá bhrí sin, bearta breise a thabhairt isteach chun go gcosnófar tomhaltóirí ar mhuirir iomarcacha ar sheirbhísí comhshó airgeadra, agus chun a áirithiú go dtabharfar do thomhaltóirí an fhaisnéis a theastaíonn uathu chun an rogha comhshó airgeadra is fearr a dhéanamh.

(6)

Chun a áirithiú nach mbeidh ar ghníomhaithe margaidh aghaidh a thabhairt ar an ngá le leibhéal díréireach infheistíochta a dhéanamh chun a mbonneagar, a dtrealamh agus a bpróisis íocaíochta a oiriúnú chun bheith níos trédhearcaí, ba cheart go mbeadh na bearta a chuirfear chun feidhme ina mbearta iomchuí, leordhóthanacha agus costéifeachtacha. Ag an am céanna, i gcásanna ina bhfuil ar an íocóir roghnú idir roghanna éagsúla comhshó airgeadra ag UMB nó ag an díolphointe, ba cheart go gcuirfeadh an fhaisnéis a sholáthraítear ar chumas an íocóra comparáid a dhéanamh, ionas go bhféadfadh sé nó sí rogha eolach a dhéanamh.

(7)

Chun inchomparáideacht a bhaint amach, ba cheart na muirir comhshó airgeadra ar na híocaíochtaí cártabhunaithe go léir a shloinneadh ar an mbealach céanna, eadhon mar chéatadáin marcála suas os cionn na rátaí tagartha malairte eachtraí euro is déanaí atá ar fáil, arna n-eisiúint ag an mBanc Ceannais Eorpach (BCE). D'fhéadfadh gur ghá marcáil suas a bhunú ar ráta atá díorthaithe ó dhá ráta BCE i gcás ina bhfuil comhshó á dhéanamh idir dhá airgeadra nach euro iad.

(8)

I gcomhréir leis na ceanglais faisnéise ghinearálta maidir le comhshó airgeadra a leagtar síos i dTreoir (AE) 2015/2366, ní mór do sholáthraithe seirbhísí comhshó airgeadra an fhaisnéis a nochtadh maidir lena muirir comhshó airgeadra sula gcuirtear tús leis an idirbheart íocaíochta. I gcás páirtithe a thairgeann seirbhísí comhshó airgeadra ag UMB nó ag an díolphointe, ba cheart dóibh faisnéis maidir lena muirir ar na seirbhísí sin a sholáthar ar bhealach soiléir agus inrochtana, mar shampla trína muirir a chur ar taispeáint ag an gcuntar nó go digiteach ar an teirminéal, nó ar an scáileán i gcás ceannacháin ar líne. De bhreis ar an bhfaisnéis dá dtagraítear in Airteagal 59(2) de Threoir (AE) 2015/2366, ba cheart go gcuirfeadh na páirtithe sin freisin, sula gcuirtear tús le hidirbheart, faisnéis shainráite ar fáil maidir leis an méid atá le híoc leis an íocaí san airgeadra atá in úsáid ag an íocaí agus an méid iomlán atá le híoc ag an íocóir in airgeadra chuntas an íocóra. Ba cheart go sonrófaí sa mhéid atá le híoc san airgeadra atá in úsáid ag an íocaí praghas na n-earraí agus na seirbhísí atá le ceannach agus d'fhéadfaí é sin a thaispeáint ag an tseiceáil amach seachas ar an teirminéal íocaíochta. De ghnáth is é an t-airgeadra áitiúil an t-airgeadra a bhíonn in úsáid ag an íocaí ach, i gcomhréir le prionsabal na saoirse conarthaí, d'fhéadfadh i roinnt cásanna gur airgeadra eile Aontais a bheadh i gceist. Ba cheart go mbeadh an méid iomlán atá le híoc ag an íocóir in airgeadra chuntas an íocóra déanta suas de phraghas na n-earraí nó na seirbhísí agus na muirir comhshó airgeadra. Ina theannta sin, ba cheart go ndéanfaí an dá mhéid a dhoiciméadú ar admháil nó ar mheán marthanach eile.

(9)

I ndáil le hAirteagal 59(2) de Threoir (AE) 2015/2366, i gcás ina ndéantar seirbhís comhshó airgeadra a thairiscint ag UMB nó ag an díolphointe, ba cheart go mbeadh sé indéanta don íocóir an tseirbhís sin a dhiúltú agus íoc san airgeadra atá in úsáid ag an íocaí ina ionad sin.

(10)

Chun a chur ar chumas íocóirí comparáid a dhéanamh idir muirir a ghabhann leis na roghanna éagsúla comhshó airgeadra ag UMB nó ag an díolphointe, ní hamháin gur cheart do sholáthraithe seirbhísí íocaíochta na n-íocóirí faisnéis atá go hiomlán inchomparáide a sholáthar maidir leis na muirir is infheidhme don chomhshó airgeadra i dtéarma agus coinníollacha a gcreatchonartha, ach ba cheart go ndéanfaidís freisin an fhaisnéis sin poiblí ar ardán leictreonach atá ar fáil go forleathan agus a bhfuil rochtain éasca orthu, go háirithe ar a suíomh gréasáin do chustaiméirí, ar a suíomh gréasáin baincéireachta baile agus ar a bhfeidhmchláir baincéireachta soghluaiste, ar bhealach atá éasca le tuiscint agus inrochtana. D'fhreastalódh sé sin ar fhorbairt suíomhanna gréasáin comparáide ionas go mbeadh sé níos éasca do thomhaltóirí praghsanna a chur i gcomparáid le chéile agus iad ag taisteal nó ag siopadóireacht thar lear. Ina theannta sin, ba cheart go gcuirfeadh soláthraithe seirbhísí íocaíochta na n-íocóirí i gcuimhne d'íocóirí na muirir comhshó airgeadra is infheidhme nuair a dhéanann siad íocaíocht chártabhunaithe in airgeadra eile, trí úsáid a bhaint as bealaí cumarsáide leictreonacha atá ar fáil go forleathan agus a bhfuil rochtain éasca orthu, amhail teachtaireachtaí SMS, ríomhphoist nó brúfhógraí trí aip baincéireachta soghluaiste an íocóra. Ba cheart go dtiocfadh soláthraithe seirbhísí íocaíochta ar chomhaontú le húsáideoirí seirbhísí íocaíochta maidir leis an mbealach cumarsáide leictreonaí trína soláthróidh siad an fhaisnéis maidir le muirir comhshó airgeadra, ag cur san áireamh an bealach is éifeachtaí chun teacht ar an íocóir. Chomh maith leis sin, ba cheart go nglacfadh soláthraithe seirbhísí íocaíochta freisin le hiarrataí ó úsáideoirí seirbhísí íocaíochta diúltú do theachtaireachtaí leictreonacha a fháil, ar teachtaireachtaí iad ina bhfuil faisnéis faoi mhuirir comhshó airgeadra.

