European flag

Iris Oifigiúil
an Aontais Eorpaigh

GA

Sraith L

2026/1885

30.7.2026

CINNEADH (CBES) 2026/1885 ÓN gCOMHAIRLE

an 30 Iúil 2026

lena leasaítear Cinneadh 2010/413/CBES a bhaineann le bearta sriantacha i gcoinne na hIaráine

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, agus go háirithe Airteagal 29 de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

An 26 Iúil 2010, ghlac an Chomhairle Cinneadh 2010/413/CBES (1).

(2)

An 29 Meán Fómhair 2025, tar éis na bearta sriantacha a bhaineann leis na Náisiúin Aontaithe a bheith ath-fhorchurtha ar an Iaráin, i gcomhréir le Rún 2231 (2015) ó Chomhairle Slándála na Náisiún Aontaithe, ghlac an Chomhairle Cinneadh (CBES) 2025/1972 (2) lenar leasaíodh Cinneadh 2010/413/CBES chun bearta sriantacha uathrialacha uile an Aontais ar an Iaráin a cuireadh ar fionraí nó a foirceannadh faoin bPlean Cuimsitheach Comhpháirteach Gníomhaíochta a ath-fhorchur.

(3)

I bhfianaise na n-ábhar imní atá ann i gcónaí, chinn an Chomhairle duine amháin agus eintiteas amháin a chur le liosta na ndaoine agus na n-eintiteas a liostaítear in Iarscríbhinn II a ghabhann le Cinneadh 2010/413/CBES.

(4)

Ba cheart, dá bhrí sin, Cinneadh 2010/413/CBES a leasú dá réir sin,

TAR ÉIS AN CINNEADH SEO A GHLACADH:

Airteagal 1

Leasaítear Iarscríbhinn II a ghabhann le Cinneadh 2010/413/CBES i gcomhréir leis an Iarscríbhinn a ghabhann leis an gCinneadh seo.

Airteagal 2

Tiocfaidh an Cinneadh seo i bhfeidhm ar dháta a fhoilsithe in Iris Oifigiúil an Aontais Eorpaigh.

Arna dhéanamh sa Bhruiséil, an 30 Iúil 2026.

Thar ceann na Comhairle

An tUachtarán

T. BYRNE

(1)  Cinneadh 2010/413/CBES ón gComhairle an 26 Iúil 2010 a bhaineann le bearta sriantacha i gcoinne na hIaráine agus lena n-aisghairtear Comhsheasamh 2007/140/CBES (IO L 195, 27.7.2010, lch. 39, ELI: http://data.europa.eu/eli/dec/2010/413/oj).

(2)  Cinneadh (CBES) 2025/1972 ón gComhairle an 29 Meán Fómhair 2025 lena leasaítear Cinneadh 2010/413/CBES a bhaineann le bearta sriantacha i gcoinne na hIaráine (IO L, 2025/1972, 29.9.2025, ELI: http://data.europa.eu/eli/dec/2025/1972/oj)

IARSCRÍBHINN

Leasaítear Iarscríbhinn II a ghabhann le Cinneadh 2010/413/CBES mar a leanas:

(1)

faoin gceannteideal ‘I. Daoine agus eintitis a bhfuil baint acu le gníomhaíochtaí núicléacha nó le gníomhaíochtaí diúracán balaistíoch agus daoine agus eintitis a thugann tacaíocht do Rialtas na hIaráine.’, fo-cheannteideal ‘A. Daoine’, cuirtear isteach an iontráil seo a leanas:

 

Ainm

Faisnéis aitheantais

Cúiseanna

Dáta an liostaithe

‘57.

Ali ANSARI

ar a dtugtar freisin Ali Akbar ANSARI

Feidhm: Pearsa gnó

Dáta breithe: 26.12.1968

Náisiúntacht: Iaránach

Inscne: fireann

Is pearsa gnó Iaránach agus iar-úinéir Bank Ayandeh agus Iran Mall é Ali Ansari.

Trí líonra cuideachtaí, úsáideann Ali Ansari bealaí baincéireachta eachtracha chun cistí a aistriú thar lear. Tagann na cistí sin go páirteach ó dhíolacháin ola na hIaráine. Is foinse shuntasach chistiúcháin í earnáil ola na hIaráine d’arm na hIaráine agus do mCór Gharda na Réabhlóide Ioslamaí (IRGC).

Ina theannta sin, trí líonra cuideachtaí, faigheann Ali Ansari sócmhainní substaintiúla, lena n-áirítear réadmhaoin san Aontas agus sa Ríocht Aontaithe, thar ceann daoine a bhfuil baint acu le ceannaireacht na hIaráine, lena n-áirítear an Ceannaire Uachtarach Mojtaba Khamenei.

Dá bhrí sin, tugann Ali Ansari tacaíocht do Rialtas na hIaráine.

30.7.2026’;

(2)

faoin gceannteideal ‘I. Daoine agus eintitis a bhfuil baint acu le gníomhaíochtaí núicléacha nó le gníomhaíochtaí diúracán balaistíoch agus daoine agus eintitis a thugann tacaíocht do Rialtas na hIaráine.’, fo-cheannteideal ‘B. Eintitis’, cuirtear isteach an iontráil seo a leanas:

 

Ainm

Faisnéis aitheantais

Cúiseanna

Dáta an liostaithe

‘204.

MAPNA Group

Seoladh: No. 231, Mirdamad Blvd., 1918953651, Tehran, an Iaráin

Uimhir chlárúcháin: 99134

Uimhir aitheantais náisiúnta: 10101431259

Cód eacnamaíoch: 411111477788

Suíomh gréasáin: www.mapnagroup.com

Is príomhghníomhaí é MAPNA Group in earnáil fuinnimh, ola agus gáis na hIaráine. Tá sé faoi úinéireacht nó faoi rialú Aireacht Fuinnimh na hIaráine, atá liostaithe ag an Aontas.

I gcomhar le gníomhaithe Stáit agus eintitis atá faoi úinéireacht Stáit, amhail Ministry of Petroleum (an Aireacht Pheitriliam) agus National Iranian Oil Company, tá baint ag MAPNA Group le taiscéalaíocht a dhéanamh ar gháscheantair agus ar olacheantair agus, dá bhrí sin, cuireann sé le hioncam ola na hIaráine. Leithdháiltear cuid shuntasach den ioncam sin ar na fórsaí armtha, lena n-áirítear Cór Gharda na Réabhlóide Ioslamaí (IRGC), agus An Eagraíocht um Nuálaíocht agus Taighde i réimse na Cosanta (SPND).

Dá bhrí sin, tugann MAPNA Group tacaíocht do Rialtas na hIaráine. Ina theannta sin, tugann MAPNA Group tacaíocht do ghníomhaíochtaí núicléacha na hIaráine atá íogair ó thaobh an leata de.

30.7.2026’.

ELI: http://data.europa.eu/eli/dec/2026/1885/oj

ISSN 1977-0839 (electronic edition)