(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú. Le hAirteagal 10(2) den Rialachán sin foráiltear maidir le hathmheastóireacht a dhéanamh ar bhreiseáin a údaraíodh de bhun Threoir 70/524/CEE ón gComhairle (2).

(2)

Le Rialachán (CE) Uimh. 1464/2004 ón gCoimisiún (3), údaraíodh ullmhóid arb é atá inti naraisin (Monteban G100) (‘an ullmhóid’) ar feadh 10 mbliana i gcomhréir le Treoir 70/524/CEE mar bhreiseán beathaithe le haghaidh sicíní lena ramhrú. Ina dhiaidh sin cuireadh an ullmhóid sin i gClár na mbreiseán beathaithe mar tháirge a bhí ann cheana, i gcomhréir le hAirteagal 10(1), pointe (b) de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh isteach iarratas ar údarú na hullmhóide mar bhreiseán beathaithe le haghaidh sicíní lena ramhrú. D’iarr an t-iarratasóir go n-aicmeofaí an breiseán sin sa chatagóir breiseán ‘coicideastait agus histeamonastait’. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 3 Deireadh Fómhair 2018 (4), an 30 Eanáir 2024 (5) agus an 28 Eanáir 2026 (6) go bhfuil an ullmhóid sábháilte do na spriocspeicis, agus do thomhaltóirí agus don chomhshaol, nuair a úsáidtear í i gcás sicíní lena ramhrú ag 70 mg/kg de bheatha. Chuir sé i dtábhacht go bhfuil naraisin tocsaineach do chapaill, turcaithe agus coiníní ar leibhéil faoi bhun na leibhéal a úsáidtear chun coiciodóis i sicíní a chosc agus gur fritásctha é úsáid na hullmhóide go comhuaineach le drugaí antaibheathacha áirithe (e.g. tiamúilin). Tháinig an tÚdarás ar an gconclúid freisin gur greannaitheoir súl í an ullmhóid ach nach greannaitheoir craicinn í, go bhféadfadh sí íogrú craicinn a spreagadh agus go mbeadh riosca ag baint le nochtadh ionanálaithe do dhaoine a láimhseálann an breiseán. Tháinig an tÚdarás ar an gconclúid thairis sin go bhfuil úsáid na hullmhóide ag 60 mg/kg de bheatha éifeachtúil chun coiciodóis i sicíní lena ramhrú a rialú. Mheas sé go bhfuil gá le ceanglais shonracha maidir le faireachán iarmhargaidh, agus mhol sé go ndéanfaí faireachán allamuigh ar fhrithsheasmhacht Eimeria spp. in aghaidh naraisine, le linn na coda deiridh den tréimhse údarúcháin más féidir. D’fhíoraigh sé freisin an tuarascáil ar na modhanna anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann an ullmhóid na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh sicíní lena ramhrú. Is iomchuí foráil a dhéanamh maidir le faireachán iarmhargaidh ar fhrithsheasmhacht Eimeria spp. in aghaidh naraisine. Is iomchuí foráil a dhéanamh maidir lena sonrú sna treoracha i dtaca le húsáid go bhfuil an breiseán contúirteach le haghaidh speicis áirithe agus gur féidir a úsáid chomhuaineach le substaintí íocshláinte áirithe a bheith fritásctha. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Ós rud é nach bhfuil gá leis na modhnuithe ar choinníollacha údaraithe na hullmhóide a chur i bhfeidhm láithreach ar chúiseanna sábháilteachta, is iomchuí foráil a dhéanamh maidir le hidirthréimhse do na páirtithe leasmhara ionas gur féidir leo iad féin a ullmhú chun na ceanglais nua a chomhlíonadh a eascraíonn as an údarú.

(7)

Mar thoradh ar údarú na hullmhóide mar bhreiseán beathaithe le haghaidh sicíní lena ramhrú, ba cheart Rialachán (CE) Uimh. 1464/2004 a aisghairm.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,