(11)

Is iomchuí meabhrúcháin thréimhsiúla a úsáid i gcásanna ina bhfuil an t-íocóir ag fanacht thar lear ar feadh tréimhse fhada, mar shampla i gcás ina bhfuil an t-íocóir ar postú nó ag staidéar thar lear, nó i gcás ina n-úsáideann an t-íocóir cárta do cheannacháin ar líne san airgeadra áitiúil. Ní cheanglófaí le hoibleagáid maidir le meabhrúcháin den sórt sin a sholáthar infheistíochtaí díréireacha a dhéanamh chun na próisis ghnó agus bonneagair próiseála íocaíochta an tsoláthraí seirbhísí íocaíochta atá ann cheana féin a chur in oiriúint, ach d'áiritheofaí leis go mbeadh an t-íocóir níos fearr ar an eolas agus é ag meas na roghanna éagsúla comhshó airgeadra.

(12)

Ba cheart go gcuirfeadh an Coimisiún tuarascáil faoi bhráid Pharlaimint na hEorpa, na Comhairle, BCE agus Choiste Eacnamaíoch agus Sóisialta na hEorpa maidir le cur i bhfeidhm na rialach lena gcothromaítear costas na n-íocaíochtaí trasteorann in euro le costas na n-idirbheart náisiúnta in airgeadraí náisiúnta agus maidir le héifeachtacht na gceanglas faisnéise ar chomhshó airgeadra a leagtar amach sa Rialachán seo. Ba cheart go ndéanfadh an Coimisiún anailís ar fhéidearthachtaí breise freisin — agus ar indéantacht theicniúil na bhféidearthachtaí sin — chun síneadh a chur leis an riail maidir le muirir chothroma ionas go gcuimseofaí gach airgeadra Aontais agus feabhas breise a chur ar thrédhearcacht agus inchomparáideacht na muirear comhshó airgeadra, chomh maith leis na páirtithe a bheith in ann cumasú agus díchumasú a dhéanamh ar an rogha glacadh le comhshó airgeadra seachas an rogha a chuireann soláthraí seirbhísí íocaíochta an íocóra ar fáil.

(13)

Ós rud é nach féidir leis na Ballstáit cuspóirí an Rialacháin seo a ghnóthú go leordhóthanach ach, de bharr nádúr trasteorann na n-íocaíochtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,

(1)

Éilítear soiléiriú leis na tuairiscí ar fheithiclí chatagóir T1 agus T2 dá bhforáiltear i Rialachán (AE) Uimh. 167/2013 ó Pharlaimint na hEorpa agus ón gComhairle (3) i dtaca le suíomh an acastóra is gaire don tiománaí do tharracóirí ag a bhfuil suíomh tiomána iniompaithe agus i dtaca leis an modh chun airde mheáchanlár an tarracóra a ríomh. Chun airde mheáchanlár feithiclí chatagóir T2 a ríomh go cruinn agus go haonfhoirmeach, ba cheart tagairt a dhéanamh do chaighdeáin is infheidhme go hidirnáisiúnta lena ndéantar airde mheáchanlár tarracóra a chinneadh.

(2)

Tá sainmhíniú cruinn ar na gnéithe éagsúla de tharracóirí talamhaíochta bunaithe ar an anailís ar a gcuid tréithe teicniúla ríthábhachtach chun an Rialachán seo agus na gníomhartha tarmligthe cur chun feidhme a chur chun feidhme go cuí agus go hiomlán. Ós rud é go dtarlaíonn plé ar shainmhínithe na gcatagóirí sna fóraim idirnáisiúnta ábhartha a bhfuil an tAontas ina pháirtí díobh, ba cheart don Choimisiún obair den sórt sin a chur san áireamh chun cosc a chur le haon éifeachtaí díréireacha agus diúltacha ar chur i bhfeidhm na gceanglas teicniúil agus na nósanna imeachta tástála, agus aon thionchair dhiúltacha do na monaróirí, go háirithe i leith tarracóirí an-speisialaithe

(3)

I Rialachán (AE) Uimh. 167/2013, ba cheart a shoiléiriú go gciallaíonn an téarma “innealra idirmhalartaithe”“trealamh idirmhalartaithe”, rud a áirithíonn go n-úsáidtear téarmaíocht go comhsheasmhach ar fud an Rialacháin sin.

(4)

I Rialachán (AE) Uimh. 167/2013, ceanglaítear ar allmhaireoirí cóip den deimhniú comhréireachta a choinneáil i leith táirgí nach bhfuil i gcomhréir leis an Rialachán sin nó a mbaineann riosca tromchúiseach leo. Ba cheart a shoiléiriú go bhfuiltear ag tagairt do dheimhniú ar chineálcheadú AE. Dá bhrí sin, ba cheart an Rialachán sin a leasú chun go ndéanfaí tagairt ann don doiciméad iomchuí.

