European flag

Iris Oifigiúil
an Aontais Eorpaigh

GA

Sraith C


C/2026/1343

16.3.2026

Caingean arna tabhairt an 2 Feabhra 2026 – an Ungáir v Parlaimint na hEorpa agus Comhairle an Aontais Eorpaigh

(Cás C-46/26)

(C/2026/1343)

Teanga an cháis: an Ungáiris

Páirtithe

Iarratasóir: An Ungáir (ionadaithe: Z. Fehér agus Cs. Marosvári, Gníomhairí)

Cosantóir: Parlaimint na hEorpa agus Comhairle an Aontais Eorpaigh

An t-ordú atá á lorg

Iarrann an Ungáir ar an gCúirt Bhreithiúnais:

—

Rialachán (AE) 2026/261 ó Pharlaimint na hEorpa agus ón gComhairle an 26 Eanáir 2026 maidir le deireadh a chur de réir a chéile le hallmhairí gáis nádúrtha ón Rúis agus ullmhú chun deireadh a chur de réir a chéile le hallmhairí ola ón Rúis, feabhas a chur ar an bhfaireachán ar spleáchais fuinnimh a d’fhéadfadh a bheith ann, agus lena leasaítear Rialachán (AE) 2017/1938 (1).

—

A ordú do Pharlaimint na hEorpa agus do Chomhairle an Aontais Eorpaigh na costais a íoc.

Saincheisteanna dlí agus príomhargóintí

Mar thaca leis an gcaingean, maíonn an t-iarratasóir ceithre shaincheist dlí.

An chéad saincheist dlí: Rogha mhícheart an bhoinn dhlíthiúil.

Is iad Airteagal 194(2) CFAE agus Airteagal 207 CFAE bunús dlí an Rialacháin.

Ní fhéadfaidh Airteagal 207 CFAE a bheith ina bhunús dlí ach do ghníomhartha reachtacha ina saineofar an creat chun an comhbheartas tráchtála a chur chun feidhme amháin nó nach bhfuil a n-éifeachtaí ar an trádáil tánaisteach. Ní thagann croílár an Rialacháin, ag féachaint go háirithe dá aidhm agus dá ábhar, faoi réimse na rialála trádála, ach faoi réimse na mbeart sriantach faoi Airteagal 215 CFAE, ós rud é nach é trádáil an gháis nádúrtha a rialáil is phríomhchuspóir don Rialachán, ach go gceanglaítear leis go gcuirfí isteach ar an gcaidreamh tráchtála le tríú stát i réimse an gháis nádúrtha, agus is é sin an fáth ar cheart gurbh ar bhonn Airteagal 215 CFAE a glacadh é seachas ar bhonn Airteagal 207 CFAE.

And dara saincheist dlí: Sárú ar Airteagal 194(2) CFAE.

Ní féidir le gníomhartha reachtacha a ghlactar faoi Airteagal 194(2) TFEU difir a dhéanamh do cheart na mBallstát na coinníollacha a chinneadh maidir lena n-acmhainní fuinnimh a shaothrú, dá rogha idir fhoinsí éagsúla fuinnimh agus do struchtúr ginearálta a soláthair fuinnimh. Is féidir an fhoráil sin a mheas mar theorainn a bheith á cur ar chumhachtaí.

Leis an rialachán, cuirtear toirmeasc ar ghás píblíne agus gás nádúrtha leachtaithe ó Chónaidhm na Rúise nó a onnmhairítear uaithi a allmhairiú. Is é fíoréifeacht an toirmisc sin ná a chur d’oibleagáid ar an Ungáir measúnú a dhéanamh ar an bhféidearthacht foinsí eile fuinnimh a thabhairt isteach agus struchtúr ginearálta a soláthair fuinnimh a athstruchtúrú. Dá bhrí sin, sáraítear Airteagal 194(2) CFAE leis an Rialachán.

An tríú saincheist dlí: Sárú ar phrionsabal na dlúthpháirtíochta i réimse an bheartais fuinnimh.

De bhun Airteagal 194(1) den CFAE, ní mór don dlúthpháirtíocht idir na Ballstáit a bheith éifeachtach freisin i réimse an bheartais fuinnimh. Faoi phrionsabal na dlúthpháirtíochta i réimse an bheartais fuinnimh, ceanglaítear ar institiúidí an Aontais scrúdú a dhéanamh an ndéanann beart nó gníomh ar leith dochar do leasanna fuinnimh na mBallstát éagsúil agus, má dhéanann, an dochar sin a chur ar a chothrom le leasanna na mBallstát eile agus an Aontais Eorpaigh ina iomláine. Agus an Rialachán á ghlacadh acu, theip ar institiúidí an Aontais gníomhú ar an gcaoi sin, agus dá réir rinne siad sárú ar phrionsabal na dlúthpháirtíochta i réimse an bheartais fuinnimh.

An ceathrú saincheist dlí: Sárú ar phrionsabal na comhréireachta.

Ceanglaítear le prionsabal na comhréireachta, i gcás go bhfuil bearta iomchuí éagsúla ann, nach mór dul ar iontaoibh an bhirt is lú ualach agus nár cheart na míbhuntáistí a eascraíonn as a bheith díréireach leis na cuspóirí a shaothraítear.

Níl an cuspóir a shaothraítear leis an Rialachán comhréireach leis an dochar a dhéantar do Bhallstáit amhail an Ungáir, a bhfuil a soláthar gáis nádúrtha fós ag brath go mór ar ghás na Rúise. Ina theannta sin, d’fhéadfaí an cuspóir atá á shaothrú leis an Rialachán a bhaint amach le bearta nach bhfuil chomh sriantach sin.


(1)   IO L 2026/261, 02.02.2026.


ELI: http://data.europa.eu/eli/C/2026/1343/oj

ISSN 1977-107X (electronic edition)