(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú agus a athnuachan.

(2)

Le Rialachán Cur Chun Feidhme (AE) 2015/722 ón gCoimisiún (2), údaraíodh táirín ar feadh 10 mbliana mar bhreiseán beathaithe le haghaidh Canidae, Felidae, Mustelidae agus éisc fheoiliteacha.

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach chun údarú ullmhóide arb é atá inti táirín mar bhreiseán beathaithe a athnuachan le haghaidh Canidae, Felidae, Mustelidae agus éisc fheoiliteacha, agus chun úsáid nua a údarú in éanlaith chlóis agus i speicis mhucúla, inar iarradh go n-aicmeofaí an breiseán i gcatagóir na mbreiseán ‘breiseáin chothaitheacha’ agus san fheidhmghrúpa ‘vitimíní, próivitimíní agus substaintí atá dea-shainithe ó thaobh ceimiceán de, a bhfuil éifeacht chomhchosúil acu’. Bhí na sonraí agus na doiciméid a cheanglaítear faoi Airteagal 14(2) de Rialachán (CE) Uimh. 1831/2003 ag gabháil leis an iarratas sin. Tharraing an t-iarratasóir siar an t-iarratas ina dhiaidh sin maidir le héanlaith chlóis agus speicis mhucúla.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 24 Meitheamh 2025 (3) gur sholáthair an t-iarratasóir fianaise go bhfuil an ullmhóid arb é atá inti táirín fós sábháilte le haghaidh Canidae, Felidae, Mustelidae, éisc fheoiliteacha, agus le haghaidh na dtomhaltóirí agus an chomhshaoil faoi na coinníollacha a údaraítear faoi láthair. Thug an t-údarás le fios go bhfuil leibhéil táirín 0,05 % – 0,25 % i mbeatha iomlán sábháilte do chait, agus lamháil sábháilteachta idir 4 agus 20 i gceist. Ar bhonn an tacair theoranta sonraí atá ar fáil ón litríocht maidir le héisc eite fheoiliteacha, measadh go bhfuil leibhéil idir 2,0 % agus 2,5 % sábháilte. I gcás na speiceas eile, tháinig an tÚdarás ar an gconclúid go nglactar le leibhéil táirín suas le 0,2 % i mbeatha iomlán, ach níorbh fhéidir lamháil sábháilteachta a sholáthar. Tháinig an tÚdarás ar an gconclúid freisin gur greannaitheoir craicinn agus súl é táirín, agus gur íogróir craicinn agus riospráide é. Meastar go bhfuil riosca ag baint le haon nochtadh don tsubstaint sin. Luaigh an tÚdarás nach n-áirítear san iarratas ar athnuachan an údaraithe togra maidir le coinníollacha an údaraithe bunaidh a leasú ná a fhorlíonadh, ar togra é a mbeadh tionchar aige ar éifeachtúlacht an bhreiseáin. Dá bhrí sin, tháinig sé ar an gconclúid freisin nach gá measúnú a dhéanamh ar éifeachtúlacht an bhreiseáin i gcomhthéacs na hathnuachana ar an údarú. Mheas an tÚdarás nach bhfuil gá le ceanglais shonracha maidir le faireachán iarmhargaidh.

(5)

Maidir leis na conclúidí agus na moltaí ar ar thángthas le linn an mheasúnaithe a rinneadh i ndáil leis an modh a úsáidtear chun anailís a dhéanamh ar tháirín mar bhreiseán beathaithe i gcomhthéacs an údaraithe roimhe seo, ba é meas na Saotharlainne Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. I gcomhréir le hAirteagal 5(4), pointe (c), de Rialachán (CE) Uimh. 378/2005 ón gCoimisiún (4), níl gá leis an tuarascáil mheastóireachta ón tSaotharlann Tagartha dá bhrí sin.

(6)

I bhfianaise an mhéid thuas, measann an Coimisiún go gcomhlíonann an ullmhóid arb é atá inti táirín na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan. Measann an Coimisiún nárbh fhéidir lamháil sábháilteachta a sholáthar i gcás Canidae, Mustelidae, éisc eite fheoiliteacha agus speicis uisceacha fheoiliteacha eile, seachas mamaigh, agus dá bhrí sin is gá uaschion a shocrú le haghaidh na speiceas sin. Ós rud é nach féidir rialú éifeachtach a dhéanamh chun a áirithiú go gcomhlíonfar an t-uaschion nuair a úsáidtear an breiseán go comhuaineach in uisce agus i mbeatha, níor cheart a úsáid in uisce a cheadú ach amháin i gcás Felidae. I ndáil leis na speicis agus na catagóirí ainmhithe, measann an Coimisiún gur cumhdaíodh leis an údarú roimhe seo, faoin téarma cineálach ‘iasc,’ gach speiceas uisceach, seachas mamaigh. Tá staidéir ann ar speicis éagsúla crústach agus moileasc a n-éilítear táirín ina leith agus níl aon riosca ag baint le táirín a údarú i gcás na speiceas sin (5). Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc. Ba cheart na bearta cosanta sin a bheith gan dochar do cheanglais eile sábháilteachta oibrithe faoi dhlí an Aontais.

(7)

Mar thoradh ar údarú na hullmhóide táirín a athnuachan mar bhreiseán beathaithe, ba cheart Rialachán Cur Chun Feidhme (AE) 2015/722 a aisghairm.

(8)

Le Rialachán Cur Chun Feidhme (AE) 2015/722 foráiltear go gceadaítear táirín a chur ar an margadh agus a úsáid mar bhreiseán atá comhdhéanta d’ullmhóid, ach go hearráideach níor sonraíodh comhdhéanamh na hullmhóide sin i dtéarmaí an údaraithe. Ba cheart foráil a dhéanamh maidir le tuairisc níos cruinne ar tháirín a údaraítear mar ullmhóid ag tiúchaintí 97 %, trí chomhdhéanamh an bhreiseáin a údaraítear mar ullmhóid a shonrú. Ina theannta sin, ós rud é go leagtar amach uaschion an bhreiseáin le haghaidh Canidae, Mustelidae agus éisc eite fheoiliteacha agus speicis uisceacha fheoiliteacha eile, seachas mamaigh, is iomchuí foráil a dhéanamh maidir le hidirthréimhse do na páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(9)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,