(5)

Le Rialachán (AE) Uimh. 167/2013, ceanglaítear go bhfuil torthaí na tástála mar cheangaltán i ndeimhniú ar chineálcheadú AE. Ba cheart a shoiléiriú go bhfuiltear ag tagairt do bhileog thorthaí na tástála. Dá bhrí sin, ba cheart an Rialachán sin a leasú chun go ndéanfaí tagairt ann don cheangaltán iomchuí.

(6)

Le Rialachán (AE) Uimh. 167/2013, tugadh an chumhacht don Choimisiún gníomhartha tarmligthe a ghlacadh ar feadh tréimhse 5 bliana, a chuaigh in éag an 21 Márta 2018. Ós rud é go mbíonn síorghá le gnéithe éagsúla den phróiseas cineálcheadaithe mar a leagtar síos leis an Rialachán sin agus leis na gníomhartha a ghlactar dá bhun, go háirithe chun iad a chur in oiriúint do dhul chun cinn teicniúil nó ceartúcháin a thabhairt isteach, ba cheart síneadh a chur leis an tréimhse chun tarmligean na cumhachta a fheidhmiú agus deis a thabhairt síntí breise intuigthe a chur leis an tréimhse sin.

(7)

Déantar tagairt i Rialachán (AE) Uimh. 167/2013 d'aisghairm Threoir 74/347/CEE ón gComhairle (4) nuair ba cheart, ina ionad sin, tagairt a dheanamh d'aisghairm Threoir 2008/2/CE ó Pharlaimint na hEorpa agus ón gComhairle (5), lenar códaíodh an iar-Treoir. Dá bhrí sin, is gá an tagairt iomchuí a leasú i Rialachán (AE) Uimh. 167/2013.

(8)

Ós rud é go leasaítear Rialachán (AE) Uimh. 167/2013 leis an Rialachán seo gan an t-ábhar rialála atá ann a leathnú agus nach féidir leis na Ballstáit cuspóirí an Rialacháin seo a ghnóthú go leordhóthanach agus, de bharr fhairsinge agus éifeachtaí an Rialacháin, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(9)

Ba cheart, dá bhrí sin, Rialachán (AE) Uimh. 167/2013 a leasú dá réir sin,

(1)

Rinneadh Treoir 2004/52/CE ó Pharlaimint na hEorpa agus ón gComhairle (4) a leasú go substaintiúil. Ós rud é go bhfuil tuilleadh leasuithe le déanamh uirthi, ba cheart an Treoir sin a athmhúnlú ar mhaithe le soiléireacht.

(2)

Tá sé inmhianaithe go mbeadh córais leictreonacha dolaí bóthair in úsáid go forleathan sna Ballstáit agus sna tíortha comharsanachta, agus, a mhéid is féidir, go mbeadh córais iontaofa, sholáimhsithe agus chost-éifeachtúla ann atá oiriúnach don fhorbairt a dhéanfar amach anseo ar an mbeartas maidir le muirir ar úsáid bóthair ar leibhéal an Aontais agus do na forbairtí teicniúla a thiocfaidh amach anseo. Dá bhrí sin, is gá córais leictreonacha dolaí bóthair a dhéanamh idir-inoibritheach chun laghdú a dhéanamh ar chostas íoc na ndolaí agus ar na hualaí a bhaineann leis ar fud an Aontais.

(3)

Rannchuidíonn córais idir-inoibritheacha leictreonacha dolaí bóthair leis na cuspóirí a leagtar síos i ndlí an Aontais maidir le dolaí bóthair a bhaint amach.

(4)

Is fadhb mhór é an easpa idir-inoibritheachta sna córais leictreonacha dolaí bóthair i gcás ina mbaineann an dola atá le híoc leis an bhfad arna thaisteal ag an bhfeithicil (dolaí fadbhunaithe) nó leis an bhfeithicil a bheith ag dul thar phointe sonrach (mar shampla, praghsáil de réir tródaim). Dá bhrí sin, níor cheart feidhm a bheith ag na forálacha i ndáil le hidir-inoibritheacht na gcóras leictreonach dolaí bóthair ach maidir leis na córais sin agus níor cheart feidhm a bheith acu maidir le córais ina mbaineann an dola atá le híoc leis an bhfad ama arna chaitheamh ag an bhfeithicil ar an mbonneagar lena mbaineann dola (mar shampla, córais ambhunaithe amhail greamáin).

(5)

Baineann fadhb mhór le forfheidhmiú trasteorann na hoibleagáide dolaí san Aontas a íoc i ngach cineál córais, bíodh siad ina gcóras fadbhunaithe, tródambhunaithe nó ambhunaithe, leictreonach nó láimhe. Chun dul i ngleic leis an bhfadhb a bhaineann le forfheidhmiú trasteorann tar éis mainneachtain dola a íoc, ba cheart feidhm, dá bhrí sin, a bheith ag na forálacha maidir le malartú trasteorann faisnéise maidir leis na córais sin ar fad.

(6)

Sa dlí náisiúnta, is féidir an cion arb éard é mainneachtain dola a íoc a aicmiú mar chion riaracháin nó mar chion coiriúil. Ba cheart feidhm a bheith ag an Treoir seo gan beann ar aicmiú an chiona.

(7)

Ós rud é nach bhfuil siad aicmithe go comhleanúnach ar fud an Aontais, agus gur nasc indíreach atá acu le húsáid an bhonneagair, níor cheart táillí páirceála a chur san áireamh i raon feidhme na Treorach seo.

(8)

Is gá comhchuibhiú a dhéanamh ar an teicneolaíocht a úsáidtear agus ar na comhéadain idir na comhpháirteanna idir-inoibritheachta ar mhaithe le hidir-inoibritheacht na gcóras leictreonach dolaí bóthair.

(9)

Ba cheart caighdeáin iomchuí atá oscailte agus poiblí, a mbeadh fáil ag na soláthraithe córais ar fad orthu ar bhonn neamh-idirdhealaitheach, a fhorbairt agus a chomhlíonadh ar mhaithe le comhchuibhiú na dteicneolaíochtaí agus na gcomhéadan.

(10)

Chun na teicneolaíochtaí cumarsáide is gá a chumhdach lena dtrealamh ar bord (TAB), ba cheart cead a bheith ag soláthraithe Sheirbhís Dolaí Leictreonacha na hEorpa (SDLE) úsáid a bhaint as córais eile crua-earraí agus bogearraí atá san fheithicil cheana féin amhail córais loingseoireachta satailíte nó gléasanna láimhe, agus ba cheart cead a bheith acu nascadh leis na córais sin.

(11)

Saintréithe na gcóras leictreonach dolaí bóthair a chuirtear i bhfeidhm ar fheithiclí saothair éadroim faoi láthair, ba cheart iad a chur san áireamh. Ós rud é nach n-úsáidtear suí satailíte ná cumarsáid mhóibíleach in aon chórais leictreonacha dolaí bóthair den sórt sin i láthair na huaire, ba cheart ligean do sholáthraithe SDLE, ar feadh tréimhse theoranta ama, TAB atá oiriúnach lena úsáid le teicneolaíocht mhicreathonnach 5,8 GHz amháin a chur ar fáil d'úsáideoirí feithiclí saothair éadroim. Níor cheart gur dochar an maolú sin do cheart na mBallstát dolaí atá bunaithe ar shatailítí a chur chun feidhme le haghaidh feithiclí saothair éadroim.

(12)

Le córais bailiúcháin dolaí atá bunaithe ar theicneolaíocht uathaitheanta uimhirphlátaí (ANPR), is gá níos mó seiceálacha láimhe a dhéanamh ar idirbhearta dolaí sa chúloifig ná i gcás córais lena n-úsáidtear TAB. Tá na córais lena n-úsáidtear TAB níos éifeachtúla le haghaidh fearainn mhóra dola leictreonaigh, agus tá córais lena n-úsáidtear teicneolaíocht ANPR níos oiriúnaí d'fhearainn bheaga, amhail dolaí cathrach, lena mbainfeadh costais dhíréireacha nó ualaí riaracháin dá n-úsáidfí TAB. Is féidir le teicneolaíocht ANPR a bheith úsáideach go háirithe nuair a chomhcheanglaítear le teicneolaíochtaí eile é.

(13)

I bhfianaise forbairtí teicniúla a bhaineann le réitigh atá bunaithe ar theicneolaíocht ANPR, ba cheart na comhlachtaí caighdeánaithe a spreagadh leis na caighdeáin theicniúla is gá a shainiú.

(14)

Ba cheart feidhm a bheith ag cearta agus oibleagáidí sonracha na soláthraithe SDLE maidir le heintitis a chruthaíonn go bhfuil ceanglais áirithe comhlíonta acu agus a bhfuil clárú mar sholáthraithe SDLE faighte acu ina mBallstát bunaíochta.

(15)

Ba cheart cearta agus oibleagáidí na bpríomhghníomhaithe SDLE, is é sin le rá, soláthraithe SDLE, muirearóirí dolaí agus úsáideoirí SDLE, a shainiú go soiléir chun a áirithiú go bhfeidhmeoidh an margadh ar bhealach cóir agus éifeachtúil.

(16)

Tá sé tábhachtach, go háirithe, cosaint a thabhairt do chearta áirithe de chuid na soláthraithe SDLE, amhail an ceart go gcosnófaí sonraí atá íogair ó thaobh na tráchtála de, agus sin a dhéanamh gan tionchar diúltach a bheith ar cháilíocht na seirbhísí a chuirtear ar fáil do mhuirearóirí dolaí agus d'úsáideoirí SDLE. Go háirithe, níor cheart ceangal a bheith ar an muirearóir dolaí aon sonraí atá íogair ó thaobh an tráchtála de a nochtadh d'aon cheann d'iomaitheoirí an tsoláthraí SDLE. Ba cheart méid agus cineál na sonraí a chuireann soláthraithe SDLE in iúl do mhuirearóirí dolaí, chun na críche dolaí a ríomh agus a chur i bhfeidhm nó chun na críche ríomh an dola arna chur i bhfeidhm ag soláthraithe SDLE ar fheithiclí na n-úsáideoirí SDLE a fhíorú, a choimeád chomh híseal agus is féidir.

(17)

Ba cheart ceangal a bheith ar sholáthraithe SDLE comhoibriú go hiomlán le muirearóirí dolaí lena n-iarrachtaí forfheidhmithe, sa chaoi go gcuirfear le héifeachtúlacht fhoriomlán na gcóras leictreonach dolaí bóthair. Dá bhrí sin, ba cheart cead a bheith ag muirearóirí dolaí, i gcás ina bhfuil amhras ann go raibh mainneachtain dola a íoc, a iarraidh ar an soláthraí SDLE sonraí a bhaineann leis an bhfeithicil agus le húinéir nó sealbhóir na feithicle arb é cliant an tsoláthraí SDLE é, ar choinníoll nach n-úsáidfear na sonraí sin chun aon chríche eile seachas chun críche forfheidhmithe.

(18)

Chun a chur ar chumas soláthraithe SDLE dul in iomaíocht, ar bhealach neamh-idirdhealaitheach, do gach cliant i bhfearann SDLE ar leith, tá sé tábhachtach an deis a thabhairt dóibh creidiúnú a fháil san fhearann sin sách luath ionas gur féidir leo seirbhísí a thairiscint do na húsáideoirí amhail ó chéad lá oibriúcháin an chórais dolaí.

(19)

Ba cheart do mhuirearóirí dolaí rochtain a thabhairt do sholáthraithe SDLE ar a bhfearann SDLE ar bhonn neamh-idirdhealaitheach.

(20)

Chun trédhearcacht agus rochtain neamh-idirdhealaitheach ar fhearainn SDLE do na soláthraithe SDLE ar fad a áirithiú, ba cheart do mhuirearóirí dolaí an fhaisnéis ar fad is gá a bhaineann le cearta rochtana a fhoilsiú i ráiteas fearainn SDLE.

(21)

Ba cheart na lacáistí nó na lascainí ar fad a thairgeann Ballstát nó muirearóir dolaí d'úsáideoirí TAB a bheith trédhearcach, fógartha go poiblí agus ar fáil faoi na coinníollacha céanna do chliaint na soláthraithe SDLE.

(22)

Ba cheart soláthraithe SDLE a bheith i dteideal cúiteamh cóir a fháil, a ríomhfaí ar bhonn modheolaíocht thrédhearcach, neamh-idirdhealaitheach agus chomhionann.

(23)

Ba cheart cead a bheith ag muirearóirí dolaí a asbhaint ó luach saothair na soláthraithe SDLE na costais iomchuí arna dtabhú chun na gnéithe den chóras leictreonach dolaí bóthair a bhaineann go sonrach le SDLE a sholáthar, a oibriú agus a chothabháil.

(24)

Ba cheart do sholáthraithe SDLE na dolaí ar fad atá le híoc ag a gcliaint a íoc leis an muirearóir dolaí. Níor cheart soláthraithe SDLE a bheith faoi dhliteanas, áfach, i leith dolaí nach bhfuil íoctha ag a gcliaint, i gcás ina bhfuil TAB ag na cliaint a bhfuil dearbhú tugtha ina leith don mhuirearóir dolaí gur TAB neamhbhailí é.

(25)

I gcás ina bhfuil róil eile ag eintiteas dlítheanach, ar soláthraí seirbhíse dolaí é, i gcóras leictreonach dolaí bóthair, nó ina bhfuil gníomhaíochtaí eile aige nach mbaineann go díreach le ríomhbhailiú dolaí, ba cheart ceangal a bheith air taifid chuntasaíochta a choinneáil lenar féidir idirdhealú soiléir a dhéanamh idir na costais agus an t-ioncam a bhaineann le soláthar na seirbhísí dolaí agus na costais agus an t-ioncam a bhaineann le gníomhaíochtaí eile, agus, arna iarraidh sin, faisnéis a sholáthar faoi na costais sin agus faoin ioncam sin a bhaineann le soláthar na seirbhísí dolaí don Chomhlacht Idir-Réitigh ábhartha nó don chomhlacht breithiúnach ábhartha. Níor cheart tras-fhóirdheontais idir na gníomhaíochtaí arna ndéanamh i ról an tsoláthraí seirbhíse dolaí agus gníomhaíochtaí eile a cheadú.

(26)

Ba cheart an deis a bheith ag úsáideoirí clárú le SDLE trí aon soláthraí SDLE, gan beann ar a náisiúntacht, ar an mBallstát cónaithe ná ar an mBallstát ina bhfuil an fheithicil cláraithe.

(27)

Chun íocaíocht dhúbailte a sheachaint agus chun deimhneacht dhlíthiúil a thabhairt d'úsáideoirí, ba cheart a mheas gur leor do sholáthraí SDLE dola a íoc chun oibleagáidí an úsáideora i leith an mhuirearóra dolaí ábhartha a chomhlíonadh.

(28)

Ba cheart a áirithiú sa chaidreamh conarthach idir muirearóirí dolaí agus soláthraithe SDLE, inter alia, go n-íoctar dolaí i gceart.

(29)

Ba cheart nós imeachta idirghabhála a bhunú d'fhonn díospóidí idir muirearóirí dolaí agus soláthraithe SDLE le linn caibidlíochtaí conarthacha agus ina gcaidreamh conarthach a réiteach. Muirearóirí dolaí agus soláthraithe SDLE atá ag lorg socrú díospóide a bhaineann leis an gceart go dtabharfaí rochtain neamh-idirdhealaitheach ar fhearainn SDLE, ba cheart dóibh dul i gcomhairle le Comhlachtaí Idir-réitigh Náisiúnta.

(30)

Ba cheart an chumhacht a bheith ag na Comhlachtaí Idir-réitigh a fhíorú go bhfuil na coinníollacha conarthacha arna bhforchur ar aon soláthraí SDLE neamh-idirdhealaitheach. Go háirithe, ba cheart an chumhacht a bheith acu a fhíorú go n-urramaíonn an luach saothair a thairgeann an muirearóir dolaí do na soláthraithe SDLE na prionsabail a leagtar amach sa Treoir seo.

(31)

Is ionann sonraí tráchta na n-úsáideoirí SDLE agus ionchur atá bunriachtanach chun feabhas a chur ar bheartais iompair na mBallstát. Ba cheart deis a bheith ag na Ballstáit, dá bhrí sin, sonraí den sórt sin a iarraidh ar soláthraithe seirbhíse dola, lena n-áirítear ar sholáthraithe SDLE chun na críche beartais tráchta a cheapadh agus feabhas a chur ar an mbainistiú tráchta nó le haghaidh úsáid neamhthráchtála eile ag an Stát, i gcomhréir leis na rialacha is infheidhme maidir le cosaint sonraí.

(32)

Tá gá le creat lena leagfar síos na nósanna imeachta maidir le soláthraithe SDLE a chreidiúnú d'fhearann SDLE agus lena n-áiritheofar rochtain chóir ar an margadh agus lena gcosnófar, san am céanna, an leibhéal seirbhíse leordhóthanach. Ba cheart a leagan amach go mionsonrach i ráiteas fearainn SDLE an nós imeachta chun soláthraí SDLE a chreidiúnú d'fhearann SDLE, agus go háirithe an nós imeachta chun an chomhréireacht le sonraíochtaí agus oiriúnacht úsáide na gcomhpháirteanna idir-inoibritheachta a sheiceáil. Ba cheart an nós imeachta a bheith mar an gcéanna do na soláthraithe SDLE ar fad.

(33)

Chun go mbeidh rochtain éasca ag gníomhaithe margaidh SDLE ar fhaisnéis, ba cheart ceangal a bheith ar na Ballstáit na sonraí tábhachtacha ar fad a bhaineann le SDLE a fhoilsiú i gcláir náisiúnta atá ar fáil go poiblí.

(34)

Chun dul chun cinn teicneolaíochta a éascú, tá sé tábhachtach go mbeadh an deis ag muirearóirí dolaí tástáil a dhéanamh ar theicneolaíochtaí nó coincheapa nua chun dolaí a bhailiú. Ba cheart na tástálacha sin a bheith teoranta, áfach, agus níor cheart ceangal a bheith ar sholáthraithe SDLE a bheith rannpháirteach iontu. Ba cheart an deis a bheith ag an gCoimisiún gan tástálacha den sórt sin a údarú más rud é go bhféadfaidís dochar a dhéanamh d'fheidhmiú cuí na ngnáthchóras leictreonach dolaí bóthair nó SDLE.

(35)

De dheasca éagsúlachtaí móra i sonraíochtaí teicniúla na gcóras leictreonach dolaí bóthair, d'fhéadfadh sé nach bhféadfaí idir-inoibritheacht na ndolaí leictreonacha ar fud AE a bhaint amach, agus, dá bhrí sin, go leanfaí leis an staid reatha ina mbíonn roinnt píosaí TAB ag teastáil ó úsáideoirí chun dolaí a íoc san Aontas. Tá drochthionchar ag an staid sin ar éifeachtúlacht na n-oibríochtaí iompair, ar chost-éifeachtúlacht na gcóras bailiúcháin dolaí, agus ar bhaint amach chuspóirí na mbeartas iompair. Ba cheart aghaidh a thabhairt, dá bhrí sin, ar na saincheisteanna is cúis leis an staid sin.

(36)

Cé go bhfuil feabhas ag teacht ar an idir-inoibritheacht trasteorann ar fud an Aontais, is é an cuspóir sa mheántéarma go dtí an fadtéarma go bhféadfaí taisteal trasna an Aontais le gan ach píosa amháin TAB. Dá bhrí sin, chun ualaí riaracháin agus costais ar úsáideoirí bóthair a sheachaint, tá sé tábhachtach go mbunódh an Coimisiún treochlár chun an cuspóir sin a bhaint amach, agus chun saorghluaiseacht daoine agus earraí san Aontas a éascú, gan tionchar diúltach a bheith aige sin ar an iomaíocht ar an margadh.

(37)

Is seirbhís mhargadhbhunaithe é SDLE agus, dá bhrí sin, níor cheart oibleagáid a bheith ar sholáthraithe SDLE a gcuid seirbhísí a sholáthar ar fud an Aontais. Chun leas na n-úsáideoirí, áfach, ba cheart do sholáthraithe SDLE gach fearann SDL in aon Bhallstát a chinneann siad a gcuid seirbhísí a sholáthar ann a chumhdach. Thairis sin, ba cheart don Choimisiún measúnú a dhéanamh i dtaobh an mbíonn sé de thoradh ar an tsolúbthacht a thugtar do sholáthraithe SDLE go ndéantar fearainn bheaga nó imeallacha SDLE a eisiamh ó SDLE, agus, má fhaigheann sé gurb é sin an toradh, ba cheart dó gníomhú i gcás inar gá.

(38)

Ba cheart cur síos mionsonrach a dhéanamh sa ráiteas fearainn SDLE ar na creatchoinníollacha tráchtála d'oibríochtaí na soláthraithe SDLE san fhearann SDLE lena mbaineann. Go háirithe, ba cheart cur síos a dhéanamh ann ar an modheolaíocht a úsáidtear chun luach saothair na soláthraithe SDLE a ríomh.

(39)

I gcás ina bhfuil córas leictreonach dolaí bóthair nua á sheoladh nó ina bhfuil córas atá ann cheana á mhodhnú go substaintiúil, ba cheart don mhuirearóir dolaí na ráitis fearainn SDLE atá nua nó tugtha cothrom le dáta a fhoilsiú agus fógra leordhóthanach tugtha aige chun gur féidir soláthraithe SDLE a chreidiúnú nó a athchreidiúnú don chóras, ar a dhéanaí, mí amháin roimh lá an tseolta oibriúcháin. Ba cheart don mhuirearóir dolaí an nós imeachta maidir le soláthraithe SDLE a chreidiúnú nó a athchreidiúnú, faoi seach, a cheapadh agus a leanúint ar bhealach lenar féidir an nós imeachta a thabhairt i gcrích, ar a dhéanaí, mí amháin roimh sheoladh oibriúcháin an chórais nua nó an chórais atá modhnaithe go substaintiúil. Ba cheart do mhuirearóirí dolaí cloí lena gcuid féin den nós imeachta atá beartaithe mar atá leagtha síos sa ráiteas fearainn SDLE.

(40)

Níor cheart do mhuirearóirí dolaí a iarraidh ná a cheangal ar sholáthraithe SDLE aon réitigh theicniúla shonracha a thabhairt a d'fhéadfadh an idir-inoibritheacht le fearainn SDLE eile agus le comhpháirteanna idir-inoibritheachta an tsoláthraí SDLE atá ann cheana a chur i mbaol.

(41)

Tá an deis ag SDLE na costais riaracháin agus na hualaí riaracháin atá ar oibreoirí agus tiománaithe idirnáisiúnta iompair de bhóthar a laghdú go suntasach.

(42)

Ba cheart cead a bheith ag soláthraithe SDLE sonraisc a eisiúint d'úsáideoirí SDLE. Ba cheart cead a bheith ag muirearóirí dolaí, áfach, a iarraidh go seolfaí sonraisc thar a gceann agus faoina n-ainm, toisc gur féidir impleachtaí díobhálacha riaracháin agus cánach a bheith ag an sonrascadh díreach faoi ainm an tsoláthraí SDLE, i bhfearainn áirithe SDLE.

(43)

Ba cheart do gach Ballstát ag a bhfuil dhá fhearann SDLE ar a laghad oifig teagmhála a ainmniú do sholáthraithe SDLE ar mian leo SDLE a sholáthar ina chríoch chun an teagmháil a bhíonn acu leis na muirearóirí dolaí a éascú.

(44)

Le haghaidh seirbhísí leictreonacha dolaí agus seirbhísí eile, amhail feidhmeanna córas cliste iompair atá comhoibritheach (CCI-C), úsáidtear teicneolaíochtaí comhchosúla agus bandaí minicíochta atá in aice a chéile i gcomhair cumarsáid ghearr-raoin ó fheithicil go feithicil agus ó fheithicil go bonneagar. Amach anseo, is fiú an fhéidearthacht a bhaineann le teicneolaíochtaí eile atá ag teacht chun cinn a úsáid i gcórais leictreonacha dolaí a fhiosrú, i ndiaidh measúnú críochnúil ar na costais, na tairbhí, na bacainní teicniúla agus na réitigh a d'fhéadfaí a úsáid ar na bacainní sin. Tá sé tábhachtach go gcuirfí bearta chun feidhme chun go gcosnófaí na hinfheistíochtaí atá déanta cheana i dteicneolaíocht mhicreathonnach 5,8 GHz ar chur isteach ó theicneolaíochtaí eile.

(45)

Gan dochar don dlí maidir le Státchabhair agus do dhlí na hiomaíochta, ba cheart cead a bheith ag na Ballstáit bearta a fhorbairt chun ríomhbhailiú agus ríomhbhilleáil dolaí a chur chun cinn.

(46)

Nuair a dhéanfaidh comhlachtaí caighdeánaithe athbhreithniú ar na caighdeáin ábhartha maidir le SDLE, ba cheart socruithe iomchuí idirthréimhse a bheith ann chun leanúnachas SDLE a áirithiú agus chun a áirithiú gur comhoiriúnach, do na córais dolaí, na comhpháirteanna idir-inoibritheachta atá in úsáid cheana féin tráth an athbhreithnithe ar na caighdeáin.

(47)

Ba cheart do SDLE ligean don idirmhódúlacht teacht chun cinn, agus na prionsabail “íoc mar a úsáidtear” agus “íoc mar a thruaillítear” á saothrú ag an am céanna.

(48)

De dheasca na bhfadhbanna a bhaineann le ciontóirí neamhchónaitheacha i gcoinne córais leictreonacha dolaí bóthair a shainaithint, cuirtear bac ar fhorbairt thuilleadh córas den sórt sin agus ar chur i bhfeidhm níos fairsinge na bprionsabal “íoc mar a úsáidtear” agus “íoc mar a thruaillítear” ar bhóithre an Aontais agus is gá, dá bhrí sin, teacht ar bhealach chun na daoine sin a shainaithint agus chun a gcuid sonraí pearsanta a phróiseáil.

(49)

Ar chúiseanna comhsheasmhachta agus úsáide éifeachtúla acmhainní, ba cheart na huirlisí céanna a úsáid sa chóras malartaithe faisnéise faoi dhaoine nach n-íocann dola, agus faoina bhfeithiclí, agus a úsáidtear sa chóras malartaithe faisnéise faoi chionta tráchta a bhaineann le sábháilteacht ar bhóithre dá bhforáiltear i dTreoir (AE) 2015/413 ó Pharlaimint na hEorpa agus ón gComhairle (5).

(50)

I mBallstáit áirithe, ní chinntear gur mainneachtain a bhí ann dola a íoc go dtí go dtugtar fógra don úsáideoir faoin oibleagáid an dola a íoc. Toisc nach ndéanfar comhchuibhiú leis an Treoir seo ar na dlíthe náisiúnta ina leith sin, ba cheart an deis a bheith ag na Ballstáit an Treoir seo a chur i bhfeidhm chun úsáideoirí agus feithiclí a shainaithint chun na críche fógra a thabhairt. Níor cheart an cur i bhfeidhm leathnaithe sin a cheadú, áfach, ach amháin má chomhlíontar coinníollacha áirithe.

(51)

Níl na himeachtaí leantacha a thionscnaítear tar éis mainneachtain dola a íoc comhchuibhithe ar fud an Aontais. Is minic a thugtar an deis don úsáideoir bóthair sainaitheanta an dola atá dlite, nó méid socraithe ina ionad, a íoc go díreach leis an eintiteas atá freagrach as an dola a thobhach, sula gcuirfidh údaráis na mBallstát tús le haon imeachtaí breise riaracháin nó coiriúla. Tá sé tábhachtach go mbeadh nós imeachta éifeachtúil chun deireadh a chur leis an mainneachtain dola a íoc ar fáil faoi théarmaí comhchosúla do gach úsáideoir bóthair. Chun na críche sin, ba cheart cead a bheith ag na Ballstáit a chur ar fáil don eintiteas atá freagrach as an dola a thobhach na sonraí is gá chun an fheithicil ar ina leith a mainníodh dola a íoc agus chun úinéir nó sealbhóir na feithicle a shainaithint, ar choinníoll go n-áiritheofaí go dtabharfaí cosaint chuí do shonraí pearsanta. Sa chomhthéacs sin, ba cheart do na Ballstáit a áirithiú go gcuirfí deireadh leis an mainneachtain dola a íoc dá gcomhlíonfaí an t-ordú íocaíochta arna eisiúint ag an eintiteas lena mbaineann.

(52)

I mBallstáit áirithe, meastar gur mainneachtain dola a íoc é easpa nó mífheidhmiú TAB i gcás nach féidir dolaí den sórt sin a íoc ach le TAB.

(53)

Ba cheart do na Ballstáit an fhaisnéis agus na sonraí is gá a thabhairt don Choimisiún chun meastóireacht a dhéanamh ar éifeachtacht agus ar éifeachtúlacht an chórais malartaithe faisnéise faoi dhaoine nach n-íocann dola. Ba cheart don Choimisiún measúnú a dhéanamh ar na sonraí agus ar an bhfaisnéis arna bhfáil, agus leasuithe ar an Treoir seo a mholadh, más gá.

(54)

Agus é ag déanamh anailís ar na bearta a d'fhéadfaí a dhéanamh chun forfheidhmiú trasteorann na hoibleagáide dolaí a íoc san Aontas a éascú tuilleadh, ba cheart don Choimisiún measúnú a dhéanamh ina thuarascáil freisin ar an ngá atá le cúnamh frithpháirteach idir na Ballstáit.

(55)

Tá próiseáil sonraí pearsanta i gceist le forfheidhmiú na hoibleagáide dolaí a íoc, le sainaithint na feithicle agus sainaithint úinéir agus shealbhóir na feithicle ar cinneadh ina leith gur mainneachtain a bhí ann dola a íoc agus le bailiú na faisnéise faoin úsáideoir chun a áirithiú go gcomhlíonann an muirearóir dolaí a chuid oibleagáidí i leith na n-údarás cánach. Is gá próiseáil den sórt sin a dhéanamh i gcomhréir le rialacha an Aontais, mar a leagtar amach, inter alia, i Rialachán (AE) 2016/679 ó Pharlaimint na hEorpa agus ón gComhairle (6), i dTreoir (AE) 2016/680 ó Pharlaimint na hEorpa agus ón gComhairle (7) agus i dTreoir 2002/58/CE ó Pharlaimint na hEorpa agus ón gComhairle (8). Aithnítear go sainráite in Airteagal 8 de Chairt um Chearta Bunúsacha an Aontais Eorpaigh an ceart go ndéanfar sonraí pearsanta a chosaint.

(56)

Ní dhéanann an Treoir seo difear do shaoirse na mBallstát rialacha a leagan síos lena rialaítear muirir ar úsáid bonneagair bóthair agus cúrsaí cánachais.

(57)

Chun malartú trasteorann faisnéise faoi na feithiclí agus úinéirí nó sealbhóirí feithiclí lenar bhain mainneachtain dolaí a íoc a éascú, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (CFAE) a tharmligean chuig an gCoimisiún i dtaca le hIarscríbhinn I a leasú chun athruithe i ndlí an Aontais a léiriú. Ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún freisin i dtaca leis na mionsonraí a leagan síos chun feithiclí a aicmiú chun críocha na scéimeanna taraifí is infheidhme a bhunú, le hoibleagáidí na n-úsáideoirí SDLE a shainiú tuilleadh maidir le sonraí a sholáthar don soláthraí SDLE agus úsáid agus láimhseáil an TAB, leis na ceanglais a leagan síos le haghaidh comhpháirteanna idir-inoibritheachta maidir le sábháilteacht agus sláinte, iontaofacht agus infhaighteacht, caomhnú an chomhshaoil, comhoiriúnacht theicniúil, slándáil agus príobháideacht agus oibriú agus bainistiú, leis na ceanglais ghinearálta bonneagair a leagan síos le haghaidh comhpháirteanna idir-inoibritheachta agus leis na critéir íosta incháilitheachta a leagan síos le haghaidh comhlachtaí dá dtugtar fógra. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (9). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(58)

Chun an Treoir seo a chur chun feidhme, is gá coinníollacha aonfhoirmeacha maidir le cur i bhfeidhm na sonraíochtaí teicniúla agus riaracháin chun na nósanna imeachta lena mbaineann gníomhaithe SDLE agus na comhéadain eatarthu a imlonnú sna Ballstáit, sa chaoi go n-éascófar an idir-inoibritheacht agus go n-áiritheofar go rialófar na margaí náisiúnta bailiúcháin dolaí le rialacha comhionanna. Chun coinníollacha aonfhoirmeacha a áirithiú maidir leis an Treoir seo a chur chun feidhme agus chun na sonraíochtaí teicniúla agus riaracháin sin a shainiú, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (10).

(59)

Níor cheart gur dochar an Treoir seo d'oibleagáidí na mBallstát maidir leis an teorainn ama chun an Treoir a leagtar amach i gCuid B d'Iarscríbhinn V a thrasuí sa dlí náisiúnta.

(60)

Leis an Treoir seo, urramaítear na cearta bunúsacha agus comhlíontar na prionsabail a aithnítear i gCairt um Chearta Bunúsacha an Aontais Eorpaigh, go háirithe cosaint sonraí pearsanta.

(61)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 28(2) de Rialachán (CE) Uimh. 45/2001 ó Pharlaimint na hEorpa agus ón gComhairle (11),